1 ଆଦ୍‌ ଦିନେ ଯିହୁଦା ଦେଶ୍‌ତାଗ୍‌ ଇଦ୍‌ ପାଟେ ପାରିତଡ଼୍‌; "ମାନାଦ୍‌ ୱେରଡ଼୍‌ ଢାଟୁମ୍‌ ନଗର୍‌ ମିନ୍ଦେ; ଆଦ୍‌ ପରିତ୍ରାଣତିଙ୍କ୍‌ ଆଗେତ୍‌ ଡେମ୍‌ପେଟ୍‌ ନୁ ଅସାର୍‌ ଲେକାମ୍‌ ମାଡ଼ିତିଡ଼୍‌। 2 ସତ୍‌ ପାଲନ୍‌ ମାଡ଼ାନଡ଼୍‌ ଦାର୍ମିକ୍‌ ନାରୁଡ଼୍‌ ବେଲାନ୍‌ ନେଙ୍ଗେ ପାର୍‌ତଡ଼୍‌, ଆଦିଙ୍କ୍‌ ମିଡ଼୍‌ ନାର୍‌ତେ ଆର୍ଙ୍ଗ୍‌ସାରେ ତେର୍‌ମୁଟ୍‌। 3 ବେନନ୍‌ ମାନ୍‌ ମିୟାଗେ ମିନ୍ତେ, ଅଙ୍କ୍‌ ମିଡ଼୍‌ ଶାନ୍ତିତେ ନେଃତିତିଡ଼୍‌; ବାତେଙ୍କ୍‌ଇତ୍କେ ଅଣ୍ଡ୍‌ ମିୟାଗେ ଆଶେ ନେତିତଣ୍ଡ୍‌। 4 ମିଡ଼୍‌ ସାରେ କାଲାମ୍‌ ସଦାପ୍ରବୁନାଗେ ବିଶ୍ୱାସ୍‌ ନେଃମୁଟ୍‌; ବାତେଙ୍କ୍‌ଇତ୍କେ ସଦାପ୍ରବୁ ଯିହୋବାଃତାଗ୍‌ ସାରେ କାଲାମ୍‌ କାଲ୍‌କ୍‌ ମିନ୍ଦେ। 5 ବେନଡ଼୍‌ ଗର୍ବମାତ୍‌ତଡ଼୍‌ ଅଙ୍କ୍‌ ନମ୍ର ମାଡ଼ିମିନ୍ଦେଣ୍ଡ୍‌ ବେଡ଼ିୟେ ନଗର୍‌ତାଗ୍‌ ବାସେ ମାଡ଼ମାନ୍ଦାନ୍‌ ନାରୁଡ଼୍‌କିଙ୍କ୍‌ ନଷ୍ଟ ମାଡ଼ିମିନ୍ଦେଣ୍ଡ୍‌, ଅଡ଼୍‌କିଙ୍କ୍‌ ଦଂସ ମାଡ଼ି ବୂମ୍‌ଦାଗ୍‌ କାଲ୍‌ପିତଣ୍ଡ୍‌। 6 ଡେକେ, ଗରିବ୍‌ନଡ଼୍‌ ଡେକେ ନୁ ବାତ୍‌ତେ ଇଲ୍‌ୱେ ଲେକେତ୍‌ ନାରୁଡ଼୍‌ ଡେକେତ୍‌ ମଦଲ୍‌ ଆଦ୍‌ ନକିତେ। 7 ଦାର୍ମିକ୍‌ନଡ଼୍‌ ଆର୍‌ ତିନାଙ୍କ୍‌; ଟିକ୍‌ ଯେ ମିଡ଼୍‌, ମିଡ଼୍‌ ଦାର୍ମିକ୍‌ତେ ଆର୍‌ ତନ୍ଦମିନ୍ଦେଡ଼ି। 8 ହୋ ସଦାପ୍ରବୁ, ମାମେ ମି ଶାସନ୍‌ ଆର୍‌ଦାଗ୍‌ ମିକିଙ୍କ୍‌ କେପି ମିନ୍ଦେମ୍‌; ମିୟାଦ୍‌ ପେଦେର୍‌ ନୁ ମି ଏର୍କେ ଚିହ୍ନେ ପରୁ ମାୟାଦ୍‌ ଜିୱେତେ ଆଶେ ମିନ୍ଦେ। 