1 ପାରସ୍ୟତେ ରାଜାଲ୍‌ କୋରସ୍‌ ରାଜତ୍ୱତେ ତୃତୀୟ ୱାଡ଼୍‌ସେତେ ବେଲ୍‌ଟଶତ୍ସ ପେଦେର୍‌ ପୁତ୍‌ତେନଣ୍ଡ୍‌ ଦାନିୟେଲ୍‌ତେ ପରୁ ଇଦ୍‌ ବିଷୟ ପ୍ରକାଶ୍‌ ଆତ୍‌ତେ ନୁ ଆଦ୍ ନିଜାମ୍‌, ଆଦ୍‌ ୱେରଡ଼୍‌ ବେଡ଼େୟ୍‌ଯୁଦ୍ଦ୍‌ ବିଷୟ; ମେଣ୍ଡେ ଅଣ୍ଡ୍‌ ବୁଜେମ୍‌ ଆତ୍‌ତଣ୍ଡ୍‌ ନୁ ଆଦ୍‌ ଦର୍ଶନ୍‌ ବିଷୟ ଅଙ୍କ୍‌ କେତ୍‌ତଡ଼୍‌। 2 ଆଦ୍‌ ସମୟତେ ନାନେ, ଦାନିୟେଲ୍‌, ସାରେ ତିନି ସପ୍ତାହ ଯାକ ଦୁଃକ ମାଡ଼ମାତ୍‌ତାନ୍‌ 3 ସାରେ ମୁଣ୍ଡ୍‌ ସପ୍ତାହ ତେର୍‌ନା ଯାକ ନାନେ ବାତେବା ଲେକେତ୍‌ କାଦି ତିନନ୍‌, କି ଆୱୁଙ୍କ୍‌ ବା ଅଙ୍ଗୁର୍‌କାଲ୍‌ ନା' ପାୟୁର୍‌ତାଗ୍‌ ନେଙ୍ଗ, ଆଗେକ୍‌ବା ବା ନାନେ ବାତେ ମେନ୍ଦୁଲ୍‌ତାଗ୍‌ ନିୟ୍‌ ଅକନ୍‌।

4 ମେଣ୍ଡେ, ପ୍ରତମ୍‌ ନେଲ୍‌ଞ୍ଜ୍‌ତେ ନାଲୁଦିନାତେ ନାନେ ହିଦ୍ଦେକଲ ପେଦେର୍‌ ବେଡ଼ିୟ୍‌ ବେଡ଼େମ୍‌ ଆଞ୍ଚିନା ମାନ୍ଦାନ୍‌ ୱେଲେ, 5 ନାନେ କଣ୍ଡାନାକି ଉଡ଼୍‌ତାନ୍‌, ମେଣ୍ଡେ ଉଡ଼େ, ପାଣ୍ଡ୍ରିଲାଦ୍‌ ଚକା କେର୍‌ତେନଣ୍ଡ୍‌ ୱେରଣ୍ଡ୍‌ ନାରୁଣ୍ଡ୍‌, ଅନ୍‌ ଟିକିଡ଼୍‌ ପରୁ ନିର୍ମଳ ସୁନାତେ ବେଲ୍‌ଟ୍‌ ତଃସ୍‌ମାତ୍‌ତେ; 6 ମିକା ଅନ୍‌ ମେନ୍ଦୁଲ୍‌ ବା ସିଙ୍ଗ୍‌ଡ଼ାମ୍‌ ଇନା ପତ୍‌ତେ ନୁ ଅନ୍‌ ମକମ୍‌ କାରେନ୍‌ ୱେସ୍‌ ଲେକାମ୍‌ ନୁ ଅନ୍‌ କଣ୍ଢା ୱେଇସ୍‌; ନିଡ଼୍‌ତାନ୍‌ କିସ୍‌ ଲେକାମ୍‌, ମେଣ୍ଡେ ଅନ୍‌ କାଇ ନୁ ପାଦାକ୍‌ ସାକ୍‌ସାକା ପିତ୍ତଲ୍‌ତେ ୱେଇସ୍‌ ଲେକାମ୍‌ ନୁ ତାନ୍‌ ବାକ୍ୟତେ ଲେଙ୍ଗ୍‌ ନାରୁଡ଼୍‌ ମାନ୍ଦେତେ ଲେଙ୍ଗ୍‌ ଲେକାମ୍‌। 