1 ରାଜା ନବୂକଦ୍‌ନିତ୍ସର୍‌ ଷାଠିଏ କାଇ ଡେଙ୍ଗ୍‌ ନୁ ଚଅ କାଇ ଗାଲ୍‌ ୱେରଡ଼୍‌ ଲେକେତ୍‌ ସମୟ ତିଆର୍‌ ମାଡ଼୍‌ତଣ୍ଡ୍‌; ବାବିଲ୍‌ ପ୍ରଦେଶ୍‌ତେ ଦୂରା ପେଦେର୍‌ତେ ପଦାତାଗ୍‌ ଅଣ୍ଡ୍‌ ଆଦ୍‌ ତିଆର୍‌ ମାଡ଼୍‌ତଣ୍ଡ୍‌। 2 ଆସୁଙ୍କ୍‌ ରାଜା ନବୂକଦ୍‌ନିତ୍ସର୍‌ ଆଦ୍‌ ବେନ୍‌ ମନ୍ଦିର୍‌ ତିଆର୍‌ ମାଡ଼ିମାତ୍‌ତଣ୍ଡ୍‌, ଆଦିନ୍‌ ତିଆର୍‌ ମାଡ଼ାନଙ୍କ୍‌ ୱାଦାନ୍‌ ସେଙ୍ଗେ ରାଜ୍ୟଚାଲା ମାଡ଼ାନଡ଼୍‌, ଅଞ୍ଚଳତିଙ୍କ୍‌ ଶାସନ୍‌ ମାଡ଼ାନ୍‌ ନାରୁଡ଼୍‌ ନୁ ଦେଶତିଙ୍କ୍‌ ଚାଲା ମାଡ଼ାନଡ଼୍‌, ବିଚାର୍‌ ମାଡ଼ାନଡ଼କ୍, ଡ଼ାବ୍‌ନେତାନଡ଼୍‌, ନିୟମ ତିଆର୍‌ ମାଡ଼ାନ୍‌ ନାରୁଡ଼୍‌ , ସର୍‌ର୍ପାମାଡ଼ିଦାନଡ଼୍‌ ନୁ ପ୍ରଦେଶୀୟ ସାରେ ଶାସନକର୍ତ୍ତାନଡ଼୍‌ ଅଣ୍ଡୟ୍‌ତାଗ୍‌ ମାଡ଼ାନ୍‌ ସେଙ୍ଗେ ରାଜାଲ୍‌ ନବୂକଦ୍‌ନିତ୍ସର ନାରୁଡ଼୍‌ ପାକେ ରତ୍‌ତଣ୍ଡ୍‌। 3 ଆଗେ , ରାଜ୍ୟଚାଲା ମାଡ଼ାନଡ଼୍‌ ନଡ଼୍‌କିଙ୍କ୍‌ ରାଜାନ୍‌ ରାଜାନ୍‌ ନାରୁଡ଼୍‌ ନୁ ଦେଶତିଙ୍କ୍‌ ଚାଲା ମାଡ଼ାନଡ଼୍‌, ବିଚାର୍‌ ମାଡ଼ାନଡ଼କ୍, ଡ଼ାବ୍‌ନେତାନଡ଼୍‌, ନିୟମ ତିଆର୍‌ ମାଡ଼ାନ୍‌ ନାରୁଡ଼୍‌ , ସର୍‌ର୍ପାମାଡ଼ିଦାନଡ଼୍‌ ନୁ ପ୍ରଦେଶୀୟ ସାରେ ଶାସନକର୍ତ୍ତାନଡ଼୍‌, ରାଜାଲ୍‌ ନବୂକଦ୍‌ନିତ୍ସରତେ ତିଆର୍‌ତେ ମୃର୍ତ୍ତିତିଙ୍କ୍‌ ତିଆର୍‌ ମାଡ଼ାନଙ୍କ୍‌ ଅଣ୍ଡୟତାଗ୍‌ ଆତ୍‌ତଡ଼୍‌, ମେଣ୍ଡେ ଅଡ଼୍‌ ନବୂକଦ୍‌ନିତ୍ସରତେ ତିଆର୍‌ ଆତ୍ତେ ମୁର୍ତ୍ତିତେ ମୁନେ ନିତ୍‌ତଡ଼୍‌। 