ରାଜାନ୍ ନବୂକଦ୍ନିସରତେ ସାପ୍ନା
1 ତାନ୍ପେର୍କେ ନବୂକଦ୍ନିତ୍ସରତେ ଶାସନ୍ କାଲାମ୍ତେ ଦ୍ୱିତୀୟ ୱାଡ଼୍ସେତେ, ନବୂକଦ୍ନିତ୍ସର ସାପ୍ନା ଉଡ଼୍ତଣ୍ଡ୍; ଆସୁଙ୍କ୍ ଅନ୍ ଆତ୍ମା ଦାଦ୍ରେଲ୍ତେ ନୁ ଅନ୍ ଉସ୍କାଡ଼୍ ୱିର୍ତେ। 2 ତାନାପେର୍କେ ରାଜାଙ୍କ୍ ଅନ୍ ସାପ୍ନା କେତ୍ତେ ପେର୍କେ ରାଜାଲ୍ ମନ୍ତ୍ରମାଡ଼ାନଡ଼୍, ପାଞ୍ଜିଉଡ଼ାନଡ଼୍, ମାୟାବୀ ନୁ କଲ୍ଦୀୟନଡ଼୍କ୍ କାର୍ଙ୍ଗାନଙ୍କ୍ ଆଦେଶ୍ ଇତ୍ତଣ୍ଡ୍। ଆସୁଙ୍କ୍ ଅଡ଼୍ ୱାସ୍ ରାଜାନ୍ ମୁନେ ନିତ୍ତଡ଼୍। 3 ମେଣ୍ଡେ, ରାଜାଲ୍ ଅଡ଼୍କିଂଙ୍କ୍ କେତ୍ତଣ୍ଡ୍, ନାନ୍ନେ ୱେରଡ଼୍ ସାପ୍ନା ଉଡ଼୍ତାନ୍, ମେଣ୍ଡେ ଆଦ୍ ସାପ୍ନା ବୁଜେମ୍ ଆଦାନ୍ ସେଙ୍ଗେ ନାୟାଦ୍ ମାନ୍ ଚିନ୍ତେ ଆସମିନ୍ଦେ।
4 ଆସୁଙ୍କ୍ କଲ୍ଦୀୟନଡ଼୍ ଅରାମୀୟ ଗଟ୍ତେ ରାଜାଙ୍କ୍ କେତ୍ତଡ଼୍, ହୋ ମହାରାଜା, ଚିରଜିବି ଆୟିଣ୍ଡ୍; ନି ଦାସନଡ଼୍ ସାପ୍ନାତେ ଗଟି କେଞ୍ଜ୍ସ୍ପା, ମାମେ ଆଦିନ୍ ଅର୍ଥ ପ୍ରକାଶ୍ ମାଡ଼ିତମ୍।
5 ରାଜାଲ୍ କଲ୍ଦୀୟନଡ଼୍କିଙ୍କ୍ ଉତ୍ତର୍ ଇସ୍ କେତ୍ତଣ୍ଡ୍, ନାୟାଗ୍କଞ୍ଜ୍ ଗଟ୍ ପେଇସ୍ ଆଞ୍ଜ୍ମିନ୍ଦେ; ମିଡ଼୍ ଯଦି ଆଦ୍ ସାପ୍ନା ନୁ ଆଦିନ୍ ଅର୍ଥ ନାକିଙ୍କ୍ କେଲକଟ ମାତ୍କେ, ଆଲେକ୍ ମିକିଂଙ୍କ୍ ଦୁଡ଼ା ଦୁଡ଼ା ନାଡ଼୍କେ ୱେଇତିତ୍ ନୁ ମିଇ ଲୋକିଙ୍କ୍ ଲିକିତଡ଼୍। 6 ମାତର୍ ବେସୁଙ୍କ୍ ମିଡ଼୍ ସାପ୍ନା ନୁ ଆଦିନ୍ ଅର୍ଥ କେତିତିଡ଼୍, ଆଲେକେ ମିଡ଼୍ ନାୟାଗ୍କଞ୍ଜ୍ ଦାନ, ପୁରସ୍କାର୍ ନୁ ବାଡ଼୍ୟେ ସମ୍ମାନ୍ ପାହେମ୍ ଆଦ୍ତିଡ଼୍; ଆଦିନ୍ ସେଙ୍ଗେ ଆଦ୍ ସାପ୍ନା ନୁ ଆଦିନ୍ ଅର୍ଥ ନାକିଙ୍କ୍ କେଲ୍ମୁଟ୍।
7 ଅଡ଼୍ ଦ୍ୱିତୀୟ ଦାମ୍ ଉତ୍ତର୍ ଇସ୍ କେତ୍ତଡ଼୍, ମହାରାଜା, ନି ଦାସନଡ଼୍କ୍ ସାପ୍ନାତ୍ ଗଟ୍ କେଲ୍ମ୍, ଆସୁଙ୍କ୍ ମାମେ ଅର୍ଥ କେତିତମ୍।
