Levitikas-Pristi Eri'zane 12

A’nemo’ma mofavre kasente tenigenoma azeri agruma hu’zamofo naneke

1 Hanki anantera Ra Anumzamo’a Mosesena asamino, 2 Amanage hunka Israeli vahera zamasamio, mago a’mo’ma ne' mofavre’ma kasentenuno’a, namunkama freneno’ma nehiaza huno 7ni’a zagegna maniteno agrua hugahie. 3 Hagi ne' mofavremofona 8 zagekna zupa agoza anoma’a taga hutregahaze. 4 Hagi ana a’mo’a ne' mofavrema kasente’nea zankura, 33'a zagegna agruma hanigura avega anteno manigahie. Hagi ana a’mo’a ruotage’ma huno me’neazantamina avakora nosuno, ruotagema hunefina ovuno mani’nenigeno agruma hu knamo’a egahie. 5 Hianagi mofa’ma kasentesigeno’a ana a’mo’a tare sontamofo agu’afi agrua osuno maniteno, ete mago’ane 66'agna maniteno agrua hugahie. 6 Hagi ne’mofavreo, mofa mofavre’ma kasente’nesia zanku’ma azeri agruma hu knama evutenkeno’a, tevefima kresramna vu ofa mago kafu hu’nesia sipisipi nevreno, kumi ofama hu’zana maho namao kugofa nama avreno pristi vahete seli nomofo avuga egahie. 7 Hagi ana nama pristi ne’mo’a avreno, ana a’mo’ma agruma osu’nea zantera nona huno Ra Anumzamofontera ofa hina, ana a’mo’ma mofavrema kasenteteno azeri agru hugahie. Hagi ama’i a’mo’ma mofavrema kasentete’noma azeri agruma hania zamofo trake. 8 Hianagi ana a’mo’ma sipisipima avrenoma ega’ma osanuno’a, tare maho namao, tare kugofa nama avreno e’nigeno, mago nama Ra Anumzamofonte kresramana nevuno, mago nama ana a’ma azeri agru hu ofa pristi ne’mo’a hugahie.