Juízes 3

Ra Anumzamofona atre’za savri a’nemo’zama nehazaza hu’za havi anumzante mono hunte’naza naneke

1 Hagi ko’ma Kenani mopafima ha’ma hu’naza zama onke’naza Israeli vahetmima rezamaheno kenaku, Ra Anumzamo’a mago’a vahera zamatrege’za Kenani mopafina mani’naze. 2 Hagi Israeli vahe’ma efore hutere hu’za henkama esaza vahetami Ra Anumzamo’a ha’ma hanaza avu’avaza rempi huzaminaku Kenani mopafi vahera zamahenatitre vagaore’ne. 3 Ama’na kumatmimpi nemaniza vahetami zamatrege’za mani’naze. Faifu’a kumapima nemani’za Filistia vaheki, maka Kenani vaheki, Saidoni vaheki, Hivi vahe’ma Lebanoni agonamofoma Bal-Hermoniti’ma vuno Hamat kumate’ma uhanati’nea vahe’mokizmi ozamahe zamatrege’za mani’naze. 4 Hagi Ra Anumzamo’ma Mosesema ami’nea kasegea avaririgahazafi ovaririgosazafi huno Israeli vahe’ma rezamaheno kesigu Ra Anumzamo’a ana vahera zamatrege’za mani’naze. 5 E’ina hazageno Kenani vahe’ene, Hiti vahe’ene, Amori vahe’ene, Perisi vahe’ene Hivi vahe’ene, Jebusi vahe’mokizmi amu’nompi Israeli vahera mani’naze. 6 Ana’ma nehu’za Israeli vahe’mo’za zamagri mofa’ne ara e’neri’za, ete zamagra mofa’nea zamatrazage’za zamagri mofavreramintera vea omeneri’za unemrazageno, havi anumzazmirera monora ome hunte’naze.

Otnieli’a keaga refkohu kva ne efore hu’nea naneke

7 Israeli vahe’mo’za Ra Anumzamofo avufina kefo zamavu’zmava nehu’za, Ra Anumzamofona zamagekani nente’za, Bali havi anumzante’ene Asera havi anumzamofo amema’are monora hunte’naze. *3:7 Bali havi anumzana ve anumzanki, asera anumzanema hu’neana zafareti tro huntenaza a' havi anumzanku hu’ne. 8 E’ina hazageno Ra Anumzamo’a Israeli vahe’tminkura tusi arimpa ahezamanteno Mesopotemia Kini ne' Kusan-risataimi azampi zamavarentegeno ha' eme huzamanteno zamazeri haviza nehuno, zamavareno kina ome huzmantege’za 8'a zagegafufi Kusan-risataimi kazokzo eri’za vahe umani’naze. 9 Hianagi Israeli vahe’mo’za Ra Anumzamofontega zamazama hinogura krafa hazageno, Ra Anumzamo’a zamazama hu' nera, Kalepi negana Kenazi ne’mofo, Otnielina azeri oti’ne. 10 Ra Anumzamofo Avamumo’a agri’ene emani’negeno, Israeli vahe’mokizmi keaga refko hu kva vahera mani’ne. Hagi Otnieli’ma Mesopotemia vahe’ene ha' ome nehigeno, Ra Anumzamo’a kini ne' Kusan-risataimina azampi avrentegeno aheno hara azeri agatere’ne. 11 Ana higeno 40'a kafufina ha’huzana omanege’za, fru hu’za Israeli vahe’mo’za mani’nazageno, Kenazi ne’mofo Otnieli’a fri’ne.

12 Ete mago’ene Israeli vahe’mo’za Ra Anumzamofo avufina kefo avu’avara hazageno, Ra Anumzamo’a Moapu kini ne' Eklonina hankavea amigeno Israeli vahera hara eme huzmagatereno kegava huzmante’ne. Na’ankure zamagra Ra Anumzamofo avufina kefo zamavu’zamava hu’naze. 13 Hagi Ekloni’a Amoni vahe’ene Ameleki vahe’enena kehige’za azageno Israeli vahera hara ome huzamante’za tofegna zafamoke hu’nea Jeriko rankuma zamahe’za hanare’naze. 14 Hagi ana hazageno Israeli vahe’mo’za 18ni’a kafuzagefi Moapu kini ne' Ekloni kazokzo eri’za vahera mani’naze.

