1 ତାନ୍‌ପେର୍କେ ନାରୁଡ଼୍‌ ମୋଶାନ୍‌ ପର ସଦାପ୍ରବୁନ୍‌ ଗଟ୍‌ ଲେକାମ୍‌ ନିଲ, ଉମେ, ଏର୍ରେ କଲର୍‌ ନୁଲ୍‌ତଡ଼୍‌ ପବିତ୍ର ପଡ଼୍‌ୟେତ୍‌ ସେବା ମାଡ଼ାନ୍‌ ମାଇଦିଙ୍କ୍‌ ସାୟେତ୍‌ ଚିଲେ ତିଆର୍‌ ମାଡ଼୍‌ତଡ଼୍‌, ମେଣ୍ଡେ ହାରୋଣତେ ମାଇଦିଙ୍କ୍‌ ପବିତ୍ର ଚିଲେ ତିଆର୍‌ ମାଡ଼୍‌ତଡ଼୍‌।

2 ମେଣ୍ଡେ ଆ ସୁନା ତଡ଼୍‌ ନୁ ନିଲ ଉମେ, ଏର୍ରେ ରଙ୍ଗ୍‌ ନୁ ନଟ୍‌ତେ ପାଣ୍ଡ୍ରିଲାଦ୍‌ ଚୁଦୁଲାଦ୍‌ ନୁଲ୍‌ ତଡ଼୍‌ ଏଫୋଦ ଚିଲେ ତିଆର୍‌ ମାଡ଼୍‌ତଡ଼୍‌। 3 ଇତ୍କେ, ଅଡ଼୍‌ ନୁଲ୍‌ ଲେସ୍‌ ପାଲ୍‌ସେଆକ୍‌ ମାଡ଼୍‌ ଶିଳ୍ପ ପାଡ଼୍‌ୟି ତଡ଼୍‌ ନିଲ, ଉମେ, ଏର୍ରେ ରଙ୍ଗ୍‌ ନୁ ପାଣ୍ଡ୍ରିଲାଦ୍‌ ଚୁଦୁଲାଦ୍‌ ନୁଲ୍‌ ଆଗାକନ୍‌ ୱିତାନ୍‌ ମାଇଦିଙ୍କ୍‌ ଆଦ୍‌ କୟିସ୍‌ ପାଲ୍‌ସେ ସରୁ ମାଡ଼୍‌ତଡ଼୍‌। 4 ଅଡ଼୍‌ ନିଜେ ନିଜେ କାଇଲି ରେଣ୍ଡ୍‌ ଆଟ୍‌ତାଦ୍‌ କୁସ୍ପି; ଆଗେତ୍‌ ରେଣ୍ଡ୍‌ ତାଲାନାଗ୍‌ ନିଜେ ନିଜେତିଙ୍କ୍‌ ଯଡ଼୍‌ସ୍ପିତଡ଼୍‌। 5 ମୋଶାନ୍‌ ପର ସଦାପ୍ରବୁନ୍‌ ଆଜ୍ଞାଲେକାମ୍‌ ଏଫୋଦତେ ପେଦେର୍‌ତେ ବେନ୍‌ ଚିତ୍ରା କାବ୍‌ରା ପଟୁକା ଆଗେତ୍‌ ଦୁଙ୍କା ମାତ୍‌ତେ, ଆଦ୍‌ ଗାଲା ଆ ପାଡ଼୍‌ୟି ଲେକାମ୍‌ ଲେକ୍‌ତାଦିନ୍‌ ତଡ଼୍‌ ନିଲ, ଉମେ, ଏର୍ରେ ରଙ୍ଗ୍‌ ନୁ ନଟ୍‌ତେ ପାଣ୍ଡ୍ରି ଚୁଦୁଲାଦ୍‌ ନୁଲ୍‌ ତଡ଼୍‌ ତିଆର୍‌ ଆତ୍‌ତେ। 6 ମେଣ୍ଡେ ଅଡ଼୍‌ ଇସ୍ରାଏଲତେ ମାର୍‌କିଡ଼୍‌ ପେଦେର୍‌ ଲେକାମ୍‌ ଡ଼େୱୁତେ ପାୟିସାନ୍ ନ୍ୟାୟ୍‌ ଡ଼େୱୁତେ ନୁ ସୁନା ଦାରାତେ ଟୁଞ୍ଜ୍‌ପ୍‌ତେ ରେଣ୍ଡେ ଗୋମେଦକ ମଣି ତିଆର୍‌ ମାଡ଼୍‌ତଡ଼୍‌। 