1 ଅଣ୍ଡ୍‌‍ଦିନ୍ ଜିସୁ ବିଶ୍ରାମଦିନେ ତାଗ୍ ଶସ୍ୟୱାୟେ ତାଲାନ୍ ଆଞ୍ଜ ମାନ୍ଦାନ୍ ୱେଲେ ଅନ୍‌ ଶିଷ୍ୟଡ଼୍ କେଡ଼୍ ଦେହେସ୍ କାଇଦେ ନଅକି ତିଞ୍ଜ ମାତ୍‍ତଡ଼୍ । 2 ଇତ୍କେ ପାରୂଶୀଡ଼୍ ଲୋପେ ବେସ୍‍କ୍‍ତୁଡ଼୍‍ କେତ୍‍ତଡ଼୍‍, "ବିଶ୍ରାମଦିନେ ଦାଗେ ବାତେଏ ମାଡ଼ାନାଦ୍ ନିୟମ୍‍ ଆୟ୍‍ୟ, ଆଦ୍ ମିଡ଼୍ ବାତେଙ୍କ୍ ମାଡ଼ୁତିଡ଼୍ ?"

3 ଜିସୁ ଅଡ଼୍‌‍କିଂଙ୍କ୍ ଉତ୍ତର୍ ହିତ୍‍ତଣ୍ଡ୍, ଦାଉଦ୍‍ ନୁ ତାମ୍ ସାଙ୍ଗଡ଼୍ କାରୱିନ୍ ମାନ୍ଦାନ୍ ୱେଲେ ଅଣ୍ଡ୍‌ ବାତେଏ ମାଡ଼ତ୍‍ତଣ୍ଡ୍, ଆଦ୍ ମିଡ଼୍ କାର୍‍ୱିଡ଼୍ କି ? 4 ଅଣ୍ଡ୍‌ ବେଲା ଇଶ୍ୱର୍ ତେ ଲୋନ୍‌ ଆସି, ବେନେ ଦର୍ଶନୀରୂଟି ମାତର୍ ଯାଜକିଡ଼୍ ୱିଡ଼୍‍ସି ମେଣ୍ଡେ ବେନଙ୍କେ ତିନ୍ଦାନଙ୍କ୍ ନିୟମ୍‍ ଆୟ୍‍ୟ, ଆଦ୍ ତାସ୍ ତିତ୍‍ତଣ୍ଡ୍, ମେଣ୍ଡେ ତାନ୍ ସାଙ୍ଗଡ଼କ୍ ମିକା ହିତ୍‍ତଣ୍ଡ୍ ।

5 ମେଣ୍ଡେ, ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, "ନାରୁନ୍‍ପିଲେ ବିଶ୍ରାମଦିନେତେ ପ୍ରବୁ ଆଦ୍‍ତନ୍ ।"

