1 ତାନ୍‌ପେର୍କେ ମୋଶାଲ୍ ନୁ ହାରୋଣ ଆଞ୍ଜ୍‌ ଫାରୋଙ୍କ୍‍ କେତ୍‍ତଡ଼୍, "ଇସ୍ରାଏଲତେ ସଦାପ୍ରବୁ ପରମେଶ୍ୱର କେତିତଣ୍ଡ୍‌, ଆଞ୍ଚିନାକ୍‌ ମା ଉଦ୍ଦେଶ୍ୟତେ ପାଣ୍ଡୁମ୍‌ ମାଡ଼ାନଙ୍କ୍‌ ମା ନାରୁଡ଼୍‌କିଙ୍କ୍‌ ଆଦାନଙ୍କ୍‌ ଇମ୍‌।"

2 ଆସୁଟ୍‌ ଫାରୋ କେତ୍‍ତଣ୍ଡ୍‌, "ସଦାପ୍ରବୁ ବେନ, ଯେ ମାନାଡ଼୍‌ ଅନ୍‍ ଗଟି ମାନେମ୍‌ ଆସ୍‌ ଇସ୍ରାଏଲ୍‌ତାକ୍‌ ଆଦାନଙ୍କ୍‌ ଇଦ୍‌ତମ୍‌ ? ମାମେ ସଦାପ୍ରବୁଙ୍କ୍ ପୁଃନମ୍‍ ନୁ ଇସ୍ରାଏଲ୍‌ତିଙ୍କ୍‌ ଆଦାନଙ୍କ୍‌ ଇୱମ୍‌।" 3 ଅଡ଼୍ କେତ୍‍ତଡ଼୍‌, "ଏବ୍ରିୟନଡ଼୍‌ ପରମେଶ୍ୱର ମାକିଙ୍କ୍‌ ଦର୍ଶନ ଇସ୍ କେସମିନ୍ଦେଣ୍ଡ୍‌। ଆଦିଙ୍କ୍‌ ମାମ୍‍ ବିନୟ ମାଡ଼ୁତମ୍‍ ସଦାପ୍ରବୁ ପରମେଶ୍ୱରଦେ ଉଦ୍ଦେଶ୍ୟତେ ସେବା ମାଡ଼ାନ୍‍ ମାଇଦିଙ୍କ୍‌ ମାକିଙ୍କ୍‌ ପ୍ରାନ୍ତର୍‌ତାଗ୍‌ ମୁଣ୍ଡ୍‌ ଦିନାନ୍‌ ଆର୍‌ ଆଦାନଙ୍କ୍‌ ଇମ୍‍ ଇଲୁକ୍ ଅଣ୍ଡ୍‌ ମିକିଙ୍କ୍ ମହାମାରିତେ ସାକୁତଡ଼୍ ରେଃତିତଣ୍ଡ୍‌। 4 ଆସୁଟ୍‌ ମିସରତେ ରାଜାଲ୍‍ ଅଡ଼୍‍କିଙ୍କି କେତ୍‍ତଡ଼୍ ହୋ ମୋଶା ନୁ ହାରୋଣ ମିଡ଼୍‍ ବାତାଙ୍କ୍‍ ନାରୁଡ଼୍‍କିଙ୍କ୍‌ ପଡ଼ିୟେତାଗାଙ୍କ୍‍ ୱିଡ଼୍‌ସିଦୁତିନ୍‌ ? ମିଡ଼୍ ନିଜେ ବଜ୍‌ କାଞ୍ଜାନ୍ କାମ୍‌ଦାଗ୍‌ ଆନୁଟ୍‌।" 5 ଫାରୋ ମେଣ୍ଡେ କେତ୍‍ତଣ୍ଡ୍‌ ଉଡ଼ାଟ୍‍ ଇଞ୍ଜେ ଇଦେଶତାଗ୍‍ ଇନାରୁଡ଼୍ ନାଗେ ମେଣ୍ଡେ ମିଡ଼୍ ଅଡ଼କିଙ୍କ୍‌ ବଜକାଞ୍ଜାନ୍‍ ନାଗାଙ୍କ୍‌ ୱିର୍‌ସ୍ପୁତିଡ଼୍‌।

