1 ଜିସୁ ନାରୁଡ଼୍‍କ୍ ତାନ୍‍ୱାଦ୍ ସାରେ ଗଟ୍ କେତାନାଦ୍ ତେର୍‍ସ୍‍ପି କଫର୍ନାହୁମ୍‍ ଟାୱୁନ୍‍ତାଗେ ଆତ୍‍ତଣ୍ଡ୍ । 2 ଆଦ୍ ଦିନାମ୍‍ତେ ୱେର୍‍ଣ୍ଡ୍ ଶତସେନାପତିତେ ଦାସ୍ ରଗାମ୍ ଆସ୍ ଡଲାନ୍ ରକମ୍ ଆସ୍‍ମାତ୍ତଣ୍ଡ୍, ଅଣ୍ଡ୍‌ ତାନୱେ ପ୍ରିୟଦାସ, ମାତ୍‍ତଣ୍ଡ୍ । 3 ଅଣ୍ଡ୍‌ ଜିସୁନ୍ ବିଷୟତେ କାବୁର୍ ଆସ୍, ଅଣ୍ଡ୍‌ ବେଲା ୱାସ୍ ତାନ୍ ଦାସତେ ଜିୱେ ରକ୍ଷା ମାଡ଼ତଣ୍ଡ୍, ଇଦିନ୍ ସେଙ୍ଗେ ଅନ୍‌ ଗାର୍‍ରେ ଯିହୁଦୀଡ଼୍ ଲୋପେ ବେସ୍‍କ୍‍ତୁଡ଼୍‍ ମୁକ୍ୟା ନାରୁଡ଼୍‍କିଂଙ୍କ୍ ରହସ୍ ଅଂକିଙ୍କ୍‌ ଅନୁରଦ୍‌‍ ମାଡ଼ତଣ୍ଡ୍ । 4 ଅଡ଼୍‌‍ ଜିସୁନ୍ ଗାର୍‍ରେ ଆଞ୍ଜ୍ ଅଂକିଙ୍କ୍‌ ନିଜାମ୍ ବିନତି ମାଡ଼ି କେତାଙ୍କ୍ ପସ୍‍ପ୍‍ତ୍‍ତଡ଼୍, "ଅଣ୍ଡ୍‌ ନିୱାଦ୍ ସାହାଯ୍ୟ ଆଦାନ୍ ସେଙ୍ଗେ ଯୋଗ୍ୟ ଆଦ୍‍ତନ୍; 5 ବାତେଙ୍କ୍ ଇତ୍କେ ଅଣ୍ଡ୍‌ ମାନ୍‍ ଜାତିତିଙ୍କ୍ ପ୍ରେମ୍ ମାଡ଼ୁତଣ୍ଡ୍ ନୁ ଅଣ୍ଡ୍‌ ନିଜେ ମାନ୍‍ ସେଙ୍ଗେ ସମାଜ୍‍ଲନ୍ ତିଆର୍ ମାଡ଼ିସ୍ ମିନ୍ଦେଣ୍ଡ୍ ।"

