1 ତାନ୍‍ପେର୍କେ ଜିସୁ ଗାଲିଲୀତାଗ୍ ଉଡାଙ୍କ୍ ପସ୍‍ପ୍‍ତଣ୍ଡ୍, ବାତ୍‍ତେଙ୍କ୍ ଇତ୍‍କେ ଯିହୁଦୀଡ଼୍‍ ଅଂକିଙ୍କ୍‌ ଆୱ୍‍କାନ୍ ମାଇଦିଙ୍କ୍ ଚେଷ୍ଟା ମାଡ଼୍‍ନାଙ୍କ୍ ଅଣ୍ଡ୍‌ ଯିହୁଦା ପ୍ରଦେଶ୍‍ତାଗ୍ ଉଡାନ୍‌ ମାଇଦିଙ୍କ୍ ଇଚ୍ଛା ମାଡ଼କଟ୍ ମାତ୍‍ତଣ୍ଡ୍ । 2 ଯିହୁଦୀଡ଼ାଦ୍‍ କୁଟୀର ବାସ ପାଣ୍ଡୁମ୍‍ତେ ଦିନାମ୍ ଗାର୍‍ରେ ହେୱ୍‍ସ୍‍ମାତ୍‍ତେ, 3 ତାନ୍ ତାମୁଣ୍ଡ୍‌କିଡ଼୍ ଜିସୁଙ୍କ୍ କେତ୍‍ତଡ଼୍, "ନିମ୍‍ ବେନ୍ ପାଡ଼ିୟି ମାଡ଼ମିନ୍ଦେନି, ହାଉସାରେ ବେଦ୍‍ପୁଟୁଙ୍କ୍ ମିଇ ଶିଷ୍ୟଡ଼୍ ଆନ୍‌‍ତେ ଉଡ଼ିତିଡ଼୍, ଆଦିନ୍ ମାଇଦିଙ୍କ୍ ହିଗାଙ୍କ୍ ପେୟ୍‍ସ୍‍ଆଞ୍ଜ୍ ଯିହୁଦା ପ୍ରଦେଶ୍‍ତାଗ୍ ଅନ୍‌, 4 ବାତେଙ୍କ୍ ଇତ୍‍କେ ବେନ ତିଆର୍ ଆତ୍‍ତାଙ୍କ୍ ଇଚ୍ଛା ମାଡ଼୍‍କେ ମିଞ୍ଜିମିକା ବାତେଏ ମାଡ଼ଣ୍ଡ୍ । ମିଡ଼୍ ଯଦି ହିସାର୍‍ରେ ମାଡ଼ୁତିଡ଼୍, ଆଲାଇତ୍‍କେ ନିଜେତିଙ୍କ୍ ଜଗତ୍‍ତେ ଗାର୍‍ରେ ତିଆର୍ ମାଡ଼ା ।" 5 ବାତ୍‍ତେଙ୍କ୍ ଇତ୍‍କେ ତାନ୍ ତାମୁଣ୍ଡ୍‌କିଡ୍‍ ମିକା ଅନ୍‌‍ଆଗେ ବିଶ୍ୱାସ୍ ମାଡ଼କଟ୍ ମାତ୍‍ତଡ଼୍ ।