4 ତାନ୍‌ପେର୍କେ ଚାଲାନି ଗାଟିଲେଙ୍ଗ୍‌ତେ କେତ୍‌ତଣ୍ଡ୍‌, ହୋ ନାରୁଡ଼୍‌ମାନ୍ଦେ, ଗୋଷ୍ଠିବର୍ଗ ନୁ ୱେରେ ୱେରେ ଗଟିନଡ଼ି, ମିକିଙ୍କ୍‌ ଇଦ୍‌ ଆଦେଶ୍‌ ଇସ ମିନ୍ଦେଣ୍ଡ୍‌, 5 ବେନ୍‌ ସମୟତେ ମିଡ଼୍‌ ଆକୁମ୍, ଅଷଡ଼୍‌, ଡ଼ୁମିର୍‌, ଚତୁସ୍ତନ୍ତ୍ରୀ ନୁ ନେବଲ୍‌ ଡଲ୍‌ଲେ ନୁ ସାରେ ପ୍ରକାର୍‌ ଲେଙ୍ଗ୍‌ କେଞ୍ଜିତିଡ଼୍‌, ଆସୁଙ୍କ୍‌ ମିଡ଼୍‌ ରାଜାଲ୍‌ ନବୂକଦ୍‌ନିତ୍ସରତେ ତିଆର୍‌ ଆତ୍‌ତେ ସୁବର୍ଣ୍ଣ ମୁର୍ତ୍ତିତେ ମୁନେ ଆଡ଼୍‌କି ଆସ୍‌ ମଡ଼୍‌କିତିଡ଼୍। 6 ମେଣ୍ଡେ, ବେନେଲେକାତ୍‌ ନାରୁଣ୍ଡ୍‌ କାପ୍‌ ମୁଡ଼ୁନ୍ଦି ମଡ଼୍‌କଡ଼୍‌ , ଅଣ୍ଡ୍‌ ଆଦ୍‌ ଦଣ୍ଡତାଗ୍‌ ନିଡ଼୍‌ତାନ୍‌ କିସ୍‌ଗୁଇନ୍ଦେତାଗ୍‌ ହେସିତଡ଼୍‌। 7 ମେଣ୍ଡେ ବେସୁଙ୍କ୍‌ ସାରେ ନାରୁଡ଼୍‌ କଃକ୍‌, ଅଷଡ଼୍‌, ବୀଣା, ଚତୁସ୍ତନ୍ତ୍ରୀ, ନେବଲ୍‌ ନୁ ସାରେଲେକାତ୍‌ ଲେଙ୍ଗ୍‌ କେଞ୍ଜ୍‌ତଣ୍ଡ୍‌, ଆସୁଙ୍କ୍‌ ସାରେ ନାରୁଡ଼୍‌, ଗୋଷ୍ଟିୟ ନାରୁଡ଼୍‌ ନୁ ବାଷାବାଦିନଡ଼୍‌ ରାଜା ନବୂକଦ୍‌ନିତ୍ସରତେ ତିଆର୍‌ ଆତ୍ତେ ମୁର୍ତ୍ତିତିଙ୍କ୍‌ କାପ୍‌ମୁଡ଼ୁନ୍ଦି ମଡ଼୍‌କଣ୍ଡ୍‌।

8 ଆଦିନ୍‌ ସେଙ୍ଗେ ଆଦ୍‌ ସମୟତେ ବେସ୍‌ତୁଡ଼୍‌ କଲ୍‌ଦୀୟ ନାରୁଡ଼୍‌ ଗାରେ ୱାସ୍‌ ଯିହୁଦିୟ ନାରୁଡ଼୍‌ ବିରୁଦ୍ଦ୍‌ତେ ନିନ୍ଦା କାବୁର୍ ତାତ୍‌ତଡ଼୍‌। 9 ଅଡ଼୍‌ ନବୂକଦ୍‌ନିତ୍ସର୍‌ ରାଜାଙ୍କ୍‌ ଉତ୍ତର୍‌ ଇସ୍‌ କେତ୍‌ତଡ଼୍‌, ହୋ ମହାରାଜା, ଚିରଜିବି ଆୟିଣ୍ଡ୍‌। 