ସନ୍ଦେ ପେୟେ
1 ତାନ୍ପେର୍କେ ମୋଶାଙ୍କ୍ ମେଟେକନ୍ ଡିଗାନାଦ୍ ଲେଟ୍ ଉଡ଼୍ ନାରୁଡ଼୍ ହାରୋଣତେ ଗାରେ ସାରେତଡ଼୍ ଗୁଡ଼ି ଅକିଙ୍କି କେତ୍ତଡ଼୍, ତେଦେ, ମା ଗାରେ ଆଦିନ୍ମାଇଦିଙ୍କ୍ ମା ମାଇଦିଙ୍କ୍ ଦେୟାମ୍ ତିଆର୍ ମାଡ଼୍, ବେଲାକି ବେନ୍ ନାରୁଣ୍ଡ୍ ମିସର୍ ଦେଶକନ୍ ମାକିଙ୍କ୍ ପେସ୍ପିତାତ୍ତଣ୍ଡ୍, ଆ ମୋଶାନ୍ ପର ବାତେ ଗଟେମ୍ ଆତ୍ତେ, ଆଦ୍ ମାମ୍ ପୁନମ୍। 2 ଆସୁଟ୍ ହାରୋଣ ଅଡ଼୍କିଙ୍କ୍କେତ୍ତଣ୍ଡ୍, ଆସୁଟ୍ ମିଡ଼୍ ନିଜର ନିଜର ମୁତେକିଙ୍କ୍ ନୁ ମାର୍କ୍ମାୟ୍ସ୍କିଙ୍କ୍ କେୱୁକନ୍ ସୁନାକୁଣ୍ଡେ ଟେଣ୍ଡି ନାୟାଗେ ତାଡ଼ାଟ୍। 3 ଆସୁଟ୍ ସାରେ ନାରୁଡ଼୍ ନିଜର ନିଜର କେଉ ସୁନାକୁଣ୍ଡେ ସାରେ ଟେଣ୍ଡି ହାରୋଣତେ ଗାରେ ତାତ୍ତଡ଼୍। 4 ଅଣ୍ଡ୍ ଅଡ଼୍ କାଇଦେ ଆଦ୍ ଅସ୍ ଶିଳ୍ପ ଚିଲେ ଛଞ୍ଚ ତିଆର୍ ମାଡ଼୍ ଅଣ୍ଡୟ୍ ଢଲା ପେୟେ ତିଆର୍ ମାଡ଼୍ତଡ଼୍; ଆସୁଙ୍କ୍ ନାରୁଡ଼୍ କେତ୍ତଡ଼୍, ହୋ ଇସ୍ରାଏଲ୍, ବେନ୍ ଦେୟାମ୍ତିଙ୍କ୍ ମିକିଙ୍କ୍ ମିସର୍ ଦେଶକନ୍ ପେସ୍ପିତାତ୍ତେ, ଅଣ୍ଡେ ଇଣ୍ଡ୍।
5 ଆସୁଟ ହାରୋଣ ଆଦ୍ ଉଡ଼୍ ତାନ୍ ନିମେ ଅଣ୍ଡୟ୍ ବେଦି ତିଆର୍ ମାଡ଼୍ତଣ୍ଡ୍, ମେଣ୍ଡେ ନାଡ଼୍ ସଦାପ୍ରବୁନ୍ ମାଇଦିଙ୍କ୍ ଉତ୍ସର୍ଗ ପାଣ୍ଡୁମ୍ ଆଦ୍ତେ, ଇଦି କେତ୍ତଡ଼୍। 6 ଇଗାକଞ୍ଚ୍ ନାରୁଡ଼୍ ମେଣ୍ଡେ ଦିନ୍ ନାର୍କୁକ୍ ତେଦି ଦୁପାମ୍ ବେଦି ଉତ୍ସର୍ଗ ମାଡ଼୍ତଡ଼୍ ନୁ ମଙ୍ଗଲ୍ତାଦ୍ ପୂଜେ ମାଇଦିଙ୍କ୍ ନୈବେଦ୍ୟ ତାତ୍ତଡ଼୍; ଆସୁଙ୍କ୍ ନାରୁଡ଼୍ ତିନ୍ଦାଙ୍କ୍ ଉଦାଙ୍କ୍ କୁଦ୍ତଡ଼୍; ଇଦିନାଗଙ୍କ୍ ୱେଡ଼୍କେ ମାଡ଼ାଙ୍କ୍ ତେଦ୍ତଡ଼୍।