6 ଆଗେଙ୍କ୍ ଜିସୁ ଅଡ଼୍‌‍ ତଡ଼୍ ଆତ୍‍ତଣ୍ଡ୍ । ଅଣ୍ଡ୍‌ ଲୋତ୍‍ତେ ସୁଦୁର୍ ଦୁରାମ୍ ହେୱତାୱେୟେ, ଶତସେନାପତି ସାଙ୍ଗଡ଼କ୍ ରହସ୍ ଅଂକିଙ୍କ୍‌ କେତ୍ତଣ୍ଡ୍, "ପ୍ରବୁ କଷ୍ଟ ମାଡ଼୍‍ମାଟ୍; ବାତେଙ୍କ୍ ଇତ୍କେ ନିମ୍‍ ଯେ ନା ଲନ୍ ଡେକେ ୱାଟିତି, ନାନ୍ ଇଦ୍ ରକମ୍ ଯୋଗ୍ୟ ଆୟ୍‍ୟ; 7 ତ ନାନ୍ ନି ଗାର୍‍ରେ ଆଦାଙ୍କ୍ ନିଜେତିଙ୍କ୍ ଯୋଗ୍ୟ ହେର୍କେ ମାଡ଼ନ୍; ବାତେଙ୍କ୍ ଇତ୍କେ ୱେରନ୍ ପଦ୍ ଗଟ୍ ମାଡ଼ା, ନା ଦାସ ସୁସ୍ଥ ଆଦ୍‍ତନ୍ । 8 ବାତେଙ୍କ୍ ଇତ୍କେ ନାନ୍ ୱେରନ୍ ଅଦିନତେ ମାତ୍‍କେ ମିକା ନା ଆଦିନ୍ ତେ ସୈନିଡ଼୍ ମିନ୍ଦେଡ଼୍; ମେଣ୍ଡେ, ନାନ୍ ଅର୍‌ତୁଙ୍କ୍ ଆନ୍‌ ଇତ୍କେ ଅଣ୍ଡ୍‌ ଆଦ୍‍ତନ୍; ଅର୍‌ତୁଙ୍କ୍ ୱାଡ଼ା ଇତ୍କେ ଅଣ୍ଡ୍‌ ୱାଦ୍‍ତଣ୍ଡ୍; ମେଣ୍ଡେ ନା ଦାସଙ୍କ୍ ଇଦ୍ ମାଡ଼ା ଇତ୍କେ ଅଣ୍ଡ୍‌ ଆଦ୍ ମାଡ଼ିତନ୍ ।"

9 ଜିସୁ ଇଦ୍ ସାରେ ଗଟ୍ କେଞ୍ଜି ବାକ୍‍ୱା ଆତ୍‍ତଣ୍ଡ୍, ମେଣ୍ଡେ ତିଡ଼ିୟି ମିକା ପେର୍‍କେ ୱାସ୍ ମାନ୍ଦାନ୍ ନାରୁଡ଼୍ ସାରେତଡ଼୍‌କିଂଙ୍କ୍ କେତ୍ତଣ୍ଡ୍, "ନାନ୍ ମିକିଂଙ୍କ୍ କେତୁତାନ୍, ଇସ୍ରାଏଲ୍ ଲୋପେ ଇସ ବାଡ଼ିୟାଦ୍ ବିଶ୍ୱାସ୍ ଦର୍‍ସ୍‍କନ୍ !"

10 ମେଣ୍ଡେ, ରହତେ ନାରୁଡ଼୍ ଲୋନ୍‌ ମାଲ୍‍ସ୍ ୱାସ୍ ଦାସଙ୍କ୍ ସୁସ୍ଥ ଉଡ଼୍‌ତଡ୍ ।

11 ଇଗେଙ୍କ୍ ଜିସୁ ନାଇନ ପେଦେର୍‍ତେ ନଗର୍‍ତାଗ୍ ଆତ୍‍ତଣ୍ଡ୍, ମେଣ୍ଡେ ଅନ୍‌‍ୱେ ଶିଷ୍ୟଡ଼୍ ନୁ ନାର୍ଗେ ନାରୁଡ଼୍ ଅନ୍‌ ତଡ଼୍ ଆଞ୍ଜ ମାତ୍‍ତଡ଼୍ । 12 ଅଣ୍ଡ୍‌ ନଗର୍‍ତେ ହାର୍ ତାଗ୍ ହେୱତେ ୱେଲେ, ଉଡାଟ୍, ନାରୁଡ଼୍ ୱେର୍‍ଣ୍ଡ୍ ଡୋଲତେ ନାରୁଙ୍କ୍ ବାଇଦେ କାଞ୍ଜି ତାସ ମାତ୍‍ତଣ୍ଡ୍, ଅଣ୍ଡ୍‌ ତାମ୍ ୟାୟଙ୍କ୍ ୱେରନ୍ ମାର୍‍, ମେଣ୍ଡେ ଆଦ୍ ନାଟାଡ଼୍ ରାଣ୍ଡିଲ୍; ମେଣ୍ଡେ ନାର୍ ତେ ନାର୍ଗେ ନାରୁଡ଼୍ ଅନ୍‌ ତଡ଼୍ ମାତ୍‍ତଡ଼୍ । 13 ଆଦିଙ୍କ୍ ଉଡ଼ି ପ୍ରବୁ ତାନ୍ ସେଙ୍ଗେ ଦୟାତେ ଦାନ୍ଦେ ଆସ୍ ଆଦିଙ୍କ୍ କେତ୍ତଣ୍ଡ୍, "କେୟିମା ।" 14 ମେଣ୍ଡେ, ଅଣ୍ଡ୍‌ ଗାର୍‍ରେ ଆଞ୍ଜ୍ ଡଲୋତିଙ୍କ୍ ହିଟ୍‍ତ୍‍ତଣ୍ଡ୍, ମେଣ୍ଡେ, କାଞ୍ଜ୍‍ତେନଡ଼୍ ନିତ୍‍ତଡ଼୍, ଜିସୁ କେତ୍ତଣ୍ଡ୍, "ପେକାଲ୍, ନାନ୍ ନିକିଂଙ୍କ୍ କେତୁତାନ୍, ତେଦ୍‍ଦେ ।" 15 ଆଗେତିନ୍‍ସ୍ ଡୋଲତେ ନାରୁଡ଼୍ ତେଦି କୁଦ୍‍ତଣ୍ଡ୍, ମେଣ୍ଡେ ଗଟ୍ ତିରିୟାଙ୍କ୍ ପସ୍‍ପିତ୍‍ତଣ୍ଡ୍, ମେଣ୍ଡେ ଜିସୁ ଅଂକିଙ୍କ୍‌ ତାମ୍ ୟାୟଙ୍କ୍ କାଇଦେ ପସ୍‍ପିତ୍‍ତଣ୍ଡ୍ ।

