అపొస్తుయఁ కమ్మయఁ
1 నంగె హుక్కొమి హిల్లెఎకి? నాను అపొస్తులతెఎఁ ఆఎకి? మా ప్రెబు జీసుఇఁ నాను మెస్సలొఒఁకి? మీరు ప్రెబు తాణ కమ్మతి పొఒలొతెరి ఆఎకి? 2 ఎట్కతరకి నాను అపొస్తులతెఎఁ ఆఅతివ మింగె పట్టె అపొస్తులతెఎఁ ఆహమఇఁ, ప్రెబు తాణ నెహిఁ కమ్మగట్టతెఎఁ ఇంజిహిఁ ముద్రలెహెఁ మన్నతెరి మీరు ఆఎకి?
3 నన్నఅఁ నిందయఁ కియ్యనరకి నాను వెహ్ని కత్త ఇదిఎ. 4 తింజలితక్కి గొస్సలితకి మంగె హుక్కొమి హిల్లెఎకి? 5 మన్ని అపొస్తులంగయఁలెహెఁ, ప్రెబు తయ్యియఁలెహెఁ, ఓడె కేపాలెహెఁ నమ్మకొము గట్టి డొక్రిని దేచ్చొ ఓహిఁ రేజలితకి మంగె హుక్కొమి హిల్లెఎకి? 6 ఓడె కమ్మ కిఅరేటు మంజలితక్కి నానుఎ బర్నబాదెహెఁ నీడ్డలితకి హుక్కొమి హిల్లఅ గట్టతొమికి? 7 ఎంబఅసివ తన్ని సొంతె కర్చు హిహఁ జుజ్జతకి హన్నెసికి? ద్రాక్సటోట ఉహఁ ఏదఅఁతి పండుయఁ తిన్నఅఁగట్టసి ఎంబఅసి? మందతి మెచ్చిహిఁ మందతి పాలు గొహఅతసి ఎంబఅసి?
8 ఈ హాడ్డయఁ నాను మణిసి హుక్కొమి తొల్లె వెస్సమంజఇఁకి? నియొమిసాస్తురివ ఇదిఎ వెస్సిమంజన్నెమ? 9 క్డానుత నొర్పిమని కోడ్డితి మూతి బుట్టి దొహఅదు ఇంజిహిఁ మోసే నియొమిసాస్తురిత రాస్కి ఆహమన్నె, మహపురు వరిఇ కోడ్డియఁ తకిఎదెహెఁ రాచ్చిమన్నెసికి? 10 ఆఅతిఁ మా కోసొమి ఇదఅతి వెస్సిమంజన్నెసి? సొత్తెఎ, మా కోసొమిఎ ఈ కత్త రాస్కిఆహమన్నె ఏనయి ఇచ్చిసరి, డూహిమన్నసి ఆసతొల్లె డూనయి మన్నె, క్డానుత నొర్పినసి ఏ పాడెతి బాగ బెట్టఆఇఁ ఇంజిహిఁ ఆస తొల్లె నొర్పినయి మన్నె. 11 మీ కోసొమి సుద్దుజీవుతక్కి పాడఆతఅఁ మాంబు మట్టమచ్చిహిఁ మీ తాణటి అంగతక్కి పాడఆతి పాడెయతి దాచ్చకొడ్డినయి కజ్జ కమ్మకి? 12 ఎట్కతరకి మీ ముహెఁ ఈ హుక్కొమి మన్నె ఇచ్చిహిఁ మంగె హారెఎ గడ్డు హుక్కొమి మన్నెఎకి?
ఇంజహఁ మాంబు ఈ హుక్కొమితి లేంబలొఒమి, క్రీస్తు నెహిఁకబ్రుతకి ఏనిలేఁతి అడ్డు ఆంగికిహఁ కొడ్డఅరేటు బర్రెతి ఒర్హి మన్నొమి. 13 మహపురు గుడిత కమ్మకిన్నరి తాంబు తింజహఁ బత్కిని కూడతి మహపురు గుడిటిఎ ప్ణానెరి, పూజపిండత సినికిహిఁ మన్నరికి ఏ పూజపిండత పూజకీతి కూడతి ప్ణానెసి ఇంజిహిఁ మీరు పునొఒతెరికి? 14 ఎల్లెకిఎ నెహిఁకబ్రు వెహ్నరి నెహిఁకబ్రుటిఎ బత్కినయి మన్నె ఇంజిహిఁ ప్రెబుఎ నియొమి కిహనెసి.
