Salmos 7

Benjameni nagapinti ne' Kusi zagame, Deviti kre’nea naneke

1 Ra Anumzana nagri Anumzamoka, kagripi fra nekuanki, nahenaku’ma navrarizama ne-esagenka nagu’vazinka naza huo. 2 Ana’ma osnankeno’a laionimo’ma nehiaza hu’za nahe’za tagna taganu vazisageno mago vahe’mo’e huno eme naza huno nagura ovazigahie. 3 Ra Anumzana nagri Anumzamoka, nagrama vahe’ma zamazeri haviza huge, nzampima hazenke’zama mege, 4 hazenke’a omne vahe kefo avu’ava huntege, agafa’a omne zante ha' vahe’ni’amofo feno rohumare’na erige’ma hu’nenuana geno’a, 5 zamatrege’za ha' vahe’nimo’za narotgo hu’za nazeri’za zamaga kanonu kugusopafi nahetrenage’na ra nagigura nagesa ontahi’na frineno. 6 Ra Anumzamoka krimpa hezmantenka otinka, ha' vahe’niaramina kasi vazizana eri zamaveri huo. Otinka zamarimpama ahenenantaza ha' vaheni’a fatgo kavukva hunka refko huzmantenka knazana zamio. 7 Atrege’za maka vahera emeri atru hu’za manigagisagenka, kagra manisga hunka mani’nenka kegava huzmanto. 8 Ra Anumzana maka vahe’ma refko nehia Anumzamo nagrira refko huno keana, nagra fatgo hu’noe. Fatgo navu’nava’ene knare navu’nava hugeno, hazenke zani’a omane’neanki, marerisa Anumzamoka nagrira refko hunanto. 9 Fatgo Anumzamoka kagra vahe’mofo antahintahine, tumo’enena negana Anumza mani’nananki, atregeno kefo zamavu’zmavama nehaza vahe’mokizmi kefo zamavu’zmava’mo’a vaganerena, fatgo avu’ava’ma nehaza vahera zamaza huge’za hankaveti’za maniho. 10 Marerifa Anumzana agra hankoni’agino, agra tumo’amo’ma fatgoma hu’nea vahera zamagu’nevazie. 11 Anumzamo’a fatgo huno keaga refko nehia Anumzankino, maka kna arimpa ahenezmante. 12 Hanki mago vahe’mo’ma agu’ama rukrahe osigeno’a, Anumzamo’a kazima’a kume neganeno, ati’a refagigino karina negreno retrotrara nehie. 13 Vahe’ma ahe fri ha' zama’a retro hunenteno, teve nefa’ane kevea’aramina retro hunente.

14 Kefo zamavu’zmava’zama nehaza vahe’mo’za kefo avu’ava zamo zamagu’afina avitege’za, a’nemo’za zamu’ene hazaza hu’za hazenke avu’ava zana zamu’ene hu’za krunagema hu’za kasenentaze. 15 Hagi iza’o vahe’moma taminogu’ma kerima kafintenimo’a, agra’a ana kerima kafintenia kerifi tamigahie. 16 Vahe’ma hazenkema hunte’nia hazenkemo’a rukrahe huno agri asenire ne-enigeno, vahe’ma azeri haviza hunaku retro’ma hania havizamo’a ete rukrahe huno agri kokovite egahie. 17 Fatgo avu’ava zama’agura Ra Anumzamofona susu hunente’na, muse zagame hu’na Ra Anumzana Marerifa Anumzamofona agia erisga hugahue.