8 ରାଜାଲ୍ ଉତ୍ତର୍ କେତ୍ତଣ୍ଡ୍, ନାୟାଗ୍କଞ୍ଜ୍ ଗଟ୍ ପେଇସ୍ ଆତ୍ତେ, ଇଦ୍ଉଡ଼ି ମିଡ଼୍ ସମୟ୍ ଡେରି ମାଡ଼ାନଙ୍କ୍ ଇଚ୍ଛା ମାଡ଼ୁତିଡ଼୍, ଇଦ୍ ନାନେ ନିଜାମ୍ ପୁତ୍ତାନ୍। 9 ମାତର୍ ମିଡ଼୍ ଯଦି ଆଦ୍ ସାପ୍ନା ନାକିଙ୍କ୍ କେଲକଟ୍ ମାତ୍କେ; ଆଲେକ୍ ମିଇ ସେଙ୍ଗେ ଅଣ୍ଡୟ୍ ମାତ୍ର ଦଣ୍ଡ ଆଦେଶ୍ ମିନ୍ଦେ; ବାତେଙ୍କ୍ଇତ୍କେ ସମୟ୍ ଆୟ୍ୱାକେ ମିଡ଼୍ ନା’ମୁନେ ମିଚ୍ ନୁ ବୁସା ମାଡ଼ାନ୍ ବାକ୍ୟ କେତାନ୍ ସେଙ୍ଗେ ତିଆର୍ ମାଡ଼ିମିନ୍ଦେଡ଼ି; ଆଦିନ୍ ସେଙ୍ଗେ ମିଡ଼୍ ସାପ୍ନା ନାକିଙ୍କ୍ କେଞ୍ଜ୍ସ୍ପାଟ୍, ଆଲେକେ ମିଡ଼୍ ଯେ ଆଦିନ୍ ଅର୍ଥ ନା’ପାକେ କେତେ ପାର୍ଦିଡ଼୍, ଇଦ୍ ନାନେ ପୁନ୍ଦ୍ତାନ୍।
10 କଲ୍ଦୀୟନଡ଼୍ ରାଜାନ୍ ମୁନେ ଉତ୍ତର୍ କେତ୍ତଡ଼୍, ମାହାରାଜାନ୍ ବିଷୟ ବେନ କେତେ ପାର୍ତନ୍, ପୃତିବିତାଗ୍ ଇଦ୍ଲେକାମ୍ ବେନ୍ ନାରୁଣ୍ଡ୍ ଇଲାଣ୍ଡ୍; ବାତେଙ୍କ୍ଇତ୍କେ ବେନ୍ ରାଜାଲ୍, ପ୍ରବୁ କି ଶାସନ୍କର୍ତ୍ତା ବେନେବା ମନ୍ତ୍ରମାଡ଼ାନଡ଼୍ କିଅବା ପାଞ୍ଜିଉଡ଼ାନଡ଼୍ କି କଲ୍ଦୀୟଙ୍କ୍ ଇଦ୍ରକମ୍ ଗଟ୍ ପଚାର୍ ମାଡ଼ଡ଼୍। 11 ମେଣ୍ଡେ, ମହାରାଜାଲ୍ ବାତେ ଇଚ୍ଛାମାଡ଼ିତଣ୍ଡ୍, ଆଦ୍ ଅସାଦାରଣ ବିଷୟ ନୁ ବେନଡ଼୍ ମାନ୍ଦାନ୍ ଆଉଙ୍ଗ୍ ମେନ୍ଦୁଲ୍ତେ ଆୟଡ଼୍, ଆ ଦେବ୍ଗଣ ବିଷୟତେ ମେଣ୍ଡେ ବେନ ମହାରାଜାନ୍ ମୁନେ ଆଦ୍ କେତେ ପାର୍ୱଣ୍ଡ୍।
12 ଇଦ୍ କାରଣ୍ତିଙ୍କ୍ ରାଜାଲ୍ ନାର୍ଗେ କପାମ୍ ନୁ ମେଣ୍ଡେ ନାର୍ଗେ କପାମ୍ ଆସ୍ ବାବିଲୀୟତେ ସାରେ ଜ୍ଞାନି ନାରୁଡ଼୍ ଆୱୁକାଙ୍ଗ୍ ଆଦେଶ୍ ଇତ୍ତଣ୍ଡ୍। 13 ଆସୁଙ୍କ୍ ଆଦେଶ୍ ପ୍ରଚାର୍ ଆତ୍ତେ ଯେ, ଜ୍ଞାନି ନାରୁଡ଼୍ ଡଲିତଡ଼୍; ମେଣ୍ଡେ, ନାରୁଡ଼୍ ଦାନିୟେଲ୍ ନୁ ତାନ୍ ସାଙ୍ଗନଡ଼୍କ୍ ଆୱୁକାଙ୍ଗ୍ ମେକ୍ତଡ଼୍।
