1 ମେଣ୍ଡେ ମା ଲେକାମ୍‌ ଯାଜକ୍‌ ପାଡ଼ିୟ୍‌ ମାଡ଼ାନ୍‌ ମାଇଦିଙ୍କ୍‌ ଅଡ଼୍‌କିଙ୍କ୍‌ ପ୍ରତିଷ୍ଟା ମାଡ଼ାନ୍‌ ମାଇଦିଙ୍କ୍‌ ମିଡ଼୍‌ ଅଡ଼୍‌ ପର ଇ ସାରେ କାମ୍‌ ମାଡ଼ିତିଡ଼୍‌; ବାତେଙ୍କ୍‌ଇତ୍କେ ଅଣ୍ଡୟ୍‌ ଗଡ୍‌ପିଲେ ନୁ ରେଣ୍ଡେ ମେଣ୍ଢା ଅଦ୍‌ତିଡ଼୍‌। 2 ମିଡ଼୍‌ ତାଡ଼ି କାଇଲ୍‌ତେ ରୋଟି ନୁ ନିୟ୍‌କାଇଲିତେ ତାଡ଼ିତ୍‌ତେ ତିଆରଆତ୍‌ତେ ବବ ନୁ ନିୟ୍‌ଦେ ତାଡ଼ି କାଇଲ୍‌ତେ ଚୁଦୁଲାଦ୍‌ ଚକୁଲି ଗହମ ମଇଦାତେ ତିଆର୍‌ ମାଡ଼ିତିଡ଼୍‌, 3 ମେଣ୍ଡେ ଅଣ୍ଡୟ୍‌ କୁସ୍କେତାଗ୍‌ ୱାଟିତିଡ଼୍‌ ନୁ ଗଡ୍‌ପିଲେ ନୁ ରେଣ୍ଡ୍‌ ମେଣ୍ଢାତଡ଼୍‌ ଅସ୍‌ ଆ କୁସ୍କ୍‌ସେ ତାତିତିଡ଼୍‌।

4 ମେଣ୍ଡେ ହାରୋଣତେ ନୁ ତାନ୍‌ ମାର୍କିକିଙ୍କ୍‌ ସମାଗମ ଗୁଡ଼ୁସେତାଗ୍‌ ଦୁୱାଡ଼୍‌ ଗାରେ ତାସ୍‌ ଏର୍‌ଦେ ଅଡ଼୍‌କିଙ୍କ୍‌ ଏର୍‌ ମିସ୍ପିତିଡ଼୍‌। 5 ଆ ସାରେ ଚକା ଅସ୍‌ ହାରୋଣଙ୍କ୍ ଜାମା ନୁ ଏଫୋଦର୍‌ ଲାଟିଚକା ନୁ ଏଫୋଦର୍‌ ନୁ ବୁକୁଫଟା କେର୍ରପିତିଡ଼୍‌, ମେଣ୍ଡେ ଏଫୋଦର୍‌ ଚିତ୍ରନାଗ୍‌ ପଟୁକାତେ ତାନ୍‌ ଟିକିଡ଼୍‌ ତାଗ୍‌ ତଃତିଡ଼୍‌। 6 ଅନ୍‌ ମୁଞ୍ଜିନାଗ ଜସ୍‌ତଃସ୍‌ ତାନ୍‌ ପର ପବିତ୍ର ସଜ୍‌ ଇଦ୍‌ତିଡ଼୍‌। 7 ଇଦିନାଗଙ୍କ୍‌ ଅବିଷେକ୍‌ତେ ନିୟ୍‌ ଅସ୍‌ ଅନ୍‌ ମୁଞ୍ଜିନ୍‌ ପର ତସି ଅକିଙ୍କ୍‌ ଅବିଷେକ୍‌ ମାଡ଼ିତିଡ଼୍‌। 8 ଆସୁଟ୍‌ ମିଡ଼୍‌ ହାରୋଣତେ ମାର୍କିଡ଼୍‌କିଙ୍କ୍‌ ତାସ୍‌ ଚକା କେର୍‌ସ୍ପିତିଡ଼୍‌। 