6 ଆସୁଟେ ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, "ନାୟାଦ୍ ଦିନାମ୍ ହି ଯାକ ଉପସ୍ଥିତ ଆୟକେ, ମାତର୍ ମିକିଂଙ୍କ୍ ସାରେ ଦିନାମ୍ ଲେକାମ୍ । 7 ଜଗତ୍ ମିକିଂଙ୍କ୍ ପାସ୍‍କ, ବାତେଙ୍କ୍ ଇତ୍‍କେ ନାକିଂଙ୍କ୍ ପାସ୍‍କିତ୍‍ତେ, ବାତେଙ୍କ୍ ଇତ୍‍କେ ତାନାଦ୍ ପାଡ଼୍‍ୟି କାରାପ୍, ନାନ୍ ତାନ୍ ବିଷୟ୍‍ତେ ହି ସାକ୍ଷ୍ୟ ଇସ୍‌ ୱାଦୁତାନ୍ । 8 ମିଡ଼୍ ହି ପାଣ୍ଡୁମ୍‍ତାଗେ ଆନୁଟ୍, ନାନ୍ ଇଞ୍ଜେ ହି ପାଣ୍ଡୁମ୍‍ତାଗ୍ ଆନନ୍‍, ବାତ୍‍ତେଙ୍କ୍ ଇତ୍‍କେ ନାୟାଦ୍ ଦିନାମ୍ ହି ଯାକ ଉପସ୍ଥିତ ଆୟକେ ।" 9 ଜିସୁ ଅଡ଼୍‌‍କିଂଙ୍କ୍ ହିୱ୍ ସାରେ ଗଟି କେସ୍ ଗାଲିଲୀତାଗ୍ ମାତ୍‍ତଣ୍ଡ୍ ।

10 ବାତେଙ୍କ୍ ଇତ୍‍କେ ତାନ୍ ତାମୁଣ୍ଡ୍‌କିଡ଼୍ ପାଣ୍ଡୁମ୍‍ତାଗେ ଆଦ୍‌ ୱେୟେ ଅଣ୍ଡ୍‌ ଆନ୍‌‍ତେ ଆତ୍‍ତଣ୍ଡ୍, ଉଡ଼୍‍ତେଲେକେ ଆୟ୍‍ୟ, ମାତର୍ ଅଣ୍ଡୟ୍‌ ଲେକାତ୍ ଉଡ଼୍‍ତେ । 11 ଆଦିଙ୍କ୍ ଯିହୁଦୀ ନେତାଲଡ଼୍ ପାଣ୍ଡୁମ୍‍ତାଗେ ମେହ୍‍କ ପାଚ୍ରାମାଡ଼୍‍ତଡ଼୍, ଅଣ୍ଡ୍‌ ବେକେ ?

12 ମେଣ୍ଡେ, ଅନ୍‌ ବିଷୟ୍‍ତେ ନାରୁଡ଼୍ ତାମ୍‍ତାମ୍ ଲୋପ୍ ତିରିୟାନଙ୍କ୍ ପସ୍‍ପ୍‍ତ୍‍ତଡ଼୍; ମେଣ୍ଡେ ବେନ୍‍ ବେନ କେତ୍‍ତଡ଼୍, "ଅଣ୍ଡ୍‌ ଅର୍‍ତୁଣ୍ଡ୍ ସାୟେତ୍ ନାରୁଡ଼୍;" ମେଣ୍ଡେ ବେନ କେତ୍‍ତଡ଼୍, "ଇଲେ, ଅଣ୍ଡ୍‌ ନାରୁଡ଼୍‍କିଂଙ୍କ୍ ବୁସା ମାଡ଼ମିନ୍ଦେଣ୍ଡ୍ ।" 13 ମିକା ଯିହୁଦୀ ନେତାଲଡ଼୍ ୱେର୍‍ଙ୍ଗିଙ୍କ୍ ଅନ୍‌ ବିଷୟ୍‍ତେ ପୁତ୍‍ତେଲେକେ ବେନ ବାତେଏ କେଲକଟ ମାତ୍‍ତଡ଼୍ ।

14 ବାତେଙ୍କ୍ ଇତ୍‍କେ ପାଣ୍ଡୁମ୍‍ତେ ଆଦା ଦିନାମ୍ ତେର୍‍ତେପେୟ୍, ଜିସୁ ମନ୍ଦିର୍‍ତାଗ୍ ଆଞ୍ଜ୍ ଶିକ୍ଷା ହିଦାଙ୍କ୍ ପସ୍‍ପ୍‍ତଣ୍ଡ୍ । 15 ଆସୁଟେ ଯିହୁଦୀ ନେତାଲଡ଼୍ ଦାଦ୍‍ରେଲି କେତ୍‍ତଡ଼୍, "ହିଣ୍ଡ୍ ପାଟ୍ କାର୍‍ୱକଟ୍ ବେଲା ହିସର୍ ବିଷୟ୍ ପୁତ୍‍ତଣ୍ଡ୍ ?"

