ବେଲ୍ଶତ୍ସର୍ ସେଙ୍ଗେ ନେଟେତାଗ୍ ଲେକାନାଦ୍
1 ରାଜାଲ୍ ବେଲ୍ଶତ୍ସର ତାନ୍ ହଜାର୍ ହଜାର୍ ଅମାତ୍ୟନଡ଼୍ ସେଙ୍ଗେ ୱେରଡ଼୍ ବେଡ଼ିୟାଦ୍ ବଜି ତିଆର୍ ମାଡ଼୍ତଣ୍ଡ୍ ନୁ ଆ ହଜାର୍ ହଜାର୍ ନାରୁଡ଼୍ ମୁନେ ଅଙ୍ଗୁର୍କାଲ୍ ଉତ୍ତଣ୍ଡ୍। 2 ମେଣ୍ଡେ, ତାନ୍ ବାବାଲ୍ ନବୂକଦ୍ନିତ୍ସର ଯିରୁଶାଲମସ୍ଥ ମନ୍ଦିର୍ତାଗାଙ୍କ୍ ବେନ୍ ସାରେ ସୁନା ନୁ ରୂପାତେ ପାତ୍ର ଡଙ୍ଗିଅସ୍ ମାତ୍ତଣ୍ଡ୍, ଆସୁଙ୍କ୍ ରାଜାଲ୍ ନୁ ତାନ୍ ଅମାତ୍ୟନଡ଼୍, ମେଣ୍ଡେ ତାନ୍ ମୁତେକି ନୁ ବେଡ଼ିୟ୍ ମୁତେକି ବେଲାନ୍ ଉନ୍ଦ୍ତା, ଆଦିନ୍ ସେଙ୍ଗେ ବେଲ୍ଶତ୍ସର ଅଙ୍ଗୁର୍କାଲ୍ ଉଞ୍ଜ୍ ଉଞ୍ଜ୍ ସାରେ ପାତ୍ର ତାତାନଙ୍କ୍ କେତ୍ତଣ୍ଡ୍। 3 ଆସୁଙ୍କ୍ ଯିରୁଶାଲମ୍ ମନ୍ଦିର୍ତାଗାଙ୍କ୍, ଇତ୍କେ, ପରମେଶ୍ୱର୍ତେ ଲୋତ୍ତାଗାଙ୍କ୍ ବେନ୍ସାରେ ସୁବର୍ଣ୍ଣ ପାତ୍ର ଡଙ୍ଗି ଆସ୍ମାତ୍ତେ, ଆଦିଙ୍କ୍ ନାରୁଡ଼୍ ତାତ୍ତଡ଼୍; ମେଣ୍ଡେ, ରାଜା ନୁ ତାନ୍ ଅମାତ୍ୟନଡ଼୍, ତାନ୍ ମୁତେକି ନୁ ବେଡ଼ିୟ୍ ମୁତେକି ଆୱୁସାରେ ଉତ୍ତା। 4 ଆୱୁ ଅଙ୍ଗୁର୍କାଲ୍ ଉଞ୍ଜ ଉଞ୍ଜ ସୁନା ନୁ ରୂପା, ପିତ୍ତଲ୍, ଲୁହା, ୱେର୍କି ନୁ କାଲ୍କିନ୍ ତଡ଼୍ ତିଆର୍ଆତ୍ତେ ଦେୟାକିନ୍ ପ୍ରଶଂସା ମାଡ଼୍ତା।
5 ଆଦ୍ ଦଣ୍ଡତେ ନାରୁନ୍ କାଇଦେ ୱାଡ଼୍ଞ୍ଚ୍କ୍ ୱାସ୍ ରାଜପ୍ରାଚାଦ୍ତାଗ୍ ନେଟେତାଗ୍ ଉସ୍ତେ ପରୁ ଦୀପାଦାରତେ ପାକେ ଲେକ୍ତେ, ମେଣ୍ଡେ କାଇଦେ ବେନ୍ ଅଂଶ ଲେକ୍ତା, ରାଜାଲ୍ ଆଦ୍ ଉଡ଼୍ତଣ୍ଡ୍। 