1 ମାତର୍‌ ମାମେ ନେଟା ତିଆର୍‌ ମାଡ଼ମିନ୍ଦେମ୍‌ ଇଞ୍ଜ କେଞ୍ଜି ସନ୍‌ବଲ୍ଲଟ୍‌ କୁପିତ୍‌ ନୁ ଅଦିକ୍‌ ବିରକ୍ତ ଆସ୍‌ ଯିହୁଦୀୟଡ଼୍‌କ୍‌ ପାସ୍କକ୍‌ତା। 2 ମେଣ୍ଡେ, ଅଣ୍ଡ ନିଜର ଦାଦାଲଡ଼୍‌ ନୁ ଶମରୀୟା ସୈନ୍ୟଦଲ୍‌ ମୁନେ ଇ ଗଟ୍‌ କେତ୍‌ତଣ୍ଡ, "ଇ ଦୁର୍ବଳ ଯିହୁଦୀୟ ଅଡ଼୍‌ ବାତେ ମାଡ଼ମିନ୍ଦେଡ଼ି ? ଅଡ଼୍‌ ବାତେ ଡ଼େକା ବନ୍ଦ ମାଡ଼ି ମାନ୍ତଡ଼୍‌ ? ଅଡ଼୍‌ ବାତେ ବଳିଦାନ ମାଡ଼ିତଡ଼୍‌ ? ଅଡ଼୍‌ ବାତେ ଅଣ୍ଡୟ୍‌ ଦିନ୍‌ତିଙ୍କ୍‌ ତେର୍‌ସ୍ପିତଡ଼୍‌ ? ଅଡ଼୍‌ ବାତେ ନେଟେତ୍‌ ଢିପିନ୍‌କନ୍‌ ମାଲ୍‌ ତଲ୍‌କେ ଟେଣ୍ଡି ଜିୱେ ମାଡ଼ିତଡ଼୍‌ ?" 3 ଇ ସମୟତେ ଅମ୍ମୋନିୟ ଟୋବୀୟ ଆଦିନ୍‌ ଗାରେ ମାତ୍‌ତେ, ମେଣ୍ଡେ ଅଣ୍ଡ କେତ୍‌ତଣ୍ଡ, "ଆଗେକ୍‌ବା ଅଡ଼୍‌ ବାତେ ମାଡ଼ମିନ୍ଦେଡ଼୍‌, କଇଲେ ତାରିଆତ୍‌କେ ଆଦ୍‌ ଅଡ଼ାଦ୍‌ ନେଟେ ଉର୍ଙ୍ଗିଆଦ୍‌ତେ।"

4 ଅ ମା ପରମେଶ୍ୱର, କେଞ୍ଜେ; ବାତେଙ୍କ୍‌ଇତ୍କେ ମାମ୍‌ ପାସ୍‌କି ଆସ୍‌ ମିନ୍ଦେମ୍‌; ଅଡ଼୍‌ ପାସ୍‌କାନାଦ୍‌ ଅଡ଼୍‌ ନିଜର ତାଲ୍‌ତାଗ୍‌ ୱାଟିମ୍‌ ନୁ ଅଡ଼୍‌କିଂଙ୍କ୍‌ ବିଦେଶକନ୍‌ ବନ୍ଦି ମାଡ଼ି ନଷ୍ଟ ଆଦାନ୍‌ ମାଇଦିଙ୍କ୍‌ ପସ୍ପିମ୍‌; 5 ମେଣ୍ଡେ ଅଡ଼୍‌ ଅଦର୍ମତିଙ୍କ୍‌ ମୁସ୍‌ମାଟ୍‌ ନୁ ମିଇ ମୁନେ ଅଡ଼୍‌ ବଜ୍‌ ଆଇମାକି; ବାତେଙ୍କ୍‌ଇତ୍କେ ତିଆର୍‌ ମାଡ଼ାନଡ଼୍‌ ମୁନେ ଅଡ଼୍‌ ମିଇପରୁ ପାପ୍‌ ମାଡ଼ିମିନ୍ଦେଡ଼୍‌। 6 ଇଲାନେ ମାମ୍‌ ନେଟା ତିଆର୍‌ ମାଡ଼୍‌ତମ୍‌ ନୁ ଆଦିନ୍‌ ଡ଼େଙ୍ଗ୍‌ ଦୁଡ଼େ ଏୱୁନା ସାରେ ନେଟାନେ ଅଣ୍ଡୟ୍‌ କାଲ୍‌ପ୍‌ତଡ଼୍‌; ବେଲାନେ ପାଡ଼୍‌ୟି ମାଡ଼ାନଙ୍କ୍‌ ନାରୁଡ଼୍‌ ଇଚ୍ଛା ମାତ୍‌ତେ।

