1 ତାନ୍‌ପେର୍କେ ବତ୍ସଲେଲ୍‌ ଶିଟିମ୍‌ ୱେର୍‌କ୍‌ତେ ଦୁଡ଼୍‌ କାଇ ଲାଟି ନୁ ରେଣ୍ଡ୍‌ କାଇ ଦୁଡ଼େ ଓସାର୍‌ ନୁ ଦେଢ଼ କାଇ ଡ଼େଙ୍ଗ୍‌, ଅଣ୍ଡୟ୍‌ ନିୟମ୍‌ତେ ସିନ୍ଦୁକ୍‌ ତିଆର୍‌ ମାଡ଼୍‌ତଡ଼୍‌ 2 ନୁ ଆଗେତ୍‌ ଲପେ ନୁ ବାୟିଦେତ୍‌ ନିର୍ମଲ୍‌ ଲେକେତ୍‌ ମାଡ଼୍‌ପି ଆଗେତ୍‌ ସାରେ ପାକ୍‌କେ ଲେକେତ୍‌ ନେଟେ ମାଡ଼୍‌ତଡ଼୍‌। 3 ମେଣ୍ଡେ ଆଗେତ୍‌ ନାଲୁ ମୁଲାନ୍‌ ମାଇଦିଙ୍କ୍‌ ନାଲୁ ସୁନା ଇକ୍‌ଲେକ୍‌ ତସ୍‌ତଡ଼୍‌; ଆଗେତ୍‌ ଅଣ୍ଡୟ୍‌ ପାକେ ରେଣ୍ଡେ କଡ଼ା ଇକ୍‌ଲେମ୍‌ ନୁ ୱେର୍‌ ପାକେ ରେଣ୍ଡେ ଇକ୍‌ଲେମ୍‌ ୱାଟ୍‌ତଡ଼୍‌। 4 ମେଣ୍ଡେ ଆ ଶିଟିମ୍‌ ୱେର୍‌କ୍‌ ଟେଙ୍ଗା ମାଡ଼ି ଲେକେତ୍‌ ମାଡ଼୍‌ପ୍‌ତଡ଼୍‌ 5 ନୁ ନିୟମ୍‌ତେ ସିନ୍ଦୁକ୍‌ କାଞ୍ଜାନ୍‌ ମାଇଦିଙ୍କ୍‌ ନିୟମ୍‌ତେ ଗାରେତ୍‌ ଇକ୍‌ଲେମ୍‌ତେ ଆ ଟେଙ୍ଗା ନେଃତ୍‌ତଡ଼୍‌। 6 ଆଦିନ୍‌ ମାଇଦିଙ୍କ୍‌ ଆ ନିର୍ମଲ୍‌ ସନ୍‌ତେ ଦୁଡ଼୍‌ କାଇ ଲାଟି ଦେଢ଼ କାଇ ଓସାର୍‌ ଅଣ୍ଡୟ୍‌ ପାପ୍‌ କ୍ଷମା ମୁସାନାଦ୍‌ ତିଆର୍‌ ମାଡ଼୍‌ତଡ଼୍‌। 7 ମେଣ୍ଡେ ପିଟା ପାଡ଼ିୟ୍‌ଦେ ସନ୍‌ତେ ରେଣ୍ଡେ କିରୁବ ଦୂତ୍‌ ଇନା ତିଆର୍‌ ମାଡ଼ି ପାପ୍‌ ନର୍‌ଦାନ୍‌ ଦିନ୍‌ ରେଣ୍ଡେ ତାଲାନାଗ୍‌ ୱାଟ୍‌ତଡ଼୍‌। 8 ଆଗାଙ୍କ୍‌ ଅଣ୍ଡୟ୍‌ ତାଲ୍‌ତାଗ୍‌ ଅଣ୍ଡୟ୍‌ କିରୁବ ନୁ ୱେର୍‌ରେ ତାଲ୍‌ତାଗ୍‌ ୱେର୍‌ରେ କିରୁବ ତିଆର୍‌ ମାଡ଼୍‌ତଡ଼୍‌; ପାପ୍‌ନର୍‌ଦାନ୍‌ ରେଣ୍ଡେ ତାଲାନେ ରେଣ୍ଡେ କିରୁବ ଆଗେତ୍‌ ଦୁଡ଼େ ମାଡ଼ିନେଃତ୍‌ତଡ଼୍‌। 