୨ କରନ୍ତିୟ 9

ବାଗାତ୍ ମଣ୍ଡଲିତେ କ୍ରିଷ୍ଟିୟାନ୍‍ ସେଙ୍ଗେ ସାହାଯ୍ୟ

1 ଯିହୁଦାତାଗ୍ ମାନ୍ଦାନ୍ ଇଶ୍ୱର୍‌ତେ ନାରୁଡ଼୍‍ତେ ପାକେ ସାହାଯ୍ୟ ରତାନ୍ ସେଙ୍ଗେ ମିକିଂଙ୍କ୍ ଲେକାନାଲ୍‌ଦ୍ ବାତେଏ ଆବଶ୍ୟକତା ଇଲ୍‍ଲେ । 2 ନାନ୍ ପୁତ୍‍ତାନ୍, ମୀଇଡ଼୍ ସାରେଦାମ୍ ସାହାଯ୍ୟ ମାଡ଼ାନଙ୍କ୍ ତିଆର୍ ନୁ ମାସିଦୋନିଆତେ ନାରିଡ଼୍ ପାକେ ମିୟାଦ୍ ବିଷୟ୍‍ତେ ନାନ୍ ଗର୍ବ ମାଡ଼୍‍ତାନ୍ । ନାନ୍ କେସ୍‍ମାତ୍‍ତାନ୍, "ଆକାୟାତେ ଦାଦାନଡ଼ି ସାହାଯ୍ୟ ମାଡ଼ାନ୍ ସେଙ୍ଗେ ଆତ୍‍ତେ ୱାଡ଼୍‍ଷା କନ୍‍ସ୍ ତିଆର୍ ଆସ୍ ମିନ୍ଦେ ।" ମିୟାଦ୍ ଆଗ୍ରହ ଅଡ଼୍‌ ତାଗାଙ୍କ୍ ନାର୍‍ଗେ ନାରିଡ଼୍‍କିଙ୍କ୍ ତିଆର୍‍ତେ ମାଡ଼୍‍ତେ । 3 ଇଞ୍ଜେ ନାନ୍ ଇ ଦାଦାନଡ଼୍‍କ୍ ମିଇ ପାକେ ରହସମିନ୍ଦେନ୍ । ଉଡ଼େ, ଇଦ୍ ସମୟ୍‍ତେ ବେଲାନ୍ ମିୟାଦ୍ ବିଷୟ୍‍ତେ ମାୟାଦ୍‌ ଗର୍ବ ଆଙ୍ଗ୍‍ଡ଼ାମ୍‍ ଆୟ୍‍ମାକି । ନାନ୍‍ନେ କେତ୍‍ତାନ୍ ଲେକାମ୍ ମିଡ଼୍ ଦାନତଡ଼୍ ତିଆର୍ ଆ‍ସ୍‍ ମାନୁଟ୍ । 4 ମାସିଦୋନିଆତେ ନାରୁଡ଼୍ ନା ତଡ଼୍ ଆଞ୍ଜ୍ ଯଦି ମିକିଂଙ୍କ୍ ତିଆର୍ ଆତ୍‍ତାଦ୍ ଉଡ଼ିତଡ଼୍; ଆଲେକେ ମିଇ ପରୁ ଗାଟି ଆଶେ ମାନ୍‍ ମାମ୍‍ମେ ସିଗ୍ ଆଦ୍‍ତମ୍, ନିଜାମ୍ କେତାନଙ୍କ୍ ଆତ୍‍କେ, ଆଦ୍ ମିଇ ପାକେ ମିକା ସିଗ୍‍ତାଦ୍ ଆଦ୍‍ତେ । 