16 ଆସୁଙ୍କ୍ ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, "ନାୟାଦ୍ ଶିକ୍ଷା ନାୟାଦ୍ ନିଜ୍‍ତାଦ୍‍ ଆୟ୍‍ୟ, ବାତେଙ୍କ୍ ଇତ୍‍କେ ନାକିଂଙ୍କ୍ ରହତେନଣ୍ଡ୍ ଇଶ୍ୱର୍‌ତେ କନ୍‍ସ୍ ୱାସ୍‍ମିନ୍ଦେ । 17 ବେନଆଇ ଯଦି ଇଶ୍ୱର୍‌ତେ ଇଚ୍ଛା ସାଦନ୍‍ ମାଡ଼ାଙ୍କ୍ ଇଚ୍ଛାମାଡ଼ୁତନ୍, ଆଲାଇତ୍‍କେ ହି ଶିକ୍ଷା ଇଶ୍ୱରତାଗାଙ୍କ୍ ତିଆର୍, ନା ନାନ୍ ନା ନିଜର୍‍ତାଗାଙ୍କ୍ କେତୁତାନ୍, ଆଦ୍ ଅଣ୍ଡ୍‌ ପୁନ୍‍ତଣ୍ଡ୍ । 18 ବେନ ନିଜେତ୍ ତାଗାଙ୍କ୍ କେତିତଣ୍ଡ୍, ଅଣ୍ଡ୍‌ ନିଜେତ୍ ଗୌରବତିଙ୍କ୍ ମେହ୍‍କିତନ୍, ବାତେଙ୍କ୍ ଇତ୍‍କେ ବେନ ନିଜେତ୍ ପ୍ରେରଣାକର୍ତ୍ତାନ୍ ଗୌରବ୍ ମେହ୍‍କିତନ୍, ଅଣ୍ଡ୍‌ ସତ୍, ମେଣ୍ଡେ ଅନାଗେ ବାତେମେଣ୍ଡେ ବିଶ୍ୱାସ୍ ଇଲେ । 19 ମୋଶାଲ୍ ବାତେଏ ମିକିଂଙ୍କ୍ ବ୍ୟବସ୍ଥା ହିୱଣ୍ଡ୍ ? ମିକା ମିଇ ଲୋପେଙ୍କ୍ ବେନମିକା ବ୍ୟବସ୍ଥା ପାଲନ୍ ମାଡ଼୍‍ୱିଡ଼୍ । ମିଡ଼୍ ବାତେଙ୍କ୍ ନାକିଂଙ୍କ୍ ଆୱ୍‍କାଂଙ୍କ୍ ଚେଷ୍ଟା ମାଡ଼ମିନ୍ଦେଡ଼ି ?"

20 ନାରୁଡ଼୍ ଉତ୍ତର୍ ହିତ୍‍ତଡ଼୍, "ନିକିଂଙ୍କ୍ ବୁତ୍ ପୟ୍‍ସ୍ ମିନ୍ଦେ, ବେନ ନିକିଂଙ୍କ୍ ଆୱ୍‍କାଂଙ୍କ୍ ଚେଷ୍ଟା ମାଡ଼ୁତଣ୍ଡ୍ ?"

21 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, "ନାନ୍ ୱେରଡ଼୍ ମହାନ୍ ପାଡ଼୍‍ୟି ମାଡ଼୍‍ତାନ୍, ମେଣ୍ଡେ ମିଡ଼୍ ସାରେତଡ଼ି ଦାଦ୍‍ରେଲି ମିନ୍ଦେଡ଼ି । 22 ଆଦିନ୍ ମାଇଦିଙ୍କ୍ ମୋଶାଲ୍ ମିକିଂଙ୍କ୍ ସୁନ୍ନତ୍ ପାଲନ୍ ଇସ୍‌‍ମିନ୍ଦେନ୍, ହିଦ୍ ଯେ ମୋଶାନାଗାଙ୍କ୍ ଆଶେ ମିନ୍ଦେ, ଆଦ୍ ଆୟ୍‍ୟ, ମାତର୍ ଆନିଦାଦିଡ଼୍ ଡ଼ାଗାଙ୍କ୍, ମେଣ୍ଡେ ମିଡ଼୍ ବିଶ୍ରାମ୍‍ଦିନେତାଗ୍ ପେକାଲଡ଼ାଦ୍ ସୁନ୍ନତ୍ ମାଡ଼ମିନ୍ଦେଡ଼ି । 23 ✝ଯଦି ବିଶ୍ରାମ୍‍ଦିନେ ଦିନାତେ ପେକାଙ୍କ୍ ସୁନ୍ନତ୍ ମାଡ଼୍‍କେ ମୋଶାନାଦ୍‍ ବ୍ୟବସ୍ଥା ଉର୍‍ଗାଡ଼୍ ଆୟ୍‍ୟ, ଆଲାଇତ୍‍କେ ନାନ୍ ବିଶ୍ରାମ୍‍ଦିନେ ଦିନାତେ ୱେରନ୍ ନାରୁଙ୍କ୍ ସାରେ ସୁସ୍ଥ ମାଡ଼୍‍କେ ମିଡ଼୍ ବାତେଙ୍କ୍ ନା ପର୍‍ର କପାମ୍ ଆଦୁତିଡ଼୍ ? 24 ବାୟ୍‍ଦେତ୍‍ ବିଷୟ୍ ଉଡ଼ି ବିଚାର୍ ମାଡ଼୍‍ମାଟ୍, ଲେକାମ୍ ନ୍ୟାୟତେ ବିଚାର୍ ମାଡ଼ାଟ୍ ।"

25 ଆସୁଟେ ଜିରୂଶାଲାମ୍‍ତେ ନାରୁଡ଼୍ ଲୋପେଙ୍କ୍ ବେନଡ଼୍ କେତାଙ୍କ୍ ପସ୍‍ପ୍‍ତ୍‍ତଡ଼୍, "ଯିହୁଦୀ ନେତାଲଡ଼୍ ବେନଙ୍କ୍ ଆୱ୍‍କାନ୍ ମାଇଦିଙ୍କ୍ ଚେଷ୍ଟା ମାଡ଼ୁତଡ଼୍, ହିଣ୍ଡ୍ ବାତେଏ ଅଣ୍ଡ୍‌ ଆୟ୍‍ୟ ? 26 ମେଣ୍ଡେ ଉଡ଼ାଟ୍, ଅଣ୍ଡ୍‌ ସାରେତଡ଼୍ କେଞ୍ଜ୍‍ତେ ଲେକେମ୍ ଗଟି କେସମିନ୍ଦେନ୍, ମେଣ୍ଡେ ଅଡ଼୍‌ ଅଂକିଙ୍କ୍‌ ବାତେଏ ମାଡ଼ଡ଼୍‍ । ହିଣ୍ଡ୍ ଯେ ମସିହ, ହିଦ୍ ବାତେଏ ନେତାଲଡ଼୍ ନିଜାମ୍ ପୁତ୍‍ତଡ଼୍ ? 27 ବେଲା ଆୟି, ହିଣ୍ଡ୍ ବେଗାକନ୍‍ସ୍ ୱାସ୍ ମିନ୍ଦେଣ୍ଡ୍ ମାନାଡ଼୍ ପୁତ୍‍ତାଡ଼୍‍, ବାତେଙ୍କ୍ ଇତ୍‍କେ ମସିହ ବେସୁଙ୍କ୍‍ ୱାଦ୍‍ତଣ୍ଡ୍, ଆସୁଟେ ଅଣ୍ଡ୍‌ ୱାଦାନାଦ୍ ବେନ ପୁନ୍‍ଅଡ଼୍‌‍ ।"

