ଦଶ ଆଦେଶ୍
1 ତାନ୍ପେର୍କେ ପରମେଶ୍ୱର ଇସାରେ ଗଟି କେତ୍ତଣ୍ଡ୍, 2 "ବେନ୍ ନିକିଙ୍କ୍ ଦାସ ଲତ୍ତେକଞ୍ଜ୍ ମିସର୍ ଦେଶକନ୍ ପେସ୍ପି ତାସ୍ ମିନ୍ଦେଣ୍ଡେ, ନିଇ ଆ ସଦାପ୍ରବୁ ପରମେଶ୍ୱର ମାମ୍ ଆଦ୍ତମ୍।" 3 ମା ପାକେ ମିୟାଦ୍ ମେଣ୍ଡେ ବେନ୍ ଦେୟାକ୍ ଆୟ। 4 ନିମେ ନିଜର ମାଇଦିଙ୍କ୍ ବେନେଆୟି ମାଇମାନ୍ଦାନ୍ ମୃର୍ତ୍ତି ତିଆର୍ ମାଡ଼୍ମାଟ୍; କି ପରମାନ୍ଦାନ୍ ସ୍ୱର୍ଗତାଗ୍, କି ମଦଲମାନ୍ଦାନ୍ ପୃତିବିତାଗ୍, କି ପୃତିବିତେ ମଦଲ୍ ମାନ୍ଦାନ୍ ଏର୍ଦାଗ୍ ମାନ୍ଦାନ୍ ବେନବା ଜିନିଷ ନିଜେତ୍ ମକମ୍ଲେକାମ୍ ତିଆର୍ ମାଡ଼୍ମାଟ୍। 5 ନିମେ ଆୱିଙ୍କ୍ ମଡ଼କ୍ମା, କି ଆୱିନ୍ ସେବା ମାଡ଼୍ମାଟ୍; ବେଲାକି ମାମ୍ ନି ସଦାପ୍ରବୁ ପରମେଶ୍ୱର ସାରେ ଗୌରବ୍ ମାଡ଼ାନ୍ ପରମେଶ୍ୱର୍ ଆଦ୍ତମ୍, ମେଣ୍ଡେ, ବେନ ମାକିଙ୍କ୍ ପାସ୍କିତଡ଼୍, ମାମେ ଅଡ଼୍କିଙ୍କ୍ ତୃତିୟ ନୁ ଚତୁର୍ଥ ପିଲୁଡ଼୍ ଆଇନା ପିଲାକିନ୍ ପର ଆଦାନ୍ ଅପରାଦ୍ତେ ମାଡ଼ିମାନ୍ଦାନ୍ ଦଣ୍ଡ ଇଦ୍ତାନ୍; 6 ମାତର୍ ବେନ୍ ମାନାଙ୍କ୍ ପ୍ରେମ ମାଡ଼ିତଣ୍ଡ୍ ନୁ ମାମ୍ ଗଟିକିଙ୍କ୍ ମାନେମ୍ ଆଦ୍ତଣ୍ଡ୍, ମାମେ ଅଡ଼୍ ଅଜାର୍ ଅଜାର୍ ପିଲୁଡ଼୍ହେୱୁନା ଦୟାମାଡ଼ାନଣ୍ଡ୍। 7 ମିଡ଼୍ ନିଜର ସଦାପ୍ରବୁନ୍ ପରମେଶ୍ୱର ପେଦେର୍ ବୁଚାତେ ଅଦ୍ତନ୍ତ, ବେନ ଆୟି ଅନ୍ ପେଦେର୍ତିଙ୍କ୍ ବୁଚା ଆଲ୍ସିତଣ୍ଡ୍, ସଦାପ୍ରବୁ ଅକିଙ୍କ୍ ଦୋଷି ଇଞ୍ଜ କେତିତଣ୍ଡ୍। 8 ରମାନ୍ ଦିନ୍ ପବିତ୍ର ଲେକାମ୍ ପାଲନ୍ ମାଡ଼ାନଙ୍କ୍ ଏର୍କେ ମାଡ଼ାଟ୍। 9 ଆରୁ ଦିନାତ୍ ତିପାଲ୍ ନୁ ନିଜେତ୍ ସାରେ ପାଡ଼ିୟ୍ ମାଡ଼ିତିଡ଼୍; 10 ମାତର୍ ସାତ୍ ଦିନ୍ ମିଇ ସଦାପ୍ରବୁନ୍ ପରମେଶ୍ୱରଦେ ରମାନ୍ ଦିନ୍ ଆଦ୍ତେ; ଆଗେଙ୍କ୍ ମିଡ଼୍, କି ମିଇ ମାର୍, କି ମିଇ ମାୟାଡ଼୍, ମିଇ ଦାସ, କି ଦାସି, ମିଇ ଜିୱାକ୍, କି ମିଇ ନଗର୍ଗାରେତ୍ ପ୍ରବାସି ବିଦେଶି, ବେନ୍ ବାତେଆୟି କାମ୍ ମାଡ଼୍ମାଟ୍। 