5 ମିଡ଼୍ ପ୍ରତିଶ୍ରୁତି ଇସ୍ ମାନ୍ଦା‍ନ୍ ଦାନ ନେହେତାନ୍ ସେଙ୍ଗେ ଇ ଦାଦାନଡ଼୍‍କ୍ ନାନ୍ ଆଦାନ୍ ମୁନେଙ୍କ୍ ମିଇ ପାକେ ରଅତାନ୍‍ ସେଙ୍ଗେ ମାନ୍‍ ମାଡ଼୍‍ତାନ୍ । ଆଲେକେ, ନାନ୍ ମିଇ ପାକେ ହେୱୁଦାନ୍ ୱେଲେ ଇଦ୍ ଦାନ ଗୁଡ଼୍‍ପି ନେହେସ୍ ମାନ୍ଦାନ୍ ମିନ୍ଦେ । ଇଦିନ୍‍ତଡ଼୍ ମିଡ଼୍ ବାଦ୍ୟତଡ଼୍ ଇୱେକଟ ନିଜେତ୍ ଇଚ୍ଛାତେ ଇଦୁତିଡ଼୍ ଇଞ୍ଜ ପ୍ରକାଶ୍ ଆଦ୍‍ତେ ।

6 ହେର୍କା ନେହେମୁଟ୍, ବେନ ସୁକୁକ୍ ୱିଜ୍ ୱିତିତନ୍, ଅଣ୍ଡ୍‌ ସୁକୁକ୍ ପାଣ୍ଡ୍‍ପ୍ସିତନ୍; ବେନ ନାର୍‍ଗେ ୱିଜ୍ ୱିତିତନ୍, ଅଣ୍ଡ୍‌ ନାର୍‍ଗେ ପାଣ୍ଡ୍‍ପ୍ସିତନ୍‍ । 7 ବେନ ବେଲା ନିଜେତ୍ ଜିୱୁଣ୍ଡ୍‍ତାଗ୍ ଆଲ୍‍ସିତିଡ଼୍, ଅଣ୍ଡ୍‌ ଆଲାନ୍ ଦାନ ମାଡ଼ିଣ୍ଡ୍ ନୁ ଆଦ୍ ଦାନ ଦୁଃକାମ୍‌ ଆସ୍ ବା ମାତର୍ ଉର୍‌ଗାଡ଼୍‌ ଆୟ୍‍ମାକି । ବାତେଙ୍କ୍ ଇତ୍‍କେ ୱେଡ଼୍‍କେତେ ଇଦାନଙ୍କ୍ ଇଶ୍ୱର୍‌ ପ୍ରେମ ମାଡ଼ିତନ୍ । 8 ସାରେଲେକାତ୍ ଦାନ୍‍ତେ ମିକିଂଙ୍କ୍ ଉନ୍ନତି ମାଡ଼ାନ୍ ସେଙ୍ଗେ ଇଶ୍ୱର୍‌ ପାର୍‍ଦ୍‍ତଣ୍ଡ୍; ପେର୍‍କେ ମିଡ଼୍ ସାରେଦାମ୍ ସମ୍ପତିତାଗେ ବାଦ୍‍କେ ପାର୍‍ତିଡ଼୍ ନୁ ସାରେ ଲେକାତ୍ ଲେକେତ୍‍ ପାଡ଼୍‍ୟି ସେଙ୍ଗେ ବେସର୍ ଦର୍‍କାର୍ ଆସର୍ ଦାନ ଇଦ୍‍ଏ ପାର୍‍ତିଡ଼୍ । 9 ଦର୍ମଶାସ୍ତ୍ରତାଗ୍ ଲେକାମିନ୍ଦେ, "ଅବାବ୍‍ତେ ନାରିଡ଼୍‍କ୍ ଅଣ୍ଡ୍‌ ଉଦାର୍‍ତଡ଼୍ ଦାନ ମାଡ଼ିତନ୍‍; ତାନ୍ କୃପା ସାରେଦିନାତ୍‍ ମାଇଦିଙ୍କ୍ ।"

