1 ତାନ୍‌ପେର୍‌କେ ଲେବି ପିଲୁଡ଼୍‌ତାଗାଙ୍କ୍‌ ୱେରଣ୍ଡ୍‌ ନାରୁଣ୍ଡ୍‌ ଆସ୍‌ ଲେବି ପିଲୁଡ଼୍‌ତାଗାଙ୍କ୍‌ ଜନ୍ମ ଆତ୍‌ତେ ଅଣ୍ଡୟ ପିକ୍‌ତିଙ୍କ୍‌ ପେଣ୍ଡୁଲ୍‌ ଆତ୍‌ତଣ୍ଡ୍‌ । 2 ଆସୁଟ୍‌ ଆ ନାଟାଡ଼୍ ଡଙ୍କେତ୍ ଆସ୍‌ ଅଣ୍ଡୟ ମାରିଙ୍କ୍‌ ଜନ୍ମ ମାଡ଼୍‍ତେ, ମେଣ୍ଡେ, ମାରିଙ୍କ୍‌ ସାୟେ ସୁନ୍ଦର୍ ଉଡ଼ି ଆଦ୍‍ ଅକିଙ୍କି ମୁଣ୍ଡ୍‌ ନେଲ୍‌ଞ୍ଜ୍‌କ୍‌ ଆୟିନା ମିଞ୍ଜ୍‌ସ୍ପି ନେଃତେ । 3 ଆଦ୍‌ ମିଞ୍ଜ୍‌ସ୍ପି ନେଃତେ ପାର୍‌ୱକଟ୍‌ ଆଦ୍‌ ୱେରଡ଼୍‌ ତୁମ୍‌ ଲେକେତ୍‌ ପେଟେ ମାଡ଼ି ମାଣ୍ଡୁଲ୍‌ନିୟ୍‌ ନୁ ଦୁପାମ୍‌ ତମି ଆଗେ ଆ ପେଃକାଙ୍କ୍‌ ୱାଟି ନୀଲ ବେଡ଼େମ୍‌ ଆଞ୍ଚିନାଗ୍‌ ଲାଟି ପାପିରସ୍‌ତେ ଗାଡ଼୍‌ତାଗ୍‌ ନେଃତେ । 4 ମେଣ୍ଡେ ଅନାଦ୍‌ ବାତ୍‌ ଆଦ୍‌ତେ, ଆଦ୍‍ ଉଡ଼ାନ୍‍ ମାଇଦିଙ୍କ୍‌ ଅନ୍‌ ହେଲାଡ଼୍‌ ଜେକେ ନିସ୍‍ ମାତ୍‍ତେ । 5 ତାନ୍‌ପେର୍‌କେ ଫାରୋନ୍‍ ମାୟାଡ଼୍ ଏର୍‌ ମିଦାନ୍‍ ମାଇଦିଙ୍କ୍‌ ନୀଲ ବେଡ଼େମ୍‍ ତାଗ୍‍ ୱାତ୍‌ତେ, ଆଦିନ୍‌ ସାଙ୍ଗକିନ୍‌ତଡ଼୍‌ ବେଡ଼େମ୍‍ ଆଞ୍ଚିନାକ୍‌ ଉଡମାତ୍‌ତା । ଆସୁଟେ ଆଦ୍‌ ଲାଟି ଗାଡ଼୍‌ତାଗ୍‌ ୱେରଡ଼୍‌ ପେଟେତିଙ୍କ୍ ଉଡ଼ି ଆଦ୍‍ ତାତ୍‌ତାନ୍‌ ମାଇଦିଙ୍କ୍‌ ନିଜର୍‌ ଦାସିକିଙ୍କ୍‌ ରଃତେ । 6 ଆଦ୍‍ ପେଟେତିଙ୍କ୍‌ ଟେଣ୍ଡି ଆ ପେଃକାଙ୍କ୍‌ ଉଡ଼୍‌ତେ; ମେଣ୍ଡେ ଉଡ଼ାଟ୍‍, ଆ ପେକାଲ୍‌ କେୟୁତଣ୍ଡ୍‌; ଆସୁଟ୍‌ ଆଦ୍‍ ଦୟାମାଡ଼ି କେତ୍‌ତେ "ଇଣ୍ଡ୍‌ତ ଅର୍ତୁଣ୍ଡ୍‌ ଏବ୍ରିୟ ପେକାଲ୍‍ ।" 7 ଆସୁଟ୍‌ ଆଦିନ୍‌ ଏଲାଡ଼୍ ଫାରୋନ୍‍ ମାୟାଡ଼୍‌ତିଙ୍କ୍‌ କେତ୍‍ତେ ନାନ୍‍ ଆଞ୍ଜ୍‌ ନି ମାଇଦିଙ୍କ୍‌ ଇ ମାରିଙ୍କ୍‌ ପାଲ୍‍ଉସ୍ପାନ୍‍ ମାଇଦିଙ୍କ୍‌ ଏବ୍ରିୟ ନାଟାନାଗାଙ୍କ୍‌ ୱେରଡ଼୍‌ ୟାୟଙ୍କ୍‍ କାର୍ଙ୍ଗି ତାତ୍‌ତେ । 