16 ଇଗେତିସ୍‍ନ୍‍ ସାରେତଡ଼୍ ୱେର୍‍ତଡ଼୍, ମେଣ୍ଡେ ଇଶ୍ୱର୍‌ତେ ମହିମା କୀର୍ତ୍ତନ୍ ମାଡ଼ କେତାଙ୍କ୍ ପସ୍‍ପ୍‍ତଣ୍ଡ୍, "ମାନ୍‍ ଲୋପେ ୱେର୍‍ଣ୍ଡ୍ ବାଡ଼ିୟଣ୍ଡ୍ ବାବବାଦୀ ୱାସ୍‍ମିନ୍ଦେଣ୍ଡ୍ ନୁ ଇଶ୍ୱର୍ ତାମ୍ ନାରୁଡ଼୍‍କ୍ ଉଦାର୍ ମାଡ଼ାଙ୍କ୍ ୱାସ୍‍ମିନ୍ଦେଣ୍ଡ୍ ।"

17 ମେଣ୍ଡେ, ଜିସୁନ୍ ବିଷୟତେ ଇଦ୍ ଗଟ୍ ଯିହୁଦା ଦେଶ୍ ଏକାମ୍ ନୁ ସାରେ ପାକା ସାରେ ପଡ଼ିୟେତାଗ୍ ପ୍ରଚାର୍ ଆତ୍‍ତେ ।

18 ପେର୍‍କେ ଯୋହନ୍‌ତେ ଶିଷ୍ୟଡ଼୍ ଇଦ୍ ସାରେ ବିଷୟ୍ ଯୋହନ୍‌ତିଙ୍କ୍ କେତ୍‍ତଡ଼୍‍ । 19 ଆଗେ ଯୋହନ୍‌ ତାମ୍ ଶିଷ୍ୟଡ଼ତେ ଲୋପେ ଇର୍‌ୱୁଡ଼୍‌କିଙ୍କ୍ ଗାର୍‍ରେ କାର୍‍ଙ୍ଗି ପ୍ରବୁନ୍ ଗାର୍‍ରେ ଇଲା କେସ୍ ରହତଣ୍ଡ୍, "ବେନନାଦ୍ ଆଗମନ୍ ଆଦ୍‍ତେ, ଅଣ୍ଡ୍‌ ନାରୁଡ଼୍ କି ନିମେ, କି ମାମ୍ ମେଣ୍ଡେ ଅଡ଼୍‌‍କିଂଙ୍କ୍ କେପି ମାନ୍‍ତମ୍ ?"

