1 ସାରା ପୃତିବୀତେ ନାରୁଡ଼୍ ସାରେ ଗୋଷ୍ଠୀ ବା ଜାତି, ଦେଶିୟ ନୁ ଭାଷାବାଦୀ ନାରୁଡ଼୍ ସେଙ୍ଗେ ନବୂକଦ୍ନିତ୍ସର୍ ରାଜାନ୍ (ବିଜ୍ଞାପନ୍); ମିକିଙ୍କ୍ ଅଦିକ୍ ଲେକାମ୍ ଶାନ୍ତି ଆୟି। 2 ବାଡ଼ିୟେ ପରମେଶ୍ୱର୍ ନା ପାକେ ବେନ୍ ବେନା ଚିଃହ୍ନେ ନୁ ଆଶ୍ଚର୍ଯ୍ୟ କାମ୍ ମାଡ଼ି ମିନ୍ଦେଣ୍ଡ୍, ଆୱୁସାରେ ପ୍ରଚାର୍ ମାଡ଼ାନଙ୍କ୍ ନାୟାଦ୍ ଡଲାନାଦ୍ ଲେକେତ୍ ଆତ୍ତେ।
3 ଅନାୱୁ ଚିଃହ୍ନାକି ବେଲାନ୍ ମହତ୍ ନୁ ଅନାୱୁ ଆଶ୍ଚର୍ଯ୍ୟ ମାଡ଼ିମାନ୍ଦାନ୍ କାମ୍ ବେଲାନ୍ ସାହେ ! ଅନ୍ ରାଜ୍ୟ ସାରେଦିନାତାଦ୍ ନୁ ଅନାଦ୍ ଶାସନ ଯୁଗ୍ ଯୁଗ୍ ମାନ୍ତେ।
ନବୂକଦ୍ନିତ୍ସରତେ ଦ୍ୱିତୀୟ ସାପ୍ନେ
4 ନାନେ ନବୂକଦ୍ନିତ୍ସର ତାନ୍ ଲତ୍ତାଗ୍ ନୁ ରାଜ୍ପ୍ରାସାଦ୍ତାଗ୍ ଶାନ୍ତିତେ ବା ୱେଡ଼୍କେତେ ମାତ୍ତାନ୍। 5 ନାନେ ୱେରଡ଼୍ ସାପ୍ନେ ଉଡ଼୍ତାନ୍, ଆଦ୍ ନାକିଙ୍କ୍ ୱେର୍ସ୍ପେତେ ନୁ ପାଟ୍ତେ ପଡ଼ିୟେତାଗ୍ ନାୟାଦ୍ ଚିନ୍ତା ନୁ ମାନ୍ତେ ଦର୍ଶନ୍ ନାକିଙ୍କ୍ ଦାଦ୍ରେଲ୍ସ୍ପ୍ତେ। 6 ଆଦିଙ୍କ୍ ସାପ୍ନେତେ ଅର୍ଥ ନାକିଙ୍କ୍ କେଞ୍ଜ୍ସ୍ପାନ୍ ସେଙ୍ଗେ ନାନେ ବାବିଲ୍ତେ ସାରେ ବୁଦ୍ଦିମାନ୍ ନାରୁଡ଼୍କିଙ୍କ୍ ନା’ପାକେ ତାତାନ୍ ସେଙ୍ଗେ ଆଦେଶ୍ ଇତ୍ତାନ୍; 7 ଆସୁଙ୍କ୍ ମନ୍ତ୍ରମାଡ଼ାନଡ଼୍, ପାଞ୍ଜିଉଡ଼ାନଡ଼୍, କଲ୍ଦୀୟ ନୁ ପଣ୍ଡିତିଡ଼୍ ନା’ପାକେ ୱାତ୍ତଡ଼୍; ଆସୁଙ୍କ୍ ନାନେ ଅଡ଼୍କିଂଙ୍କ୍ ସାପ୍ନେ କେତ୍ତାନ୍; ମାତର୍ ଅଡ଼୍ ଆଦିନ୍ ଅର୍ଥ ନାକିଙ୍କ୍ କେତେ ପାର୍ୱଡ଼୍। 