7 ମାତର୍‌ ଯିରୁଶାଲମ୍ ନେଟେତେ ତିଆର୍‌ ପାଡ଼୍‌ୟି ଅଦିକ୍‌ ଆସ୍‌ ମିନ୍ଦେ ନୁ ଉଙ୍ଗ୍‌ତାୱୁସାରେ ପଡ଼୍‌ୟିଆ ବନ୍ଦ ଆଦାଙ୍କ୍‌ ଆଦୁତ୍‌, ଇଦ୍‌ କେଞ୍ଜି ସନ୍‌ବଲ୍ଲଟ୍‌ ନୁ ଟୋବୀୟ, ମେଣ୍ଡେ ଆରବୀୟଡ଼୍‌ ନୁ ଅମ୍ମୋନିୟଡ଼୍‌ ନୁ ଅସ୍‌ଦୋଦିୟଡ଼୍‌ ଅଦିକ୍‌ କପାମ୍‌ ଆତ୍‌ତଡ଼୍‌। 8 ମେଣ୍ଡେ, ଆସାରେ ଯିରୁଶାଲମତିଙ୍କ୍‌ ଆଞ୍ଜ ଆଦିନ୍‌ ବିରୁଦ୍ଧତେ ଯୁଦ୍ଧ ମାଡ଼ାନଙ୍କ୍‌ ନୁ ଆଗାକନ୍‌ ରାମ୍‌କ୍‌ ମାଡ଼ାନଙ୍କ୍‌ ଅଣ୍ଡୟ ମନ୍ତ୍ରନା ମାଡ଼୍‌ତଡ଼୍‌। 9 ମାତର୍‌ ମାମ୍‌ ଅଡ଼୍‌ ମାଇଦିଙ୍କ୍‌ ମିଇ ପରମେଶ୍ୱରଦେ ଗାରେ ପ୍ରାର୍ଥନା ମାଡ଼୍‌ତମ୍‌ ନୁ ନାର୍କାପାଲି ଅଡ଼୍‌ ବିରୁଦ୍ଧତେ କେପି ମାତ୍‌ତମ୍‌।

10 ଆସୱେଲେ ଯିହୁଦାଲ୍‌ କେତ୍‌ତଣ୍ଡ, "ବଜ୍‌କାଞ୍ଜାନଡ଼୍‌ ବପୁ ତେର ମିନ୍ଦେ, ମେଣ୍ଡେ ନାର୍ଗେ ଉର୍ଙ୍ଗତେ ନେଟା ମିନ୍ଦେ; ଆଦିଙ୍କ୍‌ ମାମ୍‌ ନେଟା ପେକାଙ୍କ୍‌ ପାର୍‌ୱମ୍‌ ଆତ୍‌ତମ୍‌।"

11 ମେଣ୍ଡେ, ମା ବିରୁଦ୍ଧତେନଡ଼୍‌ କେତ୍‌ତଡ଼୍‌, "ମାମ୍‌ ଅଡ଼ାଗ୍‌ ଆଞ୍ଜ୍‌ ଅଡ଼୍‌କିଂଙ୍କ୍‌ ଆୱୁକି ନୁ ଅଡ଼୍‌ ପାଡ଼୍‌ୟି ବନ୍ଦ ମାଡ଼୍‌ନା ଜାକ୍‌ ଅଡ଼୍‌ ପୁନଡ଼୍‌ ବା ଉଡ଼ଡ଼୍‌।" 12 ମେଣ୍ଡେ, ଅଡ଼୍‌ ଗାରେ ମାନ୍ଦାନଡ଼୍‌ ଯିହୁଦୀୟଡ଼୍‌ ସାରେ ପଡ଼୍‌ୟେକନ୍‌ ୱାସ୍‌ ମାକିଙ୍କ୍‌ ଦଶ ଦାମ୍‌ କେତ୍‌ତଡ଼୍‌, "ମିଇକିଙ୍କ୍‌ ମାକିଙ୍କ୍‌ ଗାରେକଞ୍ଜ୍‌ ମାଲ୍‌ସ୍‌ ୱାଦାଙ୍କ୍‌ ଆଦ୍‌ତେ।" 13 ଇଦିଙ୍କ୍‌ ନାନ୍‌ ନେଟାନେ ପେର୍‌କେତ୍‌ ପାକ୍‌ ମଦଲ୍‌ତେ କୁଲା ପଡ଼୍‌ୟେତାଗ୍‌ ନାରୁଡ଼୍‌କିଙ୍କ୍‌ ଅଡ଼୍‌ ପରିବାର ଅନୁସାର୍‌ତେ ଅଡ଼୍‌କିଂଙ୍କ୍‌ ସୁର୍ ନୁ ବର୍ଚ୍ଚା ନୁ ୱିଲ୍‌କିନ୍‌ତଡ଼୍‌ ଏଞ୍ଚ୍‌ତଡ଼୍‌।