7 ଆସୁଙ୍କ୍ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, ମିଡ଼୍ ଡ଼ିଗି ଆନ୍, ବାତେଙ୍କ୍ଇତ୍କେ ମିଇ ବେନ୍ ନାରୁଡ଼୍ ମିଡ଼୍ ମିସରକନ୍ ପେସ୍ପିତାତି, ମିକିଙ୍କ୍ ବିପଦ୍ ମାଡ଼ମିନ୍ଦେଡ଼୍। 8 ମାମ୍ ଅଡ଼୍କିଙ୍କ୍ ବେନ୍ ଆର୍ଦେ ବିଷୟ୍ତେ ଆଦେଶ୍ ଇତ୍ତମ୍, ଅଡ଼୍ ଜାପେ ଆଗାକନ୍ ଆତ୍ତଡ଼୍; ଅଡ଼୍ ନିଜେତ୍ମାଇଦିଙ୍କ୍ ଅଣ୍ଡୟ୍ ଡଲା ପେୟେ ତିଆର୍ ମାଡ଼୍ତାଆଦିଙ୍କ୍ ଆଗେ ପୁଜେମାଡ଼୍ତଡ଼୍, ମେଣ୍ଡେ ଆଦିନ୍ ଗାରେ ବଲିଦାନ୍ ମାଡ଼୍ କେତ୍ତଡ଼୍, ହୋ ଇସ୍ରାଏଲ୍, ବେନ୍ ଦେୟାତିଙ୍କ୍ ମିକିଙ୍କ୍ ମିସର୍ ଦେଶକନ୍ ପେସ୍ପିତାତିଡ଼୍, ଅଣ୍ଡେ ଇଣ୍ଡ୍। 9 ସଦାପ୍ରବୁ ମୋଶାଙ୍କ୍ ମେଣ୍ଡେ କେତ୍ତଣ୍ଡ୍, ମାମ୍ ଇ ନାରୁଡ଼୍କିଙ୍କ୍ ଉଡ଼୍ତମ୍; ଉଡ଼୍ଟା, ଅଡ଼୍ ଅଦିକ୍ ଉର୍ଗାଡ଼୍ ନାରୁଡ଼୍। 10 ଆଦିଙ୍କ୍ ମିଡ଼୍ ଇଞ୍ଜେ ମାକିଙ୍କ୍ ୱିଡ଼୍ସିମୁଟ୍, ମା କପାମ୍ ଅଡ଼୍ ସାରେପାକା ନାର୍ଗେ ଆୟି, ମାତର୍ ମାମେ ମିକିଙ୍କ୍ ଗ୍ରାସ ମାଡ଼ିକାଡ଼୍; ମାତର୍ ମାମ୍ ମିକିଙ୍କ୍ ବାଡ଼୍ନାର୍ ମାଡ଼ିକାଡ଼୍।
11 ଆସୁଟ୍ ମୋଶାଲ୍ ନିଜର ସଦାପ୍ରବୁ ପରମେଶ୍ୱରଦିଙ୍କ୍ ଅନୁରଦ୍ ମାଡ଼ି କେତ୍ତଣ୍ଡ୍, ହୋ ସଦାପ୍ରବୁ, ନିମେ ନିଜର ବେନ୍ ନାରୁଡ଼୍କିଙ୍କ୍ ନିଜର ବାଡ଼ିୟ୍ପରାକ୍ରମ୍ ନୁ କାଇଦେ ବପୁତେ ମିସର୍ ଦେଶକନ୍ ପେସ୍ପିତାତି, ଅଡ଼୍ ସାରେପାକା ନି କପାମ୍ ବାତେଙ୍କ୍ ନିଡ଼୍ତିତ୍ ? 