1 ତାନ୍‌ପେର୍କେ ବନ୍ଦିଆତ୍‌ତେ ପିଲା ସଦାପ୍ରବୁ ଇସ୍ରାଏଲ୍‌ ପରମେଶ୍ୱରଦେ ଆଦେଶ୍‌ତେ ଅଣ୍ଡୟ୍‌ ମନ୍ଦିର୍‌ ତିଆର୍‌ ମାଡ଼ମିନ୍ଦେଡ଼୍‌ ଇଞ୍ଜ ଯିହୁଦା ନୁ ବିନ୍ୟାମିନ୍‌ତେ ପାକେତଡ଼୍‌ କେଞ୍ଜ୍‌ତଡ଼୍‌। 2 ଆସୁଟ୍‌ ଅଡ଼୍‌ ଯିରୁବ୍ବାବିଲ୍‌ ନୁ ବାବାଲଡ଼୍‌ ପିଲୁଡ଼୍‌ ବାଡ଼ିୟଡ଼୍‌ ଗାରେୱାସ୍‌ ଅଡ଼୍‌କିଂଙ୍କ୍‌ କେତ୍‌ତଡ଼୍‌, "ମାମ୍‌ ମିଇ ତଡ଼୍‌ ତିଆର ମାଡ଼ିତମ୍‌; ବାତେଙ୍କ୍‌ଇତ୍କେ ମିଡ଼୍‌ ବେଲାନ୍‌, ଆଲାନେ ମାମ୍‌ ମିଇ ପରମେଶ୍ୱରଦିଙ୍କ୍‌ ମେଃକମିନ୍ଦେମ୍‌; ମେଣ୍ଡେ, ଅଶୂର ରାଜାଲ୍‌ ଏସର୍‌ହଦ୍ଦୋନ୍‌, ଯେ ମାକିଙ୍କ୍‌ ଇଗେ ତାସ୍‌ମିନ୍ଦେଣ୍ଡ୍‌, ଅନ୍‌ ସମୟକନ୍‌ ମାମ୍‌ ଅନ୍‌ ଲେକାମ୍‌ ବଲିଦାନ୍‌ ମାଡ଼ମିନ୍ଦେମ୍‌।" 3 ମାତର୍‌ ଯିରୁବ୍ବାବିଲ୍‌ ନୁ ଯେଶୂୟ ନୁ ଇସ୍ରାଏଲତେ ୱେର୍‌ ବାବାନ୍‌ ପିଲୁଡ଼୍‌ତଡ଼୍‌ ବାଡ଼ିୟଡ଼୍‌ ଅଡ଼କ୍‌ କେତ୍‌ତଡ଼୍‌, "ମାନ୍‌ ପରମେଶ୍ୱରତେ ଲେକାମ୍‌ ଲନ୍‌ ତିଆର୍‌ ମାଡ଼ାନ୍‌ ବିଷୟତେ ମାନ୍‌ତଡ଼୍‌ ମିୟାଦ୍‌ ବାତେ ସମ୍ଫର୍କ ଇଲେ; ମାତର୍‌ ମା ପର ପାରସ୍ୟ ରାଜା କୋରସ୍‌ ରାଜାନ୍‌ ଗଟ୍‌ ପ୍ରମାନ୍‌ତେ ମାମ୍‌ ନିଜେ ଅଣ୍ଡୟତାଗ୍‌ ଆସ୍‌ ଇସ୍ରାଏଲତେ ପରମେଶ୍ୱର ସଦାପ୍ରବୁନ୍‌ ଆଦେଶ୍‌ତେ ତିଆର ମାଡ଼ିକାଡ଼୍‌।" 