1 ବାତେଏ ଲାବ୍ ଆୟକ୍‍ ମିକା ନାକିଂଙ୍କ୍ ନିଜାମ୍ ଦର୍ପ ମାଡ଼ାଙ୍କ୍ ଆଦ୍‍ତେ । ବାତେଙ୍କ୍ ଇତ୍‍କେ ପ୍ରବୁ ନାକିଂଙ୍କ୍ ବେନ୍‍ସାରେ ବିଦ୍ୟା ଇତ୍‍ତନ୍ ନୁ ପ୍ରତ୍ୟାଦେଶ୍‍ ଇତ୍‍ତନ୍, ହାଉସାରେ ଇଞ୍ଜେ ନାନ୍ ଲେକିତାନ୍ । 2 କ୍ରିଷ୍ଟନ୍‍ ୱେରଣ୍ଡ୍ ନାରୁଡ଼୍ ଚଉଦ ୱାଡ଼୍‍ଷା ମୁନେଙ୍କ୍ ତୃତୀୟସ୍ୱର୍ଗ ଯାକ ଆଞ୍ଜ୍‍ମାତ୍‍ତନ୍ ଅଣ୍ଡ୍‌ ମେନ୍ଦୁଲ୍‍ତେ ଆଞ୍ଜମାତ୍‍ତଣ୍ଡ୍ ବାତେଙ୍କ୍ ଇତ୍‍କେ ଦର୍ଶନ୍ ଉଡ଼ିମାତ୍‍ତଣ୍ଡ୍, ନାନ୍ ପୁନନ୍, ଆଦ୍ ମାତର୍ ଇଶ୍ୱର୍ ପୁତ୍‍ତନ୍ । 3 ହଁ ନାନ୍ ପୁତ୍‍ତାନ୍, ଅଣ୍ଡ୍‌ ଅଂକିଙ୍କ୍‌ ସ୍ୱର୍ଗତାଗେ ଆସ୍‍ମାତ୍‍ତନ୍ ଇଦ୍ ମୁନେଙ୍କ୍ ପୁତ୍‍ତାନ୍ ଅଣ୍ଡ୍‌ ଗଟେମ୍ ଆସ୍‍ମାତ୍‍ତେ ଆଦ୍ ଦର୍ଶନ୍ ଉଡ଼ିମାତ୍‍ତନ୍, ନାନ୍ ପୁନନ୍, ମାତର୍ ଇଶ୍ୱର୍ ପୁତ୍‍ତନ୍ । 4 ଆଗେ ଅଣ୍ଡ୍‌ ଗଟି କେତ୍‍ତେ ପାର୍‍ୱାଦ୍ ନୁ ଲେଙ୍ଗ୍ ମାଡ଼୍‍ୱେ ପାର୍‍ୱାଦ୍ ଲେକାମ୍ କେଞ୍ଜାଙ୍କ୍‍ ପାର୍‍ତନ୍ । 5 ଇ ନାରିନ୍ ସେଙ୍ଗେ ନାନ୍ ଗର୍ବ ମାଡ଼ିତାନ୍ । ବାତେଙ୍କ୍ ଇତ୍‍କେ ନିଜେତ୍ ଦୁର୍ବଲ୍‍ତେ ସେଙ୍ଗେ ମେଣ୍ଡେ ବାତେଏ ବିଷୟ୍‍ତେ ନାନ୍ ଗର୍ବ ମାଡ଼ନ୍ । 6 ଗର୍ବ ମାଡ଼ାନାଦ୍ ନା ପାକେ ମୁର୍କ ଆୟନ୍‍ଣ୍ଡ୍‍, ବାତେଙ୍କ୍ ଇତ୍‍କେ ନାନ୍ ସତ୍‍ଗଟ୍ କେତିତାନ୍ । ବାତେଙ୍କ୍ ଇତ୍‍କେ ନାନ୍ ଗର୍ବ ମାଡ଼ନ୍, ବାତେଙ୍କ୍‍ଇତ୍କେ ନାନ୍ ଆଲ୍‍ସୁତାନ୍, ନାରୁଡ଼୍ ନାକିଂଙ୍କ୍ ବେଲାନ୍ ପାଡ଼୍‍ୟି ମାଡ଼ାନାଦ୍ ଉଡ଼ିତଡ଼୍ ବା ନାୟାଗ୍ କଞ୍ଜ୍ ବେଲାନ୍ ଗଟ୍ କେଞ୍ଜିତଡ଼୍, ଆଗେଙ୍କ୍ ନାକିଂଙ୍କ୍ ବେଡ଼୍‍ୟନ୍ ଇଞ୍ଜ ଏର୍କା ମାଡ଼୍‍ମାକିଡ଼୍‍ ।

7 ଇଦ୍ ବାଗାତ୍ ମାନ୍ଦାନ୍ ଦେଶ୍‍କିନାଗ୍ ଲାବ୍ ମାଡ଼ି ନାନ୍ ବେଲାନ୍ ଆଂକାର୍ ଆଦାଙ୍କ୍‍ ଆୟ୍‍ୟ, ଆଦିନ୍ ସେଙ୍ଗେ ନା ମେନ୍ଦୁଲ୍‍ତାଗ୍ ୱେରଡ଼୍ ଯନ୍ତ୍ରନାଲେକାତ୍ ବ୍ୟାଦି ଇତ୍‍ତଡ଼୍, ଇଦ୍ ନାକିଂଙ୍କ୍ ଆଶେ ଆୟ୍‍ୱାଙ୍କ୍ ଶୟତାନ୍‍ତେ ଦୂତ୍‍ତିଙ୍କ୍ ରତ୍‍ତତେ । 8 ଆଦିଙ୍କ୍ ନାନ୍ ଅନାଗାଙ୍କ୍ ଯେକେ ଆଦାନ୍ ସେଙ୍ଗେ ନାନ୍‍ନେ ପ୍ରବୁନାଗେ ଆଦ୍ ବିଷୟ୍‍ତେ ମୁଣ୍ଡ୍‍ଦାମ୍ ପ୍ରାର୍ତନା ମାଡ଼ିତାନ୍, 9 ବାତେଙ୍କ୍ ଇତ୍‍କେ ଅଣ୍ଡ୍‌ ନାକିଂଙ୍କ୍ କେତ୍‍କେ, "ନାୟାଦ୍ ଅନୁଗ୍ରହ ମିଇ ସେଙ୍ଗେ ଆଦ୍‍ତେ, ବାତ୍‍ତିଙ୍କ୍‍ଇତ୍କେ ମିୟାଦ୍ ଦୁର୍ବଲତାତେ ମାୟାଦ୍‌ ଶକ୍ତି ସିଦ୍ଦ ଆଦ୍‍ତେ ।" ଆଦିଙ୍କ୍ କ୍ରିଷ୍ଟନ୍ ଶକ୍ତି ନାୟାଗେ ଅଦିଷ୍ଟାନ୍ ମାଡ଼ାନ୍ ସେଙ୍ଗେ ନାନ୍ ନାୟାଦ୍ ଦୁର୍ବଲ୍‍ତାଦ୍ ସେଙ୍ଗେ ଅଦିକ୍‌ ଗର୍ବ ମାଡ଼ିତାନ୍ ନୁ ୱେଡ଼େକେ ମାଡ଼ିତାନ୍ । 10 କ୍ରିଷ୍ଟନ୍‍ ସେଙ୍ଗେ ସାରେଲେକାମ୍ ଦୁର୍ବଲ୍‍ତେ, ଅପ୍‍ମାନ୍, କଷ୍ଟ, ଗାଟିତିପାଲ୍ ନୁ ଆପଦ୍ ବିପଦ୍ ନାନ୍ ସୁକାମ୍‍ତେ ମାନ୍‍ତାନ୍, ବାତେଙ୍କ୍‍ଇତ୍କେ ବେସୁଙ୍କ୍‍ ନାନ୍ ଦୁର୍ବଲ୍‍, ଆସୁଙ୍କ୍ ନାନ୍‍ନେ ଶକ୍ତିନଡ଼୍ ।

