1 ଅର୍ତ୍ତକ୍ଷସ୍ତ ରାଜାନ୍‌ ରାଜତ୍ୱତେ କୋଡ଼ିଏ ୱାଡ଼୍‌ସେତେ ନିସନ୍‌ ନେଲ୍‌ଞ୍ଜିନେ ଗଟେମ୍‌ ଆତ୍‌ତେ ଯେ, ରାଜାନ୍‌ ମୁନେ ଦ୍ରାକ୍ଷାରସ ମାନ୍ଦାନ୍‌ ୱେଲେ ନାନ୍‌ ଆ ଦ୍ରାକ୍ଷାରସ ଅସ୍‌ ରାଜାଙ୍କ୍‌ ଇତ୍‌ତାନ୍‌। ଆଦିନ୍‌ ମୁନେ ନାନ୍‌ ଅନ୍‌ ମୁନେ ବେସୁଙ୍କ୍‌ ଦୁଃକାମ୍‌ ଆୟିୱେ ମାତ୍‌ତାନ୍‌। 2 ତାନ୍‌ପେର୍କେ ରାଜାଲ୍‌ ନାକିଙ୍କ୍‌ ପାସ୍‌ରିଞ୍ଚ୍‌ତଣ୍ଡ୍‌, ନିମ୍‌ତ ଦୁଃକ୍‌ ଆୟିୱିନ୍‌, ବାତ୍‌ତିଙ୍କ୍‌ ମିଇ ମକମ୍‌ ୱାରିମିନ୍ଦେ ? ଇଦ୍‌ ମନ୍‌ଦେ ଦୁଃକାମ୍‌ ମେଣ୍ଡେ ବାତେଆୟ୍‌। ଆସୁଙ୍କ୍‌ ନାନେ ଅଦିକ୍‌ ୱେର୍‌ତାନ୍‌। 3 ମେଣ୍ଡେ, ନାନ୍‌ ରାଜାଙ୍କ୍‌ କେତ୍‌ତାନ୍‌, "ମହାରାଜାଲ୍‌ ଚିରଜିବି ଆୟିଣ୍ଡ୍‌; ବେନ୍‌ ନଗର୍‌ ନା ଆନିଦାଦିଡ଼୍‌ କବରପଡ଼ିୟେତ୍‌, ଆଦ୍‌ ବେସୁଙ୍କ୍‌ ଡେୱକଟ୍‌ ଆସ୍‌ମିନ୍ଦେ ନୁ ଆଗେତ୍‌ ଆର୍ରଙ୍ଗ୍‌ ସାରେ କିସ୍‌ ତଡ଼୍‌ କାର୍‌ୱିମିନ୍ଦେ, ଆସୱେଲେ ବାତେଙ୍କ୍‌ ନାଆ ମକମ୍‌ ୱାର ?" 4 ଇଗାକଞ୍ଚ୍‌ ରାଜାଲ୍‌ ନାକିଙ୍କ୍‌ କେତ୍‌ତଣ୍ଡ, "ଆଲେକେ ନିମେ ବାତ୍‌ ବିଷୟତେ ନିବେଦନ ମାଡ଼ମିନ୍ଦେନି ?" ଆସୁଙ୍କ୍‌ ନାନ୍‌ ସ୍ୱର୍ଗତେ ପରମେଶ୍ୱରତେ ଗାରେ ପ୍ରାର୍ଥନା ମାଡ଼୍‌ତାନ୍‌। 5 ମେଣ୍ଡେ, ନାନ୍‌ ରାଜାଙ୍କ୍‌ କେତ୍‌ତାନ୍‌, ବେସୁଙ୍କ୍‌ ମହାରାଜାନ୍‌ ସନ୍ତୋଷ ଆଦ୍‌ତେ ନୁ ନିଜର ଦାସ ବେସୁଙ୍କ୍‌ ନିଜର୍‌ କଣ୍ଢେତେ ଅନୁଗ୍ରହ ପାହେମ ଆସ୍‌ ମାନ୍‌ତଣ୍ଡ, ଆସୁଙ୍କ୍‌ ଯିହୁଦା ଦେଶତିଙ୍କ୍‌, ନା ଆନିଦାଦିଡ଼୍‌ କାବୁର୍ ନଗରତିଙ୍କ୍‌ ନାକିଙ୍କ୍‌ ରଃତାନ୍‌ ମାଇଦିଙ୍କ୍‌ ଆଦେଶ୍‌ ମାଡ଼୍‌, ଆସୁଙ୍କ୍‌ ନାନ୍‌ ଆଦ୍‌ ତିଆର ମାଡ଼ିତାନ୍‌। 