Levitikas-Pristi Eri'zane 14

Fugonkrimo vagarenkeno azeri avusese hu’zamofo naneke

1 Ra Anumzamo’a Mosesena amanage huno asmi’ne, 2 Fugonkrima eri’nesaza vahe’mo’zama ana krimo’ma atrezamantesige’za zamagra’ama zamazeri avusesema hanaza zama eri’za pristi vahete’ma vanaza zamofo trake. 3 Hagi Pristi vahe’mo’ma kumamofo fegia vuno, ana fugo namumo’ma atrentesigura ana fugo vahe’ma ome kesigenoma, ana fugo namumo’ma atrentesigeno’a, 4 pristi vahe’mo’a ana fugo vahera asamisigeno, agruma hu’nesia namafinti tare namarare nevreno, sida teve e’nerino, koranke nofira e’nerino, hisopu zafa azankuna e’nerino, pristi vahete esigeno ana nera azeri agru hugahie. 5 Hagi pristi vahe’mo’a zamasamisige’za enevania timpinti mopa kavofi tina afi’za esageno, ana kavomofo agofeto mago nama anankena akafrinigeno, koramo’a ana kavofi evuramigahie. 6 Hagi avu’agama mania namagi, sida tevegi, korankre nofiki, hisopu zafa azankunaki huno ana korama rente’nenia timpina reteno atigahie. 7 Anama azeri agruma hania vahe’mofo avufarega namamofo korana 7ni’a zupa pristi vahe’mo’a rutri tri hunenteno, hago agru hane huno ana fugo nera hunenteno, avuga’ma mani’nea nama atresigeno hareno vugahie. 8 Hagi ana’ma agruma hania ne’mo’a, kukena’a sese nehuno avufaretira mika azokara vazagatenetreno, tina freno agrua hino. Ana’ma hutesuno’a, agru hugahiankino kuma agu’afina ufregahianagi, 7ni’a kna maniteno seli noma’afina ufregahie. 9 Hagi ete 7ni kna zupa agra’ama azeri agruma hania vahe’mo’a agi azokora nehareno, avu azokara nehareno, maka avufga azoka’ene nehareno, kukena’a sese nehuno, timpi tina freno agra’a avufga sese huno azeri agru hugahie. 10 Hagi 8ti kna zupa afuhe afahe osuno mago kafu hu’nesia tare ve sipisipigi, mago a' sipisipi nevreno, 3'a kilo flaua olivi masavene eri havia hu’ne’nia witi ofa e’nerino, mago kapu olivi masave kre sramanama vu’zana erigahie. 11 Hagi azeri agruma hania pristi ne’mo’a, anama agru’ma hania nera nevreno ofa’anena erino Ra Anumzamofo avuga atru’ma hu seli nomofo kahante vugahie. 12 Hagi ana’ma hutesuno’a, pristi vahe’mo’a kumi ofa mago ve sipisipine, olivi masavene eri verave hu ofa Ra Anumzamofontega hugahie. 13 Hagi ana ve sipisipia ruotage’ma hu’nere’ma kumite’ma hu ofane, kre fanane hu ofanema nehazare ome aheno. Hagi kefozama hu’nere’ma kresramana vu’zane kumite’ma kresramana vu’zana ruotage hu’neankino pristi vahe’mofoza megahie. 14 Hagi kefozama hu’nere’ma erino e’nea sipisipi afu’mofo korana, pristi vahe’mo’a mago’a erino ana vahe’mofo tamaga kaziga agesare’ene, tamaga kaziga azafare’ene tamaga kaziga agigore’ene frentegahie. 15 Hagi pristi vahe’mo’a mago’a olivi masavena hoga aza agu’safi taginteteno, 16 tamaga kaziga azankoreti ana masavempi reteno, Ra Anumzamofo avuga 7ni’a zupa rutri trira hugahie. 