6 ଆସୁଙ୍କ୍ ରାଜାଲ୍ ମକମ୍ ମୁର୍ ମୁରା ଆତ୍ତେ ନୁ ଅନ୍ ହେର୍କେ ଅଙ୍କ୍ କପାମ୍ ମାଡ଼୍ତେ; ମେଣ୍ଡେ, ତାନ୍ ଟିକିଡ଼୍ତେ ଗାଟି ସାରେ ଲେଙ୍ଗ୍ତା ଆତ୍ତା ନୁ ଅନ୍ ବଟ୍ମିଣ୍ଡାନାଗ୍ ବଟ୍ମିଣ୍ଡା ତାଲ୍ଗ୍ତା। 7 ରାଜ୍ଗଣତେ, କଲ୍ଦୀୟ ନୁ ପଣ୍ଡିତିଡ଼୍ ତାତାନ୍ ସେଙ୍ଗେ ଗାଟିଲେଙ୍ଗ୍ ମାଡ଼ି କାର୍ଙ୍ଗ୍ତଣ୍ଡ୍। ରାଜାଲ୍ ବାବିଲିୟ ବିଦ୍ୱାନ୍ନଡ଼୍କିଙ୍କ୍ କେତ୍ତଣ୍ଡ୍, ବେନଆୟି ଇଦ୍ ଲେକ୍ତାଦିଙ୍କ୍ କାର୍ତିତଣ୍ଡ୍ ନୁ ଆଦିନ୍ ଅର୍ଥ ନାକିଙ୍କ୍ କେତିତଣ୍ଡ୍, ଅଣ୍ଡ୍ ଆପେ ରଙ୍ଗ୍ଦେ ଚକେ କେର୍ତଣ୍ଡ୍ ନୁ ଅନ୍ ଗୁଡ଼ୁଙ୍ଗ୍ତାଗ୍ ଲେକେତାଦ୍ ନେଡ଼େମ୍ ଇଦ୍ତମ୍, ମେଣ୍ଡେ, ଅଣ୍ଡ୍ ରାଜ୍ୟତେ ତୃତୀୟ କର୍ତ୍ତାଲ୍ ଆଦ୍ତଣ୍ଡ୍। 8 ଆସୁଙ୍କ୍ ରାଜାନ୍ ସାରେତଡ଼୍ ଜ୍ଞାନି ନାରୁଡ଼୍ ଲୋପେ ୱାତ୍ତଡ଼୍; ମାତର୍ ଅଡ଼୍ ଲେକ୍ତାଦ୍ କାର୍ତେ ପାର୍ୱଡ଼୍, କି ରାଜାଙ୍କ୍ ଆଦିନ୍ ଅର୍ଥ କେତାନଙ୍କ୍ ପାର୍ୱଡ଼୍। 9 ରାଜାଲ୍ ବେଲ୍ଶତ୍ସର ଗାଟି କପାମ୍ ଆତ୍ତଣ୍ଡ୍ ନୁ ତାନ୍ ମୁକମ୍ ମୁର୍ ମୁରା ଆତ୍ତେ, ମେଣ୍ଡେ ତାନ୍ ବେଡ଼ିୟେ ନାରୁଡ଼୍ ଆନ୍ତେ ବାକ୍ୱା ଆତ୍ତଡ଼୍।
10 ଆଦ୍ ସମୟ୍ତେ ରାଜାନ୍ ନୁ ତାନ୍ ବେଡ଼ିୟେ ନାରୁଡ଼୍ ଗଟ୍ ସେଙ୍ଗେ ରାଣୀଲ୍ ତିନ୍ଦାନ୍ ଲୋତ୍ତାଗାଙ୍କ୍ ୱାତ୍ତେ; ରାଣୀଲ୍ କେତ୍ତେ, ହୋ ରାଜାନଡ଼ି ଚିରଜିବି ଆୟିମ୍; ମିୟାଦ୍ ହେର୍କେ ନିକିଙ୍କ୍ କପାମ୍ ମାଡ଼୍ମା କି, କିଅବା ନିୟାଦ୍ ମକମ୍ ମୁର୍ ମୁରା ଅୟ୍ମା କି। 