8 ମାତ୍ର ତାନ୍ପେର୍କେ ନା' ଦାୟାତ୍ ପେଦେର୍ ଲେକାମ୍ ବେଲ୍ଟଶତ୍ସତେ ପେଦେର୍ତେ ଦାନିୟେଲ୍ ନା’ପାକେ ୱାତ୍ତଣ୍ଡ୍, ଅନ୍ ହୃଦୟ୍ତାଗ୍ ପବିତ୍ର ଦେୟାତ୍ ଆତ୍ମାମିନ୍ଦେ; ଆସୁଙ୍କ୍ ନାନେ ଅଙ୍କ୍ ସାପ୍ନେତ୍ ଗଟ୍ କେଞ୍ଜ୍ସ୍ପି କେତ୍ତାନ୍, 9 ହୋ ମନ୍ତ୍ରକେତାନଡ଼୍ ବେଡ଼ିୟଣ୍ଡ୍ ବେଲ୍ଟଶତ୍ସର୍, ନାନେ ପୁତ୍ତାନ୍, ପବିତ୍ର ଦାୟାକିନ୍ ଆତ୍ମା ନି ହୃଦୟତାଗ୍ ମିନ୍ଦେ ନୁ ବେନେ କଷ୍ଟତ୍ ବାକ୍ୟ ନିୟାଗେ କଷ୍ଟତାଦ୍ ଆୟବାନେ, ଆଦିନ୍ ସେଙ୍ଗେ ନାନେ ସାପ୍ନେତାଗ୍ ବେନେ ବେନେ ସାପ୍ନେ ଉଡ଼୍ତାନ୍, ଆଦ୍ ନୁ ଆଦିନ୍ ଅର୍ଥ ନାକିଂଙ୍କ୍ କେଞ୍ଜ୍ସ୍ପେ।
10 ପାଟ୍ତେ ପଡ଼୍ୟିତ୍ ପରୁ ନା’ମାନ୍ତେ ସାପ୍ନେ ଇଦ୍ଲେକାମ୍ ମାତ୍ତେ; ନାନେ ଉଡ଼୍ତାନ୍, ମେଣ୍ଡେ ଉଡ଼େ, ବୁମ୍ଦେ ନାଡ଼୍ମେ ଅଣ୍ଡୟ୍ ମାଡ଼େ ନୁ ଆଦ୍ ନାର୍ଗେ ଡ଼େଙ୍ଗ୍। 11 ଆଦ୍ ମାଡ଼େ ପେର୍ସେ ନୁ ଢ଼ାଟୁମ୍ ଆତ୍ତେ ନୁ ଆଦିନ୍ ଡେଙ୍ଗ୍ ମାବ୍ତାଗ୍ ହେଉତେ, ମେଣ୍ଡେ ସାରେ ପୃତିବୀତେ ସାରେପାକା ଆଦ୍ ତନ୍ଦମାତ୍ତେ। 12 ଆଦିନ୍ ଆକି ସୁନ୍ଦର୍ ନୁ ଆଦିନ୍ କାୟା ନାର୍ଗେମାତା, ମେଣ୍ଡେ ଆୱୁ ସାରେତଡ଼୍ କାଦି ମାତ୍ତା। ୱାୟେତେ ପଶୁ ଆଗେତ୍ ନିଡ଼୍କେ ଆତ୍କେ ନୁ ମାବ୍ତାଗ୍ ଉଡାନ୍ ପିଟେକି ଆଗେ କମାନାଗ୍ ବାସେ ମାଡ଼୍ତା ନୁ ସାରେ ପଶୁ ଆଗାଙ୍କ୍ କାଦି ପାହେମ୍ ଆତ୍ତା।