17 Hagi mago’ama mesia masavena pristi vahe’mo’a erino anama agruma hania vemofona, tamaga kaziga agesa atupareki, tamaga kaziga azafa azankoreki, tamaga kaziga agamofo agafa agigore frentegahie. 18 Hagi pristi vahe’mo’a aza agu’safima mesia masavema’a erino azeri agruma hania vahe’mofo asenirera frentegahiankino, e’i ana ofama hania zamo’a kumi’amofo nona hinkeno, Ra Anumzamo’a azeri agru hugahie. 19 Hagi anantera pristi vahe’mo’a kumitera kresramana nevuno, anama agruma osu’nesia vahera azeri agru hugahie. Ana’ma hutesuno’a, pristi vahe’mo’a tevefima kre fananehu kresramna vu sipisipi afura ahegahie. 20 Hagi pristi vahe’mo’a kre fanane hu ofane, witi ofanena kresramna vu itare kregahie. Pristi ne’mo’a e’ina hanigeno, anama kumi’ma hu’nesia vahe’mo’a agru hugahie. 21 Hagi amunte’ma omnenkeno maka ofama erino’ma ega’ma osanuno’a, mago ve sipisipi nevreno, olivi masavene erihavia hu’ne’nia 1 kilo witi ofa e’nerino, mago kapu olivi masavenena kumite’ma nonama huno eri veravema hu ofa erino egahie. 22 Hagi erino ega’ma hu’ne’nia avamente tare maho namarareno, tare agaho kugofa namararena azerino eno, magora kumite Kresramana nevuno, magora tevefi kre fanane hu ofa hugahie. 23 Hagi 8ti knazupa anama azeri agruma haniazana erino pristi vahete atru’ma nehaza seli nomofo kahante Ra Anumzamofo avuga vino. 24 Ana’ma hanigeno’a, pristi vahe’mo’a ana ve sipisipi afu’ene mago kapu olivi masave erino Ra Anumzamofo avuga eri veravehu ofa hugahie. 25 Hagi pristi vahe’mo’a kefozama hu’naza zante kresramna vu ofa, ve sipisipi aheno korama’a tagino tamaga agesa atupare frenenteno, tamaga kaziga azafa azankore frenenteno, tamaga kaziga agamofo agigorera frentegahie. 26 Hagi pristi vahe’mo’a hoga kaziga aza agusafi olivi masavena taginteteno, 27 tamaga kaziga azankoreti ana masavempi areno 7ni’a zupa Ra Anumzamofo avuga rutri tri hugahie. 28 Hagi aza agusafima mago’a masavema me’nefintira ko’ma kefozama hu’nere’ma ofama hu’nea afumofo korama frentenere, tamaga kaziga agesamofo atumpareki, tamaga kaziga azankoreki, tamaga kaziga agafa agigoreki, huno frentegahie. 29 Hagi pristi vahe’mo’a aza agusafima mago’ama me’nia masavema’a ana vahe’mofona kumimofo nona huno asenifi frenteno Ra Anumzamofo avuga azeri agru hugahie. 30 Hagi pristi vahe’mo’a ana tare namafinti’ma maho namao, kugofa namama avreno esifinti kresramna vugahie. 31 Mago nama kumite kresramana nevuno, magora tevefima kre fananehu kresramna vu witine erinteno kregahie. E’inahukna kante pristi vahe’mo’a agru’ma osu’nesia vahe’mofo agira erino, Ra Anumzamofontera kumi nona hanigeno, anamo’a agru hugahie. 32 Ama’i avufafima fugo namuma re’nesia vahe’mo’ma ante’nesia avamente erino esigeno’ma azeri agruma hania zamofo trake.