12 ଆ ମେଟେତ୍ ଅଞ୍ଚଲ୍ତେ ଅଡ଼୍କିଙ୍କ୍ ନଷ୍ଟମାଡ଼ି ପୃତିବିତିଙ୍କ୍ ନଷ୍ଟ ମାଡ଼୍ନ୍ମାଇଦିଙ୍କ୍, ଦଂସତ୍ମାଇଦିଙ୍କ୍ ପେସ୍ପିତାତ୍ତଡ଼୍, ଇସତ୍ ଗଟ୍ ମିସ୍ରିୟଡ଼୍ ବାତେଙ୍କ୍ ୱେର୍ସଡ଼୍ ମାଡ଼୍ତଡ଼୍ ? ନିମେ ନିଜର ପିନା କପାମ୍କନ୍ ପେୟ୍ମ୍ ନୁ ନିଜର ନାରୁଡ଼୍ଆଗାଙ୍କ୍ ସାରେପାକ୍ ଇସାରେ ନମ୍ର ବିଷୟ୍କନ୍ ୱିଡ଼୍ସିମ୍। 13 ନି ଦାସ ଅବ୍ରାହାମ୍, ଇସ୍ହାକ ନୁ ଇସ୍ରାଏଲିଡ଼୍କିଙ୍କ୍ ଏର୍ରକେମାଡ଼୍, ନିମେ ନି ନିଜ ପେର୍ଦେତେ ପ୍ରମାଣ ମାଡ଼୍ ଅଡ଼୍କିଙ୍କ୍ କେତ୍ତୁତି, ମାମ୍ ମାବ୍ତେ ଉକାକ୍ ଲେକାମ୍ ମିଇ ପିଲୁଡ଼୍ ପେର୍ସ୍ପିକାଡ଼୍ ନୁ ଇ ବେନ୍ସାରେ ଦେଶତିଙ୍କ୍ ଗଟ୍ କେତ୍ତମ୍, ଆଦ୍ ନି ପିଲୁଡ଼୍ତିଙ୍କ୍ ଇଦିକାଡ଼୍, ଅଡ଼୍ ତେର୍ୱକାଲାମ୍ ହେୱୁନା ଆଦ୍ ଅଦିକାର୍ ମାଡ଼୍ତଡ଼୍। 14 ଆସୁଙ୍କ୍ ସଦାପ୍ରବୁ ନିଜର ନାରୁଡ଼୍ ପର ବେନ୍ ଦଂସ ମାଡ଼ାନ୍ ମାଇଦିଙ୍କ୍ ଗଟ୍କେସ୍ ମାତ୍ତଡ଼୍, ଆଗାକନ୍ ଜେକେ ଆତ୍ତଣ୍ଡ୍।
15 ତାନ୍ପେର୍କେ ମୋଶାନ୍ ପାୟୁର୍ ମାଲ୍ପି ସାକ୍ଷ୍ୟ ଇନା ରେଣ୍ଡ୍ କାଲ୍ ବାଲା କାଇଦେ ପୟିସ୍ ମେଟେକନ୍ ଡ଼ିଗ୍ତଡ଼୍; ଆ ଓସାର୍ ବାଲା ଇପାକେ ନୁ ଆପାକେ ରେଣ୍ଡେ ପାକା ଲେକାମାତ୍ତେ। 16 ଆ କାଲ୍ ବାଲାତେ ପରମେଶ୍ୱର୍ଦେ ତିଆର୍ ଆତ୍ତାୱୁ; ମେଣ୍ଡେ ଆଗେତ୍ ଡ଼େୱୁତେ ଲେକେ ଇ ପରମେଶ୍ୱର୍ ଲେକେ ମାତ୍ତେ।
17 ଲପେକନ୍ ନାରୁଡ଼୍ ଗାଟି ଲେଙ୍ଗ୍ ମାଡ଼ୱାନାକେ, ଯିହୋଶୂୟ୍ ନାରୁଡ଼୍ ମର୍ରେକେଞ୍ଜି ମୋଶାଙ୍କ୍ କେତ୍ତଣ୍ଡ୍ ୱେସ୍ରାତ୍ ପର ଯୁଦ୍ଦ୍ତେ ଲେଙ୍ଗ୍ ଆଦୁତ୍।
