2 Coríntios 5

Jisas kamo prisre, God bogl deno muduno swara yenaiglkwa

11 Ana no Krais kogonmo yoba munga i, okuo nono mudu Yaglno Kade gumamugl adigl moramgra we di prisre, no ye kuduglmo gogl, ye kamo yoba pre medraiglmedi di tomga. No kogon yegl ere wan moglsre, mabuno siragl mere ta erumga i, God gumuglo mina nogugl paugwa. Te, ene ama kanigwa. 12 Ka i mitna ene kinano sidre, no wakai kanaiglmedi ta prikrumga ba ene no kogono kandre, gun yenaiglmedi bunga. Ene gun yedre, yoba tau kagno ake mitna edigwa i, kano si kegl dinaiglkwa. Yoba i, ye yoba gumuglnomugl wakai kanaiglmedi ersre, deno muduno siragl mere paugwa i, pre yubun dekrikwa.

13 Ana no kogon erumnara i, yoba tau no du erimedi pribi, pra, God swara no wakai kanabedi prumga. Mo, yoba tau no nomano wakai paugo, kogon erimedi pribi, i ama wakai. No kogon erumga i, ene wakai moraiglmedi kogon ere munga. 14 Siragl pre Krais dem muduo podo norukwa i, no batno sugo, no ye kogonmo erumga. Te, no prumga i, ye swara nono mudu pre goglkwa pre nono mudu akie gunga mere yegl pamedi prumga. 15 Krais ye yoba mudu pre goglkwa i, yoba u kor pidre, kor moraiglkwa yobamo i, ye yene primere mogl pai erekre, Krais prumere mere mogl pai eraiglkwa pre goglkwa. Ye nono pre goglsre, adigl u kor ogwa pre nono kaima yegl eramga paugwa.

16 Ana mem yegl mere paugwa pre no erme yoba ogono nagino mina meda mabuno erikwa i kandre, ye kan yubu sikrumga. No okna yoba taragl meda erikwa i keme kamga igne, Krais ama yoba yoko ta moglmedi kamga ba no erme yegl mere ta kankrumga. 17 No erme kamga i, yoba deno muduno mina suna kandre, yoba ta Krais yugobunomo suna moglkwa i, ye u kor pi kodumedi kamga. Ye okna siragl mere moglkwa i dudugo, ye erme u kor pidre, kor kaima moglkwa.

18,19 Ana taragl mudu yegl mere God yene erukwa. God ere mogl, Krais kogon erumara i mina nono erme ye bogl deno muduno swara yomga. Na ka yegl diga i, God yoba bogl deno muduno swara yenaiglkwa i, God ere mogl, Krais kogon erabara swara i mina yoba mudu uglo koglo koglo meglkwa i, tadaglmeno kide kodo tenan, ye bogl deno muduno swara yenamnedi konbauna yauro togwa pre diga. Te, no ye kogonmo yoba munga i, God no ama kogon norsre, yoba siragl mere ye bogl deno muduno swara yenaiglkwa i, yoba di teo dugwa. 20 Ana God kogon yegl mere norukwa pre no Krais dra idre, ye kamo yoba di tomga. Te, no ye kamo yoba di tomga igne i God no drano mina yoba agle dugwa mere yegl paugwa. No Krais kamo yoba di tedre, ka gigledi di tomga i, Krais kogon erumara i pre ene u God bogl deno muduno swara yeo! dumga. 21 I siragl pre Krais ye tadaglme ta ere kankrukwa ba God yoba tadaglmeno mudu i pi ye moglmara edugo, Krais mudu topo erukwa. God yegl erukwa i, nono Krais kogon erumara i mina God ye du moglmere mere yegl, nono ama ye gumuglo mina yoba du moraiglmedi pre erukwa.