7 ମେଣ୍ଡେ ଆ ସଦାପ୍ରବୁନ୍‌ ଆଜ୍ଞାଲେକାମ୍‌ ଏଫୋଦର୍‌ ରେଣ୍ଡେ ଆଟେତ୍‌ ପର ଇସ୍ରାଏଲ୍‌ ମାର୍‌କିଡ଼୍‌ ଏର୍ରକେ ମାଡ଼ାନ୍‌ ମଣି ଇନା ଆୱୁ କୁସ୍‌ପ୍‌ତଡ଼୍‌।

8 ତାନ୍‌ପେର୍କେ ଆ ଏଫୋଦର୍‌ତେ ପାଡ଼୍‌ୟି ନ୍ୟାୟ୍‌ ସୁନା ତଡ଼୍‌ ନୁ ନିଲ, ଉମେ, ଏର୍ରେ କଲର୍‌ ନୁ ବଲା ପାଣ୍ଡ୍ରିଲାଦ୍‌ ଚୁଦୁଲାଦ୍‌ ନୁଲ୍‌ ତଡ଼୍‌ ତିଆର ମାଡ଼ାଙ୍କ୍‌ ପୁତ୍‌ତେନଡ଼୍‌ ମିସ୍ତ୍ରି ପାଡ଼୍‌ୟିଦେ ଗୁଣ୍ଡେତାଗ୍‌ ଚିଲେ ତିଆର୍‌ ମାଡ଼୍‌ତଡ଼୍‌। 9 ଆୱୁ ନାଲୁ ମୁଲା ମାତ୍‌ତା, ଅର୍ଥାତ୍‌, ଅଡ଼୍‌ ଆ ଗୁଣ୍ଡେବାଲା ଉଃସ୍‌ ମାଡ଼୍‌ ଅଣ୍ଡୟ୍‌ ଇଞ୍ଚ୍‌ ଲାଟି ନୁ ଅଣ୍ଡୟ୍‌ ଇଞ୍ଚ୍‌ ଓସାର୍‌ ମାଡ଼୍‌ତଡ଼୍‌। 10 ମେଣ୍ଡେ, ଆୱୁ ନାଲୁ ଦାଢି ନାର୍ଗେ ଦାମ୍‌ଦେ ମଣି ଟୁଞ୍ଜ୍‌ପ୍‌ତଡ଼୍‌; ଆଗେତ୍‌ ପ୍ରତମ୍‌ ଲାଇନ୍‌ତେ ଚୁଣି, ପିତମଣି ନୁ ମରକତ, 11 ଦ୍ୱିତିୟ୍‌ ଲାଇନ୍‌ତେ ପଦ୍ମରାଗ ନୁ ନିଲକାନ୍ତ ନୁ ହିରକ, 12 ତୃତିୟ ଲାଇନ୍‌ତେ ପେରୋଜ ନୁ ଇନ୍ଦ୍ରନିଳମଣି ଯିସ୍ମ ନୁ କଟାହେଲା, 13 ମେଣ୍ଡେ ନାଲୁ ଲାଇନ୍‌ତେ ବୈଦୁର୍ଯ୍ୟ ନୁ ଗୋମେଦକ ନୁ ପଡ଼ଦ୍‌ଇନା ତିର୍ମ୍‌ତେ ମଣି ମାତ୍‌ତା; ଇସାରେ ମଣି ସନ୍‌ଦେ ଦାଗ୍‌ତେ କୁସ୍‌ପ୍‌ତଡ଼୍‌। 14 ମେଣ୍ଡେ ଇସ୍ରାଏଲତେ ମାର୍‌କିଡ଼୍‌ ପେଦେର୍‌ ଲେକ୍‌ତେ ଇ ସାରେ ମଣି ଅଡ଼୍‌ ପେଦେର୍‌ ଲେକାମ୍‌ ବାରଟାନ୍‌ ଆତ୍‌ତା ନୁ ପାୟିସାନ୍ ନ୍ୟାୟ୍‌ ଅଣ୍ଡୟ୍‌ ଅଣ୍ଡୟ୍‌ ମଣିତେ ବାରଟାନ୍‌ ପିଲୁଡ଼୍‌ତେ ଅଣ୍ଡୟ୍‌ ଅଣ୍ଡୟ୍‌ ପେଦେର୍‌ ମାତ୍‌ତା। 