18 ଆସୁଟ ମୋଶାଲ୍ କେତ୍ତଣ୍ଡ୍, ଇଦି ଜିଡ଼ାନାଦ୍ ଲେଙ୍ଗ୍ ଆୟ୍, କି ଆରେମ୍ ଆଦାନ୍ ଲେଙ୍ଗ୍ ଆୟ୍, ମାତର୍ ନାନ୍ ପାରନ୍ ଲେଙ୍ଗ୍ କେଞ୍ଜୁତାନ୍।
19 ଆସୁଙ୍କ୍ ଆ କଟାମ୍ତେ ଗାରେ ହେୱୁଦାନ୍ ୱେଲେ ଆଦ୍ ପେୟେ ନୁ ଏନ୍ଦାନାଦ୍ ଉଡ଼୍ତଡ଼୍; ଆସୁଟ୍ ମୋଶାନ୍ କପାମ୍ ପେୟେ ନିଡ଼୍ତେ; ଆଦିଙ୍କ୍ ଅଣ୍ଡ୍ ନିଜର କାଇକନ୍ ଆ ରେଣ୍ଡ୍ କାଲ୍ ବାଲେ ଏସି ମେଟେତ୍ ମଦଲ୍ ଆଦ୍ ଉତ୍ତଣ୍ଡ୍। 20 ମେଣ୍ଡେ ଅଡ଼୍ଆଗାଙ୍କ୍ ତିଆର୍ ଆତ୍ତେ ପେୟେ ଅସ୍ କିସ୍ତାଗ୍ ପଡ଼୍ସ୍ତଡ଼୍ ନୁ ଆଦିଙ୍କ୍ ନରି ଦୂମ୍ ମାଡ଼୍ତଡ଼୍, ମେଣ୍ଡେ ଏର୍ରଦେ ପର ଇଲିସ୍କିସ୍ ଇସ୍ରାଏଲତେ ମାର୍କିଡ଼୍କିଙ୍କ୍ ଉସ୍ପିତଡ଼୍। 21 ଆସୁଙ୍କ୍ ମୋଶାଲ୍ ହାରୋଣତିଙ୍କ୍ କେତ୍ତଣ୍ଡ୍, ଇ ନାରୁଡ଼୍ ନି ପର ବାତ୍ମାଡ଼୍ତଡ଼୍ ଯେ, ନିମେ ଅଡ଼୍ ପର ବାତେଙ୍କ୍ ବାଡ଼ିୟେ ପାପ୍ ମାଡ଼୍ନା ମାଡ଼ିମିନ୍ଦେଡ଼ି ?
22 ଆସୁଙ୍କ୍ ହାରୋଣ କେତ୍ତଣ୍ଡ୍, ମା ପ୍ରବୁନ୍ କପାମ୍ ଅଦିକ୍ ଆୟିମାକି; ନିମ୍ ପୁଞ୍ଜ ମିନ୍ଦେନି ଯେ, ଇ ନାରୁଡ଼୍ ଦୁଷ୍ଟ କାମ୍ତାଗ୍ କାଇଲିମିନ୍ଦେଡ଼୍। 23 ଇଡ଼୍ ନାକିଙ୍କ୍ କେତ୍ତଡ଼୍, ମିକିଙ୍କ୍ ପୁନ୍ଦାନ୍ମାଇଦିଙ୍କ୍ ମାମ୍ ମାଇଦିଙ୍କ୍ ଦେୟାମ୍ ତିଆର୍ ମାଡ଼ାଟ୍; ବାତେଙ୍କ୍ଇତ୍କେ ବେନ୍ ବ୍ୟକ୍ତି ମାକିଙ୍କ୍ ମିସର୍ ଦେଶକନ୍ ପେସ୍ପିତାତଣ୍ଡ୍, ଆ ମୋଶାଙ୍କ୍ ବାତେ ଆତ୍ତେ, ଆଦ୍ ମାମ୍ ପୁନମ୍। 