9 ମେଣ୍ଡେ ହାରୋଣନ୍‌ତିଙ୍କ୍‌ ନୁ ତାନ୍‌ ମାର୍କିଡ଼୍‌କିଙ୍କ୍‌ ମାଲ୍‌ତାଡ଼୍‌ କେର୍ସ୍ପିକାଡ଼୍‌ ନୁ ଅଡ଼୍‌ ମୁଞ୍ଜିନାଗ ତାଲ୍‌ଗୁଡ଼୍‌ ତଃତିଡ଼୍‌; ଆଗାକନ୍‌ ଅଡ଼୍‌ ଅନନ୍ତକାଲନ ନିୟମ୍‌ ତଡ଼୍‌ ଯାଜକ ପଦତାଗ୍‌ ପାହେମ୍‌ ଆଦ୍‌ତଣ୍ଡ୍‌ । ଇଲାନେ ମିଡ଼୍‌ ହାରୋଣତିଙ୍କ୍‌ ନୁ ତାନ୍‌ ମାର୍‌କିଡ଼୍‌କ୍‌ ହେଞ୍ଚିତିଡ଼୍‌। 10 ତାନ୍‌ପେର୍କେ ମିଡ଼୍‌ କାଲ୍‌ପାନ୍‌ ଗୁଡ଼ୁସେତାଗ୍‌ ମୁନେ ଆ ଗଡ୍‌ପିଲେ ତାତିତିଡ଼୍‌, ମେଣ୍ଡେ ହାରୋଣତେ ନୁ ତାନ୍‌ ମାର୍କିଡ଼୍‌କ୍‌ ଆ ଗଡ଼୍‌ପିଲେତ୍‌ ମୁଞ୍ଜିନାଗେ ମିଇ ନିଜର କାଇ ବରସା ଇଦ୍‌ତେ। 11 ଆସୁଟ ମିଡ଼୍‌ କାଇଲାନ୍‌ ଗୁଡ଼ୁସେତାଗ୍‌ ଦ୍ୱାର୍‌ ମୁନେ ସଦାପ୍ରବୁନ୍‌ ମୁନେ ଆ ଗଡ୍‌ପିଲେତିଙ୍କ୍ ଆୱୁକିତିଡ଼୍‌। 12 ତାନ୍‌ପେର୍କେ ଗଡ୍‌ପିଲେତେ ନେତୁରୁ ଇସୁର୍‌ ଅସ୍‌ ୱାଡ଼୍‌ଞ୍ଚ୍‌ତଡ଼୍‌ ବେଦିତେ ନେଃତିନ୍‌ ପର ଇଦ୍‌ତିଡ଼୍‌, ମେଣ୍ଡେ ବେଦିତ୍‌ ମଦଲ୍ ଆ ସାରେ ନେତୁର୍‌ ତଃସିଦ୍‌ତିଡ଼୍‌। 13 ମେଣ୍ଡେ ତାନ୍‌ ଲପେମାନ୍ଦାନ୍‌ କଡ଼୍‌ୱେସ୍‌ ନୁ ତାଡ଼୍‌କ୍‌ ପରୁ ରେଣ୍ଡ୍ କିଡ଼୍‌ନି ନୁ ରେଣ୍ଡ୍‌ ବୃକ୍‌କ ନୁ ଆଦିନ୍‌ ପର ମେଦୁର୍‌ ଅସ୍‌ ବେଦିତାଗ୍‌ ଅକିତିଡ଼୍‌। 14 ମାତର୍‌ ଗଡ୍‌ପିଲେତ୍‌ ଆୱୁଙ୍ଗ୍‌, ତଲ୍‌କେ ନୁ ଗୋମୟତେ ୱେସ୍ରାମ୍‌ତେ ବାଇଦେ କିସ୍‌ତଡ଼୍‌ ପଡ଼୍‌ସିଦ୍‌ତଡ଼୍‌; ଇଦି ପାପତେ ବଲି ଆଦ୍‌ତେ।