Ehuti’a Moapu vahe zamazampinti Israeli vahera zamagu’vazino zamavare’nea naneke

15 Hianagi Israeli vahe’mo’zama Ra Anumzamofontegama zamaza hinogu’ma krafagema hazageno’a, ha' vahe zamazampinti’ma zamazama hu' nera Benzameni nagapinti Gera nemofo hoga azane ne' Ehuti azeri oti’ne. Hagi Israeli vahe’mo’za kafure kafure’ma kini ne’ma takesi zagoma nemizaza huno Moapu kini ne' Ekloni ome ami’nogu ana zantamina Ehutina nemi’za huntazageno erino vu’ne. 16 Ana higeno Ehuti’a tarega kaziga asane bainati kazina zaza’amo’a 50'a sentemita hu’nea tro huno tamaga kaziga amote anakiteno za’za ke’na’a antanino refite’ne. 17 Hagi Ekloni’a ra avufgane ne' mani’neankino, Ehuti’a ana takesi zagone maka zantamina erino Eglonina ome ami’ne. 18 Hagi ana takesi zantamima amiteno’a, ana zantamima azama hu’za eri’za vu’naza vahera eme huzamantege’za vu’naze. 19 Hianagi Ehuti’a Gilgali tavaonte’ma havi anumzama tro’ma hunte’nazareti ete rukrehe huno Ekloninte eno amanage hu’ne, Ekloniga oku’a nanekeka’a erigante’na oe, higeno Ekloni’a eri’za vahe’agura huno, amafintira maka atiramiho, hige’za maka eri’za vahe’amo’za atirami vagare’naze. 20 Hagi Eglonima zasi’ma e’neria noma’afi agrake’ma manigeno’a, Ehuti’a amanage hu’ne, Anumzamofontegati oku nanekeka’a eri’na e’noe. Anage higeno tra’aretira oti’ne. 21 Hagi Ehuti’a tarega kazigama asane bainati kazima tamaga kaziga amote’ma anakinte’nea kazina avazu huno, Ekloni rimpa reragufe’ne. 22 Ana bainati kazimofo nena’amo’ene asana’amo’enena Eglonina rimpafi ufresupanegeno afovamo’a herafiramino bainati kazina refite’ne. 23 Ehuti’a ana kazina eriokasi Ekloni avufgafi me’negeno netreno, agu’ati kafana erinegino, marerino nomofo agofetu’ma zasi’ma e’nerizareti takaureno fre’ne. 24 Ehuti’ma vutegeno’a, Ekloni eri’za vahe’mo’za eme kazana anaga kaziga nomofo kafana erigi’negeno, zamagesama antahi’zana agu’afinka rifa nereno mani’ne hu’za hu’naze. 25 Anage hu’za nentahiza kafante avega ante’naze. Hianagi kafana ame huno onagige’za kafante kinofira eri’za ana kafana anagi’za kazana, kvazmimo’a frino mopafi mase’nege’za ke’naze. 26 Hagi kini ne' eri’za vahe’mo’zama kafante avega ante’za mani’nazageno, Ehuti’a freno havere taga hu’za trohunte’naza havi anumzamofo amema’a me’nea kumara agatereno Seira vu’ne. 27 Hagi ana’ma huteno’a Israeli vahe’mofo mopafima ufreno Efraemi agonafima nevuno’a, ufe rege’za Israeli vahe’mo’za nentahi’za eme atru hazageno, ha' hunaku zamavareno ugota huno agra urami’ne. 28 Anama uneramino’a amanage huno hu’ne, navaririta viho, na’ankure Ra Anumzamo’a ha' vahetamia Moapu vahera tamagri tamazampi avrente’neankita zamahegahaze. Anage hige’za Israel vahe’mo’za Ehutina avariri’za Jodani tima takama nehazare Moapu vahe’enena hara ome hu’za magore hu’za ozamatre zamahehana hu’naze. 29 Ana hapina Moapu hankavenentake ha' vahe’tmina Israeli vahe’mo’za 10tauseni’a vahe zamahehna nehu’za zamatrage’za ofre’naze. 30 E’ina hu’za Israeli vahe’mo’za Moapu vahera, zamahe vagarazageno 80'a kafufina hahu’zana omanege’za, Israeli vahe’mo’za knare hu’za mani’naze.

Kema refkohu ne' Samgari naneke

31 Ehuti amefira Anati nemofo Samgari efore huno bulimakao afu reneharia ronku hu’nea azotareti 600'a Filistia vahera zamahe hana huno Israeli vahera zamagu’vazi’ne.