2 Coríntios 11

ପାଉଲ୍ ନୁ ବଣ୍ଡ ଶିଷ୍ୟ

1 ନାନ୍ ଇଚ୍ଛା ମାଡ଼ୁତାନ୍, ବାତେବା ବିଷୟ୍‍ତେ ସୁଦୁର୍‌ ମଣ୍ଡି ଆତ୍‍କେ ମିକା ମିଇଡ଼୍ ନାକିଂଙ୍କ୍ ସାରେ ମାଡ଼ିତିଡ଼୍ । 2 ମିଇ ମୁନ୍‍ନେ ୱେରଡ଼୍ ଐଶ୍ୱରିକ୍ ଇର୍ଷାତେ ନା ହୃଦୟ୍‍ତାଗ୍ ମିନ୍ଦେ । ବାତେଙ୍କ୍‍ଇତ୍‍କେ ମିଇଡ଼୍ ପବିତ୍ର କୁମାରି ପିକ୍‍ତେ ଲେକାମ୍ । ୱେରଡ଼୍ ମାତର୍ କ୍ରିଷ୍ଟନ୍‍ ତଡ଼୍ ମିୟାଦ୍ କାଲ୍‍ପିଦାନ୍‍ ସେଙ୍ଗେ ନାନ୍‍ନେ ପ୍ରତିଜ୍ଞା ମାଡ଼୍‍ତାନ୍ । 3 ନାକିଂଙ୍କ୍ ୱେର୍‌ ୱେସୁତ୍, ତାଡ଼ାମ୍‍ତେ ଚାଲାକ୍ ତଡ଼୍ ପ୍ରତାରିତ ଆଦ୍‍ଦାନ୍ ଲେକାମ୍ ମିଡ଼୍ ବେସୁଙ୍କ୍‍ କ୍ରିଷ୍ଟନ୍‍ ସେଙ୍ଗେ ମିୟାଦ୍ ସାରେ ସରଲ୍‍ ବିଶ୍ୱାସ୍‍ତେ ମାର୍‌ଙ୍ଗି ଆଦ୍‍ତିଡ଼୍ । 4 ବାତେଙ୍କ୍‍ଇତ୍କେ ବେନ ଯଦି ୱାସ୍ ମାମ୍‍ମେ ପ୍ରଚାର୍ ମାଡ଼ିମାନ୍ଦାନ୍ ଜିସୁଙ୍କ୍ ୱିଡ଼୍‍ସି ମେଣ୍ଡେ ବେନନ୍ ଜିସୁନ୍ ଗଟ୍ ପ୍ରଚାର୍ ମାଡ଼ିତନ୍ ବା ମିଇଡ଼୍ ଦର୍‍ସ୍‍କି ମାନ୍ଦାନ୍ ପବିତ୍ରଆତ୍ମା ୱିଡ଼୍‍ସି ମେଣ୍ଡନ୍ ବେନ୍ ଆତ୍ମାତେ ଗଟି କେତିତଡ଼୍‍ ବା ମିଡ଼୍ ଗ୍ରହନ୍ ମାଡ଼ିମାନ୍ଦାନ୍ ସୁସମାଚାର୍ ୱିଡ଼୍‍ସି ବେନେବା ସୁସମାଚାର୍‌ ପ୍ରଚାର୍ ମାଡ଼ିତଡ଼୍, ମିଡ଼୍ ଆଦ୍ ଗ୍ରହନ୍ ମାଡ଼ିମାନୁଟ୍ ।

5 ମିୟାଦ୍ ଆଦ୍ ବିଶିଷ୍ଟ ପ୍ରେରିତ ଶିଷ୍ୟଡ଼ାଗାଙ୍କ୍ ନାନ୍‍ନେ ବେନ୍ ବା ଗୁଣତେ ନିକୃଷ୍ଟ ଇଞ୍ଜ ଆଲ୍‍ସନ୍ । 6 ନାନ୍ ଅଡ଼୍‌‍ଲେକାମ୍ ବାକ୍‍ପଟୁ ଆଦେ ପାର୍ୱନ୍, ବାତେଙ୍କ୍ ଇତ୍‍କେ ନାନ୍ ବୁଦ୍‍ତେ ନିସ୍‌ଟୁର୍‌ ଆୟନ୍ । ମିକିଂଙ୍କ୍ ଇଦ୍ ଗଟ୍ ମାମ୍‍ମେ ସାରେଦାମ୍ ନୁ ସାରେ ସମୟ୍‍ତେ କେସ ୱାଦୁତମ୍‍ ।