20 ଆଦ୍ ନାରୁଡ଼୍ ଜିସୁ ଗାର୍‍ରେ ୱାସ୍ କେତ୍‍ତଡ଼୍‍, "ବାପ୍ତିସ୍ମ ଯୋହନ୍‌ ମାକିଂଙ୍କ୍ ନି ଗାର୍‍ରେ ଇଲା କେସ୍ ରହତଣ୍ଡ୍, ବେନନାଦ୍ ୱାଦାନାଦ୍ ଆଦ୍‍ତେ, ଅଣ୍ଡ୍‌ ନାରୁଡ଼୍ କି ନିମେ, କି ମାମ୍ ମେଣ୍ଡେ ଅଡ଼୍‌‍କିଂଙ୍କ୍ କେପିତମ୍ ?"

21 ଆସୁଣ୍ଟ୍ ଜିସୁ ନାର୍ଗେ ନାରୁଡ଼୍‍କିଂଙ୍କ୍ ରୋଗ୍, ତିପାଲ୍‍ ନୁ ଦୁଷ୍ଟ ଆତ୍ମା କଞ୍ଜ୍ ସାଏ ମାଡ଼ତଣ୍ଡ୍, ମେଣ୍ଡେ ନାର୍ଗେ କାନାଲଡ଼କ୍ ଉଡ଼ାନାଦ୍ ଶକ୍ତି ହିତ୍‍ତଣ୍ଡ୍ । 22 ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, ମିଡ଼୍ ଆଞ୍ଜ୍ ବାତା ଉଡ଼୍‍ତିଡ଼୍‍ ନୁ କେଞ୍ଜ୍‍ତିଡ଼୍‍, ଆଦ୍ ସାରେ ଯୋହନ୍‌ତିଙ୍କ୍ କେଲାଟ୍; କାନାଲଡ୍ ଉଡ଼ାଙ୍କ୍ ପାର୍‍ଦ୍‍ତଡ଼୍, କୁଟାଲଡ଼୍‍ ତାଆକାଂଙ୍କ୍ ପାର୍‍ଦ୍‍ତଡ଼୍, କୁଷ୍ଠୀ ନାରୁଡ଼୍ ସୁସ୍ଥ ଅଦୁତଡ୍, ବାୟିରାଲଡ୍ କେଞ୍ଜାଙ୍କ୍ ପାର୍‍ଦ୍‍ତଡ଼୍, ଡୋଲତେ ନଡ୍ ଜିୱେ ଆଦ୍‍ତଡ଼୍, ଦରିଦ୍ରଡ଼୍‍ ଗାର୍‍ରେ ସୁସମାଚାର୍ ପ୍ରଚାର୍ ମାଡ଼ୁତଡ଼୍; 23 ମେଣ୍ଡେ, ବେନେ ନାରୁଣ୍ଡ୍‍ ନାକିଂଙ୍କ୍ ବାଦା ଇୱଣ୍ଡ୍‍, ଅଣ୍ଡ୍‌ ଦନ୍ୟ ।