11 ନାନ୍‍ନେ ମଣ୍ଡିନ୍‍ ଲେକାମ୍ ଆଚରନ୍ ମାଡ଼୍‍ତାନ୍ । ଇଦ୍ ମାଡ଼ାନ୍ ସେଙ୍ଗେ ମିଡ଼୍ ନାକିଂଙ୍କ୍ ଦାନ୍ଦେ ମାଡ଼୍‍ତିଡ଼୍, ବାତେଙ୍କ୍‍ଇତ୍‍କେ ନାୟାଦ୍ ପ୍ରସଂଶା ମାଡ଼ାନାଦ୍ ମିୟାଦ୍ ନିୟମ୍ ମାତ୍‍ତେ । ନାନ୍‍ନେ ବାତେଏ ଆୟକ୍‍ ମିକା ମିୟାଦ୍ ଆଦ୍ ମାନ୍ଦାନ୍ "ପ୍ରେରିତ୍ ଶିଷ୍ୟନଡ଼ାଗାଙ୍କ୍," ବାତେଏ ବା ଗୁନତେ ନିକୃଷ୍ଟ ଆୟ୍‍ୟ । 12 ମିୟାଗ୍‍ ମାନ୍ଦାନ୍ ଦର୍‍ଯ୍ୟତେ ନାର୍‍ଗେ ବାକ୍‍ୱା ଆଦାନ୍ ପାଡ଼୍‍ୟି ତିଆର୍ ମାଡ଼ି ନାର୍‍ଗେ ଆଦ୍‍ବୁତ୍‌ ବିଷୟ ତଡ଼୍ ନାନ୍ ଯେ ମୁନେତ୍‍କଞ୍ଜ୍ ପ୍ରେରିତ୍ ଶିଷ୍ୟ, ଇଦିନ୍ ନିଦର୍ଶନ ଇତ୍‍ତନ୍ । 13 ମାତର୍ ୱେରଡ଼୍ ବିଷୟ୍‍ତେ ବାଗାତଡ଼୍ ମଣ୍ଡଲିନାଗାଙ୍କ୍ ମିଇ ତଡ଼୍ ନାୟାଦ୍ ବ୍ୟବହାର୍ ୱେରେ ଆତ୍‍ତେ । ଯଦି ଇଦ୍ ମିଇ ସେଙ୍ଗେ ନାୟାଦ୍ ଜିୱୁତେ ବ୍ୟବହାର୍, ଆଲେକେ ଆଦିନ୍ ସେଙ୍ଗେ ନାକିଂଙ୍କ୍ ଦୟା ମାଡ଼ି କ୍ଷମା ମାଡ଼େ । ନାନ୍ ମିକିଂଙ୍କ୍ ଡାବ୍‍କ୍ ସାହାଯ୍ୟ ତାଲାକାନ୍ ସେଙ୍ଗେ ନାନ୍ ମିଇ ପରୁ ବୋଜ୍ ଇୱନ୍ ।

14 ତୃତିୟ ଦାମ୍ ମିଇ ପାକେ ଆଦାନ୍ ସେଙ୍ଗେ ନାନ୍‍ନେ ତିଆର୍ ଆସମିନ୍‍ନ୍ଦେନ୍‍ । ନାନ୍ ମିୟାଗାଙ୍କ୍ ବାତେବା ବିଷୟ ଦାବୀ ମାଡ଼ନ୍ । ନାନ୍ ମିକିଂଙ୍କ୍ ଇଚ୍ଛା ମାଡ଼ୁତାନ୍ । ମିୟାଦ୍ ବୁମ୍‍ନେଲ୍ ଆୟ୍‍ୟ । ବାତେଙ୍କ୍‍ଇତ୍‍କେ ୟାୟ୍‍ ବାବାନ୍ ସେଙ୍ଗେ ପିଲାପିସ୍‍କା ଗୁଡ଼୍‍ପନ୍‍, ୟାୟ୍‍ ବାବାଲ୍ ପିଲାପିସ୍‍କାନ୍ ସେଙ୍ଗେ ଗୁଡ଼୍‍ପି ମାନ୍‍ତଡ଼୍ । 