7 ଇଶ୍ୱର୍‌ତେ ସୁସମାଚାର୍‌ ପ୍ରଚାର୍ ମାଡ଼ାନ୍ ୱେଲେ ନାନ୍ ମିଇୟାଗାଙ୍କ୍ ଇଦିନ୍ ମୁଲ୍ୟ ଦାବୀ ମାଡ଼ନ୍ । ମୀଇୟାଦ୍ ଉନ୍ନତି ସେଙ୍ଗେ ନାନ୍ ନିଜେତିଙ୍ଗ୍ ଅବନତ୍ ମାଡ଼୍‍ତାନ୍ । ଇଦ୍ ବାତେଏ ନାୟାଦ୍ ପାପ୍‌ ? 8 ମିଇୟାଗେ ପାଡ଼୍‍ୟି ମାଡ଼ାନ୍ ୱେଲେ ନାନ୍ ବାଗାତ୍ ମଣ୍ଡଲିନାଗାଙ୍କ୍ ଆର୍ତିକ ସାହାଯ୍ୟ ପାଏମ୍ ଆତ୍‍ତାନ୍ । କେତାଙ୍କ୍ ଆତ୍‍କେ, ମିୟାଦ୍ ଉପକାର୍ ସେଙ୍ଗେ ନାନ୍ ଅଡ଼୍‌‍କିଂଙ୍କ୍ ଲୁଣ୍ଠନ୍ ମାଡ଼୍‍ତାନ୍ । 9 ✝୧୧:୯ ଫିଲିପିୟ ୪:୧୫-୧୮.ମୀଇତଡ଼୍ ମାନ୍ଦାନ୍ ୱେଲେ ନାୟାଦ୍ ସାରେ ଅବାବ୍ ସେଙ୍ଗେ ନାନ୍ ବେନଙ୍କ୍ ବାରଗ୍ରସ୍ତ ମାଡ଼ନ୍ । ବାତେଙ୍କ୍‍ଇତ୍କେ ମାସିଦୋନିଆତାଗାଙ୍କ୍ ୱାସ୍‍ମାନ୍ଦାନ୍ ଦାଦାନଡ଼୍ ନାୟାଦ୍ ସାରେ ଅବାବ୍ ମେଣ୍ଟାଇ ଇସ୍‍ମାତ୍‍ତଡ଼୍ । ଅତିତି ଲେକାମ୍ ବବିଷ୍ୟତ୍‍ତେ ମିକା ନାନ୍ ବେସୁଙ୍କ୍‌ବା ମିକିଂଙ୍କ୍ ବାରଗ୍ରସ୍ତ ମାଡ଼ନ୍ । 10 ନା ହୃଦୟ୍‍ତାଗ୍ ମାନ୍ଦାନ୍ କ୍ରିଷ୍ଟନାଦ୍ ସତ୍ୟତେ ନର୍‍ସ୍‍ ମିକା ନାନ୍ ପ୍ରତିଜ୍ଞା ମାଡ଼ି କେତୁତାନ୍ ଯେ, ଆକାୟା ଦେଶ୍‍ତେ ବେନେବା ନାର୍‍ଦାଗ୍ ନାୟାଦ୍ ଇଦ୍ ଗର୍ବତିଙ୍କ୍ ବେନ କଣ୍ଡନ୍‌ ମାଡ଼େ ପାର୍‍ୱଡ଼୍ । 11 ନାନ୍ ବାତେଙ୍କ୍ ଇଦ୍‍ଲେକାମ୍ କେତୁତାନ୍ ? ନାନ୍ ବାତେଏ ମିଇକିଙ୍କ୍ ପ୍ରେମ ମାଡ଼ନ୍ ? ଇଶ୍ୱର୍ ପୁତ୍‍ତନ୍, ମିଇକିଙ୍କ୍ ନାନ୍ ବେସର୍ ପ୍ରେମ ମାଡ଼ୁତାନ୍ ।