28 ଆସୁଟେ ଜିସୁ ମନ୍ଦିର୍‍ତାଗ୍ ଶିକ୍ଷା ହିସ ବେଡ଼୍‍ୟ୍ ଲେଙ୍ଗ୍‍ତେ କେତ୍‍ତଣ୍ଡ୍, "ମିଡ଼୍ ନାକିଂଙ୍କ୍ ନୁ ନାୟାଦ୍ ଉତ୍ପତ୍ତିଙ୍କ୍ ପୁତ୍‍ତିଡ଼୍ କି ? ନାନ୍ ନିଜର୍‍ତାଗାଙ୍କ୍ ୱାଡ଼ନ୍‍, ବାତେଙ୍କ୍ ଇତ୍‍କେ ନା ପ୍ରେରଣାକର୍ତ୍ତାଲ୍‍ ସତ୍, ଅଂକିଙ୍କ୍‌ ମିଡ଼୍ ପୁନ୍‍ୱିଡ଼୍ । 29 ବାତେଙ୍କ୍ ଇତ୍‍କେ ନାନ୍ ଅଂକିଙ୍କ୍‌ ପୁତ୍‍ତାନ୍, ବାତେଙ୍କ୍ ଇତ୍‍କେ ନାନ୍ ଅନ୍‌‍ଆଗାଙ୍କ୍ ୱାସ୍‍ମିନ୍ଦେନ୍, ମେଣ୍ଡେ ଅଣ୍ଡ୍‌ ନାକିଂଙ୍କ୍ ରହ୍‍ତଣ୍ଡ୍ ।"

30 ଆସୁଟେ ଅଡ଼୍‌ ଅଂକିଙ୍କ୍‌ ପୟ୍‍ତାଙ୍କ୍ ଚେଷ୍ଟା ମାଡ଼୍‍ତଡ଼୍; ବାତେଙ୍କ୍ ଇତ୍‍କେ ବେନମେଣ୍ଡେ ଅନ୍‌ ପର୍‍ର କାୟ୍‍ ୱାଟଡ଼୍‍, ବାତ୍‍ତେଙ୍କ୍ ଇତ୍‍କେ ଅନାଦ୍‌ ଦିନାମ୍ ଆଦ୍ ଯାକ ହେୱକଟ୍ ମାତ୍‍ତେ । 31 ବାତେଙ୍କ୍ ଇତ୍‍କେ ନାରୁଡ଼୍ ଲୋପେଙ୍କ୍ ନାର୍‍ଗେ ଅନ୍‌‍ଆଗେ ବିଶ୍ୱାସ୍ ମାଡ଼ି କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍, "ହିଣ୍ଡ୍ ବେନ୍‍ସାରେ ବାକ୍‍ୱା ପାଡ଼ିୟି ମାଡ଼ିମିନ୍ଦେଣ୍ଡ୍ ମସିହ ୱାସ୍ ଆୱିଙ୍କ୍‍ଅନ୍‌‍ ବାତେଏ ନାର୍‍ଗେ ମାଡ଼ିତନ୍ ?"

32 ଜିସୁନ୍ ବିଷୟ୍‍ତେ ନାରୁଡ଼୍ ନିଜେ ନିଜେ ତିରିୟାନାଦ୍ ପାରୂଶୀଡ଼୍ କେଞ୍ଜ୍‍ତଡ଼୍, ଆସୁଟେ ମୁକ୍ୟଯାଜକ୍ ନୁ ପାରୂଶୀଡ଼୍ ଅଂକିଙ୍କ୍‌ ପୟ୍‍ଦାନ୍‍ ମାଇଦିଙ୍କ୍ ପ୍ରହରୀଡ଼୍‍କ୍ ରହ୍‍ତଡ଼୍ । 33 ଆସୁଟେ ଜିସୁ କେତ୍‍ତଣ୍ଡ୍, "ନାନ୍ ମେଣ୍ଡେ ସୁଦୁର୍ ସମୟ୍‍ଜାକ ମିଇ ତଡ଼୍ ମାନ୍‍ତାନ୍, ତାନ୍‍ପେର୍କେ ନାକିଂଙ୍କ୍ ରୟ୍‍ସ୍‍ମାନ୍ଦାନନ୍‍ ଗାର୍‍ରେ ମାଲ୍‍ସ୍ ଆଦ୍‍ତନ୍ । 34 ମିଡ଼୍ ନାକିଂଙ୍କ୍ ମେହ୍‍କିତିଡ଼୍‍, ମାତର୍ ଦର୍‍ସ୍‍କ୍‍ ପାର୍‍ୱିଡ଼୍, ମେଣ୍ଡେ, ନାନ୍ ବେଗେ ମାନ୍‍ତାନ୍, ଆଗେ ମିଡ଼୍ ଆତ୍‍ତାଙ୍କ୍ ପାର୍‍ୱିଡ଼୍ ।"