6 ଜିସୁ ମେଣ୍ଡେଅଣ୍ଡ୍‌ ବିଶ୍ରାମଦିନେ ତେ ସମାଜ୍ ଲତ୍‍ତାଗେ ନେଙ୍ଗିମିକା ଶିକ୍ଷା ହିସ ମାତ୍‍ତଣ୍ଡ୍; ଆଗେ ୱେରନ୍ ନାରୁଡ଼୍ ମାତ୍‍ତଣ୍ଡ୍, ଅନ୍‌‍ୱାଦ୍ ତିନ୍ଦେକାଇ ୱାତିମାତ୍‍ତେ । 7 ମେଣ୍ଡେ, ଅଣ୍ଡ୍‌ ଉମ୍ଭ ବିଶ୍ରାମଦିନେ ଦାଗେ ସୁସ୍ଥ ମାଡ଼ିତନ୍, ଇଦ୍ ଉଡ଼ାନ୍ ସେଙ୍ଗେ ଶାସ୍ତ୍ରୀ ନୁ ପାରୂଶୀଡ଼୍ ଅଂକିଙ୍କ୍‌ ଉଡ଼ ମାତ୍‍ତଡ଼୍, ବେଲାକି ଅଡ଼୍‌‍ ଅନ୍‌ ବିରୁଦ୍ ତେ ଦଷ୍ ପଇତାଙ୍କ୍ ପାର୍‍ଦ୍‍ତଡ଼୍ । 8 ବାତେଙ୍କ୍ ଇତ୍କେ ଜିସୁ ଅଡ଼୍‌‍ୱାଦ୍ ମନ୍‍ତାଦ୍ ହେର୍କା ପୁଞ୍ଜ୍, ବେନ୍ ନାରୁଡ଼୍ ତେ କାୟ୍ ୱାତିମାତ୍‍ତେ, ଅଂକିଙ୍କ୍‌ କେତ୍ତଣ୍ଡ୍, ତେଦ୍‍ଦା ନାଡ଼ମେ ନିଲ୍‍ମ୍ । ମେଣ୍ଡେ ଅଣ୍ଡ୍‌ ତେଦି ନିତ୍‍ତଣ୍ଡ୍ । 9 ଆଗେଙ୍କ୍ "ଜିସୁ ଅଡ଼୍‌‍କିଂଙ୍କ୍ କେତ୍ତଣ୍ଡ୍, ନାନ୍ ମିକିଂଙ୍କ୍ ପାଚ୍ରାମାଡୁତାନ୍, ବିଶ୍ରାମଦିନେ ତେ ବାତେଏ ମାଡ଼ାନାଦ୍ ନିୟମ୍‍ ? ସାୟେ ମାଡ଼ାନାଦ୍ ନା କାରାପ୍ ମାଡ଼ାନାଦ୍ ? ଜିୱୁଣ୍ଡ୍ ରକ୍ଷା ମାଡ଼ାନାଦ୍ ନା ଆୱକାନାଦ୍ ?" 10 ମେଣ୍ଡେ, "ଅଣ୍ଡ୍‌ ସାର୍‍ରେପାକେ ସାରେତଡ଼୍‌କିଂଙ୍କ୍ ଉଡ଼ି ଅଂକିଙ୍କ୍‌ କେତ୍ତଣ୍ଡ୍, ନି କାଇଆମ୍ । ଆସୁଣ୍ଟ୍ ଅଣ୍ଡ୍‌ ଆଲା ମାଡ଼ତ୍‍ତଣ୍ଡ୍, ଆସୁଟେ ଅନ୍‌‍ୱାଦ୍ କାୟ୍ ସୁସ୍ଥ ଆତ୍‍ତେ ।"

11 ବାତେଙ୍କ୍ ଇତ୍କେ ଅଡ଼୍‌‍ କପାମ୍ ଆଦ୍‍ତଡ଼୍, ମେଣ୍ଡେ ଜିସୁନ୍ ସେଙ୍ଗେ ବାତେମାଡ଼୍ ପାର୍‍ଦ୍‍ତଡ଼୍, ଆଦ୍ ବିଷୟତେ ନିଜେ ନିଜେ ଗଟି ତିରିୟା ତିରିୟି ଆତ୍‍ତଡ଼୍ ।

12 ଆସୁଣ୍ଟ୍ ଜିସୁ ଅନ୍‌‍ଦିନେ ପ୍ରାର୍ତନା ମାଡ଼ାନ୍ ସେଙ୍ଗେ ମେଟେତାଗ୍ ଆଞ୍ଜ୍ ପରମେଶ୍ୱରତେ ଗାର୍‍ରେ ପ୍ରାର୍ତନା ମାଡ଼ମାଡ଼ ନିଟ୍‍ଟା ନାର୍କେ ମାତ୍‍ତଣ୍ଡ୍ । 13 ନାର୍‍କୁକ୍, ଜିସୁ ତାନ୍ ପ୍ରେରିତ୍‍ ଶିଷ୍ୟଡ଼୍ ଗାର୍‍ରେ କାର୍‍ଙ୍ଗି ଅଡ଼୍‌‍ ଲୋପେ ବାରଜାନ୍‍ତିଙ୍କ୍ ଏଞ୍ଚତଣ୍ଡ୍; ଅଣ୍ଡ୍‌ ଅଡ଼୍‌‍କିଂଙ୍କ୍ ମିକା ପ୍ରେରିତ୍ ପେଦେର୍ ହିତ୍‍ତଣ୍ଡ୍; 14 ଅଡ଼୍‌‍ ଆତ୍‍ତଡ଼୍ ଶିମୋନ୍, ବେନଙ୍କ୍ ଅଣ୍ଡ୍‌ ମିକା ପିତର୍ ପେଦେର୍ ହିତ୍‍ତଣ୍ଡ୍, ମେଣ୍ଡେ ତାମ୍ ଦାଦାଲ୍‌ ଆନ୍ଦ୍ରିୟ, ଯାକୁବ୍ ନୁ ଯୋହନ୍‌, ପିଲିପ୍‍ପ ନୁ ବର୍ତଲମି, 15 ମାତିଉ ନୁ ତୋମା, ଆଲ୍‍ଫିତେ ମାର୍‍ ଯାକୁବ୍ ନୁ ଶିମୋନ୍, ବେନଙ୍କ୍ ଉଦଯୋଗୀ ଇଞ୍ଜ କେତିତଡ଼୍‍, 16 ଯାକୁବ୍ ତେ ମାର୍‍ ଯିହୂଦା ନୁ ଇଷ୍କାରିୟୋତୀୟ ଯିହୂଦା, ବେନ ଜିସୁଙ୍କ୍ ଶତ୍ରୁଡ଼୍ କାଇଦେ ଇତ୍‍ତନ୍ ।