12 ବାତେଙ୍କ୍ ଇତ୍‍କେ ଇଞ୍ଜେ ନାନ୍ ବାତେ ମାଡ଼ୁତାନ୍, ଆଦ୍ ମାଡ଼ ମାନ୍‍ତାନ୍ । ଆଲେକେ, ମାନ୍‍ ଲେକାମ୍ ପାଡ଼୍‍ୟି ମାଡ଼ୁତଡ଼୍ ଇଞ୍ଜ ବେନଡ଼୍ ଗର୍ବ ମାଡ଼ିତଡ଼୍, ଅଡ଼୍‌ ମେଣ୍ଡେ ଆଦ୍ ମେଣ୍ଡେ ମାଡ଼େପାର୍‍ୱଡ଼୍ । 13 ଅଡ଼୍‌ ମୁନେଙ୍କ୍ କଞ୍ଜ୍ ଶିଷ୍ୟ ଆୟ୍‍ୟଡ଼୍, ଅଡ଼୍‌ ସାରେତଡ଼୍ ଟକୁୱାନଡ଼୍‌ । ଅଡ଼୍‌ ନିଜେତ୍ ପାଡ଼୍‍ୟି ବିଷୟ୍‍ତେ ମିଚ୍‍ କେତିତଡ଼୍‍ ନୁ କ୍ରିଷ୍ଟଙ୍କ୍ ପ୍ରେରିତ୍ ଶିଷ୍ୟ ଲେକାମ୍ ଉଡ଼ାନ୍ ସେଙ୍ଗେ ସଦ୍ମଦାନ୍ କେର୍‍ତଡ଼୍ । 14 ଇଗେ ବାକ୍‍ୱା ଆଦାନାଦ୍ ବାତେଏ ଆୟ୍‍ୟ, ବାତେଙ୍କ୍ ଇତ୍‍କେ ଶୟ୍‍ତାନ୍‍ ମିକା ୱେସ୍‍ତେ ଜତିର୍ମୟ ସ୍ୱର୍ଗଦୂତନ୍ ଲେକାମ୍ ତନ୍ଦାନ୍ ସେଙ୍ଗେ ସଦ୍ମବେଶ ଲେକାମ୍ ୱାଦ୍‍ତା । 15 ଆଦିଙ୍କ୍ ତାନ୍ ପେର୍‍କେ ଆଦାନଡ଼୍ ଦାର୍ମିକ୍ ସେବାନଡ଼୍ ସଦ୍ମବେଶ ୱାତ୍‍କେ, ଆଶ୍ୱର୍ଯ୍ୟ ଆଦାନାଦ୍ ବାତେଏ ଆୟ୍‍ୟ, ବାତେଙ୍କ୍ ଇତ୍‍କେ ପେର୍‍କେ କାମ୍‍ତେ ଯୋଗ୍ୟତେ ଦଣ୍ଡ୍ ଅଡ଼୍‌ ଆଦ୍‍ତଡ଼୍ ।

ପ୍ରେରିତ୍ ଶିଷ୍ୟଲେକାମ୍ ପାଉଲ୍‍ତେ କଷ୍ଟ

16 ନାନ୍ ମେଣ୍ଡନ୍‍ନ୍ଦାମ୍ କେତୁତାନ୍, ବେନ ବେଲାନ୍ ନାକିଂଙ୍କ୍ ମଣ୍ଡି ଇଞ୍ଜ ହେର୍କା ମାଡ଼ଣ୍ଡ୍ । ଯଦି ଆଦ୍‍ଲେକାମ୍ ଏର୍କା ମାଡ଼ାଟ୍, ଆଲେକେ ନାକିଂଙ୍କ୍ ମଣ୍ଡି ଲେକାମ୍ ଗ୍ରହନ୍‍ ମାଡ଼ାଟ୍, ଆଲେକେ ନାନ୍ ଦର୍ପ ମାଡ଼ାନଙ୍କ୍ ସାମାନ୍ୟ ସୁଯୋଗ୍ ପାଏମ୍ ଆଦ୍‍ତନ୍ । 