1 ତାନ୍‍ ପେର୍କେ ନାନେ ଉଡ଼୍‍ତାନ୍‍, ମେକା ଗଲାଲ୍ ସାତ୍‍ଟାନ୍ ମୁଦ୍ରାନାଗାଙ୍କ୍ ୱେରଡ଼୍‍ ଟେଣ୍ଡ୍‍ତନ୍ ନୁ ନାଲୁ ପଶୁନ୍ ନାଗାଙ୍କ୍ ୱେରଡ଼୍‍ ନାକିଙ୍କ୍ ଗାଟି ଲେଙ୍ଗ୍‍ଦେ କେତ୍‍ତନ୍, "ୱାଡ଼େ !" 2 ନାନେ ମାଲ୍‍ସ୍‍ ଉଡ଼୍‍ତାନ୍, ୱେରଡ଼୍ ପାଣ୍ଡେଲାଦ୍ ଗୁରାମ୍‍, ଗୁରାତଣ୍ଡ୍‍ କାଇଦାଗ୍ ୱିଲ୍‍ ପୟ୍‍ସ୍‍ ମାତ୍‍ତନ୍ । ଅଙ୍କ୍‌ ୱେରଡ଼୍ ମୁକୁଟ୍‍ ଇତ୍‍ତଡ଼୍ ନୁ ଅଣ୍ଡ୍‌ ଯୁଦ୍‍ତାଗ୍ ଜିଡ଼ାନଙ୍କ୍ ସେଙ୍ଗେ ପେଇତ୍‍ତନ୍ ।

3 ତାନ୍‍ପେର୍କେ ମେକା ମେଇତାନନ୍‍ ରେଣ୍ଡ୍ ଟେଣ୍ଡ୍‍ତଣ୍ଡ୍ ନୁ ରେଣ୍ଡ୍ ପଶୁ ନାକିଙ୍କ୍ କେତ୍‍ତା, "ୱାଡ଼ାଟ୍‍ ।" 4 ନାନେ ଉଡ଼୍‍ତାନ୍, ଏର୍‍ରେ କଲର୍‍ତାଦ୍ ମେଣ୍ଡନ୍ ଗୁରାମ୍‍ । ପୃତିବିତାଗ୍ ଅଶାନ୍ତି ମାଡ଼ାନ୍ ସେଙ୍ଗେ ତାନ୍ ଚାଲାମାଡ଼ାନଙ୍କ୍‍ ଆଦେଶ୍ ଇତ୍‍ତନ୍, ନାରୁଡ଼୍ ବେଲାନ୍ ଯୁଦ୍‌ମାଡ଼ି ନିଜେ ନିଜେତିଗ୍ ଆୱୁକିତଡ଼୍ । ଅନ୍‌ କାଇଦାଗ୍ ୱେରଡ଼୍‍ ବେଡ଼ିୟାଦ୍ କଡ଼୍‍ଗ ତିଆର୍‍ ଆତ୍‍ତେ ।

5 ତାନ୍‍ପେର୍କେ ମେକାଗଲାଲ୍ ମୁଣ୍ଡ୍ ମୁଦ୍ରା ଉତ୍‍ତେ ପେର୍କେ ମୁଣ୍ଡ୍ ମେଣ୍ଢା ନାକିଙ୍କ୍ କେତ୍‍ତା, "ୱାସ୍‍ ଉଡ଼ା ।" ନାନେ ଉଡ଼୍‍ତାନ୍, ୱେରଡ଼୍ ଗୁଡି କଲର୍‍ତେ ଗୁରାମ୍; ଆଦ୍ ଗୁରାତଣ୍ଡ୍‍ତେ କାଇଦାଗ୍ କେଜି ମାତ୍‍ତେ; 6 ନୁ ନାୟାଦ୍ ଏର୍କେ ଆତ୍‍ତେ ନାଲୁଜାକ ପଶୁ ଅଣ୍ଡୟ୍‌ ଲେଙ୍ଗ୍‍ତେ କେତୁତା, "ଅନ୍‌‍ଦିନାତ୍ କୁଲ୍‍ଦେ ଅଣ୍ଡ୍‌‍ କେଜି ଗଅମ୍ ନୁ ମୁଣ୍ଡ୍ କେଜି ଯବ* ଦର୍‍କିତ୍ । ଇତ୍କେ ଜିତ ନିୟ୍‍ ମାଡ଼େ ନୁ ଅଙ୍ଗୁର୍‌ ବଗିଚାତିଙ୍ଗ୍ ନଷ୍ଟ ମାଡ଼୍‍ମାଟ୍ ।"