13 ନାନେ ପାଟ୍ତେ ପଡ଼୍ୟିତ୍ ପରୁ ନା’ମାନ୍ତେ ଦର୍ଶନ୍ ଲେକାମ୍ ଉଡ଼୍ତାନ୍, ମେଣ୍ଡେ ଉଡ଼େ, ୱେରଣ୍ଡ୍ କେପାନଣ୍ଡ୍ ନୁ ପବିତ୍ର ନାରୁଣ୍ଡ୍ ସ୍ୱର୍ଗତାଗାଙ୍କ୍ ଡିଗି ୱାତ୍ତଣ୍ଡ୍। 14 ଅଣ୍ଡ୍ ଗାଟିଲେଙ୍ଗ୍ ମାଡ଼ି ଇଦ୍ଗଟ୍ କେତ୍ତଣ୍ଡ୍, ଇଦ୍ ମାଡ଼େତିଙ୍କ୍ ନାଡ଼୍କାଟ୍ ନୁ ଆଦିନ୍ କମାଙ୍କ୍ ସାରେ ତିଡ଼୍ପାଟ୍, ଆଦିନ୍ ଆକିସାରେ କାୟ୍ମୁଟ୍ ନୁ କାୟାଙ୍କ୍ ସାରେ ଲିକିମୁଟ୍; ଆଗେ ମଦଲ୍ ମାନ୍ଦାନ୍ ପଶୁ ନୁ କମେତାୱୁ ପିଟେ ମିରି। 15 ଆଗେକ୍ବା ବା ବୁମ୍ତାଗ୍ ଆଦିନ୍ ନାଡ଼୍ମେତ୍ ଗଣ୍ଡିତିଙ୍କ୍ ଲୁହା ନୁ ପିତ୍ତଲ୍ଲେକାଦ୍ ଇକ୍ଲେମ୍ତଡ଼୍ ତହସ୍ ୱାୟେତ୍ ଲେତେ ଗାଡ଼୍ତାଗ୍ ୱାଟାଟ୍ ନୁ ଆଦ୍ ମାବ୍ ସାଲ୍ଦେ ଜଡ଼୍ଗି, ମେଣ୍ଡେ ପଶୁକିନ୍ତ ପୃତିବିତେ ଗାଡ଼୍ତାଗ୍ ଆଦିନ୍ ଅଂଶ ଆୟି; 16 ଆଦିନ୍ ନାରୁଡ଼୍ ହୃଦୟ ପରିବର୍ତ୍ତିତ ଆୟି ନୁ ଆଦିଙ୍କ୍ ପଶୁନ୍ ହୃଦୟ୍ ଦୁକାମ୍ ଆୟି, ଆଦିନ୍ ପରୁ ସାତ୍ ବର୍ଷ ଆନି। 17 ବେନ ସାରେତିଙ୍କ୍ ବେଡ଼ିୟଣ୍ଡ୍, ଅଣ୍ଡ୍ ଯେ ନାରୁଡ଼୍ ରାଜ୍ୟତାଗ୍ ଶାସନ ମାଡ଼ିତଣ୍ଡ୍ ନୁ ବେନଙ୍କ୍ ଅନାଦ୍ ଇଚ୍ଛା, ଅଙ୍କ୍ ଆଦ୍ ଇଦ୍ତଡ଼୍, ମେଣ୍ଡେ ନାରୁଡ଼ଗାଙ୍କ୍ ବେନ ଗରିବ୍ ମାନ୍ଦାନ୍ ନାରୁଙ୍କ୍ ଅନ୍ ପରୁ ହେଞ୍ଚିତଣ୍ଡ୍, ଜିୱେ ମାନ୍ଦାନ୍ ନାରୁଡ଼୍ ବେଲାନ୍ ଇଦ୍ ପୁନ୍ଦ୍ତଡ଼୍, ଆଦିନ୍ ସେଙ୍ଗେ ଇଦ୍ ବାକ୍ୟ ପ୍ରହରୀନଡ଼୍ ଆଦେଶ୍ ଲେକାମ୍ ନୁ ଇଦ୍ ଦାବି ପବିତ୍ରନାରୁଡ଼୍ ବାକ୍ୟ କେପାନଡ଼୍ ଆଦେଶ୍ତେ ନୁ ଇଦ୍ ଦାବୀ ପବିତ୍ର ନାରୁଡ଼୍ ବାକ୍ୟତଡ଼୍ ଆସ୍ମିନ୍ଦେ।
