1 ଆ ବୁଦ୍‍ ଇଲ୍‍ୱେ ଗାଲାତିୟଡ଼ି ! ବେନ ମିକିଙ୍କ୍ ଇଦ୍ ମନ୍ତ୍ର କାର୍‍ସ୍‍ପୁତଣ୍ଡ୍ ? କ୍ରୁଶ ପର ଜିସୁ କ୍ରିଷ୍ଟ ଡଲ୍‍ତାଦ୍ ଗଟ୍ ମି ଗାରେ ଗାଟି ସାୟେ କେତୁତମ୍ । 2 ଅଣ୍ଡୟ୍‌ ଗଟ୍ ନାକିଙ୍କ୍‍ କେଲାଟ୍, ନିୟମ୍ ପାଲନ୍ ମାଡ଼ି ମିଡ଼୍ ପବିତ୍ର ଆତ୍ମା ପାଏମ୍ ଆତ୍‍ତିଡ଼୍, ନା ମେଲ୍‍ତା କାବୁର୍ କେଞ୍ଜି ଆଦିଙ୍କ୍ ବିଶ୍ୱାସ୍ ମାଡ଼ି ? 3 ମିଡ଼୍ ଇଦ୍‍ରକମ୍ ବିଚାର୍ ବାତେଙ୍କ୍ ମାଡ଼ୁତିଡ଼୍ ? ପରମ୍‍ଆତ୍ମାନ୍ ଶକ୍ତିତଡ଼୍ ମିଡ଼୍ ବେନ୍ ଜିୱୁଣ୍ଡ୍ ଆରାମ୍ ମାଡ଼୍‍ତିଡ଼୍, ନିଜର୍ ଶକ୍ତିତଡ଼୍ ଆଦିଙ୍କ୍ ପୁରା ମାଡ଼ାନଙ୍କ୍ ବାତେଙ୍କ୍ ଆଲ୍‍ସୁତିଡ଼୍ ? 4 ଅଦିନ୍‌ ସେଙ୍ଗେ ମିୟାଦ୍ ସାରେ ପାଡ଼୍‍ୟି ବାତେ ଆଙ୍ଗ୍‍ଡ଼ାମ୍ ? ଆଗାଙ୍କ୍ ବାତ୍ ଶିକ୍ଷା ପାଏମ୍ ଆୟ୍‍ୱିଡ଼୍ କି ? 5 ମିକିଙ୍କ୍ ନିୟମ୍ ବିଶ୍ୱାସ୍ ମାଡ଼୍‍ତାଙ୍କ୍ ଇଶ୍ୱର୍ ବାତ୍ ତାନ୍ ଆତ୍ମା ଇତ୍‌ତଣ୍ଡ୍‌ ନୁ ମି ଲୋପେ ଆଶର୍ଯ୍ୟ ପାଡ଼୍‍ୟି ସାରେ ମାଡ଼୍‍ତଣ୍ଡ୍, ନା ମିଡ଼୍ ମେଲ୍‍ତା କାବୁର୍ କେଞ୍ଜି ଆଗେ ବିଶ୍ୱାସ୍ ମାଡ଼ୁତିଡ଼୍ ଇଞ୍ଜ ?

