1 ମାନାଡ଼୍ ପୁତ୍‍ତାଡ଼୍ ଯେ, ବେନ୍ ପାର୍ତିବ୍ ମେନ୍ଦୁଲ୍ ଲେକାମ୍ ତମ୍ୱୁତେ ମାନାଡ଼୍ ଇଞ୍ଜେ ମିନ୍ଦେ, ଆଦ୍ ଦ୍ୱଂସ ଆତ୍‍କେ, ମାନ୍‍ ଇଶ୍ୱର୍‌ ସ୍ୱର୍ଗତାଗ୍ ୱେରଡ଼୍ ସାରେଦିନାତ୍ ଡ଼ାଦ୍ ଲନ୍‌ ନେହେଚିସ୍ ମିନ୍ଦେନ୍ । 2 ମାନାଡ଼୍ ପୃତିବିତାଗ୍ ମାଞ୍ଜ୍ ସର୍ଗତାଗ୍ ମାନ୍ଦାନ୍ ଲୋନ୍‌ ଲେକାତ୍ ଚକାସିଲେ କେର୍‍ଦାନଙ୍କ୍ ତିପାଲ୍ ଆଦୁତାଡ଼୍ । 3 ବାତେଙ୍କ୍ ଇତ୍‍କେ ଆଦ୍ ସ୍ୱର୍ଗତେ ଲୋତ୍‍ତାଗ୍ ନେଙ୍ଗ୍‍କେ, ମାନାଡ଼୍ ବାଣ୍ଡା ତନ୍ଦୱାଡ଼୍ । 4 ମାନାଡ଼୍ ଇଦ୍ ପୃତିବି କୁଣ୍ଡେତାଗ୍ ମାନ୍ଦାନ୍‍ୱେଲେ ଗାଟି ତିପାଲ୍‍ତେ ଜିୱୁଣ୍ଡ୍‍ତଡ଼୍ କେୟମାତ୍‍ତମ୍ । ପୃତିବି ମେନ୍ଦୁଲ୍ ନିଡ଼୍‍ତାନାଦ୍ ମାନ୍‍ ଇଚ୍ଛା ଆୟ୍‍ୟ, ମାତର୍ ମାନ୍‍ ଆଲ୍‍ସୁତମ୍, ସ୍ୱର୍ଗତାଉ ଚକାସିଲେ କେର୍‍କେ ମାୟାଦ୍‌ ଇଦ୍ ଡଲାନ୍ ମେନ୍ଦୁଲ୍ ବେଲାନ୍ ଅମର୍‌ ଆଦ୍‍ତେ । 5 ଇଶ୍ୱର୍‌ ମାକିଂଙ୍କ୍ ଇଦ୍ ପରିବର୍ତ୍ତନ୍ ସେଙ୍ଗେ ତିଆର୍ ମାଡ଼୍‍ତଣ୍ଡ୍ । ମେଣ୍ଡେ ଇଦିନ୍ ସାରେ ଲେକାମ୍ ତାନ୍ ପବିତ୍ର ଆତ୍ମାତିଙ୍କ୍ ଅଣ୍ଡ୍‌ ମାନ୍‍ ଦାନ ମାଡ଼୍‍ତଣ୍ଡ୍ ।

6 ଆଦିନ୍ ସେଙ୍ଗେ ମାମ୍‍ମେ ସାରେଦାମ୍ ସାହାସ୍ ପଇତ୍‍ତମ୍ । ମାମ୍‍ମେ ପୁତ୍‍ତମ୍, ବେସ୍ ଦିନା ମାମ୍‍ମେ ଇଦ୍ ମେନ୍ଦୁଲ୍‌ତେ ମାନ୍‍ତମ୍, ଆସର୍ ଦିନା ପ୍ରବୁନାଗେ ଜାକେମାଞ୍ଜ୍ ବାଦ୍‍କ୍‍ତମ୍, 7 ବାତେଙ୍କ୍‍ଇତ୍କେ ମାନାଡ଼୍ ଉଡ଼ାନ୍ ଲେକାମ୍ ଜିୱୁଣ୍ଡ୍ ବାଦ୍‍କମ୍, ମାତର୍ ବିଶ୍ୱାତଡ଼୍ ଜିୱୁନ୍ ବାଦାକୁତମ୍ । 