1 ଜିସୁ କେତ୍‍ତଣ୍ଡ୍, ମିୟାଦ୍ ହୃଦୟ୍ ଉଦ୍‍ବିଗ୍ନ ଆୟ୍‍ମା; ମିଡ଼୍ ଇଶ୍ୱର୍‌ତିଙ୍କ୍ ବିଶ୍ୱାସ୍ ମାଡ଼ାଟ୍, ନାକିଂଙ୍କ୍ ମିକା ବିଶ୍ୱାସ୍ ମାଡ଼ାଟ୍ । 2 ନା ବାବାନ୍ ଲୋନ୍‌ ନାର୍‍ଗେ ପଡ଼ିୟେମିନ୍ଦେ; ଯଦି ଇଲକଟ୍ ମାନେଡ଼୍‍, ଆଲେକେ ନାନ୍ ମିକିଂଙ୍କ୍ କେଲନ୍ ଆୟେନ୍, ନାନ୍ ମିଇ ସେଙ୍ଗେ ପଡ଼ିୟେ ମାଡ଼ାଙ୍କ୍ ଆଦୁତାନ୍; 3 ମେଣ୍ଡେ ନାନ୍ ଆଞ୍ଜ୍ ମିଇ ମାଇଦିଙ୍କ୍ ପଡ଼ିୟେ ମାଡ଼ି ମେଣ୍ଡନ୍ ଦାମ୍ ୱାଦ୍‍ତାନ୍, ମେଣ୍ଡେ ନାନ୍ ବେନ୍ ପଡ଼ିୟେ ତାଗ୍ ମାନ୍‍ତାନ୍, ମିଡ଼୍‍ଆନ୍‌ନ୍ତେ ଆଗେ ମାନ୍‍ତିଡ଼୍, ଆଦିନ୍ ସେଙ୍ଗେ ମିଇ ପାକେ ୱାଦ୍‍ତାନ୍ । 4 ନାନ୍ ବେନ୍ ପଡ଼ିୟେତାଗ୍ ଆଦୁତାନ୍, ଆଦ୍ ଆର୍ ମିଡ଼୍ ପୁତ୍‍ତିଡ଼୍ ।

5 ତୋମାଲ୍‌ ଅଂକିଙ୍କ୍‌ ପଚ୍ରାରା ମାଡ଼୍‍ତଣ୍ଡ୍‌, ପ୍ରବୁ, ନିମ୍‍ ବେନ୍ ପଡ଼ିୟେ ତାଗ୍ ଅଦୁତିନ୍, ଆଦ୍‍ମାମେ ପୁନ୍‍ନମ୍; ଆର୍ ବା ବେଲା ପୁତ୍‍ତମ୍ ?

6 ଜିସୁ ଅଂକିଙ୍କ୍‌ କେତ୍‍ତଣ୍ଡ୍‌, ନାନ୍ ଆର୍, ସତ୍ ନୁ ଜିୱୁନ୍; ନାଆଲାନ୍ ଅନ୍‌‍ୱେ ବେନବା ବାବାନ୍ ଗାର୍‍ରେ ଆଦ୍‍ପାର୍‍ୱଡ଼୍ । 7 ଯଦି ମିଡ଼୍ ନାକିଂଙ୍କ୍ ପୁଞ୍ଜ୍ ମାନେଡ଼ି, ଆଲେକେ ନା ବାବାଙ୍କ୍ ମିକା ପୁନେଡ଼ି; ଇଞ୍ଜେ ଅଂକିଙ୍କ୍‌ ପୁତ୍‍ତିଡ଼୍ ନୁ ଅଂକିଙ୍କ୍‌ ଉଡ଼ୁତିଡ଼୍ ।

8 ପିଲିପ୍ ଅଂକିଙ୍କ୍‌ କେତ୍‍ତେ, ପ୍ରବୁ, ମାକିଂଙ୍କ୍ ବାବାନ୍ ତ ଦର୍ଶନ୍ ମାଡ଼ିମ୍, ଆଦ୍ ମା ସେଙ୍ଗେ ଯତେଷ୍ଟ ।