11 ନି ରାଜ୍ୟତାଗ୍ ୱେରଣ୍ଡ୍ ନାରୁଣ୍ଡ୍ ମିନ୍ଦେଣ୍ଡ୍, ଅନ୍ ହୃଦୟତାଗ୍ ପବିତ୍ର ଦେୟାକିନ୍ ଆତ୍ମା ମିନ୍ଦେ; ମେଣ୍ଡେ ନି ବାବାନ୍ ସମୟ୍ତେ ଦେୟାକିନ୍ ଜ୍ଞାନ୍ ଲେକାମ୍ ଜ୍ଞାନ୍ମିନ୍ଦେ ନୁ ବୁଦ୍ଦି ନୁ ଜ୍ଞାନ୍ ଅନାଗେ ତନ୍ଦିମାତ୍ତେ; ମେଣ୍ଡେ ନି ବାବାଲ୍ ରାଜାଲ୍ ନବୂକଦ୍ନିତ୍ସର, କେ, ନି ବାବାଲ୍ ରାଜା, ଅଙ୍କ୍ ମନ୍ତ୍ରମାଡ଼ାନଡ଼୍, ପାଞ୍ଜିଉଡ଼ାନଡ଼୍, କଲ୍ଦୀୟ ନୁ ପଣ୍ଡିତିଡ଼୍ ପରୁ ବେଡ଼୍ୟଣ୍ଡ୍ ମାଡ଼ି ହେଞ୍ଚିମାତ୍ତଣ୍ଡ୍; 12 ବାତେଙ୍କ୍ଇତ୍କେ ଆ ଦାନିୟେଲ୍ତେ ଅନ୍ତର୍ତେ ବେଡ଼ିୟ୍ ଆତ୍ମା, ଜ୍ଞାନ୍ ନୁ ବୁଦ୍ଦ୍, ସାପ୍ନାତେ ଅର୍ଥ କେତାନଙ୍କ୍ ନୁ ଲୋପେତ୍ ବାକ୍ୟ କେତାନାଦ୍ ନୁ ଡାଉଟ୍ତେ ହେର୍କେ ମାଡ଼ାନାଦ୍ ଶକ୍ତି ତନ୍ଦିମାତ୍ତେ, ରାଜାଲ୍ ଅଙ୍କ୍ ବେଲ୍ଟଶତ୍ସତେ ପେଦେର୍ ଇସ୍ ମାତ୍ତଣ୍ଡ୍। ଇଞ୍ଜେ ଦାନିୟେଲ୍ତିଙ୍କ୍ କାର୍ଙ୍ଗାଟ୍, ଅଣ୍ଡ୍ ଅର୍ଥତେ ଗଟ୍ କେତିତଣ୍ଡ୍।
ଦାନିୟେଲ୍ତେ ଲେକା ଅର୍ଥ କେତାନାଦ୍
13 ଆସୁଙ୍କ୍ ଦାନିୟେଲ୍ତିଙ୍କ୍ ରାଜାନ୍ ମୁନେ ତାତ୍ତଡ଼୍ ରାଜାଲ୍ ଦାନିୟେଲ୍ତିଙ୍କ୍ କେତ୍ତଣ୍ଡ୍, ନା ବାବାଲ୍ ମହାରାଜା ଯିହୁଦା ଦେଶ୍ତାଗାଙ୍କ୍ ବେନଡ଼୍କିଙ୍କ୍ ତାସ୍ମାତ୍ତଣ୍ଡ୍, ଆ ଏଞ୍ଚତେ ଯିହୁଦୀ ନାରୁଡ଼୍ଡ଼ାଗାଙ୍କ୍ ବେନ୍ ଦାନିୟେଲ୍ ମାତ୍ତଣ୍ଡ୍, ଅଣ୍ଡ୍ କି ନିମେ ? 14 ନାନେ ନି ବିଷୟତେ କେଞ୍ଜ୍ତାନ୍ ଯେ, ନି ଅନ୍ତର୍ତେ ଦେୟାକିନ୍ ଆତ୍ମା ମିନ୍ଦେ, ମେଣ୍ଡେ ଜ୍ଞାନ୍ ନୁ ୱେୟିସ୍, ବୁଦ୍ଦି ନୁ ବେଡ଼ିୟ୍ ଜ୍ଞାନ୍ ନିୟାଗେ ତନ୍ଦିତ୍। 