నిర్గమ 36

1 మోసే "సుద్దుటాయుత ఆతి సేబ కోసొమి బర్రె రకొమి కమ్మయఁ కియ్యలితక్కి బెసలేలు, అహోలీయాబు జాప్నరి బర్రెజాణ నియొమికిత్తెరి. ఈ కమ్మయఁ కియ్యలితక్కి యెహోవ ఏవరకి తెల్వి, బుద్ది హిత్తెసి. ఈవరి యెహోవ హెల్లొ హీతిలెహెఁ కమ్మయఁ కివికిత్తెరి" ఇచ్చెసి.

లోకూణ హారెఎ హార్కుయఁ తన్నయి

2 బెసలేలు, అహోలీయాబుతొల్లె పాటు యెహోవ ఏవరి హిఁయఁత గేనొమి ఇట్టహఁ ఏ కమ్మ కియ్యలితక్కి జోలితెసి ఏవరి బర్రెజాణతి మోసే హాటితెసి. 3 ఏవరి వాహఁ సుద్దు టాయుత సేబ కివికియ్యలితక్కి, సుద్దుటాయు దొస్సలితక్కి ఇస్రయేలు లోకు తత్తని బర్రె మోసే తాణటి కొడ్డితెరి. ఇచ్చిహిఁ ఇస్రయేలులోకు ప్రెతి నేచు మణుసు పూర్తి మోసే కానుక తప్పివితెరి. 4 ఎచ్చెటిఎ సుద్దుటాయుత పాడఆతి కమ్మ కిహఁ సొక్తిగట్టరి బర్రెజాణ తాంబు కిహిమన్ని కమ్మ పిస్సహఁ మోసే తాణ వాతెరి. 5 "సేబ కివికియ్యతక్కి యెహోవ కిమ్ము ఇంజిహిఁ వెస్తి కమ్మయఁ కోసొమి లోకు సరిఆతని కిహఁ హార్రెఎ గడ్డు తచ్చిహిఁ వాహిఁ మన్నెరి" ఇంజిహిఁ మోసేతొల్లె వెస్తెరి. 6 మోసే "నీఎఁటి ఏని ఆబెలవ, అయ్యవ సుద్దుటాయుతి కమ్మ కోసొమి ఏనిలెహెఁతి కానుకవ తఅదు" ఇంజిహిఁ వెస్తెసి. సిబిరం బర్రె ఈ హాడ్డతి వేంగికిత్తెరి. ఏ కమ్మ బర్రె కివికియ్యలితక్కి సర్రిఆతి హర్కుయఁ సరిఆతు. ఏదణికిహఁ గడ్డుకూడఆతె. 7 లోకు కానుక తచ్చలి పిస్తుతెరి.