6 ✝ଅବ୍ରାହାମ୍‌ତେ ଗଟ୍ ଏର୍କେ ମାଡ଼ାଟ୍ । ଶାସ୍ତ୍ରତାଗ୍ ଲେକା ମିନ୍ଦେ, "ଅଣ୍ଡ୍‌ ଇଶ୍ୱର୍‌ତିଙ୍କ୍ ବିଶ୍ୱାସ୍ ମାଡ଼୍‍ତଣ୍ଡ୍ ନୁ ତାନ୍ ବିଶ୍ୱାସ୍‍ତେ ମାଇଦିଙ୍କ୍ ଇଶ୍ୱର୍ ଅଂକିଙ୍କ୍‌ ଦାର୍ମ୍ ନାରୁଣ୍ଡ୍ ଇଞ୍ଜ ଏଞ୍ଚ୍‍ତଣ୍ଡ୍ ।" 7 ✝ବେନଡ଼୍ ବିଶ୍ୱାସ୍ ମାଡ଼ିତଡ଼୍, ଅଡ଼୍‌ ଅବ୍ରାହାମ୍‌ତେ ନିଜାମ୍‍ ବଂଶତଡ଼୍, ଇଦ୍ ମିଡ଼୍ ପୁନୁଟ୍‍ । 8 ମୁନେତ୍‍ କଞ୍ଚ୍‍ ଦର୍ମଶାସ୍ତ୍ରତାଗ୍‍ ଲେକା ମିନ୍ଦେ ଯେ, ବିଶ୍ୱାସ୍ ତଡ଼୍ ଇଶ୍ୱର୍ ଅଣଇହୁଦିଡ଼୍‍କ୍ ମିକା ଦାର୍ମାମ୍ ନାରୁଣ୍ଡ୍ ଇଞ୍ଜ କେତିତଣ୍ଡ୍ । ଇଦ୍ ଗଟ୍ ମୁନେନ୍ ଅବ୍ରାହାମ୍‍ତିଙ୍କ୍ କେସ୍‍ମାତ୍‍ତଣ୍ଡ୍, "ମି ତଡ଼୍ ଇଶ୍ୱର୍ ପୃତିବୀତେ ସାରେ ନାରୁଡ଼୍‍କିଙ୍କ୍ ଆର୍ଶିବାଦ୍‌ ମାଡ଼ିତଣ୍ଡ୍ ।" 9 ଅବ୍ରାହାମ୍‍ ବିଶ୍ୱାସ୍ ମାଡ଼ି ଆର୍ଶିବାଦ୍‌ ପାଏମ୍ ଆସ୍ ମାତ୍‍ତଣ୍ଡ୍; ଆଦିଙ୍କ୍ ବେନଡ଼୍ ବିଶ୍ୱାସ୍ ମାଡ଼ିତଡ଼୍, ଅଡ଼୍‌ ସାରେତଡ଼୍ ଅନ୍‌ ଲେକେମ୍ ଆର୍ଶିବାଦ୍‌ ପାଏମ୍ ଆଦ୍‍ତଡ଼୍ ।

10 ବେନଡ଼୍ ନିୟମ୍ ପାଲନ୍ ମାଡ଼ାନାଗ୍‍ ଆଶେ ୱାଟିତଡ଼୍, ଅଡ଼୍‌ ଅବିସାପ୍ ପାଏମ୍ ଆଦାନ୍ ଜିୱୁଣ୍ଡ୍ ବାଦ୍‍କିତଡ଼୍ । ବାତେଙ୍କ୍‍ଇତ୍‍କେ ଦର୍ମଶାସ୍ତ୍ରତାଗ୍ ଲେକାମିନ୍ଦେ, "ମୋଶାନ୍ ନିୟମ୍ ବଇତାଗ୍ ବାତ୍ ସାରେ ଲେକା ମିନ୍ଦେ, ଯଦି ବେନ ଆଦ୍ ପୁରା ମାଡ଼ଣ୍ଡ୍, ଅଂକିଙ୍କ୍‌ ଇଶ୍ୱର୍ ଅବିସାପ୍ ଇଦ୍‍ତଣ୍ଡ୍ ।" 11 ଆଦିଙ୍କ୍ ଇଗାଙ୍କ୍ ପୁନ୍ଦାନଙ୍କ୍ ଅଦୁତ୍, ନିୟମ୍ ତଡ଼୍ ବେନ ଇଶ୍ୱର୍‌ତେ କଣ୍ଡେତାଗ୍ ଦାର୍ମାମ୍ ନାରୁଣ୍ଡ୍ ଆୟଣ୍ଡ୍, ବାତେଙ୍କ୍‍ଇତ୍‍କେ ଦର୍ମଶାସ୍ତ୍ରତାଗ୍ ଲେକା ମିନ୍ଦେ, "ବିଶ୍ୱାସ୍ ତଡ଼୍ ଇଶ୍ୱର୍‌ତେ ଗାରେ ନିର୍ଦଷ୍ ମାନ୍ଦାନ୍‍ ନାରୁଣ୍ଡ୍ ଇଁ ବାଦ୍‍କିତଣ୍ଡ୍ ।" 12 ମାତର୍‌ ନିୟମ୍ ତଡ଼୍ ବିଶ୍ୱାସ୍‍ତାଦ୍ ବାତ୍ ସମ୍ପର୍କ ଇଲ୍‍ଲେ । ଦର୍ମଶାସ୍ତ୍ରତାଗ୍ ଲେକା ମିନ୍ଦେ, "ବେନ୍ ନାରୁଣ୍ଡ୍ ନିୟମ୍‍ତାଦ୍ ଦାବୀ ଲେକେତ୍‍ ପାଡ଼୍‍ୟି ମାଡ଼ିତଣ୍ଡ୍, ଅଣ୍ଡ୍‌ ବାଦ୍‍କିତଣ୍ଡ୍ ।"

