1 ତାନ୍‌ପେର୍କେ ସଦାପ୍ରବୁ ମୋଶାଙ୍କ୍‍ କେତ୍‍ତଣ୍ଡ୍‌ ନିମେ ଫାରୋନ୍‍ ଗାରେ ଆଞ୍ଜ୍‌ ଆଦ୍‍ କେଲ୍‍ମ୍‍ ଏବ୍ରିୟଡ଼୍ ସଦାପ୍ରବୁ ପରମେଶ୍ୱର ଇଦ୍‍ ଗଟ୍‍ କେତିତିଣ୍ଡ୍‌ ମା ସେବା ମାଡ଼ାନ୍‍ ମାଇଦିଙ୍କ୍‌ ନିମେ ମା ନାରୁଡ଼୍‍କିଙ୍କ୍‌ ୱିଡ଼୍‌ସିମ୍‍। 2 ମାତର୍‌ ବେସୁଟ୍‌ ଅଡ଼୍‍କିଙ୍କ୍‌ ୱିଡ଼୍‌ସିଦାଙ୍କ୍‍ ଇଲେ ଇଞ୍ଜ୍‍ କେତିତିଡ଼୍‌ ଆସୁଟ୍‌ ବା ଅସୁବିଦା ଆଦ୍‌ତେ । 3 ଆଲେକେ ଉଡ଼େ, ନି ୱାୟେତାଗ୍‍ ମାନ୍ଦାନ୍‍ ଗୁରାମ୍‌, ଗଦ, ଉଟ୍‌, ଗଡ୍‌କ୍‍ ନୁ ମେକା ପଶୁକିନ୍‍ ପରୁ ସଦାପ୍ରବୁନ୍‍ କାଇ ମିନ୍ଦେ ଆଦିଙ୍କ୍‌ ମରୁଡ଼ି ଆଦ୍‌ତେ। 4 ମାତର୍‌ ସଦାପ୍ରବୁ ଇସ୍ରାଏଲିଡ଼୍ ନୁ ମିସ୍ରିୟଡ଼୍ ଜିୱାକିଙ୍କ୍‍ ୱେର୍‍ ମାଡ଼ିତଣ୍ଡ୍‌ ଆସୁଟ୍‌ ଇସ୍ରାଏଲ୍‍ତେ ନାରୁଡ଼ାୱୁ ପଶୁ ବେନ୍‍ ବା ଡଲ୍‍ଲ ଆଦ୍‌ତା । 5 ସଦାପ୍ରବୁ ସମୟ୍‍ ତିଆର୍‍ ମାଡ଼ି କେତିତଣ୍ଡ୍‌, ନାଡ଼୍ ସଦାପ୍ରବୁ ଇ ଦେଶ୍‍ତାଗ୍‍ ଇଦ୍‌ ପାଡ଼୍‍ୟି ମାଡ଼ିତଣ୍ଡ୍‌।

6 ମେଣ୍ଡନ୍‌ ଦିନେ ସଦାପ୍ରବୁ ଆଦ୍‍ ପାଡ଼୍‍ୟି ମାଡ଼୍‍ତଣ୍ଡ୍‌, ଆସୁଟ୍‌ ମିସ୍ରିୟ ନାରୁଡ଼୍‌ ସାରେ ପଶୁ ଡଲ୍‍ତା; ମାତର୍‌ ଇସ୍ରାଏଲତେ ନାରୁଡ଼ାୱୁ ପଶୁ ଅଣ୍ଡୟ ବା ଡଲ୍‍ଲେ ଆତ୍‌ତା। 7 ଆସୁଟ୍‌ ଫାରୋ ନାରୁଡ଼୍‍କ୍‍ ରହସ୍‍ ଇସ୍ରାଏଲିୟଡ଼୍ ଅଣ୍ଡୟ୍ ବା ପଶୁ ଡଲ୍‌ୱେ ମାନ୍ଦାନାଦ୍‌ ଉଡ଼୍‌ତଡ଼୍‌। ଆଗେକ୍‌ବା ଫାରୋନ୍‍ ହୃଦୟ କଠିନ ଆତ୍‌ତେ ନୁ ଅଣ୍ଡ୍‌ ନାରୁଡ଼୍‍କିଙ୍କ୍‌ ଆଦାନଙ୍କ୍‌ ଇୱଣ୍ଡ୍ ଆତ୍‌ତଣ୍ଡ୍‌।

