1 ମେଣ୍ଡେ ନିମେ ଇସାରେ ନିୟମ ଅଡ଼୍‌କିଙ୍କ୍‌ ଜ୍ଞାନ ପୁଞ୍ଜ୍‌ପିତିଡ଼୍‌। ଯଥା- 2 ନିମେ ଏବ୍ରିୟ ଦାସଙ୍କ୍‌ ଆସ୍‌ତଣ୍ଡ, ଅଣ୍ଡ୍‌ ଆରୁ ଏଣ୍ଡେକ୍‌ ସେବା ମାଡ଼ିତଣ୍ଡ୍‌; ମେଣ୍ଡେ ସାତ୍‌ ଏଣ୍ଡେକିନେ ଅଣ୍ଡ୍‌ ବାତେଇୱେ ମୁକ୍ତି ଆଦ୍‌ତଣ୍ଡ୍‌ । 3 ବେସୁଙ୍କ୍‌ ମାଲିକ୍‌ ୱେରଣ୍ଡ୍‌ ଆସ୍‌ ୱାଦ୍‌ତଣ୍ଡ୍‌, ଆସୁଟ୍‌ ଅଣ୍ଡ୍‌ ୱେରଣ୍ଡ୍‌ ଆଦ୍‌ତଣ୍ଡ୍‌, ମେଣ୍ଡେ ଅଣ୍ଡ୍‌ ବେସୁଙ୍କ୍‌ ପେଣ୍ଡୁଲ୍‌ ଆସ୍‌ ୱାଦ୍‌ତଣ୍ଡ୍‌, ଆଲେକ୍‌ ଅନ୍‌ମୁତେ ଅନ୍‌ତଡ଼୍‌ ପେଇସ୍‌ ଆଦ୍‌ତେ। 4 ମେଣ୍ଡେ ବେସୁଙ୍କ୍‌ ତାନ୍‌ ପ୍ରବୁ ଅକିଙ୍କ୍‌ ପେଣ୍ଡୁଲ୍‌ ଇସ୍‌ମାନ୍ତଣ୍ଡ ନୁ ଆ ମୁତେନାଗାଙ୍କ୍‌ ମାର୍‌ ମାୟାସ୍‌ ଜନମ୍‌ ଆଦ୍‌ତା, ଆଲେକେ ଆ ନାଟାଡ଼୍‌ ନୁ ତାନ୍‌ ପିଲାନ୍‌ ପର ତାନ୍‌ ପ୍ରବୁନ୍‌ ଅଦିକାର୍‌ ଆଦ୍‌ତେ ନୁ ଅଣ୍ଡ୍‌ ୱେରଣ୍ଡେ ପେଇସ୍‌ ଆଦ୍‌ତଣ୍ଡ୍‌ । 5 ମାତର୍‌ ନାନ୍‌ ନା ପ୍ରବୁ ସାଉକାରି, ମେଣ୍ଡେ ନିଜର ନାଟାଡ଼୍‌ତିଙ୍କ୍‌ ନୁ ପିଲାକିଙ୍କ୍‌ ପ୍ରେମ୍‌ ମାଡ଼ିତେ, ଇଦି ମାଇଦିଙ୍କ୍‌ ନାନ୍‌ ମୁକ୍ତି ଆସ୍‌ ଆନନ୍‌, ଇସତ୍‌ ଗଟି ବେସୁଙ୍କ୍‌ ଆ ଦାସ୍‌ ଅଦିକ୍‌ କେତ୍‌ତିତଣ୍ଡ୍‌ 6 ଆଲେକେ ଅନ୍‌ ସାଉକାର୍‌ ଅଂକିଙ୍କି ପରମେଶ୍ୱରଦେ ଗାରେ ଅଦ୍‌ତଣ୍ଡ୍‌, ମେଣ୍ଡେ ଅଂକିଙ୍କ୍‌ କାପାଟ୍‌ ଦୁୱାର୍‌ ବନ୍ଦ୍‌ଦେ ଗାରେ ତାସ୍‌ ଅନ୍‌ ପ୍ରବୁ କଟାନାଗ୍‌ ଅନ୍‌ କେୱୁଦିଙ୍କ୍‌ କଟିତିଡ଼୍‌; ଆସୁଟ୍‌ ଅଣ୍ଡ୍‌ ସାରେୱେଲେ ଅନ୍‌ ସେବା ମାଡ଼ିତଣ୍ଡ୍‌।