7 ମେଣ୍ଡେ, ନାନେ, ଦାନିୟେଲ୍‌, ଅଣ୍ଡୟ୍‌ ଦାମ୍‌ ଉଡ଼୍‌ତାନ୍‌; ବାତେଙ୍କ୍‌ଇତ୍କେ ନା ତଡ଼୍‌ଦେ ନାରୁଡ଼୍‌ ଆଦ୍‌ ଦର୍ଶନ୍‌ ଉଡ଼ଡ଼୍‌; ମାତର୍‌ ଅଡ଼୍‌ ଗାଟି ୱେର୍‌ତଡ଼୍‌ ନୁ ନିଜେ ନିଜେତିଙ୍କ୍‌ ମିଞ୍ଜାନଙ୍କ୍‌ ମିର୍‌ତଡ଼୍‌। 8 ଆସୁଙ୍କ୍‌ ନାନେ ୱେରନ୍‌ ମାଞ୍ଜ୍‌ ଇଦ୍‌ ବେଡ଼େୟ୍‌ଦର୍ଶନ୍‌ ଉଡ଼୍‌ତାନ୍‌ ନୁ ନା'ୟାଗ୍‌ ବାତେ ଇସୁର୍‌ମିକା ଶକ୍ତି ଇଲ୍‌ୱେମାତ୍‌ତେ; ବାତେଙ୍କ୍‌ଇତ୍କେ ନାୟାଦ୍‌ ମକମ୍‌ତେ ୱେସ୍‌ ପରିବର୍ତ୍ତନ ଆତ୍‌ତେ ନୁ ନାନେ ବାତେ ଶକ୍ତିନେଃତେ ପାର୍‌ୱନ୍‌। 9 ଆଗେକ୍‌ବା ନାନେ ଅନ୍‌ ବାକ୍ୟତେ ଲେଙ୍ଗ୍‌ କେଞ୍ଜ୍‌ତାନ୍‌; ମେଣ୍ଡେ, ବେସୁଙ୍କ୍‌ ନାନେ ଅନ୍‌ ବାକ୍ୟତେ ଲେଙ୍ଗ୍‌ କେଞ୍ଜ୍‌ତାନ୍, ଆସୁ‌ଙ୍କ୍‌ ନାନେ କାପ୍‌ମୁଡ଼୍‌ନ୍ଦି ରାଲି ଲୋତ୍‌ତେ ମାଦ୍ରେ ଉସ୍କାଡ଼୍‌ତେ ମାତ୍‌ତାନ୍‌। 10 ଆଗାଙ୍କ୍‌ ଉଡ଼ାଟ୍‌, ୱେରଡ଼୍‌ କାଇ ଇଟିମିକା ନାକିଙ୍କ୍‌ ବଟ୍‌ମିଣ୍ଡା ନୁ କାଇକିନାଗ୍‌ ପଇତ୍‌ତେ ଆସୁଟ୍‌ ନାନ୍‌ ଡ଼ାଟାମ୍‌ ଆସ୍‌ ନିତ୍‌ତାନ୍‌। 11 ମେଣ୍ଡେ, ଆଦ୍‌ ନାକିଙ୍କ୍‌ କେତ୍‌ତେ, ହୋ ପ୍ରିୟସାଙ୍ଗନ୍‌ ଦାନିୟେଲ୍‌, ମାମେ ମିକିଂଙ୍କ୍‌ ବେନ୍‌ ବେନା ବାକ୍ୟ କେତିତମ୍‌, ଆଦ୍‌ ବୁଜେମ୍‌ ଆୟ୍‌ମୁଟ୍‌ ନୁ ତିନାଙ୍କ୍‌ଆସ୍‌ ନିଲ୍‌ମୁଟ୍‌; ବାତେଙ୍କ୍‌ଇତ୍କେ ଇଞ୍ଜେ ମାମେ ନି ପାକେ ମାଲ୍‌ସ୍‌ ମିନ୍ଦେମ୍‌; ଅଣ୍ଡ୍‌ ନାକିଙ୍କ୍‌ ଇଦ୍‌ ଗଟ୍‌ କେଲ୍‌ନାଙ୍କ୍‌ ନାନେ ୱାଡ଼୍‌କି ୱାଡ଼୍‌କି ନିତ୍‌ତାନ୍‌।

