1 ମେଣ୍ଡେ ମା ମାଇଦିଙ୍କ୍‌ ଯାଜକ୍‌ ପାଡ଼ିୟ୍‌ ମାଡ଼ାନ୍‌ମାଇଦିଙ୍କ୍‌ ମିଡ଼୍‌ ଇସ୍ରାଏଲତେ ମାର୍କିକ୍‌ ଆଗାଙ୍କ୍‌ ନିଜର ଦାଦାଙ୍କ୍‌ ହାରୋଣତିଙ୍କ୍‌ ନୁ ତାନ୍‌ ତଡ଼୍‌ ତାନ୍‌ ମାର୍କିଡ଼୍‌କ୍‌, ଇତ୍କେ, ହାରୋଣ, ନାଦବ୍‌ ଅବୀହୂ, ଇଲୀୟାସର ନୁ ଈଥାମରତିଙ୍କ୍‌ ମା ଗାରେ ତାତ୍‌ତିନ୍‌ତି। 2 ମିଇ ଦାଦାଲ୍‌ ହାରୋଣତେ ସନ୍‌ମାନ୍‌ ନୁ ସୁନ୍ଦର୍‌ତେ ମାଇଦିଙ୍କ୍‌ ପବିତ୍ର ଚିଲେ ତିଆର୍‌ ମାଡ଼ିତିଡ଼୍‌। 3 ମେଣ୍ଡେ ମାମ୍‌ ବେନଙ୍କ୍‌ ଜ୍ଞାନଦାୟକ୍‌ ଆତ୍ମାତେ ନିଣ୍ଡୁଙ୍କ୍‌ ମାଡ଼ିମିନ୍ଦେମ୍‌, ଆ ସାରେ ବିଜ୍ଞମନା ନାରୁଡ଼୍‌କିଙ୍କ୍‌ ଆଦେଶ୍‌ ମାଡ଼ାଟ୍‌; ମା ମାଇଦିଙ୍କ୍‌ ଯାଜକ୍‌ ପାଡ଼ିୟ୍‌ ମାଡ଼ାନ୍‌ ମାଇଦିଙ୍କ୍‌ ହାରୋଣତିଙ୍କ୍‌ ପବିତ୍ର ମାଡ଼ାନ୍‌ ମାଇଦିଙ୍କ୍‌ ଅଡ଼୍‌ ଆଦିନ୍‌ ଚିଲେ ତିଆର୍‌ ମାଡ଼ିତଡ଼୍‌। 4 ଇତ୍କେ, ବୁକୁପଟା, ଏଫୋଦ, ଲାଟି ଚକା, ବୁଟାଦାର ଜାମା, ପାଗ ନୁ ପାଡ଼େତାଗ୍‌ ତଃତାନାଦ୍‌, ଇୱୁ ସାରେ ଚିଲେ ଅଡ଼୍‌ ତିଆର୍‌ ମାଡ଼ିତଡ଼୍‌; ମା ଲେକାମ୍‌ ଯାଜକ୍‌ ପାଡ଼ିୟ୍‌ଦେ ମାଇଦିଙ୍କ୍‌ ମି ଦାଦାଲ୍‌ ହାରୋଣ ନୁ ଅନ୍‌ ମାର୍କ ମାଇଦିଙ୍କ୍‌ ଅଡ଼୍‌ ପବିତ୍ର ଚିଲେ ତିଆର୍‌ ମାଡ଼୍‌ତିଡ଼୍‌। 5 ଅଡ଼୍‌ ସନ୍‌ଦେ, ନିଲ, ଉମେ, ସିନ୍ଦୁର୍‌ କଲର୍‌ ନୁ ନଟ୍‌ତେ ପାଣ୍ଡ୍ରିଲାଦ୍‌ ଚୁଦୁଲାଦ୍‌ ଅଦ୍‌ତିଡ଼୍‌।

