1 ମେଣ୍ଡେ ମିଡ଼୍‌ ଦୁପାମ୍‌ ନିଡ଼୍‌ପ୍ସାନ୍‌ ମାଇଦିଙ୍କ୍‌ ଶିଟିମ୍‌ ୱେର୍‌କ୍‌ ଅଣ୍ଡୟ୍‌ ବେଦି ତିଆର୍‌ ମାଡ଼ିତିଡ଼୍‌। 2 ଆଦ୍‌ ଅଣ୍ଡୟ୍‌ କାଇ ଲାଟି ନୁ ଅଣ୍ଡୟ୍‌ କାଇ ଓସାର୍‌ ନୁ ନାଲୁମୁଲା ଆଦ୍‌ତେ, ମେଣ୍ଡେ ରେଣ୍ଡ୍‌ କାଇକ୍‌ ଲାଟି ଆଦ୍‌ତେ; ଆଗେ କକ୍‌ ସାରେ ଆଗେ ଅଂଶ ଆଦ୍‌ତେ। 3 ଆଗେ ପରତ୍‌ପାକେ ନୁ ନାଲୁପାକା ନୁ ନେତ୍‌ ନିର୍ମଲ୍‌ ସନ୍‌ଦେ ମାଡ଼୍‌ପିତିଡ଼୍‌ ନୁ ସାରେପାକା ସନ୍‌ଦେ ନେଟେ ମାଡ଼୍‌ତିଡ଼୍‌। 4 ମେଣ୍ଡେ ଆଗେତ୍‌ ନେଟେତ୍‌ ମଦଲ୍‌ ରେଣ୍ଡେପାକାନ୍‌ ରେଣ୍ଡେ ମୁଲାନ୍‌ ଗାରେ ସନ୍‌ଦେ ରେଣ୍ଡ୍‌ ରେଣ୍ଡ୍‌ ଇକ୍‌ଲେକ୍‌ ମାଡ଼୍‌ତିଡ଼୍‌; ମେଣ୍ଡେ ଆୱୁ କାଞ୍ଜାନ୍‌ ମାଇଦିଙ୍କ୍‌ ଟେଙ୍ଗା ଆଦ୍‌ତା। 5 ଆ ଟେଙ୍ଗେ ଶିଟିମ୍‌ ୱେର୍‌କ୍‌ ତିଆର୍‌ ମାଡ଼ି ସନ୍‌ଦେ ମାଡ଼୍‌ପିତିଡ଼୍‌। 6 ମେଣ୍ଡେ ମାମ୍‌ ବେନ୍‌ ପଡ଼ିୟେତାଗ୍‌ ମିଇ ତଡ଼୍‌ କାଇଲିତମ୍‌, ଆ ପଡ଼ିୟେତାଗ୍‌, ଇତ୍କେ, ସାକ୍ଷ୍ୟ ସିନ୍ଦୁକ୍‌ତେ ପରତ୍‌ପାକେ ପାପ୍‌ ନର୍‌ଦାନାଦ୍‌ ମୁନେ ସାକ୍ଷ୍ୟସିନ୍ଦୁତେ ପେଡ଼ିତ୍‌ ପରତ୍‌ପାକେ ଲିକ୍‌ତେ ଚିଲେତେ ମୁନେ ଆଦ୍‌ ନେଃତିଡ଼୍‌। 7 ହାରୋଣ ଆଦିନ୍‌ ପର ସାୟେ ଗାବ୍‌ ମାନ୍ଦାନ୍‌ ଦୁପାମ୍‌ ନିଡ଼୍‌ସ୍ପିତିଡ଼୍‌, ଅଣ୍ଡ୍‌ ନିତାଲ୍‌ ନାର୍କୁକେ ୱେସ୍‌ ପରିଷ୍କାର୍‌ ମାଡ଼ାନ୍‌ ୱେଲେ ଆ ଦୁପାମ୍‌ ନିଡ଼୍‌ସ୍ପିତିଣ୍ଡ୍‌ । 