6 ମେଣ୍ଡେ ଫାରୋ ଆଦ୍‍ ଦିନ୍‍କନ୍‍ ନାରୁଡ଼୍‍ ପାୟିଦାୟିତ୍‌ ଆଦାନଣ୍ଡ୍‌ ନୁ କୁଲିନଡ଼୍‌କ୍‌ ଇଦ୍ ଆଦେଶ୍‌ ଇତ୍‍ତଣ୍ଡ୍‌। 7 ମିଡ଼୍ ଇଟା ମାଡ଼ାନ୍‌ ମୁନେଙ୍କ୍‌ତେ ଲେକାମ୍‌ ଇ ନାରୁଡ଼୍‍କିଙ୍କ୍‌ ମେଣ୍ଡେ କୟାଲ୍‌ ଇମାଟ୍‍; ଅଡ଼୍ ଆଞ୍ଜ୍‌ ନିଜର ମାଇଦିଙ୍କ୍‌ କୟାଲ୍‌ ଗୁଡ଼୍‌ପିତଡ଼୍। 8 ମେଣ୍ଡେ, ମୁନେଙ୍କ୍‌ ଅଡ଼୍ ପର ବେସର୍‌ ଇଟା ମାଡ଼ାନାଦ୍‌ ବଜ୍‍ ମାତ୍‌ତେ, ଇଞ୍ଜେ ଆ ବଜ୍‍ ଇମୁଟ୍‌; ଆଗାକଞ୍ଚ୍‌ ଇସୁକ୍‌ ବା କମ୍‍ ମାଡ଼ମାଟ୍‍; ବେଲାକି ଅଡ଼୍ ମଣ୍ଡିଡ଼୍‌ ଆଦ୍‍ତଡ଼୍‌; ଆଦିଙ୍କ୍‌ ମିକିଙ୍କ୍‌ ପରମେଶ୍ୱରଦେ ଲେକାମ୍‌ ବଲିଦାନ୍‌ ମାଡ଼ାଙ୍କ୍‍ ଆଦାନଙ୍କ୍‌ ଇମୁଟ୍‌ ଇଞ୍ଜ କାର୍ଙ୍ଗ ମିନ୍ଦେଡ଼୍। 9 ଇଦିନ୍‌ମାଦିଙ୍କ୍‌ ଇଡ଼୍ ବେଲା ବଜ୍‍ କାଞ୍ଜାନ୍‍ ଦାନ୍ଦେତେ ମାନ୍‍ତଡ଼୍ ମିଚ୍‍ ଗଟ୍‌ତାଗାଙ୍କ୍‍ ଡ଼େରି ମାଡ଼୍‌ମାକିଡ଼୍। 10 ଆଗାଙ୍କ୍‌ ନାରୁଡ଼୍‍କ୍‌ ପାଡ଼୍‍ୟି ଶାସନ୍ ମାଡ଼ାନଡ଼୍‌ ନୁ କୁଲିନଡ଼୍‌ ବାଇଦେ ଆଞ୍ଜ୍‌ ଅଡ଼୍‌କିଙ୍କ୍‌ କେତ୍‌ତଡ଼୍‌ , "ଫାରୋ ଇଦ୍‌ ଗଟ୍‌ କେତିଡ଼୍‌, ମାମେ ମିକିଙ୍କ୍‌ ମେଣ୍ଡେ ବାଗ୍‌ ଇୱମ୍‌। 11 ଆନୁଟ୍‌, ବେଗେ ବାଗ୍‌ ପାହେମ୍‌ ଆଦ୍‌ତିଡ଼୍‌ ଆଗାକଞ୍ଚ୍‌ ନିଜେ ନିଜେ ସେଙ୍ଗେ କୟାଲ୍‌ ଗୁଡ଼୍‌ପାଟ୍‌; ମାତର୍‌ ମିୟାଦ୍‌ ପାଡ଼ିୟି ବାତେ ସୁକୁକ୍‌ ବା କମ୍‌ ଆୟ।" 