1 ଆଦିନ୍‌ ମାଇଦିଙ୍କ୍‌ ସଦାପ୍ରବୁନ୍ ସାରେ ଗଟ୍‌ଲେକାମ୍‌ ପବିତ୍ର ପଡ଼ିୟେତ୍‌ ପାଡ଼ିୟ୍‌ସାରେ ତିଆର୍‌ ମାଡ଼ାନଙ୍କ୍‌ ସଦାପ୍ରବୁ ବତ୍ସଲେଲ୍‌ ନୁ ଅହଲିୟାବ ବାଗାତଡ଼୍‌ ବେନଡ଼୍‌କିଙ୍କ୍‌ ନୁ ବୁଦ୍ଦ୍‌ ଇସ୍‌ମିନ୍ଦେଣ୍ଡ୍‌, ଆୱୁସାରେ ବୁଦ୍ଦ୍‌ ମାନ୍ଦାନ୍‌ ନାରୁଡ଼୍‌ କାମ୍‌ ମାଡ଼ିତଡ଼୍‌।

2 ତାନ୍‌ପେର୍କେ ମୋଶା ଆଦ୍‌ ସଦାପ୍ରବୁନେ ସାରେ ଆଜ୍ଞାନୁସାର୍‌ତେ ପବିତ୍ର ପଡ଼ିୟେତ୍‌ ପାଡ଼୍‌ୟି ସାରେ କେତାନ୍‌ ମାଇଦିଙ୍କ୍‌ ସଦାପ୍ରବୁ ବତ୍ସଲେଲ୍‌ ନୁ ଅହଲିୟାବ ଲେକେତ୍‌ ବେନଙ୍କ୍‌ ଜ୍ଞାନ ନୁ ବୁଦ୍ଦ୍‌ ଇସମିନ୍ଦେଣ୍ଡ୍‌, ଅସାରେ ବିଜ୍ଞମନା ନାରୁଡ଼୍‌ ପାଡ଼୍‌ୟି ମାଡ଼୍‌ତଡ଼୍‌। 3 ଆସୁଙ୍କ୍‌ ଅଡ଼୍‌ ପବିତ୍ର ପଡ଼୍‌ୟେତେ ପାଡ଼ିୟି ତିଆର୍‌ ମାଡ଼ାନ୍‌ ମାଇଦିଙ୍କ୍‌ ଇସ୍ରାଏଲତେ ମାର୍ ତାତ୍‌ତେ ଉପହାର୍‌ ସାରେ ମୋଶାନାଗ୍‌କନ୍‌ ନେଃତ୍‌ତଡ଼୍‌; ଆଗେକ୍‌ବା ନାରୁଡ଼୍‌ ନିତାଲ୍‌ତେ ନାର୍‌କୁ ଅନ୍‌ ଗାରେ ଆସାମେ ମେଣ୍ଡେ ପୁରସ୍କାର୍‌ ତାତ୍‌ତଡ଼୍‌। 4 ଆସୁଟ୍‌ ପବିତ୍ର ପଡ଼୍‌ୟେତ୍‌ ସାରେ ପାଡ଼୍‌ୟି ମାଡ଼୍‌ନଡ଼୍‌ ବୁଦ୍ଦ୍‌ ମାନ୍ଦାନ୍‌ ନାରୁଡ଼୍‌ ନିଜର ନିଜର ପାଡ଼୍‌ୟିଦାଗାଙ୍କ୍‌ ୱାସ୍‌ ମୋଶାଙ୍କ୍‌ କେତ୍‌ତଡ଼୍‌, 5 ସଦାପ୍ରବୁ ବାତେ ବାତେ ମାଡ଼ାଙ୍କ୍‌ ଗଟ୍‌ ଇସ୍‌ମିନ୍ଦେଣ୍ଡ, ନାରୁଡ଼୍‌ ଆ ପାଡ଼୍‌ୟିଦେ ମାଇଦିଙ୍କ୍‌ ଦରକାର୍ ଜିନିଷ୍‌ ଅଦିକ୍‌ ତାତୁତଡ଼୍‌।