4 ଆସୁଟ୍‌ ଦେଶ୍‌ତେ ସାରେ ନାରୁଡ଼୍‌ ଯିହୁଦାତେ ନାରୁଡ଼୍‌କ୍‌ କାଇକ୍‌ ଦୁର୍ବଲ ମାଡ଼ାନଙ୍କ୍‌ ନୁ ତିଆର୍‌ ମାଡ଼ାନ୍‌ ପାଡ଼ିୟ୍‌ଦାଗ୍‌ ଅଡ଼୍‌କିଂଙ୍କ୍‌ କଷ୍ଟ ଇଦାନଙ୍କ୍‌ ପସ୍ପ୍‌ତଣ୍ଡ୍‌, 5 ମେଣ୍ଡେ, ଅଡ଼୍‌ୱାଦ୍‌ ସାରେ ପାଡ଼ିୟି ମାଡ଼ାନଙ୍କ୍‌ ପାରସ୍ୟ ରାଜାଲ୍‌ କୋରସ୍‌ତେ ସାରେଜିୱୁନ୍‌ ନୁ ପାରସ୍ୟ ରାଜାଲ୍‌ ଦାରିୟାବସତେ ଅଦିକାର୍‌ ହେୱୁନା ଅଡ଼୍‌ ବିରୁଦ୍ଦତେ କେତାନଡ଼୍‌କ୍‌ ଦରମା ଇସ୍‌ ନେଃତ୍‌ତଡ଼୍‌। 6 ମେଣ୍ଡେ, ଅକ୍ଷଶ୍ୱେରଶତେ ସମୟତେ ଅନ୍‌ ରାଜତ୍ୱତେ ଆରାମ୍‌ତେ ଅଡ଼୍‌ ଯିହୁଦା ନୁ ଯିରୁଶାଲମ୍‌ ମାନ୍ଦାନଡ଼୍‌ ବିରୁଦ୍ଦତେ ଅଣ୍ଡୟ୍‌ ଅପ୍‌ମାନ୍‌ତେ ଚିଟି ଲେକ୍‌ତଡ଼୍‌।

7 ମେଣ୍ଡନ୍‌ଦାମ୍‌, ଯିରୁଶାଲେମ୍‌ ଅଦିକାର୍‌ତେ ସମୟତେ ବିଶ୍ଲମ୍‌, ମିତ୍ରଦାତ, ଟାବେଲ୍‌ ନୁ ଅନ୍‌ ୱେର୍‌ ତଡ଼୍‌ଦେନଡ଼୍‌ ପାରସ୍ୟ ରାଜାଲ୍‌ ଅର୍ତ୍ତକ୍ଷସ୍ତତେ ଗାରେ ଲେକ୍‌ତଡ଼୍‌; ଆ ଚିଟି ଅରାମିୟ ଅକ୍ଷରତେ ଲେକ୍‌ତେ ନୁ ଅରାମିୟ ଗଟ୍‌ତେ ଲେକାଆସ୍‌ ମାତ୍‌ତେ। 8 ରହୁମ୍‌ ମନ୍ତ୍ରି ନୁ ଶିମ୍‌ଶୟ ଲେକକ୍‌ ଅର୍ତ୍ତକ୍ଷସ୍ତ ରାଜାନ୍‌ ଗାରେ ଯିରୁଶାଲମତେ ବିରୁଦ୍ଦତେ ଇଦ୍‌ ଲେକାମ୍‌ ଚିଟି ଲେକ୍‌ତଣ୍ଡ୍‌; 9 ରହୁମ୍‌ ମନ୍ତ୍ରି ନୁ ଶିମ୍‌ଶୟ ଲେକକ୍‌ ନୁ ଅଡ଼୍‌ ୱେର୍‌ ତଡ଼୍‌ଦେନଡ଼୍‌ ସାରେ, ଇତ୍କେ, ଦିନିୟ ନୁ ଅଫର୍ସ୍ତକିୟ, ଟର୍ପଲିୟ, ଅଫର୍ସ୍ତିୟ, ଅର୍କବିୟ, ବାବିଲିୟ, ଶୁଶନିୟ, ଦେହ୍ୱିୟ, ଏଲମିୟ ନାରୁଡ଼୍‌, 10 ମେଣ୍ଡେ, ମହାମହିମା ସାରେ ଅସ୍ନପ୍‌ପରତାଗ୍‌ ତାତ୍‌ତେ, ମେଣ୍ଡେ ଶମରିୟା ଟାୱୁନ୍‌ତେ ନୁ ଫରାତ୍‌ ଇଲ୍‌କେତ୍‌ ଆପାକେତ୍‌ ଦେଶତେ ୱେର୍‌ ପଡ଼୍‌ୟିତ୍‌ ମାଞ୍ଜ୍‌, ନାର୍ଗେ ନଗର୍‌ତେ ନାରୁଡ଼୍‌ ଲେକ୍‌ତଡ଼୍‌। 11 ଅଡ଼୍‌ ଅର୍ତ୍ତକ୍ଷସ୍ତ ରାଜାନ୍‌ ଗାରେ ବେନ୍‌ ଚିଟି ରସ୍‌ ମାତ୍‌ତଣ୍ଡ୍‌, ଆଗେ ଲେକ୍‌ତାଦ୍‌ ଇଦି; "ଫରାତ୍‌ ଇଲ୍‌କେତ୍‌ ଆପାକେତ୍‌ ନାରୁଣ୍ଡୁ, ମି ଦାସଡ଼୍‌ଆଗାଙ୍କ୍‌, 12 ବେଡ଼ିୟ୍‌ ରାଜାନ୍‌ ଗାରେ ପୁଞ୍ଜ୍‌ସ୍ପାଙ୍କ୍‌ ଇଦି ଯେ, ମି ଗାରେ ୱାତ୍‌ତେ ଯିହୁଦିୟ ନାରୁଡ଼୍‌ ଯିରୁଶାଲମତେ ମା ଗାରେ ୱାସ୍‌ମିନ୍ଦେଣ୍ଡେ; ଅଡ଼୍‌ ଆ ରାମ୍‌କ୍‌ ଦୁଷ୍ଟ ନଗର୍‌ ତିଆର୍‌ ମାଡ଼ମିନ୍ଦେଣ୍ଡ୍‌ ନୁ ନେଟେ ତେର୍‌ସ୍ପି ବିତ୍ତିମୁଲେ ପୁଃନେ ମାଡ଼ିମିନ୍ଦେଣ୍ଡେ।, 13 ମହାରାଜାନ୍‌ ଗାରେ ପୁଞ୍ଜପାନାଦ୍‌ ଇଦି ଯେ, ବେସୁଙ୍କୁ ଇ ନଗର୍‌ତେ ତିଆରଆତେ ନୁ ନେଟାନ୍‌ ପାଡ଼୍‌ୟି ତେର୍‌ରିତ୍‌, ଆସୁଙ୍କ୍‌ ଆ ନାରୁଡ଼୍‌ ଚିସ୍ତୁ ବା ଆଦାୟି ଇୱଡ଼୍‌, ମେଣ୍ଡେ ପେର୍କେ ଆଦ୍‌ ରାଜାଲଡ଼୍‌ ଲସ୍‌ ଆଦ୍‌ତେ। 14 ମାମ୍‌ ରାଜାନ୍‌ ଲତ୍‌ତାଗ୍‌ ଅୱଡ଼୍‌ ତିନ୍‌ତମ୍‌ ନୁ ମହାରାଜାନ୍‌ ଅପମାନ୍ ଉଡ଼ାନାଦ୍‌ ମାନାଦ୍‌ ଟିକ୍‌ ଆୟ୍‌, ଇଦିଙ୍କ୍‌ ନାରୁଡ଼୍‌କ୍‌ ରସ୍‌ ମହାରାଜାଙ୍କ୍‌ ଇଲା ପୁଞ୍ଜ୍‌ପ୍‌ତମ୍‌। 