8 ଆସୁଟ୍‌ ଫାରୋନ୍‍ ମାୟାଡ଼୍ କେତ୍‍ତେ, "ଆନ୍‌," ଆସୁଟ୍‌ ଆଦ୍‌ ପିକିଡ଼୍ ଆଞ୍ଜ୍‌ ଆ ପେକଡ଼୍ ୟାୟଙ୍କ୍‍ କାର୍ଙ୍ଗିତାତ୍‍ତେ । 9 ଆସୁଟ୍‌ ଫାରୋନ୍‍ ମାୟାଡ଼୍ ତାକିଙ୍କ୍‌ କେତ୍‍ତେ, "ନିମେ ଇ ପେଃକାଙ୍କ୍‌ ଅସ୍‍ ନା ମାଇଦିଙ୍କ୍‌ ପାଲ୍‍ଉସ୍ପା; ନାନେ ନିକିଙ୍କ୍‌ ଡାବ୍‌ ଇଦ୍‍ତାନ୍‍," ଆସୁଟ୍‌ ଆଦ୍‌ ନାଟାଡ଼୍ ଆ ପେକାଙ୍କ୍‌ ପାଲ୍‍ ଉସ୍ପ୍‌ତେ । 10 ଆସୁଙ୍କ୍‌ ପେକାଲ୍‍ ପେର୍ସି ୱାତ୍‌ତେ ୱେଲେ, ଆଦ୍‌ ଅଙ୍କ୍‌ ଅସ୍ ଫାରୋନ୍‍ ମାୟାଡ଼୍‍ତିଙ୍କ୍‌ ଇତ୍‍ତେ। ଆସୁଙ୍କ୍‌ ପେକାଲ୍‍ ତାନ୍‍ ମାର୍ର ଆତ୍‌ତଣ୍ଡ୍‌ । ଆଦିଙ୍କ୍‌ ଅନ୍ ପେଦେର୍‌ ମୋଶାଲ୍‌ ଇତ୍‍ତେ । ବାତେଙ୍କ୍‌ଇତ୍କେ ଆଦ୍‍ କେତ୍‍ତେ ନାନେ ଏର୍‌ ତାଗାଙ୍କ୍‌ ଅଙ୍କ୍‌ ଦରସ୍କ୍‍ତାନ୍‍ ।

11 ମୋଶାଲ୍‌ ବାଡ଼ିୟଣ୍ଡ୍‌ ଆତ୍‌ତେ ୱେଲେ ଅଣ୍ଡ୍‌ଦିନେ ଅଣ୍ଡ୍‌ ନିଜର୍‌ ଦାଦାଲଡ଼୍ ଗାରେ ଆଞ୍ଜ ଅଡ଼୍‍କିଙ୍କି ବଜ୍‍ କାଞ୍ଜାନାଦ୍‍ ଉଡ଼ୁତଣ୍ଡ୍‌; ମେଣ୍ଡେ ୱେରଣ୍ଡ୍‌ ମିସ୍ରିୟ ଦାଦାଲଡ଼୍‍ ଲୋପେଙ୍କ୍‌ ୱେରଣ୍ଡ୍ ଏବ୍ରିୟଙ୍କ୍‌ ରେଃତାନାଦ୍‍ ଉଡ଼୍‍ତଣ୍ଡ୍‌ । 12 ଆସୁଟ୍‌ ମୋଶାଲ୍ ଇକ୍ଆକ୍‍ ଉଡ଼୍‍କଟ ଅକିଙ୍କ୍‌ ଉଡ଼ି ଆ ମିସ୍ରିୟଙ୍କ୍‍ ଆୱୁକି ଉସ୍କ୍‍କତାଗ୍‍ ମିଚ୍‌ସିତ୍‍ତଡ଼୍ । 13 ଅଣ୍ଡ୍‌ ମେଣ୍ଡନ୍‌ ଦିନେ ଅଣ୍ଡ୍‌ ବାଇଦେ ଆଞ୍ଜ୍‌ ଇର୍‌ୱୁଡ଼ୁ ଏବ୍ରିୟଡ଼୍ ରାମ୍‌କ୍‌ ଆଦାନାଦ୍‌ ଉଡ଼ି ଦୋଷି ନାରୁଙ୍କ୍‌ କେତ୍‍ତଣ୍ଡ୍‌ ନିମେ ବାତାଙ୍କ୍‍ ନିଜର୍‌ ଦାଦାଙ୍କ୍‍ ରେଃତୁତିନ୍‌ ?