9 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, ପିଲିପ୍, ଇସର୍ ଯାକ ନାନ୍ ନି ସାଙ୍ଗେତେ ମିନ୍ଦେନ୍, ମେଣ୍ଡେ ନିମ୍‍ ବାତେଏ ନାକିଂଙ୍କ୍ ପୁନ୍‍ୱିନ୍ ? ବେନ ନାକିଂଙ୍କ୍ ଦର୍ଶନ୍ ମାଡ଼ିମିନ୍ଦେଣ୍ଡ୍, ଅଣ୍ଡ୍‌ ବାବାଙ୍କ୍ ଦର୍ଶନ୍ ମାଡ଼୍‍ତଣ୍ଡ୍; ମାକିଂଙ୍କ୍ ବାବାନ୍ ଦର୍ଶନ୍ ମାଡ଼ିମ୍ ଇଞ୍ଜ ନିମ୍‍ ବେଲା କେତୁତିନ୍ ? 10 ନାନ୍ ଯେ ବାବାନାଗେ ମିନ୍ଦେନ୍ ନୁ ବାବାଲ୍ ନାୟାଗ୍ ମିନ୍ଦେନ୍, ଇ ଗଟ୍ ବାତେଏ ବିଶ୍ୱାସ୍ ମାଡ଼୍‍ୱିନ୍ ? ନାନ୍ ମିକିଂଙ୍କ୍ ବେନ୍ ସାରେ ବାକ୍ୟ କେତ୍‍ତାନ୍, ଆଦ୍‍ ସାରେ ନା ନିଜେତ୍ ତାଗାଙ୍କ୍ କେଲନ୍, ବାତେଙ୍କ୍ ଇତ୍‍କେ ବାବାନାଗେ ମାଞ୍ଜ୍ ନିଜେତ୍ ପାଡ଼୍‍ୟି ମାଡ଼ୁତଣ୍ଡ୍ । 11 ନାନେଜେ ବାବାନାଗେ ମିନ୍ଦେନ୍ ନୁ ବାବା ନାଗେ ମିନ୍ଦେନ୍, ନାୟାଉ ଇଉସାରେ ଗଟି ବିଶ୍ୱାସ୍ ମାଡ଼ାଟ୍, ଇଲୁକ୍ ନାୟାଦ୍ ପାଡ଼୍‍ୟି ଉଡ଼ି ବିଶ୍ୱାସ୍ ମାଡ଼ାଟ୍ । 12 ସତ୍ ନାନ୍ ମିକିଂଙ୍କ୍ କେତୁତାନ୍, ନାୟାଗେ ବେନ ବିଶ୍ୱାସ୍ ମାଡ଼ିତନ୍, ନାନ୍ ବେନ୍ ପାଡ଼୍‍ୟି ମାଡ଼ୁତାନ୍, ଅଣ୍ଡ୍‌ ମିକା ଆଦେ ମାଡ଼ିତନ୍, ମେଣ୍ଡେ ଆଦ୍‍ ସାରେ ୱିଡ଼୍‍ସି ଗାଟି ଲେକାମ୍ ପାଡ଼୍‍ୟି ମାଡ଼ିତନ୍, ବାତେଙ୍କ୍ ଇତ୍‍କେ ନାନ୍ ବାବାନ୍ ଗାର୍‍ରେ ଆଦୁତାନ୍ । 13 ମେଣ୍ଡେ ନା ପେଦେର୍ ତେ ବାତେଏ ତାଲ୍‍କିତିଡ଼୍, ଆଦ୍ ନାନ୍ ମାଡ଼ିତାନ୍ । ବେଲାକି ପିଲାନ୍ ତଡ଼୍ ବାବାନାଦ୍ ମହିମା ପ୍ରକାଶ୍ ଆଦ୍‍ତେ । 14 ଯଦି ମିଡ଼୍ ନା ପେଦେର୍ ତେ ବାତେଏ ବିଷୟ ନାକିଂଙ୍କ୍ ତାଲ୍‍କିତିଡ଼୍, ନାନ୍ ଆଦ୍ ମାଡ଼ିତାନ୍ ।

15 ଯଦି ମିଡ଼୍ ନାକିଂଙ୍କ୍ ପ୍ରେମ ମାଡ଼ୁତିଡ଼୍, ଆଲେକେ ନାଉ ଗଟ୍ ସାରେ ପାଲନ୍ ମାଡ଼ିତିଡ଼୍ । 16 ମେଣ୍ଡେ, ନାନ୍ ବାବାଙ୍କ୍ ଅନୁରଦ୍‌ ମାଡ଼ିତାନ୍, ମେଣ୍ଡେ ମିଇ ସାଙ୍ଗେତେ ସାରେଦିନା ମାନ୍ଦାନ୍ ସେଙ୍ଗେ ଅଣ୍ଡ୍‌ ମିକିଂଙ୍କ୍ ମେଣ୍ଡେ ୱେରନ୍ ସାହାଜ୍ୟ କାର୍‍ଙ୍ଗି ହିଦ୍‍ତଣ୍ଡ୍, 17 ଅଣ୍ଡ୍‌ ସତ୍ୟମୟ ଆତ୍ମାଙ୍କ୍ ହିଦ୍‍ତନ୍ । ଜଗତ୍ ଅଂକିଙ୍କ୍‌ ଗ୍ରହନ୍ ମାଡ଼େ ପାର୍‍ୱ, ବାତ୍‍ତିଙ୍କ୍ ଜଗତ୍ ଅଂକିଙ୍କ୍‌ ଉଡ଼ କି ପୁନ୍‍ନ; ବାତେଙ୍କ୍ ଇତ୍‍କେ ମିଡ଼୍ ଅଂକିଙ୍କ୍‌ ପୁତ୍‍ତିଡ଼୍, ବାତେଙ୍କ୍ ଇତ୍‍କେ ଅଣ୍ଡ୍‌ ମିଇ ତଡ଼୍ ମାନ୍‍ତନ୍, ମେଣ୍ଡେ ଅଣ୍ଡ୍‌ ମିଇ ଜିୱେତାଗ୍ ମାନ୍‍ତନ୍ ।