15 ଆଦିନ୍‌ ମାଇଦିଙ୍କ୍‌ ଅଡ଼୍‌ ଗୁଣ୍ଡେ ବାଲାନେ ନିର୍ମଲ୍‌ ସୁନା ତଡ଼୍‌ ନେଡ଼େମ୍‌ ଇନା ମାଡ଼୍‌ପି ଇକ୍‌ଲେମ୍‌ ତିଆର୍‌ ମାଡ଼୍‌ତଡ଼୍‌। 16 ରେଣ୍ଡେ ସୁନା ନୁ ରେଣ୍ଡେ ମୁଦା ତିଆର୍‌ ମାଡ଼୍‌ ଗୁଣ୍ଡେବାଲାନେ ରେଣ୍ଡେ ଆଞ୍ଚିନା ଆ ରେଣ୍ଡେ ଇକ୍‌ଲେକ୍‌ ଉରୁସ୍କ୍‌ତଡ଼୍‌। 17 ମେଣ୍ଡେ ଗୁଣ୍ଡେବାଲାନ୍‌ ଆଞ୍ଚିନା ରେଣ୍ଡେ ଇକ୍‌ଲେକିନାଗ୍‌ ଆ ରେଣ୍ଡେ ମାଡ଼୍‌ତେ ସୁନାତେ ଇକ୍‌ଲେମ୍‌ ୱାଟ୍‌ତଡ଼୍‌। 18 ମେଣ୍ଡେ ମାଡ଼୍‌ତେ ଇକ୍‌ଲେମ୍‌ତେ ରେଣ୍ଡେ ତାଲାନ୍‌ ରେଣ୍ଡେ ପାକା ବନ୍ଦ ମାଡ଼୍‌ ଏଫୋଦ ଚିଲେତ୍‌ ମୁନେ ରେଣ୍ଡେ ଆଟେତ୍‌ ପର ନେଃତଡ଼୍‌। 19 ମେଣ୍ଡେ, ଅଡ଼୍‌ ରେଣ୍ଡେ ସୁନାମୁଦା ତିଆର୍‌ ମାଡ଼ି ଗୁଣ୍ଡେବାଲାନେ ରେଣ୍ଡେ ଆଞ୍ଚିନା ଏଫୋଦରତ୍‌ ମୁନେ ଲପେତ୍‌ତେ ପାକେ ନେଃତ୍‌ତଡ଼୍‌। 20 ଅଡ଼୍‌ ମେଣ୍ଡେ ରେଣ୍ଡେ ସୁନାମୁଦା ମାଡ଼୍‌ ଏଫୋଦର୍‌ ରେଣ୍ଡେ ଆଟେତ୍‌ ମଦଲ୍‌ ଆ ମୁନେ ବାଗ୍‌ତେ ଯୋଡ଼ ପଡ଼ିୟେତ୍‌ ଏଫୋଦର୍‌ ଚିତ୍ରା କାବ୍‌ରା ପଟୁକାତ୍‌ ପର ଆଦ୍‌ ନେଃତ୍‌ଡ଼୍‌। 21 ମେଣ୍ଡେ ବୁକୁପଟା ବେଲାନ୍‌ ଏଫୋଦରତେ ଚିତ୍ରା କାବ୍‌ରା ପଟୁକା ପର ମାଞ୍ଜ୍‌ ଏଫୋଦରକ୍‌ନ ପିସ୍‌କ୍‌ଆସ୍‌ ବେଲା ରାୟି, ଆଦିନ୍‌ମାଇଦିଙ୍କ୍‌ ଅଡ଼୍‌ ବୁକୁପଟାତିଙ୍କ୍‌ ନିଜେତ୍‌ ଇକ୍‌ଲେତେ ନିଲ ନୁଲ୍‌ଦେ ଏଫୋଦରତେ ଇକ୍‌ଲେ ତଡ଼୍‌ ବନ୍ଦ ମାଡ଼୍‌ ନେଃତ୍‌ଡ଼୍‌; ମୋଶାନ୍‌ ପର ସଦାପ୍ରବୁନ୍‌ ଆଜ୍ଞାନୁସାର୍‌ତେ ଇଦି ମାଡ଼୍‌ତଡ଼୍‌।