18 "ନାନେ ରାଜା ନବୂକଦ୍ନିତ୍ସର୍ ଇଦ୍ ସାପ୍ନେ ଉଡ଼ିମିନ୍ଦେନ୍," "ଇଞ୍ଜେ କେ ବେଲ୍ଟଶତ୍ସର, ନିମେ ଅର୍ଥ କେଞ୍ଜ୍ସ୍ପାଟ୍, ବାତେଙ୍କ୍ଇତ୍କେ ନା’ରାଜ୍ୟତେ ସାରେ ବୁଦ୍ଦିମାନ୍ ନାରୁଡ଼୍ ଆଦିନ୍ ଅର୍ଥ ନାକିଙ୍କ୍ କେତାନଙ୍କ୍ ପାର୍ୱଡ଼୍; ମାତର୍ ନିମେ ପାର୍ତିନ୍, ବାତେଙ୍କ୍ଇତ୍କେ ନି ଅନ୍ତର୍ତାଗ୍ ପବିତ୍ର ଦେୟାକିନ୍ ଆତ୍ମା ମିନ୍ଦେ।"
ଦାନିୟେଲ୍ ସାପ୍ନେତେ ଅର୍ଥ କେତାନାଦ୍
19 ଆଗେତ୍ ବେଲ୍ଟଶତ୍ସର ପେଦେର୍ତଣ୍ଡ୍ ଦାନିୟେଲ୍ ବେସ୍କ ବର୍ଷ ବାକ୍ୱା ଆସ୍ ମାନ୍ତଣ୍ଡ୍ ନୁ ଅନ୍ ହେର୍କେ ଅଙ୍କ୍ ଗାବ୍ରା ମାଡ଼୍ତେ। ରାଜାଲ୍ ଉତ୍ତର୍ ମାଡ଼ି କେତ୍ତଣ୍ଡ୍, ହୋ ବେଲ୍ଟଶତ୍ସର, ଆଦିନ୍ ସାପ୍ନେ ଆଦିନ୍ ଅର୍ଥ ମିକିଙ୍କ୍ ଗାବ୍ରା ମାଡ଼୍ମା କି। ବେଲ୍ଟଶତ୍ସର ଉତ୍ତର୍ ମାଡ଼ି କେତ୍ତଣ୍ଡ୍, ହୋ ନା ପ୍ରବୁ, ବେନଡ଼୍ ନିକିଙ୍କ୍ ପାସ୍କିତଡ଼୍, ଅଡ଼୍ ସେଙ୍ଗେ ଇଦ୍ ସାପ୍ନେ ଆୟି ନୁ ନି ପାକେତଡ଼୍ ସେଙ୍ଗେ ଆଦିନ୍ ଅର୍ଥ ଗଟେମ୍ ଆୟି। 20 ନିମେ ବେନ୍ ମାଡ଼୍ଡ଼େ ଉଡ଼୍ତିନ୍, ବେଲାନ୍ ପେର୍ସି ଶକ୍ତି ଆତ୍ତେ, ଆଦିନ୍ ଡେଙ୍ଗ୍ ମାବ୍ତାଗ୍ ହେଉତେ ନୁ ସାରେ ପୃତିବିତାଗ ତନ୍ଦତେ; 21 ଆଦିନ୍ ଆକିସାରେ ସୁନ୍ଦର୍ ନୁ କାୟା ନାର୍ଗେମାତ୍ତା ନୁ ଆୱୁ ସାରେତଡ଼୍ କାଦି ମାତ୍ତା; ଆଦିନ୍ ମଦଲ୍ ୱାୟେତେ ପଶୁକି ବାସେ ମାଡ଼୍ତା, ଆଦିନ୍ କମାନ୍ ପରୁ ମାବ୍ତେ ପିଟେକି ବାସେ ମାଡ଼ମାତ୍ତା;
