1 "ଗାଟି ଲେଙ୍ଗ୍‌ଦେ କେଲ୍‌ମୁଟ୍‌, ଲେଙ୍ଗ୍‌ କମ୍‌ ମାଡ଼୍‌ମାଟ୍‌, ମୟିର୍‌ ଲେକାମ୍‌ ନିଜେତ୍‌ ଲେଙ୍ଗ୍‌ ତେମୁଟ୍‌, ମାମେ ନାରୁଡ଼୍‌କିଙ୍କ୍‌ ଅଡ଼୍‌ ଅଦର୍ମ ନୁ ଯାକୁବ୍‌ତେ ପିଲୁଡ଼୍‌ତିଙ୍କ୍‌ ପାପ୍‌ସାରେ କେଞ୍ଜ୍‌ସ୍ପାଟ୍‌। 2 ଆଗେକ୍‌ବା ଅଡ଼୍‌ ସାରେଦିନା ମା ପେର୍କେ ୱାଦ୍‌ତଡ଼୍‌ ନୁ ମା ଆର୍‌ ବିଷୟ୍‌ତେ ପୁନ୍ଦାନଙ୍କ୍‌ ଇଚ୍ଛା ଆଦ୍‌ତଡ଼୍‌; ବେନ୍‌ ନଗର୍‌ତେ ନାରୁଡ଼୍‌ ଦର୍ମକର୍ମ ମାଡ଼ିତଡ଼୍‌ ନୁ ମାନ୍‌ ପରମେଶ୍ୱର୍‌ତେ ନିୟମ୍‌ ୱିଡ଼୍‌ସଣ୍ଡ୍‌, ଅଡ଼୍‌ ଲେକାମ୍‌ ଅଡ଼୍‌ ଦର୍ମ ନିୟମ୍‌ ବିଷୟ ମାକିଙ୍କ୍‌ ପାଚ୍‌ରିଞ୍ଚିତଡ଼୍‌ ନୁ ପରମେଶ୍ୱର୍‌ତେ ପାକେ ୱାଦାନଙ୍କ୍‌ ଇଚ୍ଛା ମାଡ଼ିତଡ଼୍‌। 3 ଅଡ଼୍‌ କେତିତଡ଼୍‌, ମାମେ ବାତ୍‌ତିଙ୍କ୍‌ ଉପବାସ୍‌ ମାଡ଼ିମିନ୍ଦେମ୍‌ ନୁ ମି ଉଡ଼୍‌ୱିଡ଼୍‌? ମାମେ ବାତ୍‌ତିଙ୍କ୍‌ ନିଜେ ନିଜେ ଜିଊତିଙ୍କ୍‌ ତିପାଲ୍‌ ଇସ୍‌ମିନ୍ଦେଡ଼୍‌ ନୁ ମିଡ଼୍‌ ମାନ୍‌ ଇୱିଡ଼୍‌ ? ଉଡ଼ାଟ୍‌, ମିଡ଼୍‌ ଉପବାସ ଦିନେ ନିଜେତ୍‌ ସୁକାମ୍‌ ଉଡ଼ମିନ୍ଦେଡ଼ି ନୁ ଲେକେତ୍‌ ସାରେ କଷ୍ଟ ଅଦୁତିଡ଼୍‌। 4 ଉଡ଼େ, ମିଡ଼୍‌ ରାମ୍‌କ୍‌ ନୁ ମର୍‌ରେ ସେଙ୍ଗେ, ମେଣ୍ଡେ ଦୁଷ୍ଟଡ଼୍‌ ମୁଟ୍‌କ୍‌ତଡ଼୍‌ ରେଃତାନଙ୍କ୍‌ ଉପବାସ ମାଡ଼ମିନ୍ଦେଡ଼ି; ମିୟାଦ୍‌ ଲେଙ୍ଗ୍‌ ପରୁ ବେଲାନ୍‌ କେଞ୍ଜାନଙ୍କ୍‌ ଆଦ୍‌ତେ, ଇଦ୍‌ଲେକାମ୍‌ ଉପବାସ ନେଣ୍ଡ୍‌ ମିଡ଼୍‌ ମାଡ଼୍‌ୱିଡ଼୍‌। 5 ଇଦ୍‌ ଲେକାମ୍‌ ଉପବାସ, ନାରୁଡ଼୍‌ ନିଜେତ୍‌ ଜିଉତିଙ୍କ୍‌ କଷ୍ଟ ଆଦାନ୍‌ ସେଙ୍ଗେ ଇଦ୍‌ ଲେକାମ୍‌ ଦିନାମ୍‌, ମାମେ ବାତ୍‌ତେ ହେଞ୍ଚି ମିନ୍ଦେମ୍‌ ? ବସେ ମାଡ଼୍‌ଲେକାମ୍‌ ତାଲ୍‌ଲେ ଆଡ଼୍‌ଗି ମାଡ଼ାନାଦ୍‌, ମେଣ୍ଡେ ଇସୁରାଦ୍‌ ଚକା ନୁ ନିର୍‌ ନିଜେତ୍‌ ମଦଲ୍‌ ଲିକାନାଦ୍‌, ଇଦ୍‌ ମିଡ଼୍‌ ଉପବାସ ନୁ ସଦାପ୍ରବୁନ୍‌ ପେଦେର୍‌ତେ ବାତେ ୱିଡ଼୍‌ସ୍ତେ ଦିନାମ୍‌ ଇଞ୍ଜ୍‌ କେତିତିଡ଼୍‌ ? 