10 ହୋ ମହାରାଜା, ନିମେ ଆଦେଶ୍‌ କେସ୍‌ମିନ୍ଦେନି ଯେ , ବେନେଆୟି ଆକୁମ୍‌, ଅଷଡ଼୍‌, ବୀଣା, ଚତୁସ୍ତନ୍ତ୍ରୀ, ନେବଲ୍‌, ମୃଦଙ୍ଗ ନୁ ସାରେ ଲେକେତ୍‌ ଲେଙ୍ଗ୍‌ କେଞ୍ଜିତିଡ଼୍‌, ଅଣ୍ଡ୍‌ କାପ୍‌ମୁଡ଼ୁନ୍ଦି ଆସ୍‌ ସୁନାତେ ମୁର୍ତ୍ତିତିଙ୍କ୍ ମଡ଼୍‌କିତିଡ଼୍‌; 11 ମେଣ୍ଡେ, ବେନଆୟି ନାରୁଣ୍ଡ୍‌ କାପ୍‌ମୁଡ଼୍‌ନ୍ଦି ଆସ୍‌ ମଡ଼୍‌କଣ୍ଡ୍‌ ଅଙ୍କ୍‌ ନିଡ଼୍‌ତାନ୍‌ କିସ୍‌ ଗୁଇନ୍ଦେତାଗ୍‌ ହେସିତଡ଼୍‌; 12 ଇଗେ ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋ ପେଦେର୍‌ତଡ଼୍‌ ବେସ୍‌ତଡ଼୍‌ ଯିହୁଦି ନାରୁଡ଼୍‌ ମିନ୍ଦେଡ଼୍‌, ଅଡ଼୍‌କିଂଙ୍କ୍‌ ତାନ୍‌ ବାବିଲ୍‌ ପ୍ରଦେଶ୍‌ତେ ରାଜକାମ୍‌ତାଗ୍‌ ଏଞ୍ଚି ମିନ୍ଦେଡ଼୍‌; ହୋ ମହାରାଜା, ଆ ନାରୁଡ଼୍‌ ନିକିଙ୍କ୍‌ ମାନେମ୍‌ ଆୟଡ଼୍‌; ଅଡ଼୍‌ ନିଇ ଦେୟାକିନ୍‌ ସେବା ମାଡ଼ଡ଼୍‌ କି ନିୟାଦ୍‌ ତିଆର୍‌ ଆତ୍‌ତେ ସୁନାତେ ମୁର୍ତ୍ତିତିଙ୍କ୍‌ ମଡ଼୍‌କଡ଼୍‌।

13 ଆସୁଙ୍କ୍‌ ନବୂକଦ୍‌ନିତ୍ସର ଗାଟି କପାମ୍‌ ନୁ କପାତେ ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋଙ୍କ୍‌ ତାତାନଙ୍କ୍‌ ଆଦେଶ୍‌ ମାଡ଼୍‌ତଣ୍ଡ୍‌। ଆସୁଙ୍କ୍‌ ନାରୁଡ଼୍‌ ଅଡ଼୍‌କିଂଙ୍କ୍‌ ରାଜାନ୍‌ ମୁନେ ତାତ୍‌ତଡ଼୍‌। 14 ନବୂକଦ୍‌ନିତ୍ସର ଅଡ଼୍‌କିଂଙ୍କ୍‌ ଉତ୍ତର୍‌ ମାଡ଼ି କେତ୍‌ତଣ୍ଡ୍‌, ହୋ ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋ, ମିଡ଼୍‌ ବାତ୍‌ ମାନ୍‌ ଆସ୍‌ ନା ଦେୟାକିନ୍‌ ସେବା ମାଡ଼ଣ୍ଡ୍‌,ବା ନାୟାଦ୍‌ ତିଆର୍‌ ଆତ୍‌ତେ ସୁନାତେ ମୁର୍ତ୍ତିତିଙ୍କ୍‌ ମଡ଼୍‌କ୍‌ୱିଡ଼୍‌? 