35 ଆସୁଟେ ଯିହୁଦୀଡ଼୍‍ ନିଜେ ନିଜେତିଙ୍କ୍ କେତ୍‍ତଡ଼୍, "ହିଣ୍ଡ୍ ବେଗେ ଆଦ୍‍ଦାନ୍ ମାଇଦିଙ୍କ୍ ପେୟିସ୍ ମିନ୍ଦେନ୍ ଯେ, ମାନ୍‍ଡ଼୍‍ ଅଂକିଙ୍କ୍‌ ଦର୍‍ସ୍କାଙ୍କ୍ ପାର୍‍ୱାଡ଼୍‍ ? ହିଣ୍ଡ୍ ବାତେଏ ଗ୍ରୀକ୍‍ନାରୁଡ଼୍‍ ଲୋପେଙ୍କ୍ ଦୁଡ଼ାଦୁଡ଼ା ଯିହୁଦୀଡ଼୍‍ ଗାର୍‍ରେ ଆଞ୍ଜ୍ ଗ୍ରୀକ୍‍ ନାରୁଡ଼୍‍କିଙ୍କ୍ ଶିକ୍ଷା ହିଦାଙ୍କ୍ ପେୟିସ୍ ମିନ୍ଦେନ୍ ? 36 ମିଡ଼୍ ନାକିଂଙ୍କ୍ ମେହ୍‍କିତିଡ଼୍‍, ମାତର୍ ଦର୍‍ସ୍‍ୱିଡ଼୍, ମେଣ୍ଡେ ନାନ୍ ବେଗେ ମାନ୍‍ତାନ୍, ମିଡ଼୍ ଆଦ୍ ପାର୍‍ୱିଡ଼୍, ଅଣ୍ଡ୍‌ ହି ବେନ ଗଟି କେତ୍‍ତଣ୍ଡ୍, ଇଦିନ୍ ଇତ୍‍କେ ବାତେଏ ?"

37 ପାଣ୍ଡୁମ୍‍ତେ ଶେଷଦିନେ, ଇତ୍‍କେ, ମୁକ୍ୟଦିନେ, ଜିସୁ ନିସ୍‍ମେଣ୍ଡେ ଗାଟି ଲେଙ୍ଗ୍‍ଦେ କେତ୍‍ତଣ୍ଡ୍, "ବେନଙ୍କ୍ ଯଦି ଉନ୍ଦେୱାହ୍‍ତେ, ଅଣ୍ଡ୍‌ ନା ଗାର୍‍ରେ ୱାଡ଼ିଣ୍ଡ୍ । 38 ବେନ ନାୟାଗେ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ଉନିଣ୍ଡ୍, ଦର୍ମଶାସ୍ତ୍ରତାଗ୍ ଲେକାମିନ୍ଦେ, ବେନ ନାୟାଗ୍ ବିଶ୍ୱାସ୍ ମାଡ଼ିତନ୍ ଅନାଦ୍‌ ଜିୱୁତାଦ୍ ସ୍ରୋତ ପ୍ରବାହିତ ଆସମାନ୍‍ତେ ।" 39 ଜିସୁ ପବିତ୍ର ଆତ୍ମା ବିଷୟ୍‍ତେ ହିଦ୍‍ଗଟ୍ କେତ୍‍ତଣ୍ଡ୍, ବେନ ଜିସୁନାଗ୍ ବିଶ୍ୱାସ୍ ମାଡ଼ମାତ୍‍ତଡ଼୍, ଅଡ଼୍‌ ପେର୍‍କେ ପବିତ୍ର ଆତ୍ମା ପାଏମ୍ ଆଦ୍‍ତଡ଼୍, ବାତ୍‍ତେଙ୍କ୍ ଇତ୍‍କେ ଜିସୁ ଆଦ୍ ଯାକ ମହିମା ପାଏମ୍ ଆୟ୍‍ୱାଙ୍କ୍ ପବିତ୍ର ଆତ୍ମା ହିୱକଟ୍ ମାତ୍‍ତଡ଼୍ ।