9 ମେଣ୍ଡେ କିରୁବ ମାନ୍ଦେ ପର୍‌ଆସ୍‌ ପାପ୍‌ନରଦାନଙ୍କ୍‌ ମୁସ୍‌ତଡ଼୍‌ ନୁ ଅଡ଼୍‌ ମକମ୍‌ ସାମ୍‌ନା ସାମ୍‌ନି ଆତ୍‌ତଡ଼୍‌; ମାତର୍‌ ପାପ୍‌ନର୍‌ଦାନ୍‌ ପର କିରୁବନଡ଼୍‌ ମକମ୍‌ ମାତ୍‌ତେ।

10 ଆଦିନାଗାଙ୍କ୍‌ ଆ ଶିଟିମ୍‌ ୱେର୍‌କ୍‌ତେ ରେଣ୍ଡେ କାଇ ଲାଟି ନୁ ଅଣ୍ଡୟ୍‌ କାଇ ଓସାର୍‌ ନୁ ରେଣ୍ଡ୍‌ କାଇ ଦୁଡ଼େ ଡ଼େଙ୍ଗ୍‌ ଅଣ୍ଡୟ୍‌ ଟେବୁଲ୍‌ ତିଆର୍‌ ମାଡ଼୍‌ତଡ଼୍‌। 11 ମେଣ୍ଡେ ଆଦ୍‌ ନିର୍ମଲ୍‌ ସନ୍‌ଲେକେତ୍‌ ମାଡ଼୍‌ପ୍‌ତଡ଼୍‌ ନୁ ଆଗେତ୍‌ ଚାର୍‌ପାକା ଲେକେତ୍‌ ନେଟେ ମାଡ଼୍‌ତଡ଼୍‌। 12 ମେଣ୍ଡେ ଆ ଗେତ୍‌ ଚାର୍‌ପାକା ନାଲୁ ୱାଡ଼୍ଞ୍ଜ୍‌କିନ୍‌ତଡ଼୍‌ ୱେରଡ଼୍‌ ତିଆର୍ ମାଡ଼୍‌ତଡ଼୍‌ ନୁ ଆ ମାନ୍ଦାନ୍‌ ଚାର୍‌ପାକା ସନ୍‌ତେ ନେଟେ ମାଡ଼୍‌ତଡ଼୍‌। 13 ମେଣ୍ଡେ ସନ୍‌ଲେକେ ତାୱୁ ନାଲୁ ଇକ୍‌ଲେମ୍‌ ତ୍‌ସ ଆଗେତ୍‌ ନାଲୁ ଡେକା ନାଲୁ ମୁଲାନା ନେଃତଡ଼୍‌। 14 ଆ ଇକ୍‌ଲେମ୍‌ତେ ଗାରେତ୍‌ ୱେର୍‌ତେ ଗାରେତେ ସାମ୍‌ଡ଼େ କାଞ୍ଜାନ୍‌ ମାଇଦିଙ୍କ୍‌ ଟେଙ୍ଗାତେ ଦର୍‌ ମାତ୍‌ତେ। 15 ମେଣ୍ଡେ ଅଣ୍ଡ୍‌ ଆ ସାମଡ଼େତ୍‌ କାଞ୍ଜାନ୍‌ ଶିଟିମ୍‌ ବସେତେ ଟେଙ୍ଗା ତିଆର୍‌ ମାଡ଼୍‌ ସନ୍‌ଦେ ମାଡ଼୍‌ପ୍‌ତଡ଼୍‌। 16 ମେଣ୍ଡେ, ଆ ସାମଡ଼େତ୍‌ ପରତ୍‌ ପାକେତ୍‌ ଜିନିଷ ସାରେ, ଇତ୍କେ , ଆଗେତ୍‌ ତାଲି, ଉୱିଡ଼୍‌, ଜିନିଷ ତସାନ୍‌ମାଇଦିଙ୍କ୍‌ ମୁନ୍ତାସାରେ ନିର୍ମଲ୍‌ ସୁନାତେ ତିଆର୍‌ ମାଡ଼୍‌ତଡ଼୍‌।

