1 యెహోవ మోసేతొల్లె ఇల్లెకి వెస్తెసి. 2 "ఇస్రయేలు లోకుటి తొల్లి జర్నఆతి బేలిటి నంగె హీతిదెహెఁ. మణిసియఁ, కోడ్డియఁ ఏనఅఁ ఇచ్చివ మూలుతయి నాదిఎ."

3 ఎచ్చెటిఎ మోసే లోకుతి రోహెఁఎఁ కూడికిహఁ ఇల్లెకి వెస్తెసి. మీరు ఐగుప్తు దేసత గొత్తి హలీంగఆహఁ మచ్చి తాణటి పంగత వాతనితి ఈ దిన్న గుర్తు ఇట్టకొడ్డదు. యెహోవ తని బల్మిగట్టి కెస్కదాస ఏ కొస్టొటి మిమ్మఅఁ పిస్పికియ్యతెసి. మీరు పుల్లఆతి గుండతొల్లె కేపితి రొట్టేఁణి తింజలి కూడెఎ. 4 అబీబు ఇన్ని నీంజుఎ మీరు పంగత వాతెరి. 5 కనానీయుయఁ, హిత్తీయుఁయఁ, అమోరీయుయఁ, హివ్వీయుయఁ, యెబూసీయుఁయఁ బత్కిమన్ని పాలు క్రియఁ హొట్టిని దేసెత తాకికియ్యఇఁ మా పూర్బెతరితొల్లె యెహోవ హాడ్డ హిత్తెసి. ఏవసి వాగ్దానొమి హీతిలెహఁ ఏ దేసెత మీరు హాని పత్తెక ఈ నియొమిక ఈ లేంజుఎ కిహకొడ్డితిదెహెఁ. 6 మీరు సాత దిన్నయఁ పత్తెక పుల్లఆఅతి రొట్టెయఁణి మీరు తింజు. సాతతి దిన్న యెహోవ పర్బుకిద్దు. 7 సాత దిన్నయఁ పత్తెక పుల్లఆఅతి రొట్టెయఁతొల్లె దెహెఁ తిచ్చిదెఁ. మీ దేసెటి ఈ హద్దుటి ఏ హద్దు పుల్లఆతని కల్పితి గుండ మీ తాణ మంజలి కూడెఎ. ఎల్లెకిఁఎ కిత్తయి ఎమ్మినయి జికెల మీ తాణ తోంజఅయ్యలి కూడెఎ. 8 ఏ దిన్న మీ కొక్కరి పోదాఁణి "నాను ఐగుప్తుటి వాతటి యెహోవ నంగెకి హిత్తని తాణటి పుల్లఆఅతి రొట్టెయఁని హూడ్డహఁ తింజిమఇఁ" ఇంజిహిఁ వెహ్దు. 9 యెహోవ తని బలొమి గట్టి కెస్కతొల్లె మిమ్మఅఁ ఐగుప్తుటి తత్తెసి. ఏవణి హాడ్డ మీ తాణ మన్నిలెహెఁ, ఈ నియొమి మీ కెస్కాణ గుర్తుయఁ మీ త్రాయుఁత ఇట్టకొడ్డదు. 10 ఏదఅఁతక్కి మీరు కాలెఎ బర్సయఁ ఈ నియొమితి, ఏదఅఁతి ఇట్టితి కాలొమిత కిన్నయి మన్నె.