12 ଆସୁଟ୍‌ ନାରୁଡ଼୍ କୟାଲ୍‌ ବାଦୁଲ୍‌ତେ ଜିଟ୍‍କା ଗୁଡ଼୍‌ପାନଙ୍କ୍‌ ସାରେ ମିସର୍‌ ଦେଶ୍‌ତାଗ୍‌ ଏକାମ୍‍ ଆତ୍‍ତଡ଼୍ ? 13 ମେଣ୍ଡେ ପାୟିଡ଼୍‌ମାଡ଼ାନଡ଼୍‌ ଦାନ୍ଦେ ମାଡ଼ି କେତ୍‌ତଡ଼୍‌, "କୟାଲ୍‌ ପାହେମ୍‌ ଆଦାନ୍‌ ସମୟତେ ବେଲାନ୍‌ ମିଡ଼୍‌ କାମ୍‌ ମାଡ଼ମାତ୍‌ତିଡ଼୍‌, ଆଦ୍‌ଲେକାମ୍‌ ଇଞ୍ଜେ ମିକା ତିଆର୍‌ ମୁନେତ୍‌ କାମ୍‌ ସାରେଦିନାମ୍‌ ତେର୍ସ୍ପାଟ୍‌।" 14 ଫାରୋନ୍‍ ପାୟିଡ଼୍ ମାଡ଼୍‌ନା ମାଡ଼ାନଡ଼୍ ଇସ୍ରାଏଲ୍‌ ପିଲୁଡ଼୍‌ ବେନ୍‍ ପାଡ଼ିୟ୍‌ମାଡ଼ାନଡ଼୍‌କ୍ ନେଃସ୍‌ମାତ୍‌ତଡ଼୍; ଅଡ଼୍‌କିଙ୍କ୍ ରେଃସ୍ କେତ୍‌ତଡ଼୍, "ମିଡ଼୍ ମୁନେତ୍‌ ଲେକାମ୍‌ ଇଟା ମାଡ଼ାନ୍‍ ତିଆର୍‌ତେ ପାୟିଡ଼୍ ବାତ୍‌ତିଙ୍କ୍‍ ସାରେପୁରା ତେର୍‌ସ୍ୱିଡ଼୍ ?"

15 ଆଗକ୍‌ ଇସ୍ରାଏଲ୍‌ ପିଲୁଡ଼୍‌ ପାୟିଡ଼୍ ମାଡ଼୍‌ନା ମାଡ଼ାନ୍‌ ଅଦକ୍ୟଡ଼୍ ୱାସ୍‍ ଫାରୋନ୍‍ ଗାରେ କେଇ ମେଣ୍ଡେ କେତ୍‍ତଡ଼୍ ନିମେ ବାତାଙ୍କ୍‍ ନିଜର ଦାସଡ଼୍ ତଡ଼୍ ଇଲା ବ୍ୟବହାର ମାଡ଼ୁତି। 16 ନିଇ ଦାସଡ଼୍‍କିଙ୍କ୍‌ କୟାଲ୍‌ ଇୱମ୍‍ ବା ଅଡ଼୍ କେତୁତଡ଼୍ ଇଟା ତିୟାର୍‍ ମାଡ଼ାଟ୍‍; ମେଣ୍ଡେ ଉଡ଼ାଟ୍‍ ନିଇ ଦାସଡ଼୍ ରେହେସ୍ ଆଦୁତଡ଼୍‌ ମାତର୍‌ ଦଷ୍‌ ନିଇ ନିଜର ନାରୁଡ଼୍‍ଡ଼ାଦ୍‍।

17 ଆସୁଟ୍‌ ଅଣ୍ଡ୍‌ କେତ୍‍ତଣ୍ଡ୍‌, ମିଡ଼୍‍ ଗାଟି ମଣ୍ଡି, ଆଦିଙ୍କ୍‌ ନାନେ କେତୁତାନ୍‌, ସଦାପ୍ରବୁନ୍‍ ଉଦ୍ଦେଶ୍ୟତେ ସେବା ମାଡ଼ାନଙ୍କ୍‍ ମାକିଙ୍କ୍‌ ୱିଡ଼୍‌ସିମ୍‍। 