9 ନାର୍କାତେ ନାନେ ନା ଜିୱେତେ ମି ସାଙ୍ଗେ ଉନ୍ଦେୱାତିତ୍; ହଁ, ନାନେ ନିଜେତ୍‌ ହୃଦୟତେ ଆତ୍ମାତଡ଼୍‌ ଯାପେ ମିକିଙ୍କ୍‌ ମେଃକିତାନ୍‌; ବାତେଙ୍କ୍‌ଇତ୍କେ ପୃତିବିତାଗ୍‌ ନି ଶାସନ୍‌କାଲାମ୍‌ ପ୍ରକାଶ୍ ଆତ୍‌କେ ଜଗତ୍‌ତେ ନାରୁଡ଼୍‌ ଦର୍ମତେଶିକ୍ଷା ପାଏମ୍‌ ଆଦ୍‌ତଡ଼୍‌। 10 ଦୁଷ୍ଟ ମାନେଇ ତାଗାଙ୍କ୍‌ ଦୟାତେ କେତ୍‌କେ ହେ ଅଣ୍ଡ୍‌ ଦର୍ମ ନାଡ଼୍‌ସଣ୍ଡ୍‌; ସାୟେ ଦେଶ୍‌ତାଗ୍‌ ଅଣ୍ଡ୍‌ ଅନ୍ୟାୟ୍‌ ମାଡ଼ିତଣ୍ଡ୍‌ ନୁ ସଦାପ୍ରବୁନ୍‌ ମହିମାତିଙ୍କ୍‌ ଉଡ଼ଣ୍ଡ୍‌। 11 ହୋ ସଦାପ୍ରବୁ, ନିଆଦ୍‌ କାଇ ସାରେ ପାକେ ଆସ୍‌ମିନ୍ଦେ, ଆଗେକ୍‌ବା ଅଡ୍‌ ଉଡଡ୍‌, ମାତର୍‌ ନାରୁଡ଼୍‌ପାକେ ନିଆଦ୍‌ ଇଚ୍ଛା ଉଡ଼ି ଅଡ଼୍‌ ସିଗ୍‌ ଆଦ୍‌ତଡ଼୍‌; ହଁ, କିସ୍‌ ମି ପାକେତଡ଼୍‌କିଙ୍କ୍‌ ଆୱୁକିତ୍‌।

12 ହୋ ସଦାପ୍ରବୁ ନିମ୍‌ ମା ମାଇଦିଙ୍କ୍ ଶାନ୍ତି ତିଆର୍‌ ମାଡ଼ିତିନ୍‌; ବାତେଙ୍କ୍‌ଇତ୍କେ ନିମେ ମା ମାଇଦିଙ୍କ୍‌ ମାୟାଦ୍‌ ବାତ୍‌ତେ ମାନ୍‌ ସାରେ ପାଡ଼୍‌ୟି ପୁରା ମାଡ଼ିମିନ୍ଦେନି 13 ହୋ ସଦାପ୍ରବୁ, ମା ମାଇଦିଙ୍କ୍‌ ପରମେଶ୍ୱର୍‌, ନିକ୍‌ ୱିଡ଼୍‌ସି ୱେର୍‌ ପ୍ରବୁନଡ଼୍‌ ମାନ୍‌ ପର ରାଜତ୍ୱ ମାଡ଼ିମାତ୍‌ତଡ୍‌, ମାତର୍‌ ନି ତଡ଼୍‌ ମାମେ ନି ପେଦେର୍‌ତେ ପାଲନ୍‌ ମାଡିତମ୍‌। 14 ଅଡ୍‌ ଡଲିମିନ୍ଦେଡ଼୍‌, ଅଡ୍‌ ମେଣ୍ଡେ ଜିଉନ୍‌ ଆୟଡ୍‌; ଅଡ୍‌ ଡଲି ମିନ୍ଦେଡ୍, ଅଡ୍‌ ତେଦଡ୍; ବାତେଇତ୍କେ ମିଡ୍‌ ମାଡ଼୍‌ତେ କାୟେ ଇସ୍‌ ଅଡ଼୍‌କିଙ୍କ୍‌ ଦଂସ ମାଡ଼ିମିନ୍ଦେନି ନୁ ଅଡ୍‌ ଏର୍କେ ମାପି ମିନ୍ଦେନି। 15 ମିଡ୍‌ ଇ ଦେଶତେ ନାରୁଡ୍‌କିଙ୍କ୍‌ ନାର୍ଗେ ମାଡ଼ମାନ୍ଦାନ୍, ହୋ ସଦାପ୍ରବୁ, ନିମେ ଇ ଦେଶ୍‌ତେ ନାରୁଡ୍‌କିଙ୍କ୍‌ ନାର୍ଗେ ମାଡ଼ମାନ୍ଦାନ୍; ନିମେ ଗୌରବ୍‌ ଆସ୍‌ ମିନ୍ଦେନି; ନିମେ ଦେଶ୍‌ତେ ଚାନ୍ଦ୍‌ତିଙ୍କ୍‌ ଏକାମ୍‌ ମାଡ଼ିମିନ୍ଦେନି। 