8 ମେଣ୍ଡେ ସଦାପ୍ରବୁ ମୋଶାଙ୍କ୍‍ ନୁ ହାରୋଣତିଙ୍କ୍‌ କେତ୍‍ତଣ୍ଡ୍‌, ମିଡ଼୍ କାଇମୁଟ୍‌ ନିଇସ୍‌ ମିକା ବାଟ୍‌ତେ ନିର୍‌ ଅୟମ୍‌, ମେଣ୍ଡେ, ମୋଶାଲ୍‌ ଫାରୋନ୍‌ ମୁନେ ଆଦ୍‍ ମାବ୍‌ତେ ପାକେ ଲିକିୱିଣ୍ଡ୍‌। 9 ଆସୁଟ୍‌ ଆଦ୍‍ ସାରେ ମିସର୍‍ ଦେଶତେ ପର ପିଣ୍ଡ୍‌ ଗୁଣ୍ଡାଲ୍‌ ଆସ୍‍ ମିସ୍ରିୟ ସାରେ ନାରୁଡ଼୍ ନୁ ଜିୱାକ୍‌କିଙ୍କ୍‌ ମେନ୍ଦୁଲ୍‍ତାଗ୍‍ କୃପୁକ୍‌ ଆଦ୍‌ତା 10 ଆସୁଟ୍‌ ଅଡ଼୍ ବାଟ୍‌ତେ ନିର୍‌ ଆସ୍‍ ଫାରୋନ୍‍ ମୁନେ ନିତିତିଡ଼୍ ମେଣ୍ଡେ ମୋଶାଲ୍ ମାବ୍‌ତେ ପାକେ ଆଦ୍‌ ଲିକିସ୍‌ ୱାନାକେ, ସାରେ ନାରୁଡ଼୍ ନୁ ଜିୱାକ୍‌କିନ୍‌ ମେନ୍ଦୁଲ୍‌ତାଗ୍‍ କୃପୁକ୍‌ ଆତ୍‌ତା । 11 ଆ କୃପୁକ୍‌ ମାଇଦିଙ୍କ୍‌ ମନ୍ତ୍ରୀନଡ଼୍‌ ମୋଶାଙ୍କ୍‍ କାଇଲାନାଗ୍‍ ନିତ୍‍ପାର୍‍ୱଡ଼୍ ଆତ୍‍ତଡ଼୍। ବାତେଙ୍କ୍‌ଇତ୍କେ ମନ୍ତ୍ରୀନଡ଼୍‌ ନୁ ସାରେ ମିସ୍ରିୟଡ଼୍‍ ମେନ୍ଦୁଲ୍‌ତାଗ୍‍ କୁର୍‌ପୁକ୍‌ ଆତ୍‌ତା। 12 ତାନ୍‌ପେର୍କେ ସଦାପ୍ରବୁ ଫାରୋନ୍‍ ହୃଦୟତିଙ୍କ୍‍ ଡ଼ୁଟାଙ୍କ୍‍ ମାଡ଼୍‍ତଣ୍ଡ୍‌ ଆସୁଟ୍‌ ଅଣ୍ଡ୍‌ ମୋଶାନ୍‍ ପର ଆଦ୍‍ ସଦାପ୍ରବୁନ୍‌ ବାକ୍ୟ ପ୍ରମାନନ୍‌ତେ ଅଡ଼୍ ଗଟିଙ୍କି ପୟଡ଼୍ ଆତ୍‍ତଡ଼୍‍।

