1 ଆଗେକ୍‌ବା ହୋ ମା ଦାସ ଯାକୁବ୍‌ ନୁ ମାମେ ହେଞ୍ଚିମାନ୍ଦାନ୍‌ ଇସ୍ରାଏଲ୍‌, ଇଞ୍ଜେ କେଞ୍ଜା; 2 ବେନ ନିକିଙ୍କ୍‌ ତିଆର୍‌ ମାଡ଼୍‌ତଣ୍ଡ୍‌ ନୁ ଡଙ୍କେତାଗାଙ୍କ୍‌ ନିକିଙ୍କ୍‌ ମାଡ଼୍‌ତେ, ବେନ ନିକିଙ୍କ୍‌ ସାହାଯ୍ୟ ମାଡ଼ିତଣ୍ଡ୍‌, ଆ ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌; "ହୋ ମା ଯାକୁବ୍‌, ହୋ ମାମେ ହେଞ୍ଚିମାନ୍ଦାନ୍‌ ଯିଶୁରୁଣ*44:2 ଯିଶୁରୁଣ: ଇତ୍କେ ସରଲ୍‌ ନାରୁଣ୍ଡ୍‌, ଇସ୍ରାଏଲ୍‌ତିଙ୍କ୍‌ ପୁନ୍ଦାନଙ୍କ୍‌ ଆଦ୍‌ତେ,, ୱେର୍‌ମାଟ୍‌। 3 ବାତେଙ୍କ୍‌ଇତ୍କେ ମାମେ ଉନ୍ଦେୱାତ୍‌ତେ ପରୁ ଏର୍‌ ନୁ ୱାସ୍ତେ ବୁମ୍‌ଦେ ପରୁ ଏର୍‌ ପଙ୍ଗ୍‌ସିକାଡ଼୍‌; ମାମେ ମି ପିଲୁଡ଼୍‌ ପରୁ ନିଜେତ୍‌ତେ ଆତ୍ମା ନୁ ମିଡ଼୍‌ ପିଲାକିନ୍‌ ପରୁ ନିଜେତ୍‌ ଆଶିର୍ବାଦ୍‌ ତସିକାଡ଼୍‌; 4 ଆସୁଙ୍କ୍‌ ଅଡ଼୍‌ ଏର୍‌ ପଙ୍ଗାନ୍‌ ଗାରେ ମାନ୍ଦାନ୍‌ ବାଇଶୀ ପେଦେର୍‌ତେ ମାଡ଼େ ଲେକାମ୍‌ ଗାଡ୍‌କିନାଗ୍‌ ମିକା ମଡ଼୍‌ତିତା। 5 ୱେରଣ୍ଡ୍‌ କେତିତଣ୍ଡ୍‌, ମାମେ ସଦାପ୍ରବୁନ୍‌; ୱେରେ ଅର୍‌ତୁଣ୍ଡ୍‌ ଯାକୁବ୍‌ ପେଦେର୍‌ତଣ୍ଡ୍‌ ନିଜେତିଙ୍କ୍‌ କେତିତଣ୍ଡ୍‌; ମେଣ୍ଡେ, ୱେରଣ୍ଡ୍‌ ସଦାପ୍ରବୁନ୍‌ ଉଦ୍ଦେଶ୍ୟତେ ନିଜେତ୍‌ କାଇଦେ କାଲ୍‌ପିତଣ୍ଡ୍‌ ନୁ ଇସ୍ରାଏଲ୍‌ତେ ପିଲୁଡ଼୍‌ ପେଦେର୍‌ତେ ନିଜେତିଙ୍କ୍‌ ତଃତିତେ।" 6 ସଦାପ୍ରବୁ, ଇସ୍ରାଏଲ୍‌ତେ ରାଜା ନୁ ତାନ୍‌ ମୁକ୍ତିଦାତା ସାରେତିଙ୍କ୍‌ ବେଡ଼ିୟେ ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌; "ମାମେ ଆରାମ୍‌ ନୁ ମାମେ ଶେଷ, ମେଣ୍ଡେ ମାକ୍‌ ୱିଡ଼୍‌ସି ପରମେଶ୍ୱର୍‌ ମେଣ୍ଡେ ଇଲ୍‌ଲେ। 