17 ମେଣ୍ଡେ, ଜିସୁ ପ୍ରେରିତ୍ ତଡ଼୍ ମେଟେତାଗାଙ୍କ୍ ମଦଲ୍ ୱାତ୍‍ତଣ୍ଡ୍ । ମେଣ୍ଡେ ତାନ୍ ଗାଟି ନାର୍ଗେ ଶିଷ୍ୟଡ଼୍ ତଡ଼୍ ୱେରନ୍ ସାମ୍‍ନ୍ ବୁମ୍‍ତାଗେ ନିତ୍‍ତଡ଼୍ । ମେଣ୍ଡେ ସାରେ ଯିହୂଦା ପ୍ରଦେଶ୍, ଯିରୁଶାଲେମ୍, ମେଣ୍ଡେ ସୋର ନୁ ସୀଦୋନ୍‍ତେ ଆଞ୍ଚିନାଗା କଞ୍ଜ୍ ଗାଟି ନାରୁଡ଼୍ ଉପସ୍ଥିତ୍ ଆତ୍‍ତଡ୍; 18 ଅଡ଼୍‌‍ ଅନ୍‌ ବାକ୍ୟ କେଞ୍ଜାନଙ୍କ୍ ନୁ ନିଜ୍‍ନିଜ୍ ରୋଗତେ କନ୍‍ସ୍ ସୁସ୍ଥ ଆଦାନ୍ ସେଙ୍ଗେ ୱାସ୍ ମାତ୍‍ତଡ଼୍, ମେଣ୍ଡେ ବେନ ଅଶୁଚି ଆତ୍ମା ତଡ଼୍ କଷ୍ଟ ଆସ୍‍ସ ମାତ୍‍ତଡ଼୍, ଅଡ଼୍‌‍ ସାରେତଡ଼୍‍କ୍ ଜିସୁ ସୁସ୍ଥ ମାଡ଼ତଣ୍ଡ୍; 19 ମେଣ୍ଡେ ନାରୁଡ଼୍ ଅଂକିଙ୍କ୍‌ ଇଟାନଙ୍କ୍ ଆଲ୍‍ସି ମାଡ଼ମାତ୍‍ତଡ଼୍, ବାତେଙ୍କ୍ ଇତ୍କେ ଅନାଗା କଞ୍ଜ୍ ଶକ୍ତି ପେୟିସ୍ ସାରେତଡ଼୍‌କିଂଙ୍କ୍ ସୁସ୍ଥ ମାଡ଼ମାତ୍‍ତେ ।

20 ଆସୁଣ୍ଟ୍ ଜିସୁ ତାନ୍ ଶିଷ୍ୟଡ଼୍ ପାକ୍‍କେ ଉଡ଼ି କେତ୍ତଣ୍ଡ୍,

"ଅଦାତ୍ମିକ୍ ଜିୱୁନ୍‍ତାଗ୍ ଦୁର୍ବଲ୍ ଇଞ୍ଜ ଏର୍କା ମାଡ଼ାନ୍ ନାରୁଡ଼୍ ଦନ୍ୟ,"