ଦାନିୟେଲ୍ତିଙ୍କ୍ ସାପ୍ନେତେ ଅର୍ଥ କେତାନାଦ୍
14 ଆସୁଙ୍କ୍ ଅରୀୟୋକ୍ ପେଦେର୍ତଣ୍ଡ୍ ବେନ୍ ରାଜସେନାପତି ବାବିଲୀୟ ଜ୍ଞାନି ନଡ଼୍କିଙ୍କ୍ ଆୱୁକାଙ୍ଗ୍ ତିଆର୍ ଆସ୍ମାତ୍ତେ, ଅକିଙ୍କ୍ ଦାନିୟେଲ୍ ଆଲୁସୁଡ଼୍ ତାଗ୍ ନୁ ଜ୍ଞାନ୍ତେ ଉତ୍ତର୍ ଇତ୍ତଣ୍ଡ୍; 15 ଅଣ୍ଡ୍ ରାଜ୍ସେନାପତି ଅରୀୟୋକ୍ତିଙ୍କ୍ ଉତ୍ତର୍ ଇସ୍ କେତ୍ତଣ୍ଡ୍, ରାଜଜ୍ଞା ଇସର୍ ଦାନ୍ଦେ ବାତ୍ତିଙ୍କ୍ ? ଆସୁଙ୍କ୍ ଅରୀୟୋକ୍ ସାରେ ବିଷୟ୍ ଦାନିୟେଲ୍ତିଙ୍କ୍ କେଞ୍ଜ୍ସ୍ପତଡ଼୍।
16 ତାନ୍ପେର୍କେ ଦାନିୟେଲ୍ ରାଜାନ୍ ପାକେ ଆଞ୍ଜ୍ ନିଜେତ୍ ସେଙ୍ଗେ ୱେରଡ଼୍ ସମୟ୍ ତିଆର୍ ମାଡ଼ାନଙ୍କ୍ ପ୍ରାତନା ମାଡ଼୍ତଣ୍ଡ୍, ଆଦ୍ ମାଡ଼୍କେ ମହାରାଜାନ୍ ପାକେ ସାପ୍ନେତେ ଅର୍ଥ କେତିତାନ୍ ଇଞ୍ଜ କେତ୍ତଣ୍ଡ୍। 17 ଆସୁଙ୍କ୍ ଦାନିୟେଲ୍ ତାନ୍ ଲୋନ୍ ଆତ୍ତଣ୍ଡ୍, ମେଣ୍ଡେ ଅଣ୍ଡ୍ ନୁ ତାନ୍ ସାଙ୍ଗନଡ଼୍ ବେଲାନ୍ ବାବିଲ୍ତେ ୱେରେ ୱେରେ ଜ୍ଞାନି ନଡ଼୍କିଙ୍କ୍ ତଡ଼୍ ନଷ୍ଟ ଆୟଡ଼୍, 18 ଆଦିନ୍ ସେଙ୍ଗେ ଇଦ୍ ମାନ୍ଦେ ଲପେତ୍ ବିଷୟତେ ସ୍ୱର୍ଗତାଗ୍ ମାନ୍ଦାନ୍ ପରମେଶ୍ୱର୍ ଅନୁଗ୍ରହ ପ୍ରାତନା ମାଡ଼ାନଙ୍କ୍ ତାନ୍ ସାଙ୍ଗ ହନାନୀୟ, ମୀଶାୟେଲ୍ ନୁ ଅସରୀୟଙ୍କ୍ ଆଦ୍ ସାରେ କେତ୍ତଡ଼୍। 19 ( ଆୟୁବ ୩୩: ୧୫:୧୬ ଗଣନା ୧୨: ୯) ଆଦ୍ଦିନେ ନାର୍କା ଦର୍ଶନତେ ଆଦ୍ ମାନ୍ଦେ ଲପେତ୍ ବିଷୟ୍ ଦାନିୟେଲ୍ତେ ପାକେ କେତ୍ତଡ଼୍। ଆସୁଙ୍କ୍ ଦାନିୟେଲ୍ ସ୍ୱର୍ଗତ୍ ପରମେଶ୍ୱର୍ତିଙ୍କ୍ ଦନ୍ୟବାଦ୍ ମାଡ଼୍ତଣ୍ଡ। 20 ଦାନିୟେଲ୍ ଉତ୍ତର୍ ଇସ୍କେତ୍ତଣ୍ଡ୍, ପରମେଶ୍ୱର୍ତେ ପେଦେର୍ ସାରେଦାମ୍ ଦନ୍ୟ ଆୟି; ବାତେଙ୍କ୍ଇତ୍କେ ଜ୍ଞାନ୍ ନୁ ପରାକ୍ରମ ଅନାଦ୍; 21 ମେଣ୍ଡେ, ଆଦ୍ ସମୟ ନୁ କାଲାମ ପରିବର୍ତ୍ତନ୍ ମାଡ଼ିତଣ୍ଡ୍; ଅଣ୍ଡ୍ ରାଜାଗଣତିଙ୍କ୍ ଆଦ୍ ଜାଗେତାଗାଙ୍କ୍ ଟେଣ୍ଡିଦେ ପାର୍ତଣ୍ଡ୍ ନୁ ରାଜାଗଣତିଙ୍କ୍ ଆଦ୍ ଜାଗେଇଦେ ପାର୍ତଣ୍ଡ୍; ଅଣ୍ଡ୍ ଜ୍ଞାନିଡ଼୍କ୍ ଜ୍ଞାନ୍ ନୁ ବୁଦ୍ଦ୍ମାନ୍ଦାନଡ଼୍ ବିଚାର୍ ଇଦ୍ତଣ୍ଡ୍; 22 ଅଣ୍ଡ୍ କୁଇଙ୍କ୍ ନୁ ମିଞ୍ଜିମାନ୍ଦାନ୍ ବିଷୟସାରେ କେତିତଣ୍ଡ୍; ଇକାଡ଼୍ତେ ବାତେ ମିନ୍ଦେ, ଆଦ୍ଅଣ୍ଡ୍ ପୁନ୍ଦ୍ତଣ୍ଡ୍ ନୁ ଅନ୍ ପାକେ ୱେସ୍ ମାନ୍ନ୍ତେ। 23 ହୋ ନା ଆନିଦାଦିଡ଼୍ତେ ପରମେଶ୍ୱର୍, ନାନେ ନୀଇ ଦନ୍ୟବାଦ୍ ନୁ ପ୍ରଶଂସା ମାଡ଼ୁତାନ୍, ନିମେ ନାକିଙ୍କ୍ ଜ୍ଞାନ୍ ନୁ ଶକ୍ତି ଇସ୍ମିନ୍ଦେନି ନୁ ନୀଇ ପାକେ ମାୟାଦ୍ ନିବେଦନ୍ତେ ବିଷୟ୍ ଇଞ୍ଜେ ନାକିଙ୍କ୍ କେଞ୍ଜ୍ସ୍ପି ମିନ୍ଦେନି; ବାତେଙ୍କ୍ଇତ୍କେ ନିମେ ରାଜାନ୍ ଗଟ୍ ମାକିଙ୍କ୍ କେଞ୍ଜ୍ସ୍ପିତିନ୍।
ଦାନିୟେଲ୍ ରାଜାଙ୍କ୍ ସାପ୍ନେତ୍ ଅର୍ଥ କେତାନାଦ୍
24 ଆଦିଙ୍କ୍ ବାବିଲିୟ ଜ୍ଞାନି ନାରୁଡ଼୍ ଦଂସ ମାଡ଼ାନଙ୍କ୍ ରାଜାଙ୍କ୍ ହେଞ୍ଚ୍ତେ ଅରୀୟୋକ୍ ପାକେ ଦାନିୟେଲ୍ ଆତ୍ତଣ୍ଡ୍; "ଅଣ୍ଡ୍ ଆଞ୍ଜ୍ ଅଙ୍କ୍ ଇଦ୍ଲେକାମ୍ କେତ୍ତଣ୍ଡ୍, ବାବିଲିୟ ବିଦ୍ୱାନ୍ନଡ଼୍କ୍ ଆୱୁକ୍ମା କି; ରାଜାନ୍ ମୁନେ ନାକିଙ୍କ୍ ଅୟିଡ଼୍, ନାନେ ରାଜାନ୍ ପାକେ ଅର୍ଥ କେତିତାନ୍।"
25 ଆସୁଙ୍କ୍ ଅରୀୟୋକ୍ ଦାନିୟେଲତିଙ୍କ୍ ଯାପେ ରାଜାନ୍ ମୁନେ ଅସ୍ ରାଜାନ୍ ଇଦ୍ଲେକାମ୍ କେତ୍ତଣ୍ଡ୍, ଏଞ୍ଚ୍ତେ ଯିହୁଦାନ୍ ପିଲାକିନାଗ୍ ନାନେ ୱେରଣ୍ଡ୍ ନାରୁଙ୍କ୍ ଦର୍ସ୍କିମିନ୍ଦେନ୍, ଅଣ୍ଡ୍ ମହାରାଜାଙ୍କ୍ ଅର୍ଥ କେଞ୍ଜ୍ସ୍ପିତଣ୍ଡ୍।
26 ରାଜା ଆ ଦାନିୟେଲ୍, ବେନନ୍ ପେଦେର୍ ବେଲ୍ଟଶତ୍ସତାଗ୍ ମାତ୍ତଣ୍ଡ୍, ଅଙ୍କ୍ ଉତ୍ତର୍ ମାଡ଼ି କେତ୍ତଣ୍ଡ୍, ନାନେ ବେନ୍ ସାପ୍ନେ ଉଡ଼୍ତାନ୍, ନିମେ କି ଆଦ୍ ନୁ ଇଦିନ୍ ଅର୍ଥ ନାକିଙ୍କ୍ କେତେପାର୍ତିନ୍ ?