13 ତାନ୍‌ପେର୍କେ ସଦାପ୍ରବୁ ମୋଶାଙ୍କ୍‍ କେତ୍‍ତଣ୍ଡ୍‌, ମିଡ଼୍ ନାର୍କୁକେ ତେଦି ଫାରୋନ୍‌ ମୁନେ ନିସ୍‍ ଅକିଙ୍କି ଇଦି ଗଟ୍‍ କେଲ୍‌ମୁଟ୍‍ ଏବ୍ରିୟଡ଼୍ ସଦାପ୍ରବୁ ପରମେଶ୍ୱର କେଲ୍‍ନଣ୍ଡ୍‌ ମା ସେବା ମାଡ଼ାନଡ଼୍ ମା ନାରୁଡ଼୍‍କିଙ୍କ୍‌ ୱିଡ଼୍‌ସିମ୍‍। 14 ଇଲୁକ୍‍ ମେଣ୍ଡନ୍‌ଦାମ୍‍ ମାମ୍‌ମେ ନି ହୃଦୟ ବିରୁଦ୍ଧତେ ମେଣ୍ଡେ ମି ଦାସଡ଼୍‍ ନୁ ନାରୁଡ଼ାଗ୍‍ ମା ସାରେ ଲେକାମ୍‌ ମରୁଡ଼ି ରଃତିତମ୍‍ ଆସୁଟ୍‌ ସାରେ ପୃତିବିତେ ମା ଲେକେ ବେନ ଇଲାଣ୍ଡ୍‌ ଇଦି ନିମେ ପୁନ୍ଦେ ପାର୍‍ଦ୍‍ତି। 15 ବାତେଙ୍କ୍‌ଇତ୍କେ ଇଞ୍ଜେ ମାମ୍‌ମେ ନିଜର କାଇ ଆସ୍‍ ଏର୍‌ତୁପାନ୍‌ତେ ମିକିଙ୍କ୍‌ ନୁ ମି ନାରୁଡ଼୍‍କିଙ୍କ୍‌ ସଂହାର୍‍ ମାଡ଼ୱାନାକେ, ମେଣ୍ଡେ ମିଡ଼୍ ପୃତିବିତାଗ୍‍ ତେର ମିନ୍ଦେଡ଼୍। 16 ମାତର୍‌ ମିକିଙ୍କ୍‌ ନିଜର ଶକ୍ତି ତତାନ୍‍ ମାଇଦିଙ୍କ୍‌ ନୁ ସାରେ ପୃତିବିତାଗ୍‍ ବେଲା ମା ପେଦେର୍‍ ଗୌରବ୍‌ ଆଦ୍‌ତେ, ନିଜାମ୍‌ତେ ଇଦ୍‌ଲେକାମ୍‌ ମାମ୍‍ ମିକିଙ୍କ୍‌ ତିଆର୍‌ ମାଡ଼ି ନେଃହେସ୍‌ ମିନ୍ଦେମ୍‍। 17 ଆଗେକ୍‌ବା ମିଡ଼୍ ମା ନାରୁଡ଼୍‍କିଙ୍କ୍‌ ଆଦାନଙ୍କ୍‌ ଇୱକଟ୍‌ ଅଡ଼୍‌ ପର ଆଙ୍କାର୍‌ ମାଡ଼ୁତିଡ଼୍ ? 18 ଉଡ଼ାଟ୍‍ ମାମ୍‌ମେ ନାଡ଼୍ ଇ ସମୟ୍‍ତେ ମିସର୍ ଦେଶ୍‌ତାଗ୍‍ଗେ ଇଲାନେ ଆଦୁର୍‌ଗାଡାନ୍‌ ୱାର୍‍ସାମ୍‍ ମାଡ଼ିତମ୍‍ ଯେ, ମିସରତାଗ୍‌ ବେସୁଙ୍କ୍‌ ଇଦ୍‌ଲେକାମ୍‌ ଆଦୁର୍‌ ଗାଡ଼ାନ୍‌ ୱାଡ଼୍‌ସାମ୍‌ ବେସୁଙ୍କୁ ଆୟିୱେ ମାନ୍‌ନ୍ତେ। 