15 ମିଇକିଙ୍କ୍ ସାହାଯ୍ୟ ମାଡ଼ାନ୍ ସେଙ୍ଗେ ନାୟାଦ୍ ସର୍ବସ୍ୱ, ଇଦ୍‍ଲେକାମ୍ କି ନିଜେତିଙ୍ଗ୍ ୱେଡ଼୍‍କେତେ ଉସ୍ୱର୍ଗ ମାଡ଼ିଇଦାନ୍ ସେଙ୍ଗେ ନାନ୍ ତିଆର୍ । ନାନ୍ ମିକିଂଙ୍କ୍ ଇସର୍ ଅଦିକ୍‌ ପ୍ରେମ ମାଡ଼ୁତାନ୍ ଇଞ୍ଜ ମିଇଡ଼୍ ବାତେଏ ନାକିଂଙ୍କ୍ ଇସର୍ ସୁଦୁଟ୍ ପ୍ରେମ ମାଡ଼ିତିଡ଼୍ ?

16 ନାନ୍ ମିଇ ପରୁ ମପ୍‍ ଲେକାମ୍ ଆୟନ୍ । ଇଦ୍ ଗଟ୍ ମିଡ଼୍ ନିଜାମ୍ ସ୍ୱିକାର୍ ମାଡ଼ିତିଡ଼୍ । ବାତେଙ୍କ୍ ଇତ୍‍କେ ମିୟାଗାଙ୍କ୍ ବେନ କେତ୍‍ତେ ପାର୍‍ତଡ଼୍, ନାନ୍ ଦୂର୍ତ୍ତ ଆସ୍‍ମାନ୍‍ନାଙ୍କ୍ ୱିଶାମ୍ କେସ୍ ମିକିଂଙ୍କ୍ ଉଡ଼ିଇଦାଗ୍ ୱାଟ୍‍ତାନ୍ । 17 ମିଇ ପାକେ ବେନଡ଼୍ ରତ୍‍ତାନ୍, ଅଡ଼୍‌ ତାଗାଙ୍କ୍ ବେନନ୍‍ତଡ଼୍ ନାନ୍‍ନେ ବାତେଏ ମିୟାଗାଙ୍କ୍ ବାତେଏ ସୁବିଦା ହାସଲ୍‍ ମାଡ଼୍‍ତାନ୍ ? 18 ମିଇ ପାକେ ଆଦାନ୍ ସେଙ୍ଗେ ନାନ୍ ତିତସ୍‍ତିଙ୍କ୍ ଅନୁରଦ୍‌ ମାଡ଼୍‍ତାନ୍ ନୁ ଅନ୍‌ ତଡ଼୍ ବାଗାତଡ଼୍‍କ୍ ରତ୍‍ତାନ୍ । ତିତସ୍ ମିଇୟାଗାଙ୍କ୍ ବାତେଏ ସୁବିଦା ମାଡ଼୍‍ତଣ୍ଡ୍ ଇଞ୍ଜ ବେନ କେତ୍‍ତେ ପାର୍‍ଦ୍‍ତିନ୍ ? ଅଣ୍ଡ୍‌ ନୁ ନାନ୍ ସାମାନ୍‌ କାମ୍‌ ଆସ୍ ମିଇ ତଡ଼୍ ସାୟେ ବ୍ୟବହାର୍ ମାଡ଼ମ୍ ?