27 ଦାନିୟେଲ୍ ରାଜାନ୍ ମୁନେ ଉତ୍ତର୍ ଇସ୍ କେତ୍ତଣ୍ଡ୍, ମହାରାଜାଲ୍ ବେନ୍ ଲପେତ୍ ଗଟ୍ ପଚାର୍ ମାଡ଼ିମିନ୍ଦେନି, ଆଦ୍ ଜ୍ଞାନି ନାରୁଣ୍ଡ୍ କି ପାଞ୍ଜିଉଡ଼ାନଡ଼୍ କି ମନ୍ତ୍ରମାଡ଼ାନଡ଼୍ କି ପଣ୍ଡିତ୍ନଡ଼୍ ମହାରାଜାନ୍ ମୁନେ କେତେ ପାର୍ୱଡ଼୍; 28 ମାତର୍ ବେନ୍ ଲପେତ୍ ବିଷୟ୍କି କେତିତଡ଼୍, ଇଦ୍ଲେକାମ୍ ୱେରଡ଼୍ ପରମେଶ୍ୱର୍ ସ୍ୱର୍ଗତାଗ୍ ମିନ୍ଦେଣ୍ଡ୍, ମେଣ୍ଡେ ତେରାନ୍ କାଲାମ୍ତେ ବାତେ ବାତେ ଗଟେମ୍ ଆଦ୍ତେ, ଆଦ୍ ଅଣ୍ଡ୍ ମହାରାଜାଲ୍ ନବୂକଦ୍ନିତ୍ସରଙ୍କ୍ କେଞ୍ଜ୍ସ୍ପି ମିନ୍ଦେଣ୍ଡ୍। ନିମେ ପାଟ୍ତେ ପଡ଼୍ୟିତାଗ୍ ଉଡ଼୍ତାଦ୍ ସାପ୍ନେ ନୁ ଅର୍ଥ ଇଦ୍;
29 ହୋ ମହାରାଜା,ପାଟାନ୍ ପରୁ ନିୟାଦ୍ ମାନ୍ତେ ବବିଷ୍ୟଦ୍ ଗଟ୍ଣା ବିଷୟ୍କି ଚିନ୍ତା ଆତ୍ତେ; ମେଣ୍ଡେ ବେନ୍ ଲପେତ୍ ବିଷୟ୍କି କେତିତଡ଼୍, ଅଣ୍ଡ୍ ବାତେ ଗଟେମ୍ ଆଦ୍ତେ, ଆଦ୍ ନି ପାକେ କେସ୍ମିନ୍ଦେଣ୍ଡ୍। 30 ମାତର୍ ବେନେଆୟି ଜିୱେ ନାରୁଣ୍ଡ୍ ଜ୍ଞାନ୍ ଅପେକ୍ଷା ନାୟାଦ୍ ଜ୍ଞାନ୍ ଅଦିକ୍ ମିନ୍ଦେ ଇଞ୍ଜ ବେନ ଇଦ୍ ଲପେତ୍ ବିଷୟ କେସ୍ ଆସ୍ମିନ୍ଦେ, ଆଦ୍ ଆୟ, ମାତର୍ ମହାରାଜାଙ୍କ୍ ବେଲାନ୍ ଅର୍ଥ କେତାଙ୍କ୍ ଆଦ୍ତେ ନୁ ନିମେ ବେଲାନ୍ ନିଜେତ୍ ମାନ୍ତେ ଚିନ୍ତେ ପୁନ୍ତିନ୍, ଆଦିନ୍ ସେଙ୍ଗେ ଆଦ୍ ନା ପର କେସ୍ମିନ୍ଦେଡ଼୍।
ସାପ୍ନେତେ ଅର୍ଥ
31 ହୋ ମହାରାଜା, ନିମେ ଉଡ଼ ଉଡ଼ ୱେରଡ଼୍ ବାଡ଼୍ୟିଆଦ୍ ମୁର୍ତ୍ତି ଉଡ଼୍ତିନ୍, ଆଦ୍ ନାର୍ଗେ ଶକ୍ତିଶାଲୀ ନୁ ଗାଟି ନାର୍ଗେୱେସ୍ ଆଦ୍ ମୁର୍ତ୍ତି ନି ମୁନେ ନିତ୍ତେ ନୁ ଆଦ୍ ତନ୍ଦାନଙ୍କ୍ ବୟଙ୍କର୍ ମାତ୍ତେ। 