7 ମାମେ ଆ ପାଃନ୍ତେ ନାରୁଡ଼୍‌କିଙ୍କ୍‌ ତିଆର୍‌ ମାଡ଼ାନ୍‌ ସମୟ୍‌ତାଗାଙ୍କ୍‌ ମା ଲେକାମ୍‌ ବେନ କାର୍ଙ୍ଗିତଣ୍ଡ୍‌ ନୁ ଅଣ୍ଡ୍‌ କେତିତଣ୍ଡ୍‌ ନୁ ଯାପେ ମା ସେଙ୍ଗେ ଆଦ୍‌ ସଜାମାଡ଼ିତଣ୍ଡ୍‌ ? ମେଣ୍ଡେ, ବାତେ ବାତେ ଗାରେମାନ୍ଦା ନୁ ବାତେ ବାତେ ଗଟେମ୍‌ ଆଦ୍‌ତେ, ଆଦ୍‌ ଅଡ଼୍‌ କେଲିଡ଼୍‌। 8 ମିଡ଼୍‌ ରାମ୍‌କ୍‌ ଆସ୍‌ ୱେର୍‌ମାଟ୍‌; ମାମେ ବାତେ ମୁନେଙ୍କ୍‌ କଞ୍ଜ୍‌ ମି ପାକେ କେସ୍‌ମାନମ୍‌ ନୁ ମିକିଙ୍କ୍‌ ଆଦ୍‌ କେଲମ୍‌ ? ମିଡ଼୍‌ ମା ସାକ୍ଷୀ। ମାକ୍‌ ୱେରେ ମେଣ୍ଡେ ବେନ୍‌ ପରମେଶ୍ୱର୍‌ ମିନ୍ଦେଣ୍ଡ୍‌ ? ୱେରେ ଶକ୍ତିତେ ଦେୟାକ୍‌ କାଲ୍‌କ୍‌ ଇଲା; ମାମେ ବେନଙ୍କ୍‌ ପୁନମ୍‌।"

9 ବେନଡ଼୍‌ ମାଇତେ ମୁର୍ତ୍ତିତିଙ୍କ୍‌ ତିଆର୍‌ ମାଡ଼ିତଣ୍ଡ୍‌, ଅଡ଼୍‌ ସାରେତଡ଼୍‌ ଅସାର୍ ନୁ ଅଡ଼୍‌ ମନ୍‌ତେ ବିଷୟ୍‌କି ଲାବ୍‌ ଆୟଡ଼୍‌; ଅଡ଼୍‌ ବେଦ୍‌ଲେକାମ୍‌ ସିଗ୍‌ ଆଦ୍‌ତଡ଼୍‌, ଆଦିନ୍‌ ସେଙ୍ଗେ ଅଡ଼୍‌ୱାଦ୍‌ ନିଜେ ସାକ୍ଷିନଡ଼୍‌କ୍‌ ଉଡ଼ଡ଼୍‌, କି ପୁନଣ୍ଡ୍‌। 10 ବେନ୍‌ ବାତେଆୟି ବିଷୟତେ ଲାବ୍‌ ଆୟ, ଇଦ୍‌ଲେକାମ୍‌ ଦେୟାମ୍‌ ବେନ୍‌ ତିଆର୍‌ ମାଡ଼ିମିନ୍ଦେଣ୍ଡ୍‌, କି ଡେୱୁତେ ମୁର୍ତ୍ତି ବେନ ଚଞ୍ଚ୍‌ତାଗ୍‌ ତସିମିନ୍ଦେଣ୍ଡ୍‌ ? 11 ଉଡ଼େ, ତାନ୍‌ ସାଙ୍ଗନଡ଼୍‌ ସାରେତଡ଼୍‌ ସିଗ୍‌ ଆଦ୍‌ତଡ଼୍‌; ମେଣ୍ଡେ, ବଡ଼େଇ ନାରୁଡ଼୍‌ ମାତ୍‌ତର୍‌; ସାରେତଡ଼୍‌ ଅଣ୍ଡୟ୍‌ତାଗ୍‌ ଆୟିଡ଼୍‌, ଅଡ଼୍‌ ନିଲ୍‌ୱିଡ଼୍‌; ଅଡ଼୍‌ ବିଦ୍‌ବିଦା ଆଦ୍‌ତଡ଼୍‌, ଅଡ଼୍‌ ଅଣ୍ଡୟ୍‌ଦାମ୍‌ ସିଗ୍‌ ଆଦ୍‌ତଡ଼୍‌। 