11 ବାତେଙ୍କ୍ଇତ୍କେ ସଦାପ୍ରବୁ ମାବ୍ମୟଲ୍ ନୁ ପୃତିବି ନୁ ସମୁଦ୍ର ନୁ ଆଗେ ମାନ୍ଦାନ୍ ସାରେ ଜିନିଷ୍ ଆରୁଦିନାନେ ତିଆର୍ ମାଡ଼ି ସାତ୍ ଦିନ୍ତେ ରମ୍ତଣ୍ଡ୍; ଇଦିନ୍ମାଇଦିଙ୍କ୍ ସଦାପ୍ରବୁ ରମାନ୍ ଦିନେତିଙ୍କ୍ ଆଶିର୍ବାଦ୍ ମାଡ଼ି ପବିତ୍ର ମାଡ଼ିମିନ୍ଦେଣ୍ଡ୍।
12 ନିମେ ନିଜର ବାବାଙ୍କ୍ ନୁ ନିଜର ୟାୟଙ୍କ୍ ସମ୍ମାନ୍ ମାଡ଼ିତିନ୍; ଆସୁଙ୍କ୍ ମିଇ ସଦାପ୍ରବୁ ପରମେଶ୍ୱର ନିକିଙ୍କ୍ ବେନ୍ ଦେଶ ଇଦ୍ତଣ୍ଡ୍, ଆଦ୍ ଦେଶ୍ତାଗ୍ ନିୟାଦ୍ ନାର୍ଗେ ଗେଲ୍ସାନାଦ୍ ଆଦ୍ ତଅତେ।
13 ମିଡ଼୍ ନାରୁଡ଼୍କିଙ୍କ୍ ଆୱୁକ୍ମାଟ୍।
14 ମିଡ଼୍ ବ୍ୟବିଚାର୍ ମାଡ଼୍ମାଟ୍।
15 ମିଡ଼୍ ଡ଼ଙ୍ଗ୍ମାଟ୍।
16 ମିଡ଼୍ ନିଜର ପରିବାରତେ ନାରୁଡ଼୍ ବିରୁଦ୍ଦ୍ତେ ମିଚ୍ ସାକ୍ଷ୍ୟ ଇମାଟ୍।
17 ମିଡ଼୍ ନିଜର ଗାରେତଡ଼୍ ଲତ୍ତାଗ୍ ଆଶେ ମାଡ଼୍ମାଟ୍, ମିଡ଼୍ ୱେରେତଡ଼୍ ମୁତେଙ୍କ୍, କି ଦାସି, କି ଅନ୍ ଗଡ୍କିଙ୍କ୍, କି ଗଦ, କି ମିଇ ଗାରେତଡ଼୍ ବାତେଆୟି ଜିନିଷ୍ତିଙ୍କ୍ ଆଶେ ମାଡ଼୍ମାଟ୍।
ନାରୁଡ଼୍ ୱେର୍
18 ଆସୁଟ୍ ସାରେତଡ଼୍ ନାରୁଡ଼୍ ମାବ୍ ଲେଙ୍ଗ୍ଦେ ନୁ ମେର୍ଚାନାଦ୍ ନୁ ମୟିର୍ ନୁ ଉମ୍ଲେକାମ୍ ମେଟେ ଉଡ଼ିତିଡ଼୍; ମେଣ୍ଡେ, ଆଦ୍ ଉଡ଼ି ଅଡ଼୍ ୱାଡ଼୍କି ଜେକେ ନିତିତଡ଼୍। 19 ମେଣ୍ଡେ ଅଡ଼୍ ମୋଶାଙ୍କ୍ କେତ୍ତଡ଼୍, ନିମେ ମାତଡ଼୍ ଗଟି କେଲ୍ମ୍, ମାମ୍ କେଞ୍ଜିତମ୍; ମାତର୍ ପରମେଶ୍ୱର ମାତଡ଼୍ ଗଟି କେଲ୍ମାକିନ୍, ଇଲୁକ୍ ମାମ୍ ଡଲିତମ୍। 20 ଆସୁଟ୍ ମୋଶାଲ୍ ନାରୁଡ଼୍କିଙ୍କ୍ କେତ୍ତଣ୍ଡ୍, "ୱେର୍ମାଟ୍; ବାତେଙ୍କ୍ଇତ୍କେ ମିକିଙ୍କ୍ ପରିକ୍ଷା ମାଡ଼ାଙ୍କ୍ ନୁ ମିଡ଼୍ ବେଲା ପାପ ମାଡ଼୍ୱିଡ଼୍, ଆଦିନ୍ମାଇଦିଙ୍କ୍ ନିଜର୍ ୱେର୍ଦାନଡ଼ି ମିଇ କଣ୍ଡାନ୍ ମୁନେ ମାଡ଼୍ନଙ୍କ୍ ପରମେଶ୍ୱର ୱାସ୍ମିନ୍ଦେଣ୍ଡ୍।" 21 ଆଦିଙ୍କ୍ ନାରୁଡ଼୍ ଜେକେ ନିସ୍ ମାତ୍ତଡ଼୍; ମାତର୍ ବେଗେ ପରମେଶ୍ୱର ମାତ୍ତଣ୍ଡ୍, ମୋଶାଲ୍ ଆ ଲତ୍ତେ ଇକାଡ଼୍ତାଲାନ୍ ଆତ୍ତଣ୍ଡ୍।