6 ମେଣ୍ଡେ ଅଡ଼୍‌ ଆ ସନ୍‌ଦେ ନୁ ନିଲ, ଉମେ, ସିନ୍ଦୁର୍‌ ରଙ୍ଗ୍‌ ନୁ ନଟ୍‌ତେ ପାଣ୍ଡ୍ରିଲାଦ୍‌ ଚୁଦୁଲାଦ୍‌ ନୁଲ୍‌ଦେ ତିଆର୍‌ ଆତ୍‌ତେ କାଲ୍‌ଦେ ପାଡ଼ିୟେ ମାଡ଼ାଙ୍କ୍‌ ପୁତ୍‌ତେନଡ଼୍‌ ଏଫୋଦଚିଲେ ତିଆର୍‌ ମାଡ଼ିତଡ଼୍‌। 7 ଆଗେ ରେଣ୍ଡ୍‌ ତାଲାନାଗ୍‌ ନିଜେ ନିଜେ କାଇଲି ରେଣ୍ଡ୍‌ ଆଟା ରଃସ୍ପିମାନ୍ଦ୍‌ତଡ଼୍‌; ଇଦ୍‌ଲେକାମ୍‌ ଆୱୁ ମୁକ୍ତ ଆଦ୍‌ତା। 8 ମେଣ୍ଡେ ଏଫୋଦର୍‌ ବେନ୍‌ ଚିତ୍ରତେ ପଟୁକାତ୍‌ ଆଗେତ୍‌ ପର ମାନ୍‌ତେ, ଆଗେତ୍‌ ଚିତ୍ର ପାଡ଼ିୟ୍‌ଦେ ଆ ଚିଲେ ଲେକାମ୍‌ ଆଦ୍‌ତେ; ଇତ୍କେ, ସନ୍‌ଦେ, ନିଲ, ଉମେ, ସିନ୍ଦୁର୍‌ରଙ୍ଗ୍‌ ନୁ ନଟ୍‌ତେ ପାଣ୍ଡ୍ରି ଚୁଦୁଲାଦ୍‌ ଚିଲେ ଆଦ୍‌ତେ। 9 ଲପେକନ୍‌ ମିଡ଼୍‌ ରେଣ୍ଡ୍‌ ଗୋମେଦକ ମଣି* ଆସି ଆଗେତ୍‌ ପର ଇସ୍ରାଏଲତେ ମାର୍‌କିଡ଼୍‌ ପେଦେର୍‌ ଲେକିତିଡ଼୍‌। 10 ଇତ୍କେ, ଅଡ଼୍‌ ପିଲୁଡ଼୍‌ ଲେକାମ୍‌ ଆରୁନ୍‌ପେଦେ ଅଣ୍ଡୟ୍‌ ମଣି ପର ନୁ ମେଣ୍ଡେ ବାଗାତ୍‌ ପେଦେ ଆରୁ ପେଦେ ମେଣ୍ଡେ ୱେର୍‌ ମଣି ପର ଡ଼େୱିତିଡ଼୍‌। 11 ଶିଲ୍ପ ପାଡ଼୍‌ୟିତେ ପାୟିସାଙ୍କ୍‌ ଡେୱାନ୍‌ ନ୍ୟାୟ୍‌ ଆ ରେଣ୍ଡ୍‌ ମଣି ପର ଇସ୍ରାଏଲତେ ମାର୍‌କିଡ଼୍‌ ପେଦେର୍‌ ଡେୱିତିଡ଼୍‌, ମେଣ୍ଡେ ଆଦ୍‌ ରେଣ୍ଡ୍‌ ସନ୍‌ଦେ ଦୁୱାର୍‌ ବନ୍ଦ ମାଡ଼ିତିଡ଼୍‌। 12 ମେଣ୍ଡେ ଇସ୍ରାଏଲତେ ମାର୍କିଡ଼୍‌କ୍‌ ଏତ୍‌ମାଡ଼୍‌ ମାଡ଼ାନ୍‌ମାଇଦିଙ୍କ୍‌ ମିଡ଼୍‌ ଆ ରେଣ୍ଡେ ମଣି ଏଫୋଦରତେ ରେଣ୍ଡେ ଟିକିଡ଼୍‌ତେ ଚିଲେ ଇଦିତିଡ଼୍‌; ଆଗେ ହାରୋଣତେ ଏତ୍‌ମାନ୍ଦାନ୍‌ ମାଇଦିଙ୍କ୍‌ ସଦାପ୍ରବୁନ୍‌ ମୁନେ ନିଜର ରେଣ୍ଡେ ଆଟେତାଗ୍‌ ଅଡ଼୍‌ ପେଦେର୍‌ କାଞ୍ଜିତିଡ଼୍‌। 