8 ଆଦିଙ୍କ୍ ମାମ୍‍ମେ ସାହାସ୍‍ତଡ଼୍‍, ମେଣ୍ଡେ ଇଦ୍ ମେନ୍ଦୁଲ୍‌ ୱିଡ଼୍‍ସି ମିକା ପ୍ରବୁନ୍ ତଡ଼୍ ମାନ୍ଦାନ୍ ସେଙ୍ଗେ ମାମ୍‍ମେ ଅଦିକ୍‌ ସାର୍‍ଦେ । 9 ଆଦିନ୍ ସେଙ୍ଗେ ଇଗେ ନିଜେର୍‍ ଲୋନ୍‌ ମାନିଣ୍ଡ୍ ବା ମେଣ୍ଡନ୍‍ଲନ୍‍ ମାନିଣ୍ଡ୍, ଇଶ୍ୱର୍‌ତିଙ୍କ୍ ଶାନ୍ତି ମାଡ଼ାନାଦ୍ କେ ମାୟାଦ୍‌ ୱେରଡ଼୍ ଇଚ୍ଛା । 10 ✝ବାତେଙ୍କ୍‍ଇତ୍କେ ମାକିଂଙ୍କ୍ ସାରେତଡ଼୍‍କ୍ ଅନ୍‌ ତଡ଼୍ ବିଚାର୍ ଆଦାନ୍ ସେଙ୍ଗେ ନିଜାମ୍ କ୍ରିଷ୍ଟନ୍ ମୁନେ ଉପସ୍ଥିତ୍ ଆଦାନଙ୍କ୍ ୱେଇତିତ୍ । ଆସୁଙ୍କ୍ ଡଲାନ୍ ମେନ୍ଦୁଲ୍‌ ମାନାଡ଼୍ ମାଡ଼ିମାନ୍ଦାନ୍ ସାୟେତାଦ୍‍ ବା ପିନ୍ଦଲାଦ୍ ମେନ୍ଦୁଲ୍‌ତେ, ସାରେ ପାଡ଼ିୟିଦେ ଲେକାତ୍ ମାନାଡ଼୍ କାୟେ ଦର୍ସିକି ଆଦ୍‍ତାଡ଼୍‍ ।

11 ପ୍ରବୁଙ୍କ୍ ୱେର୍‍ଦାନାଦ୍ ଇତ୍‍କେ ବାତ୍‍ତେ, ମାନାଡ଼୍ ପୁତ୍‍ତାଡ଼୍ ନୁ ଇଦ୍ ମାଡ଼ାନ୍ ସେଙ୍ଗେ ମାନାଡ଼୍ ସାରେତଡ଼କିଂଙ୍କ୍ କେତୁତାଡ଼୍ । ଇଶ୍ୱର୍‌ ମାନ୍‍ ସାରେତଡ଼୍ ଲେକେତ୍‍ତେ ପୁତ୍‍ତଣ୍ଡ୍ । ନାନ୍ ଆଶେ ମାଡ଼ୁତାନ୍, ମିୟାଦ୍‍ ମନ୍‍ତାଗ୍‍ ମିଡ଼୍ ନାକିଂଙ୍କ୍ ଲେକେତ୍‍ତେ ପୁତ୍‍ତିଡ଼୍ । 