୨ କରନ୍ତିୟ 3

ପୁନେ ନିୟମ୍‍ତେ ଦାସ

1 ମାନାଡ଼୍ ବାତେଏ ମେଣ୍ଡନ୍ ‍ଦାମ୍ ଆତ୍ମପ୍ରଶଂସା ମାଡ଼ାନଙ୍କ୍ ଆରାମ୍ ମାଡ଼ୁତାଡ଼୍ ? ବା ବେନ୍‍ ବେନଡ଼୍ ଲେକାମ୍ ବାତେଏ ମିଇ ପାକେ ବା ମିଇ ପାକାଙ୍କ୍ ମାୟାଦ୍‌ ପ୍ରସଂଶା ଚିଟି ଦର୍‍କାଡ଼୍ ? 2 ମିଇଡ଼େକେ ମା ପୁତ୍‍ତେନଡ଼ି ଚିଟି, ମାମ୍‍ମେ ଜିୱୁଣ୍ଡ୍‍ତାଗ୍ କେତ୍‍ତାଦ୍ ଲିପି, ବେଦିଙ୍କ୍ ସାରେତଡ଼୍ ପୁତ୍‍ତଡ଼୍ ନୁ କାର୍‍ତେ ପାର୍‍ତଡ଼୍ । 3 ଇଦ୍ ପରିଚୟ ଚିଟି କ୍ରିଷ୍ଟନ୍‍ ତଡ଼୍ କେତ୍‍ତାଦ୍ ନୁ ମାନ୍‍ ତଡ଼୍ ଅନାଦ୍‌ ବିଷୟ୍‍ତେ ମାଡ଼୍‍ତାଦ୍ । ଇଦ୍ କାରିଲାଦିନ୍‍ ତଡ଼୍ କେତ୍‍ତାଦ୍ ଆୟ୍‍ୟ, ବାତେଙ୍କ୍ ଇତ୍‍କେ ଜୀୱେମାନ୍ତାନ୍‌ ଇଶ୍ୱର୍‌ତେ ଆତ୍ମା ତଡ଼୍ ନାରିଡ଼୍ ଜିୱୁଣ୍ଡ୍‍ତାଗ୍ ଲେକାତ୍‍ତେ । 4 କ୍ରିଷ୍ଟନ୍ ଇସ୍ ଇଶ୍ୱର୍‌ତେ ପରୁ ଆଶେ ମାନ୍‍ନାଙ୍କ୍ ମାମ୍‍ମେ ଇୱୁସାରେ ମାଡ଼ୁତମ୍, 5 ମାମ୍‍ମେ ଯେ ନିଜେତାଦାଙ୍କ୍ ବାତେଏ ଉଦ୍‍ବାବନ୍ ମାଡ଼ାନଙ୍କ୍ ଇଚ୍ଛା, ଇଦ୍‍ଲେକାମ୍ ଆୟ୍‍ୟ, ମାତର୍ ମାୟାଦ୍‌ ଇଚ୍ଛା ଇଶ୍ୱର୍‌ତାଗେ; 6 ନୂତନ୍ ନିୟମ୍‌ତିଙ୍କ୍ ମେଣ୍ଡେଅଡ଼୍‌‍ତିଡ଼ାଗ୍ ମାନ୍‍ତଡ଼୍ ପ୍ରକାଶ୍ ମାଡ଼ାନ୍ ସେଙ୍ଗେ ଶକ୍ତି ଇତ୍‍ତନ୍ । ଇଦ୍ ନିୟମ୍ କେତ୍‍ତାଦ୍ ଆୟ୍‍ୟ, ମାତର୍ ଆତ୍ମାତଡ଼୍ ଲେକ୍‍ତାଦ୍‍; ବାତେଙ୍କ୍ ଇତ୍‍କେ କେତ୍‍ତାଦ୍ ନିୟମ୍ ଡଲାଙ୍କ୍ ମାଡ଼ିତ୍, ବାତେଙ୍କ୍ ଇତ୍‍କେ ଆତ୍ମାତେ ନିୟମ୍ ଜିୱୁନ୍ ସଂସାର୍‍ ମାଡ଼ିତ୍ ।