18 ନାନ୍ ୱିଡ଼୍‍ସି ଆତ୍‍ତେ ପେର୍‍କେ, ମିକିଂଙ୍କ୍ ଅନାତ୍ ମାଡ଼ି ୱିଡ଼୍‍ସି ଆନନ୍, ନାନ୍ ମିଇ ଗାର୍‍ରେ ମାଲ୍‍ସ୍ ୱାଦ୍‍ତାନ୍ । 19 ସୁଦୁଟ୍ ମାତର୍ ଦିନାମ୍ ମିନ୍ଦେ, ଜଗତ୍ ନାକିଂଙ୍କ୍ ମେଣ୍ଡେ ଉଡ଼; ମାତର୍ ମିଡ଼୍ ନାକିଂଙ୍କ୍ ଉଡ଼ିତିଡ଼୍, ବାତେଙ୍କ୍ ଇତ୍‍କେ ନାନ୍ ଜିୱେ, ମେଣ୍ଡେ ମିଡ଼୍ ଆନ୍‌‍ତେ ଜିୱେ ମାନ୍ଦ୍‍ତିଡ଼୍ । 20 ନାନ୍ ବାବାନାଗ୍ ମେଣ୍ଡେ ମିଡ଼୍ ନାୟାଗ୍ ମିନ୍ଦେଡ଼ି, ଇଦ୍ ଆଦ୍ ଦିନ୍ ୱାତ୍‍କେ ପୁନ୍‍ତିଡ଼୍ ।

21 ବେନ ନା ଗଟିସାରେ ଗ୍ରହନ୍ ମାଡ଼ି ପାଲନ୍ ମାଡ଼ିତନ୍, ଅଣ୍ଡ୍‌ ନାକିଂଙ୍କ୍ ପ୍ରେମ ମାଡ଼ିତନ୍, ମେଣ୍ଡେ ବେନ୍ ନାକିଂଙ୍କ୍ ପ୍ରେମ ମାଡ଼ିତନ୍, ନା ବାବାଲ୍ ଅଂକିଙ୍କ୍‌ ପ୍ରେମ ମାଡ଼ିତନ୍, ମେଣ୍ଡେ ନାନେମିକା ଅଂକିଙ୍କ୍‌ ପ୍ରେମ ମାଡ଼ିତାନ୍ ନୁ ଅଂକିଙ୍କ୍‌ ପ୍ରକାଶ୍ ମାଡ଼ିତାନ୍ ।

22 ଯିହୁଦା, ବେନ ଇଷ୍କାରୀୟତିୟ ଆୟନ୍ ଅଂକିଙ୍କ୍‌ କେତ୍‍ତଣ୍ଡ୍‌, ହଁ ପ୍ରବୁ, ଇଦ୍ ବେଲା ଆଦ୍‍ତେ, ନିଜେତିଙ୍କ୍ ଜଗତ୍‍ତାଗ୍ ତିଆର୍ ମାଡ଼କଟ୍ ମା ପାକେ ବେଲା ତିଆର୍ ମାଡ଼ିତି ?

23 ଜିସୁ ଅଂକିଙ୍କ୍‌ ଉତ୍ତର୍ କେତ୍‍ତଣ୍ଡ୍‌, ଯଦି ବେନ ନାକିଂଙ୍କ୍ ପ୍ରେମ ମାଡ଼୍‍କେ ଆଲେକେ ଅଣ୍ଡ୍‌ ନା ବାକ୍ୟ ପାଲନ୍ ମାଡ଼ିତନ୍, ମେଣ୍ଡେ ନା ବାବାଲ୍ ଅଂକିଙ୍କ୍‌ ପ୍ରେମ ମାଡ଼ିତନ୍, ମେଣ୍ଡେ ମାମ୍‍ମେ ଅନ୍‌ ପାକେ ୱାସ୍ ଅନ୍‌ ତଡ଼୍ ମାନ୍‍ତମ୍ । 24 ବେନ ନାକିଂଙ୍କ୍ ପ୍ରେମ ମାଡ଼ନ୍, ଅଣ୍ଡ୍‌ ନା ବାକ୍ୟ ପାଲନ୍ ମାଡ଼ନ୍ । ନାନ୍ ଇସ୍‍ମାନ୍ଦାନ୍ ଶିକ୍ଷା ନାୱାଦ୍ ଆୟ୍‍ୟ ଆଦ୍ ନା ପ୍ରେରଣାକର୍ତ୍ତାନ୍ ଇଶ୍ୱର୍‌ତାଦ୍ ।