8 ମେଣ୍ଡେ ମୁଲ୍‌ପୁଟ୍‌ତେ ୱେଲେ ହାରୋଣ ୱେସ୍‌ ନିଡ଼୍‌ସ୍କ୍‌ପାନ୍‌ ସମୟତେ ଦୁପାମ୍‌ ନିଡ଼୍‌ସ୍ପିଦ୍‌ତଣ୍ଡ୍‌, ଆଗାକନ୍‌ ମିଡ଼୍‌ ଆନିଦାଦିଡ଼୍‌ ସଦାପ୍ରବୁନ୍‌ ମୁନେ ସାରେ ଦିନା ଦୁପାମ୍‌ ନିଡ଼୍‌ସ୍ପିତିଡ଼୍‌। 9 ମିଡ଼୍‌ ଆଦିନ୍‌ ପର ଇତ୍ତଡ଼୍‌ ଦୁପାମ୍‌ ଇଲୁକ୍‌ ଦୁପାମ୍‌ ବେଦି ଇଲୁକ୍‌ ତିନ୍ଦାନ୍‌ ନୈବେଦ୍ୟ ଉତ୍ସର୍ଗ ମାଡ଼୍‌ୱିଡ଼୍‌ ଆୟେଡ଼୍‌ ନୁ ଆଦିନ୍‌ ପର ଉନ୍ଦାନ୍‌ ନୈବେଦ୍ୟ ତସ୍‌ମାଟ୍‌। 10 ମେଣ୍ଡେ ହାରୋଣ ଏଣ୍ଡେକତେ ଅଣ୍ଡୟ୍‌ଦାମ୍‌ ଆଦିନ୍‌ କଃର୍‌ଦେ ମାଇଦିଙ୍କ୍‌ ପବିତ୍ର ମାଡ଼ିତିଡ଼୍‌; ଆ ସମର୍ପିତ୍‌ ପାପତେ ବଲିତେ ନେତୁର୍‌ତେ ମି ଆନିଦାଦିଡ଼୍‌ ଏଣ୍ଡେକ୍‌ତେ ଅଣ୍ଡୟ୍‌ଦାମ୍‌ ଆଦିନ୍‌ ମାଇଦିଙ୍କ୍‌ ସମର୍ପିତ୍‌ ମାଡ଼ିତିଡ଼୍‌; ଇ ବେଦି ସଦାପ୍ରବୁନ୍‌ ମାଇଦିଙ୍କ୍‌ ପବିତ୍ର ଆଦ୍‌ତେ।

11 ମେଣ୍ଡେ ସଦାପ୍ରବୁ ମୋଶାଙ୍କ୍‌ ଇ ଗଟ୍‌ କେତ୍‌ତଣ୍ଡ୍‌, 12 ବେସୁଟ୍‌ ମିଡ଼୍‌ ଲେକ୍‌ତେ ନାରୁଡ଼୍‌ ସଂକ୍ୟାଲେକାମ୍‌ ଇସ୍ରାଏଲତେ ମାର୍କିଡ଼୍‌ ଲେକାଙ୍କ୍‌ ମାଡ଼ିତିଡ଼୍‌, ଆସୱେଲେ ଅଡ଼୍‌କିଙ୍କ୍‌ ସାରେ ନାରୁଡ଼୍‌ ସଦାପ୍ରବୁଙ୍କ୍‌ ଗାରେ ନିଜର ନିଜର ପ୍ରାମାନ୍‌ ଲେକାନ୍‌ ସମୟତେ ସମର୍ପିତ୍‌ ମାଡ଼ିତିଡ଼୍‌, ଆସୁଟ ଅଡ଼୍‌ଆଗାଙ୍କ୍‌ ଲେକାନ୍‌ ସମୟତେ ରଗ୍‌ ଆୟ୍‌। 13 ବେନ୍‌ ଆୟିଣ୍ଡବା ଲେକ୍‌ତେ ନାରୁଡ଼ାଗା ୱାଦ୍‌ତଣ୍ଡ୍‌, ଅଣ୍ଡ୍‌ ପବିତ୍ର ଆରୁ ଗ୍ରାମ୍‌ ଲେକାମ୍‌ ଚୁଦୁଲାଦ୍‌ ବଡ଼୍‌ ଇଦ୍‌ତିଡ଼୍‌; କୋଡ଼ିଏ ଗେରାତେ* ଅଣ୍ଡୟ୍‌ ବଡ଼୍‌; ଆ ଦୁଡ଼୍‌ ବଡ଼୍‌ ସଦାପ୍ରବୁନ୍‌ ଦର୍‌କ୍‌ତେ ପୁରସ୍କାର୍‌ ଆଦ୍‌ତେ। 