14 ଆସୁଙ୍କ୍‌ ନାନ୍‌ ଉଡ଼୍‌ତାନ୍‌ ନୁ ତେଦି ମହାନ୍‌ ନାରୁଡ଼୍‌ ନୁ ବାଡ଼୍‌ୟଡ଼୍‌କ୍‌ ନୁ ୱେର୍‌ରେ ନାରୁଡ଼୍‌କ୍‌ କେତ୍‌ତାନ୍‌; "ମିଡ଼୍‌ ଅଡ଼୍‌ ବିଷୟତେ ୱେର୍‌ମାଟ୍‌; ପ୍ରବୁଙ୍କ୍‌ ଏର୍କେ ମାଡ଼ାଟ୍‌, ଅଣ୍ଡ ମହାନ୍‌ ନୁ ବୟଙ୍କାର୍‌, ମେଣ୍ଡେ ମିଡ଼୍‌ ନିଜର ନିଜର ଦାଦାଲଡ଼୍‌, ମାର୍‌ ନୁ ମାୟାସ୍କିଙ୍କ୍‌, ନିଜର ନିଜର ନାଟାକିଙ୍କ୍‌ ନୁ ଲତ୍‌ତେ ମାଇଦିଙ୍କ୍‌ ଯୁଦ୍ଦ୍‌ ମାଡ଼ାଟ୍‌।"

15 ପେର୍କେ ମାକିଙ୍କ୍‌ ଶତ୍ରୁଡ଼୍‌ ମନ୍ତ୍ର ମାକିଙ୍କ୍‌ ପୁଞ୍ଜ୍‌ପି ଆଞ୍ଜ ମିନ୍ଦେଡ଼୍‌ ନୁ ପରମେଶ୍ୱର ଆଦ୍‌ ଆରା ମାଡ଼ି ମିନ୍ଦେଣ୍ଡେ, ଇଦ୍‌ ମାମ୍‌ କେଞ୍ଜୱାନାକେ, ମାମ୍‌ ସାରେ ନେଟାନାଗ୍‌ଗେ ନିଜର ନିଜର ପାଡ଼୍‌ୟିଦିଙ୍କ୍‌ ମାଲ୍‌ସ୍ ଆତ୍‌ତମ୍‌।