15 ଇଞ୍ଜେ ଆକୁମ୍‌, ଅଷଡ଼୍‌, ବୀଣା, ଚତୁସ୍ତନ୍ତ୍ରୀ, ନେବଲ୍‌, ମୃଦଙ୍ଗ ନୁ ସାରେ ପ୍ରକାର୍‌ ଲେଙ୍ଗ୍‌ କେଞ୍ଜ୍‌ତିଡ଼୍‌, ମିଡ଼୍‌ ଯଦି ନା'ୟାଦ୍‌ ତିଆର୍‌ ଆତ୍‌ତେ ମୁର୍ତ୍ତିତିଙ୍କ୍‌ କାପ୍‌ମୁଡ଼ୁନ୍ଦି ମଡ଼୍‌କାଙ୍କ୍‌ ତିଆର୍‌ ଆୟ୍‌ମୁଟ୍‌, ଆଲେକେ ସାୟେ; ମାତର୍‌ ଯଦି ମିଡ଼୍‌ ମଡ଼କ୍‌ୱିଡ଼୍‌ , ଆଲେକ୍‌ ଆଦ୍‌ ଦଣ୍ଡତେ ମିକିଙ୍କ୍‌ ନିଡ଼୍‌ତାନ୍‌ କିସ୍‌ ଗୁଇନ୍ଦେତାଗ୍‌ ହେସିତଡ଼୍‌; ମେଣ୍ଡେ, ଇଦ୍‌ଲେକାମ୍‌ ବେନେ ଦେୟାକ୍‌ ମିନ୍ଦେ ଯେ ମିକିଙ୍କ୍‌ ନା'କାୟି ତାଗାଙ୍କ୍‌ ଉଦ୍ଦାର୍‌ ମାଡ଼ିତେ ?

16 ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋ ରାଜାଙ୍କ୍‌ ଉତ୍ତର୍‌ କେତ୍‌ତଣ୍ଡ୍‌, "ହୋ ନବୂକଦ୍‌ନିତ୍ସର୍‌, ଇଦ୍‌ ବିଷୟତେ ନିକିଙ୍କ୍‌ ଉତ୍ତର୍‌ ଇଦାନଙ୍କ୍‌ ମାୟାଦ୍‌ ଦରକାର ଇଲେ। 17 ଯଦି ଆଦ୍‌ଲେକାମ୍‌ ଆଦ୍‌ତେ, ଆଲେକେ ମାମେ ବେନନ୍‌ ସେବା ମାଡ଼ିତମ୍‌, ମା ଆଦ୍‌ ପରମେଶ୍ୱର୍‌ ମାକିଙ୍କ୍‌ ନିଡ଼୍‌ତାନ୍‌ କିସ୍‌ ଗୁଇନ୍ଦେତାଗାଙ୍କ୍‌ ରକ୍ଷା ମାଡ଼ାନଙ୍କ୍‌ ପାର୍‌ତଣ୍ଡ୍‌; ମେଣ୍ଡେ ହୋ ମହାରାଜା, ଅଣ୍ଡ୍‌ ନିଇ କାଇଦାଗାଙ୍କ୍‌ ମାକିଙ୍କ୍‌ ଉଦ୍ଦାର୍‌ ମାଡ଼ିତଣ୍ଡ୍‌। 18 ମାତର୍‌ ଯଦି ମାଡ଼ଣ୍ଡ୍‌, ଆଲେକ୍‌ ହୋ ମହାରାଜା, ମାମେ ଯେ ନି ଦେୟାକିଙ୍କ୍‌ ସେବା ମାଡ଼ମ୍‌, କି ନିଇ ତିଆର୍‌ ଆତ୍‌ତେ ସୁନାତେ ମୁର୍ତ୍ତିତିଙ୍କ୍‌ ମଡ଼୍‌କମ୍‌, ଇଦ୍‌ ନିୟାଦ୍‌ ଆଦେଶ୍‌ ଆୟି।"