24 ଆସୁଙ୍କ୍ ନାନ୍ କେତ୍ତାନ୍ ମିୟାଗ୍ ବେନ୍ ସୁନା ମାତ୍କେ, ଆୱୁ ଅଡ଼୍ ଟେଣ୍ଡିୱିଡ଼୍; ଆସୁଟ ଅଡ଼୍ ଆଦ୍ ନାକିଙ୍କି ଇତ୍ତେ ତଡ଼୍; ନାନ୍ ଆୱୁ କିସ୍ତାଗ୍ ୱାଟ୍ତାନ୍, ଆସୁଙ୍କ୍ ଆଦ୍ ପେୟେ ଆତ୍ତେ। 25 ମେଣ୍ଡେ ମୋଶାଲ୍ ନାରୁଡ଼୍ ବିରଦିଡ଼୍କ୍ ଉଡ଼ି, ବାତେଙ୍କ୍ଇତ୍କେ ହାରୋଣ ଅଡ଼୍କିଙ୍କ୍ ଶତ୍ରୁଡ଼୍ଡ଼ାଗାଙ୍କ୍ କାୱଦାନ୍ଲେକ୍ ମାଡ଼ି ୱିଡ଼ିସ୍ତଣ୍ଡ୍। 26 ଆଗାଙ୍କ୍ ମୋଶାଲ୍ ୱେସ୍ରାମ୍ ଗାରେ ନିସ୍ କେତ୍ତଣ୍ଡ୍, ସଦାପ୍ରବୁନ୍ ପାକ୍କେ ବେନ ମିନ୍ଦେଣ୍ଡ୍ ? ଅଣ୍ଡ୍ ନାଆ ଗାରେ ୱାଡ଼ଣ୍ଡ୍; ଆସୁଟ ଲେବିନ୍ ମାର୍କ ତାନ୍ ଗାରେ ଅଣ୍ଡୟ୍ତାଗ୍ ଆତ୍ତଡ଼୍। 27 ଆସୁଟ ଅଣ୍ଡ୍ ଅଡ଼୍କିଙ୍କ୍ କେତ୍ତଣ୍ଡ୍, ଇସ୍ରାଏଲତେ ସଦାପ୍ରବୁ ପରମେଶ୍ୱର ଇ ଗଟ୍ କେଲ୍ନଣ୍ଡ୍, ମିଡ଼୍ ସାରେ ତଡ଼୍ଡ଼ି ନିଜର ନିଜର କୁରୃକ୍ତାଗ କଡ଼୍ଗ ତଃସ୍ ସାମ୍ଡ଼େତ୍ ଅଣ୍ଡୟ୍ ଆର୍ରଦେକନ୍ ଆନ୍ ଆର୍ରହେୱୁନା ଆଦାୱାଦା ମାଡ଼ାଟ୍ ନୁ ସାରେ ତଡ଼୍ଡ଼ି ନିଜର ନିଜର ଦାଦାଲଡ଼୍କ୍ ନୁ ସାଙ୍ଗଡ଼୍ ବା ଗାରେତଡ଼୍କିଙ୍କ୍ ଆୱୁକାଟ୍। 28 ଆସୁଟ ଲେବିନ୍ ମାର୍ ମୋଶାନ୍ ବାକ୍ୟାଲେକାମ୍ ଆଲେନେ ମାଡ଼୍ତଡ଼୍, ଆଦ୍ନାଣ୍ଡ୍ ନାରୁଡ଼୍ଆଗାଙ୍କ୍ ଅଦିକ୍ ଆତ୍କେ ତିନି ହଜାର୍ ନାରୁଡ଼୍ ଡଲ୍ତଡ଼୍। 29 ମେଣ୍ଡେ ମୋଶାଲ୍ କେତ୍ତଣ୍ଡ୍ ମିଡ଼୍ ସାରେ ତଡ଼୍ଡ଼ି ନିଜର ନିଜର ମାର୍କ୍ ନୁ ଦାଦାଲଡ଼୍ ପାକ୍ଆସ୍ ସଦାପ୍ରବୁନ୍ ମାଇଦିଙ୍କ୍ ନିଯୁକ୍ତି ମାଡ଼ାଟ୍, ଆସୁଟ୍ ଅଣ୍ଡ୍ ଇ ଦିନ୍ତେ ମିକିଙ୍କ୍ ଆଶିର୍ବାଦ୍ ମାଡ଼ିତଣ୍ଡ୍। 