19 ଇଦିନ୍‌ମାଦିଙ୍କ୍‍ ଇଞ୍ଜେ ନାରୁଡ଼୍‍କିଙ୍କ୍‌ ରସ୍‍ ୱାୟେତାଗ୍‍ ମୁସାନାୱୁ ବାତା ବାତା ମିନ୍ଦେ ଆୱୁସାରେ ଜାପେତାଡ଼ାଟ୍ ବାତେଙ୍କ୍‌ଇତ୍କେ ବେନ୍‍ ନାରୁଡ଼୍ ଜିୱାକ୍‌ ମାନ୍ଦାନାଗ୍‍ ମାନ୍‍ତଡ଼୍, ଅଡ଼୍ ପର ଆଦୁର୍‌ଗାଡାନ୍‌ ୱାର୍‍ସାମ୍‍ ଆତ୍କେ ଅଡ଼୍ ଡଲିତଡ଼୍। 20 ଆସୁଟ୍‌ ଫାରୋନ୍‍ ଦାସନଡ଼୍‍ ଆଗାଙ୍କ୍‍ ବେନ୍‍ ନାରୁଡ଼୍‌ ସଦାପ୍ରବୁନ୍‍ ବାକ୍ୟତେ ୱେର୍‌ତଡ଼୍‌, ଅଣ୍ଡ୍‌ ଜାପେ ନିଜର ଦାସଡ଼୍ ନୁ ପଶୁକିଙ୍କ୍‌ ଲନ୍‍ ତାତ୍‍ତଣ୍ଡ୍‌। 21 ମାତର୍‌ ବେନ୍‍ ସଦାପ୍ରବୁନ୍ ବାକ୍ୟତାଗ୍‌ ମନ୍‌ ଇୱଣ୍ଡ୍‌ ଆଦ୍‌ତଣ୍ଡ୍‌, ଅଣ୍ଡ୍‌ ନିଜର ଦାସ ନୁ ପଶୁ ମାନ୍ଦାନାଗ୍‍ ୱିଡ଼୍‌ସିଦ୍‌ତଣ୍ଡ୍‌।

22 ସଦାପ୍ରବୁ ମୋଶାଙ୍କ୍‍ କେତ୍‍ତଣ୍ଡ୍‌ "ନିମେ ମାବ୍‌ତା ନିଜର କାଇଆମ୍‍, ଆସୁଟ୍‌ ମିସ୍ରିୟଡ଼୍‌ ସାରେ ନାରୁଡ଼୍, ଗଡ୍‌କନ୍ଦେ ନୁ ୱାୟେତ୍‌ ଗାଡ଼୍‌ ତିନ୍ଦାନାୱୁ ସାରେତେ ଜିୱାକ୍‌କିନ୍‌ ପରୁ ଆଦୁର୍‌ଗାଡାନ୍‌ ୱାର୍‍ସାମ୍‍ ଆଦ୍‌ତେ ।" 23 ଆସୁଟ୍‌ ମୋଶାଲ୍‍ ନିଜର ଡୁଡ଼୍‍ ମାବ୍‌ତା ତେସୱାନାକେ, ସଦାପ୍ରବୁ ମାବ୍‍ତାଗାଙ୍କ୍‍ ଇଡ୍ରାନାଦ୍‍ ନୁ ଆଦୁର୍‌ ଗାଡାନ୍‌ ୱାର୍‍ସାମ୍‍ ମାଡ଼୍‍ତଣ୍ଡ୍‌, ମେଣ୍ଡେ ଜିଗ୍‍ଜାଗ୍‍ ବୁମ୍‍ଦା ଜାପେୱାତେ, ଇଲାନେ ସଦାପ୍ରବୁ ମିସର୍ ଦେଶ୍‌ତାଗ୍‍ ଆଦୁର୍‌ ଗାଡାନ୍‌ ୱାର୍‍ସାମ୍‍ ମାଡ଼୍‌ତଣ୍ଡ୍‌। 24 ଆସୁଟ୍‌ ଆଦୁର୍‌ ଗାଡାନ୍‌ ୱାର୍‍ସାମ୍‍ ଆତ୍‌ତେ ନୁ ଆଦୁର୍‌ ଗାଡା ସାଙ୍ଗେ ସାଙ୍ଗେ ୱାନେ ମାର୍ରସ୍‍ତେ; ଇଦ୍‌ଲେକାମ୍‌ କରାପ୍‍ ଆଦୁର୍‌ ଗାଡାନ୍‌ ୱାର୍‍ସାମ୍‍ ମିସର୍‍ ଦେଶତାଗ୍ ରାଜ୍ୟ କୁଦ୍‍ତାଗାଙ୍କ୍‌ ବେସୁଙ୍କ୍‌ ଆୟିୱେ ମାତ୍‍ତେ। 