14 ଆସୁଟ୍‌ ଅଣ୍ଡ୍‌ କେତ୍‌ତଣ୍ଡ୍‌, ବେନ ନିକିଙ୍କ୍‌ ମା ପର ରାଜାଲ୍‌ ନୁ ବିଚାକର୍ତ୍ତା ମାଡ଼ି ଏଞ୍ଚି ମିନ୍ଦେଣ୍ଡ୍‌ ? ମିଡ଼୍‌ ବେଲାନ୍‌ ଆ ମିସ୍ରିୟ ନାରୁଙ୍କ୍‌ ଆୱୁକ୍‌ତିନ୍‌, ଆଦ୍‌ଲେକାମ୍‌ କି ନାକିଙ୍କ୍‌ ଆୱୁକାନଙ୍କ୍‌ ଆଲ୍‌ସୁତି ? ଆସୁଟ୍‌ ମୋଶାଲ୍‌ ୱେର୍‌ସ୍‌ କେତ୍‍ତଣ୍ଡ୍‌ ଇଦ୍‌ ଗଟ୍‍ ସାରେତଡ଼୍ ପୁଃତ୍‍ତଡ଼୍ । 15 ଅନନ୍ତର ଫାରୋ ଇଦ୍‌ ଗଟ୍‍କେଞ୍ଜି ମୋଶାଙ୍କ୍‌ ଆୱୁକାନଙ୍କ୍‍ ଚେଷ୍ଟା ମାଡ଼ିତଡ଼୍‌ । ମାତର୍‌ ମୋଶାଲ୍‌ ଫାରୋନ୍‍ ମୁନେକଞ୍ଜ୍‌ ମିରି ମିଦୀୟନ୍‌ ଦେଶ୍‌ତାଗ୍‍ ମାନ୍ଦାନଙ୍କ୍‌ ଆଞ୍ଜ୍‌ ୱେରଡ଼୍‌ ନୂଇ ଗାରେ କୁଦୁତଣ୍ଡ୍‌ । 16 ମିଦୀୟନିୟ ଯାଜକତେ ମାୟାସ୍କ୍ ସାତ୍‍ଟାନ୍‍ ମାତ୍‍ତା; ଆୱ୍‌ ଆଗେୱାସ୍‍ ତାମ୍‍ ବାବାନ୍‍ ମେକାମେଇତାନଡ଼୍‌ ଏର୍‌ ଉସ୍ପାନ୍‍ ମାଇଦିଙ୍କ୍‍ ଏର୍‌ ତରି କୁଣ୍ଡେନିୟ୍‌ତା । 17 ଆସୁଟ୍‌ ମେକାମାନ୍ଦେ ମେୟିତାନଡ଼୍‌ ୱାସ୍ ଆୱିଙ୍କ୍‌ ତଲାନଙ୍କ୍‌ ପସ୍ପ୍‌ତା, ମାତର୍‌ ମୋଶାଲ୍‌ ତେଦି ଆୱିଙ୍କ୍‌ ଉଦ୍ଦାର୍‌ ମାଡ଼ି ଆୱିନ୍‍ ମେକାମାନ୍ଦେତିଙ୍କ୍‌ ଏର୍‌ ଉସ୍ପ୍‌ତଣ୍ଡ୍‌ । 18 ଅନନ୍ତର ଅଡ଼୍‌ ତାମ୍‌ ବାବାଲ୍‌ ରୁୟେଲ୍‍ ଗାରେ ଆନ୍‌ନାଙ୍କ୍‌, ଅଣ୍ଡ୍‌ ଆୱିଙ୍କ୍‌ ପାଚ୍‌ରିଞ୍ଜ୍‌ତଣ୍ଡ୍‌, "ନେଣ୍ଡ୍‌ ମିଡ଼୍‌ ବେଲାନ୍‌ ନେଣ୍ଡ୍‌ ଜାପେ ୱାତ୍‌ତିଡ଼୍ ?"