13 ମେଣ୍ଡେ ମିଡ଼୍‌ ରେଣ୍ଡେ ସୁନାତାଦ୍‌ ଇକ୍‌ଲେମ୍‌ ମାଡ଼ିତିଡ଼୍‌ 14 ନୁ ନିର୍ମଲ୍‌ ସନ୍‌ଦେ ତଡ଼୍ ରେଣ୍ଡେ ମାଡ଼୍‌ତା ଜଞ୍ଜିର ମାଡ଼ି ଆ ମାଡ଼୍‌ପ୍‌ତେ ଜଞ୍ଜିର ଆ ରେଣ୍ଡେ ଆଦାର୍‌ତେ ଲାଗାମାଡ଼ିତିଡ଼୍‌।

15 ମେଣ୍ଡେ ମିସ୍ତ୍ରିପାଡ଼୍‌ୟିଦେ ବିଚାର୍‌ତାଗ୍‌ ବୁକୁପଟା* ମାଡ଼ିତିଡ଼୍‌, ଇତ୍କେ, ଏଫୋଦର୍‌ ପାଡ଼ିୟି ଲେକାମ୍‌ ସନ୍‌ତେ ନିଲ, ଉମେ, ସିନ୍ଦୁର୍‌ ରଙ୍ଗ୍‌ ନୁ ନଟ୍‌ତେ ପାଣ୍ଡ୍ରି ଚୁଦୁଲାଦ୍‌ ଚିଲେତେ ତିଆର୍‌ ଆତ୍‌ତେ ମିସ୍ତ୍ରିପାଡ଼ିୟି ତଡ଼୍‌ ଆଦ୍‌ ତିଆର୍‌ ମାଡ଼ିତିଡ଼୍‌। 16 ଆଦ୍‌ ନାଲୁମୁଲା ନୁ ପିତା ଆଦ୍‌ତେ; ଆଗେତ୍‌ ଦୈର୍ଗ୍ୟ ଅଣ୍ଡୟ୍‌ ବିତା ନୁ ଓସାର୍‌ ଅଣ୍ଡୟ୍‌ ବିତା ଆଦ୍‌ତେ। 17 ମେଣ୍ଡେ ତାକିଙ୍କ୍‌ ନାଲୁ ଦାଢି ମଣିତେ କଚିତ୍‌ ମାଡ଼ିତିଡ଼୍‌, ଆଗେତ୍‌ ପ୍ରତୁମ୍‌ ଲାଇନ୍‌ତେ ଚୁଣି*, ପିତମଣି ନୁ ମରକତ; 18 ଦ୍ୱିତିୟ୍‌ ଲାଇନ୍‌ତେ ପଦ୍ମରାଗ, ନିଲକାନ୍ତ ନୁ ହିରକ 19 ତୃତିୟ ଲାଇନ୍‌ତେ କମଲା ଲେକେତ୍‌ କାଲ୍‌, ଗୋଲ୍‌ତେ କାଲ୍‌ ନୁ ଇନ୍ଦ୍ରନିଳମଣି 20 ମେଣ୍ଡେ ଚତୁର୍ଥ ଲାଇନ୍‌ତାଗ୍‌ ବୈଦୁର୍ଯ୍ୟ, ଗୋମେଦକ, ପଡ଼ଦ୍‌ ଲେକ୍‌ତାଦ୍‌; ଇସାରେ ସନ୍‌ତେ ନିଜର ନିଜର ଲାଇନ୍‌ତେ କୁସ୍‌ପିତଡ଼୍‌। 21 ଇଦ୍‌ ମଣି ଇସ୍ରାଏଲତେ ନାରୁଡ଼୍‌ ମାଇଦିଙ୍କ୍‌ ଅଡ଼୍‌ ପେଦେର୍‌ ଲେକାମ୍‌ ବାରଟାନ୍‌ ଆଦ୍‌ତା; ପାୟିସାନ୍ ନ୍ୟାୟ୍‌ ଡେୱୁତେ ସାରେ ମଣିତେ ଆ ବାରଟାନ୍‌ ପିଲୁଡ଼୍‌ତେ ମାଇଦିଙ୍କ୍‌ ସାରେ ମାର୍‌କିନ୍‌ ପେଦେର୍‌ ମାନ୍‌ତେ। 