40 ବେସୁଟ୍‌ ନାରୁଡ଼୍ ଜିସୁନ୍ ହିଦ୍ ଗଟ୍ କେଞ୍ଜ୍‍ତଡ଼୍, ଅଡ଼୍‌ ଲୋପେଙ୍କ୍ ବେନଡ଼୍ କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍, "ହିଣ୍ଡ୍ ନିଜାମ୍ ତେ ଆ ବାବବାଦୀ ।"

41 ମେଣ୍ଡେ ବାଗାତଡ଼୍ କେତାଙ୍କ୍ ପସ୍‍ପ୍‍ତ୍‍ତଡ଼୍, "ହିଣ୍ଡ୍ ମସିହ;" ବାତେଙ୍କ୍ ଇତ୍‍କେ ବାଗାତଡ଼୍ କେତ୍‍ତାଙ୍କ୍ ପସ୍‍ପ୍‍ତ୍‍ତଡ଼୍, "ମସିହ ଗାଲିଲୀତାଗାଙ୍କ୍ ୱାଡ଼ଣ୍ଡ୍ । 42 ଶାସ୍ତ୍ରତାଗ୍ ଲେକାମିନ୍ଦେ, ମସିହ ଯେ ଦାଉଦ୍‍ତେ ବଂଶତାଗାଙ୍କ୍ ନୁ ଦାଉଦ୍ ବେଗ୍‍ମାତ୍‍ତଣ୍ଡ୍, ଆଦ୍ ବେତ୍‍ଲିହିମ୍‍ ନାର୍‍ତାଗାଙ୍କ୍ ୱାଦ୍‍ତଣ୍ଡ୍ ।" 43 ଆଦିଙ୍କ୍ ନାରୁଡ଼୍ ଲୋପେ ଜିସୁନ୍ ମାଇଦିଙ୍କ୍ ମତବେଦ ଗଟେମ୍‍ଆତ୍‍ତେ; 44 ମେଣ୍ଡେ, ଅଡ଼୍‌ ଲୋପେଙ୍କ୍ ବେସ୍‍କ୍‍ତୁଡ଼୍‍ ଜିସୁ ବନ୍ଦି ଆୟିଣ୍ଡ୍ ଇଞ୍ଜ ଇଚ୍ଛା ମାଡ଼ମାତ୍‍ତଡ଼୍, ବାତେଙ୍କ୍ ଇତ୍‍କେ ବେନ ଅନ୍‌ ପର୍‍ର କାୟ୍‍ ୱାଟ୍‍ପାର୍‍ୱଡ଼୍ ।

45 ହିଦିନ୍ ଲୋପେ ପ୍ରହରୀଡ଼୍ ମାଲ୍‍ସ୍ ୱାତ୍‍ତାଙ୍କ୍, ମୁକ୍ୟ ଯାଜକ୍ ନୁ ପାରୂଶୀଡ଼୍ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଡ଼୍, "ମିଡ଼୍ ବାତେଙ୍କ୍ ଜିସୁଙ୍କ୍ ତାଡ଼୍‍ୱିଡ଼୍‍ ?"

