1 ଆଦେଲେକାମ୍ ଦାଦାନଡ଼ି ନୁ ଏଲାସ୍କ୍‍, ଇଶ୍ୱର୍‌ତିଙ୍କ୍ ଶାନ୍ତି ମାଡ଼ାନ୍ ସେଙ୍ଗେ ବେଦ୍‍ଲେକାମ୍ ବାଦ୍‍କାନଙ୍କ୍ ଆଦ୍‍ତେ, ଆଦ୍ ମାୟାଗାଙ୍କ୍ ଶିକ୍ଷା ମାଡ଼ିମିନ୍ଦେଣ୍ଡ୍ । ଆଦେଲେକାମ୍ ମୀଡ଼୍ ବାଦ୍‍କ ୱାଦୁତିଡ଼୍, ବାତେଙ୍କ୍ ଇତ୍‍କେ ହିଗାଙ୍କ୍ ବାତେଏ ଅଦିକ୍‌ ମାଡ଼ାନଙ୍କ୍ ମିକିଂଙ୍କ୍ ମାମ୍‍ମେ ହିଞ୍ଜେ ପ୍ରବୁ ଜିସୁନ୍ ପେଦେର୍‍ତେ ବିନତି ବା ସାରେଦା ମାଡ଼ୁତମ୍ । 2 ବାତେଙ୍କ୍ ଇତ୍‍କେ ପ୍ରବୁ ଜିସୁନାଗାଙ୍କ୍ ଅଦିକାର୍‌ ପାଏମ୍ ଆସ୍ ମିକିଂଙ୍କ୍ ବେନ୍‍ସାରେ ଆଦେଶ୍ କେସ୍‍ମାତ୍‍ତମ୍, ଆଦ୍ ମିଡ଼୍ ପୁତ୍‍ତିଡ଼୍ । 3 ମିଡ଼୍ ବେଲାବା ପବିତ୍ର ଜିୱା ଆୟ୍‍ମୁଟ୍, ଇଶ୍ୱର୍‌ତେ ଇଚ୍ଛା, ମିଡ଼୍ ବେଲାନ୍ ବା ଯୌନ ଲାଲସା ତାଗାଙ୍କ୍ ଦୁରାମ୍ ମାନୁଟ୍ । 4 ବେନଡ଼୍ ପର୍‍ମେଶ୍ୱର୍‍ତିଙ୍କ୍ ପୁନଡ଼୍, ଅଡ଼୍‌ ନିଜେତ୍ ମେନ୍ଦୁଲ୍‍ତିଙ୍କ୍ ହିଦ୍‍ଲେକାମ୍ ବ୍ୟବହାର୍ ମାଡ଼ିତଡ଼୍ । 5 ଇଶ୍ୱର୍‌ତିଙ୍କ୍ ପୁନ୍‍ୱେମାନ୍ଦାନ୍ ଅଣଯିହୁଦୀ ନାରୁଡ଼୍ ଲେକାମ୍ ସାରେତଡ଼୍ ନିଜେ ନିଜେତ୍ ମୁତେନ୍ ତଡ଼୍ ବେଲାନ୍ ଯୌନ ଲାଲସା ଆୟ୍‍ୟକଟ ପବିତ୍ର ନୁ ସମ୍ମାନ୍‍ତଡ଼୍ ବାଦ୍‍କାନଡ଼ାଦ୍ ସାୟେ, ଆଦ୍ ମିକିଂଙ୍କ୍ ପୁନ୍‍ନ୍ଦେ ୱେଇତିତ୍ । 6 ବେନ୍ କ୍ରିଷ୍ଟିୟାନ୍ ବିଶ୍ୱାସୀ ଦାଦାନ୍ ସେଙ୍ଗେ କାରାପ୍ କାମ୍ ମାଡ଼୍‍ମାଟ୍, ବା ଅଂକିଙ୍କ୍‌ ପାସ୍କ୍‍ମାଟ୍, ଇଦ୍ ଗଟ୍ ମାମ୍‍ମେ ମୁନେଙ୍କ୍ କେସ୍‍ମିନ୍ତେମ୍ ନୁ ଡୁଟାଙ୍ଗ୍‍ତେ ସାବ୍‍ଦାନ୍ ମାଡ଼ିତ୍‍ତମ୍ ଜେ, ବେନଡ଼୍ ଆଦ୍‍ଲେକାମ୍ ମାଡ଼ିତଡ଼୍, ପ୍ରବୁ ଅଡ଼୍‌‍କିଂଙ୍କ୍ ଦଣ୍ଡ ହିଦ୍‍ତନ୍ । 