22 ଲପେକନ୍‌ ମୋଶାନ୍‌ ପର ସଦାପ୍ରବୁନ୍‌ ଆଜ୍ଞାନୁସାର୍‌ତେ ଆ ୱିତାନ୍‌ ପାଡ଼୍‌ୟିଦେ ଏଫୋଦର୍‌ ଲାଟିଚକା ସାରେ ନିଲ ରଙ୍ଗ୍‌ ମାଡ଼୍‌ତଡ଼୍‌। 23 ଆ ଲାଟିଚକା ନାଡ଼୍‌ମେତେ ଏଡ଼୍‌ ଶକ୍ତି ବଣ୍ଡ୍‌କେତ୍‌ ନ୍ୟାୟ ଚିହ୍ନା ମାତ୍‌ତେ; ଆଦ୍‌ ବେଲା ଇଙ୍ଗିଆନ୍‌ମାକି, ଇଦିନ୍‌ମାଇଦିଙ୍କ୍‌ ଆ ଗୁଡ଼୍‌ଙ୍ଗେତ୍‌ ସାରେପାକେ ୱିତାନାଦ୍‌ ପାଡ଼୍‌ୟି ମାତ୍‌ତେ। 24 ମେଣ୍ଡେ ଅଡ଼୍‌ ଲାଟିଚକା ନାଡ଼୍‌ମେ ଶକ୍ତି ନିଲ, ଉମେ, ସିନ୍ଦୁର୍‌ କଲର୍‌ ବଲା ନୁଲ୍‌ଦେ ଡାଲିମ୍ୱ ତିଆର୍‌ ମାଡ଼୍‌ତଡ଼୍‌। 25 ମେଣ୍ଡେ ଅଡ଼୍‌ ଡାଲିମ୍ୱ ଏଡ଼୍‌ ନିର୍ମଲ୍‌ ନୁଲ୍‌ତଡ଼୍‌ ଗାଣ୍ଟେ ମାଡ଼ାନ୍‌ ଲାଟିଚକା ଅଞ୍ଚଲ୍‌ତେ ସାରେପାକା ଡ଼ାଲିମ୍ୱତେ ନାଡ଼୍‌ମା ନାଡ଼୍‌ମା ନେଃତଡ଼୍‌; 26 ଇତ୍କେ, ସେବା ମାଡ଼ାନ୍‌ ସେଙ୍ଗେ ଲାଟି ଚକା ଅଞ୍ଚଲ୍‌ତେ ସାରେପାକା ଅଣ୍ଡୟ୍‌ ଗାଣ୍ଟେତାଗାଙ୍କ୍‌ ଅଣ୍ଡୟ୍‌ ଡାଲିମ୍ୱ ନୁ ଅଣ୍ଡୟ୍‌ ଗଣ୍ଟେତାଗାଙ୍କ୍‌ ଅଣ୍ଡୟ୍‌ ଡାଲିମ୍ୱ, ଇଲାନେ ମାଡ଼୍‌ତଡ଼୍‌। 27 ତାନ୍‌ପେର୍‌କେ ମୋଶାନ୍‌ ପର ସଦାପ୍ରବୁନ୍‌ ଆଜ୍ଞାନୁସାର୍‌ତେ ଅଡ଼୍‌ ହାରୋଣ ନୁ ତାନ୍‌ ମାର୍‌କିଡ଼୍‌ ମାଇଦିଙ୍କ୍‌ ପାଣ୍ଡ୍ରିଲାଦ୍‌ ଚୁଦୁଲାଦ୍‌ ନୁଲ୍‌ ତଡ଼୍‌ ତିଆର୍‌ ଆତ୍‌ତେ ଚକା 28 ନୁ ପାଣ୍ଡ୍ରିଲାଦ୍‌ ଚୁଦୁଲାଦ୍‌ ନୁଲ୍‌ ତିଆର୍‌ ଆତ୍‌ତେ ତାଲ୍‌ଗୁଡ଼୍‌ ନୁ ପାଣ୍ଡ୍ରିଲାଦ୍‌ ଚୁଦୁଲାଦ୍‌ ନୁଲ୍‌ତେ ତିଆର୍‌ ଆତ୍‌ତେ ଅଢ଼ଣି ନୁ ନଟ୍‌ତେ ପାଣ୍ଡ୍ରିଲାଦ୍‌ ଚୁଦୁଲାଦ୍‌ ନୁଲ୍‌ ତିଆର୍‌ତେ ସେଡ଼ି ତିଆର୍‌ ମାଡ଼୍‌ତଡ଼୍‌। 