ବାତେଙ୍କ୍ ଇତ୍‍କେ ଅଡ଼୍‌ ସ୍ୱର୍ଗରାଜ୍ୟତେ ଅଦିକାର୍ ଆଦ୍‍ତଡ଼୍ ।

21 ଇଞ୍ଜେ କାର୍‍ୱିନ୍ ଯେ ମିଡ଼୍, ମିଡ଼୍ ଦନ୍ୟ,

ବାତେଙ୍କ୍ ଇତ୍କେ ମିଡ଼୍ ତିଞ୍ଜ୍‌ ପାଞ୍ଜିତିଡ଼୍‌ ।

ଇଞ୍ଜେ କେୟୁତିଡ଼୍‍ ଯେ ମିଡ଼୍, ମିଡ଼୍ ଦନ୍ୟ,

ବାତେଙ୍କ୍ ଇତ୍କେ ମିଡ଼୍ କାୱଦିତିଡ଼୍‍ ।

22 ✝ ୬:୨୨ ୧ ପିତର୍‍ ୪:୧୪. ନାରୁଡ଼୍ ବେସୁଣ୍ଟ୍ ନାରୁନ୍‍ପିଲେ ସେଙ୍ଗେ ମିକିଂଙ୍କ୍ ୱେଏରେ ମାଡ଼ିତଡ଼୍, ପାସ୍‍କିତଣ୍ଡ୍, ମେଣ୍ଡେ ନିନ୍ଦା ମାଡ଼ିତଡ଼୍ ନୁ ମି ପେଦେର୍‍ତିଙ୍କ୍ କାରାବ୍‍ ଇଞ୍ଜ ପୟଡ୍, ଆସୁଣ୍ଟ୍ ମିଡ଼୍ ଦନ୍ୟ । 23 ✝୬:୨3 ପ୍ରେରିତ ୭:୫୨.ଆଦ୍‍ଦିନେ ୱେଡ଼୍‍କା ମାଡ଼ି ହେନ୍ଦାଟ୍, ବାତେଙ୍କ୍ ଇତ୍କେ ଉଡ଼ାଟ୍, ସ୍ୱର୍ଗତାଗେ ମିୱାଦ୍ ପୁରସ୍କାର୍ ମିନ୍ଦେ; ମେଣ୍ଡେ, ଆଦ୍ ରକମ୍ ତ ଅଡ଼୍‌‍ୱାଦ୍‌ ପିତୃପୁରୁଷନଡ଼୍ ବାବବାଦୀଡ଼୍ ସେଙ୍ଗେ ମାଡ଼ମାତ୍‍ତଡ଼୍ ।

24 ବାତେଙ୍କ୍ ଇତ୍କେ ହାୟେ, ଦଣ୍ଡତେ ନାରୁଡ଼ି ସାଉକାର୍ ଯେ ମିଡ଼୍,

ବାତେଙ୍କ୍ ଇତ୍କେ ମିଡ଼୍ ନିଜେ ନିଜେ ସୁକାମ୍‍ତେ ମିନ୍ଦେଡ଼ି ।

25 ହାୟେ, ଦଣ୍ଡତେ ନାରୁନ୍ ନାର୍ଗେମାନ୍ଦାନ୍ ନାରୁଡ଼୍ ଯେ ମିଡ଼୍,

ବାତେଙ୍କ୍ ଇତ୍କେ ମିଡ଼୍ କାରୱିନ୍ ଆଦ୍‍ତିଡ଼୍ ।

ହାୟେ, ଦଣ୍ଡତେ ପାତ୍ର ଇଞ୍ଜେ କାୱଦୁତିଡ଼୍‍ ଯେ ମିଡ଼୍,

ବାତେଙ୍କ୍ ଇତ୍କେ ମିଡ଼୍ ଦୁଃକାମ୍ ନୁ କେୟିତିଡ଼୍ ।

26 ବେସୁଣ୍ଟ୍ ନାରୁଡ଼୍ ସାରେତଡ଼୍ ମିକିଂଙ୍କ୍ ପ୍ରସଂଶା ମାଡ଼ି କେତିତଡ଼୍, ଆସୁଣ୍ଟ୍ ହାୟେ, ମିଡ଼୍ ଦଣ୍ଡତେ ପାତ୍ର; ଆଦ୍ ରକମ୍ ତ ଅଡ଼୍‌‍ୱାଦ୍‌ ପିତୃପୁରୁଷନଡ଼୍ ବଣ୍ଡବାବବାଦିଡ଼୍‍ ସେଙ୍ଗେ ମାଡ଼ମାତ୍‍ତଡ଼୍ ।