14 କୋଡ଼ିଏ ଏଣ୍ଡକ୍‌କିନ୍‌ ତାନ୍‌ ଅଦିକ୍‌ ଏଣ୍ଡେକ୍‌ତେ ବୟସତେ ବେନମେଣ୍ଡେ ଲେକ୍‌ତେ ନାରୁଡ଼୍‌ଆଗାଙ୍କ୍‌ ୱାଦତଡ଼୍‌, ଅଣ୍ଡ୍‌ ସଦାପ୍ରବୁନ୍‌ ଇ ପୁରସ୍କାର୍‌ ଇଦ୍‌ତଣ୍ଡ୍‌। 15 ମିଡ଼୍‌ ନିଜର ନିଜର ଜିଉନ୍‌ତେ ମାଇଦିଙ୍କ୍‌ ସମର୍ପିତ୍‌ ମାଡ଼ାନ୍‌ ମାଇଦିଙ୍କ୍‌ ସଦାପ୍ରବୁନ୍‌ ଆ ପୁରସ୍କାର୍‌ ଇଦାନ୍‌ ୱେଲେ ସାଉକାରିଙ୍କ୍‌ ଦୁଡ଼୍‌ ବଡକ୍‌ ଅଦିକ୍‌ ଇମାଟ୍‌, ମେଣ୍ଡେ ଗରିବ୍‌ନଡ଼୍‌ ଆଗାକନ୍‌ ସୁକ୍‌କୁ ଇମାଟ୍‌। 16 ଆସୁଟ୍‌ ମିଡ଼୍‌ ଇସ୍ରାଏଲତେ ମାର୍କିଡ଼୍‌ଆଗାଙ୍କ୍‌ ଆ ସମର୍ପିତ୍‌ ରୁପା ଅସ୍‌ କାଇଲାନ୍ ଗୁଡ଼ୁସେତାଗ୍‌ ପାଡ଼ିୟ୍‌ଦେ ମାଇଦିଙ୍କ୍‌ ତିଆର୍‌ ମାଡ଼ିତିଡ଼୍‌; ଆଦ୍‌ ମି ଜିଉନ୍‌ତିଙ୍କ୍‌ ପବିତ୍ରତେ ମାଇଦିଙ୍କ୍‌ ଇସ୍ରାଏଲତେ ମାର୍କିଡ଼୍‌ ଏର୍କେତ୍‌ ମାଇଦିଙ୍କ୍‌ ସଦାପ୍ରବୁନ୍‌ ମୁନେ ମାନ୍‌ତିଡ଼୍‌।

17 ଲପେକନ୍‌ ସଦାପ୍ରବୁ ମୋଶାଙ୍କ୍‌ କେତ୍‌ତଣ୍ଡ୍‌, 18 ମିଡ଼୍‌ ନର୍‌ଦାନ୍‌ ମାଇଦିଙ୍କ୍‌ ପିତ୍ତଲ୍‌ତେ କୁଣ୍ଡେତିଙ୍କ୍‌ ନୁ ଆଗେତ୍‌ ପିତ୍ତଲ୍‌ତେ ତିଆର୍‌ ଆତ୍‌ତାଦିଙ୍କ୍‌ ତିଆର୍‌ ମାଡ଼ିତିଡ଼୍‌; ମେଣ୍ଡେ କାଇଲାନ୍‌ ଗୁଡ଼ୁସେତାଗ୍‌ ନୁ ବେଦିତ୍‌ ନାଡ଼୍‌ମେ ନେଃତିଡ଼୍‌ ଆଗେ ଏର୍‌ ତୁରୁୱିତିଡ଼୍‌। 