19 ଆସୁଙ୍କ୍‌ ନବୂକଦ୍‌ନିତ୍ସର ନାର୍ଗେ କପାତେ ଆତ୍‌ତଣ୍ଡ୍‌ ନୁ ଶଦ୍ରକ୍‌ମ ମୈଶକ୍‌ ନୁ ଅବେଦ୍‌ନଗୋତେ ସାରେପାକେ ଅନ୍‌ ମକମ୍‌ ଏର୍ର ଆତ୍‌ତେ। ଆଦିନ୍‌ ସେଙ୍ଗେ କିସ୍‌ ଗୁଇନ୍ଦେତାଗ୍‌ ସୁଦୁର୍‌ ନିଡ଼୍‌ତାନାଦିଙ୍କ୍‌ ସାତ୍‌ ଗୁଣ୍‌ତେ ନିଡ଼୍‌ତାନ୍‌ ସେଙ୍ଗେ ଅଣ୍ଡ୍‌ ଆଦେଶ୍‌ ଇତ୍‌ତଣ୍ଡ୍‌। 20 ମେଣ୍ଡେ, ଅଣ୍ଡ୍‌ ତାନ୍‌ ସୈନ୍ୟ ଡ଼ାଗାଙ୍କ୍‌ ବେସ୍‌ତୁଡ଼୍‌କ୍‌ ଶକ୍ତିତଡ଼୍‌କିଙ୍କ୍‌ ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋଙ୍କ୍‌ ତହସ୍‌ କିସ୍‌ ଗୁଇନ୍ଦେତାଗ୍‌ ହେସାନଙ୍କ୍‌ ଆଦେଶ୍‌ ଇତ୍‌ତଣ୍ଡ୍‌। 21 ଆସୁଙ୍କ୍‌ ଆ ମାନେଇନଡ଼୍‌ ନିଜେ ନିଜେ ସିଲେ, ତାଡ଼୍‌ମି, ତାଲେଗୁଡ଼୍‌ ନୁ ୱେରେ ୱେରେ ଚକା ସାରେ ତହସ୍‌ ନିଡ଼୍‌ତାନ୍‌ କିସ୍‌ ଗୁଇନ୍ଦେତାଗ୍ ହେସ୍‌ତଡ଼୍‌। 22 ରାଜାନ୍‌ ଆଦେଶ୍‌ ଅଦିକ୍‌ ଗାଟ୍‌ଗାଟା ନୁ କିସ୍‌ ଗୁଇନ୍ଦେ ନାର୍ଗେ ନିଡ଼୍‌ସ ମାତ୍‌ତେ, ଆଦିନ୍‌ ସେଙ୍ଗେ ବେନ୍ ନାରୁଡ଼୍ ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋଙ୍କ୍‌ ତେସ୍‌ ପୋଇସ୍‌ ମାତ୍‌ତଡ଼୍‌, ଅଡ଼୍‌ ନିଡ଼୍‌ତାନ୍‌ କିସ୍‌ ତାଡ଼୍‌ମିନାଗେ କାର୍ୱତଡ଼୍‌। 23 ମେଣ୍ଡେ ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋ, ଇଡ଼୍‌ ଇର୍‌ୱୁଡ଼୍‌ ତହସ୍‌ ଆସ୍‌ ନିଡ଼୍‌ତାନ୍‌ କିସ୍‌ ଗୁଇନ୍ଦେତାଗ୍‌ ରାଲ୍‌ତଡ଼୍‌।