7 ମେଣ୍ଡେ ବେନ୍‌ ନିଜର ମାୟାଡ଼୍‌ତିଙ୍କ୍ ଦାସିଇନା ୱାମିତଣ୍ଡ୍‌, ଆସୁଟ୍‌ ଅଣ୍ଡ୍‌ ଦାସଡ଼୍‌ଇନା ମୁକ୍ତି ଆୟଣ୍ଡ୍‌। 8 ଅନ ପ୍ରବୁ ଅକିଙ୍କି ନିଜର ମାଇଦିଙ୍କ୍‌ ତିଆର୍‌ ମାଡ଼୍‌କେ ଏକେ, ବେସୁଙ୍କ୍‌ ବେନ୍‌ ଅନ୍‌ ପର ରାଜିଇଲ୍‌ୱେ, ଆସୁଟ୍‌ ଅଣ୍ଡ୍‌ ଅକିଙ୍କ୍‌ ମୁକ୍ତି ଆଦାଙ୍କ୍‌ ଇଦ୍‌ତେ; ଅନ ପର ବୁଚା ମାଡ଼୍‌ନାଙ୍କ୍‌ ୱେର୍‌ ଦେଶତେନଡ଼୍‌ ଗାରେ ଅଙ୍କ୍‌ ୱାମାନ୍‌ ଅଦିକାର୍‌ ପାହେମ୍‌ ଆୟଣ୍ଡ୍‌। 9 ବେସୁଙ୍କ୍‌ ବେନ୍‌ ଆ ପ୍ରବୁନ୍‌ ନିଜର ପିଲାନ୍‌ ମାଇଦିଙ୍କ୍‌ ଆଦ୍‌ ତିଆର୍‌ ମାଡ଼ିମାନ୍‌ତଣ୍ଡ୍‌, ଆସୁଙ୍କ୍‌ ଅଣ୍ଡ୍‌ ଅନ୍‌ ପର ପିକ୍‌ତେ ବିଷୟ୍‌ତେ ନିୟମ୍‌ ଲେକାମ୍‌ ବ୍ୟବହାର୍‌ ମାଡ଼ିତିଡ଼୍‌। 10 ବେସୁଙ୍କ୍‌ ଅଣ୍ଡ୍‌ ୱେରେ ଅଣ୍ଡୟ୍‌ ମୁତେଙ୍କ୍‌ ପେଣ୍ଡୁଲ୍‌ ମାଡ଼ିତଣ୍ଡ୍‌, ଆଲେକେ ଏକେ ତାନ୍‌ ତିନ୍ଦାନ୍‌ ଉନ୍ଦାନ୍‌ ନୁ ମୁତେ ନୁ ମାନେୟି କାଇଲାନ୍‌ ସମ୍ପର୍କ ମାନ୍‌ନ୍ତେ। 11 ଯଦି ଅଣ୍ଡ୍‌ ଇ ମୁଣ୍ଡିନାଗ୍‌ ବୁଲ୍‌ ମାଡ଼ିତଣ୍ଡ୍‌, ଆଲେକେ ଆଦ୍‌ ନାଟାଡ଼୍‌ ବିନାମୁଲ୍ୟତେ ମୁକ୍ତ ଆଦ୍‌ତେ।

12 ବେନ ବେସୁଙ୍କ୍‌ ବେନ ନାରୁଡ଼୍‌କିଙ୍କ୍‌ ରେଃତିତଣ୍ଡ୍‌ ଅଣ୍ଡ୍‌ ଆଲେନେ ଡଲିତଣ୍ଡ୍‌, ନିଜାମ୍‌ ଅନ୍‌ ଜିୱୁ ଆଦ୍‌ତେ। 