13 ମାତର୍‌ କ୍ରିଷ୍ଟ ମାନ୍‍ ସେଙ୍ଗେ ଆବିସାପ୍ ପାଏମ୍ ଆସ୍ ନିୟମ୍‍ତାଗ୍ ଲେକା ମାନ୍ଦାନ୍ ଅବିସାପ୍‍ ତାଗାଙ୍କ୍ ମାକିଙ୍କ୍ ମୁକ୍ତି ମାଡ଼୍‍ତଣ୍ଡ୍ । ଦର୍ମଶାସ୍ତ୍ରତାଗ୍ ଲେକା ମିନ୍ଦେ, "ବେନ୍ ମାଡ଼େତାଗ୍ ଗୁସ୍କ୍‍ୱିଡ଼ି ଡଲିତଣ୍ଡ୍, ଅଣ୍ଡ୍‌‍ ଇଶ୍ୱର୍ ତଡ଼୍‍ ଅବିସାପ୍ ପାଏମ୍‍ ଆତ୍‍ତଣ୍ଡ୍ !" 14 ଇଶ୍ୱର୍ ଅବ୍ରାହାମ୍‍ତିଙ୍କ୍ ବେନ୍ ଆର୍ଶିବାଦ୍‌ ଇଦାନଙ୍କ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍, ଅଣଇହୁଦୀଡ଼୍ ଗାଲା ବେଲା ଆଦ୍ ପାଏମ୍ ଆଦ୍‍ତଡ଼୍, ଆଦିନ୍ ସେଙ୍ଗେ କ୍ରିଷ୍ଟ ଇଦ୍ ପାଡ଼୍‍ୟି ମାଡ଼୍‍ତଣ୍ଡ୍ । ଆଦିଙ୍କ୍ ବିଶ୍ୱାସ୍ ମାଡ଼୍‍କେ ମାମ୍ ଗାଲା ଇଶ୍ୱର୍ କେତାନ୍ ଲେକାମ୍ ପବିତ୍ର ଆତ୍ମା ପାଏମ୍ ଆଦ୍‍ତମ୍ ।

15 ଦାଦାଲଡ଼ି ନୁ ହେଲାସ୍କ୍ ! ନାନ୍ ଅଣ୍ଡୟ୍‌ ଉଦାରନ୍‍ ଇଦୁତାନ୍, ବେସୁଟ୍‌ ଇର୍‍ୱୁଡ଼୍ ବାତ୍‍ଆୟି ବିଷୟ୍‍ତେ ଅଣ୍ଡୟ୍‌ ଚୁକ୍ତି ମାଡ଼ିତଡ଼୍, ବେନ ଆଦ୍ ଚୁକ୍ତିତିଙ୍କ୍ ୱେରେ ମାଡ଼ାନଙ୍କ୍ ପାର୍‍ୱଣ୍ଡ୍ ବା ଆଗେ ବାତ୍ କାଲ୍‍ପାନଙ୍କ୍ ପାର୍‍ୱଣ୍ଡ୍ । 16 ଅବ୍ରାହାମ୍‍ ନୁ ତାନ୍ ବଂଶତଡ଼୍ ଗାରେ ଇଶ୍ୱର୍ ତାନ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍ । ଇତ୍‍କେ ଇଦ୍ ବିଷୟ୍ "ମି ବଂଶତଡ଼୍ ସେଙ୍ଗେ," ବା ନାର୍ଗେ ନାରୁଡ଼୍ ସେଙ୍ଗେ ଇଞ୍ଜ ଶାସ୍ତ୍ରତାଗ୍ ଲେକା ଇଲ୍‍ଲେ, "ମି ବଂଶତଡ଼୍ ସେଙ୍ଗେ," କେ ଇଞ୍ଜ ଇଦ୍ ଗଟ୍ ମୁନେନ୍ ଅବ୍ରାହାମ୍‍ତିଙ୍କ୍ କେସ୍‍ମାତ୍‍ତଣ୍ଡ୍ ଲେକା ମିନ୍ଦେ । ଆଦିଙ୍କ୍ ଆଦ୍ ଶାସ୍ତ୍ର ଅର୍ତୁଣ୍ଡ୍ ନାରୁଣ୍ଡ୍, ବା କ୍ରିଷ୍ଟଟନ୍ ସେଙ୍ଗେ ଟିକ୍‌ । 