7 ତାନ୍‍ ପେର୍କେ, ମେକା ମେଇତାନନ୍ ନାଲୁଯାକ ଉସ୍‍ମିକା କେତ୍‍ତନ୍ ନୁ ନାଲୁ ପଶୁ ନାକିଙ୍କ୍ କେତ୍‍ତା, "ୱାଡ଼େ !" 8 ନାନେ ଉଡ଼୍‍ତାନ୍, ୱେରଡ଼୍ ନିର୍‍ କଲର୍ ଗୁରାମ୍‍ । ତାନ୍ ଚାଲାମାଡ଼ାନ୍‍ତେ ପେଦେର୍ ଡଲାନାଦ୍; ପାତାଲ୍‍ ତାନ୍ ପେର୍କେ ଆଞ୍ଜ ମାନ୍‍ନୁ । ଯୁଦ୍‌, ଦୁବିକ୍ଷ, ରୋଗ୍, ବ୍ୟାଦି ନୁ ମେଟେତା ମାନ୍ଦାନ୍ ଉପଦ୍ରବ୍ୟ ଲେକାମ୍ ପୃତିବିତେ ଅଣ୍ଡୟ୍‌ ନାଲୁପାକା ଆଦିବାସିଡ଼୍‍କ୍ ବିନଷ୍ଟ ମାଡ଼ାନ୍ ସେଙ୍ଗେ ଅଡ଼୍‌‍କିଂଙ୍କ୍ କ୍ଷମତା ଇତ୍‍ତଡ଼୍ । 9 ତାନ୍‍ପେର୍କେ, ମେକାଗଲାଲ୍ ଏଇଙ୍ଗ୍ ମଆର୍ ଉତ୍‍ତନ୍ ନୁ ନାନେ ଉଡ଼୍‍ତାନ୍, ୱେରଡ଼୍ ବେଦୀ । ଇଶ୍ୱର୍‌ତେ ବାକ୍ୟ କେସ୍‍ମିକା ସାକ୍ଷ୍ୟତାଗ୍ ବିଶ୍ୱାସ୍‍ତେ ମାନ୍ଦାନ୍ ସେଙ୍ଗେ ଡଲିମାନ୍ଦାନ୍ ନାରୁଡ଼୍‍କିଙ୍କ୍ ଆତ୍ମାକିନ୍ ଆୱୁ ବେଦୀ ମଦଲ୍ ସୁରକିତ୍ ଆସ୍‍ମାତ୍‍ତା । 10 ଅଡ଼୍‌‍ ଗାଟିଲେଙ୍ଗ୍‍ଦେ କେତ୍‍ତା, "ସାରେଦାମ୍ ପବିତ୍ର ନୁ ସତ୍ୟତେ ପ୍ରବୁ ଇଶ୍ୱର୍ ! ପୃତିବିତାଗ୍ ବେନଡ଼୍ ମାନାଙ୍କ୍ ଆଉକି ମାତ୍‍ତଡ଼୍, ଅଡ଼୍‌‍କିଂଙ୍କ୍ ବିଚାର୍ ମାଡ଼ି ଶାସ୍ତି ଇଦାନଙ୍କ୍ ମେଣ୍ଡେ ବେସ୍‍କେ କାଲାମ୍ ଲେଟ୍‍ ମିନ୍ଦେ ?" 11 ଅଡ଼୍‌ଆଗାଙ୍କ୍ ସାରେତଡ଼୍‍କିଙ୍କ୍ ୱେରଲାକା ପାଲ୍‍ସେ ଲାୱୁ ଚକାସିଲେ ଇତ୍‍ତଡ଼୍‍ । ମେଣ୍ଡେ ଅଡ଼୍‌‍ୱାଦ୍‌ ସାଙ୍ଗ ଦାଦାନଡ଼୍ ନୁ ସେବକ୍‍ ନଡ଼୍ ନାର୍ଗେ ସଂକ୍ୟାତେ ଡଲୱେ ଯାକ ଅଡ଼୍‌‍କିଂଙ୍କ୍ ମେଣ୍ଡେ ବେସ୍‍କେ ଦିନା କେପାନଙ୍କ୍ କେତ୍‍ତଡ଼୍ ।

