Lucas 15

ମାଇମାନ୍ଦାନ୍ ମାର୍‍

11 ଜିସୁ ମେଣ୍ଡନ୍‍ଦାମ୍ କେତ୍‍ତଣ୍ଡ୍, ୱେରଣ୍ଡ୍ ନାରୁଙ୍କ୍ ଇର୍‍ୱୁଡ଼୍ ମାର୍‍କ୍ ମାତ୍‍ତଡ଼୍ । 12 ସୁଦୁର୍‍ ମାର୍‍ ତାମ୍ ବାବାଙ୍କ୍ କେତ୍‍ତଣ୍ଡ୍, ବାବା, ନା ଦୁଡ଼େ ସମ୍ପତ୍ତି ନାକିଂଙ୍କ୍ ହିମ୍ । ଆସୁଟେ ତାମ୍‍ବାବାଲ୍ ତାନ୍ ସମ୍ପତ୍ତିତିଙ୍କ୍ ଇର୍‍ୱୁଡ଼୍‍କ୍‍ ତୁସିତ୍‍ତଣ୍ଡ୍ । 13 ବେସ୍‍କ୍‍ଦିନାତ୍‍ ପେର୍‍କେ ସୁଦୁର୍‍ ମାର୍‍ ଅନ୍‌ ଦୁଡ଼େ ସମ୍ପତ୍ତି ପୟ୍‍ସ୍ ଯେକା ଦେଶ୍ ଆଦ୍‍ତନ୍ । ଅଣ୍ଡ୍‌ ଆଗେ ମଣ୍ଡି ହିନା ଗେଲ୍‍ସି ସାରେ ଦନ୍‍ସମ୍ପତ୍ତି ଉଡ଼ାମାଡ଼୍‍ ତଣ୍ଡ୍ । 14 ଅଣ୍ଡ୍‌ ସାର୍‍ରେ ଡାବ୍ କର୍ଚ୍ଚମାଡ଼ି ତେର୍‍ତେ ୱେୟ୍, ଆଦ୍ ଦେଶ୍‍ତାଗ୍ ବୟ୍‍ଙ୍କାର୍‍ ତୁପାନ୍‌ ଆଦ୍‍ତା । ଅଂକିଙ୍କ୍‌ ଆଗେ ବାତେମେଣ୍ଡେ ଦର୍‍କ୍‍ୱାଙ୍କ୍ କାର୍‍ୱିନ୍ ମାନ୍ଦେୱେୟ୍‍ତେ । ଅଂକିଙ୍କ୍‌ ଅବାବ୍ ଆଦ୍ ୱେୟ୍‍ତେ । 15 ଆସୁଟେ ଅଣ୍ଡ୍‌ ଆଦ୍ ଦେଶ୍‍ତେ ଅରତୁଣ୍ଡ୍ ନାରୁନାଗ୍ ଆଞ୍ଜ୍ ଗତିତ୍‍ ଲେକାମ୍ ମାତ୍‍ତଣ୍ଡ୍, ଆଦ୍ ନାରୁଡ଼୍ ଅଂକିଙ୍କ୍‌ ଅନ୍‌ ୱାୟାନା ପାଦି ମେଇତାଙ୍କ୍ ରହ୍‍ତଣ୍ଡ୍ । 16 ପାଦି ତିନ୍ଦାନ୍ କାଦି, ତିଞ୍ଜ୍ ଅଣ୍ଡ୍‌ ପଟ୍‍ଟେ ନିହ୍‍ତାଙ୍କ୍ ଇଚ୍ଛା ମାଡ଼୍‍ତଣ୍ଡ୍, ବାତେଙ୍କ୍ ଇତ୍କେ ବେନମେଣ୍ଡେ ଅଂକିଙ୍କ୍‌ ବାତା ହିୱଡ଼୍ । 17 ଆସୁଙ୍କ୍ ଅଂକିଙ୍କ୍‌ ହେର୍କା ମାଡ଼ି କେତ୍‍ତଣ୍ଡ୍, ନା ବାବାନ୍ ଲୋନ୍‌ ଚାକରିଡ଼୍ ଚାକୁର୍‍ତିନ୍ଦାନ୍‍ ୱେୟ୍ ଚାକର୍ ମାଇସ୍ ଆଦୁତ୍‍, ବାତେଙ୍କ୍ ଇତ୍କେ ନାନେ ଇଗ୍ କାର୍‍ୱିନ୍ ଡଲୁତାନ୍ । 18 ନାନେ ତେଦୀ ନା ବାବାନ୍ ଗାର୍‍ରେ ମାଲ୍‍ସ୍ ଆଦ୍‍ତନ୍ ବା ଅଂକିଙ୍କ୍‌ କେତିତାନ୍, ବାବା, ଇଶ୍ୱରତେ ବିରୁଦି ତେ ନୁ ନି ବିରୁଦି ତେ ନାନେ ପାପ୍‌ ମାଡ଼୍‍ତାନ୍ । 