19 ଆସୁଟ୍‌ ଅଡ଼୍‌ କେତ୍‍ତଡ଼୍‌ ୱେରଣ୍ଡ୍‌ ମିସ୍ରିୟ ନାରୁଣ୍ଡ୍‌ ମେକାମେଇତାନଡ଼୍‌ କାଇଦାଗାଙ୍କ୍‌ ମାକିଙ୍କ୍‌ ଉଦ୍ଧାର୍‌ ମାଡ଼୍‌ତେ, ମେଣ୍ଡେ, ମା ମାଇଦିଙ୍କ୍‌ ଏର୍‌ ଲାଗି ମେକାକିଙ୍କ୍‌ ଏର୍‌ ଉସ୍ପ୍‌ତଣ୍ଡ୍‌ ।

20 ଆଲେକେ ଅଣ୍ଡ୍‌ ନିଜର୍‌ ମାୟାସ୍କିଙ୍କ୍‌ କେତ୍‍ତଣ୍ଡ୍‌, "ଅଣ୍ଡ୍‌ ବେଗେ ? ମିଡ଼୍‍ ବାତ୍‌ତିଙ୍କ୍‌ ଅକିଙ୍କ୍‍ ୱିଡ଼୍‌ସିୱାତ୍‌ତିଡ଼୍‌ ? ଅଙ୍କ୍ କାର୍ଙ୍ଗାଟ୍‌; ଅଣ୍ଡ୍‌ ମାନ୍‍ତଡ଼୍ ତିନ୍‍ତଣ୍ଡ୍‌ ।"

21 ତାନ୍‌ପେର୍କେ ମୋଶାଲ୍‌ ଆ ନାରୁଣ୍ଡ୍‌ତଡ଼୍ ମାନ୍ଦାନଙ୍କ୍‍ ଇଚ୍ଛା ମାଡ଼୍‌ତଣ୍ଡ୍‌; ମେଣ୍ଡେ, ଅଣ୍ଡ୍‌ ମୋଶାନ୍‍ତଡ଼୍ ନିଜର୍‌ ମାୟାଡ଼୍ ସିପ୍‍ପୋରାଙ୍କ୍‌ ପେଣ୍ଡୁଲ୍‌ ଇତ୍‍ତଣ୍ଡ୍‌ । 22 ଆସୁଟ୍‌ ଆଦ୍‌ ନାଟାଡ଼୍ ମାର୍‌ ଜନ୍ମ ମାଡ଼ ୱାନାକେ ମୋଶାଲ୍‌ ଅନ୍‍ ପେଦେର୍‌ ଗେର୍ଶୋମ୍‍ ଇତ୍‍ତଣ୍ଡ୍‌; ବାତେଙ୍କ୍‌ଇତ୍କେ ଅଣ୍ଡ୍‌ କେତ୍‍ତଣ୍ଡ୍‌, ନାନେ ଇ ବିଦେଶ୍‌ତାଗ୍‌ ପ୍ରବାସି ଆସ୍‍ ମିନ୍ଦେନ୍‍ । 23 ନାର୍ଗେ ୱାଡ଼୍‌ସେତେ ପେର୍କେ ମିସ୍ରିୟ ରାଜାଲ୍‌ ଡଲ୍‌ତଣ୍ଡ୍‌ ମେଣ୍ଡେ, ଇସ୍ରାଏଲତେ ପିଲାକି ଦାସନ୍‌ ପାଡ଼ିୟି ସେଙ୍ଗେ କେୟାନଙ୍କ୍‍ ପସ୍ପ୍‍ତଡ଼୍ ନୁ ଦାସ ପାଡ଼ିୟିଦେ ମାଇଦିଙ୍କ୍‌ ଅଡ଼ାଦ୍‍ କେୟାନାଦ୍‍ ପରମେଶ୍ୱର୍‌ ମୁନେ ଏୱୁତେ । 24 ଆସୁଟ୍‌ ପରମେଶ୍ୱର ଅଡ଼୍‌ କେୟାନାଦ୍‍ କେଞ୍ଚ୍‍ତଣ୍ଡ୍‌, ମେଣ୍ଡେ ଅବ୍ରାହାମ୍‌ ନୁ ଇସ୍‍ହାକ୍‍ ନୁ ଯାକୁବ୍‌ତଡ଼୍ ନିଜର ନିୟମ୍‌ତିଙ୍କ୍‌ ଏର୍କେ ମାଡ଼ି । 25 ପରମେଶ୍ୱର ଇସ୍ରାଏଲତେ ନାରୁଡ଼୍‌ ପରୁ କଣ୍ଡେ ୱାଟ୍‌ତଣ୍ଡ୍‌ ନୁ ଅଡ଼୍ ଦୁଃକାମ୍‌ ପୁତ୍‍ତଣ୍ଡ୍‌ ।