19 ବାତେଙ୍କ୍ ଇତ୍‍କେ ମିଡ଼୍ ଆଲ୍‍ସୁତିଡ଼୍, ଇଞ୍ଜେକ୍ ଆଇନା ମାମ୍‍ମେ ମାତର୍ ନିଜେତ୍ ଆଦ୍‍ମି ମିକା ୱାତ୍‍ତମ୍‍ ନା ! ଇଶ୍ୱର୍ ମାନ୍ଦାନ୍‍ୱେଲେ କ୍ରିଷ୍ଟନ୍ ଦାସ ଲେକାମ୍ ମାମ୍‍ମେ ମିକିଂଙ୍କ୍ କେତୁତମ୍ । ପ୍ରିୟ ସାଙ୍ଗନଡ଼ି, ମାମ୍‍ମେ ବାତ୍ ମାଡ଼ୁତମ୍ ଆଦ୍ ମାତର୍ ମିୟାଦ୍ ଉପକାର୍‍ଦେ ସେଙ୍ଗେ ମାଡ଼ୁତମ୍ । 20 ବାତେଙ୍କ୍‍ଇତ୍କେ ନାୟାଦ୍ ୱେରେ ଆଦୁତ୍‍ତେ, ନାନ୍ ମି ପାକେ ଆଞ୍ଜ୍ ମିକିଂଙ୍କ୍ ବେଲାନ୍ ଉଡାଙ୍କ୍ ଇଚ୍ଛା ମାଡ଼ୁତାନ୍, ଆଦ୍ ଲେକାମ୍ ଉଡ଼ାନଙ୍କ୍ ଦର୍‍କ ନୁ ମିଇଡ଼୍ ନାକିଂଙ୍କ୍ ବେଲା ଉଡ଼ାନଙ୍କ୍ ଇଚ୍ଛା ମାଡ଼୍‍ୱିଡ଼୍, ଆଦ୍‍ଲେକାମ୍ ଆଦ୍ ଉଡ଼ାନଙ୍କ୍ ଆଦ୍‍ତେ । ଆଲେନ୍ ତ ଆଗେଆଞ୍ଜ୍ ନାନ୍ ବେସ୍‍ ବେସତାଉ ବିବାଦ୍, ଇର୍ଷା, କପାମ୍, ସ୍ୱାର୍ତପରତା, ଅପବାଦ୍‌, ଗର୍ବ, ନୁ ବିଶୃକଲା ଉଡ଼ାନଙ୍କ୍ ପାଏମ୍ ଆଦ୍‍ତାନ୍ । 21 ଇଞ୍ଜେ ମିଇ ପାକେ ଆଦାନ୍ ୱେଲେ ଆଲେନ୍ ଇଶ୍ୱର୍ ମିଇ ସାକ୍ଷାତ୍‍ତେ ନାକିଂଙ୍କ୍ ଅୟିରାଣ ମାଡ଼ିତଡ଼୍, ବେନଡ଼୍ ମୁନେଙ୍କ୍‍କଞ୍ଜ ପାପ୍ ମାଡ଼୍‍ତଡ଼୍, ବାତେଙ୍କ୍ ଇତ୍‍କେ ଅଡ଼ାଦ୍‌ ଅଶୁଚି ପାଡ଼୍‍ୟି ମାଡ଼୍‍ତାଦ୍‍, ବାଣ୍ଡା ନୁ ବ୍ରଷ୍ଟାଚାର୍ ସେଙ୍ଗେ ଅନୁତାପ୍ ଆୟ୍‍ୟଡ଼୍, ଇଦ୍‍ଲେକାମ୍ ନାର୍‍ଗେ ନାରୁଡ଼୍ ସେଙ୍ଗେ ନାକିଂଙ୍କ୍ ଦୁଃକାମ୍ ମାଡ଼ାନଙ୍କ୍ ଆଦ୍‍ତେ ।