15 ଇଞ୍ଜେ ଇଦ୍ ଲେକା କାର୍ତାନଙ୍କ୍ ନୁ ଆଦିନ୍ ଅର୍ଥ ନାକିଙ୍କ୍ କେଞ୍ଜ୍ସ୍ପାନଙ୍କ୍ ବୁଦ୍ଦିମାନିଡ଼୍ ନୁ ପାଞ୍ଜିଉଡ଼ାନଡ଼୍ ନା’ପାକେ ତାତ୍ତଡ଼୍; ମାତର୍ ଅଡ଼୍ ଆଦିନ୍ ଅର୍ଥ କେତାନଙ୍କ୍ ପାର୍ୱଡ଼୍। 16 ମାତର୍ ନି ବିଷୟତେ ନାନେ କେଞ୍ଜ୍ତାନ୍ ଯେ, ନିମେ କେତାନନି ନୁ ଡାଉଟ୍ ଦୂର୍ ମାଡ଼୍ଡ଼େ ପାର୍ତିନ୍; ଇଞ୍ଜେ ନିମେ ଯଦି ଇଦ୍ଲେକା କାର୍ତିତିନ୍ ଇଦିନ୍ ଅର୍ଥ ନାକିଙ୍କ୍ କେତେପାର୍ତିନ୍, ଆଲେକେ ନିମେ ଆପେ ରଙ୍ଗ୍ଦେ ଚକେ କେର୍ଦ୍ତିନ୍, ନି ଗୁଡ଼ୁଙ୍କ୍ତାଗ୍ ୱେରଡ଼୍ ସୁବର୍ଣ୍ଣ ନେଡ଼େମ୍ ଇଦ୍ତଡ଼୍ ନୁ ନିମେ ରାଜ୍ୟତେ ତୃତୀୟ ଶାସନ୍ କର୍ତ୍ତାଲ୍ ଆଦ୍ତିନ୍।
17 ଆସୁଙ୍କ୍ ଦାନିୟେଲ୍ ରାଜାନ୍ ମୁନେ ଉତ୍ତର୍ ଇସ୍ କେତ୍ତଣ୍ଡ୍, ନିୟାଦ୍ ଦାନ ନିକିଙ୍କ୍ ମାନି ନୁ ନିୟାଦ୍ ପୁରସ୍କାର୍ ୱେରେତଡ଼୍କିଙ୍କ୍ ଇମ୍; ଅଗେକ୍ ବା ନାନେ ମହାରାଜାନ୍ ମୁନେ ଇଦ୍ ଲେକା କାର୍ତିତାନ୍ ନୁ ଅର୍ଥ ଅଙ୍କ୍ କେତିତାନ୍।
18 ହୋ ମହାରାଜା, ସାରେତିଙ୍କ୍ ବେଡ଼ିୟେ ପରମେଶ୍ୱର୍ ନି ବାବାଲ୍ ନବୂକଦ୍ନିତ୍ସରଙ୍କ୍ ରାଜ୍ୟ, ମହିମା, ଗୌରବ୍ ନୁ ବପୁ ଇତ୍ତଣ୍ଡ୍; 19 ଅଣ୍ଡ୍ ଅକିଂଙ୍କ୍ ଇଲା ମହିମା ଇନାଙ୍କ୍ ସାରେ ଗୋଷ୍ଠି, ୱେରେ ୱେରେ ଦେଶ୍ତଡ଼୍ ନୁ ଭାଷାବାଦୀ ନାରୁଡ଼୍ ଅନ୍ ମୁନେ ୱାଡ଼୍କି ଆସ୍ ୱେର୍ତଡ଼୍; ବେନଙ୍କ୍ ଅନାଦ୍ ଇଚ୍ଛା, ଅଙ୍କ୍ ଅଣ୍ଡ୍ ଆୱୁକ୍ତଣ୍ଡ୍ ନୁ ବେନଙ୍କ୍ ଅନାଦ୍ ଇଚ୍ଛା, ଅଙ୍କ୍ ଅଣ୍ଡ୍ ଜିୱେ ନେଃତ୍ତଣ୍ଡ୍; ମେଣ୍ଡେ, ବେନଙ୍କ୍ ଅନାଦ୍ ଇଚ୍ଛା, ଅଣ୍ଡ୍ ଅଙ୍କ୍ ଉନ୍ନତ୍ ମାଡ଼୍ତଣ୍ଡ୍ ନୁ ବେନଙ୍କ୍ ଅନାଦ୍ ଇଚ୍ଛା, ଅଙ୍କ୍ ଅଣ୍ଡ୍ ମଦଲ୍ ମାଡ଼ଣ୍ଡ୍। 