6 ଆସୁଙ୍କ୍‌ ରାଜାଲ୍‌ ନାକିଙ୍କ୍‌ ପାସ୍‌ରିଞ୍ଚତଣ୍ଡ, "ନାଡ଼୍‌ମେତ୍‌ ରାଣିଲ୍ ଅନ୍‌ ଗାରେ କୁଦିମାତ୍‌ତେ, ମିଡ଼୍‌ ଆଦାନାଦ୍‌ ବେସ୍କ୍‌ ଦିନା ଆଦ୍‌ତେ ? ନୁ ମିଡ଼୍‌ ବେସୁଙ୍କ୍‌ ମାଲ୍‌ସୱାଦ୍‌ତିଡ଼୍‌ ?" ଇଲାନେ ନାନ୍‌ ଅନ୍‌ ଗାରେ ସମୟ ପେସ୍‌ତେ ପେର୍‌କେ ରାଜାଲ୍‌ ନାକିଙ୍କ୍‌ ରତାନ୍‌ ମାଇଦିଙ୍କ୍‌ ରାଜି ଆତ୍‌ତଣ୍ଡ୍‌। 7 ମେଣ୍ଡେ, ନାନ୍‌ ରାଜାଙ୍କ୍‌ କେତ୍‌ତାନ୍‌, "ବେସୁଙ୍କ୍‌ ମହାରାଜାଲ୍‌ ରାଜି ଆଦ୍‌ତେ, ଆସୁଙ୍କ୍‌ ଇଲ୍‌କେତ୍‌ ଆପାକେତ୍‌ ଦେଶ୍‌କେପାନଡ଼୍‌ ବେଲାନେ ଯିହୁଦା ଦେଶ ଆଞ୍ଜ୍‌ ହେଉନା ଜାକ ଆଦାନ୍‌ ମାଇଦିଙ୍କ୍‌ ନାକିଙ୍କ୍‌ ୱିଡ଼୍‌ସିଦ୍‌ତଣ୍ଡ୍‌, ଇଦିନ୍‌ ମାଇଦିଙ୍କ୍‌ ଅଡ଼୍‌ ଗାରେ ନାକିଙ୍କ୍‌ ଚିଟି ଇମୁଟ୍‌; 8 ମେଣ୍ଡେ, ମନ୍ଦିର୍‌ ସମ୍ଫର୍କୀୟ ନେଙ୍ଗାନ୍‌ଆର୍‌ ନୁ ନଗରତେ ନେଟେ ନୁ ନାନ୍‌ ନେଙ୍ଗାନ୍‌ ଲତ୍‌ତେ ମାଇଦିଙ୍କ୍‌ କଡ଼ି ମାଡ଼ାନ୍‌ ମାଇଦିଙ୍କ୍‌ ନାକିଙ୍କ୍‌ କଷ୍ଟ ଇଦାଙ୍କ୍‌ ମହାରାଜାନ୍‌ ମେଟେତିଙ୍ଗ୍‌ ରକ୍ଷାମାଡ଼ାନ୍‌ ଆସଫ ଗାରେ ଅଣ୍ଡୟ ଚିଟି ଇମୁଟ୍‌।" ଆସୁଟ୍‌ ନା ପର ନା ପରମେଶ୍ୱରତେ ମଙ୍ଗଲମୟ କାଇଦେ ସହାୟତା ପ୍ରମାଣ ରାଜାଲ୍‌ ଆଦ୍‌ ନାକିଙ୍କ୍‌ ଇତ୍‌ତଣ୍ଡ୍‌।

9 ନାନେ ଇଲ୍‌କେତ୍‌ ଆପାକେତ୍‌ ଦେଶ୍‌କେପାନଡ଼୍‌ ଗାରେ ଆଞ୍ଜ୍‌ ଅଡ଼୍‌କିଂଙ୍କ୍‌ ଚିଟି ଇତ୍‌ତାନ୍‌। ମେଣ୍ଡେ, ରାଜାଲ୍‌ ନା' ତଡ଼୍‌ ସେନାପତି ନୁ ଗୁରାକିନ୍‌ତଡ଼୍‌ ମିରାନଡ଼୍‌କ୍‌ ରତ୍‌ତଣ୍ଡ୍‌। 10 ମାତର୍‌ ଇସ୍ରାଏଲ୍‌ ମାର୍‌କିଡ଼୍‌ ମଙ୍ଗଲ ଚେଷ୍ଟା ମାଡ଼ାନ୍‌ ମାଇଦିଙ୍କ୍‌ ଅର୍ତୁଣ୍ଡ୍‌ ନାରୁଣ୍ଡ୍‌ ୱାସମିନ୍ଦେଣ୍ଡ୍‌ ଇଞ୍ଜ କେଞ୍ଜି ହୋରୋଣୀୟ ସନ୍‌ବଲ୍ଲଟ୍‌ ନୁ ଅମ୍ମୋନିୟ ଦାସ ଟୋବୀୟ ରାଜି ଆୟିୱେ ମାତ୍‌ତଡ଼୍‌। 