1 ତାନ୍‌ପେର୍କେ ସଦାପ୍ରବୁ ମୋଶାଙ୍କ୍‌ ଇଦ୍‌ ଗଟ୍‌ କେତ୍‌ତଣ୍ଡ୍‌, 2 ଉଡ଼ାଟ୍‌, ମା ଯିହୁଦା ପିଲୁଡ଼୍‌ତେ ହୂରତେ ମାର୍ରିନ୍‌ ଉରିରନ୍‌ ନାତିଙ୍କ୍‌ ବତ୍ସଲେଲ୍‌ଙ୍କ୍‌ ପେଦେର୍‌ ପୟିସ୍‌ କାର୍‌ଙ୍ଗ୍‌ତମ୍‌ 3 ମେଣ୍ଡେ ଶିଳ୍ପ* ପାଡ଼୍‌ୟି, ଇତ୍କେ, ସୁନା, ରୂପା ନୁ ପିତ୍ତଲ୍‌ତେ ଡ଼େୱାନ୍‌ ନୁ କଚନାର୍ତକ ମଣି କତ୍ତନ ୱେର୍କ୍‌ ଡ଼େୱାନ୍‌ଲେକେ 4 ସାରେ ପ୍ରକାର୍‌ ଶିଳ୍ପ ପାଡ଼୍‌ୟି ମାଡ଼ାନ୍‌ମାଇଦିଙ୍କ୍‌ 5 ଆଦି ଜ୍ଞାନ, ବୁଦ୍ଦ୍‌, ବିଦ୍ୟା ନୁ ପାଡ଼୍‌ୟି ପୁତ୍‌ତେନଡ଼୍‌ ପରମେଶ୍ୱରଦେ ଆତ୍ମାତେ ପୂରା ମାଡ଼୍‌ତମ୍‌। 6 ମେଣ୍ଡେ ଉଡ଼ାଟ୍‌, ମାଆ ଦାନ ପିଲୁଡ଼୍‌ଜାତ୍‌ତେ ଅହିଷାମକରତେ ମାର୍ରଙ୍କ୍‌ ଅହଲିୟାବତିଙ୍କ୍‌ ଅନ୍‌ତଡ଼୍‌ ଆଦ୍‌ ମାଇଦିଙ୍କ୍‌ ନିଯୁକ୍ତି ମାଡ଼୍‌ତମ୍‌; ମେଣ୍ଡେ ସାରେ ବିଜ୍ଞମନ୍‌ଦେ ନାରୁଡ଼୍‌କିଙ୍କ୍‌ ହୃଦୟତାଗ୍‌ ଜ୍ଞାନ୍‌ ଇତ୍‌ତମ୍‌; ଆଦିଙ୍କ୍‌ ମାମ୍‌ ମିକିଙ୍କ୍ ସାରେ ଆଦେଶ୍‌ ଇତମ୍‌, ଆୱୁ ସାରେ ଅଡ଼୍‌ ତିଆର୍‌ ମାଡ଼ିତଡ଼୍‌। 7 ଇତ୍କେ କାଇଲାନ୍‌ ଗୁଡ଼ୁସେତାଗ୍‌ ନୁ ସାକ୍ଷ୍ୟ ସିନ୍ଦୁକ୍‌ ନୁ ଆଗେତ୍‌ ପରତ୍‌ ପାପ୍‌ନର୍ରଦା ନୁ ଗୁଡ଼ୁସେ ସାରେ ଗିନେ, 8 ମେଣ୍ଡେ ଟେବୁଲ୍‌ ନୁ ଆଗେତ୍‌ ଗିନେ ନୁ ନିର୍ମଲ୍‌ ସୁନା ୱେସ୍‌ମାଡ଼୍‌ ନୁ ଆଗେତ୍‌ ସାରେ ଗିନେ ନୁ ଦୁପାମ୍‌ ବେଦି 9 ନୁ ଦୁପାମ୍‌ ବେଦି ନୁ ଆଗେତ୍‌ ସାରେ ଗିନେ ନୁ ନର୍‌ଦାନ୍‌ ଗିନେ ନୁ ଗଡ଼୍‌ତାଗ୍‌ ମିଟିଙ୍ଗ୍‌ତିଙ୍କ୍‌, 10 ମେଣ୍ଡେ ସୁନ୍ଦରତେ ଆଲ୍‌ତାଦ୍‌ ଚିଲେ ନୁ ଯାଜକ୍‌ ପାଡ଼ିୟ୍‌ ମାଡ଼ାନ୍‌ ମାଇଦିଙ୍କ୍‌ ହାରୋଣ ଯାଜକତେ ପବିତ୍ର ଚିଲେ ନୁ ଅନ୍‌ ମାର୍କିଡ଼୍‌ ଚିଲେ, 11 ମେଣ୍ଡେ ଅବିଷେମାଡ଼୍‌ତେ ନିୟ୍‌ ନୁ ପବିତ୍ର ପଡ଼ିୟେତ୍‌ ମାଇଦିଙ୍କ୍‌ ଗାବ୍‌ମାନ୍ଦାନ୍‌ ଦୁପାମ୍‌, ଇ ବେନ୍‌ ସାରେ ଆଦେଶ୍‌ ମାମ୍‌ ମିକିଙ୍କ୍ ଇତ୍‌ତମ୍‌, ଆ ଲେକାମ୍‌ ଅଡ଼୍‌ ମାଡ଼୍‌ତଡ଼୍‌।