24 ଯୋହନ୍‌ତେ ଶିଷ୍ୟଡ଼୍ ଆତ୍‍ତେ ପେର୍‍କେ ଜିସୁ ଯୋହନ୍‌ତେ ବିଷୟ୍ ନାରୁଡ଼୍‍କିଂଙ୍କ୍ କେତାଙ୍କ୍ ପସ୍‍ପ୍‍ତଣ୍ଡ୍, ମିଡ଼୍ ବାତେଏ ଉଡ଼ାନ୍ ସେଙ୍ଗେ ଉସ୍କ ନେଲ୍‍ଦା ପେଇସ୍ ଆଞ୍ଜ୍ ମାତ୍‍ତିଡ୍ ? ବାଆତେ ଗାଲ୍‍ଦେ ଉଙ୍ଗାନାଦ୍ ୱେରଟ୍ ୱେଦୁର୍ ? 25 ଆଦ୍ ଆୟୋକ୍ ମିଡ଼୍ ବାତେଏ ଉଡ଼ାନ୍ ସେଙ୍ଗେ ପେଇସ୍ ଆଞ୍ଜ୍ ମାତ୍‍ତିଡ୍ ? ବେନଙ୍କ୍ ଦାମ୍‍ଦେ ସିଲେ କେର୍ ତେ ଅର୍‌ତୁଣ୍ଡ୍ ନାରୁଙ୍କ୍ ? ଉଡ଼ାଟ୍, ବେନଡ଼୍ ଦାମ୍‍ଦାଉ ସିଲେ କେର୍‍ତିତଡ଼୍, ଅଡ଼୍‌‍ ରାଜ ପ୍ରସାଦତାଗ୍ ମାନ୍‍ତଡ଼୍ । 26 ନାକିଂଙ୍କ୍ କେଲ୍‍ମ୍, ଆଦ୍ ଆୟୋକ୍ ବାତେଏ ଉଡ଼ାନ୍ ସେଙ୍ଗେ ପେଇସ୍ ଆଞ୍ଜ୍ ମାତ୍‍ତିଡ୍ ? ବେନଙ୍କ୍ ଅର୍‌ତୁଣ୍ଡ୍ ବାବବାଦୀଙ୍କ୍ ? ନାନ୍ ମିକିଂଙ୍କ୍ ନିଜାମ୍ କେତୁତାନ୍, ବାବବାଦୀନ୍ କଞ୍ଜ୍ ଗାଟି ବାଡ଼ିୟଣ୍ଡ୍ ନାରୁଙ୍କ୍ । 27 ଯୋହନ୍‌ତେ ବିଷୟତେ ଇଦ୍ ଶାସ୍ତ୍ରତାଗ୍ ଲେକାମିନ୍ଦେ, ଇଶ୍ୱର୍‌ କେତ୍‍ତଣ୍ଡ୍, ଉଡ଼ାଟ୍, ମାମ୍ ମା ଦୂତ୍‍ତିଙ୍କ୍ ମି ମୁନେ ରହତୁତମ୍, ଅଣ୍ଡ୍‌ ମି ମୁନେ ମିୱାଦ୍ ହାର୍ ତିଆର୍ ମାଡ଼ିତନ୍, ଇଣ୍ଡ୍ ଆଦ୍ ନାରୁଡ଼୍ ଯୋହନ୍‌ । 28 ନାନ୍ ମିକିଂଙ୍କ୍ କେତୁତାନ୍, "ନାଟାଡ଼୍ ତାଗାଙ୍କ୍‍ ଜନମ୍ ସାରେତଡ଼୍ ଲୋପେ ଯୋହନ୍‌ତେ କଞ୍ଜ୍ ମହାନ୍ ବେନ ଇଲାଣ୍ଡ୍; ମିକା ଇଶ୍ୱର୍‌ତେ ରାଜ୍ୟତାଗ୍ ଯେ ସୁଦୁନଣ୍ଡ୍, ଅଣ୍ଡ୍‌ ଯୋହନ୍‌ କନ୍‍ସ୍ ମିକା ମହାନ୍ ।"

29 ✝ବେନଡ଼୍ ଇଦ୍ ସାରେ ଗଟ୍ କେଞ୍ଜ ମାତ୍‍ତଡ଼୍, ଅଡ଼୍‌‍, ବିସ୍ୱାଶ୍‍ତଡ଼୍‍ କର ଆଦାୟ ମାଡ଼ାନଡ଼ି, ଇଶ୍ୱର୍‌ତେ ନିଜାମ୍ ଦାବୀ ସାରେ ମାଡ଼ି ଯୋହନ୍‌ତେ ତଡ଼୍ ବାତିସ୍ମ ଇସ୍‌‍ମାତ୍‍ତଡ଼୍ । 30 ବାତେଙ୍କ୍ ଇତ୍କେ ପାରୂଶୀଡ଼୍ ନୁ ଦର୍ମଗୁରୁଡ୍ ତାମ୍ ଜିୱୁଣ୍ଡ୍ ତେ ସେଙ୍ଗେ ଇଶ୍ୱର୍‌ତେ ଉଦ୍ଦେଶ୍ୟ ଗ୍ରହନ୍ ମାଡ଼କଟ୍ ଯୋହନ୍‌ତେ କନ୍‍ସ୍ ବାତିସ୍ମ ଆ‍ୟୱେ ମାତ୍‍ତଡ଼୍ ।