11 ଇଲାନେ ନାନ୍‌ ଯିରୁଶାଲମତାଗ ଆଞ୍ଜ୍‌ ହେୱୁସ ଆଗେ ମୁଣ୍ଡ୍‌ ଦିନା ମାତ୍‌ତାନ୍‌। 12 ଆସୁଟ୍‌ ନାର୍କା ନାନ୍‌ ନୁ ନା ତଡ଼୍‌ ବେସ୍କ୍‌ତଡ଼୍‌ ନାରୁଡ଼୍‌ ତେଦ୍‌ତମ୍‌; ମେଣ୍ଡେ, ନା ପରମେଶ୍ୱର ଯିରୁଶାଲମତେ ମାଇଦିଙ୍କ୍‌ ବାତେ ମାଡ଼ାନଙ୍କ୍‌ ନା ମନ୍‌ଦାଗ୍‌ ଇସ୍‌ମାତ୍‌ତଣ୍ଡ୍‌, ଆଦ୍‌ ନାନ୍‌ ବେନଙ୍କ୍‌ ପୁଞ୍ଜ୍‌ସ୍ପନ୍‌ ଆତ୍‌ତାନ୍‌; ମେଣ୍ଡେ ନାନ୍‌ ବେନ୍‌ ପଶୁ ପର କୁଦିମାତ୍‌ତାନ୍‌, ଆଦିଙ୍କ୍‌ ୱିଡ଼୍‌ସି ୱେର୍‌ ପଶୁ ନା ତଡ଼୍‌ ଇଲ୍‌ୱେମାତ୍‌ତେ। 13 ଲିବୀୟାତନ ନାର୍କା ପେୟିସ ଉପତ୍ୟକା ଆର୍‌ ଇସ୍‌ ତାଡ଼ାମ୍‌ନୁୟିଗୁନ୍ଦେ ନୁ ପେଣ୍ଡେଦିବେ ଏୱୁନା ଆତ୍‌ତାନ୍‌ ନୁ ଯିରୁଶାଲମତେ ଉରୁଙ୍ଗ୍‌ତେ ନେଟେ ନୁ ଆଗେତ୍‌ କିସ୍‌ତେ କାର୍‌ୱି ମାନ୍ଦାନ୍‌ ଦ୍ୱାରସାରେ ଉଡ଼୍‌ତାନ୍‌। 14 ତାନ୍‌ପେର୍କେ ନାନ୍‌ ସିମ୍‌ସାମ୍‌ ଦୁୱାଡ଼୍‌ ନୁ ରାଜାନ୍‌ ଏର୍‌ୱୁ ଏୱୁନା ଆତ୍‌ତାନ୍‌; ମାତର୍‌ ଆଗେ ନାନେ କୁଦିଆଦାନ୍‌ ପଶୁତେ ଆର୍‌ ଇଲ୍‌ୱେ ମାତ୍‌ତେ। 15 ଆସୁଙ୍କ୍‌ ନାନ୍‌ ନାର୍କାତ୍‌ୱେଲେ ଇଲ୍‌କେ ଗାରେଇସ୍‌ ପରୁତ୍‌ ପାକେଙ୍କ୍‌ ଆଞ୍ଜ୍‌ ନେଟେତିଙ୍କ୍‌ ଉଡ଼୍‌ତାନ୍‌; ଆସୁଙ୍କ୍‌ ନାନ୍‌ ପରୁତ୍‌ ଦୁୱାର୍‌ ଇସ୍‌ ନେଙ୍ଗି ମାଲସ୍‌ ୱାତ୍‌ତାନ୍‌।

16 ମାତର୍‌ ନାନ୍‌ ବେକେ ଆତ୍‌ତାନ୍‌ ନୁ ବାତେ ମାଡ଼୍‌ତାନ୍‌, ଇଦି ବାଡ଼ିୟଡ଼୍‌ ପୁନଡ଼୍‌ ଆତ୍‌ତଡ଼୍‌; ମେଣ୍ଡେ, ବେସୁଙ୍କ୍‌ ଆୟିନା ନାନ୍‌ ଯିହୁଦୀୟଡ଼୍‌କି ଯାଜକିଡ଼୍‌କି ବାଡ଼ିୟଡ଼୍‌ କି ୱେର୍‌ ପାଡ଼ିୟ୍‌ ମାଡ଼ାନଡ଼୍‌କ୍‌ ଆଦ୍‌ କେଞ୍ଜ୍‌ୱେ ମାତ୍‌ତାନ୍‌। 