12 ମାମ୍‍ମେ ମେଣ୍ଡନ୍ ଦାମ୍ ମିଇପାକେ ଗର୍ବ ମାଡ଼ାନଙ୍କ୍ ଇଚ୍ଛା ମାଡ଼ମ୍ । ଇତ୍‍କେ ମା ବିଷୟ୍‍ତେ ନିଜାତାଦ୍ ଦର୍ପ ମାଡ଼ାନ୍ ସେଙ୍ଗେ ମିକିଂଙ୍କ୍ ସୁଯୋଗ୍ ଇଦାନ୍ ମାୱାଦ୍ ପାଡ଼୍‍ୟି । ଆଲେକେ ଲୋପେତ୍ ଗୁନାମ୍‍ତିଙ୍କ୍ ଉଡ଼କଟ୍ ମାତର୍ ବାଇଦେ ଉଡ଼ିମିକା ବେନଡ଼୍ ଦର୍ପ ମାଡ଼ିତଡ଼୍, ଅଡ଼୍‌‍କିଂଙ୍କ୍ ସାୟେତ୍ ଉତ୍ତର୍ ଇଦାଙ୍କ୍ ପାର୍‍ଦ୍‍ତିନ୍ । 13 ମାମ୍‍ମେ ମଣ୍ଡିମ୍, ଆଦ୍ ଇଶ୍ୱର୍‌ତେ ସେଙ୍ଗେ; ସସୁବୋଦ, ଆଲେକେ ମିଇ ସେଙ୍ଗେ । 14 କ୍ରିଷ୍ଟନ୍ ପ୍ରେମ ତଡ଼୍ ମାମ୍‍ମେ ମିନ୍ଦେମ୍ । ମାମ୍‍ମେ ବୁଜେମ୍ ଆତ୍‍ତମ୍ ଯେ, ୱେରଣ୍ଡ୍ ସାରେତଡ଼୍ ସେଙ୍ଗେ ଡଲିମାନ୍‍ନାଙ୍କ୍ ସାରେତଡ଼୍ ଅନାଦ୍‌ ଡଲ୍‍ତାଗ୍ କାଇଲ୍‍ତଡ଼୍ । 15 ଅଣ୍ଡ୍‌ ସାରେତଡ଼୍ ସେଙ୍ଗେ ଡଲିମାନାଙ୍କ୍ ବେନଡ଼୍ ଜୀୱୁନ୍‌ ମିନ୍ଦେ, ଅଡ଼୍‌ ମେଣ୍ଡେ ନିଜେତ୍ ସେଙ୍ଗେ ଜୀୱୁନ୍‌ ଆୟ୍‍ୱେ ଅନ୍‌ ସେଙ୍ଗେ ଗେଲ୍‍ସିତଡ଼୍, ବାତେଙ୍କ୍‍ଇତ୍କେ ଅଡ଼୍‌ ସେଙ୍ଗେ ଅଣ୍ଡ୍‌ ଡଲି ମେଣ୍ଡେ ଜିୱେ ଆସ୍ ମିନ୍ଦେନ୍‌ ।

16 ମାମ୍‍ମେ ମେଣ୍ଡେ ବେନଙ୍କ୍ ନାରୁଡ଼୍ ଲେକାମ୍ ବିଚାର୍ ମାଡ଼ମ୍ । ଦିନାମ୍ ମାତ୍‍ତେ, ବେସୁଙ୍କ୍‍ ମାମ୍‍ମେ କ୍ରିଷ୍ଟଙ୍କ୍ ମିକା ନାରୁଡ଼୍ ଲେଲାମ୍ ବିଚାର୍ ମାଡ଼ମାତ୍‍ତମ୍ । ବାତେଙ୍କ୍ ଇତ୍‍କେ ଇଞ୍ଜେ ମେଣ୍ଡେ ମାମ୍‍ମେ ଆଲାନ୍ ମାଡ଼ମ୍ । 17 କ୍ରିଷ୍ଟନ୍‍ ତଡ଼୍ କାଇଲ୍‍କେ, ନାରୁନାଦ୍ ପୁନେ ତିଆର୍ ଆଦ୍‍ତେ । ପାଃନ୍ତେ ବିଷୟସାରେ ମାଇ ଆଦ୍‍ତେ, ପୁନେତାଉ ତିଆର୍ ଆଦ୍‍ତେ । 