20 ମାତର୍ ଅନ୍ ହୃଦୟ୍ ଗର୍ବିତ୍ ଆୟେଡ଼୍ ନୁ ଅନ୍ ଆତ୍ମା କଠିନ୍ ଆସ୍ ଅଣ୍ଡ୍ ଅହଙ୍କାର୍ ମୁନେଙ୍କ୍ତେ ବ୍ୟବହାର୍ ମାଡ଼େଣ୍ଡ୍, ଅଣ୍ଡ୍ ତାନ୍ ରାଜସିଂହାସତାଗାଙ୍କ୍ ୱିଡ଼୍ସିତ୍ ତଣ୍ଡ୍ ନୁ ଅନ୍ ଗୌରବ୍ ଅନାଗାଙ୍କ୍ ଆତ୍ତେ, 21 ମେଣ୍ଡେ, ଅଣ୍ଡ୍ ନାରୁଡ଼୍ ପିଲାକିନାଗାଙ୍କ୍ ଯେକା ଆତ୍କେ; ଅନ୍ ଅନ୍ତଃକରଣ ପଶୁତ୍ ଲେକାମ୍ ଆତ୍ତେ ନୁ ମେଟେତ୍ ଗଦ ତଡ଼୍ ତାନାଦ୍ ମାନ୍ଦାନାଦ୍ ବାସେ ଆତ୍ତେ; ଅଣ୍ଡ୍ କନ୍ଦା ଲେକାମ୍ ଗାଡ଼୍ ତିତ୍ତଣ୍ଡ୍ ନୁ ଅନ୍ ମେନ୍ଦୁଲ୍ ମାବ୍ତେ ମାସତେ ଜଡ଼୍ଗ୍ତେ; ପେର୍କେ ଅଣ୍ଡ୍ ପୁତ୍ତଣ୍ଡ୍ ଯେ, ସାରେ ପରମେଶ୍ୱର୍ ନାରୁଡ଼୍କିଙ୍କ୍ ରାଜ୍ୟତାଗ୍ ଶାସନ ମାଡ଼ିତଣ୍ଡ୍ ନୁ ଆଦିନ୍ ପରୁ ବେନଙ୍କ୍ ଅନାଦ୍ ଇଚ୍ଛା, ଅଙ୍କ୍ ଅଣ୍ଡ୍ ହେଞ୍ଚିତଣ୍ଡ୍।
22 ମେଣ୍ଡେ ହୋ ବେଲ୍ଶତ୍ସର, ଅନ୍ ମାର୍ ଯେ ନିମେ, ନିମେ ଇୱୁସାରେ ପୁତ୍କେ ବା ନି ହୃଦୟତାଗ୍ ନମ୍ର ମାଡ଼୍ୱିନ୍; 23 ମାତର୍ ସ୍ୱର୍ଗତେ ଅଦିପତିଡ଼୍ ବିରୁଦ୍ଦ୍ତେ ନିକିଙ୍କ୍ ଉନ୍ନତ୍ ମାଡ଼ିମିନ୍ଦେ ନୁ ତାନ୍ ଲୋତ୍ତେ ବାତ୍ବାତା ଜିନିଷ୍ ନା ମୁନେ ତାତ୍କେ, ନିମେ ନୁ ନି ଅମାତ୍ୟନଡ଼୍, ନି ମୁତେକି ନୁ ନି ଆୱାତ୍ ମୁତେ ଆୱୁସାରେ ଗିନେତାଗ୍ ଅଙ୍ଗୁର୍କାଲ୍ ଉଞ୍ଜ୍ ମିନ୍ଦେ; ମେଣ୍ଡେ ରୂପାତେ, ସୁନାତେ, ପିତ୍ତଲ୍ତେ, ଲୁହାତେ, ୱେର୍କ୍ତେ ନୁ କାଲ୍ଦେ ବେନ୍ ଦେୟାକ୍ ଉଡ଼, କି