31 ଜିସୁ ମେଣ୍ଡେ କେତ୍‍ତଣ୍ଡ୍, "ଇ ଯୁଗ୍‍ତେ ନାରୁଡ଼୍‍କିଂଙ୍କ୍ ନାନ୍ ବେନନ୍ ତଡ଼୍ ସାମାନ୍ ମାଡ଼ିତାନ୍, ମେଣ୍ଡେ ଅଡ଼୍‌‍ ବେନନ୍ ରକମ୍ ଆଦ୍‍ତଡ଼୍ ? 32 ବେନେ ପିଲା ହାଟ୍ ବାଜାର୍‍ତାଗ୍ କୁଦି କାର୍‍ଙ୍ଗା କାର୍‍ଙ୍ଗି ହାସ୍ କେତିତଡ଼୍‍, ମାମ୍ ମି ବକେତ୍ ଅଷଡ଼୍‍ ଉଦ୍‍ତନ୍, ମିଡ଼୍ ହେନ୍ଦୱିଡ୍; ମାମ୍ ଡୋଲତେ ପାଟେ ପାର୍‍ତମ୍, ମିଡ଼୍ କେୟିୱିଡ଼୍‍, ଅଡ଼୍‌‍ ଆଦ୍ ପିଲାନ୍ ଲେକାମ୍ । 33 ବାତେଙ୍କ୍ ଇତ୍କେ ବାପ୍ତିସ୍ମ ଯୋହନ୍‌ ୱାସ୍ ରୋଟି ତିନଣ୍ଡ୍ ନୁ ଦ୍ରାକ୍ଷାରସ୍ ଉନଣ୍ଡ୍, ମେଣ୍ଡେ ମିଡ଼୍ ଯୋହନ୍‌ତେ ବିଷୟତେ କେତ୍‍ତିଡ଼୍, ଅଂକିଙ୍କ୍‌ ବୁତ୍ ପୟିତେ । 34 ନାରୁନ୍‍ପିଲେ ୱାସ୍ ତିନ୍ତେ, ମେଣ୍ଡେ, ମିଡ଼୍ କେତୁତିଡ଼୍‍, ଉଡ଼ାଟ୍, ଇଣ୍ଡ୍ ଅରତୁଣ୍ଡ୍ ପେଟୁ ନୁ ମାତ୍‍ୱାରି, କରଗ୍ରାହୀ ନୁ ପାପି ନାରୁଡ଼୍‍ତେ ସାଙ୍ଗ । 35 ବେନଡ଼୍ ଇଶ୍ୱର୍‌ତେ ଜ୍ଞାନତିଙ୍କ୍ ଗ୍ରହନ୍ ମାଡ଼ିତଡ଼୍, ଅଡ଼୍‌‍ ଜିୱୁଣ୍ଡ୍ ତାଗ୍ ଅନାଦ୍‌ ସତ୍‍ତେ ତନ୍ଦିତେ ।"