18 ଇୱୁସାରେ ଇଶ୍ୱର୍‌ତେ ପାଡ଼୍‍ୟି । ଅଣ୍ଡ୍‌ କ୍ରିଷ୍ଟନ୍‍ ତଡ଼୍ ମାନ୍‍ ଅନ୍‌ ତଡ଼୍ ମେଣ୍ଡନ୍‍ନ୍ଦାମ୍ କାୟ୍‍ଲ୍‍ତମ୍ ନୁ ଅନ୍‌ ତଡ଼୍ ବାଗାତଡ଼୍‍ତ ମେଣ୍ଡନ୍‍ନ୍ଦାମ୍ କାଲ୍‌ପାନ୍‌ ସେଙ୍ଗେ ଅଣ୍ଡ୍‌ ମାକିଂଙ୍କ୍ ମେଣ୍ଡେ ବାଗାତଡ଼୍‍କିଙ୍କ୍ ସାଙ୍ଗ ମାଡ଼ାନଙ୍କ୍ ଦାୟିତ୍ୱ ଇତ୍‍ତନ୍ । 19 ଆଦିଙ୍କ୍ ମାୟାଦ୍‌ କାବୁର୍ ଆଦୁତ୍‍ତେ, ଇଶ୍ୱର୍‌ କ୍ରିଷ୍ଟନ୍ ତଡ଼୍ ସାରେ ମାନବ୍ ଜାତିତିଙ୍କ୍ ଅନ୍‌ ତଡ଼୍ କାଲ୍‍ପାନଙ୍କ୍ ତିଆର୍ ମାଡ଼ିମିନ୍ଦେଣ୍ଡ୍ । ତାନ୍ ବିରୁଦ୍‌ତେ ଅଡ଼ାଦ୍‌ ଅପରାଦ୍‍ତିଙ୍କ୍ ଅଣ୍ଡ୍‌ ମେଣ୍ଡେ ତାନ୍ ହିସାବ୍‍ତେ ନେୱଣ୍ଡ୍ । ମେଣ୍ଡେ, ଇଦ୍ ମେଣ୍ଡେ କାଇଲାନାଦ୍ କାବୁର୍ କେତାନାଦ୍ ଦାୟିତ୍‌ ମା ପରୁ ଇସ୍ ମିନ୍ଦେଣ୍ଡ୍ ।

20 ମାମ୍‍ମେ କ୍ରିଷ୍ଟନ୍ ପାକେଙ୍କ୍ ଇଦ୍ ଗଟ୍ କେତୁତମ୍ । ସ୍ୱୟଂ ଇଶ୍ୱର୍‌ ମା ତଡ଼୍ ଇଦ୍ ଗଟ୍ ଇତ୍‍ତନ୍ ଇଞ୍ଜ ଏର୍କା ମାଡ଼ଙ୍କ୍ ଆଦ୍‍ତେ । କ୍ରିଷ୍ଟନ୍ ପାକେଙ୍କ୍ ମାମ୍‍ମେ ବିନତି ମାଡ଼ୁତମ୍, ଶତ୍ରୁତାଗାଙ୍କ୍ ସାଙ୍ଗ ଆୟ୍‍ମୁଟ୍ । 21 ବାତେଙ୍କ୍ ଇତ୍‍କେ ବେନନାଗେ ପାପ୍‌ ଇସୁର୍‍ ମିକା ଇଲ୍‍ୱେ ମାତ୍‍କେ, ଅଂକିଙ୍କ୍‌ ଅଣ୍ଡ୍‌ ମାନ୍‍ ସେଙ୍ଗେ ପାପ୍‌ ବଲି ଲେକାମ୍ ମାଡ଼୍‍ତଣ୍ଡ୍, ବେଲାନ୍ ମାନାଡ଼୍ ଅନ୍‌‍ତଡ଼୍ ଇଶ୍ୱର୍‌ତେ ଦାର୍ମାମ୍ ଲେକାମ୍ ଆଦିକାଡ଼୍‍ ।