13 ବେସୁଙ୍କ୍‌ ବେନ୍‌ ନାରୁଡ଼୍‌କିଙ୍କ୍‌ ରେଃତାନଙ୍କ୍‌ ଚେଷ୍ଟା ମାଡ଼ୁତଣ୍ଡ୍‌, ମାତର୍‌ ପରମେଶ୍ୱରଦେ ଇଚ୍ଛାତେ ଅନ୍‌ କାଇଦେ ଅଣ୍ଡ୍‌ ଡଲିତଣ୍ଡ୍‌, ଆସୁଟ୍‌ ଅଣ୍ଡ୍‌ ବେନ୍‌ ପଡ଼ିୟ୍‌ତାଗ ମିରି ପାର୍‌ଦ୍‌ତଣ୍ଡ୍‌, ଇଲାନେ ନିମାଇଦିଙ୍କ୍‌ ମାମେ ପଡ଼ିୟେ ତିଆର୍‌ ମାଡ଼ିତମ୍‌। 14 ମାତର୍‌ ବେନ ବେସୁଙ୍କ୍‌ ବୁସାମାଡ଼ାନ୍‌ ମୁନେ ନିଜର ଗାରେତଡ଼୍‌କିଙ୍କ୍‌ ଆୱୁକାନଙ୍କ୍‌ ସାହସ ମାଡ଼ିତଣ୍ଡ୍‌, ଆସୁଙ୍କ୍‌ ନିମେ ଅନ୍‌ ଡଲାନ୍‌ଦଣ୍ଡ୍‌ ମାଡ଼ାନ୍‌ ମାଇଦିଙ୍କ୍‌ ମା ବେଦିତ୍‌ ଗାରେ ଅକିଙ୍କ୍‌ ଅଦ୍‌ତିଡ଼୍‌।

15 ମେଣ୍ଡେ ବେନ ନିଜର ବାବାଙ୍କ୍‌ କି ୟାୟଙ୍କ୍‌ ରେଃତ୍‌ତିତଣ୍ଡ୍‌, ଅଣ୍ଡ୍‌ ନିଜାମ୍ ଡ଼ଲାନ୍‌ଦଣ୍ଡ ଆଦ୍‌ତଣ୍ଡ୍‌ ।

16 ମେଣ୍ଡେ ବେନ୍‌ ନାରୁଡ଼୍‌କିଙ୍କ୍‌ ଡ଼ଙ୍ଗି ବେନ୍‌ ୱାମିତଣ୍ଡ୍‌, ମେଣ୍ଡେ ଅଣ୍ଡ ବେନଙ୍କ୍‌ ତାନ୍‌ ଅଦିକାର ପାହେମ୍‌ ଆତ୍କେ, ଆସୁଟ୍‌ ଅନ୍‌ ନିଜାମ୍‌ ଡଲାନ୍‌ଦଣ୍ଡ୍‌ ଆଦ୍‌ତେ।

17 ବେନ୍‌ଆଇ ବାବାଙ୍କ୍‌ କି ୟାୟଙ୍କ୍‌ ଅବିଶାପ ଇଦ୍‌ତଣ୍ଡ୍‌, ଅଣ୍ଡ୍‌ ନିଜାମ୍‌ ଡଲାନ୍‌ଦଣ୍ଡ୍‌ ଆଦ୍‌ତେ।

18 ମେଣ୍ଡେ ନାରୁଡ଼୍‌ ଅଣ୍ଡୟ୍‌ ଗଟ୍‌ତିଙ୍କ୍‌ ରାମ୍‌କ ମାଡ଼୍‌ନା ମାଡ଼୍‌ନା ଅତୁରଣ୍ଡ୍‌ ମେଣ୍ଡେ ଅର୍ତୁଙ୍କ୍‌ କାଲ୍‌ଦଡ଼୍ ବା ଡ଼ୁତେ ରେଃତ୍‌କେ, ଅଣ୍ଡ ବେସୁଙ୍କ୍‌ ଡ଼ଲ୍‌ୱେକନ୍‌ କେତ୍‌ପଇତ୍‌ତଣ୍ଡ

19 ନୁ ପେର୍‌କେ ତେଦି ଡ଼ୁଡ଼୍‌ ପହିସ୍‌ ବାଇଦେଉଡ଼ିତଣ୍ଡ୍‌,ଆସୁଟ୍‌ ଅଣ୍ଡ୍‌ ଆଦ୍‌ଲେକାତ୍‌ ଦଷ୍‌ ଇଲ୍‌ୱେନଣ୍ଡ୍‌ ଆଦ୍‌ତଣ୍ଡ୍‌; କେବଳ ଅକିଙ୍କ୍‌ ଅନ୍‌ ପାଡ଼ିୟ୍‌ ମାଡ଼୍‌ତେ ନୁ ଚିକିତ୍ସାତେ କର୍ଚ ଇଦାନଙ୍କ୍‌ ୱେଇତିତ୍‌।