32 ଆଦ୍ ମୁର୍ତ୍ତିତେ ତାଲେ ୱେଡ଼୍ତେ ସୁବର୍ଣ୍ଣମୟ, ତାନ୍ ଡ଼ାଣ୍ଡେ ନୁ ବପୁ ରୁପାଲେକାମ୍, ତାନ୍ ଉଦର ନୁ କୃକ୍ ପିତ୍ତଲ୍ ଲେକାମ୍ ମାତ୍ତେ, 33 ତାନ୍ ଡ଼େକା ଲୁହାଲେକାମ୍ ନୁ ତାନ୍ ପାଦାକ୍ ବେସ୍କ୍ ଦୁଡ଼ା ଲୁହାଲେକାମ୍, ସୁଦୁର୍ ମୁର୍ତ୍ତିଲେକାମ୍ ମାତ୍ତେ। 34 ନିମେ ଉଡ଼ୱାନ୍କେ କାଇ ୱିଡ଼୍ସି ତିଆର୍ ଆତ୍ତେ ୱେରଡ଼୍ କାଲ୍ ଆ ମୁର୍ତ୍ତିମାତେ ଲୁହା ନୁ ମୃର୍ତ୍ତିଲେକାମ୍ ମାନ୍ଦାନାଦିଙ୍କ୍ ଡେକେତଡ଼୍ ୱିକି ଆଦିଙ୍କ୍ ଦୁଡ଼ାଦୁଡ଼ା ମାଡ଼ି ଉଃସିତ୍ତେ। 35 ଆସୁଙ୍କ୍ ଲୁହା, ମୁର୍ତ୍ତି, ପିତ୍ତଲ୍ ରୂପା ନୁ ସୁନା ଅଣ୍ଡୟ୍ଦାମ୍ ଦୁଡ଼ାଦୁଡ଼ା ଆସ୍ ଉର୍ଙ୍ଗ୍ତେ, ମେଣ୍ଡେ ହେଦ୍କାଲାମ୍ତେ ୱାସ୍ତେ ଗାଡ଼୍ ଲେକାମ୍ ଆତ୍ତେ; ମେଣ୍ଡେ, ଗାଲ୍ ଆୱୁସାରେ ତୁହୁସ୍ ଅତ୍ତେ ନୁ ଆୱିଙ୍କ୍ ମେଣ୍ଡେ ପଡ଼ିୟେ ଦର୍କଆତ୍ତେ; ମେଣ୍ଡେ, ଆଦ୍ ମୃର୍ତ୍ତିତିଙ୍କ୍ ଆଗାତ୍ ମାଡ଼୍ତେ ବେନ୍ କାଲ୍, ଆଦିନ୍ ଲେକାମ୍ ୱେରଡ଼୍ ବେଡ଼ିୟାଦ୍ ମେଟେ ଆତ୍ତେ, ଆଉ ସାରେ ପୃତିବିତାଗ୍ ନିଣ୍ଡିଆତ୍ତା। 36 ସାପ୍ନେ ଆତ୍ତେ ଇଦ୍; ଇଞ୍ଜେ ମାନାଡ଼୍ ମହାରାଜାନ୍ ମୁନେ ଇଦିନ୍ ଅର୍ଥ କେଞ୍ଜିସ୍ପିତମ୍। 37 ହୋ ମହାରାଜା, ନିମେ ରାଜାନ୍ଲଡ଼୍ ରାଜାନି; ସ୍ୱର୍ଗତେ ପରମେଶ୍ୱର୍ ନିକିଙ୍କ୍ ରାଜ୍ୟ, ପରାକ୍ରମ, କ୍ଷମତା ନୁ ମହିମା ଇସ୍ମିନ୍ଦେଣ୍ଡ୍। 38 ମେଣ୍ଡେ, ବେନେଆୟି ପଡ଼ିୟେତାଗ୍ ନାରୁଣ୍ଡ୍ ପିଲାକି ବାସେ ମାଡ଼ିତଡ଼୍, ଆୱୁ ପଡ଼ିୟାନାଗ୍ ନେଲ୍ ମେୟାନ୍ ପଶୁକି ନୁ ମାବ୍ତାଗ୍ ଉଡାନ୍ ପିଟେକିଙ୍କ୍ ଅଣ୍ଡ୍ ନିଜେତ୍ କାଇଦେ ସର୍ପା ମାଡ଼ିମିନ୍ଦେଣ୍ଡ୍ ନୁ ଆୱୁ ସାରେତାୱିନ୍ ପରୁ ନିଜେତିଙ୍କ୍ ଅଦିକାର୍ ଇସ୍ମିନ୍ଦେଣ୍ଡ୍; ନିମେ କେ ଆ ସାୟେତ୍ମୟତେ ତାଲେତନି। 39 ମେଣ୍ଡେ, ନି ପାକେ ନିୟାଗାଙ୍କ୍ ପୁଃନେ ମେଣ୍ଡେ ୱେରଡ଼୍ ରାଜ୍ୟ ତେଦିତେ ନୁ ତାନ୍ପେର୍କେ ପିତ୍ତଲ୍ମୟ ତୃତୀୟ ମେଣ୍ଡେ ରାଜ୍ୟ ତେଦିତେ, ଆୱିନ୍ ସାରେତାୱୁ ପୃତିବି ପରୁ ଶାସନ ମାଡ଼ିତେ। 