18 ଇଞ୍ଜେ ଆନୁଟ୍‌ ପାୟିଡ଼୍ ମାଡ଼ାଟ୍‍ ମିକିଙ୍କ୍ କୟାଲ୍‌ ଇୱମ୍‍, ଆଗେକ୍‌ବା ମିକିଙ୍କ୍ ଇଟାନେ ସାରେ ଇସାପ୍‌ ଇଦେୱେତିତ୍‌। 19 ଆଗାଙ୍କ୍‌ ମିୟାଦ୍‍ ନିତାଲ୍‌ତେ ସାରେ ଇଟାନାଗାଙ୍କ୍‌ ଇସୁକ୍‌ କମ୍‍ ଆୟ୍‌; ଇଦି ଗଟ୍‌ତେ ଇସ୍ରାଏଲ୍‌ ବଂଶତଡ଼୍ ବେଡ଼ିୟଡ଼୍‌ ଉଡୁତଡ଼୍ ଯେ ଅଡ଼୍ ସମସ୍ୟା ଦିନାମ୍‌ ହେୱୁତେ।

20 ତାନ୍‌ପେର୍କେ ଅଡ଼୍ ଫାରୋନ୍‍ ଗାରେ ୱାଦାନ୍‍ ୱେଲେ ମୋଶାଙ୍କ୍‍ ନୁ ହାରୋଣତିଙ୍କ୍‍ କାଇଲ୍‌ତଡ଼୍ ଅଡ଼୍ ଆର୍‍ଦାଗ୍‍ ନିସ୍‍ ମାତ୍‍ତଡ଼୍। 21 ଆଗେ ଅଡ଼୍ କେତ୍‍ତଣ୍ଡ୍‌, ସଦାପ୍ରବୁ ମିଇ ପରୁ କଣ୍ଡ୍‌ୱାଟି ବିଚାର ମାଡ଼ିଣ୍ଡ୍‌; ବେଲାନ୍‌ ମି ଫାରୋ ନୁ ତାନ୍‍ ଦାସନଡ଼୍ କାଇଲି ମାକିଙ୍କ୍‌ ପାସ୍‌କାନ୍‌ ଲେକାମ୍‌ ମାଡ଼ି ମାକିଙ୍କ୍‌ ଆୱୁକାନ୍‌ ସେଙ୍ଗେ ଅଡ଼୍ କାଇଦାଗ୍‌ ସାକୁ ଇତ୍‌ତଡ଼୍‌।

22 ତାନ୍‌ପେର୍କେ ମୋଶାଲ୍ ସଦାପ୍ରବୁନ୍‌ ଗାରେ ମାଲସ୍‍ ଆଞ୍ଜ କେତ୍‍ତଣ୍ଡ୍‌ ହୋ ପ୍ରବୁ, ନିମେ ବାତ୍‌ତିଙ୍କ୍‌ ଇ ନାରୁଡ଼୍‍କିଙ୍କ୍‌ ପାପ୍‌ ମାଡ଼ିମିନ୍ଦେଣ୍ଡ୍‌ ? ନିମେ ବାତ୍‌ତିଙ୍କ୍‍ ନାକିଙ୍କି ରଃତ୍‌ତି। 23 ବାତେଙ୍କ୍‌ଇତ୍କେ ବେନ୍‍ ପୁନ୍‍ନ ନାନେ ନିଇ ପେଦେର୍‍ତେ ଗଟି କେତାନ୍‍ ମାଇଦିଙ୍କ୍‌ ଫାରୋନ୍‍ ଗାରେ ୱାତ୍‍ତାନ୍‍, ଆଦ୍‌ ଦିନେତେ ଅଣ୍ଡ୍ ଇ ନାରୁଡ଼୍‍ତେ କାରାପ୍‌ ମାଡ଼ିମିନ୍ଦେଣ୍ଡ୍, ମେଣ୍ଡେ, ନିମେ ନିଜର୍ ନାରୁଡ଼୍‍ତେ ବାତେ ବା ଉଦ୍ଦାର୍ ମାଡ଼୍‌ୱିନ୍‌।