36 ମେଣ୍ଡେ, ପାରୂଶୀଡ଼୍ ଲୋପେ ୱେର୍‍ଣ୍ଡ୍ ଜିସୁଙ୍କ୍ ତାନ୍ ତଡ଼୍ ତିନ୍ଦାନଙ୍କ୍ କାରଙ୍ଗ୍‍ତଣ୍ଡ୍ । ଆଗେ ଅଣ୍ଡ୍‌ ପାରୂଶୀନଡ଼୍ ଲୋନ୍‌ ଆସି ତିନ୍ଦାନଙ୍କ୍ କୁଦ୍‍ତଡ଼୍‍ । 37 ✝ମେଣ୍ଡେ ଉଡ଼ାଟ୍, ଆଦ୍ ନାର୍ ତାଗ୍ ଅରଟ୍ ପାପି ନାଟାଡ଼୍ ମାତ୍‍ତେ; ଜିସୁ ଆଦ୍ ପାରୂଶୀନ୍ ଲୋନ୍‌ ତିନ୍ଦାନଙ୍କ୍ କୁଦିମିନ୍ଦେଣ୍ଡ୍, ଇଦ୍ ପୁଞ୍ଜ୍ ଆଦ୍ ୱେରନ୍ ଦାମ୍‍ତାଦ୍ ବତଲ୍‍ତାଗ୍ ଲେକେତ୍ ଗାବ୍‍ତେ ନିୟି ତାସ୍, 38 ପେର୍‍କେ ଜିସୁନ୍ ଲାବ୍ ଡେକେତ୍ ଗାର୍‍ରେ ନିଶ୍‍ମିକା କେୟକେୟ କାଣ୍ଡେଡି ଏର୍‍ଦେ ଅନାଦ୍‌ ଲାବ୍ ଡେକେତିଙ୍କ୍ ନାଆସ୍‍ପି ନିଜର୍ ତାଲେତ୍ କେଲ୍‍କିନ୍ ତଡ଼୍ ଆଦ୍ ଉମ୍‍ସାନଙ୍କ୍ ପସ୍‍ପିତ୍‍ତେ, ମେଣ୍ଡେ ଅନ୍‌‍ୱେ ଲାବ୍ ଡେକେତିଙ୍କ୍ ଚୁମା ମାଡ଼ି ସାୟେ ଗାବ୍‍ତେ ନିୟ୍‍ ଅକାନଙ୍କ୍ ପସ୍ପ୍‍ତେ । 39 ଆଦ୍ ଉଡ଼ି, ବେନେ ଫାରୂଶୀ ଅଂକିଙ୍କ୍‌ ନିମନ୍ତ୍ରଣ ମାଡ଼ିମାତ୍‍ତଣ୍ଡ୍, ଅଣ୍ଡ୍‌ ହେର୍କେତ୍‍ କେତ୍ତଣ୍ଡ୍, "ଇଣ୍ଡ୍ ଯଦି ବାବବାଦୀ ଆସ୍ ମାନେଣ୍ଡ୍, ଆଲାତ୍କେ ହିକିଂଙ୍କ୍ ହିଟୁତ୍, ଆଦ୍ ବାତେଏ ନୁ ବେସତ୍ ନାଟାଡ଼୍, ଇତ୍‍କେ, ଆଦ୍ ଯେ ପାପି, ଇଦ୍ ପୁଞ୍ଜ୍ ମାନେଣ୍ଡ୍ ।"

40 ଜିସୁ ଅଂକିଙ୍କ୍‌ କେତ୍‍ତଣ୍ଡ୍, "ଶିମୋନ୍, ନିକିଂଙ୍କ୍ ନାନ୍ ଅଣ୍ଡ୍‌ ଗଟ୍ କେତ୍‍ତାନ୍ ମିନ୍ଦେ ।" ଅଣ୍ଡ୍‌ କେତ୍ତଣ୍ଡ୍, "ଗୁରୁ କେଲ୍‍ମ୍ ।"

41 "ୱେର୍‍ଣ୍ଡ୍ ସାଉକାର୍‍ତେ କନ୍‍ସ୍ ଇଡ଼ିୱୁଡ଼୍‍ ଋଣ୍‍ ହସ୍‍ମାତ୍‍ତଡ୍; ଅର୍‌ତୁଣ୍ଡ୍ ପାଞ୍ଚଶହ ଦିନାରୀ* ନୁ ମେଣ୍ଡେ ଅର୍‌ତୁଣ୍ଡ୍ ପାଚାଶ୍ ଦିନାରୀ ଋଣ୍‍ ମାଡ଼ିମାତ୍‍ତଡ଼୍ । 42 ମାଲ୍‍ପିଦାଙ୍କ୍ ଅଡ଼୍‌‍କିଂଙ୍କ୍ ବାତେଏ ଇଲ୍‍ୱାଙ୍କ୍ ଅଣ୍ଡ୍‌ ଇଡ଼୍‍ୱୁଡ଼ାଦ୍ ଉଦାର୍ ୱିଡ଼୍‍ସିଦ୍‍ତନ୍ । ତ ଅଡ଼୍‌‍ ଲୋପେ ବେନ ଅଂକିଙ୍କ୍‌ ଗାଟି ପ୍ରେମ୍ ମାଡ଼ିତନ୍ ?"