15 ତାନ୍‌ପେର୍କେ ମିଡ଼୍‌ ପ୍ରତମ୍‌ ମେଣ୍ଢା ଅଦ୍‌ତିଡ଼୍‌; ମେଣ୍ଡେ ହାରୋଣ ନୁ ତାନ୍‌ ମାର୍କିଡ଼୍‌କିଙ୍କ୍‌ ଆ ମେକେତ୍‌ ମୁଞ୍ଜିନାଗ୍‌ ମି ନିଜର୍‌ ନିଜର୍‌ କାଇକ୍‌ ୱାଟିତିଡ଼୍‌। 16 ଆସୁଟ୍‌ ମିଡ଼୍‌ ଆ ମେଣ୍ଢା ଆୱୁକି ତାନ୍‌ ନେତୁରୁ ଅସ୍‌ ବେଦି ପର ଚାରେପାକା ଇଲିସ୍‌କିତିଡ଼୍‌। 17 ତାନ୍‌ପେର୍କେ ମେଣ୍ଢାତିଙ୍କ୍‌ ଦୁଙ୍କା ଦୁଙ୍କାମାଡ଼ି ତାନ୍‌ ଡ଼େକା ମେନ୍ଦୁଲ୍‌ତିଙ୍କ୍‌ ନର୍‌ସ୍‌ପି ଆସାରେ ଦୁଡ଼ା ନୁ ନେତିନ୍‌ ପର ୱାଟିତିଡ଼୍‌। 18 ମେଣ୍ଡେ ମିଡ଼୍‌ ମେଣ୍ଢାନ୍‌ ଡ଼େକାନ୍‌ ବେଦିତ୍‌ ପର ପଡ଼୍‌ସିତିଡ଼୍‌; ଆୱୁ ସାରେ ସଦାପ୍ରବୁନ୍‌ ଦୁପାମ୍‌ ବେଦି ନୁ ବଗତେ ମାଇଦିଙ୍କ୍‌ ସଦାପ୍ରବୁନ୍‌ ଉଦ୍ଦେଶ୍ୟତେ କିସ୍‌ତେ ଉପହାର୍‌ ଆଦ୍‌ତା। 19 ତାନ୍‌ପେର୍କେ ମିଡ଼୍‌ ଦ୍ୱିତିୟ୍‌ ମେଣ୍ଢାତିଙ୍କ୍‌ ଅଦ୍‌ତିଡ଼୍‌, ମେଣ୍ଡେ ହାରୋଣ ନୁ ତାନ୍‌ ମାର୍କିଡ଼୍‌କିଙ୍କ୍‌ ଆ ମେକେତ୍‌ ନେତିନାଗ୍‌ ନିଜେତ୍‌ ନିଜେତ୍‌ କାଇକ୍‌ ୱାଟିତିଡ଼୍‌। 20 ଆସୁଟ୍‌ ମିଡ଼୍‌ ଆ ମେଣ୍ଢାତିଙ୍କ୍‌ ଆୱୁକି ତାନ୍‌ ବେସର୍‌ ନେତୁର୍‌ ଅସ୍‌ ହାରୋଣତେ ତିନ୍ଦେ କେୱୁ ଆଞ୍ଚିନା ନୁ ତାନ୍‌ ମାର୍କିଡ଼୍‌ ତିନ୍‌ କେୟୁ ଆଞ୍ଚିନା ନୁ ଅଡ଼୍‌ ତିନ୍‌ କାଇଦେ ମଟାୱାଡ଼୍‌ଞ୍ଜ୍‌ଦେ ପର ନୁ ତିନ୍‌ ଡେକେତେ ମଟାୱାଡ଼୍‌ଞ୍ଜ୍‌ଦେ ପର ଇଦିତିଡ଼୍‌, ମେଣ୍ଡେ ବେଦିତ୍‌ ପର ଚାର୍‌ପାକା ନେତୁରୁ ଲିସ୍କିତିଡ଼୍‌ । 