Salmos 46

Anumzamo’a fraki kumati mani’ne hu’za Kora mofavre naga’mo’za hunte’naza zagamere

1 Anumzamo’a fraki vihutine hankavetine mani’neankino, hazenke knafima tazama hanigura maka kna retro huno nemanie. 2 E’ina hu’neankita imima e’nerisigeno, agonamo’a ankariseno hageri amu’nompina vugahianagi, tagra korora osugahune. 3 Hagerimo’a kranto kranto huno agrenkera nehanigeno, agonamo’a imina erino eri tore vare hugahianagi, tagra korora osugosune.