17 ମେଣ୍ଡେ ଆ ନିର୍ମଲ୍‌ ଅଣ୍ଡୟ୍‌ ୱେସ୍‌ ମାଡ଼୍‌ ତିଆର୍‌ ମାଡ଼୍‌ତଡ଼୍‌, ଆ ପିଟା ପାଡ଼ିୟ୍‌ଦେ ୱେସ୍‌ମାଡ଼୍‌, ଆଗେତ୍‌ ଗାଣ୍ଟେ ନୁ କମା ତିଆର୍‌ ମାଡ଼୍‌ତଡ଼୍‌, ମେଣ୍ଡେ ଆଗେତ୍‌ ଗୁଡ଼୍‌ଙ୍ଗେତ୍‌, ତଲ୍‌କା ନୁ ପୁଙ୍ଗାର୍‌ ଆଗେ କାଇଲିତା। 18 ଆ ୱେସ୍‌ମାଡ଼୍‌ତେ ଅଣ୍ଡୟ୍‌ ପାକାକ୍‌ ମୁଣ୍ଡ୍‌ କମା ନୁ ୱେସ୍‌ମାଡ଼୍‌ତେ ମେଣ୍ଡନ୍‌ ପାକେଙ୍କ୍‌ ମୁଣ୍ଡ୍‌ କମା, ଇ ଆରୁ କମା ଆଗେତ୍‌ ପାକେଙ୍କ୍‌ ପେୟିତା । 19 ମେଣ୍ଡେ ଅଣ୍ଡୟ୍‌ କମେତେ ବାଦାମ୍‌ ପୁଙ୍ଗାର୍‌ ଇନା ମୁଣ୍ଡ୍‌ ଗଲ୍‌ଦାୱୁ ଇନା, କମା ନୁ ପୁଙ୍ଗା, ମେଣ୍ଡେ ୱେର୍‌ତେ ପାକେତ୍‌ କମା ବାଦାମ୍‌ ପୁଙ୍ଗାଇନା ମୁଣ୍ଡୁ ଗଲ୍‌ଦାୱୁ, କମା ନୁ ପୁଙ୍ଗା, ଇଲାନେ ୱେସ୍‌ ମାଡ଼୍‌କନ୍‌ ପେୟିତେ ଆରୁ କମାନେ ମାତ୍‌ତେ। 20 ମାତର୍‌ ୱେସ୍‌ ମାଡ଼୍‌ତେ ବାଦାମ୍‌ ପୁଙ୍ଗା ଇନା ନାଲୁ ଗଲ୍‌ ଇନା ନୁ ଆଗେତ୍‌ କମା ନୁ ପୁଙ୍ଗା ମାତ୍‌ତା। 21 ମେଣ୍ଡେ, ଆଗେତ୍‌ ବେନ୍‌ ଆରୁ କମା ପେୟିତା, ଆ ଲେକାମ୍‌ ଅଣ୍ଡୟ୍‌ କମେତ୍‌ ମଦଲ୍‌ ଅଣ୍ଡୟ୍‌ କମେ ନୁ ୱେର୍‌ତ୍‌ପାକେ କମେତ୍‌ ମଦଲ୍‌ ଅଣ୍ଡୟ୍‌ କମେ ନୁ ମେଣ୍ଡେ କମେତ୍‌ ମଦଲ୍‌ ଅଣ୍ଡୟ୍‌ କମେ ମାତ୍‌ତେ। 22 ଇ କଡ଼୍‌ୟି ନୁ କମେ ଆଗେତ୍‌ ଦୁଙ୍କା ଆତ୍‌ତେ ନୁ ସାରେ ନିର୍ମଲ୍‌ ସନ୍‌ତେ ତିଆର୍‌ ଆତ୍‌ତେ ଅଣ୍ଡୟ୍‌ ପିଟା ପାଡ଼ିୟ୍‌ଦେ ଆତ୍‌ତେ। 