1 ତାନ୍‌ପେର୍କେ ମୋଶାଲ୍‌ ଉତ୍ତର ମାଡ଼୍‍ତଣ୍ଡ୍‌, "ଉଡ଼େ, ଅଡ଼୍ ନାକିଙ୍କ୍‌ ବିଶ୍ୱାସ ମାଡ଼ଡ଼୍‌ ନୁ ନା' ଗଟିନାଗ୍‌ ମାନ୍‌ ଇୱଡ଼୍‌; ମାତର୍‌ ଅଡ଼୍‍ କେତିତଡ଼୍, ସଦାପ୍ରବୁ ନିକିଙ୍କ୍‌ ଦର୍ଶନ ଇୱଣ୍ଡ୍‌ କି ?"

2 ଆସୁଟ୍‌ ସଦାପ୍ରବୁ ଅକିଙ୍କ୍‌ କେତ୍‍ତଣ୍ଡ୍‌, "ନି କାଇଦାଗ ବାତ୍‍ ମିନ୍ଦେ ?" ଅଣ୍ଡ୍‌ କେତ୍‍ତଣ୍ଡ୍‌, "ଡ଼ୁଡ଼୍।"

3 ଆସୁଙ୍କ୍‌ ଅଣ୍ଡ୍‌ କେତ୍‍ତଣ୍ଡ୍‌, ଆଦିଙ୍କ୍‌ ନେଲ୍‌ୱାଟା ଆସୁଙ୍କ୍‌ ଆଦିଙ୍କ୍‌ ନେଲ୍‌ ୱାଟୱାନାକେ, ଆଦ୍‍ ତାଡ଼ାମ୍‍ ଆତେ। ଆସୁଟେ ମୋଶାନ୍‌ ମୁନେଙ୍କ୍‌କନ୍‌ ମିରିତଣ୍ଡ୍‌। 4 ଆସୁଟ୍‌ ସଦାପ୍ରବୁ ମୋଶାଙ୍କ୍ କେତ୍‍ତଣ୍ଡ୍‌ ଅଡ଼୍ ମୁନେତ୍‍ ଆନିଦାଦିଡ଼୍‍ତେ ସଦାପ୍ରବୁ ପରମେଶ୍ୱର ଅର୍ଥାତ୍‍ ଅବ୍ରହାମତେ ପରମେଶ୍ୱର, ଇସ୍‍ହାକତେ ପରମେଶ୍ୱର ନୁ ଯାକୁବତେ ପରମେଶ୍ୱର ବେନ ମିକିଙ୍କ୍ ଦର୍ଶନ ଇସ୍‍ମିନ୍ଦେଣ୍ଡ୍‌ ଇଦି ବେଲା ଅଡ଼୍ ବିଶ୍ୱାସ ମାଡ଼ିତଡ଼୍‍। 5 ଆଦିଙ୍କ୍‌ ମାଇଦିଙ୍କ୍‌ ନିମେ ନିଜର ବିଶ୍ୱାସତେ କାଇଆସ୍‍ ତାନ୍‍ ତକେତିଙ୍କ୍‌ ପୟିମ୍‍ ଆସୁଟ୍‌ ଅଣ୍ଡ୍‌ କାଇଆସ୍‍ ପଇସ ୱାନାକେ ଅନ୍‍ କାଇଦାଗ୍‍ ଆଦ୍‍ ଡ଼ୁଡ଼୍ ଆତ୍‌ତେ। 6 ତାନ୍‌ପେର୍କେ ସଦାପ୍ରବୁ ଅଂକିଙ୍କ୍‌ ମେଣ୍ଡେ କେତ୍‍ତଣ୍ଡ୍‌ " ନିମେ ନିଜର କାଇ ଗୁଣ୍ଡ୍‌ତାଗ୍‌ ଇମ୍‍।" ଆସୁଟ୍‌ ଅଣ୍ଡ୍‌ ନିଜର କାଇ ଗୁଣ୍ଡେତାଗ୍‌ ଇସ୍‍ ମେଣ୍ଡନ୍‌ଦାମ୍‍ କାଇ ପେସ୍ପ୍‍ତଣ୍ଡ୍‌, ଉଡ଼େ, ଅନ୍‍କାଇ ଇମ୍‌ ଇନା ପାଣ୍ଡ୍ରିଆତ୍‍ତେ। 7 ଆସୁଟ୍‌ ଅଣ୍ଡ୍‌ କେତ୍‍ତଣ୍ଡ୍‌, ନିମେ ମେଣ୍ଡନ୍‌ଦାମ୍ ନିଜର କାଇ ଗୁଣ୍ଡ୍‌ତାଗ୍‌ ଇମ୍‍; ଅଡ଼୍ ବେସୁଙ୍କ୍‌ ନିକିଙ୍କ୍‌ ବିଶ୍ୱାସ ମାଡ଼ଡ଼୍‌ 8 ନୁ ମିୟାଦ୍‍ ଆଦ୍‍ ମୁନେତ୍ ଚିହ୍ନେତାଗ୍‌ ମାନ ଇମାଟ୍‌, ଆଲେକେ ଦ୍ୱିତୀୟ ଚିହ୍ନେତେ ବିଶ୍ୱାସ ମାଡ଼ିତିଡ଼୍‌। ଆସୁଟ୍‌ ଅଣ୍ଡ୍ ମେଣ୍ଡେ ମେଣ୍ଡନ୍‌ଦାମ୍‍ ନିଜର୍‌ କାଇ ଗୁଣ୍ଡେତାଗ୍‌ ଇସ୍‍ ପେସ୍ପତଣ୍ଡ୍‌, ଉଡ଼େ, ଆଦ୍‍ ନିଜେତେ ଆୱୁଙ୍ଗ୍‌ ଆତ୍‌ତା । 9 ଇ ରେଣ୍ଡ୍‌ ଚିହ୍ନେ ବେସୁଟ୍‌ ଅଡ଼୍ ବିଶ୍ୱାସ୍‌ ମାଡ଼ଡ଼୍‍ଆଦ୍‍ତଡ଼୍ ନୁ ନିମ୍‍ କେତାନାଦ୍‍ କେଞ୍ଜଡ଼୍ ଆଦ୍‍ତଡ଼୍‌, ଆସୁଟ୍‌ ନିମ୍‍ମେ ନୀଲ ସାଉଡ଼େତାଗାଙ୍କ୍‌ ଏର୍‍ ଇସୁର୍‌ ଅସ୍‍ ୱାସ୍‌ତେ ବୁମ୍‌ଦାଗ୍‍ ତସ୍‍ସେ ଆସୁଟ୍‌ ନିମ୍‍ ଇଲ୍‌କେତେ ବେନ୍‍ ଏର୍‍ ତାତିତି ଆଦ୍‍ ୱାସ୍‍ତେ ବୁମ୍‍ଦେ ନେତୁରୁ ଆଦ୍‌ତେ ।