22 ମିଡ଼୍‌ ନିର୍ମଲ୍‌ ସନ୍‌ଦେ ତଡ଼୍‌ ବୁକୁପଟା ମାଇଦିଙ୍କ୍‌ ମାଲା ଲେକାମ୍‌ ମାଡ଼୍‌ପିତିଡ଼୍‌ ରେଣ୍ଡେ ଜଞ୍ଜିର୍‌ ତିଆର୍‌ ମାଡ଼ିଡ଼୍‌ତିଡ଼୍‌। 23 ମେଣ୍ଡେ ବୁକୁପଟା ପର ସନ୍‌ଦେ ରେଣ୍ଡ୍‌ ମୁଦା ମାଡ଼ିତିଡ଼୍‌ ନୁ ବୁକୁପଟା ରେଣ୍ଡ୍‌ ଆଞ୍ଚିନା ଆ ରେଣ୍ଡ୍‌ ମୁଦା ଲାଗାମାଡ଼ିତିଡ଼୍‌। 24 ମେଣ୍ଡେ ବୁକୁପଟା ରେଣ୍ଡ୍‌ ଆଞ୍ଚିନା ରେଣ୍ଡ୍‌ କଡ଼ାନ୍‌ ନାଡ଼୍‌ମେ ଆ ରେଣ୍ଡ୍‌ ମାଡ଼୍‌ପେତେ ସନ୍‌ଦେ ଜଞ୍ଜିର୍‌ ଲଗାମାଡ଼ିତିତିଡ଼୍‌ । 25 ମେଣ୍ଡେ ମାଡ଼୍‌ତେ ଜଞ୍ଜିର୍‌ ରେଣ୍ଡ୍‌ ତାଲାନ୍‌ ରେଣ୍ଡିନ୍‌ତଡ଼୍‌ ବନ୍ଦ ମାଡ଼ି ଏଫୋଦଚିଲେତେ ମୁନେତ୍‌ ଜାବାନ୍‌ ପର ନେଃତିଡ଼୍‌। 26 ମିଡ଼୍‌ ସନ୍‌ତେ ରେଣ୍ଡ୍‌ ମୁଦା ତିଆର୍‌ ମାଡ଼ି ବୁକୁପଟାତେ ଆଞ୍ଚିନା ଏଫୋଦଚିଲେତେ ମୁନେତ୍‌ ଲପେ ବାଗ୍‌ତାଗ୍‌ ନେଃତିତିଡ଼୍‌। 27 ମେଣ୍ଡେ ରେଣ୍ଡ୍‌ ସନ୍‌ଦେ ମୁଦା ମାଡ଼ି ଏଫୋଦଚିଲେତେ ରେଣ୍ଡ୍‌ ଆଟେତ୍‌ ମଦଲ୍‌ ଆଗେତ୍‌ ମୁନେତ୍‌ ବାଗ୍‌ ଯଡ଼୍‌ପ୍‌ତେ ପଡ଼ିୟ୍‌ତାଗ ଏଫୋଦତେ ଚିତ୍ରମାନ୍ଦାନ୍‌ ପଟୁକା ପର ଆଦ୍‌ ନେଃତିଡ଼୍‌। 28 ଆସୁଟ୍‌ ବୁକୁପଟା ବେଲାନେ ଏଫୋଦତେ ଚିତ୍ର ପଟୁକାତେ ପର ମାଞ୍ଜ୍‌ ଏଫୋଦ୍‌ ତାଗାଙ୍କ୍‌ ରାଇମାକି, ଇଦିନ୍‌ମାଇଦିଙ୍କ୍‌ ଅଡ଼୍‌ ବୁକୁପଟାତିଙ୍କ୍‌ ନିଜ ମୁଦା ନିଲ ନୁଲ୍‌ଦଡ଼୍‌ ଏଫୋଦତେ ମୁଦେତଡ଼୍‌ ବନ୍ଦ ମାଡ଼ି ନେଃଡ଼ିତିଡ଼୍‌। 