7 ଇଶ୍ୱର୍ ମାନ୍‍ ଅଶୁଚି ବାଦ୍‍କାନ୍ ସେଙ୍ଗେ କାର୍‍ଙ୍ଗାନାଦ୍‍ ମାଡ଼ନ୍, ବାତେଙ୍କ୍ ଇତ୍‍କେ ପବିତ୍ର ଜିୱାତେ ଆଶେ ମାନ୍ଦାନ୍ ସେଙ୍ଗେ ମାନାଡ଼୍ ୱାତ୍‍ତାଡ଼୍ । 8 ଆଦିଙ୍କ୍ ବେନ୍ ମାୟାଦ୍‌ ଇଦ୍ ଶିକ୍ଷାତିଙ୍କ୍‍ ଗ୍ରହନ୍ ମାଡ଼ନ୍, ଅଣ୍ଡ୍‌ ନାରୁଙ୍କ୍ ପବିତ୍ରଆତ୍ମା ଦାନ ମାଡ଼ିମାନ୍ଦାନ୍ ଇଶ୍ୱର୍‌ତିଙ୍କ୍ ଅବମାନନା ମାଡ଼ିତନ୍ ।

9 ସାର୍‍ରେ କ୍ରିଷ୍ଟ ବିଶ୍ୱାସୀଡ଼୍ ମିୟାଦ୍ ପ୍ରେମ ମାଡ଼ାନ୍ ବିଷୟ୍‍ତେ ମାମ୍‍ମେ ମେଣ୍ଡେ ଅଦିକ୍‌ ଲେକାନଙ୍କ୍ ଦର୍‍କାର୍ ଇଲ୍‍ଲେ । ନିଜେ ନିଜେତ୍ ଲୋପେ ବେଲାନ୍ ପ୍ରେମ ମାଡ଼ାନାଦ୍ ସାୟେ, ଆଦ୍ ନିଜେ ଇଶ୍ୱର୍ ତାଗାଙ୍କ୍ ଶିକ୍ଷା ମାଡ଼ିମିନ୍ଦେମ୍‍ । 10 ସାରେ ମାସିଦୋନିଆତେ ବିଶ୍ୱାସୀଡ଼୍ ସେଙ୍ଗେ ମିଡ଼୍ ଆଦେଲେକାମ୍ ବ୍ୟବହାର୍‌ ମାଡ଼୍‍ତିଡ଼୍ । ଆଦିଙ୍କ୍ ଅଦିକ୍‌ ମାତ୍‌ତେ ମାଡ଼ାଟ୍, ମିକିଂଙ୍କ୍ ମାତର୍ ଇସରେ ବିନତି ମାଡ଼ୁତମ୍ । 11 ମୁନେନ୍ ବେଲା କେସ୍‍ମାତ୍‍ତମ୍, ଶାନ୍ତିତେ ଜିୱୁଣ୍ଡ୍ ବାଦ୍‍କିତାଡ଼୍, ନିଜେତ୍ ପାଡ଼୍‍ୟିତାଗ୍ ମାନ୍‍ ଇଦ୍‍ତାଡ଼୍ ନୁ ନିଜେତ୍ ନିଜେତ୍ ଜିବିକା ଉପାର୍ଜନା ମାଡ଼ାନାଦ୍ ମିୟାଦ୍ ଲକ୍ଷ ଆୟି । 12 ବେଦ୍‍ଲେକାମ୍ ବାଇଦେତ୍‍ ନାରୁଡ଼୍ ସେଙ୍ଗେ ମିଡ଼୍ ସାୟେ ଆୟ୍‍ମୁଟ୍, ମେଣ୍ଡେ ମିୟାଦ୍ ବାତ୍‍ତେବା ଅବାବ୍ ଆୟ୍‍ୟ ।