27 ବାତେଙ୍କ୍ ଇତ୍କେ କେଞ୍ଜୁତିଡ଼୍‍ ଯେ ମିଡ଼୍, ମିକିଂଙ୍କ୍ ନାନ୍ କେତୁତାନ୍, ମି ଶତ୍ରୁନଡ଼୍‍କ୍ ପ୍ରେମ୍ ମାଡ଼ାଟ୍; ବେନଡ଼୍ ମିକିଂଙ୍କ୍ ପାସ୍‍କିତଡ଼୍, ଅଡ଼ାଦ୍‌ ଲେକେତ୍ ମାଡ଼ାଟ୍; 28 ବେନଡ଼୍ ମିକିଂଙ୍କ୍ ଅବିଶାପ୍‌ ହିଦ୍‍ତଡ଼୍, ଅଡ଼୍‌‍କିଂଙ୍କ୍ ଆର୍ଶିବାଦ୍ ମାଡ଼ାଟ୍; ବେନଡ଼୍ ମିକିଂଙ୍କ୍ ଅପ୍‍ମାନ୍ ମାଡ଼ିତଡ଼୍, ଅଡ଼୍‌‍ ସେଙ୍ଗେ ପ୍ରାର୍ତନା ମାଡ଼ାଟ୍ । 29 ବେନ ମିକିଂଙ୍କ୍ ୱେରନ୍ ବୁକେତାଗ୍ ଚାପୁଡ଼ା ରେହେତିତଣ୍ଡ୍, ଅଂକିଙ୍କ୍‌ ମେଣ୍ଡ ଅଙ୍କ୍‌ ବୁକା ତହସିମୁଟ୍; ମେଣ୍ଡେ, ବେନ ମିଇ ଡୁପଟ୍ ହଦ୍‍ତଣ୍ଡ୍, ଅଂକିଙ୍କ୍‌ ମିଇ ଚକା ମିକା ଆଦାଙ୍କ୍ ମନା ମାଡ଼ମାଟ୍ । 30 ବେନ ମିକିଂଙ୍କ୍ ତାଆଲ୍‍କିତଣ୍ଡ୍, ଅଂକିଙ୍କ୍‌ ହିମୁଟ୍; ମେଣ୍ଡେ ବେନ ମିଇ ସମ୍ପତ୍ତି ଆଦ୍‍ତଣ୍ଡ୍, ଅନାଗା କଞ୍ଜ୍ ଆଦ୍ ମେଣ୍ଡେ ତାଲ୍‍କ୍‍ମାଟ୍ । 31 ✝୬:3୧ ମାତିଉ ୭:୧୨.ନାରୁଡ଼୍ ମି ସେଙ୍ଗେ ବେଦ୍ ଲେକାମ୍ ବ୍ୟବହାର୍ ମାଡ଼ିଡ୍ ଇଞ୍ଜ ମିଡ଼୍ ଇଚ୍ଛା ମାଡ଼ୁତିଡ଼୍, ମିଡ଼୍ ଅଡ଼୍‌‍ ସେଙ୍ଗେ ଆଦ୍ ଲେକାମ୍ ମାଡ଼ାଟ୍ ।