6 ଆସୁଟ୍‌ ମୋଶାଲ୍‌ ଗଟ୍‌ ଇସ୍‌ ଚାମ୍‌ଡ଼େତେ ସାରେ ଇଦି ଗୋଷଣା ମାଡ଼୍‌ତଡ଼୍‌, ମାନେୟି କି ନାଟାଡ଼୍‌ ପବିତ୍ର ପଡ଼୍‌ୟେତ୍‌ ମାଇଦିଙ୍କ୍‌ ମେଣ୍ଡେ ପୁରସ୍କାର୍‌ ତିଆର୍‌ ମାଡ଼୍‌ମାକିଣ୍ଡ୍‌; ଆଦିଙ୍କ୍‌ ନାରୁଡ଼୍‌ ତାନାଙ୍କ୍‌ ୱିଡ଼୍‌ଆତ୍‌ତଡ଼୍‌। 7 ବାତେଙ୍କ୍‌ଇତ୍କେ ସାରେ ପାଡ଼୍‌ୟି ମାଡ଼ାନ୍‌ ମାଇଦିଙ୍କ୍‌ ଅଡ଼୍‌ ଜିନିଷ୍‌ ପିନା ନୁ ଅଦିକ୍‌ ମାତ୍‌ତା।

8 ତାନ୍‌ପେର୍କେ ପାଡ଼୍‌ୟି ମାଡ଼୍‌ନଡ଼୍‌ ନାଗାଙ୍କ୍‌ ସାରେ ବୁଦ୍ଦ୍‌ ମାନ୍ଦାନ୍‌ ନାରୁଡ଼୍‌ ବଲା ପାଣ୍ଡ୍ରି ଚୁଦୁଲାଦ୍‌ ନୁଲ୍‌ ନୁ ନିଲ, ଉମେ ନୁ ଏର୍ରେ କଲର୍‌ ନୁଲ୍‌ତଡ଼୍‌ ଲନ୍‌ ଦଶ ପରଦା ତିଆର୍‌ ମାଡ଼୍‌ତଡ଼୍‌; ମେଣ୍ଡେ ଆସୁଟ୍‌ ଆଗେତ୍‌ ଶିଳ୍ପ ପାୟିଦେ କିରୁବ ଇନା ତିଆର୍‌ ମାଡ଼୍‌ତଡ଼୍‌। 9 ସାରେ ପରଦା ଅଟାଇଶ୍‌ କାଇ ଲାଟି, ସାରେ ପରଦା ନାଲୁ କାଇ ଓସାର୍‌ ନୁ ସାରେ ପରଦା ସାମାନ୍‌ ମାତ୍‌ତା। 10 ମେଣ୍ଡେ ଆ ଏଇଙ୍ଗ୍ ପରଦା ଅଣ୍ଡୟ୍‌ତାଗ୍‌ କାଲ୍‌ପ୍‌ତଡ଼୍‌; ମେଣ୍ଡେ ୱେର୍‌ ପରଦା ଅଣ୍ଡୟ୍‌ଆଗ୍‌ କାଲ୍‌ପ୍‌ତଡ଼୍‌। 11 ମେଣ୍ଡେ , ଆ କାଲ୍‌ପ୍‌ତେ ପଡ଼୍‌ୟିତେ ପ୍ରତମ୍‌ ଲପେ ପରଦା ଲାଇନ୍‌ତେ ନିଲ ନୁଲ୍‌ ଉଡ଼୍‌ଲନ୍‌ ମାଡ଼୍‌ତଡ଼୍‌; କାଇଲ୍‌ତେ ପଡ଼୍‌ୟେ ଦ୍ୱିତିୟ୍‌ ପରଦା ଲପେତ୍‌ ପରଦା ଉଡ଼ିତେ ଆଲେ ମାଡ଼୍‌ତଡ଼୍‌। 12 ଆ ପ୍ରତମ୍‌ତେ ଯବନିକା ନଡ଼ମ୍‌ତେ ପଚାଶ୍‌ ଉଡ଼ୁଙ୍କ୍‌ ନୁ କାଇଲ୍‌ତେ ପଡ଼୍‌ୟିତେ ଦ୍ୱିତିୟ ଯବନିକାତେ ନଡ଼କିନ୍‌ତଡ଼୍‌ ପଚାଶ୍‌ ଉଡ଼ୁଙ୍କ୍‌ ମାଡ଼୍‌ତଡ଼୍‌; ଆୱୁ ଉଡ଼ୁଙ୍କ୍‌ସାରେ ଆୱିନ୍ ମୁନେ ସାମ୍‌ନା ସାମ୍‌ନା ମାତ୍‌ତା। 13 ମେଣ୍ଡେ ଆ ପଚାଶ୍‌ ସନାମାଡ଼ି ସନ୍‌ଦାଗ୍ ଯବନିକାସାରେ ନିଜେ ନିଜେତାଗ୍ ଯଡ଼୍‌ପ୍‌ତଡ଼୍‌; ଆସୁଙ୍କ୍‌ ଲନ୍‌ ଅଣ୍ଡୟ୍‌ ଆତ୍‌ତେ ।