12 ଆସୁଙ୍କ୍‌ ଅଣ୍ଡ୍‌ ନାକିଙ୍କ୍‌ କେତ୍‌ତଣ୍ଡ୍‌, ହୋ ଦାନିୟେଲ୍‌, ୱେର୍‌ମା; ବାତେଙ୍କ୍‌ଇତ୍କେ ନିମେ ବେନ୍‌ ପ୍ରତମ୍‌ ଦିନେତାଗାଙ୍କ୍‌ ବୁଜେମ୍‌ ଆଦାନଙ୍କ୍‌ ନୁ ନି ପରମେଶ୍ୱର୍‌ତେ ପାକେ ନିଜେତିଙ୍କ୍‌ ନମ୍ର ମାଡ଼ାନଙ୍କ୍‌ ନି ମାନ୍‌ତାଗ୍‌ ଏର୍କେ ମାଡ଼୍‌ତିନ୍‌, ଆଦ୍‌ ଦିନେକଞ୍ଜ୍‌ ନିୟାଦ୍‌ ବାକ୍ୟ କେଞ୍ଜାଙ୍କ୍‌ ଆତ୍‌ତେ; ମେଣ୍ଡେ, ନିୟାଦ୍‌ ବାକ୍ୟ ସେଙ୍ଗେ ନାନ୍‌ ୱାତ୍‌ତମ୍‌। 13 ମାତର୍‌ ପାରସ୍ୟ ରାଜ୍ୟତେ ଅଦିପତି ଏକୋଇଶ୍‌ ଦିନ୍‌ ଯାକ ମାୟାଦ୍‌ ସାମ୍‌ନା ମାଡ଼୍‌ତେ; ମାତର୍‌ ଉଡ଼େ, ବେଡ଼ିୟେ ଅଦିପତିନଡ଼୍‌ ଲୋପେଙ୍କ୍‌ ମୀଖାୟେଲ୍‌ ପେଦେର୍‌ତେ ୱେରଣ୍ଡ୍‌ ମାୟାଦ୍‌ ସାହାଯ୍ୟ ମାଡ଼ାନଙ୍କ୍‌ ୱାତ୍‌ତଣ୍ଡ୍‌; ମେଣ୍ଡେ, ନାନ୍‌ ଆଦ୍‌ ପଡ଼ିୟେତାଗ୍‌ ପାରସ୍ୟତେ ରାଜାନଡ଼୍‌ ସାଙ୍ଗେ ମାତ୍‌ତମ୍‌। 14 ଇଞ୍ଜେ, ଶେଷ କାଲାମ୍‌ତେ ମି ନାରୁଡ଼୍‌ ପରୁ ବାତ୍‌ତେ ଘଟେମ୍‌ ଆଦ୍‌ତେ, ଆଦ୍‌ ମିକିଙ୍କ୍‌ ବୁଜାମାଡ଼ିଦାଙ୍କ୍‌ ମାମେ ୱାତ୍‌ତମ୍‌; ବାତେଙ୍କ୍‌ଇତ୍କେ ଦର୍ଶନ ମେଣ୍ଡେ ନାର୍ଗେକାଲାମ୍‌ ଯାକ ମିନ୍ଦେ।

15 ଅଣ୍ଡ୍‌ ନାକିଙ୍କ୍‌ ଇଦ୍‌ଲେକାମ୍‌ ଗଟି କେତାନ୍‌ ୱେଲେ ନାନେ ବୂମ୍‌ଦା ମକମ୍‌ ୱାଟି କଟ ଆତ୍‌ତାନ୍‌। 16 ଆସୁଙ୍କ୍‌ ଉଡ଼େ, ନାରୁନ୍‌ ପିଲାନ୍‌ ଲେକ୍‌ତଣ୍ଡ୍‌ ୱେରଣ୍ଡ୍‌ ନାରୁଣ୍ଡ୍‌ ନା ପାୟୁର୍‌ତିଙ୍କ୍‌ ଇଟ୍‌ତଣ୍ଡ୍‌; ଆସୁଙ୍କ୍‌ ନାନେ ମକମ୍‌ ତେସ୍‌ ନା'ମୁନେ ନିତାନ୍‌ ନାରୁଙ୍କ୍‌ କେତ୍‌ତାନ୍‌, ହୋ ନା ପ୍ରବୁ, ଇଦ୍‌ ଦର୍ଶନ୍‌ ସେଙ୍ଗେ ନାୟାଦ୍‌ ନପିନ୍‌ ନାକିଂଙ୍କ୍‌ ରାପ୍‌ତାସୁଙ୍କ୍‌ ନୁ ନାନେ ଇସୁର୍‌ ମିକା ରକ୍ଷା ମାଡ଼୍‌ଡ଼େ ପାର୍‌ୱନ୍‌। 