16 ମେଣ୍ଡେ, ଆ ଦିନ୍‌କନ୍‌ ମା ଦାସନଡ଼୍‌ ଦୁଡ଼େ ପାଡ଼୍‌ୟି ମାଡ଼୍‌ତଡ଼୍‌ ନୁ ଅଡ଼୍‌ ଦୁଡ଼୍‌ ବର୍ଚ୍ଚା, କମା, ୱିଲ୍‌, ନୁ ସାଞ୍ଜୁଆ* ପଇସ୍‌ ମାତ୍‌ତଡ଼୍‌; ପୁଣି, ବେଡ଼୍‌ୟଡ଼୍‌ ଯିହୁଦାତେ ସାରେ ଗୋଷ୍ଟିତେ ପେର୍କେ ମାତ୍‌ତଡ଼୍‌। 17 ବେନଡ଼୍‌ ନେଟା ତିଆର ମାଡ଼୍‌ତଡ଼୍‌ ନୁ ବେନଡ଼୍‌ ଜବ୍‌ କାଞ୍ଜ୍‌ତଡ଼୍‌, ଅଡ଼୍‌ ନିଜେ ନିଜେ ବଜ୍‌ ତେତ୍‌ତଡ଼୍‌, ସାରେତଡ଼୍‌ ଅଣ୍ଡୟ୍‌ କାଇଦେ ପାଡ଼୍‌ୟି ମାଡ଼୍‌ତଡ଼୍‌ ନୁ ୱେର୍‌ କାଇଦେ ଅସ୍ତ୍ର ପଇତ୍‌ତଡ଼୍‌; 18 ମେଣ୍ଡେ, ଅଲ୍‌ସାନଡ଼୍‌ ସାରେତଡ଼୍‌ ନିଜର ନିଜର ଟିକିଡ଼୍‌ତାଗ୍‌ ସୁର୍ ତଃସ୍‌ ଆଲେନେ ପାଡ଼୍‌ୟି ମାଡ଼୍‌ତଡ଼୍‌। ମେଣ୍ଡେ, ତୁରୀ ପେଞ୍ଚାନ୍‌ ନାରୁଡ଼୍‌ ମା ଗାରେ ମାତ୍‌ତା। 19 ଇଦି ପେର୍‌କେ ମାମ୍‌ କୁଲିନଡ଼୍‌କ୍‌ ନୁ ବାଡ଼୍‌ୟଡ଼୍‌କ୍‌ ନୁ ୱେର୍‌ ନାରୁଡ଼୍‌କ୍‌, ପାଡ଼୍‌ୟି ବଜ୍‌ ନୁ ବିରାବାରା ଆତ୍‌ତେ, ମେଣ୍ଡେ ମାମ୍‌ ନେଟାନ୍‌ ପର ଲେକେତ୍‌ ୱେରନାଗାଙ୍କ୍‌ ମେଣ୍ଡେ ଅତୁନାଗାଙ୍କ୍‌ ଜେକେ ମିନ୍ଦେମ୍‌; 20 ଇଦିନ୍‌ ମାଇଦିଙ୍କ୍‌ ବେନ୍‌ଆୟି ପଡ଼୍‌ୟେତାଗ୍‌ ତୂରୀନ୍‌ ଲେଙ୍ଗ୍‌ କେଞ୍ଜିତିଡ଼୍‌, ଆପଡ଼୍‌ୟେକନ୍‌ ମାଆ ଗାରେକନ୍‌ ୱାଦ୍‌ତା; ମା ପରମେଶ୍ୱର ମାନ୍‌ ପାକାଙ୍କ୍‌ ଯୁଦ୍ଦ୍‌ ମାଡ଼ିତଣ୍ଡ୍‌। 21 ଇଲାନେ ମାମ୍‌ ଆ ପାଡ଼୍‌ୟିତାଗ୍‌ କଷ୍ଟ ମାଡ଼୍‌ତମ୍‌, ମେଣ୍ଡେ ନାର୍କୁକ୍‌ ଆଦାନ୍‌ ସମୟକନ୍‌ ଉକାକ୍‌ ୱେସ୍‌ ଆଦାନ୍‌ ଜାକ୍‌ ଅଡ଼୍‌ ଦୁଡ଼୍‌ ନାରୁଡ଼୍‌ ସୂରୀ ପୟିତଡ଼୍‌। 22 ଆ ସମୟତେ ମାମ୍‌ ନାରୁଡ଼୍‌କିଙ୍କ୍‌ ମେଣ୍ଡେ କେତ୍‌ତମ୍‌, ସାରେ ନାରୁଡ଼୍‌ ନାର୍କେତ୍‌ୱେଲେ ନିଜର ନିଜର ଦାସତଡ଼୍‌ ଯିରୁଶାଲମ ଲପେ ମାନିଡ଼୍‌, ଆସୁଟ୍‌ ଅଡ଼୍‌ ନାର୍କା ମାକିଙ୍କ୍‌ କେପେ ପାର୍‌ତଡ଼୍‌ ନୁ ପାୟାଲାତେ ପାଡ଼୍‌ୟି ମାଡ଼୍‌ ପାର୍‌ତଡ଼୍‌। 23 ଇଲାନେ ମାମ୍‌ କି ମା ଦାଦାଲଡ଼୍‌ କି ମା ଦାସଡ଼୍‌ ବା ମା ପେର୍‌କେତ୍‌ କେପାନଡ଼୍‌ ବେନଡ଼୍‌ ନିଜର ମେନ୍ଦୁଲ୍‌କନ୍‌ ସିଲେ ଟେଣ୍ଡମ୍‌ ଆତ୍‌ତମ୍‌, ସାରେତଡ଼୍‌ ନିଜର ନିଜର ସୂରିସାମାନ୍‌ ପୟିସ୍‌ ଏର୍‌ଗାରେ ଆତ୍‌ତମ୍‌।