29 ବେନ୍‌ ସମୟ୍‌ତେ ୱେଲେ ହାରୋଣ ପବିତ୍ର ପଡ଼ିୟିତାଗ ନେଙ୍ଗିତଣ୍ଡ୍‌, ଆ ସମୟତେ ସଦାପ୍ରବୁନ୍‌ ମୁନେ ନିତାଲ୍‌ ଏର୍‌କେମାଡ଼୍‌ନ୍‌ ମାଇଦିଙ୍କ୍‌ ଅଣ୍ଡ୍‌ ବିଚାର୍‌ତେ ମାଇଦିଙ୍କ୍‌ ବୁକୁପଟାତେ ଇସ୍ରାଏଲତେ ମାର୍କିଡ଼୍‌ ପେଦେର୍‌ ସାରେ ନିଜର ହୃଦୟତେ ପର କାଞ୍ଜିତିଡ଼୍‌। 30 ଆ ବିଚାର୍‌ତେ ମାଇଦିଙ୍କ୍‌ ବୁକୁପଟାତେ ମିଡ଼୍‌ ଉରିମ୍‌ ନୁ ୱେସ୍‌ ନୁ ସିଦ୍ଧ ନେଃତିତିଡ଼୍‌; ଆସୁଟ ହାରୋଣ ବେନ୍‌ ସମୟତେ ସଦାପ୍ରବୁନ୍‌ ମୁନେ ନେଙ୍ଗିତଣ୍ଡ୍‌, ଆ ସମୟତେ ହାରୋଣତେ ହୃଦୟ୍‌ ପର ଆଦ୍‌ ମାନ୍‌ତେ, ମେଣ୍ଡେ ହାରୋଣ ସଦାପ୍ରବୁନ୍‌ ମୁନେ ନିତାଲ୍‌ ନିତାଲ୍‌ ଇସ୍ରାଏଲତେ ମାର୍‌କିଡ଼୍‌ ବିଚାର୍‌ ନିଜର ହୃଦୟତେ ପର କାଞ୍ଜିତିଡ଼୍‌।

31 ମିଡ଼୍‌ ଏଫୋଦତେ ଲାଟିଚକା ସାରେ ନିଲରଙ୍ଗ୍‌ ତିଆର ମାଡ଼ିତିଡ଼୍‌। 32 ଆଗେତ୍‌ ନାଡ଼୍‌ମେ ତାଲ୍‌ଲେ ନେତାନ୍‌ ମାଇଦିଙ୍କ୍‌ ଅଣ୍ଡୟ୍‌ ଦର୍ରେ ମାନ୍‌ତେ; ସାଞ୍ଜୁନେଡ଼େମ୍‌ ଗଲଦେଶ୍‌ତେ ନ୍ୟାୟ୍‌ ଆ ଦର୍ରେ ତିଡ଼୍‌ପାକା ୱିତାନ୍‌ପାୟିଡ଼୍‌ ଆଦ୍‌ତେ, ଆଗାକନ୍‌ ଆଦ୍‌ ତେଗ ଆଦ୍‌ତେ। 33 ମେଣ୍ଡେ ମିଡ଼୍‌ ଆ ଅଞ୍ଚଲ୍‌ତେ ତିଡ଼ିପାକେ ନିଲ, ଉମେ,ଆପେ, ସିନ୍ଦୁର୍‌ ରଙ୍ଗ୍‌ଦେ ଡାଲିମ୍ୱ ମାଡ଼ିତିଡ଼୍‌, ମେଣ୍ଡେ ତିଡ଼ିପାକା ଆଗେ ନାଡ଼୍‌ମେ ନାଡ଼୍‌ମେ ସନ୍‌ଦେ ଗାଟି ମାନ୍‌ତା। 