23 ମେଣ୍ଡେ, ଅଣ୍ଡ୍‌ ଆଦିନ୍‌ ମାଇଦିଙ୍କ୍‌ ସାତ୍‌ ୱେସ୍‌ ନୁ ଚିମୁଟା ନୁ ତାଡ଼୍‌ମିଇନା ସାକ୍‌ସାକା ନୁ ନିୟିମ୍‌ତାୱୁ ତିଆର୍‌ ମାଡ଼୍‌ତଡ଼୍‌ । 24 ଅଣ୍ଡ୍‌ ଅଣ୍ଡୟ୍‌ ତିରିଶ୍ ଏଇଙ୍ଗ୍‌ ପରିମିତ୍‌ ସାକ୍‌ସାକା ନୁ ସାୟେତାୱୁ ଆଦ୍‌ ନୁ ଆଗେତ୍‌ ସାରେ ପାତ୍ର ତିଆର୍‌ ମାଡ଼୍‌ତଡ଼୍‌।

25 ତାନ୍‌ପେର୍କେ ଆ ଶିଟିମ୍‌ ୱେର୍‌କ୍‌ତେ ଅଣ୍ଡୟ୍‌ କାଇ ବେଡ଼ିୟେ ନୁ ଅଣ୍ଡୟ୍‌ କାଇ ଓସାର୍‌ ନୁ ରେଣ୍ଡେ କାଇ ଡ଼େଙ୍ଗ୍‌ ନାଲୁମୁଲା ଦୁପାମ୍‌ବେଦି ତିଆର୍‌ ମାଡ଼୍‌ତଡ଼୍‌, ଆଗେତ୍‌ କକ୍‌ଇନା ଆଗେତ୍‌ ଦୁଡ଼େ ଆତ୍‌ତେ। 26 ମେଣ୍ଡେ, ଆଦ୍‌ ଆଗେତ୍‌ ପର ନୁ ଆଗେତ୍‌ ନାଲୁ ପାକା ନୁ ଆଗେତ୍‌ କକ୍‌ ନିର୍ମଲ୍‌ ପରିସ୍କାର୍‌ ମାଡ଼୍‌ପ୍‌ତଡ଼୍‌; ମେଣ୍ଡେ ଅଣ୍ଡ୍‌ ଆଗେତ୍‌ ନାଲୁପାକା ଲେକ୍‌ତାଦ୍‌ ନେଟେ ମାଡ଼୍‌ତଡ଼୍‌। 27 ମେଣ୍ଡେ ଆଗେତ୍‌ କାଞ୍ଜାନ୍‌ ଟେଙ୍ଗେତ୍‌ ନାଡ଼୍‌ମେ ମାନ୍ଦାନାଦ୍‌ ମାଇଦିଙ୍କ୍‌ ଆଗେତ୍‌ ନେଟେ ମଦଲ୍‌ ରେଣ୍ଡେ ପାକା ରେଣ୍ଡେ ମୁଲାନେ ସନ୍‌ତେ ରେଣ୍ଡେ ରେଣ୍ଡେ ଇକ୍‌ଲେମ୍‌ ତିଆର୍‌ ମାଡ଼୍‌ତଡ଼୍‌। 28 ମେଣ୍ଡେ ଶିଟିମ୍‌ ୱେର୍‌କ୍‌ତେ ଟେଙ୍ଗା ମାଡ଼୍‌ତଡ଼୍‌ ନୁ ଆଦ୍‌ ପବିତ୍ର ମାଡ଼୍‌ପଡ଼୍‌।

29 ଆଦିଙ୍କ୍‌ ଅଣ୍ଡ୍‌ ଅବିଷେକ୍‌ତେ ମାଇଦିଙ୍କ୍‌ ପବିତ୍ର ନିୟ୍‌ ନୁ ଦୁପାମ୍‌ ମାଇଦିଙ୍କ୍‌ ଗାବ୍‌ ମାନ୍ଦାନ୍‌ ପାଡ଼୍‌ୟି ମାଡ଼ାନଡ଼୍‌ ଇନା ସାୟ୍‌ ଗାବ୍‌ ମାନ୍ଦାନ୍ ସାମାନ୍‌ ତିଆର୍‌ ମାଡ଼୍‌ତଡ଼୍‌।