Salmos 41

Deviti kre’nea zagamere

1 Hagi zamunte omne vahe’ma knare zamavu’zmava’ma hunezmantaza vahera hazenke zama esigeno’a, Ra Anumzamo’a zamagu’vazigahie. 2 Ra Anumzamo’a zamagu nevazino zamaza hanige’za ofri’za knare hu’za manigahaze. Ana nehuno zamaza hanige’za maka zama hanaza zamo’a knare nehinkeno, ha' vahe’mo’zama zamahenaku’ma hanageno’a zamagu’vazigahie. 3 Hagi krima erizageno’a, Ra Anumzamo’a kegava hunezmanteno krizmia zamazeri negnamare. 4 Ra Anumzamokarega nunamuna nehuanki kasunku hunantenka nazeri kanamaro. Na’ankure osuo hunkama hu’nana kumi hu’noe. 5 Hianagi ha' vahe’nimo’za huhaviza hunante’za amanage nehaze, nazupa frinigeta tagera akanigahune? 6 Zamagra ronenimo’zama nantu’ma ante’nantazankna hu’za nantu ante nante’nazanagi, havigema hu’za nagenkema hanagu nanekea emerite’za vu’za nagenkea ome hugantikma nehaze. 7 Zamago’ma ante’nenantaza vahe’mo’za nazeri haviza hu kea sumi sumi hu’za nanekea ananeki’za, 8 agra havi kri erino tafe’arera mase’neankino onkanamregosie hu’za nehaze. 9 Knare aronenima mani’negena antahima nemina, magopinti’ma ne’zama neno’a vahe’mo’a amefi hunenamie. 10 Hianagi Ra Anumzamoka kasunku hunantenka krini’a nazeri knamrege’na ana vahera nona huzmantaneno. 11 Nazama hananke’na ha' vahe’ni’ama ha’ma huzmagateresu’na, Kagra muse hunenantane hu’na hugahue. 12 Ra Anumzamoka nagrira hazenkeni’a omne vahe mani’nogu hunka, maka zupa kavuga nantanke’na mani' vava nehue. 13 Ra Anumzana Israeli vahe Anumzana mani’neno manivava Anumzanki, huta agi’a ahentesga hanune. Tamage, tamage.