34 ଆ ଲାଟିଚକାତେ ଲାଇନ୍‌ ତିଡ଼ିପାକା ଅଣ୍ଡୟ୍‌ ସନ୍‌ଦେ ଗାଣ୍ଟା ନୁ ଅଣ୍ଡୟ୍‌ ଡାଲିମ୍ୱ କାୟେ ମେଣ୍ଡେ ଅଣ୍ଡୟ୍‌ ସନ୍‌ଦେ ଗାଣ୍ଟା ନୁ ଅଣ୍ଡୟ୍‌ ଡ଼ାଲିମ୍ୱ କାୟେ ମାନ୍‌ତେ। 35 ମେଣ୍ଡେ ହାରୋଣ ସେବା ମାଡ଼ାନ୍‌ ସମୟତେ ଆଦ୍‌ କେର୍‌ଦ୍‌ତଣ୍ଡ୍‌; ଆଗାକନ୍‌ ଅଣ୍ଡ୍‌ ବେସୱେଲେ ସଦାପ୍ରବୁନ୍‌ ମୁନେ ପବିତ୍ର ପଡ଼ିୟେତାଗ ନେଙ୍ଗିତଣ୍ଡ୍‌ ନୁ ବେସୁଙ୍କ୍‌ ଅଣ୍ଡ୍‌ ଆଗାଙ୍କ୍‌ ବାୟିଦେ ପେଇତ୍‌ତଣ୍ଡ୍‌, ଆସୱେଲେ ଆଗେତ୍‌ ଲେଙ୍ଗ୍‌ କେଞ୍ଜି ଆଦ୍‌ତେ; ଆଲାଇତ୍‌କେ ଅଣ୍ଡ୍‌ ଡଲଣ୍ଡ୍‌।

36 ମେଣ୍ଡେ ମିଡ଼୍‌ ନିର୍ମଲ୍‌ ସନ୍‌ତେ ଅଣ୍ଡୟ୍‌ ଆକ୍‌ କେତ୍‌ ତିଆର୍‌ ମାଡ଼ି ମୁଦ୍ରା ନ୍ୟାୟ୍‌ ଆଦିନ୍‌ ପର "ସଦାପ୍ରବୁନ୍‌ ମାଇଦିଙ୍କ୍‌ ପବିତ୍ର" କୋଦନ ମାଡ଼ିତିଡ଼୍‌। 37 ମେଣ୍ଡେ ତାଲ୍‌ଗୁଡ଼୍‌ ପରୁ ମାନ୍ଦାନ୍‌ ମାଇଦିଙ୍କ୍‌ ଆଦ୍‌ ନିଲ ରଙ୍ଗ୍‌ଦେ ନୁଲ୍‌ଦେ ତଃସ୍‌ ତାଲ୍‌ଗୁଡ଼୍ ମୁନେ ୱାଟିତିଡ଼୍‌। 38 ଆଦ୍‌ ହାରୋଣତେ ମୁଞ୍ଜିନାଗ୍‌ ମାନ୍‌ତେ, ଆଗେ ପବିତ୍ର ଦ୍ରବ୍ୟ ତିଆର୍‌ ଆତ୍‌ତେ ଅପରାଦ୍‌, ଇତ୍କେ, ଇସ୍ରାଏଲତେ ମାର୍‌କିଡ଼୍‌ ନିଜର ମାଇଦିଙ୍କ୍‌ ପବିତ୍ରତେ ପବିତ୍ର ଦାନାଦି ସାରେ ଦ୍ରବ୍ୟ ବିଷୟତେ ବେନ୍‌ ଅପରାଦ୍‌ ମାଡ଼ିତଡ଼୍‌, ଆଦ୍‌ ହାରୋଣତେ କାଞ୍ଜିତଣ୍ଡ୍‌ ନୁ ସଦାପ୍ରବୁନ୍‌ ମୁନେ ଅଡ଼୍‌ ବେଲାନେ ୱିଡ଼୍‌ସି ଆଦ୍‍ତଡ଼୍‌, ଇଦିନ୍‌ମାଦିଙ୍କ୍‌ ଆଦ୍‌ ସାରେଦିନା ଅନ୍‌ ମୁଞ୍ଜିନାଗ୍‌ ଗୌରବ୍‌ ମାନ୍‌ତେ। 39 ମିଡ଼୍‌ ଚକାଙ୍କ୍‌ ବୁଟାଦାର୍‌ ପାଣ୍ଡ୍ରି ଚିଲେତେ ନୁ ତାଲେଗୁଡ଼୍‌ ପାଣ୍ଡ୍ରି ଚୁଦୁଲାଦ୍‌ ନୁଲ୍‌ଦେ ତିଆର୍‌ ମାଡ଼ିତିଡ଼୍‌; ମେଣ୍ଡେ ଟିକିଡ଼୍‌ତିଙ୍କ୍‌ ସାୟେ ପାଡ଼୍‌ୟି ତଡ଼୍‌ କାବ୍ରା ଚିତ୍ରା ମାଡ଼ିତିଡ଼୍‌।