21 ତାନ୍‌ପେର୍କେ ବେଦିତ୍‌ ପରତ୍‌ ନେତୁର୍‌ ନୁ ଅବିଷେକ୍‌ତେ ନିୟ୍‌ ବେଚର୍‌ ଅସ୍‌ ହାରୋଣତେ ପର ନୁ ତାନ୍‌ ଚିଲେନ୍‌ ପର, ମେଣ୍ଡେ ତାନ୍‌ତଡ଼୍‌ ଅନ୍‌ ମାର୍କିଡ଼୍‌ ପର ନୁ ଅଡ଼୍‌ ଚିଲେନ୍‌ ପର ଲିସ୍କିତିଡ଼୍‌; ଆସୁଟ୍‌ ଅଣ୍ଡ୍‌ ନୁ ତାନ୍‌ ତଡ଼୍‌ ଅନ୍‌ ଚିଲେ, ମେଣ୍ଡେ ତାନ୍‌ ମାର୍କିଡ଼୍‌ ନୁ ଅଡ଼୍‌ ଚିଲେ ପବିତ୍ର ଆଦ୍‌ତେ। 22 ମେଣ୍ଡେ ମିଡ଼୍‌ ଆ ମେକେତ୍‌ ତଲ୍‌କେ, ତଲ୍‌କେ ଲେକ୍‌ତାଦ୍‌ ତକେ, ଲପେମାନ୍ଦାନ୍‌ ତାଡ଼୍‌କ୍‌ ନୁ କିଡ଼୍‌ନି ପର୍‌ମାନ୍ଦାନ୍‌ ଅନ୍ତ୍ରାପ୍ଲାବନ୍‌ ନୁ ରେଣ୍ଡ୍‌ କୃକ୍‌ ନୁ ଆ ପରତ୍‌ ମେଦୁର୍‌ ନୁ ଡ଼େବ୍‌ବେ ଉକୁଡ଼୍‌ ଅସ୍‌ ବେଲାକି ଆଦ୍‌ ପୂଜେ ମାଡ଼ାନ୍‌ ମେଣ୍ଢା ଆଦ୍‌ତା। 23 ମେଣ୍ଡେ ସଦାପ୍ରବୁନ୍‌ ମୁନେ ତାଡ଼ି କାଇଲ୍‌ତେ ରୋଟିତ୍‌ କୁସେତ୍‌ ଅଣ୍ଡୟ୍‌ ରୋଟି ନୁ ନିୟ୍‌ କାଇଲିତେ ଅଣ୍ଡୟ୍‌ ବବ ନୁ ଅଣ୍ଡୟ୍‌ ସରୁଲାଦ୍‌ ଡ଼ପା ଅସ୍‌ 24 ଆୱୁସାରେ ହାରୋଣତେ କାଇଦେ ନୁ ତାନ୍‌ ମାର୍କିଡ଼୍‌ କାଇଦେ ଇସ୍‌ କାଲ୍‌ପ୍‌ତେ ନୈବେଦ୍ୟା ସଦାପ୍ରବୁନ୍‌ ମୁନେ ଆଦ୍‌ ବତ୍ରା ମାଡ଼ିତିଡ଼୍‌। 25 ତାନ୍‌ପେର୍କେ ମିଡ଼୍‌ ଅଡ଼୍‌ କାଇଦେ ଆୱୁସାରେ ଅସ୍‌ ସାୟେ ଏତି ତିନ୍ଦାନ୍‌ ମାଇଦିଙ୍କ୍‌ ସଦାପ୍ରବୁନ୍‌ ମୁନେତ୍‌ ବେଦିତାଗ୍‌ ଦୁପାମ୍‌ ବେଦି ବଲିତ୍‌ ପର ପଡ଼୍‌ସିତିଡ଼୍‌। ଇଦି ସଦାପ୍ରବୁନ୍‌ ମାଇଦିଙ୍କ୍‌ କିସ୍‌ତାଦ୍‌ ଉପହାର୍‌ ଆଦ୍‌ତେ।