15 ମିଇ ଆନିଦାଦିଡ଼୍‌ତେ ଇତିହାସ୍‌ ବଇ ମେହ୍‌ଃକାଟ୍‌; ଆସୁଙ୍କ୍‌ ଆ ଇତିହାସ୍‌ ବଇତାଗ୍‌ ନିମ୍‌ ଉଡ଼୍‌ତି ନୁ ପୁନ୍‌ତିଡ଼୍‌ ଯେ, ଇ ଟାୱୁନ୍‌ତେ ରାମ୍‌କିନ୍‌ ନଗର୍‌, ମେଣ୍ଡେ ରାଜାଲଡ଼୍‌ ନୁ ପ୍ରଦେଶତେ ସାରେତ୍‌ ପର କରାପ୍‌ମାଡ଼ାଟ୍‌, ମେଣ୍ଡେ ଅଡ଼୍‌ ମୁନେତ୍‌ କାଲାମ୍‌ତେ ଆଗାଙ୍କ୍‌ ରାମ୍‌କ୍‌ ଗଟାମାଡ଼ି ମିନ୍ଦେଡ଼୍‌। ଆଦିନ୍‌ ମାଇଦିଙ୍କ୍‌ ଇ ନଗର୍‌ ନଷ୍ଟ ଆସ୍‌ମିନ୍ଦେ। 16 ମାମ୍‌ ବେଡ଼ିୟ୍‌ ରାଜାଙ୍କ୍‌ ପୁଞ୍ଜପ୍ପମିନ୍ଦେମ୍‌ ଯେ, ଇ ନଗର୍‌ତେ ତିଆର୍‌ ନୁ ଇ ନେଟେତ୍‌ ପାଡ଼୍‌ୟି ତେର୍‌କେ, ଆଦିନ୍‌ ଅନୁସାରେ ଇଲ୍‌କେତ୍‌ ଆପାକେ ମିୟାଦ୍‌ ବାତେ ବା ପଡ଼ିୟେ ମାନ।" 17 ଇଗାକଞ୍ଚ୍‌ ରାଜାଲ୍‌ ମନ୍ତ୍ରି ରହୁମ୍‌ ନୁ ପାଡ଼୍‌ୟି ପୁତ୍‌ତେ ଶିମ୍‌ଶୟ ନୁ ଅଡ଼୍‌ ଶମରିୟା ମାନ୍ଦାନ୍‌ ୱେର୍‌ ତଡ଼୍‌ଦେନଡ଼୍‌, ମେଣ୍ଡେ ଇଲ୍‌କେତ୍‌ ଆପାକେତ୍‌ ଦେଶତେ ୱେର୍‌ତଡ଼୍‌ ନାରୁଡ଼୍‌ ଗାରେ ଉତ୍ତର ରତ୍‌ତଣ୍ଡ୍‌, ମେଣ୍ଡେ "ମିୟାଦ୍‌ ମଙ୍ଗଲ ଆୟି। 18 ମିଡ଼୍‌ ମା ଗାରେ ବେନ୍‌ଚିଟି ରସମିନ୍ଦେଡ଼ି, ଆଦ୍‌ ମାମ୍‌ ମୁନେ ଟିକ୍‌ କାର୍‌ୟି ମିନ୍ଦେଡ଼୍‌। 19 ମେଣ୍ଡେ, ମାମ୍‌ ଆଦେଶ୍‌ତେ ମେଃକୱାନାକେ, ତନ୍ଦମିନ୍ଦେ ଯେ, ମୁନେତ୍‌ କାଲାମ୍‌ତେ ଇ ନଗର୍‌ତେ ରାଜାଲଡ଼୍‌ ବିରୁଦ୍ଦତେ ହଟ୍‌କା ମାଡ଼ିମିନ୍ଦେଡ଼୍‌ ନୁ ଆଗାକନ୍‌ ରାଜାଦ୍ରୋହ ନୁ ରାମ୍‌କ୍‌ ମାଡ଼ିମିନ୍ଦେ। 