6 ମାନାଡ଼୍‌ ବେନ୍‌ ଉପବାସ୍‌ ଇଚ୍ଛା ମାଡ଼ୁତାଡ଼୍‌ ଆଦ୍‌ ବାତ୍‌ତେ ଇଦ୍‌ ଆୟକି ? ଦୁଷ୍ଟଲେକାତ୍‌ ବନ୍ଧନ୍‌ ଲେସିଦାନଣ୍ଡ୍‌, ଯୁଆଡ଼୍‌ତେ ବନ୍ଧନ୍‌ ମୁକ୍ତ ମାଡ଼ାନଣ୍ଡ୍‌ ନୁ ତିପାଲ୍‌ତେ ଆସ୍‌ମାନ୍ଦାନ୍‌ ନାରୁଡ଼୍‌କିଙ୍କ୍‌ ମୁକ୍ତ ମାଡ଼ି ୱିଡ଼୍‌ସିଦାନଣ୍ଡ୍‌, ମେଣ୍ଡେ ସାରେ ଯୁଆଡ଼ି ଉଃତାନଣ୍ଡ୍‌, 7 କାର୍‌ୱିନ୍‌ ନାରୁଙ୍କ୍‌ ମିୟାଦ୍‌ କାଦି ତୁଃସାନଣ୍ଡ୍‌, ନୁ ତଲିଆତ୍‌ ଦୁଃକାମ୍‌ତେ ନାରୁଙ୍କ୍‌ ନିଜେତ୍‌ ଲୋନ୍‌ ତାତାନଙ୍କ୍‌, ମିଡ଼୍‌ ବାଣ୍ଡାମାନ୍ଦାନାଦ୍‌ ଉଡ଼୍‌କେ, ଅଙ୍କ୍‌ ଚିଲେ କେର୍ସ୍ପାନଙ୍କ୍‌ ନୁ ମି ନିଜେତ୍‌ ପିଲୁଡ଼୍‌ତେ ନାରୁନାଗାଙ୍କ୍‌ ନିଜେତିଙ୍କ୍‌ ମିଞ୍ଜସ୍ପାକଟ୍‌, ଇଦ୍‌ଲେକାମ୍‌ ଉପବାସ ମାମେ କି ହେଞ୍ଚସମ୍‌ ? 8 ଇଦ୍‌ ମାଡ଼୍‌କେ, ଦିନାମ୍‌ତେ ୱେସ୍‌ ଲେକାମ୍‌ ମିୟାଦ୍‌ ୱେଇସ୍‌ ପ୍ରକାଶ୍‌ ଆଦ୍‌ତେ ନୁ ମିୟାଦ୍‌ ଆରୋଗ୍ୟ ଜାପେ ମଡ଼୍‌ତିତେ; ମେଣ୍ଡେ, ମିୟାଦ୍‌ ଦର୍ମ ମି ମୁନେ ମୁନେ ଆଦ୍‌ତେ; ସଦାପ୍ରବୁନ୍‌ ୱେଇସ୍‌ ମି ପାକେ ମାନ୍ଦ୍‌ତେ। 9 ଆସୁଟ୍‌ ମିଡ଼୍‌ କାର୍ଙ୍ଗିତିଡ଼୍‌ ନୁ ସଦାପ୍ରବୁ ଉତ୍ତର୍‌ ଇଦ୍‌ତଣ୍ଡ୍‌; ମିଡ଼୍‌ ଅନାଗ୍‌ ସାହାଯ୍ୟ ସେଙ୍ଗେ କେୟି କାର୍ଙ୍ଗାନାଦ୍‌, ମେଣ୍ଡେ ଅଣ୍ଡ୍‌ କେତିତଣ୍ଡ୍‌ ମାମେ ମିନ୍ଦେମ୍‌। ଯଦି ମିଡ଼୍‌ ମିୟାଗାଙ୍କ୍‌ ଯୁଆଡ଼୍‌, ୱାଡ଼୍‌ଞ୍ଜ୍‌କିନ୍‌ ଲେକ୍‌ତାଦ୍‌ ନୁ ଅଦର୍ମ ବାକ୍ୟ ଦୁରାମ୍‌ ମାଡ଼ାଟ୍‌; 10 ମେଣ୍ଡେ, ଯଦି କାର୍ୱିନ୍‌ ନାରୁନ୍‌ ପରୁ ମିୟାଦ୍‌ ଜିୱେ ଦୟା ଆଦ୍‌ତେ ନୁ ମିୟାଦ୍‌ ଦୁଃକାମ୍‌ ଜିଉତିଙ୍କ୍‌ ଦୁରାମ୍‌ ମାଡ଼ିତିଡ଼୍‌; ଆଲେକେ ଇକାଡ଼୍‌ତାଗ୍‌ ମିୟାଦ୍‌ ୱେଇସ୍‌ ଆଦ୍‌ତେ ନୁ ମିୟାଦ୍‌ ଇକାଡ଼୍‌ ମାଦ୍‌ନାମ୍‌ ସାମାନ୍‌ ଆଦ୍‌ତେ; 11 ମେଣ୍ଡେ, ସଦାପ୍ରବୁ ନିଜାମ୍‌ ମିକିଙ୍କ୍‌ ଆର୍‌ ତଃସଡ଼୍‌ ଅଦ୍‌ତଣ୍ଡ୍‌ ନୁ ଉସ୍‌କନେଲ୍‌ଦାଗ୍‌ ମି ଜିଉତିଙ୍କ୍‌ ଦୁରାମ୍‌ ମାଡ଼ିତଣ୍ଡ୍‌ ନୁ ମି ବୁଲାସାରେ ଶକ୍ତି ମାଡ଼ିତଣ୍ଡ୍‌; ଆସୁଙ୍କ୍‌ ମିଡ଼୍‌ ଏର୍‌ ଇଲ୍‌ସ୍କ୍‌ତେ ବଗିଚା ଲେକାମ୍‌ ଆଦ୍‌ତିଡ଼୍‌ ନୁ ଏର୍‌ଅବାବ୍‌ ଇଲ୍‌ୱେ ଲେକେତ୍‌ ପଡ଼ିୟେ ଆଦ୍‌ତିଡ଼୍‌। 12 ମି ପିଲୁଡ଼୍‌ତେ ନାରୁଡ଼୍‌ ପାଃନ୍ତେ ପଡ଼ିୟେସାରେ ଉଃତାଦ୍‌ ମେଣ୍ଡେ ତିଆର୍‌ ମାଡ଼ିତିଡ଼୍‌; ମିଡ଼୍‌ ମୁନେତ୍‌ କାଲାମ୍‌ତେ ନାର୍ଗେ ତିଆର୍‌ ମାଡ଼୍‌ତେ ମୁଲାକିନ୍‌ ପରୁ ଲୋକ୍‌ ତେତିତିଡ଼୍‌; ଉର୍ଙ୍ଗ୍‌ତେ ନେଟେ ତିଆର୍‌ ମାଡ଼ାନଡ଼ି ନୁ ମାନ୍ଦାନ୍‌ ସେଙ୍ଗେ ପୁଃନେ ଆର୍‌ ତିଆର୍‌ ମାଡ଼ାନଣ୍ଡ୍‌ ଲେକାମ୍‌ ବେଡ଼ିୟନି ଆଦ୍‌ତିଡ଼୍‌।

13 ଆଲେକେ ଯଦି ରମାନ୍‌ ଦିନେ ନିୟମ୍‌ ପାଲନ୍‌ ମାଡ଼ାଟ୍‌, ମାମେ ପବିତ୍ର ଦିନାମ୍‌ତେ ନିଜେ ମାଡ଼୍‌ତେ ଚେଷ୍ଟାତାଗାଙ୍କ୍‌ ନିଜେତ୍‌ ଡେକେ ମାଲ୍‌ପାଟ୍‌; ମେଣ୍ଡେ, ରମାନ୍‌ଦିନାମ୍‌ତିଙ୍କ୍‌ ସୁକାମ୍‌ତେ ନୁ ସଦାପ୍ରବୁନ୍‌ ପବିତ୍ର ଦିନାମ୍‌ତିଙ୍କ୍‌ ଲେକେତ୍‌ ଇଞ୍ଜ କେଲ୍‌ମୁଟ୍‌; ମେଣ୍ଡେ, ନିଜେତ୍‌ କାମ୍‌ ମାଡ଼କଟ କି ନିଜେତ୍‌ ମାନ୍‌ତାଗ୍‌ ଚେଷ୍ଟା ମାଡ଼କଟ କି ନିଜେତ୍‌ ଗଟ୍‌ କେଲକଟ ଆଦିଙ୍କ୍‌ ପାଲନ୍‌ମାଡ଼ିତିଡ଼୍‌ ; 14 ମିଡ଼୍‌ ସଦାପ୍ରବୁନାଗେ ୱେଡ଼୍‌କେ ମାଡ଼ିତିଡ଼୍‌; ମେଣ୍ଡେ, ମାମେ ମିକିଙ୍କ୍‌ ପୃତିବୀତେ ଡେଙ୍ଗ୍‌ ଜାଗେତାଗ୍‌ ଅଦ୍‌ତମ୍‌; ମେଣ୍ଡେ, ମି ବାବାଲ୍‌ ଯାକୁବ୍‌ତେ ଅଦିକାର୍‌ ମିକିଙ୍କ୍‌ ଇଦ୍‌ତମ୍‌; ବାତେଙ୍କ୍‌ଇତ୍କେ ସଦାପ୍ରବୁନ୍‌ ମକମ୍‌ ଇଦ୍‌ କେସ୍‌ମିନ୍ଦେଣ୍ଡ୍‌।"