32 ମେଣ୍ଡେ, ବେନଡ଼୍ ମିକିଂଙ୍କ୍ ପ୍ରେମ୍ ମାଡ଼ିତଡ଼୍, ମିଡ଼୍ ଯଦି ମାତର୍ ଅଡ଼୍‌‍କିଂଙ୍କ୍ ପ୍ରେମ୍ ମାଡ଼କେ ମିଡ଼୍ କି ଅନୁଗ୍ରହ ପାଏମ୍‍ ଆଦ୍‍ତିଡ୍ ? ବାତେଙ୍କ୍ ଇତ୍କେ ପାପିଡ୍ ମିକା ନିଜେ ନିଜେ ପ୍ରେମ୍‍କାରୀନଡ଼କ୍ ପ୍ରେମ୍ ମାଡ଼ିତଡ଼୍ । 33 ମେଣ୍ଡେ, ବେଏନଡ୍ ମିକିଂଙ୍କ୍ ଲେକେତ୍ ମାଡ଼ିତଡ଼୍, ଯଦି ମିଡ଼୍ ମାତର୍‍ ଅଡ଼୍‌‍ୱାଦ୍ ଲେକେତ୍ ମାଡ଼ିତିଡ଼୍, ଆସୁଣ୍ଟ୍ ମିଡ଼୍ କି ଅନୁଗ୍ରହ ପାଏମ୍‍ ଆଦ୍‍ତିଡ୍ ? ବାତେଙ୍କ୍ ଇତ୍କେ ପାପିଡ୍ ମିକା ଆଲାମାଡ଼ୁତଡ୍ । 34 ମେଣ୍ଡେ, ବେନଡ଼ାଗା କନ୍‍ସ୍ ମିଡ଼୍ ଆଦାନ୍ ଆଶେ ମାନ୍‍ତେ, ମାତର୍ ଅଡ଼୍‌‍କିଂଙ୍କ୍ ଋଣ୍‍ ଇତ୍‍କେ ମିଡ଼୍ କି ଅନୁଗ୍ରହ ପାଏମ୍‍ ଆଦ୍‍ତିଡ଼୍ ? ପାପିଡ୍ ମିକା ସମାନ୍ କାମ୍‍ ମାଡ଼୍‍ତେ କାୟେତେ ଆଦାନ୍ ସେଙ୍ଗେ ପାପିନଡ଼କ୍ ଉଦାର୍ ହିଦ୍‍ତଡ଼୍ । 35 ମାତର୍ ମିଇ ଶତ୍ରୁନଡ଼୍‍କ୍ ପ୍ରେମ୍ ମାଡ଼ାଟ୍ ନୁ ଅଡ଼ାଦ୍‌ ଲେକେତ୍ ମାଡ଼ାଟ୍, ମେଣ୍ଡେ ପରିଶୋଦତେ ଆଶେ ୱାଟକଟ ଋଣ୍‍ ହିମୁଟ୍; ଆଲାତ୍କେ ମି ପୁରସ୍କାର୍ ବେଡ଼୍‍ୟାଦ୍‍ ଆଦ୍‍ତେ ନୁ ମିଡ଼୍ ସତ୍‍ଇଶ୍ୱର୍‍ ତେ ମାର୍‍ ଆଦ୍‍ତିଡ୍, ବାତେଙ୍କ୍ ଇତ୍କେ ବେନ ଦର୍‍କ୍‍ତା ପେର୍‍କେ ମିକା ଉପକାର୍ ପୁନଣ୍ଡ୍ ଆଦ୍ ରକମ୍ ନାରୁଡ଼୍ ନୁ ଦୁଷ୍ଟ ନାରୁଡ଼୍‍ତେ ସେଙ୍ଗେ ମିକା କୃପାବାନ୍ ଆଦ୍‍ତନ୍ । 36 ମି ବାବାଲ୍ ବେଦ୍ ରକମ୍ ଦୟାତନ୍, ମିଡ଼୍ ଆଦ୍ ପୁଟୁଙ୍କ୍ ଦୟାତନ୍ ଆୟ୍‍ମୁଟ୍ ।

37 "ମେଣ୍ଡେ, ବିଚାର୍ ମାଡ଼ମାଟ୍, ଆଲାତ୍କେ ଇଶ୍ୱର୍‌ ମିକିଂଙ୍କ୍ ବିଚାର୍ ମାଡ଼ଣ୍ଡ୍; ଦଷ୍ ହିମାଟ୍, ଆଲାତ୍କେ ଇଶ୍ୱର୍‌ ମିକିଂଙ୍କ୍ ଦଷି ମାଡ଼ଣ୍ଡ୍ । କ୍ଷମା ମାଡ଼ାଟ୍, ଆଲାତ୍କେ ଇଶ୍ୱର୍‌ ମିକିଂଙ୍କ୍ କ୍ଷମା ମାଡ଼ିତନ୍; 38 ଦାନ ମାଡ଼ାଟ୍, ଆଲାତ୍କେ ଇଶ୍ୱର୍ ମିକିଂଙ୍କ୍ ଦାନ ହିଦ୍‍ତଣ୍ଡ୍; ଅଣ୍ଡ୍‌ ବଡ୍‍ତିଙ୍କ୍ ସାରେ ମାଡ଼ି ତାଙ୍କ୍ ଆଦ୍‍ମି ମାୟିନା ମିକିଂଙ୍କ୍ ହିଦ୍‍ତଣ୍ଡ୍; ବାତେଙ୍କ୍ ଇତ୍କେ ବେନେ କଲ୍‍ସାନାଦିନ୍ ତଡ଼୍‌ କଲସିତିଡ୍, ଆଦ୍ କଲ୍‍ସାନାଦିନ୍ ତଡ଼୍‌ ଇଶ୍ୱର୍‌ ମିକିଂଙ୍କ୍ ମେଣ୍ଡେ କଲ୍‍ସି ହିଦ୍‍ତଣ୍ଡ୍ ।"