20 ଆଗେକ୍‌ବା ଯିରୁଶାଲମତେ ପାରତ୍‌ ରାଜାଲଡ଼୍‌ ମାତ୍‌ତଡ଼୍‌, ଅଡ଼୍‌ ଇଲକେତ୍‌ ଆପାକେତ୍‌ ସାରେ ଦେଶତେ ରାଜ୍‌ ମାଡ଼୍‌ତଡ଼୍‌; ମେଣ୍ଡେ, ଅଡ଼୍‌କିଂଙ୍କ୍‌ ଚିସ୍ତୁ, ସରକାର୍‌ତିଙ୍କ୍‌ ନୁ ଆଦାୟ୍‌ ଇତ୍‌ତଡ଼୍‌। 21 ଇଦିଙ୍କ୍‌ ମାୟାଗାକଞ୍ଚ୍‌ ଗଟ୍‌ ପାସ୍‌ରିଞ୍ଚ୍‌ୱେ ଜାକ୍‌ ଆ ନଗର୍‌ ବେଲାନେ ତିଆର୍‌ ଆଦ୍‌ଦେ ପାର୍‌ୱ, ଇଦିନ୍‌ ମାଇଦିଙ୍କ୍‌ ଇଞ୍ଜେ ମିଡ଼୍‌ ଆ ନାରୁଡ଼୍‌କ୍‌ ପାଡ଼ିୟ୍‌ଦେକନ୍‌ ୱିଡ଼୍‌ସାଙ୍କ୍‌ ଆଦେଶ୍‌ ଇମ୍‌। 22 ମେଣ୍ଡେ ସାବଦାନ୍‌, ଇ ବିଷୟତେ ମିଡ଼୍‌ ଡେରି ମାଡ଼୍‌ମାଟ୍‌; ରାଜାଲଡ଼୍‌ ଲସ୍‌ତେ ମାଇଦିଙ୍କ୍‌ ବାତେଙ୍କ୍‌ ନଷ୍ଟ ଆଦ୍‌ତିଡ଼୍‌ ?" 23 ଆସୁଙ୍କ୍‌ ରହୁମ୍‌ ନୁ ଲେକକ୍‌ ପାଡ଼୍‌ୟି ମାଡ଼ାଙ୍କ୍‌ ପୁତ୍‌ତେନଡ଼୍‌ ଶିମ୍‌ଶୟ ନୁ ଅଡ଼୍‌ ତଡ଼୍‌ଦେ ନାରୁଡ଼୍‌ ଗାରେ ଅର୍ତ୍ତକ୍ଷସ୍ତ ରାଜାନ୍‌ ଚିଟିତେ ଲେକ୍‌ତାଦ୍‌ କାରିୟୱାନାକେ, ଅଡ଼୍‌ ଜାପେ ଯିରୁଶାଲମ୍‌ତିଙ୍କ୍‌ ଯିହୁଦିୟଅଡ଼୍‌ ଗାରେ ଆଞ୍ଜ ବପୁତଡ଼୍‌ ଅଡ଼୍‌କିଂଙ୍କ୍‌ ପାଡ଼ିୟ୍‌ଦେକନ୍‌ ବନ୍ଦ ମାଡ଼୍‌ତଡ଼୍‌। 24 ଆସୁଟ୍‌ ଯିରୁଶାଲମ୍‌ ପରମେଶ୍ୱରତେ ଲତ୍‌ତେ ପାଡ଼୍‌ୟି ବନ୍ଦ ଆତ୍‌ତେ। ମେଣ୍ଡେ, ପାରସ୍ୟ ରାଜା ଦାରିୟାବସତେ ଅଦିକାର୍‌ ରାଜତ୍ୱତ୍‌ ରେଣ୍ଡ୍‌ ୱାଡ଼୍‌ସା ଏୱୁନା ଆଦ୍‌ ବନ୍ଦ ଆସ୍‌ ମାତ୍‌ତେ।