19 ମେଣ୍ଡେ ହାରୋଣ ନୁ ତାନ୍‌ ମାର୍‌କ୍‌ ଆଗାକନ୍‌ ନିଜର ନିଜର କାଇକ୍‌ ନୁ ଡ଼େକା ନର୍‌ଦ୍‌ତଡ଼୍‌। 20 ଅଡ଼୍‌ କାଇଲାନ୍‌ ଗୁଡ଼ୁସେତାଗ୍‌ ନେଙ୍ଗାନ୍‌ ୱେଲେ ବେଲାକି ଡଲଡ଼୍‌ ଆଦ୍‍ତଡ଼୍‌; ଇଦିନ୍‌ମାଇଦିଙ୍କ୍‌ ଏର୍‌ଦେ ନିଜର ମାଇଦିଙ୍କ୍‌ ନର୍ରତଡ଼୍‌; ବା ସଦାପ୍ରବୁନ୍‌ ସେବାତେ ମାଇଦିଙ୍କ୍‌; ଇତ୍କେ, କିସ୍‌ତେ ଉପହାର୍‌ଦେ ଦୁପାମ୍‌ନ୍ୟାୟ୍‌ ପଡ଼୍‌ସାନ୍‌ ମାଇଦିଙ୍କ୍‌ ବେଦିତ୍‌ ଗାରେ ୱାଦାନ୍‌ ୱେଲେ ବେଲା ଡ଼ଲ୍‌ମାକିଡ଼୍‌। 21 ଇଦିନ୍‌ ମାଇଦିଙ୍କ୍‌ ଅଡ଼୍‌ ନିଜର ନିଜର କାଇ ନୁ ଡ଼େକା ନର୍ରତଡ଼୍‌; ଇଦି ଆଦିନ୍‌ ନୁ ତାନ୍‌ ପିଲୁଡ଼୍‌ତେ ଆନିଦାଦିଡ଼୍‌ ପାଲନ୍‌ ମାଡ଼ାନ୍‌ ତେର୍‌ୱ ୱେଲେତ୍‌ ନିୟମ୍‌।

22 ମେଣ୍ଡେ ସଦାପ୍ରବୁ ମୋଶାଙ୍କ୍‌ କେତ୍‌ତଣ୍ଡ୍‌, 23 ମିଡ଼୍‌ ନିଜର ଗାରେ ଇସାରେ ଅଦିକ୍‌ ସାୟେ ଗାବ୍‌ମାନ୍ଦାନ୍‌ ଜିନିଷ୍‌, ଇତ୍କେ, ପବିତ୍ର ପଡ଼ିୟେତେ ବଡ଼୍‌ ଲେକାମ୍‌ ଏଇଙ୍ଗ୍‌ ବଡି ନିର୍ମଳ ଗାବ୍‌ମାନ୍ଦାନ୍‌ ନିୟ୍‌ ନୁ ଆଗେତ୍‌ ଦୁଡ଼୍‌, ଇତ୍କେ, ଶହେ ପଚାଶ୍‌ ବଡ଼୍‌ ଲେକେତ୍ ଗାବ୍‌ତାଦ୍‌ ଦାରୁଚିନି* ନୁ ଶହେ ପଚାଶ୍‌ ଗ୍ରାମ୍‌ ସାୟେ ଗାବ୍‌ ମାନ୍ଦାନ୍‌। 24 ବାର ଗ୍ରାମ୍‌ ଗୁଡ଼ତ୍ୱକ୍‌ ନୁ ଅଣ୍ଡୟ୍‌ ହିନ୍‌* ଜିତ ମାଡ଼େତ୍‌ ନିୟ୍‌ ଗୁଡ଼୍‌ପିତିଡ଼୍‌। 25 ଇସାରେ ଆୱିନ୍‌ ତଡ଼୍‌ ଅବିଷେତେ ମାଇଦିଙ୍କ୍‌ ପବିତ୍ର ନିୟ୍‌, ଇତ୍କେ, ସାୟେ ଗାବ୍‌ ମାନ୍ଦାନ୍‌ ପାଡ଼ିୟି ଲେକାମ୍‌ ନିୟ୍‌ ତିଆର୍‌ ମାଡ଼୍‌ତିଡ଼୍‌, ଆଦ୍‌ ଅବିଷେକ୍‌ତେ ମାଇଦିଙ୍କ୍‌ ପବିତ୍ର ନିୟ୍‌ ଆଦ୍‌ତେ। 