12 କାମାରି ଲୁଆ ଜିନିଷ ତିଆର୍‌ ମାଡ଼ି ନିଡ଼୍‌ତାନ୍‌ ଇର୍‌କିନ୍‌ତଡ଼୍‌ କାମ୍‌ ମାଡ଼ିତେ ନୁ ମୁଟିୟେତଡ଼୍‌ ଆଦ୍‌ ତିଆର୍‌ ମାଡ଼ି ନିଜେତ୍‌ ଶକ୍ତିତଡ଼୍‌ ଆଦ୍‌ ତିଆର୍‌ ମାଡ଼ିତେ; ହଁ ଅଣ୍ଡ୍‌ କାର୍‌ୱି ଆଦ୍‌ତଣ୍ଡ୍‌ ନୁ ତାନ୍‌ ଶକ୍ତି କମ୍‌ ଆଦ୍‌ତେ, ଅଣ୍ଡ୍‌ ଏର୍‌ ଉନକଟ୍‌ ଆୟିଦ୍‌ତଣ୍ଡ୍‌। 13 ନୁଲ୍‌ ପୟିତାନଣ୍ଡ୍‌ ଅଣ୍ଡ୍‌ ନୁଲ୍‌ ଲାଗିତଣ୍ଡ୍‌; ଅଣ୍ଡ୍‌ ରଙ୍ଗ୍‌ତଡ଼୍‌ ଅଣ୍ଡ୍‌ ଚିହ୍ନେ ଇଦ୍‌ତଣ୍ଡ୍‌, ଅଣ୍ଡ୍‌ କଲ୍‌ସାନ୍‌ ସମାନ୍‌ତଡ଼୍‌ ଆଦିଙ୍କ୍‌ କଡ଼ିତଡ଼୍‌ ଚିହ୍ନେତତିତଣ୍ଡ୍‌ ସାମାନ୍‌ତଡ଼୍‌ ଚିଃହ୍ନେ ଇଦ୍‌ତେ ନୁ ଲୋତ୍‌ତାଗ୍‌ ବାସେ ମାନ୍ଦାନ୍‌ ସେଙ୍ଗେ ନାରୁନ୍‌ ସୁନ୍ଦର୍‌ ଲେକାମ୍‌ ଆଦ୍‌ ତିଆର୍‌ ମାଡ଼ିତେ। 14 ଅଣ୍ଡ୍‌ ନିଜେତେ ସେଙ୍ଗେ ଏରସ୍‌ ମାଡ଼େ ନାଡ଼୍‌କିତେ, ତର୍ସା ନୁ ଅଲୋନ୍‌ ମାଡ଼େ ଅଦ୍‌ତେ, ଆଦ୍ ମେଟେତ୍‌ ମାଡ଼ାକିନାଗାଙ୍କ୍‌ ୱେରଡ଼୍‌ ମାଡ଼େ ନିଜେତ୍ ସେଙ୍ଗେ ଢ଼ାଟୁମ୍‌ ମାଡ଼ିତେ; ଆଦ୍‌ ଦେବଦାରୁ ମାଡ଼୍‌ ଉର୍ସିକିତଣ୍ଡ୍‌ ନୁ ୱାଡ଼୍‌ସାମ୍‌ ଆଦିଙ୍କ୍‌ ପେର୍ସିପିତେ। 15 ତାନ୍‌ପେର୍କେ ଆଦ୍‌ ନାରୁନ୍‌ ମାସାନ୍‌ ୱେର୍‌କ୍‌ ଆଦ୍‌ତେ; ଆଦ୍‌ ଆସୁଙ୍କ୍‌ ବେସ୍‌କ୍‌ ଅସ୍‌ କିସ୍‌ କାମ୍‌କେ ଅଦ୍‌ତେ; ମେଣ୍ଡେ, ଆଦ୍‌ ମାସି ରୁଟି ପଡ଼୍‌ସିତଣ୍ଡ୍‌; ମେଣ୍ଡେ, ୱେରଡ଼୍‌ ଦେୟାମ୍‌ ମାଡ଼ି ଆଦିଙ୍କ୍‌ ପୂଜା ମାଡ଼ିତେ; ଅଣ୍ଡ୍‌ ୱେରଡ଼୍‌ ଡେୱି ୱେରଡ଼୍ ମୁର୍ତ୍ତିମାଡ଼ି ଆଦିନ୍‌ ମୁନେ ମଡ଼୍‌କିତଣ୍ଡ୍‌। 