20 ମେଣ୍ଡେ ବେନ୍‌ ନିଜର ଦାସ ନୁ ଦାସିକିନ୍‌ ଡ଼ୁଡ଼୍‌ତଡ଼୍‌ ରେଃତ୍‌କେ, ଅଣ୍ଡେ ବେସୁଙ୍କ୍‌ ଅନ୍‌ କାଇଦେ ଡ଼ଲ୍‌କେ, ଆସୁଟ୍‌ ଅଣ୍ଡ୍‌ ନିଜାମ୍ ଦଣ୍ଡପାହେମ୍‌ ଆଦ୍‌ତଣ୍ଡ୍‌ । 21 ମାତର୍‌ ଅଣ୍ଡ୍‌ ଅଣ୍ଡ୍‌ଦିନେ ବା ରେଣ୍ଡ୍‌ ଦିନେ ଗେଲ୍‌ସିତଣ୍ଡ୍‌, ଆଲେକ୍‌ ଅଣ୍ଡ୍‌ ଦଣ୍ଡ୍‌ ପାହେମ୍‌ ଆୟଣ୍ଡ୍‌; ବାତେଙ୍କ୍‌ଇତ୍କେ ଅଣ୍ଡ୍‌ ତାନ୍‌ ଦନ୍‌ ଲେକାମ୍‌। 22 ମେଣ୍ଡେ ଯଦି ମାନେୟ୍‌ ତାମତାମ୍‌ ରାମ୍‌କ୍‌ ମାଡ଼୍‌ ମାଡ଼୍‌ ବେନ୍‌ ଡ଼ଙ୍କ୍‌କେତ୍‌ମାନ୍ଦାନ୍‌ ନାଟାଡ଼୍‌ତିଙ୍କ୍‌ ରେଃତିତଡ଼୍‌ ଯଦି ତାନାଦ୍‌ ଗର୍ବ ନଷ୍ଟ ଆଦ୍‌ତେ, ମାତର୍‌ ପେର୍କେ ମେଣ୍ଡେ ବାତେବା ଆପଦ୍‌ ଗଟେମ୍‌ଆଦ୍‌ତେ, ଆସୁଟ୍‌ ଆଦ୍‌ ନାଟାଡ଼୍‌ତେ ମୁଦ୍‌ପାଲ୍‌ ବେଦ୍‌ଲେକାମ୍‌ ଦାବି ମାଡ଼ିତଣ୍ଡ୍‌, ଆଦ୍‌ଲେକାମ୍‌ ତାନ୍‌ ନିଜାମ୍‌ ଗଟ୍‌ତେ ଦଣ୍ଡ୍‌ ଆଦ୍‌ତେ, ମେଣ୍ଡେ, ଆଦ୍‌ ବିଚାରକର୍ତ୍ତାନଡ଼୍‌ କେତାନ୍‌ ଲେକାମ୍‌ ଆଦ୍‌ ଇଦ୍‌ତଣ୍ଡ୍‌। 23 ମାତର୍‌ ବେସୁଙ୍କ୍‌ ମେଣ୍ଡେ ଆପଦ୍‌ ଗଟେମ୍‌ ଆତ୍କେ, ଆସୁଟ୍‌ ଅନ୍‌ ଜିଉନ୍‌ ବାଦୁଲ୍‌ତେ ଜିଉନ୍‌। 24 କଣ୍ଡା ବାଦୁଲ୍‌ତେ କଣ୍ଡା, ପାଲ୍‌କ୍‌ ବାଦୁଲ୍‌ତେ ପାଲ୍‌କ୍‌, କାଇ ବାଦୁଲ୍‌ତେ କାଇ, ଡେକେତ୍‌ ବାଦୁଲ୍‌ତେ ଡେକା, 25 କେସେର୍‌ ବାଦୁଲ୍‌ତେ କେସେର୍‌, ପୁଣ୍ଡ୍‌ଦେ ବାଦୁଲ୍‌ତେ ପୁଣ୍ଡ୍‌, ଦେବେତ୍‌ ବାଦୁଲ୍‌ତେ ଦେବେ, ଦଣ୍ଡ ଆଦ୍‌ତେ।