17 ନିଜାମ୍ ଇଞ୍ଜେ ନାନ୍ ବାତ୍‍କେତୁତାନ୍, ଆଦିନ୍ ସେଙ୍ଗେ ପ୍ରବୁ ନାକିଂଙ୍କ୍ ଗଟ୍ ଇୱଣ୍ଡ୍ । ବାତେଙ୍କ୍‍ଇତ୍କେ ଗର୍ବ ମାଡ଼ାନ୍ ବିଷୟ୍‍ତେ ନାନ୍ ପ୍ରକୃତ୍‍ତେ ମୁର୍କ ନାରିନ୍‍ ଲେକାମ୍ ଗଟି କେତୁତାନ୍ । 18 ବାତେଙ୍କ୍ ଇତ୍‍କେ ଜାଗତିକ୍ ବିଷୟ୍‍ତେ ନାର୍‍ଗେ ବେଲାନ୍ ଗର୍ବ ମାଡ଼ିତଡ଼୍, ନାନ୍ ମିକା ଆଦେଲେକାମ୍ ମାଡ଼େ ପାର୍‍ଦ୍‍ତାନ୍ । 19 ମୀଇଡ଼୍ ଜ୍ଞାନି ଆସ୍ ମିକା ୱେଡ଼୍‍କେତେ ମୁର୍କନଡ଼କ୍‍ ସାରେ ମାଡ଼ୁତିଡ଼୍ । 20 ବେନ୍ ମିଇ ପରୁ ଦାସ ଲେକାମ୍ ପ୍ରବୁତ୍ୱ ବିସ୍ତାର୍‍ ମାଡ଼୍‍କେ, ମୀଇୟାଦ୍ ସାରେପାକ୍ ଆଦ୍‍ପ୍ତା ମାଡ଼୍‍କେ, ମିକିଂଙ୍କ୍ ଉଡ଼ୀଇଦାଗ୍ ୱାଟ୍‍କେ, ମିକିଂଙ୍କ୍ ଗୃଣାମାଡ଼୍‍କେ, ଇଦ୍‍ଲେକାମ୍ କି ମିଇ ବୁକ୍‍ତାଗ୍ ଚାପୁଡ଼ା ରେହେକେ ମିକା ମିଡ଼୍ ଅଂକିଙ୍କ୍‌ ବର୍‍ଦାସ୍ ମାଡ଼ିତିଡ଼୍ । 21 ନାନ୍ ସିଗ୍‍ତଡ଼୍ ସ୍ୱୀକାର୍ ମାଡ଼୍‍ତାନ୍ ଯେ, ଇଦ୍‍ସାରେ ବିଷୟ୍‍ତେ ନାନ୍ ଅଦିକ୍‌ ଦୁର୍ବଲ୍‍ । ବାତେଙ୍କ୍ ଇତ୍‍କେ ମେଣ୍ଡେ ବେନ୍ ବିଷୟ୍‍ତେ ବେନ ଯଦି ଦର୍ପ ମାଡ଼ାଙ୍କ୍ ଶକ୍ତି ମାଡ଼ିତନ୍, ଆଲେକେ ମଣ୍ଡିନ୍‍ ଲେକାମ୍ ନାନ୍ କେତୁତାନ୍ ନାୟାଦ୍ ଆଦ୍‍ଲେକାମ୍ ଶକ୍ତିମିନ୍ଦେ । 