43 ଶିମୋନ୍ କେତ୍‍ତଣ୍ଡ୍, "ନାନ୍ ହାଲ୍‍ସୁତାନ୍, ଅଣ୍ଡ୍‌ ବେନନାଦ୍ ଗାଟି ଉଦାର୍ ୱିଡ଼୍‍ସ୍‍ଦ୍‍ତଣ୍ଡ୍, ଅଣ୍ଡ୍‌ ।" ଜିସୁ ଅଂକିଙ୍କ୍‌ କେତ୍ତଣ୍ଡ୍, "ନିମେ ଟିକ୍ କେତ୍‍ତି ।" 44 ମେଣ୍ଡେ, ଜିସୁ ଆଦ୍ ନାଟାଡ଼୍ ସେଙ୍ଗେ ତିଡ଼ିୟି ଶିମୋନ୍‍ତିଙ୍କ୍ କେତ୍ତଣ୍ଡ୍, "ଇଦ୍ ନାଟାଡ଼୍‍ତିଙ୍କ୍ ଉଡ଼ୁତି ? ନାନ୍ ମି ଲୋନ୍‌ ୱାତ୍‍ତାନ୍, ନିମେ ନା ଡେକେତ୍ ସେଙ୍ଗେ ଏର୍‍ ଇୱିନ୍, ବାତେଙ୍କ୍ ଇତ୍କେ ଇଦ୍ କାଣ୍ଡେଡ୍ ଏର୍‍ ତଡ଼୍ ନା ଡେକେ ନାଆସ୍ ମିକା ତାନ୍ କେଲ୍‍କିନ୍ ତଡ଼୍ ଅଂକିଙ୍କ୍‌ ଉମ୍‍ସିତ୍‍ତେ । 45 ନିମେ ନାକିଂଙ୍କ୍ ଚୁମା ଇସ୍‌ କାରଙ୍ଗ୍‍ୱିନ୍, ବାତେଙ୍କ୍ ଇତ୍କେ ନାନ୍ ଲୋପେ ୱାଦାନ୍ ସମୟ୍ ତେ କନ୍‍ସ୍ ଇଦ୍ ନା ଡେକେତିଙ୍କ୍ ଚୁମା ହିଦୁତେ । 46 ନିମେ ନା ତାଲେତାଗ୍ ନିୟ୍‍ ଉସିୱିନ୍, ବାତେଙ୍କ୍ ଇତ୍କେ ଇଦ୍ ନା ଡେକେତାଗ୍ ସାୟେ ଗାବ୍‍ତେ ନିୟି ଉସିତ୍‍ତେ । 47 ତ ନାନ୍ ନିକିଂଙ୍କ୍ କେତୁତାନ୍, ଇଦିନାଦ୍ ନାର୍ଗେ ପାପ୍ କ୍ଷମା ହାସ୍ ମିନ୍ଦେ, କାରନ୍‍ ଆଦ୍ ଗାଟି ପ୍ରେମ୍ ମାଡ଼ତ୍‍ତେ; ବାତେଙ୍କ୍ ଇତ୍କେ ବେନଙ୍କ୍ ସୁଦୁଟ୍ କ୍ଷମା ହିଦ୍‍ତଡ଼୍, ଅଣ୍ଡ୍‌ ସୁଦୁଟ୍ ପ୍ରେମ୍ ମାଡ଼ିତନ୍ ।"

48 ମେଣ୍ଡେ, ଜିସୁ ଆଦ୍ ନାଟାଡ଼୍ ତିଙ୍କ୍ କେତ୍ତଣ୍ଡ୍, "ନିୱାଦ୍ ପାପ୍ ସାରେ କ୍ଷମା ହାସ୍‍ମିନ୍ଦେ ।"

49 ଆଗେ ଅନ୍‌ ତଡ଼୍ ତିନ୍ଦାନଙ୍କ୍ କୁଦିମାନ୍ଦାନ୍ ନାରୁଡ଼୍ ହେର୍କେତ୍‍ କେତାନଙ୍କ୍ ପସ୍ପ୍‍ତ୍‍ତଡ଼୍, "ଇଣ୍ଡ୍ ନାରୁଡ଼୍ ବେନ ଯେ ପାପ୍ ମିକା କ୍ଷମା ମାଡ଼ୁତଣ୍ଡ୍ ?"

50 ବାତେଙ୍କ୍ ଇତ୍କେ ଜିସୁ ଆଦ୍ ନାଟାଡ଼୍‍ତିଙ୍କ୍ କେତ୍ତଣ୍ଡ୍, "ନିୱାଦ୍ ବିଶ୍ୱାସ୍ ନିକିଂଙ୍କ୍ ରକ୍ଷା ମାଡ଼ିତେ; ଶାନ୍ତି ତେ ହାନ୍ ।"