Ezequiel 13

Havige kasnampa vahe’mo’zama knazama eri’naza naneke

1 Ra Anumzamo’a amanage huno nasami’ne, 2 Vahe’mofo mofavremoka, Israeli mopafi vahe’mo’zama havige kasnampa kema zamagra’a zamagesafinti’ma nehaza vahera amanage hunka zamasamio, Ra Anumzamo’a amanage nehianki antahiho. 3 Hagi Ra Anumzana hankavenentake Anumzamo’a amanage hu’ne, Neginagi kasnampa vahe’mo’za mago’zana nonkazanagi zamagra’a antahintahima nevaririza vahe’mo’za kva hiho. 4 Hagi Israeli vahe’mota, tamagri kasnampa vahe’mo’za haviza hu’nea kumapi nemaniza afi kragna hu’naze. 5 Hagi ana vahe’mo’za kumamofo have keginama havizama hu’neana, mareriza eriso’ea osu’naze. Ana hu’neanki’za Ra Anumzamo’ma huhampri ante’nea kna zupama ha’ma eme nehanage’za hankaveti’za hara osugahaze. 6 Hagi zamagra havige ava’nagnaza nege’za, havige kasnampa nehu’za, Ra Anumzamo tasamia ke nehune hu’za nehazanagi, Nagra ozmasami’noa naneke nehu’za, zamagra ana naneke zmimo’ma eama’ma hanigu avega ante’za nemanize. 7 Hagi tamagra havige avana negeta, Nagra osu’noa kegura Ra Anumzamo hie huta havige kasnampa kea nehaze. 8 E’ina hu’negu Ra Anumzamo’a amanage hu’ne, Na’ankure tamagra havige nehuta, havige ava’nane negazagu, Nagra hara reneramantoe huno Ra Anumzamo’a hu’ne. 9 Hagi havige ava’nagna zama nege’za, havige kasanampa kema nehaza kasnampa vahera nazana erisga hu’na hara huzmantegahue. Ana hanuge’za Nagri vahe kevufina omanige, Israeli vahetmima zamagima krente’naza avontafepina zamagia kreontegahaze. Ana hanage’za Israeli mopafina vano osugahaze. E’ina hanuge’za Nagrikura Ra Anumza mani’ne hu’za ke’za antahi’za hugahaze. 10 Na’ankure havige kasnampa vahe’mo’za vahe’ni’a rezamatga hu’za amanage nehaze, hazamoke’ma hu’nefina hara omane’nigeta tamarimpa fru huta manigahaze hu’za nehaze. Hagi vahe’mo’zama kumamofo have keginama hapa’ma kate’za hunaku’ma nehazage’za, ana kasnampa vahe’mo’za efeke masave fre’za eri nehananaze. 11 E’ina hu’negu kuma keginare’ma efeke hapama fre hanane’naza vahera, ana keginamo’a traka huno masegahie huta zamasamiho. Nagra tusi ko’ene komopa ko’ene, ununko’ene huntanenkeno ana have kegina eri fragu vazitregahie. 12 Hagi ana kuma have keginamo’ma tapage’ma huraminige’za ana kasanampa vahera zamantahige’za, efeke hapama fre hanane’naza kegina, iga me’ne hu’za hugahaze. 13 E’ina hu’negu Ra Anumzana Agra miko’zama kegavama hu’nea Anumzamo’a amanage hie, Narimpa ahe’zamante’na ununkora hunente’na, nasivazi zamante’na ko’ene komopa ko’enena huntanenkeno vazihagagino maka zana eri havizantfa hugahie. 14 Hagi efeke pentima hu’naza kuma have kegina eri tapage hutre’nugeno mopafi masenigeno tra’ma anteta tro’ma hu’naza tra’mo’a amate megahie. Hagi ana have keginamo’ma faragu vaziramino tamarefitenketa, Nagrikura Ra Anumza mani’ne huta keta antahita hugahaze. 15 Anama hutena have keginane, ana keginare’ma efeke hapa’ma fre hananenaza vahe’enena, narimpa ahe’zana zamagrite rupopo huvagaregahue. Ana nehu’na amanage hu’na hugahue, have keginamo’a nomanegeno, ana keginare’ma efeke hapa’ma fre hananenaza vahe’enena omani’naze hu’na hugahue. 16 Israeli kasnampa vahetmima, Jerusalemi kumaku’ma kasnampa kema nehu’za, havige ava’nama nege’za, ha’zana omanegahianki fru huta maniho hu’zama nehaza zanena omanegahie huno Ra Anumzamo’a hu’ne.

17 Hagi vahe’mofo mofavre’moka, menina Israeli a’nemo’zama zamagra’a zamagesafinti’ma havige kasanampa kema nehaza a’neramina, zamazeri haviza hu kasnampa ke huzmantenka, 18 amanage huo, Ra Anumzana Mikozama Kegavama Hu’nea Anumzamo’a amanage hie, Safezanema nehuta vahe zamazampi avasase zama tro huta antani nezmanteta, tavravema hatita zamasenire’ma anaki nezmantaza zamo’a krifufima zagagafa azeriaza huno vahera aze’nerianki kva hiho. Hagi tamagesama antahi’zana vaheni’a zamazeri haviza hugahune huta nehuta, tamagra knare huta manigahune huta nehazanagi, Nagra ana zantamina eri haviza hutregahue. 19 Hagi osi’a bali azampi eri avite’za tro hu’naza bretine, osi’a breti ankra’a Nagri vahepintira enerita, Nagri nagia eri haviza hu’naze. Ana nehuta ofriga vahetmina zamahe nefrita, friga vahetamina zamatrage’za nemanizageta ofrita knare huta manigahaze huta havigea nezmasamize. 20 E’ina hu’negu Ra Anumzana Mikozama Kegava Hu’nea Anumzamo’a amanage hie, Safezama huta vahe zamazampi asama tro’ma huntazageno krifufima namama azeriazama huno zamazeri’nea zana zamazampintira rutraga hutre’nugeno, namaramimo’za krifufinti aru kraruvazi’za hare’za frazankna hu’za kinafintira fru hu’za manigahaze. 21 Ana nehu’na tavaravema hatita zmasenire’ma anaki zmante’naza zana eri tagato hutre’na, vaheni’a zamagu vazinuge’za mago’enena tamagri hihamufina omanigahaze. E’ina hanugeta Nagrikura Ra Anumza mani’ne huta keta antahita hugahaze. 22 Na’ankure tamagrama havige zama hazazamo fatgo vahe’mokizmia muha zana eri netraze. Hianagi Nagra mago zana hu’na zamazeri zamasunkura osu’noanagi, tamagra zamazeri fatgo hazage’za kefo avu’ava zana atre’za zamagura ovazi’naze. 23 E’ina hu’nazagu havige avanagna zama negaza a’nemota ru’enena nonketa, safezanena osugahaze. Tamagri tamazampintira vahe’ni’a zamagu vazi’nena, Nagrikura Ra Anumza mani’ne hu’za ke’za antahiza hugahaze.