26 ଆଦ୍‌ ମିଡ଼୍‌ ଅସ୍‌ କାଇଲାନ୍‌ ଗୁଡ଼ୁସେତାଗ୍‌ ନୁ ସାକ୍ଷ୍ୟ ସିନ୍ଦୁକ୍‌, 27 ମେଣ୍ଡେ ଟେବୁଲ୍‌ ନୁ ଆଗେତ୍‌ ସାରେ ଗିନେ ଦୁପାମ୍‌ ମାଡ଼େ ନୁ ଆଗେତ୍‌ ସାରେ ଜିନିଷ୍‌, 28 ମେଣ୍ଡେ ଦୁପାମ୍‌ ବେଦି ନୁ ଆଗେତ୍‌ ସାରେ ଜିନିଷ ନୁ ଡ଼େକା କାଇକ୍‌ ନର୍‌ଦାନ୍‌ ଗିନେ ନୁ ଆଗେ କୁଦ୍‌ତେନଡ଼୍‌ ଅବିଷେକ୍‌ ମାଡ଼ିତିଡ଼୍‌। 29 ମେଣ୍ଡେ ଇ ସାରେ ସାମାନ୍‌ତିଙ୍କ୍‌ ପବିତ୍ର ମାଡ଼୍‌ତିଡ଼୍‌, ଆଗାକନ୍‌ ଆଦ୍‌ ପବିତ୍ର ଆଦ୍‌ତେ, ବାତ୍‌ବା ଆଦ୍‌ ଇଟିତ୍‌, ଆଦ୍‌ ଆୱ୍‌ସାରେ ପବିତ୍ର ଆଦ୍‌ତା। 30 ମେଣ୍ଡେ ମିଡ଼୍‌ ହାରୋଣତିଙ୍କ୍‌ ନୁ ତାନ୍‌ ମାର୍କିଡ଼୍‌କିଙ୍କ୍‌ ମା ଯାଜକ୍‌ ପାଡ଼ିୟ୍‌ଦେ ମାଇଦିଙ୍କ୍‌ ଅବିଷେକ୍‌ ମାଡ଼ି ପବିତ୍ର ମାଡ଼୍‌ତିଡ଼୍‌। 31 ମେଣ୍ଡେ ଇସ୍ରାଏଲତେ ନାରୁଡ଼୍‌କିଙ୍କ୍‌ କେତିଡ଼୍‌, ମିଇ ଆନିଦାଦିଡ଼୍‌ ମା ମାଇଦିଙ୍କ୍‌ ଆଦ୍‌ ଅବିଷେକ୍‌ତେ ପବିତ୍ର ନିୟ୍‌ ଆଦ୍‌ତେ। 32 ନାରୁଡ଼୍‌ ମେନ୍ଦୁଲ୍‌ତାଗ ଆଦ୍‌ ତସାଙ୍କ୍‌ ଆୟ୍‌; ଇଲୁକ୍‌ବା ମିଡ଼୍‌ ଆଗେତ୍‌ କାଇଲିତେ ପ୍ରମାନ୍‌ ଲେକାମ୍‌ ମେଣ୍ଡେ ବେନ୍‌ବା ନିୟ୍‌ ମାଡ଼୍‌ମାଟ୍‌; ଆଦ୍‌ ପବିତ୍ର ଆଦ୍‌ତେ, ମେଣ୍ଡେ ଆଦ୍‌ ମିଇ ମାଇଦିଙ୍କ୍‌ ପବିତ୍ର ଆଦ୍‌ତେ। 33 ବେନ୍‌ଆୟି ଆଦିନ୍‌ ସାମାନ୍‌ ବାତେ ତିଆର୍‌ ମାଡ଼ିତଣ୍ଡ୍‌, ବା ବେନ୍‌ଆୟି ୱେର୍‌ ନାରୁଡ଼୍‌ ମେନ୍ଦୁଲ୍‌ତେ ଆଗେତାଦ୍‌ବାତେ ଇସୁର୍‌ ଇଦ୍‌ତଣ୍ଡ୍‌, ଅଣ୍ଡ୍‌ ନିଜର ନାରୁଡ଼୍‌ଆଗାଙ୍କ୍‌ ୱେର୍‌ ଆଦ୍‌ତେ।