46 ପ୍ରହରୀଡ଼୍ ଉତ୍ତର୍ ହିତ୍‍ତଡ଼୍, "ହି ନାରୁଡ଼୍ ବେଦ୍‍ପୁଟୁଙ୍କ୍ ଗଟି କେତୁତଣ୍ଡ୍, ବେନ୍ ନାରୁଡ଼୍ ବେସୁଙ୍କ୍‌ବା ଆଦ୍‍ପୁଟୁଙ୍କ୍ କେଲଣ୍ଡ୍ ।"

47 ଆଗାକଞ୍ଜ୍ ପାରୂଶୀଡ଼୍ ଅଡ଼୍‌‍କ୍ କେତ୍‍ତଡ଼୍, "ମିକିଂଙ୍କ୍ ମିକା ବାତେଏ ଅଣ୍ଡ୍‌ ବକ୍‍ୱା ମାଡ଼ିସ୍‍ ମିନ୍ଦେଣ୍ଡ୍‌ ? 48 ନେତାଲଡ଼୍ ଲୋପେଙ୍କ୍ ବା ପାରୂଶୀଡ଼୍ ଲୋପେଙ୍କ୍ ବାତେଏ ବେନ ୱେରଣ୍ଡ୍‍ମିକା ଅନ୍‌‍ଆଗେ ବିଶ୍ୱାସ୍ ମାଡ଼ିମିନ୍ଦେଡ଼୍ ଇଞ୍ଜ ହିଦ୍ ମିଡ଼୍ ପୁତ୍‍ତିଡ଼୍ କି ? 49 ବାତେଙ୍କ୍ ଇତ୍‍କେ ହି ନାରୁଡ଼୍ ମୋଶାନ୍‌ ବ୍ୟବସ୍ଥାତିଙ୍କ୍ ପୁନଡ଼୍, ଆଦିନ୍ ମାଇଦିଙ୍କ୍ ଇଡ଼୍‌କ୍ ଅବିଶାପ୍‌ ଦର୍‍କ୍‍ତେ ।"

50 ✝ବେନ୍ ନିକଦୀମ୍ ହିଦିନ୍ ମୁନେଙ୍କ୍ ଅନ୍‌ ଗାର୍‍ରେ ୱାସ୍‍ମାତ୍‍ତଣ୍ଡ୍ ନୁ ଯେ ଅଡ଼୍‌ ଲୋପେଙ୍କ୍ ୱେରଣ୍ଡେ, ଅଣ୍ଡ୍‌ ଅଡ଼୍‌‍କିଂଙ୍କ୍ ପାଚ୍ରାମାଡ଼୍‍ତଣ୍ଡ୍, 51 "ୱେରଣ୍ଡ୍ ନାରୁନାଗାଙ୍କ୍ ମୁନେଙ୍କ୍‍କଞ୍ଜ୍ କେଞ୍ଜକଟ ନୁ ଅନାଦ୍‌ ଆଚରଣ ବିଷୟ୍ ପୁନକଟ୍ ମାନାଦ୍‍ ବ୍ୟବସ୍ଥା ବାତେଏ ଅଂକିଙ୍କ୍‌ ଦୋଷି ମାଡ଼ିତେ ?"

52 ଅଡ଼୍‌ ଅଂକିଙ୍କ୍‌ ଉତ୍ତର୍ ହିତ୍‍ତଡ଼୍, "ନିମ୍‍ ମିକା ବାତେଏ ୱେର୍‍ନି ଗାଲିଲୀ ନାରୁନୀ ? ଗାଲିଲୀତାଗ୍ ବେନ୍‌ଆଇ ବାବବାଦୀ ତିଆର୍ ଆୟଡ଼େ, ହିଦ୍ ମେହ୍‍କିମେଣ୍ଡେ ଉଡ଼େ ।"

53 ମେଣ୍ଡେ ଅଡ଼୍‌ ସାର୍‍ତଡ଼୍ ନିଜେତ୍ ନିଜେତ୍ ଲୋକିନାଗ୍ ଆଦ୍‍ତଡ଼୍ ।