26 ଆସୁଙ୍କ୍‌ ମିଡ଼୍‌ ହାରୋଣତେ ପୂଜେ ମାଡ଼ାନାଦ୍‌ ମେଣ୍ଢାତ୍‌ ମେନ୍ଦୁଲ୍‌ତିଙ୍କ୍ ଅସ୍‌ ମାନ୍ଦେତେ ନୈବେଦ୍ୟଆନ୍ତେ ଆର୍କେଅସ୍‌ ସଦାପ୍ରବୁନ୍‌ ମୁନେ କାଲ୍‌ପିତିଡ଼୍‌; ଆ ଦୁଡ଼୍‌ ମିୟାଦ୍‌ ବାଗ୍‌ ଆଦ୍‌ତେ।

27 ମେଣ୍ଡେ ହାରୋଣତେ ନୁ ତାନ୍‌ ମାର୍‌କିଡ଼୍‌ ପଦଇଦାନ୍‌ ମାଇଦିଙ୍କ୍‌ ମେଣ୍ଢାତେ ବେନ୍‌ ଗୁଣ୍ଡେ ଲେକ୍‌ତାଦ୍‌ ମାନ୍ଦେତେ ନୈବେଦ୍ୟ ଦୋଲାୟିତ୍‌ ନୁ ବେନ୍‌ କୃକ୍‌ ଲେକେତେ ତେତାନ୍‌ ପୁରସ୍କାର୍‌ ତେତାନ୍‌ ଆଦ୍‌ତେ, ଆଦ୍‌ ମିଡ଼୍‌ ପବିତ୍ର ମାଡ଼ିତିଡ଼୍‌। 28 ଆସୁଟ୍‌ କାଲାତେ ନିୟମ ତଡ଼୍‌ ଇସ୍ରାଏଲତେ ମାର୍‌କିଡ଼୍‌ ଆଦ୍‌ ହାରୋଣତେ ନୁ ତାନ୍‌ ମାର୍‌କିଡ଼୍‌ ଅଦିକାର୍‌ ଆଦ୍‌ତେ, ବେଲାକି ଆଦ୍‌ ତେଇସ୍‌ମାନ୍ଦାନ୍‌ ପୁରସ୍କାର୍‌; ଇସ୍ରାଏଲତେ ମାର୍‌କିଡ଼୍‌ ଆଦ୍‌ ଇ ତେଃସ୍‌ ମାନ୍ଦାନ୍‌ ପୁରସ୍କାର୍‌ ଅଡ଼୍‌ ମଙ୍ଗଲ୍‌ତାଦ୍‌ ପୂଜେ ବଲିତାଗାଙ୍କ୍‌ ଆଦେୟ୍‌ ଆଦ୍‌ତେ; ଇଦି ସଦାପ୍ରବୁନ୍‌ ମାଇଦିଙ୍କ୍‌ ଅଡ଼୍‌ ତେଃସ୍‌ ମାନ୍ଦାନ୍‌ ଉପହାର୍‌ ଆଦ୍‌ତେ। 29 ମେଣ୍ଡେ ହାରୋଣତେ ଡଲ୍‌ତାଗାଙ୍କ୍‌ ଅନ୍‌ ପବିତ୍ର ଚିଲେସାରେ ତାନ୍‌ ମାର୍କିଡ଼୍‌ଡ଼ାଦ୍‌ ଆଦ୍‌ତେ; ଅବିଷେକ୍‌ ନୁ ପଦ ନିଯୁକ୍ତି ସମୟତେ ଅଡ଼୍‌ ଆଦ୍‌ କେର୍ରେତଡ଼୍‌। 