19 ନି ମାର୍‍ ଇଞ୍ଜ କାର୍‍ଙ୍ଗାନଙ୍କ୍ ନାନେ ଯୋଗ୍ୟ ଇଲେନ୍ । ନାକିଂଙ୍କ୍ ନି ଚାକର୍ ହିନା ନେହେମ୍ । 20 ଆସୁଟେ ଅଣ୍ଡ୍‌ ତେଦି ତାମ୍ ବାବାନ୍ ଗାର୍‍ରେ ଆତ୍‍ତଣ୍ଡ୍ । ବାତେଙ୍କ୍ ଇତ୍କେ ଅଣ୍ଡ୍‌ ଯେକା ମାନ୍ଦାନାଦ୍ ତାମ୍ ବାବାଲ୍ ଅଂକିଙ୍କ୍‌ ଉଡ଼ି ଦୟାତେ ବିଗଲିତ ଆତ୍‍ତଣ୍ଡ୍, ବା ମିରିଆଞ୍ଜ୍ ଅଂକିଙ୍କ୍‌ ଉର୍‍ଙ୍ଗି ନମସ୍କାର୍‍ ମାଡ଼୍‍ତଣ୍ଡ୍ । 21 ମାର୍‍ ଅଂକିଙ୍କ୍‌ କେତ୍‍ତଣ୍ଡ୍, ବାବା, ଇଶ୍ୱର୍‌ତେ ବିରୁଦି ତେ ନୁ ନି ବିରୁଦି ତେ ନାନେ ପାପାମ୍ ମାଡ଼୍‍ତାନ୍, ମାର୍‍ ଇଞ୍ଜ କାର୍‍ଙ୍ଗାନାଦ୍‍ ନାନେ ଯୋଗ୍ୟ ଇଲେନ୍ । 22 ବାତେଙ୍କ୍ ଇତ୍କେ ବାବାଲ୍ ତାମ୍ ଚାକରିଡ଼ିକ୍ କେତ୍‍ତଣ୍ଡ୍, ସିଟ୍‍ପାଟ୍ ଆଞ୍ଜ୍ ସାର୍‍ରେ ଲେକେତାଉ ଚକାସିଲେ ତାସ୍ ଇକିଂଙ୍କ୍ କେର୍‍ସ୍ପିମୁଟ୍ । ଇନ୍‍ କାୟ୍‍ଦାଗ୍‍ ମୁଦ୍‍ ନୁ ଡେକାନାଗ୍‍ ହେର୍‍ପୁକ୍ କେର୍‍ସ୍ପିମୁଟ୍ । 23 ମେନ୍ଦୁଲ୍ ମାନ୍ଦାନ୍ ପେୟେତିଙ୍କ୍ ତାସ୍ ଆୱୁକାଟ୍, ୱାଡ଼ାଟ୍, ମାନାଡ଼୍ ବୋଜିତାଗ୍ ସାର୍‍ଦେ ମାଡ଼୍‍ନା । 24 ବାତେଙ୍କ୍ ଇତ୍କେ ନା ହି ମାର୍‍ ଡଲି ମାତ୍‍ତଣ୍ଡ୍, ମେଣ୍ଡନ୍‍ଦାମ୍ ଗେଲ୍‍ସ୍‍ତଣ୍ଡ୍; ମାଇମାତ୍‍ତଣ୍ଡ୍, ମେଣ୍ଡେ ଦରକ୍‍ତଣ୍ଡ୍ । ଆସୁଟେ ଅଡ଼୍‌‍ ଗାଟି ସାର୍‍ଦ୍‍ ମାଡ଼ାଙ୍କ୍ ପସ୍‍ପ୍‍ତ୍‍ତଡ଼୍ ।

25 ଆଦ୍ ଦିନାମ୍ ତେ ବେଡ଼୍‍ୟ୍ ମାର୍‍ ୱାୟାନା ମାତ୍‍ତଣ୍ଡ୍ । ଅଣ୍ଡ୍‌ ବେସୁଙ୍କ୍‍ ଲୋତ୍ ଗାର୍‍ରେ ୱାସ୍ ହେଉତଣ୍ଡ୍, ଆସୁଟେ, ଅଣ୍ଡ୍‌ ଡୋଲା ନୁ ହେନ୍ଦାନାଦ୍ ମର୍‍ରେ କେଞ୍ଜ୍‍ତଡ଼୍, 26 ଆସୁଟେ ଅଣ୍ଡ୍‌ ୱେରଣ୍ଡ୍ ଚାକର୍‍ତିଙ୍କ୍ କାର୍‍ଙ୍ଗି ଇଗ୍ ବାତ୍ ଆଦୁତ୍‍ ଇଞ୍ଜ କେତ୍‍ତଣ୍ଡ୍ । 