24 ଆସୁଙ୍କ୍‌ ରାଜାଲ୍‌ ନବୂକଦ୍‌ନିତ୍ସର ଦାଦ୍‌ରେଲି ମିକା ଯାପେ ତେଦ୍‌ତଣ୍ଡ୍‌। ଅଣ୍ଡ୍‌ ତାନ୍‌ ମନ୍ତ୍ରୀନଡ଼୍‌କ୍‌ କେତ୍‌ତଣ୍ଡ୍‌, ମାନାଡ଼୍‌ ଇଡ଼୍‌ ମୁୱୁଡ଼୍‌କ୍‌ ନାରୁଡ଼୍‌କିଙ୍କ୍‌ ତହସ୍‌ କିସ୍‌ତାଗ୍‌ ୱାଟ୍‌ୱେ ମାତ୍‌ତମ୍‌ ? ଅଡ଼୍‌ ରାଜାଙ୍କ୍‌ ଉତ୍ତର୍‌ ଇସ୍‌ କେତ୍‌ତଡ଼୍‌, ନିଜାମ୍‌ ମହାରାଜା। 25 "ରାଜାଲ୍‌ ଉତ୍ତର୍‌ ଇସ୍‌ କେତ୍‌ତଣ୍ଡ୍‌, ଉଡ଼େ, ନାନେ କିସ୍‌ତାଗେ ତାକାନ୍ ନାଲୁୱୁଡ଼୍‌ ମୁକ୍ତ ନାରୁଡ଼୍‌କ୍‌ ଉଡ଼ୁତାନ୍‌ ନୁ ଅଡ଼୍‌ ବାତେବା ନଷ୍ଟ ଆୟ; ମେଣ୍ଡେ, ଚତୁର୍ଥ ନାରୁଣ୍ଡ୍‌ ମକମ୍‌ ପରମେଶ୍ୱରତେ ମାରିଣ୍ଡ୍‌ ଲେକାମ୍‌।"

26 ଆସୁଙ୍କ୍‌ ନବୂକଦ୍‌ନିତ୍ସର ନିଡ଼୍‌ତାନ୍‌ କିସ୍‌ଗୁଇନ୍ଦେତ୍‌ ପାକେ ମକମ୍‌ ୱାଟି କେତ୍‌ତଣ୍ଡ୍‌, ଅଣ୍ଡ୍‌ ବେଡ଼ିୟେ ପରମେଶ୍ୱର୍‌ତେ ଦାସ, ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋ, ମିଡ଼୍‌ ବାଇଦେ ପେୟିସ୍‌ମିକା ଇଗେ ୱାଡ଼ାଟ୍‌। ଆସୁଙ୍କ୍‌ ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋ କିସ୍‌ତାଗାଙ୍କ୍‌ ପେଇସ୍‌ ମିକା ୱାତ୍‌ତଡ଼୍‌। 27 ମେଣ୍ଡେ, ରାଜ୍ୟତିଙ୍କ୍ ଚାଲାମାଡ଼ାନଣ୍ଡ୍‌ , ରାଜଅଦିକାରି ନୁ ଦେଶ୍‌ତିଙ୍କ୍‌ ରକ୍ଷା ମାଡ଼ାନଣ୍ଡ୍‌ ନୁ ରାଜମନ୍ତ୍ରୀନଡ଼୍‌ ଅଣ୍ଡୟ୍‌ତାଗ୍‌ ଆସ୍‌ ଆ ମୁୱୁଡ଼୍‌କିଙ୍କ୍‌ ଉଡ଼ି କେତ୍‌ତଣ୍ଡ୍‌ ଯେ, କିସ୍‌ ଅଡ଼୍‌ ମେନ୍ଦୁଲ୍‌ତାଗେ ମିନ୍ଦେ ଇଦ୍‌ ଶକ୍ତି କେଲ୍‌ଲ ବା ଅଡ଼୍‌ ତାଲେତେ କେଲ୍‌କ୍‌ ଇସୁର୍‌ ମିକା କାର୍‌ୱ, କି ଅଡ଼୍‌ କେର୍‌ତେ ଚକା କାର୍‌ୱକି, କିଅବା ଅଡ଼୍‌ ମେନ୍ଦୁଲ୍‌ତେ କିସ୍‌ତେ ଗାବ୍‌ଇଲେ।