30 ଅନ୍‌ ମାର୍କିଡ଼୍‌ଆଗାଙ୍କ୍‌ ବେନ୍‌ ନାରୁଡ଼୍‌ ଅନ୍‌ ପଦତାଗ୍‌ ଯାଜକ ଆସ୍‌ ପବିତ୍ର ପଡ଼ିୟେତ୍‌ ସେବା ମାଡ଼ାନ୍‌ ମାଇଦିଙ୍କ୍ କାଇଲାନ୍‌ ଗୁଡ଼ୁସେତାଗ୍‌ ୱାଦ୍‌ତିଡ଼୍‌, ଅଣ୍ଡ୍‌ ଆ ଚିଲେ ସାତ୍‌ ଦିନ୍‌ କେର୍ରେତଣ୍ଡ୍। 31 ତାନ୍‌ପେର୍କେ ମିଡ଼୍‌ ଆ ପଦତାଗ୍‌ ଏଞ୍ଚତେ ମେଣ୍ଢାତେ ଆୱୁଙ୍ଗ୍‌ ଅସ୍‌ ଅଣ୍ଡୟ ପବିତ୍ର ପଡ଼ିୟେତାଗ ଆଟିତିଡ଼୍‌, 32 ମେଣ୍ଡେ ହାରୋଣ ନୁ ତାନ୍‌ ମାର୍କକ୍‌ ଗୁଡ଼ାନ୍‌ ଗୁଡ଼ୁସେତାଗ୍‌ ଦୁୱାଡ଼୍‌ତେ ଗାରେ ଆ ମେଣ୍ଢା ଆୱୁଙ୍ଗ୍‌ ନୁ କୁସେତାଗ୍‌ ମାନ୍ଦାନ୍‌ ଆ ରୋଟି ତିନ୍‌ତିଡ଼୍‌। 33 ମେଣ୍ଡେ ଅଡ଼୍‌ ପଦତେ ଏଞ୍ଚି ନୁ ତିଆର୍‌ତେ ମାଇଦିଙ୍କ୍‌ ବେନ୍‌ ଇସ୍‌ ପବିତ୍ର ଆତ୍‌ତେ, ଆଦ୍‌ ଅଡ଼୍‌ ତିନ୍‌ତଡ଼୍‌; ମାତର୍‌ ୱେର୍‌ ପିଲୁଡ଼୍‌ ନାରୁଡ଼୍‌ ଆଦ୍‌ ତିନ୍ଦ୍‌ଦେ ପାର୍‌ୱଡ଼୍‌, ବାତେଙ୍କ୍‌ଇତ୍କେ ଆଦ୍‌ ସାରେ ପବିତ୍ର ସାମାନ୍‌। 34 ମେଣ୍ଡେ ଆ ପଦ୍‌ ନିଯୁକ୍ତି ଆୱୁଙ୍ଗ୍‌ ନୁ ରୋଟିତେ ବେସୁଙ୍କ୍‌ ନାର୍କୁକ୍‌ଆୟିନା ବାତେ ମୁନେତ୍, ଆସୁଟ ଆଦ୍‌ ବାତେ ମାନ୍‌ତେ ଆଦ୍‌ କିସ୍‌ତାଗ୍‌ ପଡ଼୍‌ସିତିଡ଼୍‌, ବେନ୍‌ ଆଦିଙ୍କ୍‌ ତିନ୍‌ମାଟ୍‌; ବାତେଙ୍କ୍‌ଇତ୍କେ ଆଦ୍‌ ପବିତ୍ର ସାମାନ୍‌। 35 ମାମ୍‌ ମିକିଙ୍କ୍‌ ଇସାରେ ଆଦେଶ୍‌ ଇତ୍‌ତମ୍‌, ଆ ଲେକାମ୍‌ ମିଡ଼୍‌ ହାରୋଣତେ ପର ନୁ ତାନ୍‌ ମାର୍କିଡ଼୍‌ ପର ମାଡ଼ିତିଡ଼୍‌; ଅଡ଼୍‌ ପଦ ନିଯୁକ୍ତି ସାତ୍‌ଦିନ୍‌ ଆଦ୍‌ତେ। 