କେଞ୍ଜ, କି ପୁଃନ, ଆୱିନ୍ ପ୍ରଶଂସା ନିମେ ମାଡ଼୍ତିନ୍; ମେଣ୍ଡେ, ନିୟାଦ୍ ନେସ୍କାନାଦ୍ ବେନନ୍ କାଇଦାଗ୍ ନୁ ନିୟାଦ୍ ସାରେ ଆର୍ ବେନନ୍ ଅଦିନ୍, ନିମେ ଆ ପରମେଶ୍ୱର୍ତେ ଗୌରବ୍ ମାଡ଼୍ୱିନ୍। 24 ଆଦ୍ ସମୟ୍ତେ ଅନାଗାଙ୍କ୍ କାଇଦେ ଅଂଶ ମାଲ୍ସ୍ ଆତ୍ତେ, ମେଣ୍ଡେ ଆଦ୍ ଲେକା ଲେକାଆତ୍ତେ।
25 ମେଣ୍ଡେ, ବାତ୍ତେ ଲେକା ଆତ୍ତେ, ଆଦ୍ ଇଦ୍, ମିନେ , ମିନେ, ତକେଲ, ଉପାରସୀନ। 26 ଇଦିନ୍ ଅର୍ଥ ଇଦ୍ ମିନେ , ପରମେଶ୍ୱର୍ ତାନ୍ ରାଜ୍ୟତେ ଗଣନା ମାଡ଼ିମିନ୍ଦେଣ୍ଡ୍ ନୁ ଆଦ୍ ଶେଷ ମାଡ଼ିମିନ୍ଦେଣ୍ଡ୍। 27 ତକେଲ, ନିମେ କେଜିତେ କଲ୍ସି ମିନ୍ଦେନ୍ ନୁ ସୁକୁକ୍ ତନ୍ଦମିନ୍ଦେ। 28 ପୀରସ୍, ତାନ୍ ରାଜ୍ୟ ୱେରେ ମାଡ଼ିମିନ୍ଦେଣ୍ଡ୍, ମେଣ୍ଡେ ମାଦୀୟ ନୁ ପାରସିକନଡ଼୍କ୍ ନର୍ସ୍ ଆସ୍ମିନ୍ଦେ।
29 ଆସୁଙ୍କ୍ ବେଲ୍ଶତ୍ସର ଆଦେଶ୍ ମାଡ଼୍କେ, ନାରୁଡ଼୍ ଦାନିୟେଲ୍ତିଙ୍କ୍ ଆପେ ରଙ୍ଗ୍ଦେ ଚକେ କେର୍ସ୍ପ୍ତଡ଼୍ ନୁ ତାନ୍ ଗୁଡ଼ୁଙ୍ଗେତାଗ୍ ସୁନାତେ ନେଡ଼େମ୍ ଇତ୍ତଡ଼୍ ନୁ ଅଣ୍ଡ୍ ଯେ ରାଜ୍ୟତେ ତୃତୀୟ ଶାସନ କର୍ତ୍ତାଲ୍ ଆଦ୍ତଣ୍ଡ୍, ଅନ୍ ବିଷୟ୍ତେ ଇଦ୍ ଘୋଷଣା ମାଡ଼୍ତଣ୍ଡ୍। 30 ଆଦ୍ ନାର୍କାତେ କଲ୍ଦୀୟନଡ଼୍ ରାଜା ବେଲ୍ଶତ୍ସରତିଙ୍କ୍ ଆୱୁକାଙ୍ଗ୍ ମାଡ଼୍ତଡ଼୍। 31 ମେଣ୍ଡେ, ମାଦୀୟ ଦାରିୟାବସ ରାଜ୍ୟ ପାହେମ୍ ଆତ୍ତଣ୍ଡ୍, ଆଦ୍ ସମୟତେ ଅନାଦ୍ ପ୍ରାୟ ବାଷଟି ବର୍ଷ ବୟସ୍ ଆସ୍ମାତ୍ତେ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)