16 ଅଣ୍ଡ୍‌ ଆଗେଙ୍କ୍‌ ୱେରଡ଼୍‌ ଦୁଢ଼େ କିସ୍‌ତାଗ୍‌ କାର୍‌ୱିସ୍ପିତଣ୍ଡ୍‌; ୱେରେ ଦୁଢ଼େତେ ଅଣ୍ଡ୍‌ ଆୱୁଙ୍କ୍‌ ପଡ଼୍‌ସି ତିନ୍ଦ୍‌ତଣ୍ଡ୍‌ ନୁ ନାର୍ଗେଆୱୁଙ୍କ୍‌ ମାଡ଼ି ଡ଼ଙ୍କ ନିଃତିତଣ୍ଡ୍‌, ମେଣ୍ଡେ ଅଣ୍ଡ୍‌ କିସ୍‌କାମେକେ ଅସ୍‌ କେତିତଣ୍ଡ୍‌, ଆ, ମାମେ ଡଙ୍କେ ନିଃତମ୍‌, ମାମେ କିସ୍‌ତିଙ୍କ୍‌ ଉଡ଼୍‌ତମ୍‌। 17 ମେଣ୍ଡେ, ଅଣ୍ଡ୍‌ ଆଗେତ୍‌ ଲେକ୍‌ତାଦ୍‌ ୱେରଡ଼୍‌ ଦେୟାମ୍‌, ନିଜେତିଙ୍କ୍‌ ଡେୱି ମୁର୍ତ୍ତି ତିଆର୍‌ ମାଡ଼୍‌ତଣ୍ଡ୍‌; ଅଣ୍ଡ୍‌ ଆଦିନ୍‌ ମୁନେ ମଡ଼୍‌କି ପୂଜା ମାଡ଼ିତଣ୍ଡ୍‌ ନୁ ଆଦିନ୍‌ ମୁନେ ପ୍ରାର୍ତନାମାଡ଼ି କେତିତଣ୍ଡ୍‌, "ମାକିଙ୍କ୍‌ ଉଦ୍ଦାର୍‌ ମାଡ଼େ, ନିମେ ମା ଦେୟାମ୍‌।" 18 ଅଡ଼୍‌ ପୁନଡ଼୍‌, କି ଏର୍କେମାଡ଼ଡ଼୍‌, ବାତେଙ୍କ୍‌ଇତ୍କେ ଅଡ଼୍‌ ବେଦ୍‌ଲେକାମ୍‌ ଉଡ଼ି ପୁଃନେମାକିଡ଼୍‌, ଆଦିନ୍‌ସେଙ୍ଗେ ଅଡ଼୍‌ କଣ୍ଡା ନୁ ଅଡ଼୍‌ ବେଲାନ୍‌ ବୁଜେମ୍‌ ଆଦ୍‌ଦେ ପାର୍‌ୱଡ଼୍‌, ଆଦିନ୍‌ ସେଙ୍ଗେ ଅଡ଼୍‌ କଣ୍ଡା ମୁସି ମିନ୍ଦେଣ୍ଡ୍‌। 19 ବେନ ଏର୍କେ ଇୱଣ୍ଡ୍‌, କି ଇଦ୍‌ କେତାନ୍‌ ସେଙ୍ଗେ ବେନନ୍‌ ଗଟ୍‌ କି ବୁଦ୍ଦ୍‌ ଇଲ୍‌ଲେ ଯେ, "ଆଗେତ୍‌ ୱେରଡ଼୍‌ ଦୂଡ଼େ ଅସ୍‌ ମାମେ କିସ୍‌ତାଗ୍‌ ପଡ଼୍‌ସି ମିନ୍ଦେଡ଼୍‌ ନୁ ଆଗେତ୍‌ କାର୍‌ୱେତେ; ତାଡ଼୍‌ମି ଅସ୍‌ ରୁଟି ପଡ଼ସି ମାଡ଼ିମିନ୍ଦେଡ଼୍‌ ନୁ ଆୱୁଙ୍ଗ୍‌ ପଡ଼୍‌ସି ତିଞ୍ଜ୍‌ମିନ୍ଦେଣ୍ଡ୍‌, ଆଗେତ୍‌ ଜିନିଷ୍‌ଅସ୍‌ ମିକା ପାସ୍‌କାନ୍‌ ଜିନିଷ ତିଆର୍‌ ମାଡ଼ିକାଡ଼୍‌ ? ମାନାଡ଼୍‌ କି ଦୂଡ଼େ ୱେର୍‌କ୍‌ତେ ମୁନେ ମଡ଼୍‌କିତାଡ଼୍‌ ? 