34 ତାନ୍‌ପେର୍କେ ସଦାପ୍ରବୁ ମୋଶାଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ନିଜର୍‌ ଗାରେ ସାୟେ ଗାବ୍‌ ସାମାନ୍‌, ଇତ୍କେ, ଗୁଗ୍‌ଗୁଲ, ନକୀ ପୁଙ୍ଗାର୍‌, କୁନ୍ଦୁରୁ ନୁ ନିର୍ମଳ ଲୋବାନ୍‌, ଇ ସାରେ ସାୟେ ଗାବ୍‌ ମାନ୍ଦାନ୍‌ ସାମାନ୍‌ ଗୁଡ଼୍‌ପାଟ୍‌। 35 ମେଣ୍ଡେ ଆଦିନ୍‌ତଡ଼୍‌ ସାୟେ ଗାବ୍‌ ମାନ୍ଦାନ୍‌ ପାଡ଼୍‌ୟି ତିଆର୍‌ ନୁ ଅୱଡ଼୍‌ତେ ଅଣ୍ଡୟ୍‌ ନିର୍ମଲ୍‌ ପବିତ୍ର ଗାବ୍‌ମାନ୍ଦାନ୍‌ ଦୁପାମ୍‌ ତିଆର୍‌ ମାଡ଼ାଟ୍‌। 36 ଆଗାଙ୍କ୍‌ ଇସୁର୍‌ ଗୁଣ୍ଡାଲ୍ ମାଡ଼ି ବେନ୍‌ କାଇଲାନ୍‌ ଗୁଡ଼ୁସେତାଗ୍‌ ମାମେ ମିକିଙ୍କ୍‌ କାଇଲିତମ୍‌, ଆଗାକନ୍‌ ସାକ୍ଷ୍ୟସିନ୍ଦୁକ୍‌ତେ ମୁନେ ନେଃତିଡ଼୍; ଆଦ୍‌ ମିଇ ମାଇଦିଙ୍କ୍‌ ପବିତ୍ର ଆଦ୍‌ତେ। 37 ମେଣ୍ଡେ ମିଡ଼୍‌ ବେନ୍‌ ଗାବ୍‌ ମାନ୍ଦାନ୍‌ ଦୁପାମ୍‌ ମାଡ଼୍‌ତିଡ଼୍‌, ଆଗେତ୍‌ କାଇଲ୍‌ତେ ସାମାନ୍‌ ପ୍ରମାନ୍‌ ଲେକାମ୍‌ ମିଇ ମାଇଦିଙ୍କ୍‌ ମାଡ଼୍‌ମାଟ୍‌, ଆଦ୍‌ ମିଇ ପର ସଦାପ୍ରବୁନ୍‌ ମାଇଦିଙ୍କ୍‌ ପବିତ୍ର ଆଦ୍‌ତେ। 38 ବେନ୍‌ଆଇ ନିଜେ କେଞ୍ଜାନ୍‌ ଇସାପ୍‌ତେ ଗାବ୍‌ମାନ୍ଦାନ୍‌ ଦୁପାମ୍‌ ତିଆର୍‌ ମାଡ଼ିତିଡ଼୍‌, ଅଣ୍ଡ୍‌ ନିଜର ନାରୁଡ଼୍‌ ଆଗାଙ୍କ୍‌ ୱେର୍‌ ଆଦ୍‌ତଣ୍ଡ୍‌ ।