15 నాను ఇచ్చిహిఁ ఇవఅఁతి ఏనఅఁతివ నాను లేంబలొఒఁ, మీరు నా కత్తత ఈ సొమన కిద్దు ఇంజిహిఁ వెస్సలితక్కి నాను కత్తాణి రాచ్చిహిల్లొఒఁ, ఎంబఅసి పట్టె నా ఆసతి ఊణలెహెఁ సినికితిహిఁ నంగె హాకిఎ నెహిఁ. 16 నాను నెహిఁకబ్రు వెహ్నితాణ నంగె బొడ్డపొణొ హిల్లెఎ. నెహిఁకబ్రు వెహ్ని బోజు నా ముహెఁ మన్నె, అబలెయ, నెహిఁకబ్రు వెహఅలెహెఁ ఇచ్చిహిఁ నంగె డొండొ. 17 ఇదఅఁతి నాను మోనొఆహఁ కినిలెహెఁ ఇచ్చిహిఁ నాను జీతొమి ప్ణాఇఁ, మోనొ ఆఅతివ ప్రెబుఎ ఏ కమ్మతి నంగె హెర్పామంజనెసి. 18 ఎలెకిహిఁ ఇచ్చిహిఁ నా జీతొమి ఏనయి? నాను నెహిఁకబ్రుతి వెహ్నటి నంగె మన్ని హుక్కొమితి పూర్తి లేంబఅరేటు నెహిఁకబ్రుతి ఉజ్జెఎ వెహ్నయిఎ నా జీతొమి.
19 నాను బర్రెతక్కి హుక్కొమి గట్టతెఎఁ ఆహఁవ గడ్డుజాణతి ప్ణాఇఁవ ఇంజిహిఁ బర్రెతక్కి నాను గొత్తిలెహెఁ కిహకొడ్డితెఎఁ. 20 యూదుయఁణి పాటలి యూదుయఁలెఁ మచ్చెఎఁ నియొమిసాస్తురి నియొమి కిహానరఇఁ పాటలితకి నాను నియొమిసాస్తురి డోఇ హిల్లఅతివ, ఏదఅఁ డోఇ మన్నిలెహెఁ మచ్చెఎఁ. 21 మహపురు తాణ నియొమిసాస్తురి హిల్లఅగట్టతెఎఁ ఆఎ సమ్మ క్రీస్తుకి పాడఆతి నియొమిసాస్తురి నంగె మన్నె, ఇచ్చివ నియొమిసాస్తురి హిల్లఅగట్టరఇఁ పాటలితకి నియొమిసాస్తురి హిల్లఅగట్టణిలెహెఁ మచ్చెఎఁ. 22 బల్మిహిల్లఅగట్టరఇఁ పాటలితకి బల్మిహిల్లఅగట్టణిలెహెఁ ఆతెఎఁ, ఏనికిహిఁపట్టె రోలెకిహిఁ బర్రెతి గెల్పికియ్యలి వెల్లె ఇంజిహిఁ బర్రెతక్కి సరిఆనిలెహెఁ మచ్చెఎఁ.
23 ఓడె నెహిఁకబ్రుత ఏవరి తొల్లె అండిఇఁవ ఇంజిహిఁ ఏదఅఁ కోసొమిఎ బర్రెతి కిహిమఇఁ. 24 హ్డొన్ని పందెయఁత హ్డొన్నరి బర్రె జాణ హ్డొన్నెరి సమ్మ రొఒసిఎదెహెఁ బహుమత్తితి ప్ణానెసి ఇంజిహిఁ మీరు పుంజలొఒతెరికి? ఎల్లెకిఁఎ మీరు బహుమత్తితి ప్ణానిలెహెఁ హ్డొందు. 25 ఎచ్చెటిఎ దెహెఁఆఎ సమ్మ పందెఁత హ్డొన్ని బర్రె జాణ బర్రె కమ్మాణ ఆసతొల్లె మన్నెరి, ఏవరి గాడెకెఎఁ వాయహన్ని ఆకు టోపితకి హొట్టిమన్నెరి, మారొ ఇచ్చిహిఁ ఎచ్చెలవ హేడఅగట్టి టోపితకి ఎలెకిహిఁ హొట్టిమన్నయి. 26 ఏదఅఁతక్కి నాను గురి సినికిఅగట్టణిలెహెఁ హ్డొన్నతెఎఁ ఆఎ, గాలితి మాడకినిలెహెఁ మాడకినతెఎఁ ఆఎ. 27 పంగతరఇఁ జాప్ని డాయు కమ్మతక్కి పాడఆఅగట్టతెఎఁ ఆఇఁ హబుల ఇంజిహిఁ నా అంగతి నాను లొక్హకొడ్డిమఇఁ.