17 ତାନ୍‌ପେର୍କେ ନାନ୍‌ ଅଡ଼୍‌କିଂଙ୍କ୍‌ କେତ୍‌ତାନ୍‌, "ମାମ୍‌ ବେସତ୍‌ କାରାପ୍‌ ଅବସ୍ଥା ଆସ୍‌ ମିନ୍ଦେମ୍‌, ଯିରୁଶାଲମ ବେଲାନେ ଲିକିଆସ୍‌ ମିନ୍ଦେ ନୁ ଆଗେତ୍‌ ଦୁୱାଡ଼୍‌ ସାରେ କିସ୍‌ତେ କାର୍‌ୱି ମିନ୍ଦେ, ଇୱି ମିଡ଼୍‌ ଉଡ଼ୁତିଡ଼୍‌; ୱାଡ଼୍‌ଟ୍‌, ମାନାଡ଼୍‌ ବେଲାନେ ମେଣ୍ଡେ ଲିନ୍ଦେତ୍‌ତେ ନାରୁଡ଼୍‌ ଆୟିୱାଡ଼୍‌, ଇଦିନ୍‌ ମାଇଦିଙ୍କ୍‌ ଯିରୁଶାଲମତେ ନେଟା ତିଆର୍‌ ମାଡ଼୍‌ନାଟି।" 18 ଆସୁଙ୍କ୍‌ ନା ପର ପରମେଶ୍ୱରତେ ମଙ୍ଗଲମୟ କାଇ ବିଷୟ, ନାୟାଗାକନ୍‌' ରାଜାନ୍‌ ଗଟି ବିଷୟ ନାନ୍‌ ଅଡ଼୍‌କିଂଙ୍କ୍‌ କେତ୍‌ତାନ୍‌। ଆସୁଟ୍‌ ଅଡ଼୍‌ କେତ୍‌ତଡ଼୍‌, "ୱାଡ଼ାଟ୍‌, ମାନାଡ଼୍‌ ତେଦି ମେଣ୍ଡେ ତିଆର୍‌ ମାଡ଼ିକାଡ଼୍‌।" ଇଲାନେ ଅଡ଼୍‌ ଆ ସାୟେ ପାଡ଼୍‌ୟିଦେ ମାଇଦିଙ୍କ୍‌ ମିଇ କାଇ ଡ଼ୁଟାଙ୍କ୍‌ ମାଡ଼୍‌ତଡ଼୍‌। 19 ମାତର୍‌ ହୋରୋଣୀୟ ସନ୍‌ବଲ୍ଲଟ୍‌ ନୁ ଅମ୍ମୋନିୟ ଦାସ ଟୋବୀୟ ନୁ ଆରବୀୟ ଗେଶମ୍‌ ଇଦି କେଞ୍ଜି ମାକିଙ୍କ୍‌ ପାସ୍‌କି ନୁ ଇନ୍‌ମାଡ଼ି କେତ୍‌ତଡ଼୍‌, "ମିଡ଼୍‌ ଇଦି ବେ ପାଡ଼୍‌ୟି ମାଡ଼ମିନ୍ଦେଡ଼୍‌ ? ମିଡ଼୍‌ କି ବାତେ ରାଜାନ୍‌ ବିରୁଦ୍ଦ୍‌ତେ ତେଦିତିଡ଼୍‌ ?" 20 ଆସୁଙ୍କ୍‌ ନାନ୍‌ ଉତ୍ତର ମାଡ଼ି ଅଡ଼୍‌କିଂଙ୍କ୍‌ କେତ୍‌ତାନ୍‌, "ବେନ୍‌ ସ୍ୱର୍ଗତେ ପରମେଶ୍ୱର, ଅଣ୍ଡ୍‌ ମାକିଙ୍କ୍‌ ପାଡ଼୍‌ୟି ଟିକ୍‌ ମାଡ଼ିତଣ୍ଡ୍‌; ମାମ୍‌ ଅନ୍‌ଦାସ ଇଦିନ୍‌ ମାଇଦିଙ୍କ୍‌ ମେଣ୍ଡେ ତେଦି ତିଆର୍‌ ମାଡ଼ିତମ୍‌; ମାତର୍‌ ଯିରୁଶାଲମତେ ମିୟାଦ୍‌ ବାତେ ଗଟ୍‌ କି ଅଦିକାର କି ଏର୍ରକେଚିନ୍ନେ ଇଲେ।"