36 ମେଣ୍ଡେ ମିଡ଼୍‌ ପବିତ୍ର ମାଇଦିଙ୍କ୍‌ ନିତାଲ୍‌ ପାପତେ ବଲି ଲେକାମ୍‌ ଅଣ୍ଡୟ୍‌ ଗଡ୍‌ପିଲେ ଉତ୍ସର୍ଗ ମାଡ଼ିତିଡ଼୍‌, ମେଣ୍ଡେ ବେଦିତ୍‌ ମାଇଦିଙ୍କ୍‌ ପବିତ୍ର ମାଡ଼ାଟ୍‌ ଆଦ୍‌ ପାପ୍‌ ମୁକ୍ତି ମାଡ଼ିତିଡ଼୍‌ ନୁ ଆଦ୍‌ ପବିତ୍ର ମାଡ଼ାନ୍‌ ମାଇଦିଙ୍କ୍‌ ଅବିଷେକ୍‌ ମାଡ଼ିତିଡ଼୍‌। 37 ମିଡ଼୍‌ ବେଦିତ୍‌ ମାଇଦିଙ୍କ୍‌ ସାତ୍‌ ଦିନ୍‌ ପବିତ୍ର ମାଡ଼ି ଆଦ୍‌ ପବିତ୍ର ମାଡ଼ିତିଡ଼୍‌; ଆସୁଟ ବେଦି ପବିତ୍ର ଆଦ୍‌ତେ, ମେଣ୍ଡେ ବାତେବା ବେଦିତିଙ୍କ୍‌ ଇଟିତ୍‌, ଆସାରେ ପବିତ୍ର ଆଦ୍‌ତେ।

38 ଆ ବେଦିପର୍‌ ମିଡ଼୍‌ ଇ ବଲି ଉତ୍ସର୍ଗ ମାଡ଼୍‌ତିଡ଼୍‌; ମିଡ଼୍‌ ନିତାଲ୍‌ ନିତାଲ୍‌ ଦିନାଲ୍‌ ଅଣ୍ଡୟ୍‌ ଏଣ୍ଡ୍‌କ୍‌ ରେଣ୍ଡ୍‌ ମେଣ୍ଢାପିଲା, 39 ଇତ୍କେ, ଆଦିନ୍‌ ପ୍ରତମ୍‌ ମେଣ୍ଢାପିଲେତିଙ୍କ୍‌ ନାର୍କୁକେ ଉତ୍ସର୍ଗ ମାଡ଼୍‌ତିଡ଼୍‌ ନୁ ଦ୍ୱିତିୟ୍‌ ମେଣ୍ଢେପିଲେ ମୁଲ୍‌ପୁଟ୍‌ତେ ୱେଲେ ଉତ୍ସର୍ଗ ମାଡ଼୍‌ତିଡ଼୍‌। 40 ମେଣ୍ଡେ ପ୍ରତମ୍‌ ମେଣ୍ଢାପିଲେତଡ଼୍‌ ହିନ୍‌ ଗିନେତଡ଼୍‌ ତିଡ଼୍‌ପାକାନ୍‌ ନିର୍ମଲ ପେଷା ନିୟ୍‌ଦେ କାଇଲ୍‌ତେ ଅଣ୍ଡୟ୍‌ ଐଫାର* ଦଶମାଂଶ ମଇଦା ନୁ ଉନ୍ଦାନ୍‌ ନିୟ୍‌ଦେ ମାଇଦିଙ୍କ୍‌ ହିନ୍‌* ତିଡ଼୍‌ପାକେତ୍‌ ଅଙ୍ଗୁର୍‌କାଲ୍‌ ଇଦ୍‌ତିଡ଼୍‌। 