12 ✝ତାନ୍‍ପେର୍କେ, ନାନେ ଉଡ଼୍‍ତାନ୍, ମେକାଗଲାଲ୍ ଚଅଟାନ୍‍ ସିଲ୍‍ ଉତ୍‍ତନ୍; ସାଙ୍ଗେ ସାଙ୍ଗେ ନାର୍ଗେ ବୁମିକମ୍ଫ ଆତ୍‍ତା । ପଡ଼୍‍ଦ୍ କୃଷ୍ଣ କଲର୍‍ତେ କମ୍ୱଲ୍‍ ଲେକାମ୍ ଇକାଡ଼୍‍ ଆତ୍‍ତେ ନୁ ନେଲ୍‍ଞ୍ଜ୍ ପୁରା ନେତୁର୍ କଲର୍ ଆତ୍‍ତେ । 13 ନାର୍ଗେ ଗାଲ୍‍ଦେ ଆଗାତ୍‍ତେ ତୟା ମାଡ଼େତାଗାଙ୍କ୍ କାୟା ସାରେ ରାଲାନ୍ ଲେକାମ୍, ଉକାକ୍‍ ସାରେ ମୟଲ୍‍ତାଗାଙ୍କ୍ ପୃତିବିତେ ପରୁ ରାଲ୍‍ତା । 14 ✝ୱେରଡ଼୍ କାଗଜ୍ ପର୍ଦ୍ଦା ମାଡ଼୍‍ପି ଆଦାନ୍ ଲେକାମ୍ ମାବ୍ ମାଡ଼୍‍ପି ଆସ୍ ମାଇ ଆତ୍‍ତେ । ମେଟା ନୁ ଗପ୍‍ ମେଣ୍ଡେଅଣ୍ଡାଗ୍‍ ଆତ୍‍ତା । 15 ଆଦ୍ ସମୟତେ ପୃତିବିତେ ସାରେ, ରାଜା, ଶାସନଡ଼୍ ବା ସେନାନାୟକ୍, ଦନି ନୁ ପରାକ୍ରନ୍ତ, କ୍ରୀତଦାସ ବା ସାଦାରନ୍ ନାଗରିକ୍ ସାରେତଡ଼୍ ପାଡ଼୍‍କିନାଗ୍ ନୁ ମେଟେତ୍‍ କାଲ୍‍ ଦରାନାଗ୍‍ ମଦଲ୍‍ ଆଞ୍ଜ୍ ମିଞ୍ଜ୍‍ତଡ଼୍ । 16 ✝ଅଡ଼୍‌ ମେଟାକିଂଙ୍କ୍‌ ନୁ କାଲ୍‍କିଙ୍କ୍ କାର୍‍ଙ୍ଗି କେସମାନ୍‍ନୁଡ଼୍, "ମା ପରୁରାଲା, ସିଂହାସନତାଗେ କୁଦିମାନ୍ଦାନ୍‍ ଆ ନାରିନ୍ କଣ୍ଡେତାଗାଙ୍କ୍ ନୁ ମେକା ଗଲାନ୍‍ କପାମ୍‍ତାଗାଙ୍କ୍‍ ମାକିଙ୍କ୍ ମିଞ୍ଜ୍‍ପି ନେଏମ୍ । 17 ଅଡ଼ାଦ୍‌ କପାମ୍‍ତେ ବୟଙ୍କାର୍ ଦିନାମ୍ ୱାସ୍‍ ଏୱୁସ୍‍ମିନ୍ଦେ । ବେନ ଆଦ୍ ପ୍ରତିରଦ୍ ମାଡ଼େପାର୍‍ତନ୍ ?"