1 తయ్యియఁ ఓడె తంగిస్కతెరి, నాను మీ దరి వాహఁ డుగమని మహపురు సొత్తొతి మిమ్మఅఁ జాప్హతటి హారెఎ హాడ్డకత్త ఇచ్చివ హారెఎ తెల్వితొల్లె ఇచ్చివ జాప్హజొఒఁ. 2 నాను, మీతొల్లె మచ్చి బేలత జీసు క్రీస్తుఇఁ ఇచ్చిహిఁ, సిలువత వేతి జీసు క్రీస్తుఇఁ పిస్పె, ఓడె ఏనఅఁతివ మీ మద్ది పునఅపెఎఁ ఇంజిహిఁ ఒణ్పుకొడ్డితెఎఁ. 3 ఓడె బల్మిహిల్లఅనా, అజ్జిహిఁ, డగ్గిహిఁ, మీ మద్ది మచ్చెఎఁ. 4 ఏదఅఁతక్కి నాను జోలితివ, నెహిఁకబ్రు వెస్తివ, తెల్వి తొల్లె అండితి డుక్హి హాడ్డయఁ జోలఅనా, సుద్దుజీవు మహపురుతి సొక్తితి లేంబితెఎఁ. 5 మీ నమ్ముతి మణిసియఁ తెల్విత ఇట్టఅన, మహపురు సొక్తిత ఇట్టదు ఇంజిహిఁ నా ఒణ్పు.

6 పూర్తి నెహిఁకిఁ పడ్డఆతి బుద్దిగట్టరి మద్ది తెల్విగట్టి కబ్రు జాప్హినొమి, ఇంజఁ ఇది ఈ తాడెపురుతి తెల్వి ఆఎ, కాడెఎ ఆహఁ హాని ఈ తాడెపురుతి హుక్కొమి గట్టరి తెల్వి ఆఎ. 7 నాను వెస్సిమన్ని తోంజఆఅగట్టి మహపుతి తెల్వి, ఈ తోంజఆఅగట్టి తెల్వితి మహపురు ఈ తాడెపురు ఆరొమి ఆఅమచ్చి తొల్లిఎ మా గౌరొమి కోసొమి ఇట్టమన్నెసి. 8 ఎదణితి పాయిఁ ఈ తాడెపురుత పాడాఅతి హుక్కొమి గట్టరి అంబఅరివ పునొఒరి. ఎదణితి ఏవరి పుంజమచ్చిహిమ గౌరొమి వాణగట్టి ప్రెబుఇఁ సిలువత వేఅతెరిమ. 9 ఇదఅఁతి పాయిఁ

"మహపురు తనఅఁ జీవునోనరి కోసొమి ఏనఅఁ తెయ్యరకిహనెసి ఏవి

కన్నుతక్కి తోంజ ఆహలఉ, క్రియుఁత వేంగాలఉ,

మణిసియఁ హిఁయఁత ఒణ్పువాహాలెఎ," ఇంజిహిఁ రాస్కిఆహామన్నె.

10 మంగె ఇచ్చిహిఁ మహపురు తన్ని జీవుతొల్లె పుఁణ్బి కిహిమంజనెసి; ఏ సుద్దుజీవు బర్రె డుగమని మహపురు కత్తతి పున్నఅతి కత్తాణి డెప్నెసి. 11 రో మణిసి ఒణ్పుయఁ ఏ మణిసి హిఁయఁ తకిఎదెహెఁ సమ్మ ఎట్కతసి ఏనికిహిఁ పున్నెసి? ఎల్లెకిఎ మహపురుతి ఒణ్పుయఁ సుద్దుజీవుతక్కి పిస్పె ఓడె ఎంబఅరివ పునొఒరి. 12 మహపురు మంగె ఉజ్జెఎ హియ్యతఅఁతి పుంజకొడ్డలితకి మారొ తాడెపురుతి జీవుతి ఆఎ మహపురు తాణటి వాతి సుద్దుజీవుతి బెట్ట ఆహమనయి.

13 ఏవఅఁతి మాంబు మణిసి తెల్వి జాప్హలిఆడ్డిని హాడ్డ తొల్లె ఆఅన, సుద్దుజీవుతక్కి పాడఆతి కత్తయఁణి సుద్దుజీవుతక్కి పాడఆతఅఁతొల్లె సొమన సినికిహిఁ, సుద్దుజీవు జాప్హని హాడ్డయఁ తొల్లె మాంబు వెస్సినొమి. 14 తాడెపురుతక్కి పాడఆతి మణిసి సుద్దుజీవుతి కత్తాణి ఓపొఒసి, ఏవి ఏవణికి తెల్వి హిల్లఅ గట్టఇలెహెఁ తోంజఆహిను, ఏవఅఁతి మహపురుజీవు తొల్లెఎదెఁ పుంజలి ఆడ్డినయిఁ. ఏదఅఁతక్కి సుద్దుహిల్లఅగట్టసి పుంజలి ఆడ్డొఒసి. 15 సుద్దుజీవుతక్కి పాడఆతసి బర్రెతి పుంజలి ఆడ్డినెసి సమ్మ ఏవణఇఁ అంబఅరివ నెహిఁకిహిఁ పున్నొఒరి.

16 "ప్రెబు ఒణ్పుతి పుంజహఁ ఏవణఇఁ

వెండె వెహ్నసి ఎంబఅసి?"

మంగె ఇచ్చిహిఁ క్రీస్తు ఒణ్పు మన్నె.