29 ମେଣ୍ଡେ ନଟ୍‌ତେ ପାଣ୍ଡ୍ରିଲାଦ୍‌ ଚୁଦୁଲାଦ୍‌ ନିଲ ନୁ ଉମେ ନୁ ଏର୍ରେ କଲର୍‌ ନୁଲ୍‌ ଆଲାନ୍‌ ପାଡ଼୍‌ୟି ଅଣ୍ଡୟ୍‌ ଟିକିଡ଼୍‌ତାଗ ତଃତାନାଦ୍‌ ତିଆର୍‌ ମାଡ଼୍‌ତଡ଼୍‌। 30 ତାନ୍‌ପେର୍କେ ମୋଶାନ୍ ପର ସଦାପ୍ରବୁନ୍‌ ଆଜ୍ଞାନୁସାର୍‌ତେ ଅଡ଼୍‌ ନିର୍ମଲ୍‌ ସନ୍‌ତେ ପବିତ୍ର ତାଲେତ୍ ସଜ୍‌ ଆକ୍‌ ତିଆର୍‌ ମାଡ଼ି ଡ଼େୱୁତେ ପାୟିସାନ୍ ନ୍ୟାୟ୍‌ ଚିଲ୍‌ ଆ ପର " ସଦାପ୍ରବୁନ୍‌ ମାଇଦିଙ୍କ୍‌ ପବିତ୍ର" ଇଦି ଲେକ୍‌ତଡ଼୍‌। 31 ମେଣ୍ଡେ ପରୁତେ ପାଗ ପରୁ ନେଃତାନ୍‌ ମାଇଦିଙ୍କ୍‌ ଆଦ୍‌ ନିଲ ନୁଲ୍‌ତେ ତଃତ୍‌ତଡ଼୍‌।

32 ଇଦ୍‌ ଲେକାମ୍‌ ଗୁଡ଼ାନ୍‌ ଗୁଡ଼ୁସେତାଗ୍‌ ଲତ୍‌ତେ ସାରେ ପାଡ଼୍‌ୟି ପୂରା ଆତ୍‌ତେ; ଇସ୍ରାଏଲତେ ମାର୍‌କିଡ଼୍‌ ଆଦ୍‌ ମାଡ଼୍‌ତଡ଼୍‌, ମୋଶାନ୍‌ ପର ସଦାପ୍ରବୁନ୍‌ ଆଜ୍ଞାନୁସାର୍‌ତେ ଅଡ଼୍‌ ସାରେ ପାଡ଼୍‌ୟି ମାଡ଼୍‌ତଡ଼୍‌। 33 ଇଦ୍‌ଲେକାମ୍‌ ଅଡ଼୍‌ ମୋଶାନ୍‌ ଗାରେ ଆ ଲନ୍‌ ତାତ୍‌ତଡ଼୍‌, ଇତ୍କେ, ଗୁଡ଼ୁସା, ଆଗେତ୍‌ ସାରେ ଜିନିଷ, ଗୁଣ୍ଡୁ, ପଟା, ଗୁଞ୍ଜେ, ମେଣ୍ଡେ ଗୁଞ୍ଜେ ନୁ ଟେଙ୍ଗା; 34 ମେଣ୍ଡେ ନେତୁରୁ ରଙ୍ଗ ଆତ୍‌ତେ ମେଣ୍ଢାତଲ୍‌କେ ତିଆର୍‌ତେ ଛାତ ନୁ ପିଲେତ୍‌ ତଲ୍‌କେତେ ତିଆର୍‌ ଛାତ ନୁ ମୁସାନ୍‌ଚିଲେ ଲିକ୍‌ତେଚିଲେ; 35 ନିୟମ୍‌ତେ ସିନ୍ଦୁକ୍‌ ନୁ ଆଗେତ୍‌ ଟେଙ୍ଗା ନୁ ପାପ୍‌ ନର୍‌ଦାନାଦ୍‌ 36 ସାମ୍‌ଡ଼େତ୍‌, ଆଗେତ୍‌ ସାରେ ଜିନିଷ ନୁ ତଃନ୍ଦମାନ୍ଦାନ୍‌ ରୋଟି, 37 ନିର୍ମଲ୍‌ ୱେସ୍‌ମାଡ଼୍‌, ଆଗେତ୍‌ ୱେସ୍, ଇତ୍କେ, ୱେସ୍ଇନା ନୁ ଆଗେତ୍‌ ସାରେ ଜିନିଷ୍‌ ନୁ ୱେସ୍‌ତେ ନିୟ୍‌; 38 ମେଣ୍ଡେ ସନ୍‌ଦେ ବେଦି ନୁ ଅବିଷିକ୍ତ ନିୟ୍‌ ନୁ ଦୁପାମ୍‌ ସାୟେ ଗାବ୍‌ମାନ୍ଦାନ୍‌ ସାମାନ୍‌ ନୁ ଗୁଡ଼ୁସା ତଡ଼୍‌ ନର୍‌ଦାନ୍‌ ମୁସାନ୍‌ ଚିଲେ; 39 ପିତ୍ତଲ୍‌ତେ ବେଦି ନୁ ଆଗେତ୍‌ ପିତ୍ତଲ୍ ଇକ୍‌ଲେମ୍‌,ଆଗେତ୍‌ ଟେଙ୍ଗା ନୁ ସାରେ ଜିନିଷ୍‌, ନର୍‌ଦାନ୍‌ ଗାମ୍‌ଲେ ନୁ ଆଗେତ୍‌ କୁଦାନାଦ୍‌; 40 ମୁନେତ୍‌ ପରଦା,ଆଗେତ୍‌ ଗୁଞ୍ଜେ ନୁ ଟେଙ୍ଗା ନୁ ମୁନେତ୍‌ ଦୁଡ଼୍‌ତେ ମୁସାନ୍‌ ଚିଲେ, ଆଗେତ୍‌ ନଡ଼୍‌ ନୁ କୟେ ନୁ କାଇଲାନାଦ୍‌ ଗୁଡ଼ୁସେତାଗ୍‌ ମାଇଦିଙ୍କ୍‌ ଲତ୍‌ତେ ପାଡ଼୍‌ୟିଦେ ସାରେ ସାରେ ଜିନିଷ; 41 ପବିତ୍ର ପଡ଼୍‌ୟିତେ ସେବାତେ ସାରେ ଲେକେତ୍‌ ସିଲେ, ଅର୍ଥାତ୍‌,ହାରୋଣ ଯାଜକତେ ପବିତ୍ର ଚିଲେ ନୁ ତାନ୍‌ ମାର୍‌କିଡ଼୍‌ ଯାଜକ୍‌ ପାଡ଼ିୟ୍‌ ସାରେ ସିଲେ, 42 ଇ ବେନ୍‌ ବେନ୍‌ ପାଡ଼୍‌ୟି ମାଡ଼୍‌ନଙ୍କ୍‌ ମୋଶାନ୍‌ ପର ସଦାପ୍ରବୁନ୍‌ ଆଦେଶ୍‌ ଇସ୍‌ମାତ୍‌ତଣ୍ଡ, ଇସ୍ରାଏଲତେ ନାରୁଡ଼୍‌ ଆୱୁସାରେ ସମର୍ପନ୍‌ ମାଡ଼୍‌ତଡ଼୍‌। 43 ଇଦିନାଗ୍‌ ମୋଶାଲ୍‌ ଆ ସାରେ ପାଡ଼ିୟିଦେ ପର ଦୃଷ୍ଟି ଇତ୍‌ତଣ୍ଡ୍‌, ମେଣ୍ଡେ ଉଡ଼୍‌ଆଟ୍‌, ଅଡ଼୍‌ ସାରେ ମାଡ଼ମିନ୍ଦେଡ଼୍‌; ସଦାପ୍ରବୁ ବେଲାନେ ଆଦେଶ୍‌ ଇସ୍‌ମାତ୍‌ତଣ୍ଡ, ଅଡ଼୍‌ ଆଲେନେ ସାରେ ମାଡ଼ମାତ୍‌ତଡ଼୍‌; ଆଗାଙ୍କ୍‌ ମୋଶାଲ୍‌ ଅଡ଼୍‌କିଙ୍କ୍‌ ଆଶିର୍ବାଦ୍‌ ମାଡ଼୍‌ତଣ୍ଡ।