41 ମେଣ୍ଡେ ମୁଲ୍‌ପୁଟ୍‌ତେ ୱେଲେ ଦ୍ୱିତିୟ ମେଣ୍ଢାପିଲେ ବେଦିତାଗ୍‌ ଉତ୍ସର୍ଗ ମାଡ଼ିତିଡ଼୍‌, ମେଣ୍ଡେ ନାର୍କୁତ୍‌ କାଦିତ୍‌ ନିୟ୍‌ ନୁ ଉନ୍ଦାନ୍‌ ନିୟ୍‌ ବାଦୁଲ୍‌ତେ ସାୟେତ୍‌ ପୁରସ୍କାର୍‌ ସଦାପ୍ରବୁନ୍‌ ମାଇଦିଙ୍କ୍‌ କିସ୍‌ତେ ଉପହାର୍‌ ଇନା ଆଦ୍‌ ପାଲନ୍‌ ମାଡ଼ିତିଡ଼୍‌। 42 ଇଦି କାଇଲାନ୍‌ ଗୁଡ଼ୁସେତାଗ୍‌ ଦୁୱାର୍‌ତେ ଗାରେ ସଦାପ୍ରବୁନ୍‌ ମୁନେ ମିୟାଦ୍‌ ମୁନେଙ୍କ୍‌ତେ ଆନିଦାଦିଡ଼୍‌ ନିତାଲ୍‌ତେ ପାଡ଼ିୟ୍‌ ଦୁପାମ୍‌ ବେଦି ଆଦ୍‌ତେ; ଆ ପଡ଼ିୟ୍‌ତାଗ ମାମ୍‌ ମିଇ ତଡ଼୍‌ ତିର୍ୟାନ୍‌ ମାଡ଼ାନ୍‌ମାଇଦିଙ୍କ୍‌ ମିଇ ତଡ଼୍‌ କାଇଲିତାନ୍‌। 43 ମେଣ୍ଡେ ଆ ପଡ଼ିୟେତାଗ ମାମ୍‌ ଇସ୍ରାଏଲତେ ମାର୍କିଡ଼୍‌ ତଡ଼୍‌ କାଇଲିତାନ୍‌; ମେଣ୍ଡେ ମାମ୍‌ ଗୌରବ୍‌ ୱେଇସ୍‌ତେ ଗୁଡ଼ୁସେ ପବିତ୍ର ଆଦ୍‌ତେ। 44 ମେଣ୍ଡେ ମାମ୍‌ କାଇଲାନ୍‌ ଗୁଡ଼ୁସେତାଗ୍‌ ନୁ ବେଦି ପବିତ୍ର ମାଡ଼ିତମ୍‌, ମେଣ୍ଡେ ମା ଯାଜକ୍‌ ପାଡ଼ିୟ୍‌ଦେ ମାଇଦିଙ୍କ୍‌ ହାରୋଣତିଙ୍କ୍ ନୁ ତାନ୍‌ ମାର୍କିଡ଼୍‌କିଙ୍କ୍‌ ପବିତ୍ର ମାଡ଼ିତମ୍‌। 45 ମାମ୍‌ ଇସ୍ରାଏଲତେ ମାର୍କିଡ଼ାଗ୍‌ ମାଞ୍ଜ୍‌ ଅଡ଼୍‌ ପରମେଶ୍ୱର ଆଦିକାଡ଼୍‌। 46 ଆସୁଟ ମାମ୍‌ ଯେ ଅଡ଼୍‌ ସଦାପ୍ରବୁ ପରମେଶ୍ୱର, ଅଡ଼ାଗ୍‌ ମାନ୍ଦାନ୍‌ ମାଇଦିଙ୍କ୍‌ ମିସର୍ ଦେଶକନ୍‌ ଅଡ଼୍‌କିଙ୍କ୍‌ ପେସ୍‌ପିତାସ୍‌ ମିନ୍ଦେମ୍‌, ଆଦ୍‌ ଅଡ଼୍‌ ପୁନ୍‌ତଡ଼୍‌; ମାମ୍‌ ସଦାପ୍ରବୁ ଅଡ଼୍‌ ପରମେଶ୍ୱର।