22 ଅଡ଼୍‌ ବାତେଏ ଏବ୍ରିୟ ? ନାନ୍ ମିକା ଏବ୍ରିୟ । ଅଡ଼୍‌ ବାତେଏ ଇସ୍ରାଏଲିୟ ? ନାନ୍ ମିକା ଇସ୍ରାଏଲିୟ । ଅଡ଼୍‌ ବାତେଏ ଅବ୍ରାହାମ୍‍ତେ ବଂଶତଡ଼୍ ? ନାନ୍ ମିକା ଅବ୍ରାହାମ୍‍ତେ ବଂଶତନ୍ । 23 ✝୧୧:୨3 ପ୍ରେରିତ ୧୬:୨3.ଅଡ଼୍‌ ବାତେଏ କ୍ରିଷ୍ଟନ୍‍ ସେବାତଡ଼୍ ? ନାନ୍ ବାୟାନ୍ ଲେକାମ୍ କେତୁତାନ୍, ନାନ୍ ଅଡ଼୍‌‍ଆଗାଙ୍କ୍ ଲେକେତ୍ ଦାସ । ନାନ୍ ଅଡ଼୍‌‍ଆଗାଙ୍କ୍ ଅଦିକ୍‌ କଷ୍ଟ ମାଡ଼୍‍ତାନ୍, ଅଦିକ୍‌ ଜେଲ୍‍ଦାଗ୍ ମାତ୍‍ତାନ୍ ନୁ ବେତଦେବେ ତିତ୍‍ତାନ୍ ନୁ ନାର୍ଗେଦାମ୍ ଡଲାନ୍ ଲେକାମ୍ ଆସ୍‍ମାତାନ୍ । 24 ଏଇଙ୍ଗ୍ ଦାମ୍ ନାନ୍ ଯିହୁଦିଡ଼ାଗାଙ୍କ୍ ତିରିଶ୍‍ ନଅଟାନ୍ ବେତଦେବ୍ ତିତ୍‍ତାନ୍ । 25 ✝୧୧:୨୫ ପ୍ରେରିତ ୧୬:୨୨; ପ୍ରେରିତ ୧୪:୧୯.ରୋମିୟ ନାରୁଡ଼ାଗାଙ୍କ୍ ମୁଣ୍ଡ୍‍ଦାମ୍ ଚାବୁକ୍‍ତେ ଦେବ୍‍ତିତ୍‍ତାନ୍ । ଅଣ୍ଡ୍‌ ଦାମ୍ କାଲ୍‍କିନ୍ ତୋଡ଼୍‍ ଦେବା ତିତ୍‍ତାନ୍ । ମୁଣ୍ଡ୍ ଦାମ୍ ଜାହାଜ୍ ଦୁର୍ଗଟନାତେ ମୁନେ ଆତ୍‍ତାନ୍ ନୁ ଅଣ୍ଡ୍‌ ଦାମ୍ ସମୁଦ୍ର ଏର୍‍ଦାଗ୍ ନାର୍‍କେତ୍ ପାୟାଲ୍ ବା ଚବିଶ୍‍ ଗାଣ୍ଟା କାଟେମ୍ ଆତ୍‍ତାନ୍ । 26 ✝୧୧:୨୬ ପ୍ରେରିତ ୯:୨3; ପ୍ରେରିତ ୧୪:୫.ନାର୍‍ଗେ ଦାମ୍ ଆଦାନ୍ ୱେଲେ ସମୁଦ୍ର ନାଡ଼୍‍ମେ, ଦସ୍ୟୁନଡ଼୍ କାଇଦେ, ସ୍ୱଜାତି ଇହୁଦି ନୁ ବିଜାତିନଡ଼୍ କାଇଦେ, ନାର୍‍ଦାଗ୍ ନୁ ପ୍ରାନ୍ତର୍‍ତାଗ୍, ସମୁଦ୍ରତାଗ୍‍, ପଟ୍‍କାର୍ ବନ୍ଦୁନଡ଼୍‍ ତ ବିପଦ୍‍ତାଗ୍‍ ମୁନେ ଆତ୍‍ତାନ୍ । 