11 యెహోవ మీతొల్లె మీ పూర్బెతరితొల్లె హాడ్డ హీతి కనాను దేసెత నిన్నఅఁ తత్తి డాయు. 12 మింగె జర్నఆతి ప్రెతి తొల్లి బేలితి, మింగె మన్ని కోడ్డి గొర్రిటి జర్నఆతి ప్రెతి రో డాలుతి యెహోవకి హీతిదెఁ. కోడ్డిగొర్రితక్కి, తొల్లి జర్నఆతి పోతు డాల్క యెహోవ వయిఎ. 13 మీరు గాడ్దె డాలు ఇచ్చివ ఏదని దర్ర ఎచ్చెక మన్నెనొ ఎచ్చెకెఎ మేండడాల్కాని హెర్పలివల్లె. ఎల్లెకిఁ పిహఅతెఎఁ ఏదని హెర్కితి డిక్హిదెహెఁ. మీ మీర్కటి తొల్లె జర్నఆతి దర్ర హీహఁ ఏవరఇఁ పిస్పికిహకొడ్డలివల్లె. 14 నీఎఁటిఎ మీ మీర్క "ఇల్లెకి ఏన్నఅఁకి ఇయ్యలివలె?" ఇంజిహిఁ వెచ్చెహెఁ, ఏవరితొల్లె, ఐగుప్తుత హల్లెఎణతొల్లె మన్ని మణిసియఁ తని బల్మిటిఎ యెహోవ పంగత తత్తెసి. 15 రజ్జ మమ్మఅఁ హజ్జలి హిఅనతన్ని మణుసుతి ఆట్వకిహఁకొడ్డహఁ యెహోవ ఐగుప్తు దేసెత మన్ని ఆబెలంగ కోడ్డిగొర్రి బర్రె బేలిటి కోరితెసి. ఇంజహఁ నాను ప్రెతి తొల్లి తూసి మన్ని పోతు డాల్కటి యెహోవకి బలి హీఇఁ. తొల్లి జర్నఆతి నా మీర్క కోసొమి దర్ర హీహఁ పిట్టొవికిహఁకొడ్డిఇ ఇంజిహిఁ వెస్తెసి. 16 యెహోవ తని బలొమితొల్లె మమ్మఅఁ ఐగుప్తుటి పంగత తత్తెసి, ఇంజహఁ నీ కెయ్యు లెక్కొ ముంజు లెక్కొ ఆతని ఒణ్పు గుర్తులెహెఁ మంజలివల్లె.

17 రజ్జ ఏ లోకుతి హజ్జలి హిత్తటి మహపురు ఏవరఇఁ పిలిస్తియఁ దేసెటి దరి మచ్చటి ఏ జియ్యుటి ఏవరఇఁ హజ్జలి హిఅతెసి. "ఈ లోకు పిలిస్తీయఁతొల్లె జుజ్జతి సినికిహఁ మణుసు మాస్కకొడ్డహఁ ఓడె వెండె ఐగుప్తుత వెండె హచ్చెరి హబుల" ఇంజిహిఁ ఇంజకొడ్డితెసి. 18 ఇంజహఁ లోకుతి సుట్టుతిప్పహఁ పాడుజాడత గద్గ సమ్దురి బకి ఓహిఁ హచ్చెసి. ఇస్రయేలు లోకు తమ్మి హర్కుయఁ ఒహిఁ ఐగుప్తుటి వాతెరి. 19 మోసే, యోసేపు డుమ్‌కాని తమ్మి దేచ్చొ తచ్చిహిఁ వాతెసి. ఏనఅఁతక్కి ఇచ్చిహిఁ యోసేపు "మహపురు మిమ్మఅఁ ఒణ్పకొడ్డినెసి, ఎచ్చెటిఎ మీరు నా డుమ్‌కాని ఇంబటిఎ ఓహిఁ హజ్జు" ఇంజిహిఁ ఇస్రయేలు లోకుతొల్లె కచ్చితొమి ఒట్టుకిహకొడ్డితెసి. 20 ఏవరి సుక్కోతుటి వాహిఁహిఁ పాడుజాడత దరి మన్ని ఏతాముత బస్సకిత్తెరి. 21 మద్దెన, లాఅఁయఁ హజ్జిమన్నటి యెహోవ ఏవరకి తోడుఆహఁ మన్నెసి. మద్దెన ఇచ్చివ లాఅఁయఁ ఇచ్చివ ఉజ్జెడి హియ్యలితక్కి హిచ్చు తంబొమిలెహెఁ నోకిత మంజహఁ ఏవరఇఁ తాకికిత్తెసి. 22 మహపురు లోకుతి కోసొమి ఇట్టమన్ని మద్దెన హాగు తంబొమి, లాఅఁయఁ బేల ఉజ్జెడి హీని హిచ్చుతంబొమితి పిట్టొవికిఅన హన్నిలెహెఁ కిత్తెసి.