26 ମେଣ୍ଡେ ଯଦି ବେନ୍‌ ନିଜର ଦାସନ୍‌ କି ଦାସିନ୍‌ କଣ୍ଡାଙ୍କ୍‌ ରେଃତିତଣ୍ଡ୍‌ ଆସୁଙ୍କ୍‌ ଅଣ୍ଡ୍‌ ନଷ୍ଟ ଆଦ୍‌ତଣ୍ଡ୍‌, ଆସୁଟ୍‌ ଅଣ୍ଡ୍‌ ତାନ୍‌ କଣ୍ଡାନେ ତାକିଙ୍କ୍‌ ମୁକ୍ତ ମାଡ଼ିଦ୍‌ତଣ୍ଡ୍‌। 27 ମେଣ୍ଡେ, ମୁଟ୍‌କେ ରେଃସ୍‌ ତାନ୍‌ ଦାସନ୍‌ କି ଦାସିନ୍‌ ପାଲକ୍‌ ଉଃତ୍‌କେ, ଆଦ୍‌ ଆ ପାଲ୍‌କିନ୍‌ ସେଙ୍ଗେ ଆଦିଙ୍କ୍‌ ମୁକ୍ତ ମାଡ଼ିକାଡ଼୍‌।

28 ମେଣ୍ଡେ କନ୍ଦେ ବେନ୍‌ଆୟି ମାନେୟ୍‌ କି ନାଟାଡ଼୍‌ କର୍‌ଦେ ରେଃତ୍‌କେ ବେସୁଙ୍କ୍‌ ଆଦ୍‌ ଡଲ୍‌କେ, ଆସୁଟ୍‌ ଆ ଗଡ୍‍ କାଲ୍‌ଦେ ଦେବେତେ ଡଲିତ୍‌, ମେଣ୍ଡେ ତାନ୍‌ ଆୱୁଙ୍ଗ୍‌ ତିନ୍ଦାଙ୍କ୍‌ଆୟ୍‌; ମାତର୍‌ ଗଡ଼ିନ୍‌ ମୁଦ୍‌ପାଲ୍‌ ଦୋଷ୍‌ଇଲ୍‌ୱେନଡ଼୍‌ତେ ଯୋଗ୍ୟ ଆୟଣ୍ଡ୍‌। 29 ମାତର୍‌ ଆ ଗଡ୍‍ ମୁନେନ୍‌ ରେଃସ୍‌ ଆସମାତ୍‌ତେ, ଇଦି ପ୍ରମାଣ ତାନ୍‌ ମୁଦପାଙ୍କ୍‌ ଇତ୍କେ ନେ ଆଦିଙ୍କ୍‌ ତଃୱେ ମାଇଦିଙ୍କ୍‌ ଆଦ୍‌ ବେସୁଙ୍କୁ ମାନେୟ୍‌ କି ନାଟାଡ଼୍‌ ରେଃତ୍‌ତ୍କେ, ଆସୁଙ୍କ୍‌ ଆ ଗଡ୍ କାଲ୍‌କିନ୍‌ ଦେବେତେ ଡ଼ଲିତ୍‌ତେ; ମେଣ୍ଡେ ତାନ୍‌ ମୁଦ୍‌ପାଲ୍‌ ମିକା ଡଲିତଣ୍ଡ୍‌। 30 ଯଦିବା ଅନ୍‌ ଜିୱେତେ ମାଇଦିଙ୍କ୍‌ ୱିଡ଼୍‌ଚ୍‌କେ, ଆସୁଙ୍କ୍‌ ଅଣ୍ଡ୍‌ ଜିୱେକନ୍‌ ମୁକ୍ତିମାଇଦିଙ୍କ୍‌ ସାରେ ମୁଲ୍ୟ ଇଦେୱେତ୍‌ତି। 