10 ତାନ୍‌ପେର୍କେ ମୋଶାଲ୍ ସଦାପ୍ରବୁଙ୍କ୍‌ କେତ୍‍ତଣ୍ଡ୍‌ ହୋ ପ୍ରବୁ ଇଦି ସମୟତେ ମୁନେ ବା ନିଇ ନିଜର ଦାସନ୍‌ତଡ଼୍ ତିର୍ୟାନ୍‌ ୱେଲେ କେ ନାନେ ବାକ୍ୟପତି ଆୟନ୍‍ ମାତର୍‌ ନାନେ ବାକ୍ୟତେ ଯେୟି ନୁ ଅଦିକ୍ ଯେୟି।

11 ଆସୁଟ୍‌ ସଦାପ୍ରବୁ ଅକିଙ୍କି କେତ୍‍ତଣ୍ଡ୍‌ ନାରୁତେ ପାୟୁର୍‌ ବେନ୍‍ ତିଆର୍‍ ମାଡ଼ିମିନ୍ଦେଣ୍ଡ୍‌ ? ମେଣ୍ଡେ ନାରୁଙ୍କୁ କନ୍ଦାଲ୍‍ ବା ବୟ୍‍ରାଲ୍‌ ନୁ କଣ୍ଡ୍‌ତା ଉଡ଼ାନାଦ୍‍ ନୁ କଣ୍ଡ୍‌ତାଉଡ଼ୱାଦ୍‍ ବେନ୍‍ ମାଡ଼ିତଣ୍ଡ୍‌ ମାମ୍‍ ସଦାପ୍ରବୁ କି ଆଦ୍‍ ମାମ୍‍ ମାଡ଼ମ୍‍ ? 12 ଆଦିଙ୍କ୍‌ ଇଞ୍ଜେ ଆନ୍‌ ମାମ୍‍ ନୀଇ ପାୟୁର୍‌ ତଡ଼୍‍ତଡ଼୍ ଆସ୍‍ ଗଟି କେତାନାଦ୍‍ ନିକିଙ୍କି ନାଡ଼୍‌ସ୍ପିତମ୍‍।