13 ହୋ ଦାଦାନଡ଼ି ନୁ ଏଲାସ୍କ୍, ୱେରେ ନାରିଡ଼୍‍ତେ ବିଷୟ୍‍ତେ ଅଣ୍ଡୟ୍‌ ନିଜାତେ ଗଟ୍ ମିକିଂଙ୍କ୍ କେତାନଙ୍କ୍ ଇଚ୍ଛା ମାଡ଼ୁତମ୍ । ଆଲେକେ, ମିଡ଼୍ ବାଗାତଡ଼୍ ଲେକାମ୍ ଆସ୍‍ତେ ନାରିଡ଼୍ ଲେକାମ୍ ଶୋକାକୁଲ ଆୟ୍‍ମାଟ୍ । 14 ବେଲାନ୍ କି ମାମ୍‍ମେ ବିଶ୍ୱାସ୍ ମାଡ଼ିକାଡ଼୍ ଯେ ଜିସୁ ଡଲିମିକା ମେଣ୍ଡେ ତେଦ୍‍ତନ୍, ଆଦିଙ୍କ୍ ମାନାଡ଼୍ ଲେକାମ୍ ଗାଟି ବିଶ୍ୱାସତେ, ଜିସୁନାଗ୍ ବିଶ୍ୱାସ୍ ମାଡ଼ି ବେନଡ଼୍ ଡଲିତଡ଼୍, ଜିସୁ ମେଣ୍ଡେ ୱାଦାନ୍ ୱେଲେ ଇଶ୍ୱର୍ ଅଡ଼୍‌‍କିଂଙ୍କ୍ ଜିସୁନ୍ ତଡ଼୍ ଆଦ୍‍ତଡ଼୍ ।

15 ✝ମାମ୍‍ମେ ଇଞ୍ଜେ ମିକିଂଙ୍କ୍ ବେନ୍ ଶିକ୍ଷା ଇଦୁତମ୍, ଆଦ୍ ପ୍ରବୁନ୍ ଶିକ୍ଷା । ପ୍ରବୁନ୍ ୱାଦାନ୍ ସମୟ୍‍ତେ ମାମ୍‍ମେ ବେନଡ଼୍ ଜିୱୁନ୍ ମାନ୍‍ତମ୍, ମୁନେଙ୍କ୍ କଞ୍ଜ୍ ୱେରେନାରୁଡ଼୍ ପାକ୍ ଆସ୍‍ମାନ୍ଦାନ୍ ନାରୁଡ଼୍‍ଆଗାଙ୍କ୍ ମୁନେ ଆସ୍ ଆନ୍‌‍ମା । 16 ଆସୁଙ୍କ୍ ପ୍ରବୁ ଗଟ୍ ହିଦ୍‍ତନ୍ ମୁକ୍ୟଦୂତ୍‍ତେ ଲେଙ୍ଗ୍ ନୁ ଇଶ୍ୱର୍‌ତେ ମୟିର୍ ଲେଙ୍ଗ୍‍ତେ ଆଦ୍ ସ୍ୱର୍ଗଦୂତ ଡିଗିତା, ବେନଡ଼୍ କ୍ରିଷ୍ଟନାଗେ ମାଞ୍ଜ୍ ଡଲିମାନ୍‍ତଡ଼୍, ଅଡ଼୍‌ ମୁନେ ତେଦିତଡ଼୍ । 17 ତାନ୍ ପେର୍‍କେ ବେନଡ଼୍ ଆଦ୍ ସମୟ୍‍ତେ ଜିୱୁନ୍ ମାନ୍‍ତମ୍, ମାବ୍‍ତାଗ୍ ଅଡ଼୍‌‍ତଡ଼୍ ଉତ୍‍ତାପିତ ଆସ୍ ମୟଲ୍‍ତାଗ୍ ପ୍ରବୁନ୍‍ତଡ଼୍ ସାକ୍ଷାତ୍ ମାଡ଼ିତମ୍ । ତାନ୍ ପେର୍‍କେ ମାମ୍‍ମେ ସାରେଦିନାମ୍ ପ୍ରବୁନ୍‍ତଡ଼୍ ମାନ୍‍ତମ୍ । 18 ଇୱୁ ସାରେ ଗଟି କେଞ୍ଜ୍‍ସ୍ପି ମିଡ଼୍ ଆନ୍‌‍ତେ ନିଜେ ନିଜେତିଙ୍ଗ୍ ସାର୍‍ଦେ ଆୟ୍‍ମୁଟ୍ ।