12 ତାନ୍‌ପେର୍‌କେ ସଦାପ୍ରବୁ ମୋଶାଙ୍କ୍‌ କେତ୍‌ତଣ୍ଡ୍‌, 13 ମିଡ଼୍‌ ମେଣ୍ଡେ ଇସ୍ରାଏଲତେ ମାର୍କିଡ଼୍‌କିଙ୍କ୍‌ ଇ ଗଟ୍‌ କେଲ୍‌ମୁଟ୍‌, ନିଜାମ୍‌ ମିଡ଼୍‌ ମାଆ ରମାନ୍‌ଦିନ୍‌ ପାଲନ୍‌ ମାଡ଼୍‌ତିଡ଼୍‌; ବେଲାକି ମାମେ ଯେ ମିଇ ପବିତ୍ରତେ ସଦାପ୍ରବୁ, ଇଦି ବେଲା ମିଡ଼୍‌ ପୁନ୍‌ତିଡ଼୍‌, ଇଦିନ୍‌ମାଇଦିଙ୍କ୍‌ ମିଇ ଆନିଦାଦି ମା ନୁ ମିୟାଗ୍‌କନ୍‌ ଆଦ୍‌ ଅଣ୍ଡୟ୍‌ ଚିହ୍ନେ ଆଦ୍‌ତେ। 14 ଆଦିଙ୍କ୍‌ ମିଡ଼୍‌ ରମାନ୍‌ଦିନ୍‌ ପାଲନ ମାଡ଼୍‌ତିଡ଼୍‌; ବାତେଙ୍କ୍‌ଇତ୍କେ ଆଦ୍‌ ମିଇ ମାଇଦିଙ୍କ୍‌ ପବିତ୍ର; ବେନ୍‌ ଆଦିଙ୍କ୍‌ ଅପବିତ୍ର ମାଡ଼୍‌ତଣ୍ଡ୍‌, ନିଜାମ୍‌ ଅନ୍‌ ଜିୱୁନ୍‌ ଆଦ୍‌ତେ; ମେଣ୍ଡେ ବେନ୍‌ ବା ପ୍ରାଣି ଆ ଦିନ୍‌ ପାଡ଼୍‌ୟି ମାଡ଼୍‌ତେ, ଅଣ୍ଡ୍‌ ନିଜର ନାରୁଡ଼୍‌ଆଗାଙ୍କ୍‌ ଜେକେ ଆଦ୍‌ତଣ୍ଡ୍‌। 15 ଆରୁଦିନା ପାଡ଼୍‌ୟି ମାଡ଼୍‌ୱେତିତ୍‌, ମାତ୍ର ସାତ୍‌ ଦିନ୍‌ତେ ସଦାପ୍ରବୁନ୍‌ ମାଇଦିଙ୍କ୍‌ ପବିତ୍ର ବାଡ଼୍‌ରମାନ୍‌ଦିନ୍; ଆ ରମାନ୍‌ଦିନ୍‌ତେ ବେନ୍‌ଆୟି ପାଡ଼୍‌ୟି ମାଡ଼୍‌ତଣ୍ଡ୍‌, ନିଜାମ୍‌ ଅନ୍‌ ଜିୱୁନ୍‌ ଆଦ୍‌ତେ। 16 ଇଦିନ୍‌ମାଇଦିଙ୍କ୍‌ ଇସ୍ରାଏଲତେ ମାର୍କିଡ଼୍‌ ତେର୍‌ୱୱେଲେତ୍‌ ନିୟମ୍‌ତେ ଆନିଦାଦିଡ଼୍‌ ଆଦିନ୍‌ମାଇଦିଙ୍କ୍‌ ରମାନ୍‌ଦିନ୍‌ ପାଲନ୍‌ ମାଡ଼୍‌ତିଡ଼୍‌। 17 ଆଦ୍‌ ମାମ୍‌ ଇସ୍ରାଏଲତେ ମାର୍କିଡ଼ାଗାଙ୍କ୍‌ ଅଣ୍ଡୟ୍‌ ତେର୍‌ୱୱେଲେତ୍‌ ଚିହ୍ନେ ଆଦ୍‌ତେ, କାରଣ ସଦାପ୍ରବୁ ଆରୁଦିନାନେ ମାବ୍‌ ମୟଲ୍‌ ନୁ ପୃତିବି ତିଆର୍‌ ମାଡ଼ି ସାତ୍‌ଦିନ୍‌ତେ ରମିମାତ୍‌ତଣ୍ଡ୍‌।

18 ଆସୁଟ୍‌ ଅଣ୍ଡ୍‌ ସିନୟ ମେଟେତ୍‌ ପର ମୋଶାନ୍‌ ତଡ଼୍‌ ଗଟି ତେର୍‌ସ୍ପି ସାକ୍ଷ୍ୟ ଇନା ରେଣ୍ଡେ ଦୁଡ଼୍‌ ବାଲା,ଇତ୍କେ,ପରମେଶ୍ୱରଦେ ୱାଡ଼୍‌ଞ୍ଚ୍‌କିନେ ଲେକ୍‌ତେ ରେଣ୍ଡେ କାଲ୍‌ଦେ ବାଲା ଅକିଙ୍କ୍‌ ଇତ୍‌ତଣ୍ଡ୍‌।