ଯୋଗ୍ୟ ବେଦି ବିଷୟତେ ନିୟମ୍
22 ତାନ୍ପେର୍କେ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, ମିଡ଼୍ ଇସ୍ରାଏଲତେ ନାରୁଡ଼୍କିଙ୍କ୍ ଇ ଗଟ୍ କେଲ୍ମୁଟ୍, ମାମ୍ ମୟଲ୍ତାଗ୍ ମାଞ୍ଜ୍ ମିଇ ତଡ଼୍ ଗଟି କେତ୍ତମ୍, ମିଡ଼୍ ଇସ୍ରାଏଲ୍ତେ ନାରୁଡ଼୍କିଙ୍କ୍ ଇଦ୍ ଗଟ୍ କେଲ୍ମୁଟ୍, ମାମେ ମାବ୍ତାଗ୍ ମାଞ୍ଜ୍ ମିଇ ତଡ଼୍ ଗଟି କେତ୍ତମ୍, ଇଦ୍ ମିଡ଼୍ ନିଜେ ଉଡ଼୍ତିଡ଼୍। 23 ଇଦିନ୍ମାଦିଙ୍କ୍ ମିଡ଼୍ ମାକିଙ୍କ୍ ୱିଡ଼୍ଚି, ବେନ୍ ଦେୟାକ୍ ତିଆର୍ ମାଡ଼୍ମାଟ୍; ମିଇ ସେଙ୍ଗେ ରୂପାତାଦ୍ ଦେୟାମ୍ ନୁ ସୁନାତାଦ୍ ମୁର୍ତ୍ତି ତିଆର୍ ମାଡ଼୍ମାଟ୍। 24 ମିଡ଼୍ ମା ମାଇଦିଙ୍କ୍ ୱେରଡ଼୍ ମୁର୍ତ୍ତିତ୍ ବେଦି ତିଆର୍ ମାଡ଼ିତିଡ଼୍, ମେଣ୍ଡେ, ଆଦିନ୍ ପର ଗଡ୍କ୍ ମେକା ମିୟାଦ୍ ଦୁପାମ୍ ବେଦି ନୁ ମଙ୍ଗଲ୍ତାଦ୍ ପୂଜେ ଉତ୍ସର୍ଗ ମାଡ଼ିତଡ଼୍; ମାମ୍ ବେନ୍ ସାରେ ପଡ଼ିୟାନାଗ୍ ନିଜର ପେଦେର୍ ଏର୍କେ ମାଡ଼୍ନା ମାଡ଼ିତିଡ଼୍, ଆୱୁ ସାରେ ପଡ଼୍ୟାନାଗ୍ ମାମ୍ ମିଇ ପାକେ ୱାସ୍ ନା ମିକିଙ୍କ୍ ଆଶିର୍ବାଦ୍ ମାଡ଼ିତମ୍। 25 ଯଦି ମିଡ଼୍ ମା ମାଇଦିଙ୍କ୍ କାଲ୍କିନ୍ ବେଦି ତିଆର୍ ମାଡ଼ିତିଡ଼୍, ଆଲେକ୍ ଡ଼େୱୁତେ କାଲ୍ଦେ ଆଦ୍ ତିଆର୍ ମାଡ଼୍ମାଟ୍; ବାତେଙ୍କ୍ଇତ୍କେ ଆଦିନ୍ ପର ନିମେ ନିଜର୍ କେଚେ ଗଡ଼େଲି ତେତ୍କେ, ଆଦ୍ ଅପବିତ୍ର ମାଡ଼ିତିଡ଼୍। 26 ମେଣ୍ଡେ ମିୟାଦ୍ ବାଣ୍ଡା ମା ବେଦିତ୍ ପରୁ ବେଲାନ୍ ତନ୍ଦମାକି, ଇଦିନ୍ ମାଇଦିଙ୍କ୍ ମିଡ଼୍ ପାହାଚ ଇସ୍ ମା ବେଦିତ୍ ପରୁ ଆନ୍ମାଟ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)