20 ଅଣ୍ଡ୍‌ ନିର୍‌ ତିନ୍ଦ୍‌ତଣ୍ଡ୍‌; ଅଣ୍ଡ୍‌ ବେଲାନ୍‌ ନିଜେତ୍‌ତେ ଜିୱୁଣ୍ଡ୍‌ ଉଦ୍ଦାର୍‌ ମାଡ଼୍‌ଡ଼େ ପାର୍‌ୱଣ୍ଡ୍‌, କି ମାନ୍‌ ତିନ୍ଦେକାଇଦେ ପୟିସ୍‌ ଅଣ୍ଡ୍‌ କେତେ ପାର୍‌ୱଣ୍ଡ୍‌ ଇଦ୍‌ ମିସ୍‌ ଇଞ୍ଜ, ଆଦିନ୍‌ କାନାଲ୍‌ ମନ୍‌ ଅଙ୍କ୍‌ ଆର୍‌ବୁଲ୍‌କା ମାଡ଼ଇମିନ୍ଦେ।"

21 ହୋ ଯାକୁବ୍‌, ହୋ ଇସ୍ରାଏଲ୍‌, ନିମେ ଇୱୁସାରେ ଗଟି ଏର୍କେମାଡ଼େ, ବାତେଙ୍କ୍‌ଇତ୍କେ ନିମେ ମା ଦାସ; ମାମେ ମିକିଙ୍କ୍‌ ତିଆର୍‌ ମାଡ଼୍‌ତମ୍‌; ନିମେ ମା ଦାସ; ହୋ ଇସ୍ରାଏଲ୍‌, ନିମେ ମାକିଙ୍କ୍‌ ମାର୍‌ଙ୍ଗମ୍‌। 22 ମାମେ ମି ଦଷ୍‌ସାରେ ନାର୍ଗେ ଗୁମାମ୍‌ ଲେକାମ୍‌ ନୁ ନିୟାୱୁ ପାପ୍‌ସାରେ ମାବ୍‌ ଲେକାମ୍‌ ମାପି ମିନ୍ଦେମ୍‌; ମା ପାକେ ମାଲ୍‌ସ୍‌ୱାଡ଼େ; ବାତେଙ୍କ୍‌ଇତ୍କେ ମାମେ ମିକିଙ୍କ୍‌ ମୁକ୍ତ ମାଡ଼ିମିନ୍ଦେମ୍‌। 23 ହୋ ମାବ୍‌ମୟଲ୍‌ ପାଟେ ପାରେ, ବାତେଙ୍କ୍‌ଇତ୍କେ ସଦାପ୍ରବୁ ଏଦ୍‌ କେସ୍‌ମିନ୍ଦେଣ୍ଡ୍‌; ହୋ ପୃତିବୀତେ ନେଲ୍‌ମାନ୍ଦାନଡ଼ି, ଗାଟି ଲେଙ୍ଗ୍‌ ମାଡ଼ାଟ୍‌; ହୋ ମେଟାନଡ଼ି, ହୋ ମାଡ଼ାକ୍‌ ନୁ ଆଗ୍‌ମାନ୍ଦାନ୍‌ ସାରେ ମାଡ଼ାକ୍‌, ମିଡ଼୍‌ ଗାଟି ଲେଙ୍ଗ୍‌ଦେ ପାଟେ ପାରାଟ୍‌; ବାତେଙ୍କ୍‌ଇତ୍କେ ସଦାପ୍ରବୁ ଯାକୁବ୍‌ତିଙ୍କ୍‌ ମୁକ୍ତ ମାଡ଼ିମିନ୍ଦେଣ୍ଡ୍‌ ନୁ ଇସ୍ରାଏଲ୍‌ତାଗ୍‌ ନିଜେତିଙ୍କ୍‌ ଗୌରବ୍‌ ମାଡ଼ିତଡ଼୍‌। 