25 "ନାନ୍ ମିଇ ପାକେ ମାନ୍ଦାନ୍‍ୱେଲେ ଇଦ୍ ସାରେ ଗଟ୍ କେସ୍‍ସିତ୍‍ତାନ୍ । 26 ଆଦ୍ ସାହାଯ୍ୟୟକାରି ବେନ୍ ପବିତ୍ର ଆତ୍ମାତିଙ୍କ୍ ବାବାଲ୍ ନା ପେଦେର୍ ତେ ମାଲ୍‍ପିତନ୍, ଅଣ୍ଡ୍‌ ସାରେ ବିଷୟ୍‍ତେ ମିକିଂଙ୍କ୍ ବାତେଏ କେସ୍‍ମିନ୍ଦେନି, ଆଦ୍‍ ସାରେ ମିକିଂଙ୍କ୍ ଏର୍କା ମାଡ଼ିଦ୍‍ତଣ୍ଡ୍‌ ।"

27 ନାନ୍ ମିକିଂଙ୍କ୍ ଶାନ୍ତି ଦାନ ମାଡ଼ି ଆଦୁତାନ୍, ନାୱାଦ୍ ନିଜେତ୍ ଶାନ୍ତି ମିକିଂଙ୍କ୍ ଇଦୁତାନ୍; ଜଗତ୍ ବେଲା ଦାନ ମାଡ଼ିତେ, ନାନ୍ ମିକିଂଙ୍କ୍ ଆଦେଲେକାମ୍ ଦାନ ମାଡ଼ନ୍ । ମିୱାଦ୍ ହୃଦୟ୍ ଉଦ୍‍ବିଗ୍ନ କି ୱେର୍‍ମାକି । 28 ନାନ୍ ଆଦୁତାନ୍ ନୁ ମେଣ୍ଡେ ମିଇ ପାକେ ୱାଦ୍‍ତାନ୍, ନାୱାଦ୍ ଇଦ୍ ଗଟ୍ ତ କେଞ୍ଜି ମିନ୍ଦେଡ଼ି । ଯଦି ମିଡ଼୍ ନାକିଂଙ୍କ୍ ପ୍ରେମ ମାଡ଼େଡ଼ି, ଆଲେକେ ନାନ୍ ନା ବାବାନ୍ ପାକେ ଆଦୁତାନ୍ ଇଞ୍ଜ କେଞ୍ଜି ୱେଡ଼୍‍କେ ମାଡ଼େଡ଼ି, ବାତେଙ୍କ୍ ଇତ୍‍କେ ବାବାଲ୍ ନାୟାଗ୍‍କଞ୍ଜ୍ ମହାନ୍ । 29 ମେଣ୍ଡେ, ଇଦ୍ ଗଟେମ୍ ଆଦାନ୍ ୱେଲେ ମିଡ଼୍ ବେଲାକି ବିଶ୍ୱାସ୍ ମାଡ଼ିତିଡ଼୍, ଆଦିନ୍ ସେଙ୍ଗେ ଆଦ୍ ଗଟେମ୍ ଆଦାନ୍ ମୁନେଙ୍କ୍ ନାନ୍ ମିକିଂଙ୍କ୍ କେତୁତାନ୍ । 30 ନାନ୍ ମିତଡ଼୍ ନାର୍‍ଗେ ଜେଲ୍ ଗଟି ମାନନ୍, ବାତେଙ୍କ୍ ଇତ୍‍କେ ଇ ଜଗତ୍‍ତେ ଅଦିପତି ୱାଦୁତଣ୍ଡ୍ । ନା ପର୍‍ର ଅନାଦ୍‌ ବାତେମିକା ଇଲେ । 31 ବାତେଙ୍କ୍ ଇତ୍‍କେ ବାବାଲ୍‌ ନାକିଂଙ୍କ୍ ବେଲା ଗଟ୍ ଇତ୍‍ତନ୍, ଆଦେ ଲେକାମ୍ ନାନ୍ ପାଡ଼୍‍ୟି ମାଡ଼ିତାନ୍ । ଆଲେକେ, ନାନ୍ ନା ବାବାଙ୍କ୍ ପ୍ରେମ ମାଡ଼ୁତାନ୍ ଇଞ୍ଜ ଜଗତ୍ ପୁନ୍‍ତେ, "ୱାଡ଼ାଟ୍ ମାନାଡ଼୍ ଇଗାଙ୍କ୍ ଆଦିକାଡ଼୍ ।"