7 ମୋଶାନ୍‌ ନିୟମ୍ ସେବା ପାଡ଼୍‍ୟି ଅକର୍‍ତଡ଼୍‍ କାଲ୍‍ଦେ ପରୁ ଲେକ୍‍ତାଦ୍‍ ନିୟମ୍ ତିୟାର୍ ଆତ୍‍ତେୱେଲେ ଇଶ୍ୱର୍‌ତେ ଗୌରବ୍‌ ପେୟ୍‍ସ୍‍ମାତ୍‍ତେ । ଆଦ୍ ଗୌରବ୍‌ ୱେଇସ୍ ଇକାଡ଼୍ ଆସ୍‍ମାତ୍‍କେବା ମୋଶାନ୍‌ ୱେଇସ୍‍ତେ ପାକ୍ ଇସ୍ରାଏଲ୍‌ ନାରୁଡ଼୍ ଆଲ୍‍ସେପାର୍‍ୱେ ମାତ୍‍ତଡ଼୍ । ଡଲ୍‍ନାଦ୍ ନିୟମ୍ ଯଦି ଇଲା ଗୌରବ୍ ପାଏମ୍ ଆତ୍‍ତେ, 8 ଆଲେକେ ପବିତ୍ର ଆତ୍ମାତେ ପାଡ଼୍‍ୟି ସାର୍‍ରେ ଅନାଗାଙ୍କ୍ ବେସର୍ ଅଦିକ୍‌ ଗୌରବ୍‍ତେ ତିଆର୍ ଆଦ୍‍ତେ ! 9 ଦଣ୍ଡ୍‌ ଇଦାନ୍‌ ନିୟମ୍‌ ସେବା ପାଡ଼୍‍ୟି ଯଦି ଇସର୍ ଗୌରବ୍ ଆତ୍‍ତେ, ଆଲେକେ ଇଶ୍ୱର୍‌ତେ ପରିତ୍ରାଣ୍ ନିୟମ୍ ପ୍ରତିଷ୍ଠା ମେଣ୍ଡେ ବେସର୍ ଗୌରବ୍ ଆୟ୍‍ୟ ! 10 ପାଃନ୍ତେ ନିୟମ୍‍ତାଦ୍ ମହିମା ପୁନାଦ୍ ନିୟମ୍‍ତାଗାଙ୍କ୍ ସୁଦୁର୍ ଆତ୍‍ତେ । 11 ଯଦି ଆଦାନ୍‍ ବିଷୟ ଇସର୍ ଗୌରବ୍ ଆତ୍‍ତେ, ସାରେଦିନାଦ୍ ବିଷୟ ଇଦିନାଗାଙ୍ଗ୍ ବେସର୍ ଗୁନ୍‍ତେ ଗୌରବ୍ କାଇଲି ଆଦ୍‍ତେ !

12 ଆଦ୍‍ ଆଶେ ମାନ୍‍ନାଙ୍କ୍ ମାମ୍‍ମେ ଅଦିକ୍‌ ସାହାସ୍ । 13 ମାମ୍‍ମେ ମୋଶାନ୍ ଲେକାମ୍ ଇଲାମ୍ । ଅଣ୍ଡ୍‌ ତାନ୍ ମକମ୍‍ତିଙ୍କ୍ ମୁସିମାତ୍‍ତନ୍, ବେଲାନ୍ ମୁର୍‍କ୍ ଆସ୍ ରାଲିମାନ୍ଦାନ୍ ଆଦ୍ ୱେସ୍‍ତେ ଅବସାନତେ ଇସ୍ରାଏଲ୍‌ତେ ନାରୁଡ଼୍ ଉଡ଼େ ପାର୍‍ୱଡ଼୍ । 14 ମୁନେଙ୍କ୍ ଅଡ଼ାଦ୍‌ ଆୱୁକାନ୍‍ ଶକ୍ତି ମାଇମାତ୍‍ତେ । ଇଞ୍ଜେ ମିକା ପାଃନ୍ତେ ନିୟମ୍‌ କାର୍‍ତାନ୍‍ ସମୟ୍‍ତେ ଅଡ଼୍‌‍ମୁନେ ଆଦ୍ ମୁସି ଆସ୍‍ ମାତ୍‍ତେ । ଜିସୁ କ୍ରିଷ୍ଟନ୍ ତଡ଼୍ କାଇଲି ମାନ୍‍ନାଙ୍କ୍ ମାତର୍ ଆଦ୍ ଆବରନ୍ ଉନ୍ମୋଚିତ୍ ଆଦ୍‍ତେ । 15 ନେଣ୍ଡ୍ ମିକା ମୋଶାନ୍‌ ବ୍ୟବସ୍ଥା କାର୍‍ସମାନ୍ଦାନ୍ ୱେଲେ ଅଡ଼ାଦ୍‌ ମନ୍ ପରୁ ମାନ୍‍ତେ ୱେରଡ଼୍ ଆବରନ୍ । 16 ବାତେଙ୍କ୍ ଇତ୍‍କେ ଦର୍ମଶାସ୍ତ୍ର କେତିତ୍‍, "ବେନଡ଼୍ ଇଶ୍ୱର୍‌ତେ ପାକେ ମାଲ୍‍ଦ୍‍ତଡ଼୍, ଅଡ଼ାଦ୍‌ ଲେକେତାଦ୍ ସିଲ୍‍ ମୁସିତ୍‌ତାଦ୍ ତନ୍ଦ୍‍ୱେ ପାର୍‍ତେ ।" 17 ଇଦ୍ ଶାସ୍ତ୍ରାଂଶତାଗ୍ ଲେକାମିନ୍ତେ, "ପ୍ରବୁ," ଆଦୁତନ୍ "ଆତ୍ମା ।" ବେଗେ ପ୍ରବୁନ୍ ଆତ୍ମା, ଆଗେ ମାନ୍‍ତେ ସ୍ୱାଦିନ୍‍ତା । 18 ମାନାଡ଼୍ ସାରେତଡ଼୍ ମକମ୍‍ତେ ଦାର୍ପୁନ୍‍ତାଗ୍ ଉଡ଼ାନ୍ ଲେକାମ୍ ପ୍ରବୁନ୍ ଗୌରବ୍ ତଅନ୍‌ଦୁତ୍ ନୁ ପ୍ରବୁନାଗାଙ୍କ୍ ପେୟ୍‍ତାଦ୍ ଆଦ୍ ମାଇମାତେ ତଡ଼୍ ମାନାଡ଼୍ କାମ୍‍କେ ଲେକାମ୍ ଅନ୍‌ ରକମ୍‌ ବାଦ୍‍ଲେମ୍ ଆଦୁତ୍‍ତେ ।