24 ମି ମୁକ୍ତିଦାତାଲ୍‌ ସଦାପ୍ରବୁ, ଡଙ୍କେତାଗାଙ୍କ୍‌ ବେନ ନିକିଙ୍କ୍‌ ତିଆର୍‌ମାଡ଼୍‌ତଣ୍ଡ୍‌, ଅଣ୍ଡ୍‌ ଇଦ୍‌ କେତିତଣ୍ଡ୍‌; "ମାମେ ସଦାପ୍ରବୁ, ମାମେ ସାରେ କାମ୍‌ ମାଡ଼ିତମ୍‌ ମାମେ ୱେରନେ ମାବ୍‌ମୟଲ୍‌ ଏକାମ୍‌ ମାଡ଼ିତମ୍‌; ମାମେ ପୃତିବିତିଙ୍କ୍‌ ଗାଲ୍‌ ମାଡ଼ିକାଡ଼୍‌; ମା ସାଙ୍ଗ ବେନ ? 25 ମାମେ ବୁସା କେତାନଡ଼୍‌କ୍‌ ଚିହ୍ନେ ସାରେ ନଷ୍ଟ ମାଡ଼ିତାନ୍‌ ନୁ ମନ୍ତ୍ରର୍‌ ଗଟି କେତାନଡ଼୍‌କ୍‌; ମାମେ ଜ୍ଞାନୀନଡ଼୍‌କ୍‌ ପେର୍କେ ଟେଣ୍ଡିଦ୍‌ତମ୍‌ ନୁ ଅଡ଼୍‌ୱାଦ୍‌ ଜ୍ଞାନ୍‌ ମୁର୍କ ମାଡ଼ିତମ୍‌; 26 ମାମେ ମା ଦାସନ୍‌ ବାକ୍ୟ ପୁରା ମାଡ଼ିତମ୍‌ ନୁ ମା ଦୂତକିଙ୍କ୍‌ ଶିକ୍ଷା ନିଜାମ୍‌ତେ ମାଡ଼ିତମ୍‌; ମାମେ ଯିରୁଶାଲେମ୍‌ ବିଷୟ୍‌ତେ କେତିତମ୍‌, ଆଦ୍‌ ମାନ୍ଦାନାଦ୍‌ ପଡ଼ିୟେ ଆଦ୍‌ତେ ନୁ ଯିହୁଦାତେ ନଗର୍‌କିନ୍‌ ବିଷୟ୍‌ତେ କେତିତମ୍‌, ଆୱୁସାରେ ମେଣ୍ଡେତିଆର୍‌ ଆଦ୍‌ତା, ମେଣ୍ଡେ ମାମେ ଆଦିନ୍‌ ଉର୍ଙ୍ଗ୍‌ତେ ପଡ଼ିୟେ ସାରେ ମେଣ୍ଡନ୍‌ଦାମ୍‌ ପୁଃନେ ମାଡ଼ିକାଡ଼୍‌; 27 ମାମେ କୁଇଙ୍କ୍‌ ଏର୍‌ଦିଙ୍କ୍‌ କେତିତମ୍‌, ଇଡ଼୍‌କା ମେଣ୍ଡେ ମାମେ ମି ବେଡ଼େକ୍‌ ଇଲ୍‌କାସାରେ ଇଡ଼୍‌ସ୍କିକାଡ଼୍‌; 28 ମାମେ କୋରସ୍‌ ବିଷୟ୍‌ତେ କେତିତମ୍‌, ଅଣ୍ଡ୍‌ ମା ଗୁଡ଼ୁସେତେ ଗଲାଲ୍‌ ନୁ ମାୟାଦ୍‌ ନିୟମ୍‌ ତିଆର୍‌ ମାଡ଼ିତଣ୍ଡ୍‌; ଅଣ୍ଡ୍‌ ଯିରୁଶାଲେମ୍‌ ବିଷୟ୍‌ତେ କେତିତଣ୍ଡ୍‌, ଆଦ୍‌ ମେଣ୍ଡେ ତିଆର୍‌ ଆଦ୍‌ତେ ନୁ ମନ୍ଦିର୍‌ତିଙ୍କ୍‌ କେତିତେ, ତାନାଦ୍‌ ତେଦାନ୍‌ମୂଲେ ତିଆର୍‌ ଆଦ୍‌ତେ।"