27 ଚାକର୍ ଅଂକିଙ୍କ୍‌ କେତ୍‍ତଣ୍ଡ୍, ନି ତାମୁଣ୍ଡ୍‌ ଲୋନ୍‌ ମାଲ୍‍ସ୍ ୱାସ୍‍ମିନ୍ଦେଣ୍ଡ୍, ସାଏତ୍ ମେନ୍ଦୁଲ୍ ତେ ମାଲ୍‍ସ୍ ୱାସ୍ ମାନ୍ଦାନ୍ ମାଇଦିଙ୍କ୍ ମେନ୍ଦୁଲ୍‍ମାନ୍ଦାନ୍ ଗଡ୍‍ତିଙ୍କ୍ ଆୱୁକି ବଜି ମାଡ଼ୁତଡ଼୍ ।

28 "ବେଡ଼୍‍ୟ୍ ଦାଦାଲ୍ କପାମ୍ ଆଶେ ଲୋପ୍ ଆଦାଙ୍କ୍ ରାଜି ଆୟ୍‍ୟଣ୍ଡ୍ । ଆସୁଟେ ତାମ୍ ବାବାଲ୍ ବାୟିଦେ ୱାସ୍ ଅଂକିଙ୍କ୍‌ ଗାଟି ବୁଜାମାଡ଼୍‍ତଣ୍ଡ୍ । 29 ବାତେଙ୍କ୍ ଇତ୍କେ ବେଡ଼୍‍ୟ୍ ମାର୍‍ ତାମ୍ ବାବାଙ୍କ୍ କେତ୍‍ତଣ୍ଡ୍, ଉଡ଼େ, ହିସ ଏଣ୍ଡ୍ ଆଦୁତ୍‍ତେ ନାନେ ନି ଦାସ ଲେକାମ୍ ତାକ ୱାଦୁତାନ୍, ବାତେଙ୍କ୍ ଇତ୍କେ ବେସୁଙ୍କ୍‍ ବା ନି ଗଟ୍ ଅମାନ୍ୟ ମାଡ଼ାନ୍, ବେସୁଙ୍କ୍‍ ବା ନାକିଂଙ୍କ୍ ନା ସାଙ୍ଗଡ଼୍ ତ ବଜି ମାଡ଼ାଙ୍କ୍ ନିମ୍‍ ନାକିଂଙ୍କ୍ ମେକ୍‍ପିଲ୍ ବା ହିୱିନ୍‍ । 30 ବାତେଙ୍କ୍ ଇତ୍କେ ହିଣ୍ଡ୍ ନି ମାର୍‍ ନି ସମ୍ପତ୍ତିତିଙ୍କ୍ କଜାନଡ଼୍ ତ ଉଡ଼ାମାଡ଼ିସ୍‍ ଇଞ୍ଜ୍ ବେସୁଟ୍‌ ଅଣ୍ଡ୍‌ ଲୋନ୍‌ ମାଲ୍‍ସ୍ ୱାସ୍ ମିନ୍ଦେଣ୍ଡ୍ ନିମ୍‍ ଅନ୍‌ ମାଇଦିଙ୍କ୍ ମେନ୍ଦୁଲ୍ ମାନ୍ଦାନ୍ ପେୟେତିଙ୍କ୍ ରେହେସ୍ ବୋଜି ମାଡ଼୍‍ତିନ୍ । 31 ଆସୁଟେ ତାମ୍ ବାବାଲ୍ କେତ୍‍ତଣ୍ଡ୍, ପେକାଲ୍, ନିମ୍‍ ତ ସାର୍‍ଦାମ୍‍ ନା ତ ମାନ୍ଦୁତି, ବାତାମେଣ୍ଡେ ସାରେ ନାୟାୱୁ, ହାଉସାରେ ନିୟାୱୁ; 32 ବାତେଙ୍କ୍ ଇତ୍କେ ହିଣ୍ଡ୍ ଯେ, ନି ତାମୁଣ୍ଡ୍‌ ଡଲି ମାତ୍‍ତଣ୍ଡ୍, ମେଣ୍ଡନ୍‍ଦାମ୍ ଗେଲ୍‍ସ୍‍ତଣ୍ଡ୍; ମାଇମାତ୍‍ତଣ୍ଡ୍, ମେଣ୍ଡେ ଦରକ୍‍ତଣ୍ଡ୍, ଆଦିନ୍ ମାଇଦିଙ୍କ୍ ମାନାଡ଼୍ ଗାଟିସାର୍ଦା ମାଡ଼ାନ୍ ମାତ୍‍ତା ।"