25 ଆସୁଟ୍‌ ସାରା ମିସର୍‍ ଦେଶତେ ୱାୟେୱାକେଲ୍‍ ନାରୁଡ଼୍ ନୁ ଜିୱାକ୍‌ ସାରେ ଆଦୁର୍‌ ୱାର୍‍ସାମ୍‌ତେ ଡଲ୍‌ତା ନୁ ୱାୟେତ୍‌ ସାରେଗାଡ଼୍‌ ତିନ୍ଦାନାୱୁ ସାରେ ଆଦୁର୍‌ ଗାଡାନ୍‌ ୱାଡ୍‌ସାମ୍‌ତେ ନଷ୍ଟ ଆତ୍‌ତା, ୱାୟେତ୍‌ ସାରେ ମାଡ଼ାକ୍‌ ଉର୍ଙ୍ଗତା। 26 ମାତର୍‌ ଇସ୍ରାଏଲ୍‍ତେ ନାରୁଡ଼୍‌ ମାନ୍ଦାନାଦ୍‍ ପଡ଼ିୟେ ଗୋଶନ୍‍ ପ୍ରଦେଶତାଗ୍‌ ଆଦୁର୍‌ ଗାଡାନ୍‌ ୱାର୍‍ସାମ୍‍ ଆୟ ଆତ୍‌ତେ।

27 ତାନ୍‌ପେର୍କେ ଫାରୋ ନାରୁଡ଼୍‍କ୍‍ ରସ୍‍ ମୋଶାଙ୍କ୍‍ ନୁ ହାରୋଣତିଙ୍କ୍‍ କାର୍‍ଙ୍ଗି କେତ୍‍ତଣ୍ଡ୍‌, ଇଦ୍‌ ଅଣ୍ଡ୍‌ୟଦାମ୍‍ ନାନେ ପାପ୍‍ ମାଡ଼୍‍ତାନ୍‌; ସଦାପ୍ରବୁ ଦାର୍ମିକ୍‌, ମାତର୍‌ ମାମ୍‌ମେ ନୁ ମା ନାରୁଡ଼୍ ଦୋଷି ଆତ୍‌ତମ୍‌। 28 ସଦାପ୍ରବୁନ୍‍ ଗାରେ ପ୍ରାର୍ତନା ମାଡ଼ାଟ୍‍; ବାତେଙ୍କ୍‌ଇତ୍କେ ପରମେଶ୍ୱର ମାଡ଼୍‌ତେ ଲେଙ୍ଗ୍‌ ନୁ ଆଦୁର୍‌ ଗାଡାନ୍‌ ୱାର୍‍ସାମ୍‍ ଅଦିକ୍‍ ମାଡ଼ିମିନ୍ଦେଣ୍ଡ୍‌; ମାମ୍‍ ମିକିଙ୍କ୍‌ ଆଦାନଙ୍କ୍‌ ୱିଡ଼୍‌ସିଦ୍‍ତମ୍‍, ମିୟାଦ୍‍ ମେଣ୍ଡେ ଲେଟ୍‍ ଆୟ। 29 ଆସୁଟ୍‌ ମୋଶାଲ୍‌ ଅକିଙ୍କ୍‌ କେତ୍‍ତଣ୍ଡ୍‌, ନାନେ ନଗର୍‌ତାଗାଙ୍କ୍‍ ପେୟିସ୍‌ ଆଞ୍ଜୱାନାକେ ସଦାପ୍ରବୁନ୍‍ ଗାରେ ନିଜର କାଇ ଆତିତାନ୍‍, ଆସୁଙ୍କ୍‌ ମୟଲ୍‌ତେ ମର୍‌ରେ କମ୍‌ଆଦ୍‌ତେ ନୁ ଆଦୁର୍‌ ଗାଡାନ୍‌ ୱାର୍‍ସାମ୍‍ ମେଣ୍ଡେ ଆୟ; ମେଣ୍ଡେ ଇ ପୃତିବିତାଗ୍‍ ଯେ ସଦାପ୍ରବୁନାଦ୍‌, ଆଦ୍‍ ନିମେ ପୁନ୍ଦେ ପାର୍‍ତିନ୍‌। 