13 ଆସୁଟ୍‌ ମୋଶାଲ୍ କେତ୍‍ତଣ୍ଡ୍‌ ହୋ ପ୍ରବୁ ନାନେ ବିନୟ ମାଡ଼ୁତାନ୍‍ ବେନିନ୍‍ତଡ଼୍‌ ରଃତାନଙ୍କ୍‌ ଆଦ୍‌ତେ, ଅନ୍‍ ତଡ଼୍‌ ରଃମ୍‍ । 14 ଆସୁଟ୍‌ ମୋଶାଙ୍କ୍‍ ପର ସଦାପ୍ରବୁନ୍‍ କପାମ୍‍ ଅଦିକ୍‌ ଆତ୍‌ତେ; ଆଦିଙ୍କ୍‌ ଅଣ୍ଡ୍‌ କେତ୍‍ତଣ୍ଡ୍‌, "ଲେବିୟ ହାରୋଣ କି ମିଇ ଦାଦାଲ୍‌ ଆୟଣ୍ଡ୍‌ ? ମାମେ ପୁତ୍‍ତମ୍‍, ଅଣ୍ଡ୍‌ ଲେକେତ୍‍ ବକ୍ତାଲ୍‌। ମେଣ୍ଡେ ଉଡ଼େ, ଅଣ୍ଡ୍‌ ମି ତଡ଼୍‌ କାଇଲାନଙ୍କ୍‍ ୱାଦୁତଣ୍ଡ୍‌; ମେଣ୍ଡେ ନିକିଙ୍କ୍‌ ଉଡ଼ି ୱାଡ଼୍‌କିତଣ୍ଡ୍‌। 15 ନିମେ ଅକିଙ୍କ୍‌ କେତ୍‍ତିତି ନୁ ଅନ୍‍ ପାୟୁର୍‌ ତାଗ୍‍ ବାକ୍ୟ ଇଦ୍‍ତି। ମେଣ୍ଡେ ନାନେ ନିଇ ପାୟୁର୍‌ ନୁ ଅନ୍‍ ପାୟୁର୍‌ତଡ଼୍ ଆସ୍‌ ନିକିଙ୍କ୍‌ ମାଡ଼୍‌ତେ ପାୟିଡ଼ିଦେ ଶିକ୍ଷା ଇଦ୍‌ତାନ୍‍। 16 ଆ ନାରୁଡ଼୍‌ ଗାରେ ମି ପାକେଙ୍କ୍‌ କେତାନଣ୍ଡ୍‌ ଆଦ୍‌ତଣ୍ଡ୍‌; ଅଣ୍ଡ୍‌ ନିୟାଦ୍‌ ମକମ୍‌ ଲେକାମ୍‌ ଆଦ୍‌ତଣ୍ଡ୍‌ ନୁ ନିମେ ତାନ୍‌ ପରମେଶ୍ୱର୍‌ ଲେକାମ୍‌ ଆଦ୍‌ତିନ୍‌। 17 ମେଣ୍ଡେ ନିମେ ନିଜର୍‌ କାଇଦେ ଇଦି ଡ଼ୁଡ଼୍ ପୟିମ୍‌, ବେଲାନ୍‌ ଇଦିନ୍‍ତଡ଼୍ ନିମେ ଇୱୁ ସାରେ ଚିହ୍ନେ ତତିତିନ୍‌।"

18 ତାନ୍‌ପେର୍କେ ମୋଶାଲ୍‌ ନିଜର୍‌ ମାମାଙ୍କ୍‌ ଯିଥ୍ରୋନ୍‍ ପାକେ ମାଲସ୍‍ ଆଞ୍ଜ୍‌ କେତ୍‍ତଣ୍ଡ୍‌, "ନାନେ ଅନୁରଦ୍ ମାଡ଼ୁତାନ୍‍, ମିସର୍ ଦେଶ୍‌ତା ନା ଦାଦାଲଡ଼୍ ଗାରେ ଇଞ୍ଜେ ମାଲସ୍‍ ଆଦାନ୍‌ ମାଇଦିଙ୍କ୍‌ ନୁ ଅଡ଼୍ ନେଣ୍ଡ୍‌ ଆଇନା ଗେଲ୍ସିମିନ୍ଦେଡ଼୍‌ କି ଇଲ୍ଲେ, ଆଦ୍‍ ଉଡ଼ାନ୍‍ ମାଇଦିଙ୍କ୍‌ ନାକିଙ୍କ୍‌ ଆଦାନଙ୍କ୍‌ ଇମୁଟ୍‌।" ଆସୁଟ୍‌ ଯିଥ୍ରୋ ମୋଶାଙ୍କ୍‍ କେତ୍‍ତଣ୍ଡ୍‌, "ଲେକେତ୍‌ ଆନ୍‍।"