39 ✝ ୬:3୯ ମାତିଉ ୧୫:୧୪. ଅଣ୍ଡ୍‌ ଅଡ଼୍‌‍କିଂଙ୍କ୍ ୱେରନ୍ ୱେଷଡ଼୍ ମିକା କେତ୍ତଣ୍ଡ୍, "କାନାଲ୍ କି କାନାଙ୍କ୍ ହାର୍ ତଅତ୍‍ତେ ପାର୍‍ଦ୍‍ତଣ୍ଡ୍ ? ଯଦି ଅଣ୍ଡ୍‌ ଆଲାମାଡ଼ିତଣ୍ଡ୍ ଅଡ଼୍‌‍ କି ଇଡ଼୍‍ୱୁଡ଼୍‍ ଗୁଇନ୍ଦେ ତାଗ୍ ରାୟଡ୍ ?" 40 ✝୬:୪୦ ମାତିଉ ୧୦:୨୪,୨୫; ଯୋହନ୍‌ ୧3:୧୬; ୧୫:୨୦.ଗୁରୁ ତାଗାଙ୍କ୍‌ ଶିଷ୍ୟ ଯଗ୍ୟ ଆୟ୍‍ୟଣ୍ଡ୍; ବାତେଙ୍କ୍ ଇତ୍କେ ସାରେ ଶିଷ୍ୟ ଶିକ୍ଷା ଶେଷ୍ ମାଡ଼କେ ଗୁରୁନ୍‍ ଲେକାମ୍ ଆଦ୍‍ତନ୍ ।

41 ମେଣ୍ଡେ, ବାତେଙ୍କ୍ ନି ତାମୁଣ୍ଡ୍‌ ତେ କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ଉଡ଼ୁତି, ବାତେଙ୍କ୍ ଇତ୍କେ ନି ନିଜେ କଣ୍ଡେତାଗ୍ ବେନେ ଜିଟ୍‍କେ ମିନ୍ଦେ, ଆଦ୍ ହାଲ୍‍ସି ଉଡ଼୍‍ୱିନ୍ ? 42 ନିମେ ନିଜେ କଣ୍ଡେତାଗ୍ ମାନ୍ଦାନ୍ ଜିର୍‍କେତିଙ୍କ୍ ଉଡ଼କଟ ବେଲା ନିଜେ ତାମୁଣ୍ଡ୍‌ତିଙ୍କ୍ କେତ୍‍ତେ ପାର୍‍ଦ୍‍ତି, ତାମୁନ୍, ୱାଡେ, ନି କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ପେସ୍‍ପି ହିଦ୍‍ତାନ୍ ? ହୋ ଟେମ୍‌ପରି, ମୁନେନ୍ ନିଜେ କଣ୍ଡେତାଦ୍ ଜିଟ୍‍କେ ପେସ୍‍ପେ ପାର୍‍ୱନ୍, ତାନ୍ ପେର୍‍କେ ନିଜେ ତାମୁସ୍ ତେ କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ପେସ୍‍ପାନ୍ ସେଙ୍ଗେ ସହଜ୍‍ତେ ଉଡ଼େପାର୍‍ଦ୍‍ତି ।