31 ଗଡ଼୍‌ ମାର୍‌କିଡ଼୍‌କିଙ୍କ୍‌ କି ମାୟାଡ଼୍‌ତିଙ୍କ୍‌ କାଡ଼୍‌ଦେ ରେତ୍ତେକେ ଇ ଶାସନ ସମାନ୍‌ ଦଣ୍ଡପାଏମ୍‌ ଆଦ୍‌ତଣ୍ଡ୍‌ । 32 ବେନ୍‌ ଗଡ୍‍ ବେସୁଙ୍କ୍‌ ବେନ୍‌ ଦାସ କି ଦାସିନ୍‌ କାଡ଼୍‌ଦେ ରେଃତ୍‌କେ, ଆସୁଟ ଅଣ୍ଡ ତାନ୍‌ ପ୍ରବୁଙ୍କ୍‌ ତିରିଶ୍‌ଟାନ୍‌ ରୁପା ଇଦ୍‌ତଣ୍ଡ୍‌; ମେଣ୍ଡେ ଗଡ଼୍‌ତେ ଦେବେତେ ଡ଼ଲିତଣ୍ଡ୍‌। 33 ମେଣ୍ଡେ ବେନ୍‌ ବେସୁଙ୍କ୍‌ ନୁୟି ମାଡ଼ିତଣ୍ଡ୍‌, ନୁୟି ତେର୍‌ତାନଙ୍କ୍‌ ଆଦ୍‌ ମାଡ଼ମାକିଣ୍ଡ୍‌, ଆସୁଟ ଲପେ ବେନ୍‌ ଗଡ୍‍ କି ଗଦ୍‌ ରାଲକେ, 34 ଆ ନୂୟିଦେ ମାଲିକ୍‌ ଆଗାକନ୍‌ ବାଦୁଲ୍‌ ମାଡ଼ିତଣ୍ଡ୍‌; ଅଣ୍ଡ୍‌ ଆୱିନ୍‌ ମୁଦ୍‌ପାଲଡ଼୍‌କିଙ୍କ୍‌ ରୁପା ମୁଲ୍ୟ ଇଦିୱେତିତ୍‌, ମାତ୍ର ଡ଼ଲତେ ପଶୁ ଅନାଦ୍‌ ଇଦ୍‌ତଣ୍ଡ୍‌। 35 ମେଣ୍ଡେ ଅର୍‌ତୁଣ୍ଡ୍‌ ଗଡ୍‍ତିଙ୍କ୍‌ ମେଣ୍ଡେ ଅର୍‌ତୁଣ୍ଡ୍‌ କାଡ଼୍‌ଦେ ରେଃତ୍‌କେ ଅଣ୍ଡ୍‌ ବେସୁଙ୍କ୍‌ ଡ଼ଲିତଣ୍ଡ୍‌, ଆସୁଟ ଅଡ଼୍‌ ଜିୱେମାନ୍ଦାନ୍‌ ଗଡ୍‍ତିଙ୍କ୍‌ ୱାମି ଆଗେତ୍‌ ମୁଲ୍ୟ ରେଣ୍ଡ୍‌ ବାଗ୍‌ ମାଡ଼ିତଡ଼୍‌; ମେଣ୍ଡେ ଡ଼ଲତେ ଗଡ଼୍‌କିଙ୍କ୍‌ ବା ରେଣ୍ଡ୍‌ ବାଗ୍‌ ମାଡ଼ି ଅଦତଡ଼୍‌। 36 ମାତର୍‌ ଗଡ଼୍‌ତିଙ୍କ୍‌ ମୁନେ କାଡ଼୍‌ଦେ ରେଃତାଦ୍‌ ପୁନ୍‌ତଡ଼୍‌ ବେସୁଙ୍କୁ ତାନ ମୁଦ୍‌ପାଲ୍ ତାକିଙ୍କ୍‌ ସାବଦାନ୍‌ତେ ନେୱେମାନ୍‌ତଣ୍ଡ୍‌, ଆସୁଟ ଅଣ୍ଡ୍‌ ଗଡ୍‍ତେ ବାଦୁଲ୍‌ତେ ଗଡ୍‍ ଅଦ୍‌ତଣ୍ଡ୍‌, ମାତ୍ର ଡ଼ଲତେ ଗଡ୍‍ ଅନ୍‌ ନିଜର ଆଦ୍‌ତେ।