22 ହୋ ମହାରାଜା, ଆଦ୍ ମାଡ଼୍ଡ଼େ ନିମେ, ନିମେ ପେର୍ରତେ ସେଙ୍ଗେ ଶକ୍ତି ଆସ୍ମିନ୍ଦେ; ବାତେଙ୍କ୍ଇତ୍କେ ନିୟାଦ୍ ମହତ୍ତ୍ୱ ପାହେମ୍ ଆସ୍ମିନ୍ଦେ ନୁ ଆଦ୍ ମାବ୍ତାଗ୍ ହେଉସ୍ ମିନ୍ଦେ ନୁ ନିୟାଦ୍ ଶାସନ ପୃତିବିତାଗ୍ ହେୱ୍ନା ହେକାମ୍ ଆତ୍ତେ। 23 ମେଣ୍ଡେ, ନିମେ ବାତ୍ତେ ଉଡ଼୍ତିନ୍, ସ୍ୱର୍ଗତାଗାଙ୍କ୍ ୱେରଣ୍ଡ୍ କେପାନଣ୍ଡ ନୁ ପବିତ୍ର ମାନେଇ ଡିଗିୱାସ୍ କେତ୍ତଣ୍ଡ୍, ଇଦ୍ ମାଡ଼୍ତିଙ୍କ୍ ନାଡ଼୍କି ବିନଷ୍ଟ ମାଡ଼ାଟ୍; ବାତେଙ୍କ୍ଇତ୍କେ ବୁମ୍ତେ ମଦଲ୍ତେ ଦୁଡ଼୍ତିଙ୍କ୍ ଲୁହା ନୁ ପିତ୍ତଲ୍ ମପ୍ତାଗ୍ ତହସ୍ ୱାୟେତ୍ ୱାସ୍ତେ ଗାଡ଼୍ତାଗ୍ ୱାଟାଟ୍; ମେଣ୍ଡେ, ଆଦିଙ୍କ୍ ମାବ୍ତେ ମାସ୍ଏର୍ଦେ ଜଡ଼୍ଗି ନୁ ଆଦିନ୍ ପରୁ ସାତ୍ ବର୍ଷ ଆନାଯାକ ୱାୟେତ୍ ପଶୁକିନ୍ତ ଆଦିନ୍ ଅଂଶ ଆୟି।
24 ହୋ ମହାରାଜା, ଇଦିନ୍ ଅର୍ଥ ଇଦ୍, ମେଣ୍ଡେ ନା ପ୍ରବୁ ମାହାରାଜାନ୍ ବିଷୟତେ ସାର୍ତିଙ୍କ୍ ବେଡ଼ିୟେ ତିଆର୍ ଇଦ୍। 25 ନିମେ ନାରୁଡ଼ାଗାଙ୍କ୍ ଯେକେତନ୍ ଆଦ୍ତିନ୍ ନୁ ୱାୟ୍ତାଗ୍ ଉଡାନ୍ ପଶୁକିନ୍ତଡ଼୍ ନିମେ ମାନ୍ତିନ୍, କନ୍ଦାତ୍ ନ୍ୟାୟ ନିକିଙ୍କ୍ ଗାଡ଼୍ତିନ୍ଦାନଙ୍କ୍ ଆଦ୍ତେ, ମେଣ୍ଡେ ନିମେ ମାବ୍ତେ ହେଦିତେ ୱାସିତିନ୍, ଇଦ୍ଲେକାମ୍ ନି ପରୁ ସାତ୍ ବର୍ଷ ଆଦ୍ତେ; ତାନ୍ପେର୍କେ ବେନ ସାରେତିଙ୍କ୍ ବେଡ଼ିୟଣ୍ଡ୍, ଅଣ୍ଡ୍ ଯେ ନାରୁଡ଼୍ ରାଜ୍ୟତାଗ୍ ଶାସନ୍ ମାଡ଼ିତଣ୍ଡ୍ ନୁ ବେନଙ୍କ୍ ଆଦ୍ ଇଦାନଙ୍କ୍ ଇଚ୍ଛା ମାଡ଼ିତଣ୍ଡ୍, ଆଦିଙ୍କ୍ ଅଣ୍ଡ୍ ଆଦ୍ ଇଦ୍ତଣ୍ଡ୍, ଇଦ୍ ନିମେ ପୁନ୍ଦ୍ତିନ୍। 26 ମେଣ୍ଡେ, ମାଡେତ୍ ମଦଲ୍ତେ ଗଣ୍ଡିତିଙ୍କ୍ ୱିଡ଼୍ସାନ୍ନଙ୍କ୍ ଆଦେଶ୍ ଇଦାନାଦ୍ ଅର୍ଥ ଇଦ୍; ସ୍ୱର୍ଗକେ ଶାସନ୍ ମାଡ଼ିତ୍, ଇଦ୍ ନିମେ ପୁତ୍ତେ ପେର୍କେ ନିୟାଦ୍ ରାଜ୍ୟ ନି ସେଙ୍ଗେ ନିଜାମ୍ ଆଦ୍ତେ। 27 ହୋ ମହାରାଜା, ନାୟାଦ୍ ପୁଞ୍ଜ୍ପାନାଦ୍ ନିପାକେ ଗ୍ରହଣ ଆୟି, ମେଣ୍ଡେ ନି ଦାର୍ମିକତା ତଡ଼୍ ନିମେ ପାପିନଡ଼୍କ୍ ନୁ ଗରିବ୍ନଡ଼୍ ସେଙ୍ଗେ ଦୟା ତତାନାଦିନ୍ ତଡ଼୍ ନି ଅଦର୍ମକାମ୍ ଦୂର୍ ମାଡ଼୍ଡ଼େ; ଆଲେକେ ଆଦ୍ଦେ ପାର୍ତେ, ନିମେ ଶାନ୍ତିତେ ମାନ୍ତିନ୍।
ନବୂକଦ୍ନିତ୍ସର ପର ବିଚାର୍
28 ରାଜା ନବୂକଦ୍ନିତ୍ସର ସେଙ୍ଗେ ଇୱୁସାରେ ଗଟେମ୍ ଆତ୍ତେ। 29 ବାର ନେଲ୍ଞ୍ଜ୍ତେ ପେର୍କେ ଅଣ୍ଡ୍ ବାବିଲ୍ତେ ରାଜ୍ପ୍ରାସାଦ୍ ସାତତ୍ ପରୁ ଉଡମାତ୍ତଣ୍ଡ୍। 30 ରାଜାଲ୍ ଇଦ୍ ଗଟ୍ କେତ୍ତଣ୍ଡ୍, ନାନେ ନି ଶକ୍ତିତେ ନୁ ବିଶ୍ୱାସତେ ନି କାମ୍କେତେ ମହିମା ସେଙ୍ଗେ ରାଜ୍ୟ ମାଡ଼ାନ୍ ସେଙ୍ଗେ ବାତ୍ତେ ତିଆର୍ ମାଡ଼ିମିନ୍ଦେନି, ଇଦ୍ କି ଆଦ୍ ବାବିଲ୍ ଆୟ ? 