28 ନବୂକଦ୍‌ନିତ୍ସର କେତ୍‌ତଣ୍ଡ୍‌, ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋର ପରମେଶ୍ୱର୍‌ ଦନ୍ୟ, ବେଲାକି ଅଣ୍ଡ୍‌ ତାନ୍‌ ଦୂତତିଙ୍କ୍‌ ରତ୍‌ତଣ୍ଡ୍‌ ନୁ ତାନ୍‌ ବେନ୍‌ଦାସନଡ଼୍‌ ଅନାଗେ ବିଶ୍ୱାସ୍‌ ମାଡ଼୍‌ତଡ଼୍‌ ନୁ ତାମ୍‌ ପରମେଶ୍ୱର୍‌ତିଙ୍କ୍‌ ୱିଡ଼୍‌ସି ବେଲାନ୍‌ ୱେରେ ବେନେଆୟି ଦେୟାକିଙ୍କ୍‌ ସେବା କି ମଡ଼୍‌କଡ଼୍‌ , ଆଦିନ୍‌ ସେଙ୍ଗେ ରାଜାନ୍‌ ବାକ୍ୟ ମିଡ଼୍‌ମିକା ନିଜେ ନିଜେ ମେନ୍ଦୁଲ୍‌ତିଙ୍କ୍‌ ସର୍ପା ମାଡ଼୍‌ତଡ଼୍‌, ଅଣ୍ଡ୍‌ ଅଡ଼୍‌କିଂଙ୍କ୍‌ ଉଦ୍ଦାର୍‌ ମାଡ଼୍‌ତଣ୍ଡ୍‌।

29 ଆଦିନ୍‌ ସେଙ୍ଗେ ନାନେ ଇଦ୍‌ଆଜ୍ଞା ମାଡ଼ୁତାନ୍ ଯେ, ବେନେ ସାରେଗୋଷ୍ଠି, ଦେଶିୟ ନୁ ଭାଷାବାଦୀ ନାରୁଡ଼୍‌, ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋର ପରମେଶ୍ୱର୍‌ତେ ପାକେ ବାତେମିକା ମିଚ୍‌ ଗଟି କେତିତଣ୍ଡ୍‌, ଅଡ଼୍‌ ଦୁଡ଼ା ଦୁଡ଼ା ମାଡ଼ି ନାଡ଼୍‌କିତଡ଼୍‌ ନୁ ଅଡ଼୍‌ ଲକିଙ୍କ୍‌ ପେଣ୍ଡେକାତାମ୍‌ ଆଦ୍‌ତେ; ବାତେଙ୍କ୍‌ଇତ୍କେ ଇଦ୍‌ଲେକାମ୍‌ ଉଦ୍ଦାର୍‌ ମାଡ଼ାନଙ୍କ୍‌ ପାର୍‌ତଡ଼୍‌ ମେଣ୍ଡେ ବେନେମିକା ଦେୟାମ୍‌ ଇଲେ। 30 ଆସୁଙ୍କ୍‌ ରାଜାଲ୍‌ ଶଦ୍ରକ୍‌, ମୈଶକ୍‌ ନୁ ଅବେଦ୍‌ନଗୋର ବାବିଲ୍‌ ପ୍ରଦେଶ୍‌ତାଗ୍‌ ବାଡ଼୍‌ୟେ ପଦ ଇତ୍‌ତଡ଼୍‌।