14 ଆଦିନ୍‌ମାଇଦିଙ୍କ୍‌ ଆ ଲନ୍‌ ପାପନର୍‌ଦାନ୍‌ ଗୁଡ଼ୁସେ ମାଇଦିଙ୍କ୍‌ ମେଣ୍ଢେ କେଲ୍‌କ୍‌ ଏଗାର୍‌ଟାନ୍‌ ପରଦା ତିଆର୍‌ ମାଡ଼୍‌ତଡ଼୍‌। 15 ସାରେ ପରଦା ଦୈର୍ଗ୍ୟ ତିରିଶ୍‌ କାଇ ନୁ ଓସାର୍‌ ନାଲୁ କାଇ, ଆ ଏଗାର୍‌ଟାନ୍‌ ପରଦା ସାମାନ୍‌ ମାତ୍‌ତା। 16 ମେଣ୍ଡେ ଆ ଏଇଙ୍ଗ୍ ପରଦା ନିଜେ ନିଜେତ୍‌ ଯୋଡ଼ି ୱେରେ ନେଃତ୍‌ତଡ଼୍‌ ନୁ ୱେର୍‌ ଆରୁ ପରଦା ଯୋଡ଼ ୱେର୍‌ ନେଃତଡ଼୍‌। 17 ଯଡ଼୍‌ପ୍‌ତେ ପଡ଼୍‌ୟେତ୍‌ ପ୍ରତମ୍‌ ପାକେ ପରଦା ନାଡ଼୍‌ମେତେ ପଚାଶ୍‌ ଉଡ଼୍‌ୟି ମାଡ଼୍‌ତଡ଼୍‌ ନୁ ଦ୍ୱିତିୟ ପରଦାତେ ଯଡ଼୍‌ପ୍‌ତେ ପଡ଼୍‌ୟେ ଦଡ଼ିତେ ପଚାଶ୍‌ ଉଡ଼୍‌ୟି ମାଡ଼୍‌ତଡ଼୍‌। 18 ମେଣ୍ଡେ ଆ ଯଡ଼୍‌ପିସ୍‌ ଅଣ୍ଡୟ ଗୁଡ଼ୁସା ମାଡ଼ାନ୍‌ ମାଇଦିଙ୍କ୍‌ ପିତ୍ତଲ୍‌ତେ ପଚାଶ୍‌ ଉଡ଼୍‌ୟି ମାଡ଼୍‌ତଡ଼୍‌। 19 ମେଣ୍ଡେ ଆ ନେତୁରୁ ରଙ୍ଗ ଆତ୍‌ତେ ମେଣ୍ଢା ତଲ୍‌କେତେ ଗୁଡ଼ୁସା ଅଣ୍ଡୟ୍‌ ୱେସ୍ରାତେ ନୁ ଆଦିନ୍‌ ପର ଲେତାଦ୍‌ ତଲ୍‌କେତ୍‌ ଅଣ୍ଡୟ୍‌ ୱେସ୍ରାମ୍‌ ତିଆର୍‌ ମାଡ଼୍‌ତଡ଼୍‌। 20 ଲପେକନ୍‌ ଆ ଲନ୍‌ ଶିଟିମ୍‌ ୱେର୍‌କ୍‌ ସିଦା ନିଲ୍‌ସ୍ପାନ୍‌ ମାଇଦିଙ୍କ୍‌ ତିଆର ମାଡ଼୍‌ତଡ଼୍‌। 21 ଅଣ୍ଡୟ୍‌ ବାଲେ ଦଶ କାଇ ଲାଟି ନୁ ଦୃଢ଼ କାଇ ଓସାର୍‌ ମାତ୍‌ତେ। 22 ସାରେ ବାଲାନ୍‌ ତଡ଼େକ୍‌କେ ଆଲେମାତ୍‌ତା ରେଣ୍ଡେ ରେଣ୍ଡେ ପଦ ମାତ୍‌ତା; ଇଲାନେ ଆ ଲନ୍‌ ସାରେ ବାଲା ମାଇଦିଙ୍କ୍‌ ତିଆର୍‌ ମାଡ଼୍‌ତଡ଼୍‌। 