10 ବେନଡ଼୍ ବାଦ୍‍କାନଡ଼୍‍କ୍ ଇଶ୍ୱର୍ ୱିତାନ୍ ସେଙ୍ଗେ ୱିଜ୍ ନୁ ତିନ୍ଦାନ୍ ସେଙ୍ଗେ କାଦି କେପ୍‌ସିତନ୍, ଅଣ୍ଡ୍‌ ମିୟାଦ୍ କାମ୍‍ମାଡ଼ାନ୍ ଲେକାମ୍‍ତେ ୱିଜ୍ ନେହେଚିଦ୍‍ତନ୍ ନୁ ମିଇୟାଦ୍ ଉଦାର୍‍ତେ କାୟେ ଲେକାମ୍ ମିଡ଼୍ ଆନ୍‌ତେ ନାର୍‍ଗେ ଫସଲ୍ ପାଣ୍ଡ୍‍ସ୍ପିତିଡ଼୍ । 11 ମିଇଡ଼୍ ସାରେଦାମ୍ ବେଲାନ୍ ଉଦାର୍ ଲେକାମ୍ ଦାନ ମାଡ଼େ ପାର୍‍ତିଡ଼୍, ଇଦିନ୍‍ ସେଙ୍ଗେ ଇଶ୍ୱର୍ ମିକିଂଙ୍କ୍ ସାରେ ବିଷୟ୍‍ତେ ଉନ୍ନତି ମାଡ଼ିତନ୍ ନୁ ମାନ୍‍ ତଡ଼୍ ମିଡ଼୍ ରଅସ୍‍ମାନ୍ଦାନ୍ ଦାନ ସେଙ୍ଗେ ନାର୍‍ଗେ ଇଶ୍ୱର୍‌ତିଙ୍କ୍ ୱେଡ଼୍‌କେତେ ଦନ୍ୟବାଦ୍ ଇଦ୍‍ତଡ଼୍ । 12 ମିୟାଦ୍ ଦାନ ଲେକ୍‌ତାଦ୍‌ ସେବା ପାଡ଼୍‍ୟିତଡ଼୍ ମାତର୍ ବେନ ଇଶ୍ୱର୍‌ତେ ନାରୁଡ଼୍‍ତେ ଅବାବ୍ ଯେକା ଆଦ୍‍ତେ, ଆଦ୍ ଆୟ୍‍ୟ, ବାତେଙ୍କ୍ ଇତ୍‍କେ ଇଦିନ୍‍ ତଡ଼୍ ଇଶ୍ୱର୍‌ତେ ସେଙ୍ଗେ ନାର୍ଗେ ନାରୁଡ଼୍‍ ହୃଦୟ୍‍ତାଗ୍ କୃତଜ୍ଞତା ମିଡ଼୍‍ ଆଦ୍‍ତେ । 13 ଇଦ୍‍ ସେବା ପାଡ଼୍‍ୟି ତଡ଼୍ କ୍ରିଷ୍ଟନ୍ ସୁସମାଚାର୍‌ତେ ସେଙ୍ଗେ ମିୟାଦ୍ ବିଶ୍ୱାସ୍ତେ ସେଙ୍ଗେ ନୁ ସାରେତଡ଼୍ ତଡ଼୍ କାଇଲି ମିକା ମିଡ଼୍ ବେନ୍ ପ୍ରସଂଶା ମାଡ଼୍‍ତିଡ଼୍, ଆଦିନ୍ ସେଙ୍ଗେ ଅଡ଼୍‌ ଇଶ୍ୱର୍‌ତିଙ୍କ୍ ଗୌରବ୍ ମାଡ଼ିତଡ଼୍ । 14 ମିଇ ମାୟ୍‍ଦିଙ୍କ୍ ଇଶ୍ୱର୍‌ତେ ନାର୍‍ଗେ ଅନୁଗ୍ରହ ସେଙ୍ଗେ ଅଡ଼୍‌ ବିଶ୍ୱାସ୍‍ତାଗ୍ ନାର୍‍ଗେ ପ୍ରେମତଡ଼୍ ପ୍ରାର୍ତନାତାଗ୍ ମିକିଂଙ୍କ୍ ହେର୍କା ମାଡ଼ିତଡ଼୍ । 15 ୱାଡ଼ାଟ୍, ଇଶ୍ୱର୍‌ତେ ବାକ୍‍ୱା ନୁ ମୁଲ୍ୟହିନ ଦାନ ସେଙ୍ଗେ ଅନ୍‌ ସେଙ୍ଗେ କୃତଜ୍ଞତା ମାଡ଼ିକାଡ଼୍ !