మహపురుకి ఎట్కెఎతి డేర తెయర కిన్నయి

8 ఏ కమ్మ కిహిమన్నరి బర్రెజాణ గెనొమిగట్టరి నీల, హెఁయఁ రంఙు, గద్గ రంఙుతొల్లె కిత్తి మెత్తెన లూలుతొల్లె టాయు డేరతి కోసొమి కెరూబు దొస్సొ డేరయఁ కిత్తెరి. 9 రో డేర లంబ 28 మూరయఁ, ఓసర సారి మూర. ఏ డేరయఁ కొల రొండిఎ. 10 పాస డేరయఁ జోడెక జత్త లెహెఁ రొండణితొల్లె రొండణి దూర్సలివల్లె. 11 రో డేర కుత్తహఁ డాయుతి డేర అన్చుతి నీలి రంఙు మెత్తని లూలుతొల్లె కడ్డియఁ కిత్తెరి. రిండి కుత్తమన్ని పంగత డేర అన్చుబకి ఎల్లెకిఁ కిత్తెరి. 12 తొల్లితి డేరతక్కి దుయికొడి దొస్సొ కడ్డియఁ, ఓరొండి కుత్తమన్ని డేర అన్చుత దుయికొడిదొస్సొ కడ్డియఁ కిత్తెరి. ఏవు రొండణితక్కి రొండి ఎదురు ఎదురు మన్ను. 13 దుయికొడిదుస్సొ బఙర కొంకియఁ తెయరకిహఁ ఏ కొంక్కితొల్లె ఏ రీ డేరతి రొండనితొల్లె ఓరొండణి కల్పితటి ఏది మహపురు గుడిఆతె. 14 మహపురు టాయు గుడితి లెక్కొతి కప్పు గొర్రి బాణయఁతొల్లె ఎగ్గరొ డేరయఁ తెయరకిత్తెరి. 15 రో డేర లంబ కోడెదొస్సొ మూరయఁ, ఓసర సారి మూరయఁ. ఏ రొండిఎ కొల్లతొల్లె ఎగ్గరొ డేరయఁ కిత్తిదెఁ, 16 ఏ ఎగ్గరొ డేర కొల రొండిఎ. పాస డేరయఁ రోలెకిఁ దూర్సహఁ, సోహొ డేరయఁ రొండిఎ రోలెకి కల్పహఁ దూర్సితెరి. 17 తొల్లితి కుత్తమన్ని పంగత డేర అన్చుబకి దుయికోడి దొస్సొ కడ్డియఁకిత్తెరి. 18 ఏవఅఁతి రొండిఎ తాణ కల్పలి దుయికొడి దొస్సొ ఇత్తడి కొంకియఁ కేపికిత్తెరి. 19 గద్గ రంగు రుబ్బితి మేండ బొకడతోలు డేరత ప్డితెరి. సమ్దురి సీలుతి తోలుతొల్లె ఏదణి కప్పుతి తెయరకిత్తెరి. 20 మహపురు సుద్దుడేర కోసొమి తుమ్మ బడ్గతొల్లె సెక్కయఁకిత్తెరి. 21 రో పలక లంబ దొస్సొ మూరయఁ, ఓసర మూర బెత్తెక. 22 ప్రెతి సెక్క రొండణితక్కి రొండి సారి సొమన రీ కట్టెలి బహిఁయఁ కిత్తెరి. ఎల్లెకిఁఎ సెక్కయఁ బర్రె ఒస్పికిత్తెరి. 23 గుడిటి దక్సణ దిక్కు, ఇచ్చిహిఁ టిఇని పాడియబకి కోడె పలకయఁ మన్నిలెహెఁ కిత్తెరి. 24 రో రో పలకటి కొడె పలకయఁ డోఇ రీ కాని రీ డిమ్మయఁ, దుయికోడి వెండి డిమ్మయఁ కిత్తెరి. 25 గుడి రిక్కొపక్క, ఇచ్చిహిఁ ఉత్తర బకి కోడె పలకయఁ దుయికోడి వెండి డిమ్మయఁ, 26 రో రో పలక డోఇ రీ డిమ్మయఁకిత్తెరి. 27 పరమడ దిక్కుటి డేర డాయుబకి సోహొ పలకయఁ కిత్తెరి. 28 డాయుబకి డేర మూలబకి రీ పలకయఁకిత్తెరి. 29 ఏ పలకయఁ డోఇ బాగత నిప్హఁ తొలి కడ్డియఁటి రొండణితొల్లె రొండణి అన్చుతక్కి ఎప్పె దూర్సితెరి. ఎల్లెకిఁ రీ మూలతక్కి ఏ రిండి పలకయఁ కిత్తెరి. 30 ఆట పలకయఁ మన్ను. ఏవఅఁతి దూర్సితి వెండి డిమ్మయఁ సోడొ. ప్రెతి పలక అడుగుత రీ డిమ్మయఁ మన్ను. 31 తుమ్మ బడ్గతొల్లె ఏవఅఁతి అడ్డు పట్టియఁ కిత్తెరి. గుడి రొక్కొటి పలకతక్కి పాసగుట్ట అడ్డు పట్టియక. 32 రిక్కొబకి పలకయఁ పాసగుట్ట అడ్డు పట్టియఁ, వేడకుడ్హి డేర డాయుబకి పలకయఁ అడ్డు పట్టియఁకిత్తెరి. 33 పలక మద్ది మన్ని ముక్కెని తూడియ బడ్గ ఈ అన్చుటి ఏ అన్చుతక్కి కల్హమన్నిలెహెఁ కిత్తెరి. 34 ఏ పలకయఁకి బఙర రేకుయఁ దూర్సితిదెహఁ. అడ్డు పట్టెయఁ మన్ని గుండ్రొమి మన్ని కడ్డియఁ బఙరతొల్లె కిహఁ అడ్డు పట్టెయఁ బఙర రేకుయఁ దూర్సలివల్లె. 35 నీలి, హెఁయఁ, గద్గ రంఙుయఁ అల్లితి అడ్డు డేరతి తెయరకిత్తెరి. కెరూబు వాణతి బొమ్మ గీసితెసి. 36 ఏదణి కోసొమి తుమ్మ సెక్కతొల్లె సారిగుట ముండయఁ తెయరకిత్తెరి ఇంజహఁ ఏవఅఁతి బఙర రేకుయఁ ఒస్పికిత్తెరి. బఙరతి కొంకియఁ కోసొమి సారిగుట వెండి డిమ్మయఁకిత్తెరి. 37 ఏవసి గూడ దువ్వెరి బొందు కోసొమి నీలి, హెఁయఁ రంఙు, గద్గ రంఙు లూలుయఁతొల్లె అల్లితి అడ్డు డేరతి నేస్పికిత్తెరి. 38 ఏదణితి పాసగుట్ట తంబొమిక, ఓడె కొక్కియఁ తయర కిత్తెరి. ఏ తంబొమికతక్కి, కొంకియఁకి, ఏవఅఁతి అడ్డు వాసయఁ బఙర రేకుయఁ దూర్సితెరి. ఏవఅఁతక్కి మన్ని పాసగుట్ట డిమ్మయఁ ఇత్తడిగట్టఅఁ.