17 ବାତେଙ୍କ୍‌ଇତ୍କେ ନା ଇ ପ୍ରବୁନ୍‌ ଦାସ ବେଲାନ୍‌ ଇ ନା'ପ୍ରବୁନ୍‌ ସାଙ୍ଗେ ତିର୍‌ୟାତିର୍‌ୟି ମାଡ଼େ ପାର୍‌ତନ୍‌ ? ଆସୁଟେ ନା'ୟାଗେ ସୁଦୁର୍‌ ଶକ୍ତି ବା ନା'ୟାଗେ ନେସ୍କାନାଦ୍‌ ଇଲ୍‌ୱେ ମାତ୍‌ତେ।

18 ଆସୁଙ୍କ୍‌ ନାରୁନ୍‌ ଲେକ୍‌ତଣ୍ଡ୍‌ ୱେରଣ୍ଡ୍‌ ନାରୁଣ୍ଡ୍‌ ମେଣ୍ଡନ୍‌ଦାମ୍‌ ନାକିଙ୍କ୍‌ ଇଟିମିକା ଶକ୍ତି ମାଡ଼୍‌ତଣ୍ଡ୍‌। 19 ମେଣ୍ଡେ, ଅଣ୍ଡ୍‌ କେତ୍‌ତଣ୍ଡ୍‌, ହୋ ପ୍ରିୟସାଙ୍ଗନ୍‌ ନାରୁଣ୍ଡ୍‌, ୱେର୍‌ମା; ନିୟାଦ୍‌ ଶାନ୍ତି ଆୟି; ଶକ୍ତି ଆୟିମ୍‌ ! ଅଣ୍ଡ୍‌ ନାକିଂଙ୍କ୍‌ କେତ୍‌ତଣ୍ଡ୍‌, ନା ପ୍ରବୁ କେଲେମ୍‌ ବାତେଙ୍କ୍‌ଇତ୍କେ ନିମେ ନାକିଂଙ୍କ୍‌ ଶକ୍ତିତନ୍‌ ମାଡ଼ିମିନ୍ଦେନି। 20 ଆସୁଟ୍‌ ଅଣ୍ଡ୍‌ କେତ୍‌ତଣ୍ଡ୍‌, ମାମେ ବାତାଙ୍କ୍‌ ନି ପାକେ ୱାତ୍‌ତମ୍‌, ଆଦ୍‌ କି ନିମେ ପୁନ୍‌ୱିନ୍‌ ? ଇଞ୍ଜେ ମାମେ ପାରସ୍ୟତେ ଅଦିପତି ସାଙ୍ଗେ ଯୁଦ୍ଦ୍‌ ମାଡ଼ାନଙ୍କ୍‌ ମାଲ୍ସ୍‌ ଆଦିକାଡ଼୍‌; ମେଣ୍ଡେ, ମାମେ ପେୟିକେ, ଉଡ଼େ, ଗ୍ରୀସ୍‌ତେ ଅଦିପତି ୱାଦ୍‌ତଣ୍ଡ୍‌। 21 ମାତର୍‌ ସତ୍ୟତେ ବାତେଲେକା ମିନ୍ଦେ, ଆଦ୍‌ ମାମେ ମିକିଂଙ୍କ୍‌ କେତିତମ୍‌; ଇଡ଼୍‌ ବିରୁଦ୍ଦ୍‌ତେ ମାୟାଦ୍‌ ସାହାଯ୍ୟ ମାଡ଼ାନଙ୍କ୍‌ ମି ଅଦିପତି ମୀଖାୟେଲ୍‌ ୱିଡ଼୍‌ସି ମେଣ୍ଡେ ବେନ ଇଲାଣ୍ଡ୍‌।