19 ମେଣ୍ଡେ ସଦାପ୍ରବୁ ମିଦୀୟନ୍‌ତାଗ୍‍ ମୋଶାଙ୍କ୍‍ କେତ୍‌ତଣ୍ଡ୍‌, ନିମେ ମିସରତାଗ୍‍ ମାଲ୍‌ସ୍‌ଆଞ୍ଜ୍‌; ବେଲାନ୍‌ କି ବେନ୍‍ ନାରୁଡ଼୍ ନିଇ ଜିୱୁଅଦାଙ୍କ୍‌ ମେଃକମାତ୍‌ତଡ଼୍, ଅଡ଼୍ ସାରେତଡ଼୍ ଡଲି ମିନ୍ଦେଡ଼୍। 20 ଆସୁଟ୍‌ ମୋଶାଲ୍‌ ନିଜର ମୁତେ ନୁ ମାର୍‍କିଡ଼୍‌କ୍‌ ଗଦ ପର ତାର୍‌ସ୍ପି ମିସର୍ ଦେଶ୍‌ତାକ୍‌ ମାଲ୍‌ସ୍‍ ଆତ୍‍ତଡ଼୍; ମେଣ୍ଡେ, ମେଣ୍ଡେ ଅଣ୍ଡ୍‌ କାଇଦେ ପରମେଶ୍ୱରଦେ ଆଦ୍‌ ଡ଼ୁଡ଼୍ ଅତ୍‍ତଣ୍ଡ୍‌।

21 ସଦାପ୍ରବୁ ମୋଶାଙ୍କ୍‍ କେତ୍‍ତଣ୍ଡ୍‌, "ସାବଦାନ୍‍, ନିମେ ମିସରତାକ୍‌ ମାଲସ୍‍ ଆତ୍କେ, ମାମ୍‍ ନିଇ କାଇଦାଗ୍‌ ବେନ୍‍ ସାରେ ବାକ୍‌ୱା ପାଡ଼ିୟ୍‌ ମାଡ଼ାନ୍‍ଙ୍କ୍‍ ଇସ୍‌ମିନ୍ଦେମ୍‌, ଆଦ୍‍ ଫାରୋ କାଇଲିତେ; ମାତର୍‌ ମାନାଡ଼୍‌ ଅନ୍‍ ମନ୍‍ ଗାଡ଼୍‍ସ୍‍ ମାଡ଼ିକାଡ଼୍‌; ଆସୁଟ୍‌ ଅଣ୍ଡ୍‌ ନାରୁଡ଼୍‍କିଙ୍କ୍‌ ଆଦାନଙ୍କ୍‌ ୱିଡ଼୍‌ସଣ୍ଡ୍‌।" 22 ମେଣ୍ଡେ, ନିମେ ଫାରୋଙ୍କ୍‍ କେତିତିନ୍‌, ସଦାପ୍ରବୁ କେତିତଣ୍ଡ୍‌, ଇସ୍ରାଏଲ୍‌ ମା ମାର୍‍; ମା ବାଡ଼ିୟେ ମାର୍‍; 23 ମାମେ ମିକିଙ୍କ୍ କେସ୍‍ ମିନ୍ଦେମ୍‍, ମା ସେବା ମାଡ଼ାନ୍‍ ମାଇଦିଙ୍କ୍‌ ନିମେ ମା ମାର୍‍କିଙ୍କ୍ ୱିଡ଼୍‌ସିମ୍‍; ମାତର୍‌ ନିମେ ଅକିଙ୍କ୍‌ ୱିଡ଼୍‌ସାନଙ୍କ୍‍ ମନାମାଡ଼ୁତି; ଉଡ଼େ, ମାମେ ନି ମାରିଙ୍କ୍‌, ନି ବେଡ଼ିୟେ ମାରିଙ୍କ୍‌ ଆୱୁକିକାଡ଼୍‌।