31 ରାଜାନ୍ ମକମ୍ତାଗ୍ ଗଟ୍ ମାନା ମାନା ଇଦ୍ ସ୍ୱର୍ଗୀୟ ବାଣୀ ଆତ୍ତେ, ହୋ ରାଜାନ୍ ନବୂକଦ୍ନିତ୍ସର୍, ନିକିଙ୍କ୍ ଇଦ୍ ଗଟ୍ କେସ୍ମିନ୍ଦେଣ୍ଡ୍, ନିୟାଗାଙ୍କ୍ ରାଜ୍ୟ ଆତ୍ତେ। 32 ମେଣ୍ଡେ, ନିମେ ନାରୁଡ଼ାଗାଙ୍କ୍ ଯେକା ଆଦ୍ତିନ୍ ନୁ ୱାୟେତ୍ ପଶୁକିନ୍ତଡ଼୍ ମିୟାଦ୍ ଗୁଡ଼ିୟେମ୍ ଆଦ୍ତେ; କନ୍ଦାତ୍ ବାଦୁଲ୍ତେ ନିକିଙ୍କ୍ ଗାଡ଼୍ ତିନ୍ଦେ ୱେୟ୍ତିତ୍, ଇଦ୍ଲେକାମ୍ ନି ପରୁ ସାତ୍ ବର୍ଷ ଆଦ୍ତେ; ପେର୍କେ ବେନ ସାର୍ତଡ଼କ୍, ଅଣ୍ଡ୍ ଯେ ନାରୁଡ଼୍ ରାଜ୍ୟତାଗ୍ ରାଜ୍ ମାଡ଼ିତଣ୍ଡ୍ ନୁ ବେନଙ୍କ୍ ଅନାଦ୍ ଇଚ୍ଛା, ଆଦିଙ୍କ୍ ଅଣ୍ଡ୍ ଆଦ୍ ଇଦ୍ତଣ୍ଡ୍, ଇଦ୍ ମିଡ଼୍ ପୁନ୍ଦ୍ତିଡ଼୍।
33 ଆଦ୍ ଦଣ୍ଡତେ ନବୂକଦ୍ନିତ୍ସର୍ ପରୁ ଆଦ୍ ଗଟ୍ ସଫଲ୍ ଆତ୍ତେ; ମେଣ୍ଡେ, ନାରୁଡ଼ାଗାଙ୍କ୍ ଯେକା ଆସ୍ମିକା କନ୍ଦା ଲେକାମ୍ ଗାଡ୍ ତିନ୍ତ୍ତଣ୍ଡ୍, ମେଣ୍ଡେ ଆଦିନ୍ ମେନ୍ଦୁଲ୍ ମାବ୍ତେ ମାସ୍ଏର୍ଦେ ଜଡ଼୍ଗିତ୍, ପେର୍କେ ତାନ୍ କେଲ୍କ୍ ଗାଦ୍ ପିଟେତ୍ ଗେର୍ଙ୍ଗ୍ ଲେକାମ୍ ନୁ ଆଦିନ୍ ଇଡ଼୍ଞ୍ଚକ୍ ପିଟେତ୍ ଇଡ଼୍ଞ୍ଚକ୍ ଲେକାମ୍ ଜାର୍ତା।
ନବୂକଦ୍ନିତ୍ସରତେ ଇଶ୍ୱର୍ତେ ପ୍ରଶଂସା
34 ତାନ୍ପେର୍କେ ଇଦ୍ ସମୟ୍ତେ ସାତ୍ ବର୍ଷ ତେର୍ତେ ପେର୍କେ ନାନେ ନବୂକଦ୍ନିତ୍ସର୍ ସ୍ୱର୍ଗ ପାକେ ପରୁ ଉଡ଼୍ତାନ୍, ଆସୁଙ୍କ୍ ନାୟାଦ୍ ବୁଜେମ୍ ଆଦାନ୍ ଶକ୍ତି ମାଲ୍ସ୍ ୱାତ୍ତେ, ଆସୁଙ୍କ୍ ନାନେ ସାରେତିଙ୍କ୍ ବେଡ଼ିୟଙ୍କ୍ ଦନ୍ୟବାଦ୍ ମାଡ଼୍ତାନ୍ ନୁ ବେନ ସାରେଦାମ୍ଜିୱେ, ଅନାଦ୍ ପ୍ରଶଂସା ନୁ ସମାଦର୍ ମାଡ଼୍ତାନ୍; ବାତେଙ୍କ୍ଇତ୍କେ ଅନାଦ୍ କାମ୍ ସାରେଦିନେତାଦ୍ ନୁ ଅନ୍ ରାଜ୍ୟ ଯୁଗ୍ ଯୁଗ୍ ମାନ୍ତେ।