43 "ସାଏତ୍ ମାଡ଼େତାଗ୍ କାରାପ୍ କାୟା ଆଦ କାରାପ୍ ମାଡ଼େତାଗ୍ ସାଏତ୍ କାୟା ଆଦ ।" 44 ✝୬:୪୪ ମାତିଉ ୧୨:33.ବାତେଙ୍କ୍ ଇତ୍କେ ସାରେ ମାଡ଼ାକ୍ ନିଜେ କାୟାନ୍ ତଡ଼୍ ପୁନ୍ଦାଙ୍କ୍ ଆଦ୍‍ତେ; କୟେ ମାଡ଼ାକିନାଗେ କଞ୍ଜ୍ ତ ନାରୁଡ଼୍ ତୋୟା କୟୋଡ୍, ବା କୟେ ଟଣ୍ଡେତ୍ କଞ୍ଜ୍ ଅଙ୍ଗୁର୍‌ କୟୋଡ୍ । 45 ✝୬:୪୫ ମାତିଉ ୧୨:3୪.ସାୟେତ୍ ନାରୁଡ଼୍ ତାନ୍ ହୃଦୟ୍ ଲେକେତ୍‍ ସାଏତ୍ ଗୁଦାମ୍‌ତେ କଞ୍ଜ୍ ସାଏତ୍ ଜିନିଷ୍ ପେସ୍‍ପିତଣ୍ଡ୍, ମେଣ୍ଡେ, କାରାପ୍ ନାରୁଡ଼୍ କାରାପ୍ ଗୁଦାମ୍‌ତେ କଞ୍ଜ୍ କାରାପ୍ ଜିନିଷ୍ ପେସ୍‍ପିତଣ୍ଡ୍; ବାତେଙ୍କ୍ ଇତ୍କେ ହୃଦୟ୍ ତେ ସାରେତେ କଞ୍ଜ୍ ପାୟୁର୍ ତିରିୟିତେ ।

46 ମେଣ୍ଡେ, "ମିଡ଼୍ ବାତେଙ୍କ୍ ନାକିଂଙ୍କ୍ ପ୍ରବୁ ଇଞ୍ଜ କେତୁତିଡ଼୍‍, ମାତର୍ ନାୱାଦ୍ ବାକ୍ୟ ପାଲନ୍ ମାଡ଼୍‍ୱିଡ଼୍ ? 47 ବେନ ନା ଗାର୍‍ରେ ୱାସ୍ ନାୱାଦ୍ ଗଟ୍ କେଞ୍ଜି ଆୱୁସାରେ ପାଲନ୍ ମାଡ଼ିତନ୍, ଅଣ୍ଡ୍‌ ବେନନ୍ ରକମ୍ ଆଦ୍‍ତନ୍, ଆଦ୍ ନାନ୍ ମିକିଂଙ୍କ୍ କେତିତାନ୍ । 48 ଅଣ୍ଡ୍‌ ଇଦ୍ ରକମ୍ ୱେର୍‍ଣ୍ଡ୍ ଲୋନ୍‌ ତିଆର୍ ମାଡ଼ାନ୍ ନାରୁଡ଼୍ ତେ ରକମ୍, ବେନ କୁଇଙ୍ଗ୍ ଡେୱି ଗନ୍ଦ କାଲ୍‍କିନ୍ ପରୁ ୱାଟ୍‍ତଣ୍ଡ୍; ମେଣ୍ଡେ, ବନ୍ୟା ଆତ୍‍କେ, ଏର୍‍ ଆଦ୍ ଲତ୍‍ତିଙ୍କ୍ ଗାଟି ଜର୍‍ଦେ ଦକ୍‍କା ରେହେତ୍‍ତେ, ବାତେଙ୍କ୍ ଇତ୍କେ ଆଦ୍ ହୁଉତାନଙ୍କ୍ ପାର୍‍ୱ, ବାତେଙ୍କ୍ ଇତ୍କେ ଆଦ୍ ସାଏ ଲେକାମ୍ ତିଆର୍ ମାଡ଼ିମାତ୍‍ତଡ଼୍ । 49 ବାତେଙ୍କ୍ ଇତ୍କେ ବେନ କେଞ୍ଜି ପାଲନ୍ ମାଡ଼ଣ୍ଡ୍, ଅଣ୍ଡ୍‌ ଗନ୍ଦ ୱାଟକଟ ମାଣ୍ଡୁଲ୍‍ତେ ପରୁ ଲୋନ୍‌ ମାଡ଼ାନ୍ ନାରୁଡ଼୍ ତେ ରକମ୍; ଏର୍‍ ଆଦ୍ ଲନ୍‍ତିଙ୍କ୍ ଗାଟି ଜର୍‍ତେ ଦକ୍‍କା ରେହେତ୍‍କେ, ସାଙ୍ଗେ ସାଙ୍ଗେ ଆଦ୍ ଉରୁଙ୍ଗିତେ ନୁ ଆଦିନାଦ୍ ଦଂସ ବୟଙ୍କାର୍ ଆତ୍‍ତେ ।"