30 ତାନ୍ ମେଣ୍ଡନ୍ ଦିନ୍ ମୋଶାଲ୍ ନାରୁଡ଼୍କିଙ୍କ୍ କେତ୍ତଣ୍ଡ୍, ମିଡ଼୍ ବାଡ଼ିୟେ ପାପ୍ ମାଡ଼ିମିନ୍ଦେଡ଼ି, ଇଞ୍ଜେ ନାନ୍ ସଦାପ୍ରବୁନ୍ ପାକେ ଡିଗି ମିନ୍ଦେନ୍; ଯଦି ଆଦ୍ପାର୍ଦେ, ଆଲେକେ ନାନେ ମି ପାପତେ ବଦ୍ଲା ଅଦ୍ତାନ୍ । 31 ଲପେକନ୍ ମୋଶାଲ୍ ସଦାପ୍ରବୁ ଗାରେ ମାଲ୍ସ୍ ଆଞ୍ଜ୍ କେତ୍ତଣ୍ଡ୍, ହାୟ୍, ହାୟ୍, ଇ ନାରୁଡ଼୍ ବାଡ଼ିୟ୍ ପାପ୍ ମାଡ଼ି ମିଇ ମାଇଦିଙ୍କ୍ ସୁନାତେ ଦେୟାମ୍ ତିଆର୍ ମାଡ଼୍ତଡ଼୍। 32 ଇଞ୍ଜ୍ବା , ମିଡ଼୍ ବେସୁଙ୍କ୍ ଅଡ଼୍ ପାପ୍ କ୍ଷମା ମାଡ଼୍ତିଡ଼୍ ବେସୁଙ୍କ୍ ମାଡ଼୍ୱିଡ଼୍, ଆଦିଙ୍କ୍ ନାନ୍ ବିନୟ ମାଡ଼ୁତାନ୍, ମିଇ ଲେକ୍ତେ ବଇ ତାଗାଙ୍କ୍ ନା ପେଦେର୍ ଉଞ୍ଜ୍ସ୍ପିମୁଟ୍।
33 ଆସୁଟ୍ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ, "ବେନ୍ ନାରୁଣ୍ଡ୍ ମା ବିରୁଦ୍ଦତେ ପାପ୍ ମାଡ଼ି ମିନ୍ଦେଣ୍ଡେ, ମାମ୍ ନିଜର ବଇକନ୍ ଅନ୍ ପେଦେର୍ କହିସିଦ୍ତମ୍। 34 ଇଞ୍ଜେ ଆନୁଟ୍, ମାମ୍ ବେନ୍ ଦେଶ ବିଷୟ୍ତେ ମିକିଙ୍କ୍ କେସ୍ମିନ୍ଦେମ୍, ଆ ଦେଶତାଗ୍ ଇ ନାରୁଡ଼୍କିଙ୍କ୍ ଅୟ୍ମ୍; ଉଡ଼୍, ମା ଦୂତ୍ ମିଇ ମୁନେ ମୁନେ ଆଦ୍ତା; ମାତର୍ ମାମ୍ ମାଡ଼୍ତେ କାୟେ ଇଦାନ୍ନାଣ୍ଡ୍ ଅଡ଼୍ ପାପ୍ତେ ମାଡ଼୍ତେ କାୟେ ଅଡ଼୍କିଙ୍କ୍ ଇଦିକାଡ଼୍।
35 ମେଣ୍ଡେ ସଦାପ୍ରବୁ ନାରୁଡ଼୍କିଙ୍କ୍ ରେଃତଣ୍ଡ୍ , ବେଲାକି ହାରୋଣ ତିଆର୍ ମାଡ଼୍ତାଦ୍ ପେୟେପିଲେତିଙ୍କ୍ ଅଡ଼୍ କେତ୍ତାଙ୍କ୍ ତିଆର୍ ମାଡ଼ି ମାତ୍ତଣ୍ଡ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)