16 ହୋ ସଦାପ୍ରବୁ କଷ୍ଟ ସମୟତେ ଅଡ୍‌ ନିକିଙ୍କ୍‌ ମେଃକିମିନ୍ଦେଡ଼୍‌, ନିଆଦ୍‌ ଶାସ୍ତି ଅଡ୍‌ ପର ମାନ୍ଦାନ୍‌ ୱେଲେ ଅଡ୍‌ ପ୍ରାତନା ମାଡ଼୍‌ତଡ଼୍‌। 17 ଡଙ୍କେତ୍‌ ମାନ୍ଦାନାଦ୍‌ ଜନମ୍ ଆଦାନାଦ୍‌ ଗାରେ‌ ହେଉଦାନ୍‌ ୱେଲେ ଗାଟି କଷ୍ଟ ଆଦ୍‌ତେ ନୁ ଜନ୍ମ ଆଦାନ୍‌ ସମୟ୍‌ତେ କେୟିତେ, ଆଦ୍‌ଲେକାମ୍‌ ହୋ ସଦାପ୍ରବୁ, ମାମେ ମି ତଡ଼୍‌ଦେନମ୍‌ ଆସ୍‌ମିନ୍ଦେମ୍‌। 18 ମାନାଡ୍‌ ଡଙ୍କେତ୍‌ ଆସ୍‌ମିନ୍ଦେଡ଼୍‌, ମାନାଡ୍ ନପ୍‌ ଆସ୍‌ ବାତେ ଜନମ୍‌ ମାଡ଼ମ୍‌; ମାନାଡ୍‌ ଦେଶ୍‌ତିଙ୍କ୍‌ ଉଦ୍ଦାର୍‌ ପାଲନ୍‌ ମାଡ଼୍‌ୱାଡ଼୍‌; କି ଜଗତ୍‌ତେ ନାରୁଡ଼୍‌ ବୁମ୍‌ଦାଗ୍‌ କାଇଲ୍‌ ୱାଡ଼୍‌। 19 ମି ଡଲିମାନ୍ଦାନଡ୍‌ ଜିୱୁନ୍‌ ଆଦ୍‌ତଡ୍‌; ମା ମଡ଼୍‌ସାରେ ତେଦିତା। ହୋ ଦୂମ୍‌ଦାଗ୍‌ କାଇଲିମାନ୍ଦାନଡ଼ି, ମିଡ୍ ତେଦି ପାଟା ପାରାଟ୍; ବାତେଇତ୍କେ ମିୟାଦ୍‌ ମାସ୍‌ଏର୍‌ ଗାଡ଼୍‌ତେ ମାସ୍‌ଏର୍‌ ଲେକାମ୍‌ ନୁ ବୂମ୍‌ଦାଗ୍‌ ଡଲ୍‌ତେନଡ଼୍‌କିଙ୍କ୍‌ ତେତିତନ୍‌।

20 ହୋ ନା ନାରୁଡ୍‌, ୱାଡାଟ୍‌, ମିୟାଦ୍‌ ଲତ୍‌ତାଗ୍‌ ନେଙ୍ଗି ମି ସାର୍‌ପାକ୍‌ କାପାଟ୍‌କିଙ୍କ୍‌ ବନ୍ଦ୍‌ ମାଡାଟ୍‌; କପାମ୍‌ ୱିର୍‌ନା ଜାକ ସୁଜୁର୍‌ ନିଜ୍‌ତିଙ୍କ୍‌ ମିଞ୍ଜ୍‌ସ୍ପାଟ୍‌। 21 ବାତେଇତ୍କେ ଉଡା, ସଦାପ୍ରବୁ ପୃତିବୀତେ ନାରୁଡ୍‌କିଙ୍କ୍‌ ଅପରାଦ୍‌ତିଙ୍କ୍‌ ଅଡ଼କିଙ୍କ୍‌ ଶାସ୍ତି ଇଦାନ୍‌ ମାଇଦିଙ୍କ୍‌ ନିଜର୍‌ ପଡିୟେଙ୍କ୍‌ ୱିଡ୍‌ସି ପେୟିସ୍‌ ୱାସମିନ୍ଦେନ୍; ପୃତିବୀ ହିଁ ନା ନାଡ୍‌ମେତାଦ୍‌ ନେତୁର୍‌ ସାର୍‌ପାକ୍‌ ଆଦ୍‌ତା ନୁ ମିୟାଦ୍‌ କାୟି ନାରୁଡ୍‌କିଙ୍କ୍ ମେଣ୍ଡେ ମୁସ।"