35 ମେଣ୍ଡେ, ପୃତିବିତାଗ୍ ମାନ୍ଦାନ୍ ନାରୁଡ଼୍ ସାରେତଡ଼୍ ତେର୍ୱେ ବସ୍ତୁ ଲେକାମ୍ ଲେକାଆତ୍ତେ; ମେଣ୍ଡେ ଅଣ୍ଡ୍ ସ୍ୱର୍ଗିୟ ସୈନ୍ୟଡ଼ାଗ୍ ନୁ ପୃତିବୀତେ ନାରୁଡ଼ାଗ୍ ନିଜେତ୍ ଇଚ୍ଛାଲେକାମ୍ କାମ୍ ମାଡ଼ିତଡ଼୍; ମେଣ୍ଡେ, ବେନ ଅନ୍ କାଇଦିଙ୍କ୍ ନେଃତାଙ୍କ୍ ପାର୍ୱଣ୍ଡ୍ କି ମିଡ଼୍ ବାତେ ମାଡ଼ୁତିଡ଼୍ ଇଦ୍ ଅଙ୍କ୍ କେତାନଙ୍କ୍ ପାର୍ୱଣ୍ଡ୍।
36 ଆଦ୍ ସମୟ୍ତେ ନା’ବୁଦ୍ଦ୍ ନା’ପାକେ ମାଲ୍ସ୍ ୱାତ୍ତେ ନୁ ନା’ରାଜ୍ୟତେ ଗୌରବ୍ ସେଙ୍ଗେ ନାୟାଦ୍ କାମ୍କେ ନୁ ୱେସ୍ ନା’ପାକେ ମାଲ୍ସ୍ ୱାତ୍ତେ; ଆସୁଙ୍କ୍ ନା ମନ୍ତ୍ରୀ ନୁ ଅମାତ୍ୟନାରୁଡ଼୍ ନା ପେର୍କେ ୱାତ୍ତଡ଼୍; ମେଣ୍ଡେ, ନାନେ ନା ରାଜ୍ୟତା ଆତ୍ତାନ୍ ନୁ ନାୟାଦ୍ ସେବା ମାଡ଼ାନାଦ୍ ନାର୍ଗେ ଆତ୍ତେ। 37 ଆଦିଙ୍କ୍ ନାନେ ନବୂକଦ୍ନିତ୍ସର୍ ଆ ସ୍ୱର୍ଗତେ ରାଜାଙ୍କ୍ ପ୍ରଶଂସା, ତିଆର୍ ନୁ ମହିମା ମାଡ଼ୁତେ; ବାତେଙ୍କ୍ଇତ୍କେ ଅନ୍ ମାଡ଼୍ତେ କାମ୍ ସତ୍ୟ ନୁ ଅନ୍ ଆର୍ ମାଡ଼୍ତେ ନ୍ୟାୟ୍; ମେଣ୍ଡେ, ବେନଡ଼୍ ଗର୍ବଇଚ୍ଛା ମାଡ଼ିତଣ୍ଡ୍, ଅଡ଼୍କିଂଙ୍କ୍ ଆୱୁକାଙ୍ଗ୍ ଅନାଦ୍ ଅଦିକାର୍ ମିନ୍ଦେ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)