24 ତାନ୍‌ପେର୍କେ ଆର୍‍ଦାଗ୍‌ ମାନ୍ଦାନ୍‌ ଗୁଡ଼ୁସେତାଗ୍‌ ସଦାପ୍ରବୁ ମୋଶାଙ୍କ୍‌ ଦର୍ସ୍କି ଆୱୁକାନଙ୍କ୍‍ ଚେଷ୍ଟା ମାଡ଼୍‌ତଣ୍ଡ୍‌। 25 ଆସୁଙ୍କ୍‌ ସିପ୍‍ପୋରା ଅଣ୍ଡୟ୍‌ ୱାୟେ ମାନ୍ଦାନ୍‍ କେସେର୍‌ ପଇସ୍‍ ନିଜର୍‌ ମାର୍‌ରିଙ୍କ୍‌ ସୁନ୍ନତ ମାଡ଼ି ଆଦ୍‌ ଅନ୍ ଡେକାନ୍‌ ମଦଲ୍‌ ୱାଟି କେତ୍‍ତଣ୍ଡ୍‌, "ନିମେ ନିଜାମ୍‌ ନା ନେତୁର୍‌ତେ ପେଣ୍ଡୁଲ୍‌ ମାନେଇ।" 26 ଇଦ୍‌ଲେକା‌ମ୍‌ ପରମେଶ୍ୱର ଅକିଙ୍କ୍‌ ୱିଡ଼୍‌ସିତ୍‍ତଣ୍ଡ୍। ଆସୁଟ୍‌ ଆଦ୍‌ ନାଟାଡ଼୍ କେତ୍‍ତେ, "ସୁନ୍ନତ୍‍ତେ ନିମେ ନିଜାମ୍‌ ନେତୁର୍‌ତେ ପେଣ୍ଡୁଲ୍‌ ମାନେଇ।" 27 ତାନ୍‌ପେର୍କେ ସଦାପ୍ରବୁ ହାରୋଣତିଙ୍କ୍‌ କେତ୍‍ତଣ୍ଡ୍‌, "ନିମେ ମୋଶାନ୍‍ ତଡ଼୍ କାଇଲାନ୍‌ ସେଙ୍ଗେ ଆଞ୍ଚିନାକ୍‌ ଆନ୍‌।" ଆସୁଟ୍‌ ଅଣ୍ଡ୍‌ ଆଞ୍ଜ୍‌ ପରମେଶ୍ୱରଦେ ମେଟେତାଗ୍‌ ଅନ୍‍ ତଡ଼୍ କାଇଲି ଅଙ୍କ୍‌ ଚୁମା ଇତ୍‍ତଣ୍ଡ୍‌। 28 ଆସୁଟ୍‌ ମୋଶାଲ୍‌ ସଦାପ୍ରବୁଙ୍କ୍‌ ପ୍ରେରିତ୍‍ ସାରେ ବାକ୍ୟ ନୁ ଅନ୍‍ ଆଦେଶ୍‌ତେ ମାଡ଼୍‌ତାୱୁ ସାରେ ଚିହ୍ନେ ହାରୋଣତିଙ୍କ୍‌ କେଞ୍ଜସ୍ପ୍‌ତଣ୍ଡ୍‌। 29 ତାନ୍‌ପେର୍କେ ମୋଶାଲ୍‌ ନୁ ହାରୋଣ ଆଞ୍ଜ୍‌ ଇସ୍ରାଏଲତେ ବେଡ଼ିୟ୍‌ ନାରୁଡ଼୍‌ ଅଣ୍ଡୟ୍‌ତାଗ୍‍ ମାଡ଼୍‍ତଡ଼୍। 30 ମେଣ୍ଡେ, ହାରୋଣ ଅଡ଼୍‍କିଙ୍କ୍‌ ମୋଶାନ୍‍ ପରୁ କେସ୍‌ମାନ୍ଦାନ୍‌ ସଦାପ୍ରବୁନ୍‌ ସାରେ ବାକ୍ୟ କେତ୍‌ତଣ୍ଡ୍‌, ମେଣ୍ଡେ, ନାରୁଡ଼୍ ମୁନେ ଆୱୁ ସାରେ ଚିହ୍ନେ ତତ୍‌ତଡ଼୍‌। 31 ଆସୁଟ୍‌ ନାରୁଡ଼୍ ବିଶ୍ୱାସ ମାଡ଼୍‌ତଡ଼୍‌, ମେଣ୍ଡେ, ସଦାପ୍ରବୁ ଇସ୍ରାଏଲତେ ପିଲାକିନ୍‌ ଯତ୍ନ ମାଡ଼ାନାଦ୍‌ ନୁ ଅଡ଼୍ ଦୁକାମ୍‌ ଉଡ଼ିମିନ୍ଦେଡ଼୍‌, ଇଦି କେଞ୍ଜି ଅଡ଼୍‌ ଅଂକିଙ୍କ୍‌ ତାଲେ ଆଡ଼୍‌ଗି ମାଡ଼ି ପ୍ରଣାମ୍‌ ନୁ ଉପାସନା ମାତ୍‌ତଡ଼୍‌।