17 ନାୟାଦ୍ କେତାନ୍ ଅର୍ତ ଆଦୁତ୍, ଇଶ୍ୱର୍ ଅବ୍ରାହାମ୍‍ ତଡ଼୍ ଅଣ୍ଡୟ୍‌ ଚୁକ୍ତି ମାଡ଼ିମାତ୍‍ତଣ୍ଡ୍ ନୁ ଆଦ୍ ରକ୍ଷା ମାଡ଼ାନଙ୍କ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍ । ବେନ୍ ନିୟମ୍ ଚାରିଶହ ତିରିଶ୍ ଏଣ୍ଡ୍ ପେର୍କେ ତିଆର୍ ଆତ୍‍ତେ, ଆଦ୍ ଆ ଚୁକ୍ତିତିଙ୍କ୍ ୱେରେ ମାଡ଼ି ଇଶ୍ୱର୍‌ତେ ପ୍ରତିଜ୍ଞାତିଙ୍କ୍ ବନ୍ଦ୍ ମାଡ଼େ ପାର୍‍ୱ । 18 ✝ଇଶ୍ୱର୍‌ତେ ପ୍ରତିଜ୍ଞା ଆର୍ଶିବାଦ୍‌ ଯଦି ନିୟମ୍‍ ପାଳନ୍ ମାଡ଼ାନ୍ ତଡ଼୍ ସାମାନ୍, ଆଲେକେ ଆଦ୍ ଅନାଦ୍‌ ପ୍ରତିଜ୍ଞା ଇଞ୍ଜ କେତାନଙ୍କ୍ ଆୟ । ଆଦିଙ୍କ୍ ଇଶ୍ୱର୍ ଅନାଦ୍‌ ପ୍ରତିଜ୍ଞା ଲେକାମ୍ ଆଦ୍ ଆର୍ଶିବାଦ୍‌ ଅବ୍ରାହାମ୍‍ତିଙ୍କ୍ ଇତ୍‌ତଣ୍ଡ୍‌ ।

19 ଆଲେକେ ନିୟମ୍ ବାତେଙ୍କ୍ ତିଆର୍ ଆତ୍‍ତେ ? ନାରୁଡ଼ାଦ୍ ସାରେ କାରାପ୍ କାମ୍ ତଅସିଦାଙ୍କ୍ ଆଦିନାଦ୍ କାମ୍‌ ମାତ୍‍ତେ ମେଣ୍ଡେ ଅବ୍ରାହାମ୍‍ତେ ବେନ୍ ବଂଶତଡ଼୍‍କିଙ୍କ୍ ଉଡ଼ି ଇଶ୍ୱର୍ ଆଦ୍ ପ୍ରତିଜ୍ଞା ମାଡ଼ିମାତ୍‍ତଣ୍ଡ୍, ଆ ନାରୁଣ୍ଡ୍ ୱାନା ଯାକ ନିୟମ୍ ଦର୍‍କାର୍ ମାତ୍‍ତେ । ଅର୍ତୁଣ୍ଡ୍ ନାରୁଙ୍କ୍ ନାଡ଼୍‍ମେ ମାଡ଼ି ଦୂତକିନ୍ ତଡ଼୍ ନିୟମ୍ ତିଆର୍‍ ଆସ୍‍ମାତ୍‍ତେ । 20 ଇତ୍‍କେ ପ୍ରତିଜ୍ଞା ତଡ଼୍ ମାତର୍‌ ୱେରଣ୍ଡ୍ ନାରୁଣ୍ଡ୍ କାଇଲି ମାତ୍‍ତଣ୍ଡ୍ । ଅଣ୍ଡ୍‌ ଅଦୁତଣ୍ଡ୍ ନିଜେ ଇଶ୍ୱର୍ ।