40 ମେଣ୍ଡେ, ଚତୁର୍ଥ ରାଜାଲ୍ ଲୁହାଲେକାମ୍ ଢ଼ାଟୁମ୍ ଆଦ୍ତେ; ବାତେଙ୍କ୍ଇତ୍କେ ଲୁହା ବେଲାନ୍ ସାରେ ଜିନିଷ୍କିଙ୍କ୍ ଦୁଡ଼ାଦୁଡ଼ା ମାଡ଼ିତେ ନୁ ଲୁହା ବେଲାନ୍ ଇୱୁ ସାରେତାୱିଙ୍କ୍ ଗୁଣ୍ଡାଲ୍ ମାଡ଼ିତେ, ଆଦ୍ଲେକାମ୍ ଇଦ୍ ରାଜ୍ୟ ଦୁଡ଼ାଦୁଡ଼ା ମାଡ଼ି ଉଃସ୍ ସାରେ ଗୁଣ୍ଡାଲ୍ ମାଡ଼ିତେ। 41 ମେଣ୍ଡେ, ନିମେ ବେଲାନ୍ ଉଡ଼୍ତିନ୍ ଯେ, ପାଦାତ୍ ୱାଡ଼୍ଞ୍ଚ୍କ୍ ବେସ୍ କୁମାନ୍ ମୁର୍ତ୍ତିତ୍ ଲେକାମ୍ ନୁ ବେସ୍ ଲୁହାଲେକାମ୍ ମାତ୍ତା, ଆଦ୍ ଲେକାମ୍ ଆଦ୍ରାଜ୍ୟ ୱେରେ ରାଜ୍ୟ ଆଦ୍ତେ; ମାତର୍ ଆଗେ ଲୁହାତେ ଢ଼ାଟୁମ୍ ମାନ୍ତେ, ବାତେଙ୍କ୍ଇତ୍କେ ବୁର୍ଦେ ଲୁହା କାଇଲି ମାନ୍ଦାନାଦ୍ ନିମେ ଉଡ଼ିତିଡ଼୍। 42 ପାଦାତ୍ ୱାଡ଼୍ଞ୍ଚ୍କ୍ ସାରେ ବେଲାନ୍ ବେସ୍କ୍ ଲୁହାଲେକାମ୍ ନୁ ସୁଦୁର୍ ମୃର୍ତ୍ତିଲେକାମ୍ ମାତ୍ତେ, ଆଦ୍ଲେକାମ୍ ରାଜ୍ୟତେ ଅଣ୍ଡୟ୍ ଦୁଡ଼େ ଢ଼ାଟୁମ୍ ନୁ ଅଣ୍ଡୟ୍ ଦୁଡ଼େ ଦୁର୍ବଳ ଆଦ୍ତେ। 43 ନିମେ ବେଲାନ୍ ବୁର୍ଦେ ସାଙ୍ଗେତେ ଲୁହା କାହିଲି ମାନ୍ଦାନ୍ ଉଡ଼୍କେ, ଆଦ୍ଲେକାମ୍ ଅଡ଼୍ ନାରୁଡ଼୍ ପିଲୁଡ଼୍ ସାଙ୍ଗେ ଜାମେ କାୟିଲିତେ; ମାତର୍ ଲୁହା ବେଲାନ୍ ମୃର୍ତ୍ତିତାଗେ କାୟିଲ, ଆଦ୍ଲେକାମ୍ ଅଡ଼୍ ନିଜେନିଜେ କାଇଲି ଆସ୍ ମାନଡ଼୍। 44 ମେଣ୍ଡେ, ଆଦ୍ ରାଜ୍ୟତେ ନାରୁଡ଼୍ ସମୟତେ ସ୍ୱର୍ଗତେ ପରମେଶ୍ୱର୍ ୱେରଡ଼୍ ରାଜ୍ୟ ତିଆର୍ ମାଡ଼ିତଣ୍ଡ୍, ଆଦ୍ ବେସୁଙ୍କ୍ ବା ନଷ୍ଟ ଆୟ, ଇଦିନ୍ ବାଡ଼ିୟଡ଼୍ ୱେରେ ଗୋଷ୍ଟିତେ କାଇତେ ୱିଡ଼୍ସି ଆନ୍ୱାଡ଼୍; ମାତର୍ ଆଦ୍ ଇୱୁସାରେ ରାଜ୍ୟକିଙ୍କ୍ ଦୁଡ଼ାଦୁଡ଼ା ନୁ ନଷ୍ଟମାଡ଼ି ଜାମେ ସାରେଦିନାତାଦ୍ ଆଦ୍ତେ। (ପ୍ରକାଶିତ ୧୧: ୧୫ ) 45 ବାତେଙ୍କ୍ଇତ୍କେ ମେଟେତାଗାଙ୍କ୍ କାଇଦେ ମାଡ଼୍ୱେ ମାନ୍ଦାନ୍ ୱେରଡ଼୍ କାଲ୍ ଯେ ଲୁହା, ପିତ୍ତଲ୍, ମୁର୍ତ୍ତି, ରୁପା ନୁ ସୁନାତିଙ୍କ୍ ଗୁଣ୍ଡାଲ୍ ମାଡ଼୍ତେ, ଇଦ୍ ନିମେ ଉଡ଼୍ତିନ୍; ବେନ୍ ଆଦିନ୍ତଡ଼୍ ଗଟେମ୍ ଆଦ୍ତେ, ଆଦ୍ ମହାନ୍ ପରମେଶ୍ୱର୍ ମହାରାଜାଙ୍କ୍ ପୁଞ୍ଜପି ମିନ୍ଦେଡ଼୍; ମେଣ୍ଡେ, ଇଦ୍ ସାପ୍ନେ ନିଜାମ୍ ନୁ ଆଦିନ୍ ଅର୍ତ ସତ୍ୟ।
ଦାନିୟେଲତିଙ୍କ୍ ରାଜାଲ୍ ପୁରସ୍କାର ଇତ୍ତଡ଼୍
46 ଆସୁଙ୍କ୍ ରାଜାଲ୍ ନବୂକଦ୍ନିତ୍ସର୍ କାପ୍ମୁଡ଼ୁନ୍ଦି ରାଲି ଦାନିୟେଲ୍ତିଙ୍କ୍ ପ୍ରଣାମ୍ ମାଡ଼୍ତଣ୍ଡ୍ ନୁ ନାରୁଡ଼୍ ବେଲାନ୍ ଅନ୍ ଉଦ୍ଦେଶ୍ୟତେ ନିଇ ନୁ ଗାବ୍ ମାନ୍ଦାନ୍ ଦୂପାମ୍ ଇଦ୍ତଡ଼୍, ଇଦ୍ ଆଦେଶ୍ ମାଡ଼୍ତଣ୍ଡ। 47 ରାଜାଲ୍ ଦାନିୟେଲ୍ତିଙ୍କ୍ ଉତ୍ତର୍ ଇସ୍ କେତ୍ତଣ୍ଡ୍, ନିମେ କେ ଲପେତ୍ ଗଟ୍ କେତାନଙ୍କ୍ ତିଆର୍ ଆତ୍ତିନ୍, ଆଦିନ୍ ସେଙ୍ଗେ ନିଜାମ୍ ମିଇ ପରମେଶ୍ୱର୍ତେ ଇଶ୍ୱର୍ନଡ଼୍ ଇଶ୍ୱର୍ ନୁ ରାଜାନଡ଼୍ ପ୍ରବୁ ନୁ ଲପେତ୍ ବିଷୟକି କେତାନଣ୍ଡ୍ ଆଦ୍ତଣ୍ଡ୍। 48 ଆସୁଙ୍କ୍ ରାଜା ଦାନିୟେଲ୍ତିଙ୍କ୍ ମହାନ୍ ମାଡ଼ି ନାର୍ଗେ ନାର୍ଗେ ଦାମିନାୱୁ ଉପହାର୍ ଇତ୍ତଣ୍ଡ୍, ମେଣ୍ଡେ ବାବିଲ୍ତେ ସାରେ ପ୍ରଦେଶ୍କିନ୍ ପରୁ ଶାସନ ପଦ ଇସ୍ ବାବିଲସ୍ଥ ସାରେ ବୁଦ୍ ମାନ୍ଦାନ୍ ନାରୁଡ଼୍ ପରୁ ଅଙ୍କ୍ ଇସ୍ ବାଡ଼ିୟଣ୍ଡ ମାଡ଼୍ତଣ୍ଡ୍। 49 ମେଣ୍ଡେ, ଦାନିୟେଲ୍ ରାଜାନ୍ ପାକେ ନିବେଦନ୍ ମାଡ଼୍ ୱାନାକେ, ରାଜା ଶଦ୍ରକ୍, ମୈଶକ୍ ନୁ ଅବେଦ୍ନଗୋଙ୍କ୍ ବାବିଲ୍ ପ୍ରଦେଶ୍ତେ କାମ୍ତାଗ୍ ଏଞ୍ଚତଣ୍ଡ୍; ମାତ୍ର ଦାନିୟେଲ୍ ରାଜଦ୍ୱାର୍ତାଗ୍ ମାତ୍ତଣ୍ଡ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)