23 ମେଣ୍ଡେ ଆ ଲତ୍‌ତେ ତିନ୍ଦେକାଇ ପାକେତେ ମାଇଦିଙ୍କ୍‌ କୋଡ଼ିଏ ବାଲା ତିଆର୍‌ ମାଡ଼୍‌ତଡ଼୍‌। 24 ମେଣ୍ଡେ ଅଣ୍ଡ ଆ କୋଡ଼ିଏ ବାଲାନ୍‌ ମଦଲ୍‌ ଚାଳିଶଟାନ୍‌ ରୂପାତେ ଆଗେତ୍‌ ରେଣ୍ଡେ ପଦତେ ମାଇଦିଙ୍କ୍‌ ରେଣ୍ଡେ ଦରା ନୁ ୱେର୍‌ ବାଲାନ୍‌ ମଦଲ୍‌ ଅଡ଼୍‌କ ରେଣ୍ଡେ ରେଣ୍ଡେ ପଦତେ ମାଇଦିଙ୍କ୍‌ ରେଣ୍ଡେ ରେଣ୍ଡେ ଦରା ମାଡ଼୍‌ତଡ଼୍‌। 25 ମେଣ୍ଡେ ଲତ୍‌ତେ ୱେର୍‌ତେ ମାଇଦିଙ୍କ୍‌ ଡ଼େବ୍‌ପାକେ କୋଡ଼ିଏ ବାଲା ମାଡ଼୍‌ତଡ଼୍‌। 26 ଅଣ୍ଡୟ୍‌ ବାଲେତେ ମଦଲ୍‌ ରେଣ୍ଡେ ଦରା ନୁ ୱେର୍‌ ବାଲେତ୍‌ ମଦଲ୍‌ ରେଣ୍ଡେ ରେଣ୍ଡେ ଦରା, ଇଲେନେ ରୂପାତେ ଚାଲିଶଟାନ୍‌ ଦରା ମାଡ଼୍‌ତଡ଼୍‌। 27 ଅଣ୍ଡ୍‌ ଆ ଲତ୍‌ତେ ପେର୍‌କେତ୍‌ ମେଣ୍ଡନ୍‌ପାକେତେ ମାଇଦିଙ୍କ୍‌ ଆରୁ ଦୁଡ଼୍‌ ବାଲା ମାଡ଼୍‌ତଡ଼୍‌। 28 ମେଣ୍ଡେ କାଇଲାନ୍‌ ଗୁଡ଼୍‌ସେତ୍‌ ମାଇଦିଙ୍କ୍‌ ଆ ପାକେ ରେଣ୍ଡେ ମୁଲାନ୍‌ ମାଇଦିଙ୍କ୍‌ ରେଣ୍ଡେ ଦୁଡ଼୍‌ ବାଲା ମାଡ଼୍‌ତଡ଼୍‌। 29 ମେଣ୍ଡେ ଆଦିନ୍‌ ମଦଲ୍‌ ଯଡ଼ା ମାତ୍‌ତେ ନୁ ଆଲେନେ ଆଦିନ୍‌ ତାଲ୍‌ତାଗ୍‌ ପ୍ରତମ୍‌ ଇକ୍‌ଲେମ୍‌ ଗାରେ ଯଡ଼ା ମାତ୍‌ତେ; ଇ ଲେକାମ୍‌ ଆ ରେଣ୍ଡେ ମୁଲ୍‌ତେ ବାଲା ଯଡ଼୍‌ସ୍ପ୍‌ତଡ଼୍‌ । 30 ଆଗାକନ୍‌ ଆଟ୍‌ଟାନ୍‌ ବାଲା, ମେଣ୍ଡେ ଅଣ୍ଡୟ୍‌ ଅଣ୍ଡୟ୍‌ ବାଲାନ୍‌ ମଦଲ୍‌ ରେଣ୍ଡେ ରେଣ୍ଡେ ଦରା, ଇଲାନେ ଚଉଲ ରୁପା ଦରା ମାଡ଼୍‌ତଡ଼୍‌।