Nomofoma azeri haviza hania zamofo naneke

33 Ra Anumzamo’a anage huno Mosesene Aroninena znasami’ne, 34 Tamagrama erisanti haregahazema hu’na tamisua mopafi Kenenima vanage’na, mago’a nona azeri haviza hanena ana nomo’ma tontore’na, 35 ana nomofo nefa’a vuno pristi vahe ome zamasamino, noni’afina tontore avame’za fore hu’ne huno hugahie. 36 Hagi pristi vahe’mo’a ana nompina efreno rezaganeno onke’neno, ana nomofo venafona hanigeno makazana eri fegi atretenkeno, pristi vahe’mo’a henka ufreno ana nona kegahie. 37 Hagi pristi vahe’mo’a ana nompima ufreno rezageno’ma kesiama zafaninage zano, korankre zamo’ma fore’ma huno hanagatino fre’nesigeno’a, 38 ana nompintira pristi vahe’mo’a atiramino ana nonkafana erigino, ahe kanirentesigeno 7ni’a zagegna megahie. 39 Hagi 7ni’a zage gnama manitesigeno’a, pristi vahe’mo’a ete eno eme kesiama, ana tontomo’ma ana nomofo asoparegama rurama huno vuno eno’ma hu’nena, 40 pristi vahe’mo’a mago’a vahe huzmantesige’za ana tontoma manesi’a havea ana nontetira eri keri’za kumamofo fegu’a agru’ma osu’nefi ome atregahaze. 41 Hagi ana tontomo’ma me’nenia nomofo asoparega havema azerinogu’ma rukamarente’naza zantamina vazagate’za eri’za rankumofo fegi’a agruma osu’nefi ome atregahaze. 42 Hagi anama krima me’negeta eritraza haveramimofo nontera, ru have eri’za eme runekamare’za, ana havema azeri’zana kasefa hapa ati’za erihapa hu’za rukamrenteho. 43 Hagi anama hutesagenoma henkama ana tontoma fore’ma hina, 44 ete pristi vahe’mo’a vuno mago’ane omegeno. Ome kesigeno ana nonte’ma tontomo’ma rurama hu’nena, nomo’a haviza hu’neankino agru osu’ne huno hugahie. 45 Hagi ana noma ki’nesia havema, zafama, rekamre’nesaza zana tapage hu’za eri’za kumamofo fegi’a agruma osu’nefi ome atreho. 46 Hagi kahama eriginesia kna’afima ana nompima ufresimo’a, agru osu mani’nenigeno vuno kinaga segahie. 47 Hagi anahunkna huno iza’o, ana nompima mase’nimo’a kukena’a sese nehanigeno, iza’o ana nompima ne’zama nesimo’a, kukena’a sese hino. 48 Hianagi ana noma eri fatgo hutesageno’ma pristi vahe’mo eme kesigeno, ana tontoma orenenigeno’a ana nonkura kria omane’neanki, agru hu’ne huno pristi vahe’mo’a hugahie. 49 Hagi ana noma azeri agruma hunakura, pristi vahe’mo’a tare namarare nevreno, sida zafa e’nerino, koranke nofi enerino, hisopu zafa azankunatetiki huno azeri agru hugahie. 50 Hagi mago nama zasi ti me’nenia mopa kavomofo agofetu agra ahenigeno, koramo’a ana kavofi avitegahie. 51 Hagi anama hutesuno’a, sida teve zafa atupa’agi, hisopu zafa azankunaki, korankre nofiki, mago’ma kasefa huno mani’nea nama anama korama me’nea timpi reteno atisga huno, ana nomofona 7ni’a zupa rutri tri hugahie. 52 E’ina hukanama huno timpima me’nea namamofo korantetiki, kasefa’ma mani’nea namaretiki, sida zafaretiki, hisopu zafa azankunaki, korankre nofitetiki, huno ana noma azeri agru hutesuno’a, 53 kasefa’ma huno mani’nea nama avreno kuma’mofo fegia ometresigeno hareno vugahie. E’ina huno pristi vahe’mo’a havizama hu’nesia nomofona nona huno azeri agru hugahie.

Krima eri’nesia vahe’mo’ma hania tra kemofo naneke

54 Ama fugonkri eri’nesazo, zuka kri eri’nesaza zamofo tra ke, 55 kukenare tontore’nesio, nonte tontore’nesio, 56 zamavufagamo zorenegeno kirareki namu fore hu’nenio, efeke kirere eri’nesaza, 57 vahe’ma rempima huzamisage’za zamagra’ama agru hu’neanki, agru osu’neanki hu’zama rezagnezama kesaza zamofo tra ke. Ama’i fugo krimofo tra ke.