21 ନିୟମ୍ ବାତ୍ ଇଶ୍ୱର୍‌ତେ ପ୍ରତିଜ୍ଞାତିଙ୍କ୍ ବିରୁଦ୍‍ ମାଡ଼ୁତେ ? ଇଲ୍‍ଲେ, ବେସୁଟ୍‌ ଆୟ୍‍ୟ ! ବାତେଙ୍କ୍‍ଇତ୍‍କେ ନାରୁଣ୍ଡ୍‍ତିଙ୍କ୍ ଜିୱୁଣ୍ଡ୍ ଇଦାନ୍ ରକମ୍ ଯଦି ଅଣ୍ଡୟ୍‌ ନିୟମ୍ ତିଆର୍ ଆସ୍‍ମାନେଡ଼୍, ଆଲେକେ ଆଦ୍ ପାଲନ୍ ମାଡ଼ି ନାରୁଡ଼୍ ଇଶ୍ୱର୍‌ତେ କଣ୍ଡେତାଗାଙ୍କ୍ ନିର୍ଦୋଷ୍ ଆୟେଡ଼୍ । 22 ଇତ୍‍କେ ଦର୍ମଶାସ୍ତ୍ରତାଗ୍ ଲେକା ମିନ୍ଦେ, ସାରେ ନାରୁଣ୍ଡ୍ ପାପ୍ ଅଦିନ୍‌ତେ ମିନ୍ଦେଡ଼୍, ଆଦିଙ୍କ୍ ବେଲା ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ି ପ୍ରତିଜ୍ଞା ଆର୍ଶିବାଦ୍‌ କ୍ରିଷ୍ଟ ବିଶ୍ୱାସୀଡ଼୍ ପାଏମ୍ ଆଦ୍‍ତଡ଼୍ ।

23 ବିଶ୍ୱାସ୍‍ତେ ଯୁଗ୍ ୱାଦାନ୍ ମୁନେନ୍ ନୁ ପ୍ରଚାର୍ ଆଦାନ୍ ଯାକ ନିୟମ୍ ମାନ୍‍ ସାରେତଡ଼୍‍କିଙ୍କ୍ ତହସ୍ ନେଃଏସ୍‍ ମାତ୍‍ତେ । 24 କ୍ରିଷ୍ଟ ୱାଦାନ୍ ଯାକ ନିୟମ୍ ମାନ୍‍ ମେସ୍ତେର୍ ଇନା ମାତ୍‍ତେ; ଇତ୍‍କେ ତାନ୍ ପେର୍କେ, ମାତର୍‌ ବିଶ୍ୱାସ୍ ତଡ଼୍ ମାମ୍ ଇଶ୍ୱର୍‌ତେ ମୁନ୍‍ନେ ଦାର୍ମାମ୍ ଆଦ୍‍ତମ୍ । 25 ଇଞ୍ଜେ ବିଶ୍ୱାସ୍‍ତାଦ୍ ଯୁଗ୍ ଏୱୁତେ, ମାମ୍ ମେଣ୍ଡେ ନିୟମ୍‍ତେ ଆଦିନ୍ ଇଲେମ୍ ।

26 ବିଶ୍ୱାସ୍‍ ତଡ଼୍ ଜିସୁ କ୍ରିଷ୍ଟନାଗ୍ କାୟ୍‍ଲି ମିଡ଼୍ ସାରେତଡ଼୍ ଇଶ୍ୱର୍‌ତେ ମାର୍‍ମାୟାସ୍କ୍ ଆତ୍‍ତିଡ଼୍ । 27 ଏର୍‍ଦିକ୍ଷା ତଡ଼୍ ମିଡ଼୍ ସାରେତଡ଼ି କ୍ରିଷ୍ଟନ୍‍ ତଡ଼୍‍ ଅଣ୍ଡୟ୍‌ ଆତ୍‍ତିଡ଼୍ ନୁ ଇଞ୍ଜେ ଜିସୁ କ୍ରିଷ୍ଟଟନ୍ ଜିୱୁଣ୍ଡ୍ ଲେକାମ୍ ଚକା କେର୍‍ଦୁତିଡ଼୍ । 28 ଆଦିଙ୍କ୍ ଯିହୁଦି ନୁ ଅଣଇହୁଦି, କ୍ରିତଦାସ ନୁ ସ୍ୱାଦିନ୍ ନାରୁଡ଼୍, ମାନେୟ୍ ଆୟି କି ନାଟାଡ଼୍ ଆୟି ତାମ୍ ଲୋପେ ବାତେ ୱେରେ ଇଲ୍‍ଲେ । ମିଡ଼୍ ସାରେତଡ଼ି ଜିସୁ କ୍ରିଷ୍ଟଟନ୍ ତଡ଼୍ କାୟ୍‍ଲି ଅଣ୍ଡୟ୍‌ ଆତ୍‍ତିଡ଼୍ । 29 ✝ଯଦି ମିଡ଼୍ କ୍ରିଷ୍ଟନ୍‍ ନାରୁଡ଼ି, ଆଲେକେ ମିଡ଼୍‍ ଗାଲା ଅବ୍ରାହାମ୍‍ତେ ବଂଶତଡ଼ି ନୁ ଇଶ୍ୱର୍ ବାତ୍ ପ୍ରତିଜ୍ଞା ମାଡ଼୍‍ତଣ୍ଡ୍, ଆଦ୍ ପାଏମ୍ ଆଦ୍‍ତିଡ଼୍ ।