31 ମେଣ୍ଡେ ଆ ଶିଟିମ୍‌ ୱେର୍କ୍‌ ନାଡ଼୍‌ମେତ୍‌ ଗେଡ଼ା ତିଆର୍‌ ମାଡ଼ି ଲତ୍‌ତେ ଗାରେତେ ପାକେ ବାଲା ଏଇଙ୍ଗ୍ ଗେଡ଼ା 32 ନୁ ୱେର୍‌ତେ ପାକେ ବାଲା ଏଇଙ୍ଗ୍ ଗେଡ଼ା, ମେଣ୍ଡେ ଲତ୍‌ତେ ପେର୍‌କେତେ ପାକେ ମେଣ୍ଡନ୍‌ପାକେ ବାଲାନେ ଏଇଙ୍ଗ୍ ନାଡ଼େମେତ୍‌ ଗେଡ଼ା ଇତ୍‌ତଡ଼୍‌। 33 ମେଣ୍ଡେ ନାଡ଼୍‌ମେତେ ଗେଡ଼ା, ପଟାର୍‌ ନାଡ଼୍‌ମେତ୍‌ ଦେଶ୍‌ତାଗ୍‌ ତାଲ୍‌ହେୱୁନା ହେୱୁତା। 34 ମେଣ୍ଡେ ଆ ସାରେ ବାଲା ସନ୍‌ତେ ମାଡ଼୍‌ପ୍‌ତଡ଼୍‌ ନୁ ନାଡ଼୍‌ମେତ୍‌ ଗେଡ଼ାତେ ମାଇଦିଙ୍କ୍‌ ସୁନାତେ ଇକ୍‌ଲେମ୍‌ ମାଡ଼୍‌ତଡ଼୍‌, ନାଡ଼୍‌ମେତ୍‌ ଗେଡ଼ାସାରେ ସନ୍‌ତେ ମାଡ଼୍‌ପ୍‌ତଡ଼୍‌।

35 ଲପେକନ୍‌ ଆ ନିଲରଙ୍ଗ୍‌, ଉମେରଙ୍ଗ, ଏର୍ରେ ରଙ୍ଗ୍‌, ନୁ ବଲା ପାଣ୍ଡ୍ରି ଚୁଦୁଲାଦ୍‌ ନୁଲ୍‌ ତିଆର୍‌ତେ ନୁ କିରୁବ ଦୂତ୍‌ ଇନା ଚିତ୍ରା କାବ୍‌ରା ଅଣ୍ଡୟ୍‌ ଲିକ୍‌ତେ ଚିଲେ ତିଆର୍‌ ମାଡ଼୍‌ତଡ଼୍‌। 36 ମେଣ୍ଡେ ଆଦିନ୍‌ ମାଇଦିଙ୍କ୍‌ ଶିଟିମ୍‌ ୱେର୍‌କ୍‌ତେ ନାଲୁ ଗୁଞ୍ଜେ ମାଡ଼୍‌ ସନ୍‌ତେ ମାଡ଼୍‌ପ୍‌ତଡ଼୍‌ ନୁ ଆସାରେତେ ଆଙ୍କଡ଼ା ସନ୍‌ତେ ମାଡ଼୍‌ତଡ଼୍‌ ନୁ ଆଗେତ୍‌ ମାଇଦିଙ୍କ୍‌ ରୂପାତେ ନାଲୁ ଦରା ତସ୍‌ତଡ଼୍‌। 37 ମେଣ୍ଡେ ଆ ଗୁଡ଼ୁସେ ଆର୍‌ଦେ ମାଇଦିଙ୍କ୍‌ ନିଲ ନୁ ଉମେ ନୁ ଏର୍ରେ ରଙ୍ଗ୍‌ ନୁ ବଲା ପାଣ୍ଡ୍ରି ଚୁଦୁଲାଦ୍‌ ନୁଲ୍‌ ତଡ଼୍‌ ତିଆର୍‌ତେ ଚିତ୍ରା କାବ୍‌ରା ଅଣ୍ଡୟ୍‌ ମୁସାନ୍‌ ଚିଲେ ତିଆର୍‌ ମାଡ଼୍‌ତଡ଼୍‌। 38 ଆଗେତ୍‌ ଏଇଙ୍ଗ୍ ଗୁଞ୍ଜେ ନୁ ଆସାରେତ୍‌ ଆଙ୍କଡ଼ା ମାଡ଼୍‌ତଡ଼୍‌; ମେଣ୍ଡେ ଆସାରେତ୍‌ ନେତିନ୍‌ ଟପ୍‌ ନୁ ବନ୍ଦନି ସୁନାତେ ମାଡ଼୍‌ପ୍‌ତଡ଼୍‌, ମାତର୍‌ ଅଡ଼୍‌ ଏଇଙ୍ଗ୍ ଦରା ପିତ୍ତଲ୍‌ତେ ତାଦ୍‌ ମାତ୍‌ତେ।