30 ମାତର୍‌ ନାନେ ପୁତ୍‍ତାନ୍‍, ନିଜେ ନୁ ନିଜରତେ ଦାସନଡ଼୍ ନେଣ୍ଡ୍‌ ଆୟିନା ସଦାପ୍ରବୁ ପରମେଶ୍ୱରତିଙ୍କ୍‌ ୱେର୍‌ୱଡ଼୍ ଆଦୁତଡ଼୍‌ । 31 ଆ ସମୟତେ ଫେସି ନୁ ଗହମ ସାରେ ନଷ୍ଟ ଆତ୍‌ତା, ବାତେଙ୍କ୍‌ଇତ୍କେ ଗହମ୍‌ ପେଡ଼େକ୍ ଲେକ୍‌ତାୱୁ ନୁ ଫେସି ପୁଙ୍ଗାର୍‌ଆସ୍‌ ମାତ୍‌ତା । 32 ମାତର୍‌ ଗହମ୍‍ ନୁ ଜହ୍ନା ବାଡ଼ିୟେ ଆୟକଟ୍‌ ମାତ୍‌ତାଙ୍କ୍‍ ନଷ୍ଟ ଆୟ୍‌ୱେ ମାତ୍‍ତା। 33 ତାନ୍‌ପେର୍କେ ମୋଶାଲ୍ ଫାରୋନ୍‍ ଗାରେ ନଗର୍‌ତାଗାଙ୍କ୍‌ ବାଇଦେ ଆଞ୍ଜ୍‌ ସଦାପ୍ରବୁନ୍‍ ମୁନେ ନିଜେତ୍‌ କାଇ ଆସୱାନାକେ, ମୟଲ୍‌ ମର୍ରେ ନୁ ଆଦୁର୍‌ ଗାଡାନ୍‌ ୱାର୍‍ସାମ୍‍ ବନ୍ଦ ଆତ୍‌ତେ, ବୂମ୍‌ତାଗ୍‌ ମେଣ୍ଡେ ୱାଡ଼୍‌ସାମ୍‍ ଆୟ ଆତ୍‌ତେ। 34 ତାନ୍‌ପେର୍କେ ୱାର୍‍ସାମ୍‍ ନୁ ଆଦୁର୍‌ ଗାଡା ନୁ ମୟଲ୍‍ ମର୍ରେ ତେରାନାଦ୍‍ ଉଡ଼ି ଫାରୋ ମେଣ୍ଡେ ପାପ୍ ମାଡ଼୍‍ତଣ୍ଡ୍‌, ମେଣ୍ଡେ ଅଣ୍ଡ୍‌ ନୁ ତାନ୍‍ ଦାସନଡ଼୍ ନିଜେ ନିଜର୍‌ ମନ୍‍ ଢ଼ାଟୁଙ୍କ୍‌ ମାଡ଼୍‌ତଡ଼୍‌। 35 ଆସୁଟ୍ ଫାରୋନ୍‍ ହୃଦୟ ଢ଼ାଟୁଙ୍କ୍‌ ଆତ୍‌ତେ; ଆଦିଙ୍କ୍‌ ମୋଶାନ୍‌ ତଡ଼୍‌ କେସ୍‌ମାନ୍ଦାନ୍‌ ସଦାପ୍ରବୁନ୍‍ ବାକ୍ୟଲେକାମ୍‌ ଅଣ୍ଡ୍‌ ଇସ୍ରାଏଲ୍‌ତେ ନାରୁଡ଼୍‌କିଙ୍କ୍‌ ୱିଡ଼୍‌ସିଇୱଣ୍ଡ୍‌ ଆତ୍‌ତଣ୍ଡ୍‌।