27 ଗାଟି ତିପାଲ୍ ଆତ୍‍ତାନ୍ ନୁ ଦୁଃକାମ୍ କଷ୍ଟ ଆତ୍‍ତାନ୍, ଉସ୍କାଡ଼୍‍ତେ ନୁ କାର୍‍ୱିନ୍ ଏର୍‍ ଉନ୍‍ୱେ ନାର୍‍ଗେ ଦିନା କଟେମ୍‍ ଆତ୍‍ତାନ୍, ଲେକେତ୍‍ କାଦି, ଚକା ନୁ ମାନ୍ଦାନ୍ ପଡ଼ିୟେ ଅବାବ୍‍ତେ ନାର୍‍ଗେ କଷ୍ଟ ଆତ୍‍ତାନ୍ । 28 ଆଦେଲେକାମ୍ ସାରେ ମଣ୍ଡଲି ସେଙ୍ଗେ ନ୍ନାୟାଦ୍ ଦାୟିତ୍ୱ ସାରେଦିନ୍ ବହନ୍ ମାଡ଼ି ଚାଲେମ୍ ଆତ୍‍ତେ । 29 ବେନ ଯଦି ଦୁର୍ବଲ୍ ଆସ୍‍ମାନ୍‍ନ୍ତନ୍, ନାନ୍ ମିକା ଅନ୍‌‍ତଡ଼୍ ଦୁର୍ବଲ୍‍ ଲେକାମ୍ ଏର୍କା ମାଡ଼ିତାନ୍ । ବେନ ପାପ୍ ମାଡ଼୍‍କେ, ନାନ୍ ଜିୱେତାଗ୍ ଦୁଃକାମ୍ ଏର୍କା ମାଡ଼ିତାନ୍ ।

30 ଯଦି ଦର୍ପ ମାଡ଼ାଙ୍କ୍ ଆତ୍‍କେ, ଆଲେକେ ନା ଇୱୁସାରେ ଦୁର୍ବଲ୍‍ତେ ସେଙ୍ଗେ ନାକିଂଙ୍କ୍ ଦର୍ପ ମାଡ଼ାଙ୍କ୍ ଆଦ୍‍ତେ । 31 ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଇଶ୍ୱର୍ ଯୁଗ୍‌ଯୁଗ୍‌ ଦନ୍ୟ ଆଇନା । ଅଣ୍ଡ୍‌ ପୁତ୍‍ତନ୍ ଯେ, ନାନ୍ ମିଚ୍‌ କେଲନ୍ । 32 ✝୧୧:3୨ ପ୍ରେରିତ ୯:୨3-୨୫.ନାନ୍ ଦାମାସ୍‍କସ୍‍ ତାଗେ ମାନ୍ଦାନ୍ ୱେଲେ ରାଜା ଆରେଟସ୍‍ତେ ଗଟ୍‍ତେ ଶାସନ୍‍କର୍ତ୍ତାଲ୍ ନାକିଂଙ୍କ୍ ଗିରାପ୍ ମାଡ଼ାନ୍ ସେଙ୍ଗେ ନଗର୍‍ତେ ସାରେପାକେ କେପାନଡ଼୍‍କିଙ୍କ୍ ଏଞ୍ଚି ମାତ୍‍ତନ୍ । 33 ବାତେଙ୍କ୍ ଇତ୍କେ ନାକିଂଙ୍କ୍ ଜୁଡ଼ି ସାହାଯ୍ୟତେ ନଗର୍‍ତେ ନେଟେତ୍‌ ଜର୍‍କା ବାଇଦେ ୱେହେସ୍‍ ମାତ୍‍ତଡ଼୍ । ଇଦ୍ ଲେକାମ୍‍ତେ ନାନ୍ ଆଦ୍ ଶାସନ୍‍କର୍ତ୍ତାନ୍ କାଇଦାଗାଙ୍କ୍ ରକ୍ଷା ପାଏମ୍ ଆତ୍‍ତାନ୍ ।