40 ମେଣ୍ଡେ ହାରୋଣତେ ମାର୍କିଡ଼୍‌ ମାଇଦିଙ୍କ୍‌ ଚକା ନୁ ଟିକିଡ଼୍‌ ତିଆର୍‌ ମାଡ଼ିତିଡ଼୍‌, ମେଣ୍ଡେ ଅଡ଼୍‌କିଙ୍କ୍‌ ସନ୍‌ମାନ୍‌ ନୁ ସୁନ୍ଦରତେ ମାଇଦିଙ୍କ୍‌ ତାଲ୍‌ଗୁଡ଼୍‌ ମାଡ଼ିତିଡ଼୍‌। 41 ମେଣ୍ଡେ ମି ଦାଦାଙ୍କ୍‌ ହାରୋଣତିଙ୍କ୍‌ ନୁ ତାନ୍‌ ମାର୍‌କିଡ଼୍‌ ମେନ୍ଦୁଲ୍‌ତାଗ୍‌ ଆୱୁସାରେ କେର୍ସ୍ପାନଙ୍କ୍‌ କେତ୍‌ତିଡ଼୍‌; ମେଣ୍ଡେ ଅଡ଼୍‌କିଙ୍କ୍‌ ପେର୍କେ ମାଡ଼ି ପଦତାଗ୍‌ ହେଞ୍ଚି ନୁ ପବିତ୍ର ମାଡ଼ିତିଡ଼୍‌, ଆସୁଟ୍‌ ଅଡ଼୍‌ ମାଆ ଯାଜକ୍‌ ପାଡ଼ିୟ୍‌ ମାଡ଼ିତଡ଼୍‌। 42 ମିଡ଼୍‌ ଅଡ଼୍‌ ମେନ୍ଦୁଲ୍‌ତେ ବାଣ୍ଡାଲ୍‌ ମୁସାନ୍‌ମାଇଦିଙ୍କ୍‌ ଟିକିଡ଼୍‌ତାଗାଙ୍କ୍‌ କୁରୃକ୍‌ହେୱୁନା ୱେଡ଼୍‌ତେ ଚିଲେ କୁରୃକ୍‌ହେୱୁନା କେର୍ସପିଦ୍‌ତି। 43 ମେଣ୍ଡେ ବେସୱେଲେ ହାରୋଣ ନୁ ତାନ୍‌ ମାର୍କ ସମାଗମ ଗୁଡ଼ୁସେତାଗ୍‌ ନେଙ୍ଗିତଡ଼୍‌, କିଅବା ପବିତ୍ର ପଡ଼ିୟେତାଗ ସେବା ମାଡ଼ାନ୍‌ମାଇଦିଙ୍କ୍‌ ବେଦିତ୍‌ ଗାରେ ଆଦ୍‍ତଡ଼୍‌, ଆସୁଟ୍‌ ଅଡ଼୍‌ ବେଲା ଅପରାଦ୍‌ ମାଡ଼କଟ୍‌ ଡଲଡ଼୍‌, ଇଦିନ୍‌ ମାଇଦିଙ୍କ୍‌ ଅଡ଼୍‌ ଇ ଚିଲେ କେର୍ରଦ୍‌ତଡ଼୍‌; ଇଦି ହାରୋଣତେ ନୁ ତାନ୍‌ ବବିଷ୍ୟତ୍‌ତେ ପିଲୁଡ଼୍‌ ପାଲନ୍‌ମାଡ଼ାନ୍‌ ସାରେଦିନାତ୍‌ ନିୟମ୍‌ ଆଦ୍‌ତେ।